E Jehova Mwẹ Agiẹngiẹn Daa Ruẹ

1. De emwi nọ la ruẹ ekhọe vbe u ghaa muẹn roro aro ọmwa ne Jehova khin?

U HE ka muẹn roro ẹdẹ aro ọmwa ne Jehova khin ra? De emwi nọ la ruẹ ekhọe vbe u ghaa na erhunmwu gie ẹre? Agharhemiẹn wẹẹ, ma i bẹghe Jehova, ọ mwẹ odẹ ughughan ne Baibol ya gie ẹre. E Baibol tie Jehova “ovẹn kevbe ugue” kẹ kevbe “erhẹn nọ fuẹn emwi rua.” (Psm 84:11; Hib 12:29) E Baibol gie eke ne Jehova ye zẹvbe okuta ighobioye safaia, emwi nọ fi wainwain zẹvbe oze, kevbe ere nukhunmwu (rainbow) nọ mwẹ awanwan nọ gbe ebiebi ye ọmwa aro. (Ẹzik 1:​26-28) Odẹ ne Baibol ya gie Jehova sẹtin yan ima unu rua, ọ ghi kue ya ima gha roro ẹre wẹẹ, ma ma sẹ emwi rhọkpa vbe eke nọ ye.

2. De emwi nọ yae lọghọ, ne emwa eso sẹtin sikẹ e Jehova?

² Rhunmwuda ne ima i na bẹghe Jehova, ọ sẹtin gha lọghọ ne ima gele yayi wẹẹ, ọ hoẹmwẹ ima. Emwa eso sẹtin gha roro ẹre wẹẹ, e Jehova i khian sẹtin hoẹmwẹ iran rhunmwuda emwi ne iran he miẹn vbe agbọn. Ọ gha kẹ, iran i mwẹ erha nọ gele hoẹmwẹ iran. E Jehova rẹn evbọzẹe ne ima na mwẹ egbe iziro vberriọ, kevbe vbene egbe iziro vberriọ ya ya agbọn lọghọ ima hẹ. E Jehova keghi gi ima rẹn aro ọmwa ne irẹn khin vbe Baibol, iyobọ nọkhua ọna wa ye ne ima.

3. Vbọzẹ nọ na khẹke ne ima ruẹ vbekpa ahoẹmwọmwa ne Jehova mwẹ?

³ Ẹmwẹ ọkpa nọ wa gele gie aro ọmwa ne Jehova khin, ọre ahoẹmwọmwa. (1 Jọn 4:8) E Jehova tobọre ọre ahoẹmwọmwa. Ahoẹmwọmwa ẹre ọ yae ru emwi hia nọ ru. Ahoẹmwọmwa ne Jehova mwẹ wegbe sẹrriọ wẹẹ, ọ hoẹmwẹ emwa ni ma hoẹmwẹ ọnrẹn. (Mat 5:​44, 45) Vbe ako iruẹmwi na, ma gha guan kaẹn e Jehova kevbe odẹ nọ ya rhie ahoẹmwọmwa ma. Zẹvbe ne ima ya ruẹ vbekpa Osanobua, ahoẹmwọmwa ne ima mwẹ nẹẹn ghi gha wegbe yọ.

E JEHOVA HOẸMWẸ IMA ẸSẸSẸMWẸSE

4. Vbọ ye ruẹ hẹ, vbe u gha muẹn roro vbene Jehova mwẹ agiẹngiẹn hẹ? (Vbe ya ghee efoto.)

⁴ “Osa nọ mwẹ ekhọe agiẹngiẹn . . . ẹre Jehova khin.” (Jems 5:11) Vbe Baibol, e Jehova keghi gie egbe ẹre zẹvbe iye ọmọ nọ mwẹ agiẹngiẹn. (Aiz 66:​12, 13) Muẹn roro, iye ọmọ nọ gbaroghe ovbi ẹre nọ kakabọ hoẹmwẹ ọnrẹn. Ọ na muẹn ye ukegbe, ọ na ya urhu nekhuẹrhẹ gha gu ẹre guan. Ọ ghaa viẹ ra ọ na gha rre obalọ, iyẹe ghi hia nọ rhie emwi nọ gualọ nẹẹn. Ma ghaa rre uwu obalọ, ma gha sẹtin gha mwẹ ilẹkẹtin wẹẹ, e Jehova hoẹmwẹ ima. Ọsian khare wẹẹ: “Ẹghẹ ke ẹghẹ ne udu mwẹ ya mu waa, l na vbe gha hawa, u ghi fu mwẹ ẹko rre, u ghi vbe ya mwẹ sọyẹnmwẹ.”—Psm 94:19.

5. De iyobọ ne ahoẹmwọmwa nẹi beghe ọghe Jehova ye vbe ẹdagbọn ruẹ?

⁵ E Jehova mwẹ ẹkoata. (Psm 103:8) Egbe ima i wọọ e Jehova vbe ima gha ru emwi nọ ma gba. Ẹghẹ hia ẹre Ivbi Izrẹl ya gha ru emwi nọ sọnnọ e Jehova; ọrheyerriọ, iran gha fi werriẹ, e Jehova ghi rhie ẹre ma wẹẹ irẹn mwẹ ahoẹmwọmwa nẹi beghe daa iran. Vbe igiemwi, ọ keghi tama iran wẹẹ: “Ighobioye ẹre u khin mwẹ re kevbe wẹẹ, rhunmwuda ighẹ I hoẹmwẹ ruẹ, I vbe rhie ọghọ nuẹn.” (Aiz 43:​4, 5) E Jehova ma he fi werriẹ, ọ wa ye hoẹmwẹ ima. Ma wa mwẹ ilẹkẹtin wẹẹ ẹghẹ ọkpa i rrọọ nẹi khian ya hoẹmwẹ ima. Ọ gha khọnrẹn wẹẹ ima ru abakuru nọ wegbe, e Jehova i khian yangbe ima. Ma gha fi werriẹ, ma na bu e Jehova gha dee, ma gha bẹghe ẹre wẹẹ e Jehova ye hoẹmwẹ ima. Ọ yan rẹn wẹẹ, irẹn “gha ya ekhọe hia yabọ.” (Aiz 55:7) E Baibol gie ayabọ na zẹvbe ‘ẹghẹ irọkhegbe nọ ke obọ e Jehova tobọre rre.’—Iwinna 3:19.

6. De emwi ne ebe Zẹkaraia 2:8 ma ima re vbekpa e Jehova?

⁶ Tie Zẹkaraia 2:8. Rhunmwuda ne Jehova na hoẹmwẹ ima, ọ rẹn vbene emwi ye ima hẹ, ọ vbe hoo nọ gbaroghe ima. Ẹko i rhiẹnrhiẹn ọnrẹn vbe ima ghaa rre uwu ọlọghọmwa. Rhunmwuda ọni, ma gha sẹtin na erhunmwu gie Jehova wẹẹ: “Degue mwẹ, zẹvbe ne u gha ru ovbi aro ruẹ.” (Psm 17:8) Aro ọghe ima i re emwi na ya fialasẹ, emwi nọ kakabọ ru ekpataki vbe egbe ima ẹre aro wa khin. Nọnaghiyerriọ, ne Jehova na ya ima gie ovbi aro ọre, te ọ yevbe nọ khare wẹẹ, ‘Ọmwaikọmwa nọ rhie ikuanegbe ne uwa, ne emwa mwẹ, emwi ne I ya aro nọ ghaan ghee ẹre ọ rhie ikuanegbe na.’

7. Vbọzẹ nọ na khẹke ne ima gha mwẹ ilẹkẹtin nọ wegbe wẹẹ, e Jehova hoẹmwẹ ima?

⁷ E Jehova hoo ne u gha mwẹ ilẹkẹtin wẹẹ, irẹn hoẹmwẹ ruẹ. Sokpan, ọ rẹnrẹn wẹẹ, rhunmwuda emwi ne ima he miẹn vbe agbọn, ma sẹtin gha roro ẹre, deghẹ irẹn gha gele sẹtin hoẹmwẹ ima. Ra ma sẹtin gha rre ọlọghọmwa eso nian, nọ ya ima roro ẹre, deghẹ e Jehova gele hoẹmwẹ ima. Ma gha guan kaẹn vbene Jehova ya rhie ẹre ma wẹẹ, irẹn hoẹmwẹ Jesu, etẹn na hannọ zẹ kevbe ima hia. Ọna gha ya ima gha mwẹ ilẹkẹtin wẹẹ, e Jehova gele hoẹmwẹ ima.

VBENE JEHOVA YA RHIE AHOẸMWỌMWA MA

8. Vbọ ya Jesu yayi wẹẹ, Erha irẹn hoẹmwẹ irẹn?

⁸ A i sẹtin ka inu ukpo ne Jehova vbe Jesu ya koko gha rre ẹrinmwi, vbe uwu ẹghẹ na te iran wa hoẹmwẹ egbe ẹsẹsẹmwẹse. E Jehova keghi rhie ẹre ma wẹẹ irẹn hoẹmwẹ Jesu zẹvbe nọ rre ebe Matiu 17:5. E Jehova gha te wa kha wẹẹ, ‘Ọna ẹre I miẹn yi.’ Vbọrhirhighayehẹ, Ọ hoo ne ima gele rẹn vbene irẹn hoẹmwẹ Jesu hẹ, ẹre ọ si ẹre nọ na kha wẹẹ, “Ọna ọre Ovbi mwẹ, ne I hoẹmwẹ ọnrẹn.” Te Jehova wa gha ya Jesu hio, katekate nọ na ya arrọọ ọghẹe zọ ese. (Ẹfis 1:7) Jesu ma vbe zẹdẹ gha gbawawẹ hiehie deghẹ Jehova gele hoẹmwẹ irẹn. Te Jesu wa ya ekhọe hia ya ọna yi. Ẹ i khabẹ nọ na gha ya ekhọe hia tae vbe ẹghẹ hia wẹẹ, Erha irẹn hoẹmwẹ irẹn.—Jọn 3:35; 10:17; 17:24.

9. De ifiẹmwẹ nọ gele rhie ẹre ma, vbene Jehova hoẹmwẹ etẹn na hannọ zẹ sẹ hẹ? Rhan otọ re. (Rom 5:5)

⁹ E Jehova vbe gi etẹn na hanno zẹ rẹn wẹẹ irẹn hoẹmwẹ iran. (Tie Rom 5:5.) Ebe Rom 5:5 ghi guan kaẹn etẹn na hannọ zẹ, ọ na kha wẹẹ, “Osanobua ya ahoẹmwọmwa ọghẹe vuọn” ekhọe etẹn na hannọ zẹ. Ebe ọkpa ghi rhan otọ ẹmwẹ na ighẹ “vuọn,” ọ na kha wẹẹ, te ọ yevbe na hihiẹ amẹ hia nọ rre ẹzẹ yan ọmwa. Te igiemwi na wa deyọ, ọ gele wa rhie ẹre ma ahoẹmwọmwa nọ wegbe ne Jehova mwẹ ne etẹn na hannọ zẹ! Etẹn na hannọ zẹ rẹnrẹn wẹẹ, Osanobua “hoẹmwẹ” iran. (Jud 1) Ẹmwẹ ne ukọ e Jọn tae rhie ẹre ma, ilẹkẹtin ne etẹn na hannọ zẹ mwẹ, ọ khare wẹẹ: “U miẹn vbene Evbavba hoẹmwẹ ima hẹ! Ọ hoẹmwẹ ima sẹrriọ wẹẹ, te a ghi tie ima ivbi Osanobua!” (1 Jọn 3:1) Etẹn na hannọ zẹ ọkpa ẹre Jehova hoẹmwẹ ọnrẹn ra? Ẹo, e Jehova rhie ẹre ma nẹ wẹẹ irẹn hoẹmwẹ ima hia.

10. De ẹse nọ kpọlọ sẹ ne Jehova he ru, nọ ya ruẹ rẹn wẹẹ, e Jehova hoẹmwẹ ruẹ?

¹⁰ De ẹse nọ kpọlọ sẹ ne Jehova he ru, nọ ya ima rẹn wẹẹ, e Jehova hoẹmwẹ ima? Izọese adẹwerriegbe nọ, ahoẹmwọmwa nọ sẹ ọna i rrọọ! (Jọn 3:16; Rom 5:8) E Jehova keghi ya Ovbi ẹre nọ ghaan zọ ese ne ima, na mieke na ya orukhọ ọghe ima bọ ima kevbe ne ima sẹtin do gha re ọsiọre. (1 Jọn 4:10) Zẹvbe ne ima ya muẹn roro emwi ne Jehova vbe Jesu ru ne ima, ma ghi do rẹn vbene iran hoẹmwẹ dọmwadẹ ima hẹ. (Gal 2:20) Ẹ i re te Jesu ya arrọọ ọghẹe zọ ese rhunmwuda wẹẹ, te Jehova wa hoo nọ ru emwi nọ gbae kẹkan, sokpan te ọ ru ẹre rhunmwuda wẹẹ, ọ hoẹmwẹ ima. Ne Jehova na ya Ovbi ẹre nọ ghaan ighẹ Jesu zọ ese ne ima, rhie ẹre ma wẹẹ, ọ hoẹmwẹ ima. E Jehova keghi kue ne Ovbi ẹre rri oya, ọ na vbe kue nọ wu ne ima.

11. Vbe ima miẹn ruẹ vbe ebe Jerimaia 31:3?

¹¹ Ma bẹghe ẹre nẹ wẹẹ, e Jehova gha hoẹmwẹ ọmwa, ẹ i muẹn lẹre, sokpan, ọ gele rhie ẹre ma wẹẹ, irẹn hoẹmwẹ ọmwa nii. (Tie Jerimaia 31:3.) E Jehova si ima kẹ egbe rhunmwuda nọ na hoẹmwẹ ima. (Yae tae Diuteronomi 7:​7, 8.) Ọmwa rhọkpa ra emwi rhọkpa i rrọọ nọ gha sẹtin wannọ ima hin ahoẹmwọmwa nii rre. (Rom 8:​38, 39) Vbọ ye ruẹ hẹ ne u na rẹn wẹẹ, e Jehova mwẹ ahoẹmwọmwa vbenian? Tie Psalm 23, u gha bẹghe vbe nọ ghaa ye Devid hẹ rhunmwuda ne Jehova na hoẹmwẹ ọnrẹn kevbe vbe nọ ye ima hẹ ne ima na rẹn wẹẹ, e Jehova hoẹmwẹ ima vbe ẹdẹnẹrẹ.

VBỌ YE RUẸ HẸ NE U NA RẸN WẸẸ E JEHOVA HOẸMWẸ RUẸ?

12. De emwi ne ebe Psalm 23 wa mobọ guan kaẹn?

¹² Tie Psalm 23:​1-6. Ebe Psalm 23 keghi re ihuan ne ọsian ya rhie ẹre ma, ilẹkẹtin ne irẹn mwẹ we Jehova hoẹmwẹ irẹn kevbe wẹẹ, ọ gbaroghe irẹn. E Devid nọ gbẹn ihuan na, keghi gi ima rẹn vbene irẹn vbe Jehova ne Ọsuohuan ọghe irẹn sikẹ egbe sẹ hẹ. Orhiọn Devid keghi sotọ rhunmwuda nọ na kue ne Jehova gha dia irẹn, ọ na wa ya ekhọe hia mu ẹtin yan Jehova. E Devid wa rẹn wẹẹ, ẹghẹ ọkpa i rrọọ ne Jehova i khian ya hoẹmwẹ irẹn. De emwi nọ yae gha mwẹ ilẹkẹtin vbenian?

13. De emwi nọ ya Devid yayi wẹẹ, e Jehova gha gbaroghe irẹn?

¹³ “I i khian gha rre ivbabọ.” E Devid wa bẹghe ẹre wẹẹ, e Jehova gbaroghe irẹn, rhunmwuda te Jehova wa gha kpemehe emwi hia nọ gualọ. E Devid wa gha sọyẹnmwẹ rhunmwuda nọ na gha re ọsie Jehova, kevbe rhunmwuda ne Jehova na miẹn ọnrẹn yi. Ọni ẹre ọ si ẹre nọ na gha mwẹ ilẹkẹtin wẹẹ, e Jehova gha ye gha kpemehe emwi hia ne irẹn gualọ. Rhunmwuda ne Devid na gha mwẹ ilẹkẹtin wẹẹ, e Jehova hoẹmwẹ irẹn kevbe wẹẹ, ọ gha gbaroghe irẹn, emwi nọ mwẹ keghi sẹ ọre okẹn, ọ ma vbe gha si osi ye emwi rhọkpa.—Psm 16:11.

14. De vbene Jehova gha ya sẹtin gbaroghe ima hẹ?

¹⁴ E Jehova keghi gbaroghe ima, katekate vbe emwi nọ wegbe gha sunu daa ima. Ọ mwẹ ọtẹn nokhuo ọkpa na tie ẹre Claire,a ọ gberra ukpo 20 nẹ, nọ he ke ga vbe Bẹtẹl, ọ ma rẹn vbe nọ khian khian hẹ vbe ẹgbẹe ọre ghaa ke ọlọghọmwa ọkpa la ọvbehe. Emianmwẹ na tie ẹre stroke keghi dekun erhae, a na kan ọtiọn ọnrẹn nokhuo ọkpa fua vbe iko, ẹki iran na de, owa ne iran mwẹ na vbe wii iran. De vbene Jehova ya rhie ẹre ma wẹẹ, irẹn hoẹmwẹ iran kevbe wẹẹ irẹn gbaroghe iran? E Claire khare wẹẹ: “E Jehova kegha kpemehe emwi hia ne ẹgbẹe mwẹ gualọ vbe ẹdẹgbegbe. Ẹghẹ hia ẹre Jehova wa ya gha kpemehe emwi ne ima gualọ ne ima, uhiẹn ọ ghi kue gberra vbene I te ya aro yi! Ẹghẹ hia ẹre I ya muẹn roro vbene Jehova he ya rhie ẹre ma we irẹn hoẹmwẹ mwẹ, I i khian sẹtin mianmian. Ena hia ẹre ọ wa ru iyobọ mẹ ne I na sẹtin zin egbe ọlọghọmwa nọ rhirhi gha khin.”

15. Vbọzẹ ne orhiọn e Devid na sotọ? (Vbe ya ghee efoto.)

¹⁵ “Ọ fu mwẹ egbe rre.” Ugbẹnso, egbe ghi wa wọọ e Devid rhunmwuda ọlọghọmwa nibun nọ ghaa werriẹ aro daa. (Psm 18:​4-6) Ọrheyerriọ, ahoẹmwọmwa ne Jehova mwẹ nẹẹn kevbe vbe nọ ya gbaroghe ẹre keghi fu ẹre egbe rre. E Jehova keghi su ọsiọre ne egbe wọọ re la “oha nọ furre” kevbe “ẹzẹ nọ furre khuẹrhẹ.” Ọ na ẹre ọ si ẹre ne ẹtin na lae Devid iwu, ọ na sẹtin ye gha ya ọyẹnmwẹ ga e Jehova khian.—Psm 18:​28-32.

16. De vbene ahoẹmwọmwa ọghe Jehova he ya fu ruẹ egbe rre hẹ?

¹⁶ Erriọ vbe ye vbe ẹdẹnẹrẹ, “ahoẹmwọmwa nẹ fafa kevbe itohan ọghe Jehova ẹre ọ zẹ ighẹ ima ye rrọọ,” agharhemiẹn wẹẹ, ma rre uwu ọlọghọmwa. (Eve 3:22; Kọl 1:11) Gi ima guan kaẹn igiemwi ọghe Rachel. Iro keghi han rẹn vbe ọdafẹn ọnrẹn lẹẹ sẹ ọre rae, ọ na vbe sẹ e Jehova rae vbe ẹghẹ COVID-19. De emwi ne Jehova ru nẹẹn? Ọtẹn na khare wẹẹ: “Te Jehova wa gele rhie ẹre ma wẹẹ irẹn hoẹmwẹ mwẹ. E Jehova wa ya ọse nibun ru mwẹ ẹse, iran wa gha mwẹ ẹghẹ mẹ, iran mu evbare gu mwẹ, iran ya efoni ya gbẹnnẹ emwi eso kevbe ako evbagbẹn nọhuanrẹn nọ rhie igiọdu ne ọmwa gu mwẹ, iran mumu ogiẹ daa mwẹ, iran na vbe gha ye mwẹ ẹre rre wẹẹ e Jehova gbaroghe mwẹ. Ẹghẹ hia ẹre I ya kpọnmwẹ e Jehova, nọ na ya ẹgbẹe vbenian ru mwẹ ẹse.”

17. Vbọzẹ ne “ohan emwi rhọkpa” ma na gha mu e Devid?

¹⁷ “Ohan emwi rhọkpa i khian mu mwẹ, rhunmwuda, uwẹ gu mwẹ rrọọ.” Ẹghẹ nibun ẹre arrọọ ọghe Devid wa ya gha rre ikpadede, erriọ vbe ya gha mwẹ avbe eghian nibun ni mwẹ ẹtin. Vbọrhirhighayehẹ, ahoẹmwọmwa ne Jehova mwẹ nẹẹn ẹre ọ yae rẹn wẹẹ, emwi rhọkpa i khian sunu daa irẹn kevbe wẹẹ e Jehova gha gbogba ga irẹn. Aro e Devid wa dae wẹẹ, te Jehova wa gha gu irẹn rrọọ vbe uwu ọlọghọmwa ne irẹn werriẹ aro daa, ọna wa rhie igiọdu nẹẹn. Ẹ i khabẹ nọ na so ihuan gie Jehova wẹẹ: “[E Jehova] keghi vbe fan mwẹ yotọ vbe obọ ohan hia nọ te mu mwẹ.” (Psm 34:4) Emwi bun nọ ya Devid gha mu ohan, sokpan rhunmwuda ahoẹmwọmwa ne Jehova mwẹ nẹẹn orhiọn rẹn na sotọ.

18. Ne u na rẹn wẹẹ, e Jehova hoẹmwẹ ruẹ, vbọ khian ya ru iyobọ nuẹn vbe ohan ghaa mu ruẹ?

¹⁸ Ne ima na rẹn wẹẹ e Jehova hoẹmwẹ ima, de vbe nọ ya ru iyobọ ne ima hẹ vbe ima ghaa rre uwu ọlọghọmwa nọ wegbe? Arọndẹ ọkpa na tie ẹre Susi keghi gie vbene emwi ghaa ye irẹn vbe ọdafẹn irẹn hẹ, vbe ovbi iran nokpia gbe egbe ẹre rua, ọ khare wẹẹ: “Emwi nọ wegbe vbenian gha sunu vbe udemwurri, obalọ nọ si i re nekherhe, ọmwa i ghi rẹn vbe nọ khian khian hẹ. Sokpan agiẹngiẹn ne Jehova mwẹ daa ima wa mu ima orhiọn sotọ, ọ vbe ya ima rẹn wẹẹ e Jehova gbaroghe ima.” E Rachel ne ima ka guan kaẹn ban, khare wẹẹ: “Ọ mwẹ asọn ọkpa ne orhiọn mwẹ ma ya zẹdẹ sotọ, osi na wa gha si mwẹ, erriọ ohan vbe ya gha mu mwẹ, uwu obalọ nii, ẹre I ya tu tie Jehova, I na gha viẹ. Vbe ọwara ọkpa nii, I na bẹghe ẹre wẹẹ, e Jehova mu mwẹ orhiọn sotọ, ọ na bọ mwẹ vbene iye ọmọ bọ ovbi ẹre, ovbe na rhie mwẹ. I i sẹtin mianmian ẹdẹrriọ.” A keghi mu ọdiọn ọkpa na tie ẹre Tasos ye eghan vbe ọwara ukpo enẹ, rhunmwuda nọ ma na deba ivbiyokuo. De vbene Jehova ya rhie ẹre ma wẹẹ, irẹn hoẹmwẹ ọnrẹn kevbe wẹẹ irẹn gbaroghe ẹre? Ọ khare wẹẹ: “E Jehova keghi kpemehe emwi hia ne I gualọ mẹ, ọ na kue ru gberra vbene I ya aro yi. Ọna keghi ya mwẹ gha mwẹ ilẹkẹtin wẹẹ, I gha sẹtin ya ekhọe hia mu ẹtin yan rẹn. Vbe deba ọni, e Jehova keghi ya orhiọn nọhuanrẹn ọghẹe ru iyobọ mẹ ya gha sọyẹnmwẹ agharhemiẹn wẹẹ, I rre eke nọ gha te ya iro han mwẹ. Ọna keghi ya mwẹ rẹn wẹẹ, zẹvbe ne I ya mu ẹtin yan e Jehova, erriọ I khian vbe ya gha bẹghe vbene ọ ya rhie ẹre ma wẹẹ, irẹn hoẹmwẹ mwẹ. Ẹre I na ghi rhie obọ ye iwinna arọndẹ vbe I rre uwu eghan.”

SIKẸ OSANOBUA RUẸ NỌ MWẸ AGIẸNGIẸN

19. (a) De emwi ne ima khian gha nọ vbe erhunmwu vbe ima gha rẹn wẹẹ, e Jehova hoẹmwẹ ima? (b) De nọ ghi yẹẹ ruẹ sẹ vbe odẹ na ya gie ahoẹmwọmwa ọghe Jehova? (Ya ghee ẹkpẹti nọ khare wẹẹ, “Avbe Ẹmwẹ Nọ Gha Ya Ruẹ Rẹn Vbene Jehova Hoẹmwẹ Ruẹ Hẹ.”)

¹⁹ Okha ọghe etẹn ne ima he guan kaẹn sin rhie ẹre ma wẹẹ, e Jehova ne “Osa ọghe ahoẹmwọmwa” gu ima rrọọ! (2 Kọr 13:11) Ọ mu ẹmwẹ dọmwadẹ ima roro. Ma wa mwẹ ilẹkẹtin wẹẹ, “ahoẹmwọmwa ọghe Jehova nẹi beghe, degue” ima. (Psm 32:10) Zẹvbe ne ima ya muẹn roro vbene Jehova he ya rhie ẹre ma we irẹn hoẹmwẹ ima, ọ ghi ya ima rẹn wẹẹ, ẹ i ya ẹmwẹ ima ku hiehie, ọna ghi ya ima gha sikẹ ọre sayọ. Ma gha sẹtin na erhunmwu gie ẹre vbe ẹghẹ ke ẹghẹ, ma ghi gie ẹre rẹn wẹẹ, ma wa gualọ ahoẹmwọmwa ọghẹe. Ma gha sẹtin tama rẹn emwi hia nọ daa ima vbe orhiọn, ma ghi vbe gha mwẹ ilẹkẹtin wẹẹ, ọ rẹn vbene emwi ye ima hẹ, kevbe wẹẹ, ọ gele hoo nọ ru iyobọ ne ima.—Psm 145:​18, 19.

20. De vbene ahoẹmwọmwa ne Jehova mwẹ ya si ima ke ọre?

²⁰ Zẹvbe ne ima hoo ne ima sikẹ erhẹn vbe oni ghaa fi, erriọ ima vbe gualọ ahoẹmwọmwa ọghe Jehova. Ahoẹmwọmwa ne Jehova mwẹ ne ima kakabọ wegbe, erriọ vbe ya mwẹ agiẹngiẹn daa ima. Rhunmwuda ọni, gha ghọghọ wẹẹ, e Jehova hoẹmwẹ ruẹ. Nọnaghiyerriọ, wa gi ima hia miẹn ahoẹmwọmwa ọghe Jehova yi, ne ima ya ekhọe hia kha wẹẹ: “I hoẹmwẹ e Jehova”!—Psm 116:1.