De Emwi Ne Baibol Tae Vbekpa Odekun Ẹrhia?
Ewanniẹn ne Baibol rhie ye inọta na
Ẹ i re Osanobua ẹre ọ si odekun ẹrhia ni sunu vbe ẹdẹnẹrẹ, sokpan, ọ wa dae wẹẹ, emwa wa rri oya rhunmwuda odekun ẹrhia ni sunu. Odekun ẹrhia rre usun emwi ni ya emwa nagbọn rri oya ne Osanobua khian wabọ re rua. Vbene ọ ghi te sẹ ẹghẹ nii, Osanobua keghi rhie ifuẹko ne emwa ni rri oya rhunmwuda odekun ẹrhia.—2 Kọrint 1:3.
Vbọ ya ima rẹn wẹẹ ẹ i re Osanobua ẹre ọ ya odekun ẹrhia rri ima oya?
Te avbe odekun ẹrhia ni sunu rhie ẹre ma wẹẹ ẹghẹ okiekie ma ye ra?
De vbene Osanobua ya ru iyobọ ne emwa ne odekun ẹrhia sunu daa?
E Baibol gha sẹtin ru iyobọ ne ima ya mu egbe yotọ khẹ odekun ẹrhia ra?
Avbe ako ọghe evbagbẹn nọhuanrẹn ni gha rhie ifuẹko ne emwa ne odekun ẹrhia sunu daa
Vbọ ya ima rẹn wẹẹ ẹ i re Osanobua ẹre ọ ya odekun ẹrhia rri ima oya?
Ẹghẹ eso ghaa rrọọ ne Jehova ya loo emwi nọ yi ya rri emwa dan oya vbe ẹghẹ nọ gberra, sokpan ọna lughaẹn ne odekun ẹrhia ni sunu.
Ke emwa esi ke emwa dan ẹre ọ rri oya rhunmwuda odekun ẹrhia. Sokpan, e Baibol gi ima rẹn wẹẹ, emwa dan ọkpa ẹre Jehova loo emwi nọ yi ya rri ẹre oya vbe ẹghẹ nọ gberra. Vbe igiemwi, vbe ẹghẹ ne Osanobua ya guọghọ agbẹnvbo ọghe Sọdọm kevbe Gomorra, ọ na miẹn Lọt ne ọmwa esi fan kevbe ivbi ẹre nikhuo eva. (Gẹnẹsis 19:29, 30) Osanobua keghi ghee emwi nọ ghaa rre ekhọe emwa ni ghaa rrọọ vbe ẹghẹ nii, emwa ni ghaa ru emwi dan ọkpa, ẹre ọ fuẹn rua.—Gẹnẹsis 18:23-32; 1 Samuẹl 16:7.
Ugbẹnso emwa i rẹn wẹẹ odekun ẹrhia khian sunu. Sokpan, vbene Osanobua te loo emwi nọ yi ya rri emwa dan oya, te ọ ka ya obọ sekhae ne iran nẹ. Ẹkpotọ keghi kie ne ọmwaikọmwa nọ fi werriẹ ya miẹn fan.—Gẹnẹsis 7:1-5; Matiu 24:38, 39.
Emwa nagbọn vbe ya obọ iran si odekun ẹrhia eso. Odẹ vbo? Iran keghi mu emwi ughughan ni rre uhunmwu otagbọn na rhia, erriọ iran vbe ya bọ owa ye eke ne igbohiotọ gha na sẹtin sunu, kevbe eke ne amẹ, ra emwi ọvbehe gha na sẹtin mu emwi nibun rhia. (Arhie maan 11:18) Ma i khian sẹtin kha wẹẹ, Osanobua ẹre ọ si ẹre ne emwa nagbọn na yin vbenian.—Itan 19:3.
Te avbe odekun ẹrhia ni sunu rhie ẹre ma wẹẹ ẹghẹ okiekie ma ye ra?
Ẹn, e Baibol gi ima rẹn wẹẹ, odekun ẹrhia gha sunu vbe “ẹghẹ ufomwẹ agbọn,” ra “vbe ẹdẹ okiekie.” (Matiu 24:3; 2 Timoti 3:1) Vbe igiemwi, vbe Jesu ghi guan kaẹn ẹghẹ ọghe ima na, ọ na wẹẹ: “ukhunmwu ghi gha fi, igbohiotọ ghi vbe gha sunu vbe ehe ughughan.” (Matiu 24:7) Vbe nẹi khian ghi kpẹẹ gbe, emwi ke emwi nọ si obalọ kevbe ọlọghọmwa ye ima egbe, Osanobua gha rhie ẹre hin uhunmwu otagbọn na rre, uhiẹn ya se egbe odekun ẹrhia.—Arhie Maan 21:3, 4.
De vbene Osanobua ya ru iyobọ ne emwa ne odekun ẹrhia sunu daa?
Osanobua keghi loo Ẹmwẹ ọnrẹn nọ re Baibol ya rhie ifuẹko ne emwa ni rri oya rhunmwuda odekun ẹrhia nọ sunu. E Baibol gi ima rẹn wẹẹ, Osanobua mwẹ ẹmwẹ ima vbe orhiọn kevbe wẹẹ, ọ wa dae vbe ima ghaa rri oya. (Aizaia 63:9; 1 Pita 5:6, 7) E Baibol vbe tama ima wẹẹ, Osanobua yan rẹn nẹ wẹẹ, ẹghẹ dee ne odekun ẹrhia i khian ghi ya gha sunu.—Ya ghee “Avbe ako ọghe evbagbẹn nọhuanrẹn ni gha rhie ifuẹko ne emwa ne odekun ẹrhia sunu daa.”
Osanobua keghi loo eguọmwadia ọghẹe ya ru iyobọ ne emwa ne odekun erhia sunu daa. Osanobua keghi ru iyobọ ne eguọmwadia ọghẹe ni rre uhunmwu otagbọn na, ne iran mieke na sẹtin gha ya egbe tae Jesu. E Baibol keghi tae yotọ wẹẹ, te Jesu khian gha rhie ifuẹko ne emwa ne “orhiọn iran ma sotọ” kevbe “ni khiẹ.” (Aizaia 61:1, 2) Emwa ni ga Osanobua vbe ẹdẹnẹrẹ wa vbe hia ne iran gha ru vberriọ.—Jọn 13:15.
Osanobua wa vbe loo eguọmwadia ọghẹe ya ru iyobọ nọ khẹke ne emwa ni rri oya rhunmwuda odekun ẹrhia nọ sunu.—Iwinna 11:28-30; Galetia 6:10.
Avbe Osẹe Jehova gha ru iyobọ ne emwa ne okpe ẹhoho mu owa iran rhia vbe Puerto Rico
E Baibol gha sẹtin ru iyobọ ne ima ya mu egbe yotọ khẹ odekun ẹrhia ra?
Ẹn. Agharhemiẹn wẹẹ, e Baibol i re ebe na gbẹn na ya mu ima egbe yotọ khẹ odekun ẹrhia, ilele ni rrọọ gha wa sẹtin ru iyobọ ne ima. Vbe igiemwi:
Mu egbe yotọ khẹ odekun ẹrhia nọ gha sẹtin sunu. E Baibol khare wẹẹ, “Ọmwa nọ mwẹ ẹwaẹn gha miẹn wẹẹ orueghe dee, ọ ghi rhie uhunmwu ẹnrẹn lẹre.” (Itan 22:3) Emwi ẹwaẹn nọ deghẹ ima na mwamwa emwi ne ima khian ru, a i rẹn deghẹ odekun ẹrhia na sunu. Vbe igiemwi, ma sẹtin mwamwa emwi ima ye ẹkpo ọkpa ne ima gha sẹtin rherhe gua rhie deghẹ emwi na sunu. Uwẹ vbe ẹgbẹe ruẹ sẹtin vbe tae yotọ eke ne uwa khian na vba egbe deghẹ odekun ẹrhia na sunu.
Arrọọ ruẹ ẹre ọ khẹke nọ ru kpataki nuẹn sẹ emwi ewe ne u mwẹ. E Baibol khare wẹẹ: “Ma ma rhie emwi rhọkpa rrie agbọn na, amaiwẹ te ima khian rhie emwi rhọkpa kẹ ladian.” (1 Timoti 6:7, 8) Te ọ khẹke ne ima muegbe ne ima khian ya sẹ owa ima kevbe emwi ewe ne ima mwẹ rae, ne ima mieke na miẹn uhunmwu vbe odekun ẹrhia gha sunu. Gi ima gha yerre wẹẹ, arrọọ ọghe ima ru ekpataki sẹ emwi ewe nọ rhirhi gha khin.—Matiu 6:25.