Vbọzẹ Ne Avbe Osẹe Jehova I Na Kpokpo Egbe Ye Ẹmwẹ Ohoghe Hia Ne Emwa Ta Lele Iran?
Avbe Osẹe Jehova keghi lele ibude nọ rre Baibol nọ khare wẹẹ, ẹ i re ẹmwẹ ohoghe hia ne emwa ta lele ima ẹre ọ khẹke ne ima gha kpokpo egbe yi. Vbe igiemwi, ebe Itan khare wẹẹ: “U gha tama ọmwa nọ khare ighẹ irẹn wa rẹn emwi hia wẹẹ, ọ ba emwi eso ku ru, ihẹn ẹre ọ khian tie nuẹn.” (Itan 9:7, 8; 26:4) Ne ima gha te ya gha kpokpo egbe ba ẹmwẹ ohoghe ne emwa ta lele ima, vbene ima gha ya sẹtin ya ẹko rhiẹnrhiẹn Osanobua hẹ, ẹre ima rhie aro tua.—Psalm 119:69.
Ọghe ne ẹmwata, “ẹghẹ rrọọ na ya hunwan, ẹghẹ vbe rrọọ na ya guan.” (Asan-Ibo 3:7) Emwa ni hoo ne iran do rẹn ẹmwata ẹre ima gualọ, ma i mwẹ ẹghẹ na ya gu emwa muan ẹmwẹ ye emwi nẹi mwẹ esa. Igiemwi ọghe Jesu kevbe Ivbi Otu e Kristi ni ghaa rrọọ nẹdẹ ẹre ima lele.
E Jesu ma zẹ ẹmwẹ wanniẹn emwa ni ba ẹre ifiẹzọ vbe odaro e Pailet. (Matiu 27:11-14; 1 Pita 2:21-23) Ọ ma vbe zẹ ẹmwẹ wanniẹn emwa ni ghaa tie ẹre ọmwa oregbe kevbe ọdayọn. Nọghayayerriọ, ọ na gi uyinmwẹ ọnrẹn gha guan nẹẹn. Uhiẹn, e Jesu khare wẹẹ: “deghẹ emwi esi ẹre ẹwaẹn gele khin, iwinna rẹn ẹre ọ khian rhie ẹre ma.” (Matiu 11:19) Sokpan, vbe ẹghẹ eso, e Jesu ghi bẹghe ẹre wẹẹ, esa rrọọ ne irẹn ya guan, ọ na ya udinmwẹ zẹ ẹmwẹ wanniẹn emwa ni ghaa ta ọtakhọ lele irẹn.—Matiu 15:1-3; Mak 3:22-30.
E Jesu keghi tama erhuanegbe ẹre ne iran ghẹ gi ifiẹzọ ne emwa ba iran re ya egbe wọọ iran. Ọ khare wẹẹ: “Oghọghọ nọ ne uwa, adeghẹ emwa na rhunmwuda mwẹ gha zaan uwa, iran na gha zẹ uwa kpokpo, iran na vbe gha ta ẹmwẹ dan lele uwa, vbene uwa ma na rẹn ọkpa rẹn eva.” (Matiu 5:11, 12) Ọrheyerriọ, deghẹ esa na gha rrọọ ne iran ya lekpa ifiẹzọ vberriọ sẹ osẹe, e Jesu na khama erhuanegbe ẹre wẹẹ: “I gha rhie ẹmwẹ ne uwa gha ta ye uwa unu, I ghi vbe rhie ẹwaẹn ne uwa, sẹrriọ wẹẹ, eghian uwa rhọkpa nọ gha sẹtin gu uwa muan ẹmwẹ, ra nọ gha sẹtin gbe uwa odan, ẹ i rrọọ.”—Luk 21:12-15.
Ukọ ighẹ e Pọl keghi rhie ibude ne Ivbi Otu e Kristi ne iran ghẹ gu emwa ni gbodan gha muan ẹmwẹ, ọ na gie imuanẹmwẹ vberriọ zẹvbe nẹi mwẹ ‘esa kevbe wẹẹ ihoi ẹre ehia khin.’—Taitọs 3:9; Rom 16:17, 18.
Uko ighẹ e Pita wa vbe rhie igiọdu ne Ivbi Otu e Kristi ne iran sinmwi oseghe ne emwi ne iran yayi deghẹ ẹkpotọ na kie ne iran ya ru vberriọ. (1 Pita 3:15) Ọrheyerriọ, ọ na gi iran rẹn wẹẹ, odẹ nọ ghi maan sẹ ne iran gha ya sẹtin ru ọna ọre lekpa uyinmwẹ iran, ẹ i wa re ẹmwẹ ne unu. Ọ khare wẹẹ: “Ẹghẹ nii, emwa ni kọn, ni talọ ẹmwẹ ogbe gha ghi bẹghe uyinmwẹ esi ọghe uwa, iran i ghi miẹn ẹmwẹ ta.”—1 Pita 2:12-15.