UYINMWẸ ỌGHE IMA NE IVBIOTU E KRISTI
Vbene A Ya Guẹ Sayọ Vbe Iwinna Ikporhu—Ru Iyobọ Ne Emwa ‘Ni Mwẹ Ekhọe Ata’ Ne Iran Do Khian Erhuanegbe Jesu
EVBỌZẸE NE Ọ NA RU EKPATAKI: E Jehova keghi ya ikpẹ ọghe ẹmwata waan vbe ekhọe ‘emwa ni mwẹ ekhọe ata ni hoo ne iran gha mwẹ arrọọ ọghe etẹbitẹ.’ (Iwinna 13:48; 1 Kọr 3:7) Ma keghi deba e Jehova winna, deghẹ ima na gha loo ẹrhiọn ọghe ima ya ru iyobọ ne emwa ni rhie emwi ne iran ruẹ ye uyinmwẹ. (1 Kọr 9:26) Ọ khẹke ne emwa ne ima gu ruẹ e Baibol rẹn wẹẹ, ne ọmwa mieke na miẹn fan, te ọ gha dinmwiamẹ. (1 Pit 3:21) Ma na gha tama iran ne iran gha rhie emwi ne iran ruẹ ye uyinmwẹ, ne iran gha kporhu, ne iran gha maa emwa emwi, kevbe ne iran ya arrọọ ọghe iran fiohan ne Jehova, ọni rhiema wẹẹ te ima ru iyobọ ne iran ya do khian erhuanegbe Jesu.—Mat 28:19, 20.
VBENE A YA RU ẸRE HẸ:
Gi emwa ne u maa re Baibol rẹn wẹẹ, evbọzẹe ne u na gu iran ruẹ e Baibol ọre ne iran ‘do rẹn’ e Jehova kevbe ne iran gha ru emwi nọ yẹẹ ọre.—Jọn 17:3
Ru iyobọ ne iran ya sẹtin gbaengbe ne emwi ke emwi nọ gha mu idobo ye iran egbe vbe odẹ ọghe orhiọn, vbe na ghee uyinmwẹ dan kevbe avbe ọse dan na gu muobọ
Gha rhie igiọdu ne iran vbene iran ke dinmwiamẹ, u ye gha ru vberriọ vbe iran gha dinmwiamẹ nẹ.—Iwinna 14:22
VBE A GHA GHI GHEE ẸRE FO NẸ IGHẸ NE VIDIO OSANOBUA NE JEHOVA GHA RU IYOBỌ NUẸ, U GHI ZẸ EWANNIẸN YE AVBE INỌTA NA:
De emwi eso nọ gha sẹtin ya emwa gha si egbe wẹẹ iran i ghi ya egbe fiohan ne Jehova kevbe ne iran dinmwiamẹ?
De vbene ediọn gha ya sẹtin ru iyobọ ne emwa na gu ruẹ e Baibol, ne iran gha mwẹ alaghodaro vbe odẹ ọghe orhiọn?
De emwi ne Aizaia 41:10 maa ima re vbekpae Jehova?
De akpa eso nọ khẹke ne ima gha mwẹ, ne Jehova mieke na miẹn ugamwẹ ọghe ima yi agharhemiẹn wẹẹ ima ma gba?
De vbene ima ya deba e Jehova winna hẹ vbe nọ dekaan na ya emwa khian erhuanegbe ọghe Jesu?