Avbe Ako Na Sunu Yi Vbe Ebe Iwinna Na Loo Vbe Ne Iko Uyinmwẹ Kevbe Iwinna Ọghe Ima
FEBRUARY 4-10
EMWI EWE NI RRE UWU ẸMWẸ ỌGHE OSANOBUA | ROM 1-3
“Gha Maa Ekhọe Ọguọmwaziro Ọghuẹ Emwi”
(Rom 2:14, 15) Iran ne ẹi re Ju i mwẹ nene uhi, sokpan iran gha ye ekhọe obọ iran ru vbene nene uhi khare, ẹghẹ nii, iran ẹre ọ ghi tobọ iran re nene uhi ne egbe iran, agharhemiẹn wẹẹ iran i mwẹ nene uhi. 15 Uyinmwẹ iran rhiema ighẹ a gbẹnnẹ egbe emwi ne uhi nii hoo ye ekhọe iran. Ekhọe iran vbe rhiema wẹẹ ẹmwata ọna khin, vbe ne a na miẹn wẹẹ, ekhọe iran zẹdia bu ase ne iran, ugbẹnso, ọ ghi vbe gha gu iran gui.
lvs 18 okhuẹn 6
Ekhọe Ọguọmwaziro Nọhuanrẹn Vbe Odaro Osanobua
6 Uhiẹn, emwa ni ma rẹn e Jehova vbe rẹn wẹẹ, emwi eso rrọọ nọ maan, kevbe wẹẹ, ọ vbe mwẹ emwi eso nẹi maan. E Baibol khare wẹẹ: “Ekhọe iran zẹdia bu ase ne iran, ugbẹnso, ọ ghi vbe gha gu iran gui.” (Rom 2:14, 15) Vbe igiemwi, emwa nibun rẹnrẹn wẹẹ ọ ma khẹke na gha do izigha ra na gha rra. Ekhọe ọguọmwaziro ne Jehova rhie ne iran, nọ gha tama iran emwi nọ maan kevbe nẹi maan, ẹre ọ ya iran rẹn wẹẹ egbe emwi vberriọ ma khẹke, agharhemiẹn wẹẹ ugbẹnso iran i rẹn wẹẹ ekhọe ọguọmwaziro ẹre ọ dia iran. Odẹ vberriọ, te iran lele ilele ọghe Osanobua nọ ru iyobọ ne ima ya ru atamuolọyan nọ khẹke vbe arrọọ ọghe ima.
(Rom 2:15) Uyinmwẹ iran rhiema ighẹ a gbẹnnẹ egbe emwi ne uhi nii hoo ye ekhọe iran. Ekhọe iran vbe rhiema wẹẹ ẹmwata ọna khin, vbe ne a na miẹn wẹẹ, ekhọe iran zẹdia bu ase ne iran, ugbẹnso, ọ ghi vbe gha gu iran gui.
lvs 19-20 okhuẹn 8-9
Ekhọe Ọguọmwaziro Nọhuanrẹn Vbe Odaro Osanobua
8 Emwa eso keghi roro ẹre wẹẹ, iran gha ru emwi nọ rre iran ekhọe, ọ rhiema wẹẹ ekhọe ọguọmwaziro ọghe iran ẹre ọ dia iran. Iran keghi roro ẹre wẹẹ iran gha sẹtin ru emwi nọ rhirhi yẹẹ iran. Sokpan emwa ni ma gba ẹre ima khin, rhunmwuda ọni, iziro ọghe ima sẹtin mu ima rẹrẹ. Iziro ọghe ima sẹtin wegbe sẹrriọ wẹẹ, ọ ghi do gha dia ekhọe ọguọmwaziro ọghe ima. E Baibol khare wẹẹ: “Gha ọ gha sẹtin rẹn otọ vbene ekhọe ọmwa nagbọn ye hẹ? Emwi ọvbehe ne ọ rẹrẹ ọmwa vbe ne irẹn ye i rrọọ, ọ khuọnmwi gberra ne ọ gia sinmwi nẹ.” (Jerimaia 17:9) Rhunmwuda wẹẹ ekhọe ọghe ima gha sẹtin mu ima rẹrẹ, ma sẹtin do gha ghee emwi nọ ma gba zẹvbe emwi nọ gbae. Vbe igiemwi, a te miẹn wẹẹ e Pọl khian Ovbiotu e Kristi, te irẹn wa gha kpokpo emwa ọghe Osanobua, ọ na vbe gha roro ẹre wẹẹ emwi esi ẹre irẹn wa ru nii. Te irẹn ghaa roro ẹre vbe ẹghẹ nii wẹẹ, ekhọe ọguọmwaziro nọ maan ẹre irẹn mwẹ. Sokpan vbe ọ ghi zẹ kpẹẹ, ọ na kha wẹẹ: “Nọyaẹnmwa ọrọre ọmwa ne ọ bu ohiẹn mwẹ.” (1 Kọrinti 4:4; Iwinna 23:1; 2 Timoti 1:3) Vbe Pọl ghi bẹghe ẹre wẹẹ emwi ne irẹn ru i yẹẹ e Jehova, ọ na ghi rẹn wẹẹ te ọ khẹke ne irẹn fiwerriẹ. Vbene ima ke ru emwi ke emwi, te ọ khẹke ne ima nọ egbe ima wẹẹ, ‘De emwi ne Jehova gele hoo ne I ru?’
9 Ma i hoo ne ima ru emwi nọ gha sọnnọ ọmwa ne ima hoẹmwẹ ọnrẹn. Rhunmwuda ne ima na hoẹmwẹ e Jehova, ma i vbe hoo ne ima ru emwi nọ gha sọnnọ rẹn. Te ọ khẹke ne ima gha begbe vbe ẹghẹ hia, ne ima ghẹ ru emwi nọ gha sọnnọ e Jehova. Erriọ e Nehimaia wa vbe ru ẹre. Ọ ma rri emwa igho vbe ẹghẹ ne ọ ya gha re gọvina rhunmwuda ighẹ ọ hoo ne ọ fe. Vbọzẹe? Irẹn keghi kha wẹẹ rhunmwuda ne irẹn na “ya ọghọ ne Osanobua” ẹre nọ. (Nehimaia 5:15) E Nehimaia ma hoo ne irẹn ru emwi rhọkpa nọ gha sọnnọ e Jehova. Erriọ vbe nọ, ma ma hoo ne ima ru emwi nọ ma gba nọ gha sọnnọ e Jehova. Adeghẹ ima na gha tie Baibol, ma gha rẹn emwi nibun nọ ya ẹko rhiẹnrhiẹn e Jehova.—Ya Ghee Endnote 6.
Gualọ Emwi Ewe Ọghe Orhiọn
(Rom 3:4) Hiehiere. Ọmwa ẹmwata ẹre Osanobua khin, emwa hia gha rhe gha re ọhọnhoghe, zẹ vbene Ebe tae: “U gha guan, te a gha rẹn ighẹ ẹmwata u ta. A gha bu ohiẹn ruẹn, te u gha rri ase.”
w08 6/15 30 okhuẹn 5
Avbe Olika Ẹmwẹ Ni Rre Ebe Ne Pọl Gbẹn Gie Emwa E Rom
3:4. Adeghẹ ẹmwẹ ne emwa nagbọn tae na gbodan ghee ẹmwẹ ọghe Osanobua nọ rre uwu e Baibol, ma keghi rhiẹre ma wẹẹ “ọmwa ẹmwata ẹre Osanobua khin,” deghẹ ima na ya ẹmwẹ ne Baibol tae yi kevbe ima na gha ru emwi vbene Osanobua gualọe yi. Ma gha vbe sẹtin ru iyobọ ne emwa ọvbehe ya rẹn wẹẹ ọmwa ẹmwata ẹre Osanobua khin, deghẹ ima na rhiegba ye iwinna ikporhu iyẹn nọ maan kevbe deghẹ ima na gha hia ne ima ya emwa khian erhuanegbe ọghe Jesu.
(Rom 3:24, 25) Sokpan vbekpa ẹsọhẹ Osanobua ne a rhie ne emwa vbe ọhẹ, a keghi lekpae Jesu Kristi ne ọ fannọ iran ye otọ ye ehia khian ọmwata vbe odaro ere. 25 Te Osanobua yae ru ọmwa ẹse wẹẹ rhunmwuda uwu ẹre, ne irẹn do khian emwi ne a lekpa ẹre ya orukhọ bọ emwa vbe iran a yaeyi. Te Osanobua ye Kristi ru ẹse ne ọ ya ma emwa ẹre vbene irẹn ya ye emwa khian emwata vbe odaro ẹre hẹ. Vbe ẹghẹ ne ọ gberra, Osanobua keghi zinegbe, ọ ma vbe zẹ ye orukhọ ne emwa nagbọn ru.
w08 6/15 29 okhuẹn 6
Avbe Olika Ẹmwẹ Ni Rre Ebe Ne Pọl Gbẹn Gie Emwa E Rom
3:24, 25—Vbọzẹe ne a na miẹn wẹẹ, lekpae adẹwerriegbe ọghe Jesu Kristi, Osanobua gha sẹtin yabọ orukhọ ọghe emwa ni ghaa rrọọ “vbe ẹghẹ nọ gberra”? Ẹmwẹ akhasẹ nokaro ne Osanobua tae vbekpae Mẹzaia nọ rre ebe Gẹnẹsis 3:15, keghi mwẹ amusẹ vbe ukpo 33 C.E. vbe ẹghẹ ne Jesu ya wu vbe erhan irrioya. (Gal 3:13, 16) Ke obọ ne Jehova ya ta ẹmwẹ akhasẹ nii, te irẹn wa gha ghee ẹre wẹẹ a ru izọese ọghe adẹwerriegbe nii nẹ rhunmwuda, emwi rhọkpa i rrọọ nọ gha sẹtin mu idobo ye emwamwa ọghe Osanobua, nẹ ghẹ mwẹ amusẹ. Rhunmwuda ọni, e Jehova gha sẹtin yabọ orukhọ ọghe ivbi Adam lekpae izọese adẹwerriegbe ne Jesu khian ru, sokpan ne iran mu ẹtin yan eyan ne irẹn ru. Rhunmwuda izọese adẹwerriegbe ọghe Jesu, emwa ni wulo a te miẹn wẹẹ Jesu do wu ye orukhọ ọghe ima gha sẹtin rhiọkpaegbe.—Iwinna 24:15.
E Baibol Na Tie
(Rom 1:1-17) E Pọl ne ọguọmwadia e Kristi Jesu, kevbe ukọ Osa ne Osanobua tiere ne ọ gha kporhu iyẹn nọ maan ọghe irẹn, ẹre ọ gbẹn ebe na rre. 2 Ọ kpẹre ne Osanobua ghi la unu avbe akhasẹ ve iyẹn nọ maan na, a kevbe gbẹn ọnrẹn ye Ẹbe Nọhuanrẹn. 3 Vbekpae ọghe Ovbi ẹre ighẹ Nọyaẹnmwa Jesu Kristi vbe agbọn na, uniẹn Devid ẹre ọ la rre. 4 Zẹvbe ọghe uhuanmwẹ ọnrẹn ke ẹrinmwi rre, a keghi ya ẹtin nọkhua rhiema ighẹ Ovbi Osanobua nọ vbekpae ne a na huẹn ọnrẹn kpa vbe idin orinmwi. 5 Obọ ẹre ọre Osanobua la ru mwẹ ẹse wẹẹ ne I gha re ukọ Osanobua vbekpa e Kristi, ne I sẹtin ye emwa hia ni rre uhunmwu ẹvbo hia yayi kevbe ne iran vbe gha họn ẹmwẹ. 6 Ne usun, ọre uwa ne emwa e Rom vbe ye, emwa ne Osanobua tie re ne iran do gha re emwa Jesu Kristi 7 Rhunmwuda ọni, ọre I na gbẹn ebe gie uwa hia ni rre Rom ne Osanobua hoẹmwẹ ọnrẹn, ọ na tie uwa ne uwa do gha re emwa irẹn. Te Osanobua ne Erha mwa kevbe Nọyaẹnmwa Jesu Kristi gha rhie ẹsọhẹ kevbe ọfumwegbe ne uwa. 8 Vbe okaro, I kpọnmwẹ Osanobua mwẹ ne uwa hia vbekpae Jesu Kristi rhunmwuda, uhunmwu otọ agbọn hia wa họn ẹmwẹ iyayi uwa. 9 Osanobua ne imẹ ya ekhọe mwẹ hia ga vbuwe ne I na ya ekhọe mwẹ hia kporhu iyẹn nọ maan rẹnrẹn ighẹ ẹghẹ ne I ya na erhunmwu hia ọre I ya ye uwa rre. 10 I na erhunmwu ghe Osanobua wẹẹ, vbe iho ne ọ maan ọghẹe, ne ọ mwẹ uhunmwu mẹ ẹghẹ na ighẹ otuẹ ne I ra do tuẹ uwa re. 11 Rhunmwuda, I wa hoo ne I miẹn uwa aro ẹsẹse ne I miẹn ehe na gu uwa ghae vbe uwu afiangbe ọghe orhiọn ne ọ ya uwa wo vbe egbe. 12 Emwi ne I yae kha ọrọre wẹẹ ne a gba ru iyobọ ne egbe, ne iyayi mwẹ ya uwa obọ kevbe ne ọghe uwa vbe ye imẹ obọ. 13 I hoo ne uwa rẹn, etẹn mwẹ wẹẹ ẹghẹ nibun ọre I he ya mu egbe ne I do tuẹ uwa sokpan, emwi eso ghi de gbe odẹ, ẹi gu mwẹ rre. I te vbe hoo ne I fi emwa eso ekhọe werriẹ ye iyayi vbe uwu uwa zẹvbe ne I vbe fi eso ekhọe werriẹ ye iyayi vbe uwu iran ne ẹi re Ju ni rre ehe ọvbehe. 14 Rhunmwuda, te I rri osa ẹre ye urhu vbe obọ emwa hia, iran ni rhan aro kevbe iran ni ma rhan aro, iran ni rẹn emwi kevbe iran ni ma rẹn emwi rhọkpa. 15 Ọni ọ siẹe ne ọ na bọbọ mwẹ egbe ne I do vbe kporhu iyẹn nọ maan ma uwa ni rre Rom. 16 I wa mu ẹtin yan iyẹn nọ maan, ẹtin ne Osanobua ya miẹn iran ni yayi fan nọ, okaro, avbe Ju sokpan kevbe iran ne ẹi re Ju ba ẹre. 17 Rhunmwuda, iyẹn nọ maan tae ladian nẹ vbene Osanobua ya ye ọmwa khian ọmwata vbe odaro ẹre hẹ vbekpa iyayi ọkpa ne ọ ke omuhẹn ya sẹ ufomwẹ, rhunmwuda, Ebe tae nẹ wẹẹ, “Ọmwa ne a lekpa iyayi ya khian ọmwata vbe odaro Osanobua, ọ gha fe.”
FEBRUARY 11-17
EMWI EWE NI RRE UWU ẸMWẸ ỌGHE OSANOBUA | ROM 4-6
“Osanobua Rhie Ma Ima Nẹ Vbene Irẹn Kakabọ Hoẹmwẹ [Ima] Sẹ Hẹ”
(Rom 5:8) Sokpan Osanobua rhie ma ima nẹ vbene irẹn kakabọ hoẹmwẹ mwa sẹ hẹ ẹghẹ ne ima na gha re emwa orukhọ ọre Kristi na wu ne ima.
(Rom 5:12) Obọ orhiọnkpa kẹkan ọre orukhọ la la agbọn, orukhọ keghi rhie uwu mwẹ obọ gha dee. Emwi ne ọ ghi ke ẹre ikian ọrọre wẹẹ uwu keghi sẹ egbe emwa ni rre agbọn na hia, rhunmwuda ighẹ ima hia ẹre ọ ru orukhọ.
w11 6/15 12 okhuẹn 5
Osanobua Rhie Ma Ima Nẹ Vbene Irẹn Kakabọ Hoẹmwẹ Ima Sẹ Hẹ
5 E Pọl khian ghi suẹn gha guan kaan ẹmwẹ na, ọ na wẹẹ: “Obọ orhiọnkpa kẹkan ọre orukhọ la la agbọn, orukhọ keghi rhie uwu mwẹ obọ gha dee. Emwi ne ọ ghi ke ẹre ikian ọrọre wẹẹ uwu keghi sẹ egbe emwa ni rre agbọn na hia, rhunmwuda ighẹ ima hia ẹre ọ ru orukhọ.” (Rom 5:12) Ma gha sẹtin rẹn otọ ẹmwẹ na, rhunmwuda Osanobua gbẹnnẹ emwi nọ sunu ke ẹghẹ omuhẹn gha dee ye otọ. E Jehova keghi yi orhunmwu eva nọ re Adam vbe Ivi. Rhunmwuda ne Ayi ọghe iran na re ọmwa nọ gbae, emwa ni gbae ẹre iran vbe gha khin. Uhi ọkpa kẹkan ẹre Osanobua gbe ne iran, ọ na vbe tama iran wẹẹ, iran gha rra uhi nii, iran gha wulo. (Gẹn 2:17) Sokpan iran keghi fi obọ ye amẹ nọ rhorho, iran na he ẹmwẹ ye Osanobua obọ; uyinmwẹ ne iran yinrin na rhiẹre ma wẹẹ iran ma ghi hoo ne iran gha rre ototọ Osanobua zẹvbe Ọyiuhi kevbe Oghodua.—Diut 32:4, 5.
(Rom 5:13, 14) Orukhọ ka rre agbọn nẹ a ke do rhie nene Uhi rre, sokpan ugbẹn vbe a miẹn wẹẹ uhi i rrọọ, a ma vbe gha ka orukhọ ye ọmwa urhu. 14 Sokpan ke ẹghẹ Adam gha dee do sẹ ẹghẹ Mosis, uwu keghi mu yan emwa hia, ya sẹ egbe avbe emwa ne ọ ma ru khọ zẹ vbene Adam ru khọ vbekpa ne ọ ma na ru vbene Osanobua khare. Adam keghi re emwi ne a ya gie ọmwa ne ọ dee.
w11 6/15 12 okhuẹn 6
Osanobua Rhie Ma Ima Nẹ Vbene Irẹn Kakabọ Hoẹmwẹ Ima Sẹ Hẹ
6 Adam ru orukhọ nẹ ọ ke do suẹn gha biẹ, rhunmwuda ọni, ivbi ẹre hia keghi rri orukhọ vbe ukhu kevbe emwi nọ kẹrikian. Iran ma gha rre evba vbe Adam rra uhi Osanobua, rhunmwuda ọni, ai khian bu ohiẹn iran vbene a ya bu ohiẹn Adam; vbe ẹghẹ na kha na, Osanobua ma he gbe uhi rhọkpa ne ivbi Adam. (Gẹn 2:17) Ọrheyerriọ, ivbi Adam na ye rri orukhọ vbe ukhu. Te orukhọ kevbe uwu wa gha kha yan emwa nagbọn rhinrin ya fi ẹghẹ ne Osanobua ya gbe uhi ne Ivbi Izrẹl; ne Osanobua na gbe uhi ne iran rhiẹre ma wẹẹ emwa orukhọ ẹre iran vbe khin. (Tie Rom 5:13, 14.) A gha sẹtin ya orukhọ ne emwa nagbọn re vbe ukhu gie emianmwẹ ne emọ miẹn vbe obọ evbibiẹ iran, vbe na ghee emianmwẹ na tie ẹre Mediterranean anemia ra hemophilia. Egbọre u ka tie okha ọghe Alexis nẹ, nọ ghaa re ovbi ọba ọghe Russia na tie ẹre Czar Nicholas II; a kegha tie eni iye ẹre Alexandra. Alexis na kegha mwẹ emianmwẹ esagiẹn na tie ẹre hemophilia, na biẹ ọre biẹ. Ẹmwata nọ wẹẹ emọ eso sẹtin gha rre ẹgbẹe nii, nẹi khuọnmwi emianmwẹ na, sokpan ọ ye gha rre iran esagiẹn. Sokpan ọghe orukhọ lughaẹn. Ọmwa rhọkpa i rrọọ nọ khian sẹtin lẹẹ ne orukhọ ne ima miẹn vbe obọ Adam. Te ima hia khian rri oya ẹre. Uwu ẹre ọ kẹrikian. Te ọmwa ke ọmwa nọ ghi re ovbi Adam nẹ khian miẹn ọnrẹn vbe egbe. A gha sẹtin miẹn uhunmwu vbe ọlọghọmwa na ra?
(Rom 5:18) Zẹ vbene orukhọ ya emwa hia rri abe, erriọ vbe nọ, emwi ẹmwata ọkpa ne a ru keghi vbe fannọ emwa hia ye otọ, ọ keghi vbe rhie arrọọ ne iran.
(Rom 5:21) Erriọ vbe nọ, zẹ vbene orukhọ gha ya uwu khaemwisẹ, erriọ zẹẹ ọre ẹsọhẹ Osanobua vbe ya ẹmwata gha khaemwisẹ, ọ ghi gha su ima rrie arrọọ etẹbitẹ vbekpae Jesu Kristi Nọyaẹnmwa.
w11 6/15 13 okhuẹn 9-10
Osanobua Rhie Ma Ima Nẹ Vbene Irẹn Kakabọ Hoẹmwẹ Ima Sẹ Hẹ
9 Vbọ rhiema ighẹ ẹmwẹ e Grik na ke zedu ẹmwẹ na nọ re ‘Osanobua keghi ya iran khian emwa ni gbae’? Vbe orhunmwu ọkpa nọ zedu e Baibol ghi guan kaan ẹmwẹ na, ọ na wẹẹ: “Ọ keghi re ẹmwẹ nọ mu ukhọmwẹ emwi nọ dekaẹn emwi nọ sunu vbe ekọtu. Ẹmwẹ nọ mu ukhọmwẹ emwi na, keghi re afiwerriẹ nọ dekaan aro ne Osanobua ghi ya ghee ọmwa nii, ẹi re afiwerriẹ ne ọmwa nii ya ekhọe obọ re ru ẹre a guan kaẹn . . . Vbe ifiẹmwẹ na, Osanobua ọre ọbuohiẹn nọ ta mu olọ yan rẹn wẹẹ irẹn i khian bu ohiẹn uwu gbe ọmwa nọ rra uhi, ọ keghi fan omwa nii fua, ọ na kpa irri nẹẹn la.”
10 De emwi nọ khian ya Osanobua nọ re “enọ bu ohiẹn otọ agbọn hia” fan ọmwa orukhọ fua? (Gẹn 18:25) Emwamwa ne Osanobua ru ọre wẹẹ, ọ na gie Ovbi ẹre ne ukpọmọkpa gha die uhunmwu otagbọn. Ahoo ọghe Erhae ẹre Jesu wa ru zẹẹ vbe ọ rre agbọn, agharhemiẹn wẹẹ ọ miẹn edanmwẹ nibun, emwa yae gbogiẹ kevbe wẹẹ iran vbe rrovbiẹ ọre. Te irẹn wa da imudiase ọghẹe yi, ya sẹ ẹdẹ nọ wu vbe erhan irrioya. (Hib 2:10) Te Jesu ya arrọọ ọghẹe nọ gbae zọ ese, nọ mieke na dẹ emwa nagbọn werriegbe vbe obọ orukhọ kevbe uwu ne iran re vbe ukhu.—Mat 20:28; Rom 5:6-8.
Gualọ Emwi Ewe Ọghe Orhiọn
(Rom 6:3-5, NW) Wa ma rẹn wẹẹ, ẹghẹ ne ima na dinmwiamẹ ba e Kristi Jesu, te ima dinmwiamẹ kugbe ba uwu ne ọ wu ra? 4 Ne ima na dinmwiamẹ, te a ree ima ba irẹn, ma keghi vbe ghae vbe uwu ne irẹn wu, na do miẹn wẹẹ, vbene a huẹn Jesu kpaegbe vbe uwu vbekpa ẹtin uyi ọghe Evbavba, erriọ zẹẹ ọre ima gha vbe gha rrọọ vbe arrọọ ọgbọn. 5 Rhunmwuda, deghẹ ima do khian ọkpa deba irẹn vbekpa ne ima na wu vbene irẹn wu, erriọ zẹẹ vbe nọ, ma gha khian ọkpa yaba irẹn vbekpae ne a gha na huẹn ima kpaegbe vbene a vbe huẹn irẹn kpaegbe.
w08 6/15 29 okhuẹn 7
Avbe Olika Ẹmwẹ Ni Rre Ebe Ne Pọl Gbẹn Gie Emwa E Rom
6:3-5—Ne ako na, na wẹẹ, a dinmwiamẹ ba e Kristi Jesu kevbe a dinmwiamẹ ye uwu nọ wu, vbe a yae kha? Vbe ẹghẹ ne Jehova ya ya orhiọn nọhuanrẹn hannọ erhuanegbe Kristi zẹ, iran keghi do gha re ọkpa vbe iko nọ mudia ye ihe egbe ọghe Kristi; Jesu ọre Uhunmwuta ọghe iko na. (1 Kọr 12:12, 13, 27; Kọl 1:18) Ọna ẹre a yae kha, ne a na wẹẹ iran dinmwiamẹ ba e Kristi Jesu. Emwa na hannọ zẹ vbe dinmwiamẹ ye “uwu ne [Kristi] wu,” ọni rhiema wẹẹ, te iran zẹ egbe iran obọ ne Osanobua, iran i ghi mwẹ ayayẹro ne iran khian ya gha rrọọ vbe uhunmwu otagbọn na vbe etẹbitẹ. Iran gha wu, ọ ghi yevbe na miẹn wẹẹ te iran ya arrọọ ọghe iran zọ ese vbene Jesu vbe ru ẹre, sokpan uwu ọghe iran i re nọ sẹtin dẹ emwa werriegbe. Iran gha wu, a na vbe huẹn iran kpaegbe gha rrie ẹrinmwi nẹ, idinmwiamẹ ọghe iran ye uwu ọghe Kristi, ghi sẹ ufomwẹ.
(Rom 6:7) Rhunmwuda, ọmwa gha wu nẹ, a faẹn ye otọ hin obọ ẹtin orukhọ rre.
w14 6/1 11 okhuẹn 1
De Ayayẹro Nọ Rrọọ Ne Enikaro Ọghomwẹ?
Osanobua gha huẹn emwa ni ru emwi dan kpaegbe, ọ gha ya orukhọ ne iran ru vbene iran ke wu, buohiẹn iran ra? Ẹn o. Ebe Rom 6:7 khare wẹẹ: “Ọmwa gha wu nẹ, a faẹn ye otọ hin obọ ẹtin orukhọ rre.” Emwa ni ru emwi dan gha wu, ọni rhiema wẹẹ iran ya uwu ọghe iran hae osa ye orukhọ ne iran ru. Emwi ne iran khian ghi ru vbe a gha huẹn iran kpaegbe nẹ, ẹre Osanobua khian ya bu ohiẹn iran, ẹi re orukhọ ne iran ru vbe ẹghẹ ne iran ma ya rẹn enaye. De ere ne iran khian miẹn?
E Baibol Na Tie
(Rom 4:1-15) Vbe ima gha kha hẹ khekherriọ vbekpa ọghe Ebraham ne erha mwa odede? Vbekpa emwi ne ọ sunu vbe egbe ẹre. 2 Akpawẹ avbe emwi ne ọ ru ọre a ya kae ye ọmwata vbe odaro Osanobua, irẹn gha miẹn emwi ne ọ gha ya gha rhuọ. Sokpan irẹn i sẹtin rhuọ vbe odaro Osanobua. 3 Ebe khare wẹẹ, “Ebraham ya Osanobua yi, rhunmwuda iyayi ẹre, Osanobua keghi kae ye ọmwata.” 4 Ọmwa ghaa winna, a ghi ha ẹre osa, igho ne ọ miẹn rẹn, ai kha ighẹ te a yae ru ẹre ẹse, sokpan emwi ne ọ khuaẹn nọ. 5 Sokpan, ọmwa ne ọ ma mu ẹtin yan iwinna, ọ kegha mwẹ iyayi, ọ na hẹko mu ẹtin yan Osanobua, ne ọ ye ne ọ rri abe khian ne ọ ma rri abe, iyayi ẹre ọre Osanobua ghee re, ne ọ na yae khian ọmwata vbe odaro ẹre. 6 Ọnọna ọre Devid kha ẹghẹ ne ọ na guan vbekpa ọyẹnmwẹ ọmwa ne Osanobua ka ye ọmwata vbe ne ọ ma na ghee emwi ne ọ ru: 7 “Ọ ma kan iran ne Osanobua ya orukhọ bọ, iran ne ọ gbe gue na! 8 Ọ ma kan iran ne Osanobua i ka orukhọ ye ọre urhu.” 9 Oghọghọ ne Devid kha na, ọghe iran ni rhuẹre ọkpa nọ ra kevbe ọghe iran ni ma rhuẹ nọ? Hiehiere, ọghe iran ni ma rhuẹ ọre vbe nọ. Ma ka tie ẹre ke uwu ebe ladian wan wẹẹ, “Ebraham ya Osanobua yi, Osanobua keghi kae ye ọmwata rhunmwuda iyayi ẹre na.” 10 De ẹghẹ ne emwi na ya sunu yi? Vbe Ebraham rhuẹ nẹ nọ ra vbe ọ ma he rhuẹ? Vbe ọ ma he rhuẹ nọ ighẹ ẹi re vbe ọ rhuẹ nẹ. 11 Okiekie ọre a ghi do ya rhuẹ ọre. Arhuẹ ne ọ rhuẹre keghi re ne a ya rhiema wẹẹ ẹghẹ ne Ebraham ma na he rhuẹ Osanobua kae ye ọmwata vbe odaro ẹre rhunmwuda iyayi ẹre, rhunmwuda ọni, Ebraham keghi re erha vbekpa ọghe orhiọn ne iran hia ni ya Osanobua yi, ne irẹn vbe ka ye emwata vbe odaro ẹre, agharhemiẹn wẹẹ iran ma rhuẹ. 12 Irẹn ẹre ọ vbe re erha iran ni rhuẹre, ẹi re rhunmwuda ne iran na rhuẹ, sokpan rhunmwuda iran rrọọ vbe uwu iyayi egbe ne Ebraham vbe gha ye vbe ọ te do rhuẹ. 13 Osanobua tama Ebraham wẹẹ, agbọn na gha khian ọghẹe. Emwi ne Osanobua ve na, ẹi re rhunmwuda ighẹ Ebraham ru vbene nene uhi khare, sokpan rhunmwuda ighẹ ọ yayi, Osanobua keghi kae ye ọmwata. 14 Rhunmwuda, adeghẹ emwa ne ọ ru vbene uhi khare ọre a rhie emwi ne Osanobua ve na, iyayi ọmwa kẹkan ghi nọ khekherriọ, emwi ne Osanobua ve i vbe mwẹ esa ne ọ khin. 15 Izohu Osanobua ọre nene uhi si tuorre, sokpan ehe ne Uhi i ye, ọmwa i vbe rra uhi vbe evba.
FEBRUARY 18-24
EMWI EWE NI RRE UWU ẸMWẸ ỌGHE OSANOBUA | ROM 7-8
“Uwẹ ‘Zinegbe . . . Khẹ’ Ọre Ra?”
(Rom 8:19) Te emwi ne a yi hia hẹko zinegbe gha khẹ wẹẹ ne Osanobua viọ ivbi ẹre ladian ne a miẹn.
w12 7/15 11 okhuẹn 17
Lele Adia Ọghe Jehova Ne U Mieke Na Gele Gha Re Ọmwa Na Fan Vbe Imu
17 Vbe Pọl ghi guan kaan afanvbimu ne Jehova mwamwa khẹ emwa rẹn vbe odaro, ọ na wẹẹ: “Te emwi ne a yi hia hẹko zinegbe gha khẹ wẹẹ ne Osanobua viọ ivbi ẹre ladian ne a miẹn.” Ọ na vbe rhie tẹ wẹẹ: “A gha rhan emwi ne a yi hin uwu ọviẹn kevbe ọkẹkua ne ọ ye rre, ne ọ vbe do gha ghae vbe uyi enọyan egbe ẹre ne ivbi Osanobua mwẹ.” (Rom 8:19-21) “Emwi ne a yi” na guan kaẹn na, keghi re emwa ni khian gha rre agbọn na vbe etẹbitẹ, iran ẹre ọ khian miẹn ere vbe Osanobua gha “viọ ivbi ẹre ladian ne a miẹn;” ọni ọre emọ ne irẹn ya orhiọn nọhuanrẹn hannọ zẹ. Ẹghẹ ne Osanobua khian ya “viọ ivbi ẹre ladian ne a miẹn” ọre ẹghẹ ne emọ na hannọ zẹ ni rhiọkpaegbe gha rrie ẹrinmwi khian ya deba e Kristi wabọ emwi dan hin agbọn na rre, iran ghi vbe gbogba ga ‘oghẹn ne gbii,’ ne iran miẹn uhunmwu ya la agbọn ọgbọn.—Arhie 7:9, 14.
(Rom 8:20) Te a gheghe ya avbe emwi ne a yi khian ne ẹi ghi mwẹ esa, ẹi re wẹẹ te ọ te yẹẹ ọre vberriọ. Sokpan vbene Osanobua wẹẹ emwi gha ye ọre nọ, sokpan idaehọ na ye rrọọ wẹẹ
w12 3/15 23 okhuẹn 11
Ma Keghi Sọyẹnmwẹ Rhunmwuda Ayayẹro Ne Ima Mwẹ
11 Osanobua keghi rhie “idaehọ” ra ayayẹro ne emwa nagbọn vbe ẹghẹ ne ọ ya tae yotọ wẹẹ, ‘ọmọ’ na ru eyan rẹn gha fan emwa nagbọn hin obọ “ẹyẹn nẹdẹ nii” rre, nọ re Setan ne ọkaẹrria. (Arhie 12:9; Gẹn 3:15) Ọmwa nọ wa mobọ re ‘ọmọ’ na ru eyan rẹn nii ọre Jesu Kristi. (Gal 3:16) Uwu ọghe Jesu kevbe arhiọkpaegbe ọghẹe keghi ya emwa nagbọn gha mwẹ ayayẹro wẹẹ, a gha fan iran hin obọ ẹtin ọghe orukhọ kevbe uwu rre. Ayayẹro na, vbe dekaan ẹghẹ ne Osanobua khian ya “viọ ivbi ẹre ladian ne a miẹn.” Emwa na hannọ zẹ keghi re abọ nogieva ọghe ‘ọmọ’ na ru eyan rẹn nii. Osanobua gha ‘viọ iran ladian na miẹn,’ vbe ẹghẹ ne iran khian ya deba e Kristi guọghọ agbọn dan na, ne Setan kha yan. (Arhie 2:26, 27) Ọna ẹre ọ khian rhie imiẹnfan ne ohuan nikẹre ni khian miẹn uhunmwu vbe orueghe nọkhua.—Arhie 7:9, 10, 14.
(Rom 8:21) ẹdẹ ọkpa, a gha rhan emwi ne a yi hin uwu ọviẹn kevbe ọkẹkua ne ọ ye rre, ne ọ vbe do gha ghae vbe uyi enọyan egbe ẹre ne ivbi Osanobua mwẹ.
w12 3/15 23 okhuẹn 12
Ma Keghi Sọyẹnmwẹ Rhunmwuda Ayayẹro Ne Ima Mwẹ
12 U miẹn vbene egbe khian rọkhọ emwa nagbọn hẹ vbuwe Ukpo Arriaisẹn Ọkpa Ne Kristi Khian Ya Kha! Vbe ẹghẹ nii, Osanobua gha ye vbe “viọ ivbi ẹre ladian ne a miẹn” vbe ẹghẹ ne iran khian ya gha re ohẹn vbe ẹrinmwi, iran ghi ru iyobọ ne emwa nagbọn ya miẹn ere vbe izọese adẹwerriegbe ọghe Jesu. Arriọba nọ rre ẹrinmwi ghaa kha yan emwa nagbọn nẹ, iran ghi do suẹn gha mwẹ afanvbimu vbe obọ ẹtin ọghe orukhọ kevbe uwu. Emwa nagbọn ni họn ẹmwẹ ne Osanobua ghi do khian na fannọ “hin uwu ọviẹn kevbe ọkẹkua” ne iran ye rre. Adeghẹ iran na da imudiase ọghe iran yi vbuwe Ukpo Arriaisẹn Ọkpa Ne Kristi Khian Ya Kha, kevbe deghẹ iran na sẹtin la edanmwẹ nokiekie gberra, a ghi do gbẹn eni iran ye ‘ebe na kiri ọghe arrọọ.’ Ẹghẹ nii, iran ghi “do gha ghae vbe uyi enọyan egbe ẹre ne ivbi Osanobua mwẹ.” (Arhie 20:7, 8, 11, 12) Ayayẹro nọkhua ẹre ọna wa khin!
Gualọ Emwi Ewe Ọghe Orhiọn
(Rom 8:6) Adeghẹ egbe zẹvbe ne a yi ẹre, ẹre ọ tama ọmwa emwi ne ọ gha ru, uwu ẹre ọ ke ẹre ikian. Sokpan, adeghẹ orhiọn ẹre ọ gie odẹ emwi ne a gha ru ma ọmwa, ẹfe kevbe ọfumwegbe ọre nọ.
U Yerre Ra?
De alughaẹn nọ rrọọ vbe egbe ghaa “tama ọmwa emwi nọ gha ru” kevbe orhiọn ghaa “gie odẹ emwi na gha ru ma ọmwa”? (Rom 8:6)
Ọmwa ne egbe ẹre tama rẹn emwi nọ gha ru keghi rhie aro tua emwi ikpakpa, ọ gha rhiegbe ma vbe emwi nọ ta kevbe emwi nọ ru. Uwu ẹre ọ kẹrikian. Sokpan ọmwa ne orhiọn gie odẹ ma keghi rhie aro tua emwi ọghe orhiọn. Iziro ekhọe ọghẹe keghi re nọ maan rhunmwuda ọ kue ne orhiọn nọhuanrẹn ọghe Osanobua gha loo ẹre. Emwi nọ kẹrikian ọre arrọọ kevbe ọfunmwegbe.—w16.12, ipapa 15-17.
(Rom 8:26, 27) Erriọ zẹẹ ọre nene orhiọn vbe do gha ye ima ni ma wo vbe egbe obọ. Rhunmwuda ma ma rẹn vbene a ya na erhunmwu hẹ sokpan nene orhiọn ẹre ọ rinmwian ne ima vbe ehe ne Osanobua ye, vbe uwu ikhiẹkhiegbe obalọ ne ẹmwẹ unu i sẹtin ta ladian. 27 Osanobua ne ọ sẹtin bẹghe uwu ekhọe emwa nagbọn rẹn emwi ne nene orhiọn mu roro, rhunmwuda, te nene orhiọn rinmwian ne emwa rẹn vbe ehe ne Osanobua ye, zẹvbe ne ọ gua emwi ne irẹn hoo.
w09 11/15 7 okhuẹn 20
De Emwi Ne Erhunmwu Ne Uwẹ Na Rhiema Vbekpa Ruẹ?
20 Ugbẹnso, ma i rẹn emwi ne ima khian ta vbe ima ghaa na erhunmwu vbe ẹkhokho. E Pọl khare wẹẹ, “Ma ma rẹn vbene a ya na erhunmwu hẹ sokpan nene orhiọn ẹre ọ rinmwian ne ima vbe ehe ne Osanobua ye, vbe uwu ikhiẹkhiegbe obalọ ne ẹmwẹ unu i sẹtin ta ladian. Osanobua ne ọ sẹtin bẹghe uwu ekhọe emwa nagbọn rẹn emwi ne nene orhiọn mu roro.” (Rom 8:26, 27) E Jehova keghi dia emwa ya gbẹnnẹ erhunmwu nibun ne emwa naẹn ye uwu Evbagbẹn Nọhuanrẹn. Adeghẹ ima na vbe gha na egbe erhunmwu na gbẹnnẹ yotọ vbuwe Baibol, Osanobua gha họn, ọ ghi vbe ru ẹre ne ima. Osanobua rẹn ima, ọ vbe rẹn otọ emwi ne emwa ni gbẹn e Baibol gbẹnnẹ yotọ rhunmwuda, orhiọn nọhuanrẹn ọghẹe ẹre irẹn loo ro ya dia iran. E Jehova keghi họn erhunmwu ọghe ima vbe orhiọn nọhuanrẹn ghaa “rinmwian” ne ima. Sokpan deghẹ ima na rẹn e Baibol sayọ, ẹghẹ nii, ẹmwẹ ne ima gha ta i vbee ima, vbe ima ghaa na erhunmwu.
E Baibol Na Tie
(Rom 7:13-25) Ọni rhiema wẹẹ, te emwi nọ maan ghi gbe mwẹ uan ra? Hiehiere. Orukhọ ẹre ọ ru ẹre. Orukhọ keghi ya rhie emwi ne ọ maan mwẹ obọ, ya rhie uwu bu mwẹ gha dee, ne vbene ọ ye hẹ ne a na gha tie ẹre orukhọ, miẹn ehe na vẹ ne agbọn rẹn. Erriọ a miẹn ọnrẹn wẹẹ uhi ẹre ọ ghi ru ẹre, ne orukhọ na dọlegbe khian ne ọ kakabọ re orukhọ sẹ ayọ. 14 Ma rẹnrẹn wẹẹ emwi orhiọn ọre Uhi khin, sokpan, ọmwa ne ọ sẹtin wu mẹ khin, ne a vbe khiẹn ọre ọviẹn ne orukhọ. 15 Mẹ ma rẹn vbene I ru emwi hẹ rhunmwuda ẹi re emwi ne ọ rrọọ mwẹ ekhọe ne I ru ọre I gele ru, sokpan emwi ne ọ sọnnọ mwẹ ọre I ru. 16 Adeghẹ ẹi re emwi ne ọ rrọọ mwẹ ekhọe ne I ru, ọre I gele ru, ọni rhie ma ighẹ mẹ rhie obọ yọ wẹẹ nene uhi gbae. 17 Ọni rhiema wẹẹ ẹi re imẹ ẹre ọ wa ru avbe emwi na, sokpan orukhọ ne ọ rre uwu imẹ ẹre ọ ru ẹre. 18 Mẹ rẹnrẹn wẹẹ, emwi ne ọ maan rhọkpa i rre uwu imẹ, vbe ikinnegbe mwẹ kẹkan na, rhunmwuda, agharhemiẹn wẹẹ emwi ne ọ maan te yẹẹ mwẹ ne a ru, sokpan ẹi gu mwẹ ru. 19 Mẹ i sẹtin ru emwi ne ọ maan ne I te hoo ne I ru, sokpan emwi dan ne ẹi te khọn mwẹ ne I ru ẹre I ru. 20 Adeghẹ emwi ne ẹi khọn mwẹ ne I ru ẹre I ru, ọni rhiema khekherriọ wẹẹ ẹi re imẹ ẹre ọ ru ẹre, sokpan, orukhọ ne ọ rre uwu imẹ nọ. 21 Mẹ keghi do miẹn wẹẹ, emwi ne ọ sunu ọrọre wẹẹ, mẹ gha wẹẹ ne I ru emwi esi, emwi dan ọkpa ọre ẹtin mwẹ sẹ. 22 Sokpan otọ ẹko mwẹ ghi gha sẹ ọyẹnmwẹ ye uhi Osanobua. 23 Sokpan emwi ọvbehe ọre ọ sunu vbe ikinnegbe mwẹ, ọnii nọ wẹẹ, emwi ne ọ gu emwi ne ekhọe mwẹ ye obọ yi gbinna, ọ keghi do ya mwẹ khian oghunmwu emwi orukhọ ne ọ zẹ evbọ guẹ ru vbe ikinnegbe mwẹ. 24 Ọ sẹ mwẹ sẹ egbe mwẹ! Gha ọ ghi ra fan mwẹ hin obọ ikinnegbe ne ọ si mwẹ khian ya rhie gbe ua na? 25 Ekpọnmwẹ nọ ne Osanobua, vbekpae Nọyaẹnmwa Jesu Kristi. Vbene ọ ye mwẹ hẹ ọre ọna khin: vbe ọghe obọ mwẹ, ekhọe mwẹ ọkpa ọre I ya ru vbene Osanobua khare, vberriọ ikinnegbe mwẹ, vbene orukhọ khare, ẹre ọ ru.
FEBRUARY 25–MARCH 3
EMWI EWE NI RRE UWU ẸMWẸ ỌGHE OSANOBUA | ROM 9-11
“Erre Ọghe Erhan Oliv”
(Rom 11:16) Adeghẹ a rhie ekan-unu eka ne okaro ne Osanobua, irẹn ọ ghi wa yan ududu eka ni hia, erriọ, adeghẹ a vbe ye inian ni rre erhan fi ohan ne Osanobua, irẹn ẹre ọ wa vbe yan abọ ẹre ba ẹre
w11 5/15 23 okhuẹn 13
‘U Miẹn Vbene Ẹwaẹn Ọghe Osanobua Dinmwi Hẹ!’
13 Ukọ e Pọl keghi vbe ya emwa ni ghi khian ọkpa vbe emọ ọghe Ebraham gie abọ ọghe erhan oliv nọ mu ukhọmwẹ emwi. (Rom 11:21) Erhan oliv na kọe keghi mudia ye ihe emwamwa ọghe Osanobua nọ dekaan ile ne ọ gu Ebraham ta nọ suẹn gha mwẹ amusẹ nẹ. Inian ọghe nene erhan oliv keghi re nọhuanrẹn, ọ keghi vbe mudia ye ihe Jehova nọ rhie arrọọ ne Ivbi Izrẹl ọghe orhiọn. (Aiz 10:20; Rom 11:16) Ke ẹzi ọghe nene erhan ya sẹ ehe ne ọ na zẹlẹ abọ keghi mudia ye ihe Jesu nọ re abọ nokaro vbe emọ ọghe Ebraham. Abọ ọghe erhan oliv na, keghi mudia ye ihe emwa hia ni re abọ nogieva vbe emọ ọghe Ebraham.
(Rom 11:17) A ghi giagia abọ eso kua vbe erhan ohọ ne a kọe, a keghi do mu abọ erhan ohọ ni rre oha mama yọ. Wa ne ẹi re Ju, te uwa yevbe erhan ohọ ni rre oha nii, wanwan nian, agbọn ẹfe kevbe ne ọ mwẹ ẹtin ne ọre ọghe avbe Ju, sẹ uwa obọ.
(Rom 11:20, 21) Ẹmwata ọni khin. A giagia iran kua rhunmwuda ighẹ uwẹ yayi. Sokpan, ghẹ tọn egbe mu gbe ye ẹmwẹ na, vberriọ, gie ohan gha muẹn. 21 Osanobua ma sẹ avbe Ju ni yevbe abọ ne abọ rae, wẹ ma yayi ighẹ ọ gha sẹ uwẹ rae?
w11 5/15 24 okhuẹn 15
‘U Miẹn Vbene Ẹwaẹn Ọghe Osanobua Dinmwi Hẹ!’
15 De emwi ne Jehova ghi ru, ne emwamwa ọghẹe mieke na mwẹ amusẹ? E Pọl keghi rhan otọre wẹẹ abọ ọghe erhan oliv nọ rre oha ẹre a ghi do mama ginna erhan oliv na kọe, nọ mieke na rhihe avbe abọ na gia kua. (Tie Rom 11:17, 18.) Nọnaghiyerriọ, Ivbiotu e Kristi na hannọ zẹ ni ke agbẹnvbo ughughan rre, vbe na ghee etẹn eso na hannọ zẹ ni ghaa rre iko ọghe Rom, keghi re na ghi do mama ginna erhan oliv na vbe odẹ ọghe orhiọn. Odẹ vbenian ẹre iran ya do gha re ọkpa vbe emọ ọghe Ebraham. Abọ erhan oliv nọ rre oha ẹre iran te ka gha khin, rhunmwuda ọni, iran i ghẹ te sẹtin gha mwẹ ọghae vbe ile ne kpataki na. Sokpan e Jehova keghi kie ẹkpotọ ne iran, ne iran do gha re ọkpa vbe Ivbi e Ju ọghe orhiọn.—Rom 2:28, 29.
(Rom 11:25, 26) Ẹmwata ọkpa rrọọ, oro wa nọ, sokpan I hoo ne uwa rẹn ọnrẹn etẹn mwẹ, ọni gha kie uwa ukpẹ ne uwa na roro ighẹ uwa wan gbe. Ọre ọni khin wẹẹ, izevbudu Ivbi Izrẹl, ẹi re emwi etẹbitẹ, sokpan, ọ gha ye gha khian rhinrin emwa ne ẹi re Ju ne ọ gha bu Osanobua rre te do gba. 26 Erriọ ẹre a ra ya miẹn emwa Izrẹl fan. Zẹ vbene ebe khare: “Ọmiọnmwafan gha ke Zaiọn rre, ọ ghi rhie ekhọe dan hin uniẹn e Jekọb rre.
w11 5/15 25 okhuẹn 19
‘U Miẹn Vbene Ẹwaẹn Ọghe Osanobua Dinmwi Hẹ!’
19 Vbene ẹmwata, emwamwa ọghe Jehova vbe nọ dekaan ‘Izrẹl ọghe Osanobua’ keghi mwẹ amusẹ vbe odẹ ọghe ọyunnuan. (Gal 6:16) Zẹvbe ne Pọl tae, a gha “miẹn emwa Izrẹl fan.” (Rom 11:26) Ọ gha sẹ ẹghẹ ne Jehova khare, Ivbi “Izrẹl” hia—ọni ọre Ivbi Izrẹl ọghe orhiọn hia fẹrẹ—gha ga zẹvbe ọba kevbe ohẹn vbe ẹrinmwi. Emwi rhọkpa i rrọọ nọ khian sẹtin mu idobo ye emwamwa ọghe Jehova!
Gualọ Emwi Ewe Ọghe Orhiọn
(Rom 9:21-23) A rẹnrẹn ighẹ ọmakhe sẹtin ya obuẹ ma emwi ne ọ khọn rẹn, ọ sẹtin fian vbe obuẹ ọkpa nii ya ma akhe ọpuẹkẹ ra ọghe aghanghan. 22 Erriọ emwi ne Osanobua ru wa vbe ye zẹẹ. Ọ hoo ne ọ rhie ohu ẹre ma kevbe ne ọ vbe rhie iwegbe ẹre ladian ne a miẹn. Ọ keghi wa kakabọ zinegbe ya mu ẹmwẹ iran ne ohu ẹre muẹn woo egbe, emwa ne ọ te kei ne a rẹnkhẹn uan 23 Ọ keghi vbe gha hoo ne ọ rhie ẹre ne a miẹn ighẹ ukpọlọmwẹ uyi ẹre ne ọ tue yan ima ne ọ wẹẹ ne irẹn tohan rẹn, ma ne ọ hannọ ye otọ nẹ, ne uyi ẹre sẹ ima obọ.
w13 6/15 25 okhuẹn 5
Zin Egbe Ne Jehova Dia Ruẹ
5 Vbọ khian gha ye hẹ deghẹ emwa nagbọn ma kue ne Ọmakhe Nọ Sẹre ma iran? De vbene Osanobua khian ghi ya loo ọdakha ne ọ mwẹ hẹ? Muẹn roro, emwi ne ọmakhe ru deghẹ obuẹ ma gi ẹre ya ma akhe ne ọ te hoo ne ọ ma. Ọ sẹtin ya obuẹ nii ma akhe ọvbehe, ra ọ ghi ya muẹn kua! Adeghẹ obuẹ ma ghi mwẹ emwi nọ gia ya ru, emwa ghi gha kha wẹẹ ọmakhe ma guẹ iwinna. Sokpan ẹi re erriọ ye ne Ọmakhe ọghomwa. (Diut 32:4) Adeghẹ e Jehova te hoo ne ọ ma ọmwa, sokpan ọmwa nii ma kue, obọ ọmwa nii ẹre ọ ghi ye. Odẹ ne Jehova ya loo ọdakha nọ mwẹ zẹvbe ọmakhe ọre wẹẹ, ọmwa gha kue ne Jehova ma irẹn, e Jehova ghi maẹn vbene ọ khẹke, sokpan ọmwa nọ ma kue ne Jehova ma irẹn, e Jehova ghi sẹrae. Emwa ni kue ne Jehova ma iran keghi miẹn ere nọkhua vbọ. Vbe igiemwi, Ivbiotu e Kristi na hannọ zẹ keghi re ‘akhe ọghe itohan,’ Osanobua keghi ma iran do khian ‘akhe ọghe aghanghan nọ mwẹ evbọ gia ya ru.’ Sokpan emwa ni he ẹmwẹ ye Osanobua obọ keghi khian akhe nọ “kei na rẹnkhẹn uan.”—Rom 9:19-23.
(Rom 10:2) Rhunmwuda I gha wa sẹ osẹ ne iran wẹẹ ẹmwẹ Osanobua wa rre iran ekhọe ẹsẹse. Sokpan, vbene ẹmwẹ ọnrẹn rre iran ekhọe ma lele uviẹn ọghe ọmwa ne ọ rẹn emwi ẹse.
it-1 1260 okhuẹn 2
Igbọvo
Izọghae Nọ La Ghee Ihan. Ọmwa sẹtin gha ya ekhọe hia ru emwi, ọ ghi gele rhiegba yọ, sokpan emwi nọ ru nii ghi gha sọnnọ Osanobua. Egbe uyinmwẹ vbenian ẹre Ivbi e Ju nibun vbe orre nokaro ghaa mwẹ. Rhunmwuda ne iran na wa rhiegba ye Uhi e Mosis na lele, iran na gha roro ẹre wẹẹ te uyinmwẹ iran wa gba. Sokpan e Pọl keghi gi iran rẹn wẹẹ, te izọghae ne iran mwẹ la ghee ihan rhunmwuda, iran ma gha mwẹ irẹnmwi nọ gbae ọghe evbagbẹn nọhuanrẹn. Ọni ẹre ọ si ẹre ne iran ma na gha re emwa esi vbe odaro Osanobua. Te ọ khẹke ne iran miẹn abakuru ọghe iran kue, iran ghi la obọ e Kristi rinmwian Osanobua, ne iran mieke na gha re emwa ni gbae vbe odaro ọre kevbe wẹẹ, iran ghi vbe miẹn afanvbimu vbe obọ Uhi e Mosis. (Rom 10:1-10) Egbe ọmwa vberriọ ẹre Sọl ne ovbi e Tasọs ghaa khin, te irẹn wa ya ekhọe hia rhiegba ye ugamwẹ ọghe Ivbi e Ju; te ọghẹe ghi vbe tua gbe, ọ na gha kpokpo iko ọghe Osanobua, ọ na vbe gha hoo ne ọ “fuẹn ọnrẹn uan.” Te irẹn mu ẹmwẹ Uhi yan uhunmwu, ọ vbe gha ghee egbe ẹre zẹvbe “ọmwa ne ẹi mwẹ abakuru.” (Gal 1:13, 14; Fil 3:6) Sokpan, izọghae nọ la ghee ihan ẹre irẹn ghaa mwẹ ne ugamwẹ ọghe Ivbi e Ju. E Jehova rẹnrẹn wẹẹ ọmwa nọ mwẹ ekhọe esi te nọ, ọni ẹre ọ si ẹre ne ọ na tohan rẹn, ọ na loo e Kristi ya fi ẹre ekhọe werriẹ, ne ọ mieke na do gha ga irẹn vbe odẹ ọghe ẹmwata.—1 Tim 1:12, 13.
E Baibol Na Tie
(Rom 10:1-15) Etẹn mwẹ, ekhọe ke ekhọe mwẹ hia ọre I ya tae wẹẹ, vbọ rrọọ nian akpawẹ te a miẹn emwa fan! Erhunmwu ọre I na ghee Osanobua ne iran. 2 Rhunmwuda I gha wa sẹ osẹ ne iran wẹẹ ẹmwẹ Osanobua wa rre iran ekhọe ẹsẹse. Sokpan, vbene ẹmwẹ ọnrẹn rre iran ekhọe ma lele uviẹn ọghe ọmwa ne ọ rẹn emwi ẹse. 3 Rhunmwuda iran ma rẹn vbene Osanobua ya dọlọ ọmwa kugbe ba egbe ẹre hẹ, iran keghi rhunmwuda ọni gha bẹlẹ odẹ ọghe egbe iran, rhunmwuda ọni, iran ma ghi ye obọ ye Osanobua re vbekpa ọghe vbene ọ hoo ne ọ ya dọlọ iran kugbe ba egbe irẹn hẹ. 4 Rhunmwuda, Jesu mu ẹmwẹ nene Uhi sẹ ufomwẹ nẹ, ne a miẹn ehe na miẹn wẹẹ ọmwakọmwa ne ọ yaeyi, ọ khian ne a dọlọ kugbe ba Osanobua. 5 Ẹmwẹ ne Mosis gbẹn ẹre ọna khin, vbekpa ọghe ne a rhunmwuda ighẹ a mu nene Uhi sẹ, dọlọ ọmwa kugbe ba Osanobua: “Ọmwa ne ọ rhirhi mu nene Uhi sẹ gha la ekpa ẹre gha rrọo.” 6 Sokpan vbe ọghe wẹẹ ne a rhunmwuda iyayi dọlọ ọmwa kugbe ba Osanobua, ọ wẹẹ, “Ghẹ gbe agbanmwẹ wẹẹ, ‘De ọmwa ne ọ khian yo odukhunmwu vbe ẹrinmwi yi?’ “ (Ọni nọ wẹẹ ne ọ ya tie Kristi rre.) 7 “Erriọ ghẹ vbe kha wẹẹ, ‘De ọmwa ne ọ ra yo agbọn ne ọ rre uwu otọ?’ “ (Ọni nọ wẹẹ ne ọ ya rhie Kristi ke orinmwi gha dee.) 8 Vbene ọ khare ọre ọna khin: “Uhunmwu ne Osanobua gie sikẹ ruẹ, ọ rre aranmwẹ kevbe ekhọe ruẹ,” ọni ọrọre ẹmwẹ iyayi ne ima kporhu ẹre. 9 Deghẹ uwẹ ye akhuarhamwunu ruẹn tae wẹẹ, “Nọyaẹnmwa ọre Jesu khin,” u na vbe yayi vbe ekhọe ruẹ wẹẹ, Osanobua huẹn ọnrẹn hin idin rre, u gha re ne a miẹnfan. 10 Rhunmwuda ekhọe ọre ima ya yayi, a keghi dọlọ ima kugbe ba Osanobua, ma ye unu mwa tae ladian, a keghi miẹn mwa fan. 11 Rhunmwuda ebe tae wẹẹ, “Ọmwakọmwa ne ọ yaeyi, ẹi ra gbe I ma rẹn.” 12 Emwa hia ọre a kha, rhunmwuda alughaẹn i rrọọ ne Ju ra iran ne ẹi re Ju, Osanobua ọrọre yan ehia, ọ ghi vbe gha fiangbe iran hia ni datie ẹre wọrhọwọrhọ. 13 Zẹ vbene ebe khare “Ọmwaikọmwa ne ọ datie eni Noyaẹnmwa, ọ gha re ne a miẹn fan.” 14 Sokpan vbe iran gha na datie ẹre hẹ yi deghẹ iran ma yayi? Vbe iran gha na yayi hẹ deghẹ iran ma họn nene ẹmwẹ? Vbe iran gha na họn hẹ deghẹ i re te a kporhu ẹre. 15 Vbe a gha na kporhu hẹ, adeghẹ ẹi re te a gie emwa gha khian? Zẹ vbene ebe tae, “A miẹn vbene urremwẹ iran ru ọyunnuan hẹ ighẹ iran ni rhie iyẹn nọ maan dee!”
(Rom 8:19-21) Te emwi ne a yi hia hẹko zinegbe gha khẹ wẹẹ ne Osanobua viọ ivbi ẹre ladian ne a miẹn. 20 Te a gheghe ya avbe emwi ne a yi khian ne ẹi ghi mwẹ esa, ẹi re wẹẹ te ọ te yẹẹ ọre vberriọ. Sokpan vbene Osanobua wẹẹ emwi gha ye ọre nọ, sokpan idaehọ na ye rrọọ wẹẹ 21 ẹdẹ ọkpa, a gha rhan emwi ne a yi hin uwu ọviẹn kevbe ọkẹkua ne ọ ye rre, ne ọ vbe do gha ghae vbe uyi enọyan egbe ẹre ne ivbi Osanobua mwẹ.