IRUẸMWI 56
Gha Ru Emwi Nọ Gha Ya Iko Gha Mwẹ Akugbe
Ma ghaa rre uwu ẹbu etẹn, ẹko keghi sẹ ima ọyẹnmwẹ, zẹvbe nọ ghaa ye ne Ọba e Devid nọ na kha wẹẹ: ‘U miẹn vbene ọ maan hẹ kevbe vbene ọ rhiẹnrhiẹn hẹ, ne emwa Osanobua gha rrọọ vbe ọfunmwegbe!’ (Psalm 133:1) Akugbe ne ima mwẹ i re ọghe udomwurri. Te ima hia ku obọ gbe, ne akugbe gha rre iko.
1. De emwi ọyunnuan nọ rhie egbe ma vbe uwu ẹbu emwa Osanobua?
U gha yo iko ọghomwa vbe otọ ẹvbo ọvbehe, a sẹtin miẹn wẹẹ u ma họn urhuẹvbo ne iran zẹ vba, sokpan orhiọn ruẹ ghi ye sotọ. Vbọzẹ? Rhunmwuda, emwi ọkpa ẹre ima ruẹ vbe Baibol vbe otagbọn hia. Ma vbe hia ne ima gha hoẹmwẹ egbe. Vbe ehe ne ima rhirhi gha ye, ma hia keghi ‘tu tie eni e Jehova, ne ima mieke na gha gae vbe uwu akugbe.’—Zẹfanaia 3:9, NW.
2. De emwi ne u gha ru ne akugbe gha rre uwu ẹbu emwa Osanobua?
“Wa gha ya ekhọe uwa hia hoẹmwẹ egbe uwa ẹsẹse.” (1 Pita 1:22) Vbua khian ya sẹtin gha lele adia na hẹ? Ghẹ gha rhie aro tua abakuru ọghe emwa ọvbehe; gha rhie aro tua eke ne iran na hia. Gha gu etẹn ughughan mu obọ; ẹi wa re etẹn eso ẹre u khian gha gu mu obọ, rhunmwuda ne emwi nọ yẹẹ ruẹ na vbe yẹẹ iran. Ọ khẹke ne ima hia ne ima ghẹ gha ya aro gbe ọmwa rhọkpa re hiehie.—Tie 1 Pita 2:17.a
3. De emwi ne u gha ru vbe uwẹ vbe ọtẹn ghaa mwẹ egbe ẹzọ?
Ma wa mwẹ akugbe, sokpan emwa ni ma gba, ẹre ima khin. Ugbẹnso, ma ru emwi nọ sọnnọ egbe. Ọna ẹre ọ zẹe ne Baibol na wẹẹ ne ima “gha ya ekhọe hia yabọ egbe,” ọ na vbe kha wẹẹ: “Wa gha ya ekhọe hia yabọ egbe zẹvbe ne Jehova vbe ya ekhọe hia yabọ uwa.” (Tie Kọlose 3:13, NW.) Ẹi re avbiẹ inugba, ẹre ima ru emwi nọ sọnnọ e Jehova, ọrheyerriọ, te ọ ye yabọ ima. Ọna ẹre ọ zẹe nọ na hoo ne ima vbe gha yabọ etẹn ima. U gha rẹn wẹẹ u ru emwi nọ sọnnọ ọmwa ọvbehe, zẹ owẹ nokaro ya ru adọlọ.—Tie Matiu 5:23, 24.b
GUALỌ OTỌ RE SAYỌ
Gia ziro yan emwi eso ne u gha ru, nọ gha ya akugbe kevbe ọfunmwegbe gha rre uwu iko.
De emwi ne u gha ru, ne ọfunmwegbe mieke na gha rrọọ?
4. Ghẹ gha ya aro gbe emwa ọvbehe re
Ma rẹnrẹn wẹẹ te ọ khẹke ne ima hoẹmwẹ etẹn hia ne ima gba ga. Sokpan ọ keghi lọghọ vbe ugbẹnso, ne ima hoẹmwẹ ọtẹn ne ima roro ẹre wẹẹ, ọ lughaẹn ne ima. De emwi nọ gha ru iyobọ ne ima? Tie Iwinna 10:34, 35, iyeke ọni, uwa ghi ziro yan avbe inọta na:
Emwa ughughan ẹre Jehova miẹn yi zẹvbe eguọmwadia re. Nọnaghiyerriọ, de aro nọ khẹke ne uwẹ ya gha ghee emwa ni lughaẹn nuẹn?
De odẹ eso ne emwa ya ya aro gbe emwa re vbe ẹdogbo ne u ye? Vbọzẹ nọ ma na khẹke ne u gha mwẹ obọ vbọ?
Tie 2 Kọrinti 6:11-13, iyeke ọni, uwa ghi ziro yan inọta na:
De emwi ne uwẹ yayi wẹẹ, ọ gha sẹtin ru iyobọ nuẹn ya guobọ etẹn ughughan?
5. Ya ekhọe hia gha yabọ ne u vbe gha gualọ ọfunmwegbe
E Jehova keghi ya ekhọe hia yabọ ima, agharhemiẹn wẹẹ, ẹghẹ ọkpa i rrọọ nọ khian ya do nọ ayabọ vbe obọ ima. Tie Psalm 86:5, NW, iyeke ọni, uwa ghi ziro yan avbe inọta na:
De emwi ne ako na maa ruẹ re vbekpa odẹ ne Jehova ya ya orukhọ bọ?
Vbọzẹ ne uwẹ na gbọyẹmwẹ ye odẹ ne Jehova ya ya orukhọ bọ?
De emwi eso nọ gha sẹtin yae gha lọghọ, ne ima gha gu emwa ọvbehe rrọọ vbe ọfunmwegbe?
Vbe ima khian ya sẹtin ya egbe taa e Jehova hẹ, ne ima mieke na gha gu etẹn ima rrọọ vbe ọfunmwegbe? Tie Itan 19:11, iyeke ọni, uwa ghi ziro yan inọta na:
Ọmwa gha ru emwi nọ sọnnọ ruẹ, de emwi ne u gha ru, ne ọfunmwegbe mieke na ye gha rre uwu ẹkpo uwa?
Ugbẹnso, ma vbe ru emwi nọ sọnnọ emwa ọvbehe. Ọ gha sunu vberriọ, vbọ khẹke ne ima ru? Kpee VIDIO na, iyeke ọni, uwa ghi ziro yan inọta nọ lelẹe.
Vbe vidio na, de vbene ọtẹn nokhuo na ya ru adọlọ hẹ?
6. Gha rhie aro tua uyinmwẹ esi ọghe etẹn ne uwa gba ga
Zẹvbe ne ima ya sikẹ etẹn ne ima gba ga, ma ghi do gha bẹghe ako ne iran na hia kevbe ako ne iran na vburriẹ. Vbọ khian ru iyobọ ne ima ya gha rhie aro tua ako ne iran na hia? Kpee VIDIO na, iyeke ọni, uwa ghi ziro yan inọta nọ lelẹe.
De emwi nọ gha ru iyobọ nuẹn ya gha bẹghe uyinmwẹ esi ọghe etẹn ne uwa gba ga?
Uyinmwẹ esi ne ima mwẹ, ẹre Jehova rhie aro tua. Tie 2 Krọnikol 16:9a, iyeke ọni, uwa ghi ziro yan inọta na:
Vbọ ye ruẹ hẹ vbe ekhọe, ne u na ghi rẹn nia wẹẹ, uyinmwẹ esi ne u mwẹ, ẹre Jehova rhie aro tua?
Agharhemiẹn wẹẹ, e daiamọnd nọ mose ye mwẹ ako nọ kẹ ọre yi, emwi ighobioye ye nọ. Erriọ vbe ye, emwa ni ma gba, ẹre etẹn ima khin, ọrheyerriọ, aro nọ ghaan ẹre Jehova ya ghee iran
EMWA ESO KEGHI KHA WẸẸ: “Vbe ẹi re te ọmwa do rinmwian mwẹ nẹ, I i yabọe.”
Vbọzẹ nọ na khẹke ne ima mu egbe vbe ẹghẹ hia, ne ima ya yabọ emwa ọvbehe?
OLIKA ẸMWẸ
U ghaa yabọ, u na vbe gha rhie ẹre ma wẹẹ, u hoẹmwẹ etẹn hia ne uwa gba ga, akugbe ghi gha rre uwu iko.
Ogbewerriẹ
De emwi nọ gha ru iyobọ nuẹn, ne u ghẹ gha ya aro gbe emwa ọvbehe re?
De emwi ne u gha ru vbe uwẹ vbe ọtẹn ghaa mwẹ egbe ẹzọ?
Vbọzẹ ne uwẹ na hoo ne u ya egbe taa e Jehova, vbe odẹ nọ ya yabọ?
RUẸ SAYỌ
Ghee vbene ọkpa vbe erre ne Jesu zẹ, gha ya sẹtin ru iyobọ ne ima hẹ, ne ima ghẹ gha bu ohiẹn emwa ọvbehe.
Ọ khẹke ne ima rinmwian ọmwa nọ mu ohu ima ra, uhiẹn deghẹ ima roro ẹre wẹẹ, ima ma ru emwi nọ sọnnọ ọnrẹn ra?
“Irinmwian Keghi Re Odẹ Na Ya Gualọ Ọfunmwegbe” (The Watchtower, November 1, 2002)
Ghee emwi nọ ru iyobọ ne emwa eso ya sẹtin gha ya obọ esi mu emwa hia.
Ghee emwi eso ne u gha ru, vbe uwẹ vbe ọtẹn ghaa mwẹ egbe ẹzọ, ne ẹzọ nii ghẹ do si ighaegbe ye uwu iko.