Vbọzẹ Ne Avbe Osẹe Jehova Na Ye Kporhu Ma Emwa Ni Ka Kha Wẹẹ Iran I Danmwehọ?

Ahoẹmwọmwa ne Avbe Osẹe Jehova mwẹ ne Osanobua kevbe ogieva iran, ẹre ọ gua iran kpa ya ya ẹmwẹ nọ rre Baibol kporhu ma emwa hia, uhiẹn ya sẹ egbe emwa ni ka kha wẹẹ, iran i danmwehọ. (Matiu 22:​37-39) Rhunmwuda ne ima na hoẹmwẹ Osanobua, ma keghi lele adia ne Ovbi ẹre rhie ne ima, nọ na wẹẹ ne ima “sẹ osẹ” ma emwa hia “ẹsẹsẹmwẹse.” (Iwinna 10:42; 1 Jọn 5:3) Ọna ẹre ọ si ẹre ne ima na kporhu ma emwa inugba nọ khin, zẹvbe ne avbe akhasẹ ọghe Osanobua nẹdẹ vbe gha ru ẹre. (Jerimaia 25:4) Rhunmwuda ne ima na hoẹmwẹ ogieva ima, ma keghi hia ne ima kporhu “iyẹn nọ maan ọghe Arriọba” Osanobua ma emwa hia, uhiẹn ya sẹ egbe emwa ni ka tama ima nẹ wẹẹ, iran i danmwehọ.​—Matiu 24:14.

Ugbẹnso, ma gha werriegbe ya kporhu vbe owa ne emwa ma na ka danmwehọ ima, ma ghi miẹn emwa ni gha danmwehọ. Gia zẹ iro yan emwi eha nọ si ẹre nọ na ye vberriọ:

• Emwa kpa hin ehe ne iran ka ye rre gha rrie ihe ọvbehe.

• Emwa ọvbehe sẹtin rhie ehọ ne ima ta yi, vbe owa ne ọmwa na ka tama ima wẹẹ, irẹn i danmwehọ.

• Emwa fi werriẹ. Emwi ughughan ni sunu vbe agbọn na, ra ọlọghọmwa ne emwa la gberra sẹtin do ya iran khian emwa “ni rẹnrẹn wẹẹ, te ọ khẹke ne iran rẹn Osanobua,” ẹghẹ nii, iran ghi do gha hoo ne iran họn iyẹn nọ maan nọ rre Baibol. (Matiu 5:3) Uhiẹn, emwa eso ni ka gbodan ghee ima sẹtin do fi ekhọe werriẹ, vbene ukọ ighẹ Pọl vbe ru ẹre.​—1 Timoti 1:13.

Vbe nọ rhirhi gha ye hẹ, ma i gbagba ikporhu ọghe ima ye ọmwa rhọkpa egbe. (1 Pita 3:15) Ma rẹnrẹn wẹẹ, dọmwadẹ ọghẹe mwẹ asẹ nọ khian ya zẹ ne egbe ẹre vbe ọ gha de ọghe ugamwẹ.​—Diuteronomi 30:​19, 20.