Ma Gha Miẹn Ere Vbọ Adeghẹ Ima Na Gha Gu Etẹn Ima Ru Ọse!

1-2. De emwi nọ wa ru ekpataki vbe aro e Jehova, kevbe wẹẹ, de emwi nọ hoo ne ima ru?

OBỌ ne ima ya mu emwa ọvbehe wa kakabọ ru ekpataki vbe aro e Jehova. Jesu ma ima re wẹẹ, te ọ khẹke ne ima hoẹmwẹ ogieva ima zẹvbe ne ima hoẹmwẹ egbe ima. (Mat 22:​37-39) Ọni rhie ma wẹẹ, ma ghi gha ya obọ nọ maan mu emwa hia, ọ gha khọnrẹn wẹẹ, iran i ga e Jehova. Ma gha ru vberriọ, te ima ya egbe taa e Jehova ne Osa nọ “gi ovẹn ọnrẹn yunmwu yan emwa dan kevbe emwa esi, ọ vbe gi amẹ rhọọ yan emwa ni ru emwi esi kevbe ni ru emwi dan.”​—Mat 5:45.

² Agharhemiẹn wẹẹ, e Jehova hoẹmwẹ emwa nagbọn hia, ẹmwẹ emwa ni ru emwi esi ẹre ọ yẹẹ ọre sẹ. (Jọn 14:21) Ọ hoo ne ima ya egbe taa ẹre. Ọ rhie igiọdu ne ima, ne ima “ya ekhọe hia hoẹmwẹ” etẹn ima nikpia kevbe etẹn ima nikhuo, ne ima vbe gha mwẹ “ẹnina” daa iran. (1 Pit 4:8; Rom 12:10) Egbe ahoẹmwọmwa kevbe ẹnina na guan kaẹn mwa, ọre ne ima mwẹ dae ọmwa ima vbe uwu ẹgbẹe ra ọse ima ne kankankan.

3. Vbọ khẹke ne ima yerre vbekpa ahoẹmwọmwa?

³ Te ahoẹmwọmwa yevbe emwiokọ na kọ ye ọkpẹn owa, te a gha gbaroghe ẹre nọ mieke na waan. Ukọ ighẹ e Pọl keghi rhie ibude ne Ivbi Otu e Kristi wẹẹ: “Wa ye gha hoẹmwẹ egbe zẹvbe etẹn.” (Hib 13:1) E Jehova hoo ne ima gha hia ne ahoẹmwọmwa ne ima mwẹ ne egbe gha wegbe sayọ. Vbe ako iruẹmwi na, ma gha guan kaẹn evbọzẹe nọ na khẹke ne ima gu etẹn ima ru ọse kevbe emwi ne ima gha ru ne ima mieke na ye gha sikẹ iran sayọ.

EVBỌZẸE NỌ NA KHẸKE NE IMA GHA SIKẸ ETẸN IMA SAYỌ

4. Zẹvbe nọ rre ebe Psalm 133:​1, vbọ khian ru iyobọ ne ima, ya gha ya aro nọ ghaan ghee akugbe ne ima sọyẹnmwẹ ọnrẹn vbe otu e Jehova? (Vbe ya ghee efoto.)

⁴ Tie Psalm 133:1. Ma wa kue ye ẹmwẹ ne ọsian ọkpa tae, vbe ọ khare wẹẹ, “U miẹn vbene ọ maan hẹ” kevbe vbene ọ “rhiẹnrhiẹn hẹ” na gha gu emwa ni hoẹmwẹ e Jehova ru ọse. Adeghẹ ọmwa na gha miẹn erhan ne mose mose vbe ẹghẹ hia, ọ sẹtin do gha rhie aro gberra ẹre, erriọ ẹre ọ vbe ye, adeghẹ ima ma na begbe, a sẹtin do miẹn wẹẹ, ma i ghi gbọyẹmwẹ ya akugbe ne ima sọyẹnmwẹ ọnrẹn vbe uwu iko. Ẹghẹ hia ẹre ima ya miẹn etẹn ne ima gba ga, ugbẹnso ma sẹtin miẹn iran inugba nọ khin vbe uzọla. Vbọ khian ru iyobọ ne ima, ne ima ye gha ya aro nọ ghaan ghee iran? Ma ghaa muẹn roro vbe ẹghẹ hia, iyobọ ne dọmwadẹ etẹn ye vbe uwu iko, kevbe ne iran vbe ye ne ima, ọ ghi ya ahoẹmwọmwa ne ima mwẹ ne iran gha wegbe yọ.

5. Ma ghaa rhie ẹre ma wẹẹ, ima hoẹmwẹ egbe, vbọ khian ya ru iyobọ ne emwa ọvbehe hẹ?

⁵ Ọ wa mobọ yẹẹ emwa nibun ni rrie iko ọghe ima vbe ẹghẹ okaro vbe iran gha bẹghe vbene ima ya hoẹmwẹ egbe. Ọna ọkpa sẹtin wa ya iran rẹn wẹẹ, iran miẹn odẹ ẹmwata nẹ. Jesu khare wẹẹ: “Adeghẹ uwa na hoẹmwẹ egbe, ẹre emwa hia khian na rẹn wẹẹ, erhuanegbe mwẹ ẹre uwa khin.” (Jọn 13:35) Gi ima guan kaẹn ọmọ okhuo ọkpa na tie ẹre Chaithra, nọ ghaa rre owebe nọ yo, Avbe Osẹe Jehova kegha gu ẹre ruẹ e Baibol. Iran keghi tie ẹre gha die asikoko nọkhua. A ghi zobọ vbe ẹdẹ nokaro ọghe asikoko nii, ọ na tama ọmwa nọ gu ẹre ruẹ e Baibol wẹẹ: “Evbibiẹ mwẹ ma he mu mwẹ dede ẹdẹ. Sokpan ẹrẹna, vbe asikoko ọghe uwa, igba 52 ẹre emwa mu mwẹ dede! Te Jehova wa loo ẹgbẹe ọghẹe ya rhie ẹre ma wẹẹ, irẹn hoẹmwẹ mwẹ. I hoo ne I gha re ọkpa vbe ẹgbẹe na.” E Chaithra na ye gha ruẹ e Baibol, ọ na vbe ru afiwerriẹ eso vbe ẹdagbọn ọnrẹn, ọ na ghi do dinmwiamẹ vbe ukpo 2024. Ọghe ne ẹmwata, emwa ọgbọn ghaa bẹghe iwinna esiesi ọghe ima, kevbe odẹ ne ima ya hoẹmwẹ egbe, ọ ghi gu iran kpa ya do ga e Jehova.​—Mat 5:16.

6. Ma ghaa gu etẹn ima ru ọse, vbọ khian ya gbogba ga ima hẹ?

⁶ Adeghẹ ima na gha gu etẹn ru ọse, ọ gha sẹtin gbogba ga ima. Ukọ ighẹ e Pọl keghi rhie igiọdu ne Ivbi Otu e Kristi wẹẹ: “Wa ye gha rhie igiọdu ne egbe vbe ẹdẹgbegbe . . . ne erẹrẹ nọ lele orukhọ khian ghẹ do ya uwa khian ne ekhọe ọre wegbe.” (Hib 3:13) Deghẹ iro na ghi han ima sẹrriọ wẹẹ, te ima ghi si ghee iyeke vbe odẹ ọghe orhiọn, e Jehova sẹtin loo ọtẹn ne ima gba ga nọ rhie aro sotọ vbe egbe ima, ya ru iyobọ nọ khẹke ne ima. (Psm 73:​2, 17, 23) Egbe iyobọ vbenian ẹre ima wa gualọ zẹẹ.

7. De vbene ahoẹmwọmwa kevbe akugbe ya rhilo ginna egbe hẹ? (Kọlọsi 3:​13, 14)

⁷ Ẹgbẹe nọ hoẹmwẹ egbe ẹre ima ye, rhunmwuda ọni, ma wa miẹn afiangbe ni bun. (1 Jọn 4:11) Vbe igiemwi, ahoẹmwọmwa ẹre ọ gu ima kpa ya “mu emwi ne emwa ọvbehe ru wuo egbe,” ọna keghi ya ima mwẹ akugbe. (Tie Kọlọsi 3:​13, 14; Ẹfis 4:​2-6) Rhunmwuda ọni, ma gha yo iko ma keghi wa sọyẹnmwẹ akugbe, egbe nai miẹn egbọre vbe uhunmwu otagbọn na.

WA GHA RHIE ỌGHỌ NE EGBE

8. De vbene Jehova ya ru iyobọ ne ima hẹ ne ima ya gha mwẹ akugbe?

⁸ Akugbe ne ima mwẹ vbe uhunmwu otagbọn hia keghi re emwi ọyunnuan. E Jehova ẹre ọ zẹẹ ighẹ ima mwẹ akugbe agharhemiẹn wẹẹ, emwa ni ma gba ẹre ima khin. (1 Kọr 12:25) E Baibol khare wẹẹ, “Osanobua tobọre ma uwa ẹre nẹ, vbene uwa khian ya gha hoẹmwẹ egbe hẹ.” (1 Tẹs 4:9) Emwi ne ọna rhie ma ọre wẹẹ, e Jehova keghi loo ebe nọhuanrẹn ya ma ima emwi nọ khẹke ne ima ru, ne ima mieke na sẹtin sikẹ egbe sayọ. ‘Osanobua tobọre gha sẹtin ma ima emwi’ adeghẹ ima na gha tie ẹmwẹ ọnrẹn, ma na vbe gha yae ru emwi. (Hib 4:12; Jems 1:25) Ọna ẹre Avbe Osẹe Jehova wa hia ne iran ru.

9. Vbe ima miẹn ruẹ vbe ebe Rom 12:​9-13 vbe nọ dekaẹn na gha mu ọghọ ye emwa ọvbehe egbe?

⁹ De vbene Ẹmwẹ Osanobua ya ya ima sikẹ egbe hẹ? Gi ima ghee vbene Pọl ya guan kaẹn ẹmwẹ na hẹ, zẹvbe nọ rre ebe Rom 12:​9-13. (Tie ẹre.) Ẹmwẹ nọ tae na wa kakabọ ru ekpataki, ọ khare wẹẹ, “Ọ gha de ọghe ọghọ na rhie ne egbe, wa ghi mu asanikaro.” Vbe ọ yae kha? Te ọ khẹke ne ima gha gualọ ẹkpotọ ne ima ya rhie ẹre ma wẹẹ, ma mwẹ “ekhọe agiẹngiẹn” daa emwa, odẹ eso ne ima gha ya ru ọna ọre ne ima gha yabọ emwa, ne ima gha mu ọghọ ye iran egbe, ma ghi vbe gha zẹ emwi obọ. (Ẹfis 4:32) Ọ ma khẹke ne u gha khẹ ne etẹn ka do gu ruẹ ru ọse, sokpan te ọ khẹke ne u “mu asanikaro.” Ẹghẹ nii, u ghi gele do bẹghe ẹre wẹẹ ẹmwata ne uhunmwu ẹmwẹ ẹre Jesu tae vbe ọ khare wẹẹ: “Na gha rhie ne emwa ọvbehe ẹre oghọghọ ye sẹ, na gha miẹn emwa re.”​—Iwinna 20:35.

10. Vbe ima khian ya rhie ẹre ma wẹẹ, ima wegbe obọ vbọ “gha de ọghe ọghọ na rhie ne egbe”? (Vbe ya ghee efoto.)

¹⁰ Ma bẹghe ẹre wẹẹ, vbe Pọl ghi rhie igiọdu ne ima nẹ, ne ima gha mu ọghọ ye emwa ọvbehe egbe, ọ na vbe kha wẹẹ, “Wa gha re nọ wegbe obọ, wa ghẹ gha re obẹrure.” A gha mu iwinna ne ọmwa nọ wegbe obọ, ọ ghi ya ekhọe hia ru ẹre. Ebe Itan 3:​27, 28 khare wẹẹ: “Ẹghẹ ne u rhirhi ya sẹtin, hia ne u gha ru emwi esi ne ọmwa nọ khẹke.” Erriọ ẹre ọ vbe ye, adeghẹ ima na bẹghe ọmwa nọ gualọ iyobọ, te ọ khẹke ne ima hia vbene ẹtin ima sẹ, ne ima ru iyobọ nọ khẹke nẹẹn. Ọ ma khẹke ne ima gha la ẹdẹ yọ; ra ne ima gha roro ẹre wẹẹ, ọmwa ọvbehe gha ru iyobọ nẹẹn.​—1 Jọn 3:​17, 18.

11. Vbọ khian ru iyobọ ne ima ya sikẹ egbe sayọ?

¹¹ Odẹ ọvbehe ne ima ya rhie ọghọ ne emwa ọvbehe, ọre ne ima na rherhe yabọ iran vbe iran gha ru emwi nọ sọnnọ ima. Ebe Ẹfisọs 4:26 khare wẹẹ: “Wa ghẹ gi owẹn de, vbene ohu na ye rre uwa ẹko.” Vbọzẹ? Rhunmwuda uviẹn ọnrẹn 27 khare wẹẹ, ma gha ru vberriọ, te ima “rhie ẹghẹ ne Esu.” Vbe Baibol, ẹ i re avbiẹ inugba ẹre Jehova tama ima ne ima gha yabọ egbe. Ebe Kọlọsi 3:13 keghi rhie igiọdu ne ima, ne ima “ye gha . . . ya ekhọe hia yabọ egbe.” Ma ghaa rhie aro gberra abakuru ọghe emwa ọvbehe, ọ gha ru iyobọ ne ima ya sẹtin sikẹ iran sayọ. Ma gha ru vberriọ, te ima hia vbe odẹ ke odẹ ne ima vbe etẹn “ye gha rrọọ vbe uwu akugbe ne orhiọn nọhuanrẹn rhie ne [ima], lekpa ọfunmwegbe nọ dee [ima] hia kugbe.” (Ẹfis 4:3) Ọghe ne ẹmwata, ima ghaa yabọ egbe, akugbe kevbe ọfunmwegbe ghi gha rre uwu iko.

12. De vbene Jehova ya ru iyobọ ne ima hẹ ya sẹtin gha yabọ?

¹² Ẹmwata nọ wẹẹ, ọ sẹtin gha lọghọ ne ima sẹtin yabọ emwa ni ru ima khọọ. Sokpan, orhiọn nọhuanrẹn ọghe Osanobua gha sẹtin ru iyobọ ne ima. E Baibol ghi rhie igiọdu ne ima nẹ wẹẹ, ne ima “gha mwẹ ẹnina daa egbe,” kevbe ne ima “gha re nọ wegbe obọ,” ọ na vbe kha wẹẹ, ne ima “gi orhiọn nọhuanrẹn gha ya [ima] mwẹ oyaya.” Ọna rhie ma wẹẹ, orhiọn nọhuanrẹn ọghe Osanobua gha sẹtin ru iyobọ ne ima ya gha mwẹ zẹ ọghae. (Ghee study note ọghe ebe Rom 12:11.) Nọnaghiyerriọ, orhiọn nọhuanrẹn ọghe Osanobua gha sẹtin ru iyobọ ne ima ya gha mwẹ ẹnina daa emwa ọvbehe, kevbe ne ima vbe gha ya ekhọe hia yabọ. Ọna ẹre ọ si ẹre ne ima na ya ekhọe hia rinmwian e Jehova nọ ru iyobọ ne ima.​—Luk 11:13.

Ọ MA KHẸKE “NE IWANNEGBE . . . GHA RRE UWU ẸKPO UWA”

13. De emwi nọ gha sẹtin si ighaegbe ye uwu ẹkpo ima?

¹³ “Emwa ughughan” ni ke ehe ughughan rre, ẹre ọ rre uwu iko. (1 Tim 2:​3, 4) Deghẹ ima ma na begbe, ẹmwẹ vbene a ya mu egbe, emwi na ya gbaroghe egbe, emwi na ya rọkhọ egbe ra emwi ọvbehe sẹtin do si ighaegbe ye uwu ẹkpo ima, rhunmwuda odẹ ughughan ẹre ima ya ru emwi. (Rom 14:4; 1 Kọr 1:10) Ugbẹnvbe a miẹn wẹẹ, “Osanobua tobọre ma [ima] ẹre nẹ, vbene [ima] khian ya gha hoẹmwẹ egbe hẹ,” ọ khẹke ne ima hia ne ima ghẹ gha ru vbe na miẹn wẹẹ, odẹ ne ima ya ru emwi ẹre ọ maan sẹ ọghe emwa ọvbehe.​—Fil 2:3.

14. Vbọ khẹke ne ima hia ne ima gha ru, kevbe wẹẹ, vbọzẹ?

¹⁴ Adeghẹ ima na gha hia vbe ẹghẹ hia, ne ima gha rhie igiọdu ne egbe, ọ gha ru iyobọ ne iko ya gha mwẹ akugbe. (1 Tẹs 5:11) Vbe nọ ma he kpẹẹ gbe na, emwa ni bun ni te worua vbe odẹ ọghe orhiọn ra emwa na rhie hin iko rre keghi dọlegbe bu e Jehova gha dee. Ekhọe hia ẹre ima ya gbe ọbokhian ne iran! (2 Kọr 2:8) Ọ mwẹ ọtẹn nokhuo ọkpa nọ ma he yo iko vbe ọwara ukpo igbe, vbe ọ ghi dọlegbe suẹn iko na yo, ọ keghi kha wẹẹ, “Te emwa hia wa gha mumu ogiẹ zẹvbe ne iran ya gha so mwẹ obọ.” (Iwinna 3:19) De vbene ọna ya ru iyobọ nẹẹn hẹ? Ọ khare wẹẹ, “Ọ na yevbe na miẹn wẹẹ, te Jehova ghaa ru iyobọ mẹ ne I mieke na dọlegbe gha mwẹ oghọghọ.” Adeghẹ ima na gha rhie igiọdu ne emwa ọvbehe, e Kristi gha sẹtin loo ima ya ru iyobọ ne emwa “ne egbe wọọ re rhunmwuda ihẹ nọkhua ne [iran] mu.”​—Mat 11:​28, 29.

15. De emwi ọvbehe ne ima gha sẹtin ru nọ gha ya akugbe gha rre iko? (Vbe ya ghee efoto.)

¹⁵ Ẹmwẹ ne ima ta gha vbe sẹtin ya ọfunmwegbe gha rre uwu iko. Ebe Job 12:11 khare wẹẹ: “Sokpan, zẹvbe ne evbare na danmwẹ rhiẹnrhiẹn aranmwẹ ruẹ, erriọ ẹre ẹmwẹ na họn vbe rhiẹnrhiẹn ehọ ruẹ.” Zẹvbe ne ọmwa nọ le evbare ka danmwẹ ọnrẹn nẹ, nọ mieke na rẹn deghẹ ọ rhiẹnrhiẹn ọ ke rhie ne emwa ọvbehe vbọ, erriọ ẹre ọ vbe khẹke ne ima hia ne ima mu ẹmwẹ ne ima khian ta roro ima ke tae. (Psm 141:3) Ọ khẹke ne ima hia vbe ẹghẹ hia ne ẹmwẹ ne ima ta gha re nọ rhie igiọdu ne ọmwa, “emwa ni họẹn ghi vbe miẹn ere vbọ.”​—Ẹfis 4:29.

16. De emwa nọ mobọ khẹke nọ gha ta ẹmwẹ nọ rhie igiọdu ne ọmwa?

¹⁶ Te ọ wa khẹke ne avbe ọdọ kevbe evbibiẹ emọ gha hia vbe odẹ ke odẹ, ne ẹmwẹ ne iran ta gha re nọ rhie igiọdu ne ọmwa. (Kọl 3:​19, 21; Taitọs 2:4) Te ọ vbe khẹke ne avbe ediọn ni rre uwu iko gha ta ẹmwẹ nọ gha rhie igiọdu ne avbe ohuan ọghe Jehova. (Aiz 32:​1, 2; Gal 6:1) Itan ọkpa nọ rre Baibol khare wẹẹ: “U miẹn vbene ẹmwẹ na tae vbe ẹghẹ nọ khẹke rhiẹnrhiẹn hẹ!”​—Itan 15:23.

GI “AHOẸMWỌMWA ỌGHE IMA GHA RE . . . ỌGHE ẸMWATA, MA GHI VBE GHA RHIE ẸRE MA VBE EMWI NE IMA RU”

17. Vbe ima khian ya rẹn hẹ deghẹ ahoẹmwọmwa ọghe ẹmwata ẹre ima mwẹ ne etẹn ima?

¹⁷ Ukọ ighẹ e Jọn rhie ibude ne ima we “ọ ma khẹke ne ahoẹmwọmwa ọghe ima gha re ọghe okpunu, ra ọghe ẹmwẹ ne unu, sokpan, te ọ khẹke nọ gha re ọghe ẹmwata, ma ghi vbe gha rhie ẹre ma vbe emwi ne ima ru.” (1 Jọn 3:18) Ma hoo ne ahoẹmwọmwa ne ima mwẹ ne etẹn ima gha re nọ ke ekhọe rre. Vbọ khian ru iyobọ ne ima? Ma ghaa gu etẹn ima mu obọ vbe ẹghẹ hia ma ghi kakabọ sikẹ iran, ahoẹmwọmwa ne ima mwẹ ne egbe ghi vbe gha wegbe yọ. Rhunmwuda ọni, gualọ ẹkpotọ ne u khian ya gha gu etẹn mu obọ, ọre vbe iko nọ ra ikporhu. Gha mu otuẹ gie iran. Ma gha ru vberriọ, te ima rhie ẹre ma wẹẹ, “Osanobua tobọre ma [ima] ẹre nẹ, vbene [ima] khian ya gha hoẹmwẹ egbe hẹ.” (1 Tẹs 4:9) Ẹghẹ nii, u ghi gele do miẹn wẹẹ, ẹmwata ẹre ọsian nii tae, vbe ọ khare wẹẹ, “U miẹn vbene ọ maan hẹ, u miẹn vbọ vbe rhiẹnrhiẹn hẹ, ne emwa Osanobua gha gu egbe yin vbe ọfunmwegbe!”​—Psm 133:1.