De Aro Ne Avbe Osẹe Jehova Ya Ghee Ebe Orọnmwẹ Na Sọ?
Ma keghi lele emwi ne Baibol tae vbekpa orọnmwẹ kevbe ebe orọnmwẹ na sọ. Emwamwa ọghe Osanobua ọre ne ọdọ vbe amwẹ rọnmwẹ egbe sẹ ota. E Baibol gi ima rẹn wẹẹ, emwi ọkpa nọ gha ya ọdọ vbe amwẹ sọ ebe orọnmwẹ ọre deghẹ ọkpa vbe uwu iran na fi owẹ ye oha.—Matiu 19:5, 6, 9.
Avbe Osẹe Jehova ru iyobọ ne ọdọ vbe amwẹ ni werriẹ aro daa ọlọghọmwa vbe orọnmwẹ ọghe iran ra?
Ẹẹn, odẹ ughughan ẹre iran ya ru ọna:
Avbe ebe kevbe vidio. Avbe ebe kevbe vidio ọghe ima, keghi ru iyobọ ne ọdọ vbe amwẹ ne iran ya sọfurre ye ọlọghọmwa ni rhiegbe ma vbe orọnmwẹ ọghe iran, uhiẹn deghẹ ọ na yevbe na miẹn wẹẹ, te orọnmwẹ nii khian ghi zagha. Vbe igiemwi, ya ghee avbe uhunmwuta na, “Maintaining Commitment in Your Marriage,” “How to Forgive,” kevbe “Rebuilding Trust in a Marriage.”
Iko. Ma keghi zẹ iro yan avbe ibude ni rre Baibol ni gha sẹtin ru iyobọ ne avbe ọdọ vbe amwẹ vbe iko ọghe ima, asikoko nekherhe, kevbe asikoko nọkhua.
Ediọn. Ediọn ni rre iko keghi ru iyobọ ne avbe ọdọ vbe amwẹ, iran ghi rhie ekhọe iran gha rrie emwi ni rre Baibol, vbe na ghee emwi nọ rre ebe Ẹfisọs 5:22-25.
Ediọn ni rre iko ẹre ọ kpasẹ yọ vbe Osẹe Jehova gha khian sọ ebe orọnmwẹ ra?
Ẹo. Uhiẹn, deghẹ a na we ne ediọn ru iyobọ ne ọdọ vbe amwẹ ni werriẹ aro daa ọlọghọmwa vbe orọnmwẹ ọghe iran, a ma rhie asẹ ne iran, ne iran ya tama ọdọ vbe amwẹ nii, emwi ne iran gha ru. (Galetia 6:5) Vbọrhirhighayehẹ, adeghẹ ọmwa na sọ ebe orọnmwẹ vbe odẹ nọ ma gua ilele ọghe Baibol ro, e Baibol ma kpasẹ yọ ne ọmwa nii werriegbe ya ru orọnmwẹ.—1 Timoti 3:1, 5, 12.
De aro ne Avbe Osẹe Jehova ya ghee ẹre, vbe ọdọ vbe amwẹ gha wannọ egbe?
E Baibol we ne ọdọ vbe amwẹ ghẹ wannọ egbe, ọ gha khọnrẹn ne emwi gha lọghọ. (1 Kọrint 7:10-16) Ọdọ vbe amwẹ gha sẹtin sọfurre ye ọlọghọmwa ni bun ni rhiegbe ma vbe orọnmwẹ ọghe iran, deghẹ iran na gha na erhunmwu, iran na gha lele ilele ni rre Baibol, iran na vbe gha rhie ẹre ma wẹẹ, iran hoẹmwẹ egbe.—1 Kọrint 13:4-8; Galetia 5:22.
Vbọrhirhighayehẹ, emwi eso sẹtin sunu, nọ gha ya Ivbi Otu e Kristi ni ru orọnmwẹ nẹ wannọ egbe. A gbẹnnẹ eso ladian ye ototọ mwa:
Ọdọ gha ya ekhọe obọ ọre kha wẹẹ, irẹn i khian kpemehe ne ẹgbẹe ọre.—1 Timoti 5:8.
Ugbemwẹ ọhanabe, ra obọ atosi na ya mu ọmwa na gba ru orọnmwẹ.—Psalm 11:5.
Deghẹ ọdọ ra amwẹ na gha kpokpo ogieva ẹre, sẹrriọ wẹẹ, ọ gha sẹtin yae sẹ e Jehova rae. Vbe igiemwi, ọdọ ra amwẹ sẹtin gha kpikpi ogieva ẹre nọ re Osẹe Jehova nọ rra uhi Osanobua. Ogieva ẹre nii sẹtin zẹ ọre vbe iro wẹẹ, deghẹ iran na wannọ egbe, ẹre irẹn khian na sẹtin rhie ẹre ma wẹẹ, Osanobua ẹre irẹn “gha họn ẹmwẹ na ẹ i re emwa nagbọn.”—Iwinna 5:29.