Gha Gu Emwa Ru Ọse Ne U Ghẹ Mieke Na Gha Rre Uwu Ohioro​—Vbene Baibol Gha Ya Sẹtin Ru Iyobọ Nuẹn

Vbe ukpo 2023, avbe ọbo ebo keghi bẹghe ẹre wẹẹ, emwa ni bun wa rre uwu ohioro, rhunmwuda ọni, te ọ khẹke na zẹ emwi ru vbobọvbobọ. Ọ mwẹ emwi nọ gha sẹtin ru iyobọ ne emwa ni rre uwu ohioro ra?

• Dr. Vivek Murthy, nọ re U.S. surgeon general keghi kha wẹẹ: “Adeghẹ ima na gha rre uwu ohioro, ma na vbe gha zẹ egbe hin usun rre, ọ sẹtin si emianmwẹ ye ima egbe, ma i khian vbe gha ghọghọ. Sokpan, emwi rrọọ ne ima gha sẹtin ru vbekpa ẹre.” De emwi ne ima gha sẹtin ru? Dr. Vivek Murthy ye vbe kha wẹẹ, “Ma sẹtin gha ru emwi nọ gha ya ima sikẹ avbe ọse ima sayọ vbe ẹdẹgbegbe.”a

Ẹ i re ọmwa zẹ egbe hin usun rre ọkpa, ẹre ohioro ya mu ọmwa. Ohioro sẹtin mu ọmwa, ọ gha khọnrẹn nọ gha rre uwu ẹbu emwa. Vbene ọ rhirhi gha ye hẹ, ọmwa ghaa rre uwu ohioro, e Baibol gha sẹtin ru iyobọ nẹẹn. Ibude ni bun rre Baibol nọ guan kaẹn emwi ne ima gha ru, ne ima mieke na gha sikẹ avbe ọse ima sayọ.

Ibude ni rre Baibol ni gha sẹtin ru iyobọ nuẹn

Gha gu emwa guan. Ọna rhie ma wẹẹ, ẹ i re ọghe enegbe ruẹ ọkpa ẹre u khian wa gha guan kaẹn, u ghi vbe gha rhie ehọ ne emwa ọvbehe ta yi. Zẹvbe ne u ya mu ọghe emwa ọvbehe roro, ọ ghi ya uwa gha sikẹ egbe sayọ.

• Emwi ne Baibol khare: “Wa ghẹ wa rẹn ọghe enegbe uwa ọkpa, sokpan, wa vbe gha mu ọghe emwa ọvbehe roro.”​—Filipai 2:4.

Hia ne u gha mwẹ ọse ni bun. Gha gu emwa ughughan ru ọse, ke ni diẹn ruẹ kevbe ne u diẹn rẹn, emwa ni ke ẹvbo ọvbehe rre, kevbe emwa ni ru emwi vbe odẹ nọ lughaẹn ne ọghuẹ.

• Emwi ne Baibol khare: “Wa vbe fannọ ekhọe uwa rua.”​—2 Kọrint 6:13.

U ghaa hoo ne u rẹn vbekpa vbene u khian ya sẹtin gu obọ emwa sayọ hẹ, ya tie uhunmwuta na, “Satisfying Our Hunger for Friendship.”