Ahoẹmwọmwa Ọghe Osanobua I Fafa

1-2. De ọlọghọmwa ne etẹn ni bun werriẹ aro daa?

GIA kha wẹẹ, okọ rre uwu ẹzẹ vbe ẹghẹ ne okpẹhoho ya la. Ẹzẹ nii na gha bi okọ nii yo bi ẹre rre. Ehe ke ehe ne ẹzẹ nii bi okọ nii yo ẹre okọ nii khian gha rrie, vbe ẹ i re te ọmwa ya adẹn ematọn da ẹre yi. Adẹn ematọn ẹre ọ khian ya okọ nii deziẹn, ne ẹhoho ghẹ ghi bi ẹre yo bi ẹre rre.

² Vbe u ghaa werriẹ aro daa ọlọghọmwa nọ wegbe, ọ sẹtin yevbe na miẹn wẹẹ, te u yevbe na ghee okọ nii ne amẹ bi yo bi rre. Ugbẹnso, u sẹtin wa gha ghọghọ, ugbẹnso, iro ghi wa vbe han ruẹ, ọna rhie ma wẹẹ, vbe ẹghẹ eso u sẹtin gha mwẹ ilẹkẹtin wẹẹ, e Jehova hoẹmwẹ ruẹ, sokpan ẹghẹ eso, u ghi vbe gha gbawawẹ deghẹ e Jehova bẹghe emwi ne u la gberra. (Psm 10:1; 13:1) Ughaghe ọse ruẹ rhie igiọdu nuẹn, orhiọn ruẹ na ghi sẹ otọ vbe ẹghẹ eso. (Itan 17:17; 25:11) Sokpan, vbene u te rẹn, u na dọlegbe suẹn gha gbawawẹ. U sẹtin kue do gha roro ẹre deghẹ e Jehova ye ya aro nọ ghaan ghee ruẹ. Vbọ khian ru iyobọ nuẹn ya deziẹn vbene adẹn ematọn ya okọ deziẹn vbe u ghaa werriẹ aro daa edanmwẹ? Ọni nọ wẹẹ, vbọ khian ru iyobọ nuẹn, ya rẹn wẹẹ, e Jehova hoẹmwẹ ruẹ kevbe wẹẹ, ọ gu ruẹ rrọọ?

3. Zẹvbe nọ rre ebe Psalm 31:7 kevbe 136:1 vbọ re “ahoẹmwọmwa nẹi beghe,” kevbe wẹẹ, vbọzẹ ne ima gha na sẹtin kha wẹẹ, e Jehova ẹre ọ ghi rhie igiemwi nọ maan sẹ ye otọ vbe nọ dekaẹn na gha mwẹ ahoẹmwọmwa nẹi beghe? (Vbe ya ghee efoto.)

³ Emwi ọkpa nọ gha ru iyobọ nuẹn ya sẹtin deziẹn vbe u ghaa werriẹ aro daa edanmwẹ ọre deghẹ u na gha ye ẹre rre ahoẹmwọmwa nẹi beghe ne Jehova mwẹ. (Tie Psalm 31:7; 136:1.) Emwi ne “ahoẹmwọmwa nẹi beghe” demu ọre vbene ọmwa ya rhikhan mu ọmwa nọ hoẹmwẹ ọnrẹn vbe nẹi na sẹ ọmwa nii rae. Vbe nọ dekaẹn ọnọna, e Jehova ẹre ọ ghi rhie igiemwi nọ maan sẹ ye otọ. Uhiẹn e Baibol ghi gie Jehova, ọ na kha wẹẹ, ọ “vuọn ne ahoẹmwọmwa nẹi beghe.” (Ẹks 34:​6, 7) E Baibol vbe kha wẹẹ, e Jehova, “wa mwẹ ahoẹmwọmwa nẹi beghe daa emwa ni na erhunmwu” gie ẹre. (Psm 86:5) Ọna rhie ma wẹẹ, e Jehova i sẹ eguọmwadia ọghẹe rae! U ghaa yerre wẹẹ, e Jehova mwẹ ahoẹmwọmwa nẹi beghe daa ruẹ, ọ gha ru iyobọ nuẹn ya deziẹn vbe u ghaa werriẹ aro daa ọlọghọmwa.​—Psm 23:4.

YERRE WẸẸ ỌKPA VBE USUN EMWI NE IMA KA RUẸ VBE BAIBOL ỌRE AHOẸMWỌMWA NẸI BEGHE ỌGHE JEHOVA

4. Ya unu kaẹn emwi eso ne ima ka wa ruẹ vbe Baibol, kevbe emwi nọ si ẹre ne ima na ya ekhọe hia yaeyi.

⁴ Emwi ọvbehe nọ gha ru iyobọ nuẹn ya deziẹn vbe u ghaa werriẹ aro daa edanmwẹ ọre ne u gha yerre wẹẹ, ahoẹmwọmwa nẹi beghe ọghe Jehova keghi re ọkpa vbe usun emwi ne ima ka ruẹ vbe Baibol. Vbọ mobọ la ruẹ ekhọe vbe a gha wẹẹ, “imamwaemwi ne ima ka ruẹ vbe Baibol?” Egbọre emwi nọ la ruẹ ekhọe ọre emwi ne u he ruẹ vbe Ẹmwẹ ọghe Osanobua. Vbe igiemwi, u ruẹ ọre wẹẹ, eni ọghe Osanobua ọre Jehova, Jesu ọre ukpọmọkpa ọghe Osanobua, emwa ni wulo nẹ ma rẹn emwi rhọkpa kevbe wẹẹ, emwa nagbọn ra gha rre uhunmwu otagbọn na vbe paradais vbe etẹbitẹ. (Psm 83:18; Asan 9:5; Jọn 3:16; Arhie 21:​3, 4) Vbe u ghi do ya avbe imamwaemwi na yi, ọmwa rhọkpa ma ghi sẹtin ya imamwaemwi ohoghe mu ruẹ rẹrẹ. Vbọzẹ? Rhunmwuda u do bẹghe ẹre wẹẹ, imamwaemwi ẹmwata ẹre ehia khin. Deghẹ ima na rẹn wẹẹ, ọkpa vbe usun imamwaemwi nọ rre Baibol ne ima ka wa ruẹ ẹre ahoẹmwọmwa nẹi beghe ọghe Jehova khin, vbọ khian ya ru iyobọ ne ima ya gha mwẹ ilẹkẹtin wẹẹ, e Jehova hoẹmwẹ ima kevbe wẹẹ, ọ rẹn emwi ne ima la gberra? Ọna ẹre ima khian ghi zẹ iro yan nian.

5. Rhan otọ vbene ọmwa gha ya sẹtin bizugbe imamwaemwi ohoghe hẹ.

⁵ Vbe u da suẹn gha ruẹ e Baibol, vbọ ru iyobọ nuẹn ya bizugbe imamwaemwi ohoghe? Ọ gha kẹ, a ru iyobọ nuẹn ya rẹn alughaẹn nọ rre emwi ne ugamwẹ ruẹ ma ruẹ re kevbe emwi ne Baibol gele ta. Gi ma ghee igiemwi ọkpa: Gia kha wẹẹ, u ka yayi wẹẹ, Jesu ọre Osa ne Oghodua. Zẹvbe ne u ya ruẹ e Baibol, u na ghi do gha nọ egbuẹ wẹẹ, ‘Imamwaemwi na gele gba ra?’ Vbe u ghi ru ezanzan vbe Baibol nẹ, u na do bẹghe ẹre wẹẹ, ọ ma gba. Imamwaemwi ẹmwata ne u ghi ruẹ ọre wẹẹ: Jesu ọre “ọmọ ọdiọn vbe uwu emwi hia na yi,” irẹn ọre “ukpọmọkpa ọghe Osanobua.” Ọna ẹre u ghi ya rhie ihe imamwaemwi ohoghe ne u ka ruẹ. (Kọl 1:15; Jọn 3:18) Ọghe ne ẹmwata, imamwaemwi ohoghe sẹtin gha re “emwi ni wegbe,” ọ wa vbe lọghọ na sẹtin do guọghọ ehia sẹ otọ. (2 Kọr 10:​4, 5) Sokpan, vbe u ghi bizugbe imamwaemwi ohoghe nẹ, u ma ghi dọlegbe yaeyi.​—Fil 3:13.

6. Vbọzẹ ne ima gha na sẹtin gha mwẹ ilẹkẹtin wẹẹ, “etẹbitẹ ẹre ahoẹmwọmwa [ọghe Jehova] khin”?

⁶ U gha sẹtin ru emwi vbenian vbekpa emwi ne Baibol ma ima re vbe nọ dekaẹn ahoẹmwọmwa ne Jehova mwẹ ne ima. U ghaa gbawawẹ deghẹ e Jehova hoẹmwẹ ruẹ vbe u ghaa rre uwu ọlọghọmwa nọ egbuẹ wẹẹ, ‘Emwi ne I mu roro na gba ra?’ Iyeke ọni, u ghi ghee ẹre deghẹ iziro ruẹ gua emwi nọ rre ebe Psalm 136:1 ro, nọ re ako ebe nọhuanrẹn ne ako iruẹmwi na hẹnhẹn egbe yan. Vbọzẹ ne ako nii na kha wẹẹ, “etẹbitẹ ẹre ahoẹmwọmwa [ọghe Jehova] khin”? Vbe deba ọni, vbọzẹ ne ifiẹmwẹ na ighẹ “etẹbitẹ ẹre ahoẹmwọmwa rẹn khin” na ladian igba 26 vbe ebe Psalm 136? Zẹvbe ne ima he ruẹ ọre sin, ahoẹmwọmwa nẹi beghe ne Jehova mwẹ ne emwa rẹn keghi re ọkpa vbe usun imamwaemwi ne ima ka ruẹ vbe Baibol, te ọ wa vbe yevbe na ghee avbe imamwaemwi ọvbehe ne u ka miẹn yi vbe Baibol. Ọ ma zẹdẹ khẹke ne u gha roro ẹre wẹẹ, u i mwẹ esa ne u ye vbe aro e Jehova kevbe wẹẹ, e Jehova ma hoẹmwẹ ruẹ, rhunmwuda, iziro na ma gba. Bizugbe iziro vberriọ, vbene u gha vbe bizugbe avbe imamwaemwi ohoghe ọvbehe!

7. De ako eso vbe Baibol nọ ya ima rẹn wẹẹ, e Jehova hoẹmwẹ ima?

⁷ Ako ni bun ọvbehe wa ye rre Baibol nọ ya ima rẹn wẹẹ, e Jehova hoẹmwẹ ima. Vbe igiemwi, Jesu khama erhuanegbe ẹre wẹẹ: “Wa hin usi sẹ e sparro ni bun.” (Mat 10:31) E Jehova vbe tobọ ẹre tama emwa rẹn wẹẹ: “I gha ya uwa wegbe, I gha ru iyobọ ne uwa, I gha ya obọ erha ọmwa mwẹ nọ gbae da uwa yi.” (Aiz 41:10) Ẹmwẹ ne Jehova vbe Jesu ta na wa ya ima mwẹ ilẹkẹtin. Jesu ma kha wẹẹ, ‘Ọ gha kẹ, wa hin usi sẹ avbe sparro,’ e Jehova ma vbe kha wẹẹ, ‘Egbọre, I gha ru iyobọ ne uwa.’ Nọghayayerriọ, iran keghi kha wẹẹ: “Wa hin usi sẹ e sparro ni bun” kevbe wẹẹ, “I gha ru iyobọ ne uwa.” Adeghẹ u na gha gbawawẹ deghẹ e Jehova hoẹmwẹ ruẹ vbe u ghaa rre uwu ọlọghọmwa, avbe ako vbenian gha sẹtin fu ruẹ ẹko rre, ọ ghi vbe ya ruẹ rẹn wẹẹ, e Jehova hoẹmwẹ ruẹ. Ẹmwata ne uhunmwu ẹmwẹ ẹre ọ rre avbe ako na. U ghaa gbawawẹ, u ghi muẹn ye erhunmwu, u ghi vbe gha tie avbe ako na guan kaẹn na, u gha ru vberriọ, u ghi vbe sẹtin ta ẹmwẹ nọ rre ebe 1 Jọn 4:16 nọ khare wẹẹ: “Ma tobọ ima do rẹn nẹ wẹẹ Osanobua hoẹmwẹ ima, ma wa vbe yaeyi.”a

8. De emwi ne u gha sẹtin ru adeghẹ u na gha gbawawẹ vbe ugbẹnso deghẹ e Jehova hoẹmwẹ ruẹ?

⁸ Sokpan, deghẹ ima ru ena hia nẹ ma na ye gha gbawawẹ deghẹ e Jehova hoẹmwẹ ima, de emwi ne ima khian ghi ru? Ya emwi ne u mu roro taa emwi ne u rẹnrẹn. A sẹtin miẹn wẹẹ, emwi ne u mu roro ma gba, sokpan, ẹmwata ne uhunmwu ẹmwẹ ẹre emwi ne Baibol ma ima re vbekpa ahoẹmwọmwa ọghe Jehova khin. Adeghẹ ima ma yayi wẹẹ, e Jehova hoẹmwẹ ima, ọ rhie ma wẹẹ, ma ma yayi we Jehova ọre ahoẹmwọmwa.​—1 Jọn 4:8.

GHA YERRE WẸẸ E JEHOVA “HOẸMWẸ” RUẸ

9-10. De emwi ne Jesu ghaa guan kaẹn vbe ọ khare wẹẹ: “Evbavba tobọre hoẹmwẹ uwa,” zẹvbe nọ rre ebe Jọn 16:​26, 27? (Vbe ya ghee efoto.)

⁹ Ma gha ghee ẹmwẹ ne Jesu tama erhuanegbe ẹre, ma gha wa miẹn emwi kpataki ruẹ vbekpa ahoẹmwọmwa ne Jehova mwẹ ne ima, ọ wẹẹ: “Evbavba tobọre hoẹmwẹ uwa.” (Tie Jọn 16:​26, 27.) Ẹ i re te Jesu ta ẹmwẹ na ne erhuanegbe ẹre mieke na gha ghọghọ. Ẹmwẹ na ta sẹ evba rhie ẹre ma wẹẹ, ẹ i re vbene emwi ye iran hẹ ẹre Jesu ghaa guan kaẹn sọkpan, ẹmwẹ erhunmwu ẹre Jesu ghaa guan kaẹn.

¹⁰ Te Jesu da wa tama avbe erhuanegbe ẹre ne iran gha ya eni irẹn na erhunmwu, sokpan ne iran ghẹ na erhunmwu gie irẹn. (Jọn 16:​23, 24) Te ọ wa khẹke ne iran rẹn ọnọna. Jesu ghi rhiọ kpaegbe nẹ, a sẹtin miẹn wẹẹ, erhuanegbe ẹre ghaa hoo ne iran na erhunmwu gie Jesu. Rhunmwuda, ọse iran ẹre Jesu ghaa khin. Iran sẹtin gha roro ẹre wẹẹ, rhunmwuda ne Jesu na hoẹmwẹ iran, ẹ i mwẹ ọ ma họn erhunmwu iran, ọ ghi vbe rinmwian Erhae nọ ru emwi ne iran nọ rẹn. Vbọrhirhighayehẹ, Jesu tama iran wẹẹ, ne iran ghẹ gha mwẹ egbe iziro vberriọ. Vbọzẹ? Rhunmwuda, ọ wẹẹ: “Evbavba tobọre hoẹmwẹ uwa.” Ẹmwata na keghi re ọkpa vbe usun emwi ne ima ka wa ruẹ vbe Baibol vbekpa erhunmwu. Muẹn roro vbene ọna ya kaan ruẹ hẹ: U ruẹ ọre nẹ vbe Baibol aro ọmwa ne Jesu khin kevbe wẹẹ, Jesu hoẹmwẹ ruẹ. (Jọn 14:21) Sokpan, vbe na ghee erhuanegbe Jesu, u gha sẹtin ya ekhọe hia na erhunmwu gie Osanobua rhunmwuda, u rẹnrẹn wẹẹ, irẹn “tobọre hoẹmwẹ” ruẹ. Ẹghẹ ke ẹghẹ ne u ya na erhunmwu gie Jehova te u rhie ẹre ma wẹẹ, u ya ekhọe hia ya ẹmwẹ na yi.​—1 Jọn 5:14.

HIA NE U RẸN EMWI NỌ YA RUẸ GBAWAWẸ

11. Vbọzẹ nọ na ya Esu ghọghọ vbe ima ghaa gbawawẹ deghẹ e Jehova hoẹmwẹ ima?

¹¹ De emwi nọ ya ima gbawawẹ deghẹ e Jehova gele hoẹmwẹ ima? U sẹtin kha wẹẹ, Esu nọ, u ma wa ta ohoghe deghẹ u na kha vberriọ. Te Esu “gualọ ọmwa nọ khian gbe re,” kevbe wẹẹ, te ọ ya Esu ghọghọ vbe ima ghaa gbawawẹ deghẹ e Jehova hoẹmwẹ ima. (1 Pit 5:8) Rhunmwuda ahoẹmwọmwa ne Jehova mwẹ ne ima ẹre ọ gu kpemehe izọese adẹwerriegbe, sokpan Esu hoo ne ima gha roro ẹre wẹẹ, ma ma sẹ na gha ru egbe ẹse vberriọ na. (Hib 2:9) De ọmwa nọ khian gha ghọghọ deghẹ ima na gha gbawawẹ deghẹ e Jehova hoẹmwẹ ima? Esu nọ. De ọmwa nọ khian vbe gha ghọghọ deghẹ egbe na wọọ ima sẹrriọ wẹẹ, ma na sẹ e Jehova rae? Esu vbe nọ. Esu hoo ne ima gha roro ẹre wẹẹ, e Jehova ma hoẹmwẹ ima, sokpan irẹn ẹre Jehova ma hoẹmwẹ ọnrẹn. Ọkpa vbe usun “emwi ero” ne Esu mobọ wa ru ọre nọ na hia nọ ya ima gha roro ẹre wẹẹ, e Jehova ma hoẹmwẹ ima kevbe wẹẹ, ma i mwẹ esa ne ima ye ne Jehova. (Ẹfis 6:11) Ma gha rẹn emwi ne Esu hoo nọ ru, ọ gha gua ima kpa ya “gha gbe Esu odan.”​—Jems 4:7.

12-13. De vbene orukhọ ne ima re vbe ukhu gha ya sẹtin ya ima gha gbawawẹ deghẹ e Jehova gele hoẹmwẹ ima?

¹² Emwi ọvbehe ye rrọọ nọ ya ima gbawawẹ deghẹ e Jehova gele hoẹmwẹ ima. Vbe ọni a khin? Ọni ọre orukhọ ne ima re vbe ukhu. (Psm 51:5; Rom 5:12) Orukhọ keghi ya ima khian oghian e Jehova. Ọ vbe mu ekhọe ima rhia, erriọ ẹre ọ vbe ya ya ima khuọnmwi.

¹³ Orukhọ ya ekhọe ima bu abe gbe ima, ọ ya ima si osi, ẹ i ya orhiọn ima sẹ otọ, ọ vbe ya ekhue mu ima. Ena hia gha sẹtin sunu daa ima deghẹ ima na ru orukhọ. Sokpan, ọ sẹtin vbe sunu daa ima rhunmwuda ne ima na rẹn wẹẹ, emwa orukhọ ẹre ima khin, rhunmwuda ẹ i re erriọ ẹre Jehova te ya yi ima. (Rom 8:​20, 21) Itaya imọto gha sẹ otọ, imọto nii i sẹtin khian ẹse, erriọ ẹre ọ vbe ye, rhunmwuda ne ima na re emwa ni ma gba, ma i khian sẹtin ru emwi hia nọ te khẹke ne ima gha ru. Ẹ i khabe ne ima na gbawawẹ ugbẹnso deghẹ e Jehova gele hoẹmwẹ ima. Ọ gha sunu vberriọ, ọ khẹke ne u yerre wẹẹ, “Osanobua ọghe ẹrinmwi kpọlọ ẹsẹse, ohan rẹn vbe mu ọmwa. Ọ mwẹ ahoẹmwọmwa nẹi beghe daa emwa ni hoẹmwẹ ọnrẹn, ọ vbe ru vbene ọ khare.”​—Neh 1:5.

14. U ghaa muẹn roro izọese adẹwerriegbe ne Jehova ru emwamwa rẹn, vbọ khian ya ru iyobọ nuẹn ne u ghẹ gha roro ẹre wẹẹ, e Jehova ma hoẹmwẹ ruẹ? (Rom 5:8) (Vbe ya ghee ẹkpẹti nọ khare wẹẹ, “Lẹẹ Ne ‘Erẹrẹ Nọ Lele Orukhọ Khian.’”)

¹⁴ Ẹmwata nọ rrọọ ọre wẹẹ, ugbẹnso, ma sẹtin gha gbawawẹ deghẹ e Jehova hoẹmwẹ ima. Na gbe ọdẹn na ta ẹmwata, ma ma te gele sẹ ne Jehova gha hoẹmwẹ ọnrẹn, ọna ẹre ọ si ẹre ne ahoẹmwọmwa nọ mwẹ daa ima na hin usi. Ẹ i re emwi ne ima ru ẹre ọ ya e Jehova hoẹmwẹ ima. Ọrheyerriọ, adẹwerriegbe ọghe Jesu keghi kpe orukhọ ọghe ima kua, rhunmwuda ahoẹmwọmwa ne Jehova mwẹ ne ima ẹre ọ na ru emwamwa na. (1 Jọn 4:10) Vbe yerre wẹẹ, emwa orukhọ ẹre Jesu rre do miẹn fan, ẹ i re emwa ni gbae. (Tie Rom 5:8.) Ma rhọkpa i khian sẹtin gha ru emwi nọ gbae, e Jehova ma vbe ya aro ye ọna. Ma gha rẹn wẹẹ, orukhọ ne ima he ru sẹtin ya ima gha roro ẹre wẹẹ, e Jehova ma hoẹmwẹ ima, ọ ghi gua ima kpa ya hia vbe odẹ ke odẹ ne orukhọ ghẹ ya ima gha mwẹ iziro nọ ma gba.​—Rom 7:​24, 25.

RHIKHAN MU E JEHOVA

15-16. De ilẹkẹtin ne ima gha sẹtin gha mwẹ adeghẹ ima na rhikhan mu e Jehova, kevbe wẹẹ, vbọzẹ? (2 Samuẹl 22:26)

¹⁵ E Jehova hoo ne ima “rhikhan” mu irẹn. (Diut 30:​19, 20) Ma gha ru vberriọ ma gha sẹtin gha mwẹ ilẹkẹtin wẹẹ, ọ gha vbe rhikhan mu ima. (Tie 2 Samuẹl 22:26.) Ma gha gele rhikhan mu e Jehova, ọ gha gele ru iyobọ ne ima ya sẹtin zin egbe ọlọghọmwa ne ima rhirhi gha ye.

¹⁶ Zẹvbe ne ima ta ẹre sin, emwi bun nọ gha ru iyobọ ne ima ya deziẹn vbe ima ghaa werriẹ aro daa ọlọghọmwa. Ma rẹnrẹn wẹẹ, e Jehova hoẹmwẹ ima kevbe wẹẹ, ọ gha ru iyobọ ne ima. Erriọ ẹre Baibol tae. Adeghẹ ima na gha gbawawẹ deghẹ e Jehova hoẹmwẹ ima, ẹmwata ne ima rẹnrẹn ẹre ọ khẹke ne ima gha mu roro, ẹ i re emwi ne ima roro we ọre ẹmwata. Wa gi ima ya ekhọe hia ya emwi ne Baibol tae yi, nọ na wẹẹ, etẹbitẹ ẹre ahoẹmwọmwa ọghe Jehova khin.