**Vbene A Ya Guẹ Sayọ vbe Iwinna Ikporhu—Vbene Ima Khian Ya Rhie ne Ebe Bible Teach Ladian Hẹ**

Evbọzẹ Ne Ọ Na Ru Ekpataki: Ne ebe Bible Teach keghi re emadogua ne kpataki vbe usun ebe ne ima loo ya ma emwa emwi. Vbọrhirhighayehẹ, a te miẹn wẹẹ, ima suẹn gha gu ọmwa ruẹ ne ebe, te ima gha ka rhie ne ebe nẹ. Rhunmwuda ọni, ọ khẹke ne ima hia guẹ vbe na ya rhie ne ebe Bible Teach ladian hẹ vbe ikporhu. (Itan 22:29) Odẹ nibun rrọọ ne ima gha loo ya rhie ne ebe ladian. Sokpan, ọ khẹke ne enọ ye iyẹn wewe loo enọ rẹn wẹẹ, ọ gha maan sẹ.

Vbene A Ya Ruẹ Hẹ:

Nọ inọta ne ọmwa gha mwẹ ẹkorhiẹnrhiẹnmwẹ yi, ya rhie ekhọe ọ yan owa ghee uhunmwu ebe ọkpa vbe ne ebe. U sẹtin kue loo ọkpa vbe avbe inọta ni rre omuhẹn ọghe dọmwadẹ uhunmwu ebe. Ọ yan owa gha ghi zẹ ewanniẹ nẹ, u ghi tie ako ọghe evbagbẹn nọhuanrẹn nọ guaero ma rẹn. Vbe iyeke ọni, u ghi rhie ẹre ekhọe ghee okhuẹn ọkpa nọ guan kaan ne uhunmwuta, uwa ghi gba ziro yan rẹn kuẹi.
Odẹ ọvbehe nu gha sẹtin vbe ya lae ọre, nu loo ẹmwẹ na gbẹnnẹ ye omuso ọghe ne ebe, ya guaekpa ẹkorhiẹnrhiẹnmwẹ ọghe ne ọ yan owa. Iyeke ọni, u ghi giẹre ma rẹn, ako nọ ye vbe ne ebe ighẹ ewanniẹ ne Baibol zẹ ye nẹ inọta. Vbe igiemwi, u sẹtin rhiẹre ekhọe ghee emwi ọhanabe nọ sunnu vbe ọ ma he kpẹẹ gbe nọ ladian vbe ugha iyẹn ọghe ẹvbo. U ghi gie ẹre rẹn wẹẹ, emwa nibun wa gualọ ewanniẹ ọghe avbe inọta ni rre ipapa 3. U sẹtin vbe kha wẹẹ, te ima mu otuẹ gie emwa vbe ẹdogbo na, na gie iran rẹn iyẹn nọma ọghe emwi nọ gha sunnu vbe odaro. Iyeke ọni, ma re avbe efoto ni rre ipapa 4-5, u ghi nọ rẹn wẹẹ, “vbuwe avbe eyan na hia, de nọ khin vbọ nu hoo ne aro ruẹ sẹ vbọ gha mwẹ amusẹ?” Odẹ ọvbehe nu gha vbe la ọre, nu tama rẹn wẹẹ, te ima wa mu otuẹ sẹ ọghe emwa vbe ẹdogbo na, rhunmwuda ima hoo ne ima ru iyobọ ne iran ya miẹn ewanniẹ ye avbe inọta ne kpataki nọ dekaan arrọọ. Vbe iyeke ọni, u ghi giẹre ma rẹn avbe inọta ni rre ototọ vbe ipapa 6, ẹghẹ nii u ghi nọ rẹn, enọ yẹẹ ọre sẹ vbọ.
Suẹn e Baibol na gu ọmwa ruẹ vbe ọwarọkpa. U sẹtin kha wẹẹ: “Ma keghi ma emwa re ighẹ ebe na, ne ima ya gu ọmwa ruẹ e Baibol. U he miẹn ebe na ẹdẹ ra? [U ghi ziengbe nọ guan.] Adeghẹ u mwẹ ẹghẹ kherhe, ọ gha yẹẹ mwẹ ni giẹre ma ruẹ, vbene ima ya ye ebe na ma ọmwa emwi hẹ, vbene ima gha na loo e Baibol ọghe obọ ruẹ.”

Danmwẹ Ọna Ghee vbe Uki Na:

Ruọre yotọ vbe iruẹmwi ẹgbẹe ọghuẹ vbe na khian ya rhie ne ebe ladian hẹ.
Vbe u gha rre ikporhu, tama etẹn ọvbehe emwi nu muegbe ẹre ke owa rre, nu khian ya kporhu. (Itan 27:17) Fi ẹmwẹ ne u khian ta werriẹ, deghẹ ọ ma deyọ.