“U Miẹn Vbọ Rhiẹnrhiẹn Hẹ Na Sikẹ Osanobua!”

1-2. (a) Adeghẹ ima hoo ne ima gu ọmwa ru ọse, de emwi nọ khẹke ne ima ru? (b) Vbe ima khian zẹ iro yan vbe ako iruẹmwi na?

U MWẸ ọse nọ kakabọ sikẹ ruẹ ra? De vbene uwa ya khian ọse hẹ? Ọ gha kẹ, uwẹ vbe ọre miẹn egbe vbe ẹghẹ hia, u rẹn ọlọghọmwa nọ la gberra, u vbe rẹn emwi nọ yẹẹ ọre kevbe nẹi yẹẹ ọre. U vbe do bẹghe ẹre wẹẹ, ọmwa ne u gha sẹtin ya egbe taa ẹre nọ, rhunmwuda uyinmwẹ esi nọ mwẹ. Rhunmwuda ọni, u na ghi do hoẹmwẹ ọnrẹn.

² Na do sẹtin gha mwẹ ọse nọ maan i re iwinna ẹdẹ ọkpa. Na do sẹtin sikẹ e Jehova khuankhuankhuan i vbe re iwinna ẹdẹ ọkpa. Vbe ako iruẹmwi na, ma gha guan kaẹn vbene ima khian ya sẹtin sikẹ Osanobua sayọ hẹ, kevbe afiangbe ne ima khian lae miẹn. Gi ima ka guan kaẹn evbọzẹe nọ na maan ne ima sikẹ e Jehova nọ re ọse nọ ghi maan sẹ.

3. Vbọzẹ nọ na khẹke ne ima gha muẹn roro, afiangbe na lae miẹn vba gha sikẹ e Jehova? Ru igiemwi yọ.

³ Vbe nai na gbawawẹ, ma rẹnrẹn wẹẹ, ọ wa maan na sikẹ e Jehova. Sokpan ma gha gele muẹn roro vbene ọ maan hẹ na sikẹ e Jehova, ọ ghi gu ima kpa ya sikẹ ọre khuankhuankhuan. (Psm 63:​6-8) Vbe igiemwi, ma rẹnrẹn wẹẹ, evbare nọ maan, iku isasegbe, na gha rhie ẹghẹ ya hẹwẹ, kevbe na gha wọn amẹ nọ sẹ omwa wa mwẹ iyobọ nọkhua nọ ye ne ima. Ọrheyerriọ, emwa ni bun i ye ru avbe emwi na, ne iran ya gbaroghe egbe iran ẹse. Sokpan, ma ghaa muẹn roro vbe ẹghẹ hia, vbene avbe emwi na ru ekpataki sẹ hẹ, ọ gha ru iyobọ ne ima ya gha ru ẹre vbe ẹghẹ hia. Erriọ ẹre ọ vbe ye, ma sẹtin rẹn wẹẹ, ọ wa maan na sikẹ e Jehova, sokpan ma ghaa muẹn roro afiangbe na lae miẹn vba gha sikẹ e Jehova, ọ ghi gu ima kpa ya sikẹ ọre khuankhuankhuan.​—Psm 119:​27-30.

4. Zẹvbe nọ rre ebe Psalm 73:​28, de emwi ne ọsian ọkpa tae?

⁴ Tie Psalm 73:28. Ovbi e Livai nọ ghaa rre usun emwa ni so ihuan vbe ọgua Osa, ẹre ọ gbẹn Psalm 73. Ọ khọ wẹẹ, ọ wa ya ekhọe hia ga e Jehova vbe ukpo ni bun. Ọrheyerriọ, ọ na ye egbe ẹre kevbe emwa ọvbehe rre wẹẹ, “na sikẹ Osanobua” wa maan ne irẹn kevbe iran. De afiangbe eso na lae miẹn vba gha sikẹ Osanobua?

“NA SIKẸ OSANOBUA” KEGHI YA ỌMWA GHỌGHỌ

5. (a) Vbọzẹ nọ na ya ima ghọghọ, vbe ima gha sikẹ e Jehova? (b) Zẹvbe nọ rre ebe Itan 2:​6-16, ya unu kaẹn odẹ eso ne ẹwaẹn nọ ke obọ e Jehova rre gha ya sẹtin ru iyobọ nuẹn hẹ.

⁵ Vbene ima ya sikẹ Osanobua, erriọ ẹre ọyẹnmwẹ khian vbe ya gha sẹ ima. (Psm 65:4) Emwi bun nọ ya ima kha vberriọ. Vbe igiemwi, ma ghaa tie Baibol, ma na vbe gha ya emwi ne ima tie ru emwi, ma ghi gha mwẹ ẹwaẹn. Ẹwaẹn na ẹre ọ ghi ru iyobọ ne ima ya gha gban egbe ne emwi nọ gha sẹtin mu uyinmwẹ ima rhia, kevbe nọ gha sẹtin ya ima ru orukhọ nọ wegbe. (Tie Itan 2:​6-16.) Ẹ i khabe ne Baibol na kha wẹẹ: “Afiangbe nọ ne ọmwa nọ ghi do khian nọ wan, nọ ghi do gha mwẹ irẹnmwi.”​—Itan 3:13.

6. Vbọzẹ ne iro na han ọsian ọkpa?

⁶ Ẹmwata nọ rrọọ ọre wẹẹ, avbe ọsie Jehova vbe zẹdia khiẹ. Ọmwa nọ gbẹn Psalm 73 ghi suẹn gha mu avbe emwi nọ ma khianrẹn roro, ọ ma ghi gha ghọghọ. Ohu na gha muẹn, ọ na vbe gha gbọvo emwa dan, vbe ekhọe ọre, te emwi wa gha dunna ne emwa dan nẹi ga e Jehova. Iziro nọ ma gba nọ ghaa mwẹ ọre wẹẹ, emwa ni khọọ, kevbe emwa ni tọn egbe mu, ẹre ọ mwẹ egberranmwẹ, ẹre ọ fe, uhiẹn, iran ma vbe rẹn emwi na tie ẹre usẹ. (Psm 73:​3-7, 12) Ọna kpokpo ẹre orhiọn sẹrriọ wẹẹ, ọ na gha gbawawẹ deghẹ esa ye rrọọ ne irẹn gha ga e Jehova. Iro keghi han rẹn, ọ na kha wẹẹ: “Te imẹ ghi wa da egbe mwẹ yi kua kẹkan ra? Vbe ne I ima na ru orukhọ?”​—Psm 73:13.

7. De emwi nọ gha ru iyobọ ne ima deghẹ iro na han ima? (Vbe ya ghee efoto .)

⁷ Agharhemiẹn wẹẹ, iro han ọsian na, ọ ma gi egbe wọọ re. Ọ keghi zẹ emwi ru. Ọ na “gha rrie ọgua Osa,” evba ẹre Jehova na ghi dia iziro ọghẹe. (Psm 73:​17-19) E Jehova nọ re ọse nọ ghi sikẹ ima sẹ wa rẹn vbe ima ghaa khiẹ. Adeghẹ ima na na erhunmwu gie Jehova, ma na vbe gha lele adia nọ ya e Baibol kevbe iko ọghẹe rhie ne ima, ọ gha ru iyobọ ne ima ya sẹtin zin egbe vbe ima ghaa khiẹ ra vbe iro gha han ima. Ọ gha khọnrẹn ne osi kakabọ gha si ima, e Jehova gha sẹtin mu ima orhiọn sotọ.​—Psm 94:19.a

MA GHA “SIKẸ OSANOBUA” MA GHI GHA MWẸ ISỌKẸN, MA GHI VBE YA ARO YỌ WE EMWI GHA DUNNA VBE ODARO

8. De odẹ ọvbehe ne ima ya miẹn ere vbọ adeghẹ ima na sikẹ Osanobua?

⁸ Ọ mwẹ odẹ eva ọvbehe ne ima ya miẹn ere vbọ vbe ima gha sikẹ Osanobua. Nokaro, ọ ya ima mwẹ isọkẹn vbe ẹdagbọn ima. Nogieva, ọ ya ima ya aro yọ wẹẹ, emwi gha dunna vbe odaro. (Jer 29:11) Gi ima guan kaẹn emwi eva na sayọ.

9. Ma gha sikẹ e Jehova de vbene ọ ya ya ima mwẹ isọkẹn vbe ẹdagbọn ima?

⁹ Ma gha sikẹ Osanobua, ma ghi gha mwẹ isọkẹn. Emwa ni bun vbe ẹdẹnẹrẹ ni ma yayi we Osanobua rrọọ ma rẹn evbọzẹe ne emwa nagbọn na rre uhunmwu otagbọn na, iran vbe roro ẹre wẹẹ, ọ gha sẹ ẹghẹ, a gha ho emwa nagbọn hia bẹkun. Sokpan rhunmwuda emwi ne ima he ruẹ vbe Baibol, ma keghi do ya ekhọe hia yayi wẹẹ, “Osanobua rrọọ, kevbe wẹẹ, ọ vbe san iran ẹse ighẹ emwa ni ya ekhọe hia gualọe.” (Hib 11:6) Uhiẹn vbe ẹdẹnẹrẹ, ma wa mwẹ oghọghọ rhunmwuda, ma ru emwi na gu yi emwa nagbọn, ọni ọre ne ima na ga e Jehova nọ re Erha ima nọ rre ẹrinmwi.​—Diut 10:​12, 13.

10. Zẹvbe nọ rre ebe Psalm 37:29 de afiangbe nọ khian sẹ emwa ni mu ẹtin yan e Jehova obọ?

¹⁰ Nọ ne emwa ni bun, iran ma ya aro yọ wẹẹ, emwi gha dunna vbe odaro, emwi ne iran wa rhie aro tua ọre iwinna, ne iran biẹlẹ emọ, kevbe ne iran koko igho ne iran khian gha loo vbe iran gha zeki nẹ. Ọ ma zẹdẹ kaẹn iran deghẹ Osanobua rrọọ. Sokpan nọ ne emwa ni ga e Jehova, irẹn ọkpa ẹre iran ya aro kọ. (Psm 25:​3-5; 1 Tim 6:17) Ma wa mu ẹtin yan Osanobua nọ re ọse ima, ma vbe mwẹ ilẹkẹtin wẹẹ, ọ gha ru emwi hia nọ we irẹn khian ru ne ima. Usun emwi ne ima ya aro yi vbe odaro ọre ẹghẹ ne ima khian ya gha gae vbe etẹbitẹ vbe Paradais.​—Tie Psalm 37:29.

11. De afiangbe ne ima miẹn vbe ima gha sikẹ e Jehova, kevbe wẹẹ, de vbene ọ ye Jehova hẹ?

¹¹ Odẹ wa bun ne ima ya miẹn ere vbọ vbe ima gha sikẹ Osanobua. Vbe igiemwi, e Jehova yan rẹn wẹẹ, irẹn gha yabọ avbe ọsiọre ni roro iro fi uyinmwẹ werriẹ. (Aiz 1:18) Rhunmwuda ọni, esa i rrọọ ne ekhọe ima khian ya gha bu abe gbe ima rhunmwuda orukhọ ne ima ru vbe ẹghẹ nọ gberra. (Psm 32:​1-5) Ọ wa vbe sẹ ima ọyẹnmwẹ vbe ima ghaa ru emwi nọ ya ẹko rhiẹnrhiẹn e Jehova. (Itan 23:15) Ọghe ne ẹmwata, afiangbe ni bun ọvbehe wa rrọọ, vbe ima gha sikẹ e Jehova. Inọta nọ ghi rre evba nian ọre wẹẹ, de emwi ne ima gha ru nọ gha ya ima gha sikẹ e Jehova sayọ?

VBENE IMA KHIAN YA SẸTIN YE GHA “SIKẸ OSANOBUA”

12. De emwi eso ne u he ru, ne u mieke na sẹtin sikẹ e Jehova sayọ?

¹² Adeghẹ Ovbi Otu e Kristi nọ dinmwiamẹ nẹ ẹre u khin, ọni rhie ma wẹẹ, u ru emwi eso nẹ nọ ya ruẹ sikẹ e Jehova. U do rẹn ẹmwata vbekpa e Jehova kevbe Jesu Kristi, u roro iro fi uyinmwẹ werriẹ, u na mu ẹtin yan Osanobua, u na vbe hia ne u gha ru emwi nọ gua ahoo ọghẹe ro. Vbọrhirhighayehẹ, deghẹ ima hoo ne ima sikẹ Osanobua sayọ, te ọ khẹke ne ima ye gha ru avbe emwi na.​—Kọl 2:6.

13. De emwi eha nọ gha ru iyobọ ne ima ya gha sikẹ e Jehova sayọ?

¹³ De emwi nọ khian ru iyobọ ne ima, ne ima mieke na sẹtin ye gha sikẹ e Jehova sayọ? (1) Ọ khẹke ne ima ye gha ruẹ e Baibol ne egbe ima. Ma ghaa tie Baibol, ẹ i re emwi ne ima khian miẹn ruẹ vbekpa Osanobua ọkpa ẹre ima khian wa rhie aro tua. Nọghayayerriọ, te ọ khẹke ne ima rẹn emwi ne Jehova hoo ne ima gha ru. Ma ghi vbe gha ya ilele ni rre uwu Ẹmwẹ ọghẹe ru emwi. (Ẹfis 5:​15-17) (2) Ma ghi vbe gha ru emwi nọ gha ya amuẹtinyan ọghe ima wegbe sayọ, ọni nọ wẹẹ, ma ghi gha muẹn roro, emwi ughughan nọ rhie ẹre ma wẹẹ, e Jehova hoẹmwẹ ima ẹsẹsẹmwẹse. (3) Te ọ khẹke ne emwi nọ sọnnọ e Jehova gha sọnnọ ima, ma ghi vbe gha lẹẹ ne emwa nẹi ya ilele ọghẹe ru emwi.​—Psm 1:1; 101:3.

14. Zẹvbe nọ rre ebe 1 Kọrint 10:​31, de emwi eso ne ima gha sẹtin ru vbe ẹdẹgbegbe nọ gha ya ẹko rhiẹnrhiẹn e Jehova? (Vbe ya ghee efoto.)

¹⁴ Tie 1 Kọrint 10:31. Te ọ wa khẹke ne ima gha ru emwi nọ ya ẹko rhiẹnrhiẹn e Jehova vbe ẹghẹ hia. Ọna gberra na wa gha yo iko kevbe ikporhu kẹkan. Ọ vbe khẹke ne emwi ne ima ru vbe ẹdẹgbegbe gha re emwi nọ ya ẹko rhiẹnrhiẹn e Jehova. Vbe igiemwi, ma ghaa ta ẹmwata vbe emwi hia, ma na vbe gha ya emwi ne ima mwẹ ya ru ẹse ne emwa ọvbehe, ẹko ghi gha rhiẹnrhiẹn e Jehova. (2 Kọr 8:21; 9:7) Ọ vbe hoo ne ima gha rhie ẹre ma wẹẹ, ma gbọyẹmwẹ ye arrọọ, nọ ya ru ima ẹse. Ma gha vbe sikẹ e Jehova nọ ya arrọọ ru ima ẹse, deghẹ ima na gha begbe vbekpa evbare ne ima re kevbe ayọn ne ima da, kevbe deghẹ ima na gha gbaroghe egbe ima ne ima ghẹ mieke na mu emianmwẹ. Ma ghaa hia vbe odẹ ke odẹ ne ima gha ru emwi nọ yẹẹ e Jehova ọ gha khọnrẹn wẹẹ, emwi kherhe kẹkan nọ, ọ gha ya ima sikẹ e Jehova sayọ.​—Luk 16:10.

15. De obọ ne Jehova hoo ne ima ya gha mu emwa ọvbehe?

¹⁵ E Jehova ya obọ esi mu emwa esi kevbe emwa nẹi ru emwi esi. (Mat 5:45) Ọ vbe hoo ne ima gha ya obọ vbenian mu emwa ọvbehe. Vbe igiemwi, ọ ma khẹke ne ima gha “ta ọmwa rhọkpa ọtakhọ, ọ ma khẹke ne [ima] gha re emwa ni gui ẹzọ ẹzọ, . . . [ma] ghi vbe gha re emwa ni fu, ni ya obọ esi mu emwa hia.” (Taitọs 3:2) Nọnaghiyerriọ, ọ ma khẹke ne ima gha roro ẹre wẹẹ, ma maan sẹ emwa ọvbehe, rhunmwuda wẹẹ, ma i mwẹ iyayi ọkpa. (2 Tim 2:​23-25) Ma ghaa ya obọ esi mu emwa hia, ma na vbe gha mwẹ amuroro daa iran, ọ gha ya ima sikẹ e Jehova sayọ.

MA GHA SẸTIN “SIKẸ OSANOBUA” UHIẸN VBE IMA GHA RU ABAKURU

16. Vbe ẹghẹ eso ghi gberra nẹ, de vbene emwi ghi gha ye ọsian nọ gbẹn ebe Psalm 73 hẹ?

¹⁶ Sokpan adeghẹ u na ghi do gha roro ẹre wẹẹ, e Jehova ma ghi hoẹmwẹ ruẹ ghi vbo? Zẹvbe ne ima ka guan kaẹn rẹn sin, emwi vbenian vbe sunu daa ọmwa nọ gbẹn Psalm 73. Ọ keghi kha wẹẹ: “Iro te han mwẹ nẹ, te iyayi mwẹ khian ghi te wirua.” (Psm 73:2) Ọsian na tobọre kha wẹẹ, ekhọe irẹn ghaa “rriara” kevbe wẹẹ, irẹn na yevbe ọmwa nọ “kọn de ẹwe rua” vbe odaro e Jehova. (Psm 73:​21, 22) Te ọ ghi rhunmwuda abakuru ọghẹe gha roro ẹre wẹẹ, ọghe irẹn fo nẹ ra, ra we Jehova ma ghi hoẹmwẹ irẹn ra?

17. (a) De emwi ne ọsian ọkpa ru vbe ẹghẹ ne iro ya han rẹn? (b) De emwi ne ima miẹn ruẹ vbe okha ọghẹe? (Vbe ya ghee efoto.)

¹⁷ Adeghẹ ọsian nii ghaa roro ẹre wẹẹ, e Jehova fi iyeke gbe irẹn nẹ, ovbi ẹghẹ kherhe ẹre ọ ya gha mwẹ iziro na. Ọ khọ wẹẹ, vbe ẹghẹ ne iro ya han rẹn, ẹre ọ ya yerre wẹẹ, te ọ khẹke ne irẹn sikẹ Osanobua sayọ, ẹmwẹ nọ tae wa so igiẹ ye ọna vbe ọ khare wẹẹ: “Te ọ yevbe na miẹn wẹẹ I rre ehe ne [Jehova] ye vbe ẹghẹ hia; U keghi da mwẹ oberhọmwa yi. U ya ẹmwẹ ibude ruẹ su mwẹ, u gha vbe mu uyi yọ mwẹ egbe vbe okiekie.” (Psm 73:​23, 24) Ọ vbe khẹke ne ima lẹgbinna e Jehova nọ re okuta nọ wegbe, vbe ima gha bẹghe ẹre wẹẹ, amuẹtinyan ọghe ima beghe. (Psm 73:26; 94:18) Ọ gha khọnrẹn ne ima ru orukhọ nọ wegbe, ma gha ye sẹtin werriegbe bu e Jehova gha dee, rhunmwuda, ọ mu egbe nọ ya “ya orukhọ ọghe ima bọ ima.” (Psm 86:5) Iro gha han ima, ẹghẹ nii ẹre ọ wa ya khẹke ne ima ya sikẹ e Jehova sẹ.​—Psm 103:​13, 14.

“SIKẸ OSANOBUA” VBE ETẸBITẸ

18. Vbọzẹ ne ima na kha wẹẹ, te ima khian ye gha sikẹ e Jehova vbe etẹbitẹ?

¹⁸ Te ima khian ye gha sikẹ e Jehova, erriọ ẹre ima khian vbe ya gha ruẹ emwi ni bun vbekpa ẹre vbe etẹbitẹ. Vbe nọ dekaẹn ẹwaẹn ọghe Jehova kevbe irẹnmwi ọghẹe, e Baibol keghi kha wẹẹ, “de ọmwa nọ gha sẹtin rẹn otọ” ọre?​—Rom 11:33.

19. De igiọdu ne ebe Psalm 73 rhie ne ima?

¹⁹ Ebe Psalm 79:13 khare wẹẹ: “Ma ne emwa ruẹ ne oghẹn ohuan ruẹ gha kpọnmwọn ẹdẹdẹmwẹdẹ, ma ghi vbe gha rho ruẹ la ẹdẹ ni dee hia.” Adeghẹ u na vbe gha sikẹ e Jehova sayọ, u gha sẹtin gha mwẹ ilẹkẹtin wẹẹ, afiangbe ọghe etẹbitẹ gha sẹ ruẹ obọ, uwẹ gha vbe sẹtin kha wẹẹ: “Osanobua ọre okuta mwẹ, irẹn ọre emwi ọkpa ne I gbinna hoo.”​—Psm 73:26.