Tuesday, July 22
Gi ima vbe gha ghọghọ vbe ima ghaa rre ọlọghọmwa.—Rom 5:3.
Ọ khẹke ne Ovbi Otu e Kristi ya aro yọ wẹẹ, irẹn gha werriẹ aro daa edanmwẹ. Gi ima guan kaẹn igiemwi ọghe ukọ ighẹ Pọl. Ọ keghi tama etẹn ni rre Tẹsalonaika wẹẹ: “Vbe ẹghẹ ne ima na gha rre ehe ne uwa ye, ma na gha tama uwa yotọ wẹẹ, ma gha ya egbe miẹn ọlọghọmwa; . . . ọni ẹre ọ wa re emwi nọ sunu zẹẹ.” (1 Tẹs 3:4) Ọ na vbe gbẹn gie etẹn ni rre Kọrint wẹẹ: “Ma hoo ne uwa rẹn vbekpa ọlọghọmwa ne ima ya egbe miẹn . . . ma ma ghi te yayi wẹẹ ima gha miẹn uhunmwu vbọ.” (2 Kọr 1:8; 11:23-27) Ọ khẹke ne Ivbi Otu e Kristi ni rrọọ vbe ẹdẹnẹrẹ vbe ya aro yọ wẹẹ, iran gha miẹn ọlọghọmwa eso. (2 Tim 3:12) Rhunmwuda ne u na re ọrhuanegbe Jesu, avbe ọse ruẹ kevbe emwa ruẹ vbe uwu ẹgbẹe sẹtin gha zaan ruẹ. Emwa ne uwa gba winna zẹ ruẹ kpokpo vbe iwinna, rhunmwuda ne u na hoo ne u gha ta ẹmwata vbe emwi hia ra? (Hib 13:18) Arriọba zẹ ruẹ kpokpo ra rhunmwuda ne u na tama emwa ọvbehe vbekpa emwi ne u yayi? Vbọrhirhighayehẹ, e Pọl gi ima rẹn wẹẹ ọ khẹke ne ima gha sọyẹnmwẹ, ọ gha khọnrẹn wẹẹ ima werriẹ aro daa ọlọghọmwa. w23.12 10-11 ¶9-10
Wednesday, July 23
Wa si mwẹ fi uwu ẹmwẹ nẹ.—Gẹn 34:30.
E Jekọb wa miẹn ọlọghọmwa nibun. Ivbi e Jekọb eva na tie ẹre Simiọn kevbe Livai, keghi ya yin uyinmwẹ nọ rhie ozan gie ẹgbẹe iran kevbe Jehova. Deba ọni, ọvbokhan e Jekọb nọ wa kakabọ hoẹmwẹ ọnrẹn na tie ẹre Rekiẹl keghi wu, vbe ọ biẹ ovbi ẹre ne ukpogieva. Rhunmwuda ukhunmwu nọ ghaa fi, e Jekọb na ya egbe ọmaẹn gha rrie Igipt. (Gẹn 35:16-19; 37:28; 45:9-11, 28) E Jekọb wa gele miẹn emwi vbe agbọn, sokpan, ọ ma sẹ e Jehova rae, ọ rẹnrẹn wẹẹ, e Jehova gha mu eyan rẹn sẹ. E Jehova tobọre ma vbe ya ekhue mu e Jekọb. Vbe igiemwi, te Jehova wa ya ẹfe we Jekọb. Ẹ i mwẹ e Jekọb ma rho e Jehova vbe ọ ghi bẹghe ovbi ẹre ighẹ e Josẹf ne irẹn te gha roro ẹre wẹẹ, ọ wu nẹ! Ne Jekọb na kakabọ sikẹ e Jehova, ẹre ọ ru iyobọ nẹẹn ya sẹtin zin egbe avbe ọlọghọmwa nọ miẹn. (Gẹn 30:43; 32:9, 10; 46:28-30) Ma gha gele gu obọ e Jehova, ma gha vbe sẹtin zin egbe ọlọghọmwa nọ rhirhi de rre. w23.04 15 ¶6-7
Thursday, July 24
E Jehova ọre ọsuohuan mwẹ. I i khian gha rre ivbabọ.—Psm 23:1.
Ebe Psalm 23 keghi re ihuan ne ọsian ya rhie ẹre ma, ilẹkẹtin ne irẹn mwẹ we Jehova hoẹmwẹ irẹn kevbe wẹẹ, ọ gbaroghe irẹn. E Devid nọ gbẹn ihuan na, keghi gi ima rẹn vbene irẹn vbe Jehova ne Ọsuohuan ọghe irẹn sikẹ egbe sẹ hẹ. Orhiọn Devid keghi sotọ rhunmwuda nọ na kue ne Jehova gha dia irẹn, ọ na wa ya ekhọe hia mu ẹtin yan Jehova. E Devid wa rẹn wẹẹ, ẹghẹ ọkpa i rrọọ ne Jehova i khian ya hoẹmwẹ irẹn. De emwi nọ yae gha mwẹ ilẹkẹtin vbenian? E Devid wa bẹghe ẹre wẹẹ, e Jehova gbaroghe irẹn, rhunmwuda te Jehova wa gha kpemehe emwi hia nọ gualọ. E Devid wa gha sọyẹnmwẹ rhunmwuda nọ na gha re ọsie Jehova, kevbe rhunmwuda ne Jehova na miẹn ọnrẹn yi. Ọni ẹre ọ si ẹre nọ na gha mwẹ ilẹkẹtin wẹẹ, e Jehova gha ye gha kpemehe emwi hia ne irẹn gualọ. Rhunmwuda ne Devid na gha mwẹ ilẹkẹtin wẹẹ, e Jehova hoẹmwẹ irẹn kevbe wẹẹ, ọ gha gbaroghe irẹn, emwi nọ mwẹ keghi sẹ ọre okẹn, ọ ma vbe gha si osi ye emwi rhọkpa.—Psm 16:11. w24.01 29 ¶12-13