Ya Ekhọe Hia Yayi We Jehova Hoẹmwẹ Ruẹ

1. Vbọzẹ ne u na ya egbuẹ fiohan ne Jehova? (Vbe ya ghee efoto.)

U YE yerre ra, ẹghẹ ne u na da ya egbuẹ fiohan ne Jehova? Rhunmwuda ne u na do rẹn aro ọmwa ne Jehova khin kevbe ne u na hoẹmwẹ ọnrẹn, ẹre ọ si ẹre ne u na ya egbuẹ fiohan nẹẹn. U keghi tama e Jehova wẹẹ, iho ọghẹe ẹre u khian mu karo vbe ẹdagbọn ruẹ, kevbe wẹẹ, te u khian ya otọ ẹko ruẹ hia, arrọọ ruẹ hia, ekhọe ruẹ hia kevbe ẹtin ruẹ hia hoẹmwẹ e Jehova, ya sẹ ẹdẹ uwu. (Mak 12:30) Kẹ ẹghẹ nii gha dee, ahoẹmwọmwa ne u mwẹ nẹẹn na gha wegbe yọ wegbe yọ. Nọnaghiyerriọ, de emwi ne u khian ta deghẹ ọmwa na nọ ruẹ wẹẹ, “U gele hoẹmwẹ e Jehova ra?” Vbene u i na ka zẹdẹ roro ẹre nẹ, ẹ i mwẹ u ma kha wẹẹ, “I hoẹmwẹ e Jehova sẹ ọmwaikọmwa kevbe emwi ke emwi nọ rhirhi gha khin!”

2-3. De emwi ne Jehova hoo ne ima yayi, kevbe wẹẹ, vbe ima khian guan kaẹn vbe ako iruẹmwi na? (Jerimaia 31:3)

² Sokpan, de emwi ne u khian ta deghẹ ọmwa na nọ ruẹ wẹẹ, “Uwẹ gele yayi we Jehova hoẹmwẹ ruẹ ra?” U gha ka roro ẹre nẹ u ke zẹ ewanniẹn ra, rhunmwuda ne u na roro ẹre wẹẹ, u ma sẹ ne Jehova gha hoẹmwẹ ọnrẹn ra? Ọtẹn nokhuo ọkpa na ma ya obọ esi mu vbe ọ waan dee khare wẹẹ: “I rẹnrẹn wẹẹ, I hoẹmwẹ e Jehova. I i zẹdẹ gbe awawẹ yọ hiehie. Vbọrhirhighayehẹ, I mobọ gbe awawẹ deghẹ e Jehova hoẹmwẹ mwẹ.” Sokpan de aro ne Jehova gele ya ghee ruẹ?

³ E Jehova hoo ne u ya ekhọe hia yayi wẹẹ, irẹn hoẹmwẹ ruẹ. (Tie Jerimaia 31:3.) Ẹmwata nọ rrọọ ọre wẹẹ, e Jehova ẹre ọ tobọre si ruẹ kẹ egbe. Vbe u ghi ya egbuẹ fiohan ne Jehova nẹ kevbe vbe u ghi dinmwiamẹ nẹ, ọ keghi ya emwi nọ hin usi ru ruẹ ẹse​—ọni ọre ahoẹmwọmwa ọghẹe nẹi beghe. Ọna rhie ma wẹẹ, ahoẹmwọmwa ne Jehova mwẹ nuẹn wegbe sẹrriọ wẹẹ, ẹ i khian sẹ ruẹ rae ẹdẹ. Ọna keghi ya e Jehova ghee eguọmwadia ẹre hia, ya sẹ egbe uwẹ tobọ uwẹ zẹvbe “emwi obọ [ọre] nọ ghaan.” (Mal 3:17) E Jehova hoo ne u rẹn wẹẹ, irẹn hoẹmwẹ ruẹ. Erriọ ẹre ọ vbe gha ye ne Pọl, te Pọl wa gele yayi wẹẹ, e Jehova hoẹmwẹ irẹn, ẹre ọ si ẹre nọ na kha wẹẹ: “Vbe nai na gbe awawẹ, I wa rẹn wẹẹ, emwi rhọkpa i khian sẹtin wannọ ima hin ahoẹmwọmwa ọghe Osanobua rre, ọre uwu nọ, ra arrọọ, ra avbe odibosa, ra arriọba, ra emwi ni rrọọ nian, ra emwi ni dee vbe odaro, ra ẹtin, ra uyomwẹ, ra udinmwimwẹ, ra emwi ke emwi na ghi yi nẹ. Ena rhọkpa i khian sẹtin wannọ ima hin ahoẹmwọmwa ọghe Osanobua rre.” (Rom 8:​38, 39) Vbe ako iruẹmwi na, ma gha guan kaẹn evbọzẹe nọ na khẹke ne ima gele yayi wẹẹ, e Jehova hoẹmwẹ ima kevbe emwi nọ gha ru iyobọ ne ima ya ru vberriọ.

EVBỌZẸE NỌ NA KHẸKE NE IMA GELE YAYI WẸẸ, E JEHOVA HOẸMWẸ IMA

4. Vbe ima khian ya sẹtin rrọ emwi ero ne Esu ru?

⁴ Ma gha yayi wẹẹ, e Jehova hoẹmwẹ ima, ma gha sẹtin “rrọ emwi ero ne Esu ru.” (Ẹfis 6:11) Esu gha hia nọ ru emwi ke emwi nọ ya da ima obọ yi ne ima ghẹ ga e Jehova. Ọkpa vbe usun emwi ero ne Esu ru, nọ ghi wa khọọ sẹ, ọre nọ na hia ne ima yayi wẹẹ, e Jehova ma hoẹmwẹ ima. Ghẹ mianmian wẹẹ, te Esu gualọ eke nọ khian la la ima egbe. Ẹghẹ ne ima ya vburriẹ ẹre irẹn ya mobọ danmwẹ ima ghee, ọ sẹtin gha re ẹghẹ ne orhiọn ima ma ya sẹ otọ rhunmwuda emwi eso nọ ka sunu, ma ghaa werriẹ aro daa ọlọghọmwa, ra ma ghaa muẹn roro emwi nọ khian sunu vbe odaro. (Itan 24:10) Te Esu yevbe na ghee oduma, nọ gualọ eke ne aranmwẹ nọ khian gbe re na vburriẹ. Rhunmwuda ọni, Esu keghi gualọ eke ne ima na vburriẹ, nọ mieke na la evba lae ima egbe, ne egbe mieke na wọọ ima. Sokpan, deghẹ ima na gha hia ne ima gha mwẹ ilẹkẹtin nọ wegbe wẹẹ, e Jehova hoẹmwẹ ima, ma ghi sẹtin “gbe . . . odan” ghee Setan, ma ghi vbe sẹtin gban egbe ne emwi ero nọ ru.​—1 Pit 5:​8, 9; Jems 4:7.

5. Vbọzẹ nọ na khẹke ne ima gele rẹn wẹẹ, e Jehova hoẹmwẹ ima?

⁵ Ma gha yayi wẹẹ, e Jehova hoẹmwẹ ima, ma ghi sẹtin sikẹ ọre sayọ. Gi ima guan kaẹn emwi nọ si ẹre ne ima na kha vberriọ. Te Jehova yi ima, ne ima gha hoẹmwẹ emwa kevbe ne emwa vbe gha hoẹmwẹ ima. Ọmwa gha rhie ẹre ma wẹẹ, irẹn hoẹmwẹ ima, ọ ghi gua ima kpa vbe ya hoẹmwẹ ọnrẹn. Nọnaghiyerriọ, ma gha gele rẹn wẹẹ, e Jehova hoẹmwẹ ima, ọ ghi vbe gua ima kpa ya hoẹmwẹ ọnrẹn sayọ. (1 Jọn 4:19) Vbene ahoẹmwọmwa ne ima mwẹ ne Jehova ya wegbe yọ, erriọ ẹre ahoẹmwọmwa ne irẹn mwẹ ne ima khian vbe ya gha wegbe yọ. E Baibol khama ima wẹẹ: “Wa sikẹ Osanobua, irẹn gha vbe sikẹ uwa.” (Jems 4:8) De emwi ne ima gha ru ne ima mieke na ya ekhọe hia yayi wẹẹ, e Jehova gele hoẹmwẹ ima?

VBỌ KHIAN RU IYOBỌ NE IMA YA YAYI WẸẸ, E JEHOVA HOẸMWẸ IMA?

6. Ne ima mieke na yayi we Jehova hoẹmwẹ ima, de emwi ne ima gha sẹtin nọ vbe erhunmwu?

⁶ Ghẹ gi egbe erhunmwu na na wọọ ruẹ, u ghi vbe gha nọ emwi ne u wa gualọ zẹẹ. (Luk 18:1; Rom 12:12) U sẹtin rinmwian e Jehova inugba nọ khin vbe ẹdẹ nọ ru iyobọ nuẹn, ne u sẹtin gha ghee egbuẹ zẹvbe ne Jehova ya ghee ruẹ. Ugbẹnso, u na gha roro ẹre wẹẹ, u i mwẹ esa ne u ye, ọ gha lọghọ ne u sẹtin yayi wẹẹ, e Jehova hoẹmwẹ ruẹ. Sokpan, ghẹ mianmian wẹẹ, e Jehova kpọlọ sẹ ekhọe ruẹ. (1 Jọn 3:​19, 20) Irẹn rẹn ruẹ sẹ vbene u rẹn egbuẹ; ọ bẹghe emwi vbe egbuẹ ne u i sẹtin bẹghe. (1 Sam 16:7; 2 Krọ 6:30) Rhunmwuda ọni, “ta enegbe [ruẹ] hia ma rẹn,” u ghi rinmwiaẹn nọ ru iyobọ nuẹn ya sẹtin yayi wẹẹ, ọ hoẹmwẹ ruẹ. (Psm 62:8) Zẹvbe ne u ya na erhunmwu, te ọ khẹke ne u ru avbe emwi na khian ghi zẹ iro yan na.

7-8. De vbene ọsian ya rhie ilẹkẹtin ne ima hẹ wẹẹ, e Jehova hoẹmwẹ ima?

⁷ Ya ẹmwẹ e Jehova yi. Ọ ya orhiọn nọhuanrẹn ru iyobọ ne emwa ya gie vbene irẹn ye hẹ vbe Baibol. Ọ mwẹ odẹ ne kpataki ne ọsian ya gie Jehova, ọ khare wẹẹ: “E Jehova sikẹ iran ne agbọn zẹ ọre ẹtin. Ọ vbe miẹn iran hia ne ẹtin emwi hia fo nẹ fan.” (Psm 34:18) Deghẹ emwi na gbe ruẹ ẹtin mu otọ, u sẹtin do gha roro ẹre wẹẹ, uwẹ ọkpa ẹre ọ ghi rrọọ. Sokpan, e Jehova yan rẹn wẹẹ, egbe ẹghẹ vbenian ẹre irẹn ya sikẹ ruẹ sẹ, rhunmwuda ọ rẹnrẹn wẹẹ, u gele gualọ iyobọ irẹn. Vbe ihuan ọvbehe ne Devid gbẹn, ọ na kha wẹẹ: “Tue ameve mwẹ ye uwu ọgọ ohian ruẹ.” (Psm 56:8) E Jehova rẹn emwi ne u la gberra. Ọ mwẹ ẹmwẹ ruẹ vbe orhiọn, ọ vbe dae vbe ọ gha bẹghe ẹre wẹẹ, u rre uwu ọlọghọmwa. Te ọ yevbe na miẹn wẹẹ, ọ koko ameve ruẹ ye uwu ọgọ ohian, aro nọ ghaan ẹre ọ ya ghee ẹre, zẹvbe ne ọmwa nọ mu okhian rrie ehe ya ya aro nọ ghaan ghee amẹ nọ rre uwu ọgọ ohian rẹn. Psalm 139:3 khare wẹẹ: “[E Jehova] rẹn emwi ne I ru hia.” E Jehova bẹghe emwi ne u ru hia, sokpan, nọ maan nọ rrọọ ẹre ọ rhie aro tua. (Hib 6:10) Vbọzẹ? Rhunmwuda aro nọ ghaan ẹre ọ ya ghee ẹrhiọn ne ima ya ru emwi nọ gha ya ẹko rhiẹnrhiẹn irẹn.a

⁸ Ma ghaa tie ẹmwẹ igiọdu nọ rre avbe ako ọghe ebe nọhuanrẹn na, ọ ghi yevbe na miẹn wẹẹ, te Jehova tama ima wẹẹ: “I hoo ne u rẹn wẹẹ, I hoẹmwẹ ruẹ, I vbe mwẹ ẹmwẹ ruẹ vbe orhiọn.” Sokpan, zẹvbe ne ima ka tae sin, Esu hoo ne u yayi wẹẹ, e Jehova ma hoẹmwẹ ruẹ. Rhunmwuda ọni, adeghẹ a na miẹn wẹẹ, u gbe awawẹ deghẹ e Jehova hoẹmwẹ ruẹ, u ghi nọ egbuẹ wẹẹ, ‘De ọmwa ne I gha ya ẹmwẹ ọnrẹn yi, “erha ohoghe” nọ ra, ra “Osa ọghe ẹmwata”?’​—Jọn 8:44; Psm 31:5.

9. De ilẹkẹtin ne Jehova rhie ne emwa ni hoẹmwẹ ọnrẹn? (Ẹksodọs 20:​5, 6)

⁹ Gha muẹn roro aro ne Jehova ya ghee emwa ni hoẹmwẹ ọnrẹn. Gi ima ghee emwi ne Jehova tama e Mozis kevbe Ivbi Izrẹl. (Tie Ẹksodọs 20:​5, 6.) E Jehova yan rẹn wẹẹ, irẹn gha ye gha rhie ahoẹmwọmwa nẹi beghe ma emwa ni hoẹmwẹ irẹn. Ọna ya ima rẹn wẹẹ, ma i khian sẹtin hoẹmwẹ Osa ọghe ẹmwata ne ima ga, nẹ ghẹ vbe hoẹmwẹ ima werriegbe. (Neh 1:5) Rhunmwuda ọni, adeghẹ u na gha gbe awawẹ vbe ugbẹnso deghẹ e Jehova gele hoẹmwẹ ruẹ, te ọ khẹke ne u nọ egbuẹ wẹẹ, ‘Mẹ kue hoẹmwẹ e Jehova?’ Iyeke ọni, u ghi mu ọna roro: Deghẹ u hoẹmwẹ ọnrẹn, u na vbe gha hia ne u gha ru emwi nọ yẹẹ ọre, u ghi gha mwẹ ilẹkẹtin wẹẹ, irẹn wa vbe hoẹmwẹ ruẹ ẹsẹse. (Dan 9:4; 1 Kọr 8:3) Ọni rhie ma wẹẹ, adeghẹ u ma gbe awawẹ ye ahoẹmwọmwa ne u mwẹ ne Jehova, vbua khian ghi gu gbe awawẹ ye ahoẹmwọmwa ne Jehova mwẹ nuẹn? U gha sẹtin gha mwẹ ilẹkẹtin wẹẹ, e Jehova hoẹmwẹ ruẹ ẹsẹsẹmwẹse, ẹ i khian vbe sẹ ruẹ rae ẹdẹ.

10-11. De aro ne Jehova hoo ne u ya gha ghee izọese adẹwerriegbe? (Galetia 2:20)

¹⁰ Muẹn roro vbene izọese adẹwerriegbe ru ekpataki sẹ hẹ. Izọese adẹwerriegbe ọre ẹse nọ ghi hin usi sẹ ne Jehova ru ne emwa nagbọn. (Jọn 3:16) Sokpan, ẹse ne Jehova ru ne uwẹ tobọ ruẹ nọ ra? Ẹẹn! Gi ma guan kaẹn igiemwi ọghe ukọ ighẹ e Pọl. Yerre wẹẹ, ọ ru orukhọ nọ wegbe ni bun ọ ke do khian Ovbi Otu e Kristi, ọ ghi vbe khian Ovbi Otu e Kristi nẹ, ọ mwẹ uyinmwẹ eso nọ ghaa gu vẹn. (Rom 7:​24, 25; 1 Tim 1:​12-14) Ọrheyerriọ, ọ keghi do gha ghee izọese adẹwerriegbe zẹvbe ẹse ne Jehova ru ne irẹn. (Tie Galetia 2:20.) Vbe yerre wẹẹ, e Jehova ẹre ọ ya orhiọn nọhuanrẹn dia e Pọl ya gbẹn ẹmwẹ na ye Baibol. Te a gbẹn emwi hia ni rre Baibol ye otọ na ya ma ima emwi. (Rom 15:4) Ẹmwẹ ne Pọl tae ya ima rẹn aro ne Jehova hoo ne u ya gha ghee izọese adẹwerriegbe, ọni ọre ne u gha ghee ẹre zẹvbe ẹse ne Jehova ru nuẹn. U ghaa ya aro vbenian ghee izọese adẹwerriegbe, ọ gha ya ruẹ gha mwẹ ilẹkẹtin nọ wegbe wẹẹ, e Jehova hoẹmwẹ ruẹ.

¹¹ Ma wa ya ekhọe hia kpọnmwẹ e Jehova nọ na gie Jesu gha die agbọn na nọ do wu ne ima. Sokpan, emwi ọvbehe nọ ya Jesu gha die agbọn na ọre nọ do ta ẹmwata vbekpa Osanobua. (Jọn 18:37) Usun ẹmwata ne Jesu ma emwa re, ọre wẹẹ, e Jehova hoẹmwẹ ima ne ivbi ẹre.

VBENE JESU YA RU IYOBỌ NE IMA YA GHA MWẸ ILẸKẸTIN WE JEHOVA HOẸMWẸ IMA

12. Vbọzẹ ne ima gha na sẹtin ya emwi hia ne Jesu tae vbekpa e Jehova yi?

¹² Vbe Jesu rre uhunmwu otagbọn na, te ọ wa gha gbe ẹre otiti, nọ gi emwa rẹn aro ọmwa ne Jehova khin. (Luk 10:22) Te ọ wa khẹke ne ima ya emwi hia ne Jesu ta vbekpa e Jehova yi. Rhunmwuda, Jesu vbe Jehova ẹre ọ ghi gu obọ egbe sẹ, ọ kpẹẹ re ne iran eva ke gba gha rrọọ vbe ẹrinmwi ọ ke gha die agbọn na. (Kọl 1:15) Nọnaghiyerriọ, Jesu wa rẹn wẹẹ, e Jehova hoẹmwẹ ivbi ẹre ni ya ekhọe hia gae. De vbene Jesu ya ru iyobọ ne emwa ọvbehe hẹ ne iran mieke na yayi wẹẹ, Jehova hoẹmwẹ iran?

13. De aro ne Jesu hoo ne ima ya gha ghee Jehova?

¹³ Jesu hoo ne ima gha ya aro ne irẹn ya ghee Jehova ghee ẹre. Ọ gberra igba 160 ne Jesu tie Jehova “Erha” vbe Ebe Enẹ Ni Ta Okha Ọghe Jesu. Vbe deba ọni, vbe Jesu gu erhuanegbe ẹre guan, ọ keghi tie Jehova ‘Erha iran’ ra ‘Erha iran nọ rre ẹrinmwi.’ (Mat 5:16; 6:26) E study note ọghe ebe Matiu 5:16 khare wẹẹ: “Avbe eguọmwadia Osanobua wa mobọ gha loo okpe eni ni bun ya gie Jehova, vbe na ghee, ‘Oghodua,’ ‘Enọ Yo Sẹ,’ kevbe ‘Ayi Nọ Yi Emwi Hia,’ sokpan, ne Jesu na mobọ gha tie Osanobua ‘Erha’ ya ima rẹn vbene Jehova hoẹmwẹ eguọmwadia ẹre hẹ.” Ọ vẹ na rẹn wẹẹ, Jesu hoo ne ima gha ghee Jehova vbene irẹn ya ghee ẹre​—ọni ọre ne ima gha ghee Jehova zẹvbe Erha nọ hoẹmwẹ ivbi ẹre kevbe nọ ya aro nọ ghaan ghee iran. Gi ima zẹ iro yan igbava ne Jesu ya tie Jehova “Erha.”

14. De vbene Jesu ya rhie ẹre ma wẹẹ, aro nọ ghaan ẹre Jehova ya ghee dọmwadẹ ima? (Matiu 10:​29-31) (Vbe ya ghee efoto.)

¹⁴ Vbe okaro, gi ima guan kaẹn ẹmwẹ ne Jesu tae vbe ebe Matiu 10:​29-31. (Tie ẹre.) Avbe ahianmwẹ negiẹrẹ na tie ẹre sparro i sẹtin hoẹmwẹ e Jehova, iran i vbe sẹtin gae. Ọrheyerriọ, Erha ima ya aro nọ ghaan ghee sparro sẹrriọ wẹẹ, ọkpa kẹkan i de fua nẹ ghẹ rẹn. Inu ghi nọ ne dọmwadẹ eguọmwadia ẹre ni gae rhunmwuda we iran hoẹmwẹ ọnrẹn, te Jehova wa hoẹmwẹ iran, ọ vbe gbaroghe dọmwadẹ ọghẹe vbe uwu iran! E study note ọghe uviẹn ọnrẹn 30 ghi guan kaẹn ẹmwẹ nọ rre uviẹn na, nọ khare wẹẹ, “Uhiẹn, ọ rẹn inu eto nọ rre uwa uhunmwu,” ọ na kha wẹẹ, “Ne Jehova na rhie aro sẹ otọ vbe egbe avbe emwi nekherhe vbenian vbe egbe ima rhie ẹre ma wẹẹ, ọ mwẹ ẹmwẹ dọmwadẹ eguọmwadia ẹre vbe orhiọn.” Ọghe ne ẹmwata, e Jesu hoo ne ima rẹn wẹẹ, aro nọ ghaan ẹre Erha ima nọ rre ẹrinmwi ya ghee ima.

15. De emwi ne ẹmwẹ ne Jesu ta vbe ebe Jọn 6:44 ma ima re vbekpa e Jehova?

¹⁵ Gi ima vbe guan kaẹn ẹghẹ ọvbehe ne Jesu ya tie Jehova “Erha.” (Tie Jọn 6:44.) Erhaa nọ rre ẹrinmwi ẹre ọ fẹko si ruẹ gha die odẹ ọghe ẹmwata na. Vbọzẹ nọ na ru vberriọ? Rhunmwuda ọ bẹghe ẹre wẹẹ, ọmwa nọ mwẹ ekhọe ata ẹre u khin. (Iwinna 13:48) E study note ọghe Jọn 6:44 khare wẹẹ, egbọre ẹmwẹ ne Jerimaia tae nọ re ako ebe nọhuanrẹn ne ako iruẹmwi na hẹnhẹn egbe yan, ẹre Jesu ghaa guan kaẹn vbe ọ ta ẹmwẹ na, e Jerimaia khare wẹẹ: “I keghi ye gha mwẹ ahoẹmwọmwa nẹi beghe daa ruẹ.” (Jer 31:3; yae taa Hosia 11:4.) Ọna rhie ma wẹẹ, ọ mwẹ emwi esi ne Jehova ne Erha ima nọ rre ẹrinmwi bẹghe vbe egbuẹ, ọ gha khọnrẹn wẹẹ, uwẹ tobọ uwẹ i bẹghe ẹre.

16. (a) De emwi ne Jesu hoo nọ gi ima rẹn, kevbe wẹẹ, vbọzẹ nọ na khẹke ne ima mu ẹtin yan rẹn? (b) Vbọ khian ru iyobọ nuẹn ya gele sẹtin yayi wẹẹ, e Jehova ọre Erha ne ima hoo ne ima gha mwẹ? (Ya ghee ẹkpẹti nọ khare wẹẹ, “Erha Ne Ima Hia Hoo Ne Ima Gha Mwẹ.”)

¹⁶ Vbe Jesu khare wẹẹ, Erha ima ẹre Jehova khin, te ọ yevbe nọ ghaa kha wẹẹ: “E Jehova i wa re Erha mwẹ; Erhaa vbe nọ. Kevbe wẹẹ, I hoo ne I gu ruẹ rẹn wẹẹ, ọ hoẹmwẹ ruẹ, ẹ i vbe ya ẹmwẹ ruẹ ku.” Rhunmwuda ọni, ẹghẹ ke ẹghẹ ne u ya gbe awawẹ deghẹ e Jehova gele hoẹmwẹ ruẹ, u ghi nọ egbuẹ wẹẹ, ‘Ẹ i re te ọ khẹke ne I mu ẹtin yan ẹmwẹ ne Ovbi Osanobua nọ re ọmwa nọ ghi rẹn Erha ima sẹ tae vbekpa ẹre ra, ugbẹnvbe a miẹn wẹẹ, ẹmwata ẹre ọ ta vbe ẹghẹ hia?’​—1 Pit 2:22.

YE GHA RU EMWI NỌ GHA YA RUẸ YA EKHỌE HIA YAYI WẸẸ, E JEHOVA HOẸMWẸ RUẸ

17. Vbọzẹ nọ na khẹke ne ima ye gha ru emwi nọ gha ya ima ya ekhọe hia yayi wẹẹ, e Jehova hoẹmwẹ ima?

¹⁷ Te ọ khẹke ne ima hia ne ima gha ru emwi nọ gha ya ima yayi wẹẹ, e Jehova hoẹmwẹ ima. Zẹvbe ne ima ka tae sin, te Esu ne eghian ima khian ye gha ru emwi ero nọ mieke na mu idobo ye ugamwẹ ne ima rhie ne Jehova. E Setan keghi hia vbe odẹ ke odẹ ne ima yayi wẹẹ, e Jehova ma hoẹmwẹ ima, ne ima mieke na sẹ e Jehova rae. Ma i khian gi obọ Setan ke ukhunmwu ne ima!​—Job 27:5.

18. Vbua khian ru ne u mieke na gele yayi wẹẹ, e Jehova hoẹmwẹ ruẹ?

¹⁸ Ne ima mieke na sẹtin yayi wẹẹ, e Jehova hoẹmwẹ ima, te ọ khẹke ne ima gha na erhunmwu gie Jehova nọ ru iyobọ ne ima ya gha ghee egbe ima vbene irẹn ya ghee ima. Muẹn roro vbene emwa ni gbẹn e Baibol ya gi ima rẹn vbene Jehova hoẹmwẹ ima sẹ hẹ. Muẹn roro aro ne Jehova ya ghee emwa ni hoẹmwẹ ọnrẹn; ọ vbe hoẹmwẹ iran werriegbe. Ghẹ mianmian evbọzẹe ne u gha na sẹtin gha ghee izọese adẹwerriegbe zẹvbe ẹse ne Jehova ru ne uwẹ tobọ uwẹ. Gele yayi wẹẹ, e Jehova ọre Erhaa nọ rre ẹrinmwi zẹvbe ne Jesu khare. Ẹghẹ nii, ọmwaikọmwa gha ghi nọ ruẹ wẹẹ: “Uwẹ gele yayi we Jehova hoẹmwẹ ruẹ ra?” u ghi sẹtin si agbada vbe unu kha wẹẹ: “Ẹn, ọ hoẹmwẹ mwẹ! I vbe hia vbene ẹtin mwẹ sẹ ne I gha rhie ẹre ma vbe ẹdẹgbegbe wẹẹ, I hoẹmwẹ ọnrẹn!”