Avbe Ako Na Sunu Yi Vbe Ebe Iwinna Na Loo Vbe Ne Iko Uyinmwẹ Kevbe Iwinna Ọghe Ima
MARCH 4-10
EMWI EWE NI RRE UWU ẸMWẸ ỌGHE OSANOBUA | ROM 12-14
“Vbene A Ya Rhie Ahoẹmwọmwa Ma Zẹvbe Ovbiotu E Kristi”
(Rom 12:10) Wa kakabọ gha hoẹmwẹ egbe zẹvbe etẹn vbuwe Kristi, wa gie ẹre gha bọbọ uwa egbe ighẹ ẹmwẹ ọghọ na rhie ne egbe.
it-1 55
Agiẹngiẹn
Ọ khẹke ne Ivbiotu e Kristi gha mwẹ ahoẹmwọmwa (phi·la·del·phiʹa vbe Grik, emwi nọ rhiema ọre, “agiẹngiẹn na mwẹ ne ọtẹn”) vbuwe ẹbu iran. (Rom 12:10; Hib 13:1; vbe ya ghee 1 Pit 3:8.) Ọ khẹke ne ahoẹmwọmwa ne etẹn ni rre iko mwẹ ne egbe, yevbe na ghee ahoẹmwọmwa kevbe asikẹgbe na mwẹ vbuwe ẹgbẹe. Agharhemiẹn wẹẹ etẹn ni rre iko ka rhie ahoẹmwọmwa ma, te a ghi rhie igiọdu ne iran, ne iran gha rhiẹre ma sayọ.—1 Tẹs 4:9, 10.
Emwi ne ẹmwẹ e Grik na nọ re phi·loʹstor·gos demu ọre “na gha mwẹ agiẹngiẹn;” a keghi loo ẹre ginna emwa ni mwẹ asikẹgbe ne khuankhuankhuan. Ẹmwẹ e Grik na nọ re sterʹgo keghi rre usun ẹmwẹ na ku kugbe ya khiẹn phi·loʹstor·gos. Emwi na mobọ loo sterʹgo ginna ọre agiẹngiẹn, vbe na ghee agiẹngiẹn na mwẹ vbuwe ẹgbẹe. Ukọ e Pọl keghi rhie igiọdu ne Ivbiotu e Kristi ne iran kakabọ hia, ne iran gha mwẹ akpa na. (Rom 12:10) E Pọl vbe kha wẹẹ, vbe ẹghẹ okiekie ẹdẹ, emwa i khian ghi gha “mwẹ itohan” ra agiẹngiẹn (aʹstor·goi vbe Grik), ọ na vbe kha wẹẹ, uwu ẹre ọ khẹke emwa vberriọ.—2 Tim 3:3; Rom 1:31, 32.
(Rom 12:17-19) Ọmwa gha ruẹ khọ, ghẹ vbe ye ọkhọ ha ẹre nẹẹn. Hia ne u gha ru emwi ne emwa hia ka ye ne ọ maan. 18 Zẹ vbene ọ kan ruẹn, hia vbe odẹ ke odẹ ne uwa vbe emwa hia gba gha ma ẹko egbe. 19 Ọse mwẹ, ghẹ rria ikhi, sokpan, gie izohu Osanobua ru ẹre, rhunmwuda ebe tae wẹẹ, “‘I gha rria ikhi, I gha ru ẹre werriegbe,’ erriọ e Nọyaẹnmwa khare.”
w09 10/15 8 okhuẹn 3
“Uwa Vbe Emwa Hia Gba Gha Ma Ẹko Egbe”
3 Tie Rom 12:17. E Pọl keghi rhan otọre wẹẹ, deghẹ emwa na gha ya obọ dan mu ima, ọ ma khẹke ne ima vbe gha ya obọ dan mu iran. Ọ khẹke na wa gha lele ibude ne Pọl rhie ne ima na, katekate vbe owa ne emwa i na rre ugamwẹ ọkpa. Adeghẹ ọdafẹn ima ra ọvbokhan ima i ga e Jehova, ọ ma khẹke ne ima gha ya obọ dan muẹn, ọ gha khọn rẹn wẹẹ ọ ya obọ dan mu ima. ‘Na gha ya ọkhọ hae osa ọkhọ’ i biẹ ọmọ esi hiehie. Sokpan te uyinmwẹ vberriọ zagha owa.
w07 7/1 24-25 okhuẹn 12-13
“Ọmwa Gha Ruẹ Khọ, Ghẹ Vbe Ye Ọkhọ Ha Ẹre Nẹẹn”
12 Ibude ọvbehe ne Pọl vbe rhie ne ima vbe nọ dekaan obọ nọ khẹke na ya gha mu emwa ne ima gba ga kevbe emwa nẹi ga e Jehova, ọre wẹẹ: “Ọmwa gha ruẹ khọ, ghẹ vbe ye ọkhọ ha ẹre nẹẹn.” Ma gha sẹtin lele adia na deghẹ ima na lele ibude ne irẹn ka rhie ne ima, ne ọ na wẹẹ: “Ghẹ gha ma ẹko emwi dan.” Ẹmwata nọ rrọọ ọre wẹẹ, ọmwa nọ ya orukhọ ha osa orukhọ i khian sẹtin kha wẹẹ irẹn i ma ẹko emwi dan. Ọmwa ghaa ru vberriọ, ọni rhiema wẹẹ ẹi mwẹ “ahoẹmwọmwa nọ sẹ otọ ẹko.” E Pọl na vbe kha wẹẹ: “Hia ne u gha ru emwi ne emwa hia ka ye ne ọ maan.” (Rom 12:9, 17) De vbene ima khian ya rhie ẹmwẹ ne Pọl tae na ye uyinmwẹ hẹ?
13 Vbe lẹta ne Pọl ka gbẹn gie Ivbiotu e Kristi ni ghaa rre Kọrinti, ọ keghi guan kaan ukpokpo ne avbe ukọ werriẹ aro daa. Ọ na kha wẹẹ: “Ma ne ukọ ẹre Osanobua hẹ ke odieke . . . ne agbọn vbe ẹrinmwi miẹn gha ghe. . . . A gha rhovbiẹ ima, ma ghi gha na erhunmwu, a gha kpokpo mwa, ma ghi zin egbe. A gha talọ ku ima, ma ghi gha ya ẹmwẹ rọkhọrọkhọ wanniẹn ẹmwẹ.” (1 Kọrinti 4:9-13) Erriọ vbe ye vbe ẹdẹnẹrẹ, te emwa ni rre agbọn na wa tan aro ye Ivbiotu e Kristi ọghe ẹmwata egbe. Adeghẹ emwa na bẹghe ẹre wẹẹ ima ye ru emwi esi, agharhemiẹn wẹẹ emwa ya obọ dan mu ima, iran sẹtin do gha mwẹ ẹkorhiẹnrhiẹnmwẹ daa ikporhu iyẹn nọ maan ọghe ima.—1 Pita 2:12.
(Rom 12:20, 21) Sokpan, zẹ vbene ebe tae, “Deghẹ ohanmwẹ gbe oghian ruẹn, kokẹe, deghẹ ohanmwẹ amẹ gbe ẹre, sa amẹ nẹẹn wọn rhunmwuda, vbe ne u na ru vberriọ, ogiọnmwẹ erhẹn ẹyin ọre u koko ye ọre uhunmwu.” 21 Ghẹ gi obọ ọkhọ ke odukhunmwu nuẹn, sokpan, ya ọ maan rhie obọ yan ọkhọ uhunmwu.
w12 11/15 29 okhuẹn 13
Uwa Gha Ya Ekhọe Hia Yabọ Egbe
13 Ugbẹnso, u sẹtin gha roro ẹre wẹẹ, ọ khẹke ne u ru iyobọ ne ọmwa nọ ru ruẹ emwi khọ, ne ọ ya do rẹn avbe akpa ọghe Ivbiotu e Kristi, kevbe nọ gha rhiẹre ma vbe arrọọ ọghẹe. Ukọ e Pọl keghi gbẹn wẹẹ: “‘Deghẹ ohanmwẹ gbe oghian ruẹn, kokẹe, deghẹ ohanmwẹ amẹ gbe ẹre, sa amẹ nẹẹn wọn rhunmwuda, vbe ne u na ru vberriọ, ogiọnmwẹ erhẹn ẹyin ẹre u koko ye ọre uhunmwu.’ Ghẹ gi obọ ọkhọ ke odukhunmwu nuẹn, sokpan, ya ọ maan rhie obọ yan ọkhọ uhunmwu.” (Rom 12:20, 21) Adeghẹ u na ye gha ru emwi esi agharhemiẹn wẹẹ ọmwa ya ohu mu ruẹ, u gha sẹtin ru iyobọ ne emwa ni mwẹ uyinmwẹ dan, ne iran ya gha mwẹ uyinmwẹ esi, uhiẹn ya sẹ egbe ọmwa ne uyinmwẹ ọnrẹn ghi rhia sẹ. Adeghẹ u na gha mwẹ amuroro kevbe ẹnina daa ọmwa nọ ru ruẹ khọ, u gha sẹtin ru iyobọ nẹẹn, ne ọ ya do rẹn ẹmwata ni rre uwu e Baibol. Vbọrhirhighayehẹ, adeghẹ u na gha ya obọ esi mu ọmwa nọ ru ruẹ khọ, ẹkpotọ ghi kie ne ọmwa nii, ne ọ ya yegbe taa uyinmwẹ esi ọghuẹ.—1 Pit 2:12; 3:16.
Gualọ Emwi Ewe Ọghe Orhiọn
(Rom 12:1) Rhunmwuda ọni etẹn mwẹ, I lekpa itohan nọkhua ọghe Osanobua ghee emwa, rinmwian uwa ne uwa ya egbe uwa fi ohan ne Osanobua zẹvbe emwi izọese nọ ye rre agbọn, nọ mu aro ye ẹmwẹ iwinna ẹnrẹn, kevbe ne ọ vbe yẹẹ ọre. Ọnọna ọrọre ugamwẹ ẹmwata ne uwa gha rhie nẹẹn.
lvs 76-77 okhuẹn 5-6
Vbene Ima Khian Ya Ru Azẹ Nọ Dekaan Irọkhegbe
5 Emwi hia ne ima ru keghi dekaan ugamwẹ ne ima rhie ne Jehova. E Pọl keghi rhan otọ ọna vbe ọ khare wẹẹ: “Uwa ya egbe uwa fi ohan ne Osanobua zẹvbe emwi izọese nọ ye rre agbọn, nọ mu aro ye ẹmwẹ iwinna ẹnrẹn, kevbe ne ọ vbe yẹẹ ọre.” (Rom 12:1) Jesu khare wẹẹ: “Wẹ ghi ya ekhọe ruẹ hia, orhiọn ruẹn hia, ẹko ruẹ hia, kevbe ẹtin ruẹn hia hoẹmwẹ Nọyaẹnmwa Osanobua ruẹ.” (Mak 12:30) Ọ khẹke ne ima gha ya ekhọe hia ga e Jehova. E Jehova keghi gbe uhi ne Ivbi Izrẹl nẹdẹ wẹẹ, ẹghẹ ke ẹghẹ ne iran khian ya ye aranmwẹ zọ ese gie irẹn, ọ khẹke ne iran loo aranmwẹ ne egbe gba na. Adeghẹ egbe ma gba ne aranmwẹ nii, Osanobua i miẹn izọese nii yi. (Levitikọs 22:18-20) Erriọ vbe ye vbe ẹdẹnẹrẹ, a sẹtin do miẹn wẹẹ e Jehova i ghi miẹn ugamwẹ ọghe ima yi. De vbene ọni khian ya sẹtin sunu hẹ?
6 E Jehova keghi tama ima wẹẹ: “Ọ kere ne uwa gha re nọhuanrẹn rhunmwuda nọhuanrẹn ọre imẹ vbe khin.” (1 Pita 1:14-16; 2 Pita 3:11) Emwi ọkpa nọ khian ya e Jehova miẹn ugamwẹ ọghe ima yi, ọre deghẹ ọ na gha re nọhuanrẹn. (Diuteronomi 15:21) Ugamwẹ ọghe ima i khian sẹtin gha re nọhuanrẹn deghẹ ima na gha ru emwi nọ sọnnọ e Jehova, vbe na ghee uyinmwẹ alama oghẹ, igbinna oguo ra deghẹ ima na gha mwẹ obọ vbe emwi nọ dekaan orhiọn dan na gu muobọ. (Rom 6:12-14; 8:13) Ẹko i khian vbe rhiẹnrhiẹn e Jehova, deghẹ a na miẹn wẹẹ, emwi vbenia ni sọnnọ irẹn, ẹre ima ghi ya sọyẹnmwẹ egbe. Ọna sẹtin do ya ugamwẹ ne ima rhie ne Jehova khian nọ ma huan, ẹghẹ nii, e Jehova i ghi miẹn ọnrẹn yi; ọna sẹtin vbe mu asikẹgbe ne ima gu e Jehova mwẹ rhia.
(Rom 13:1) Ọ kere ne emwa hia gha họn ẹmwẹ ne avbe ukọ ẹvbo, rhunmwuda, asẹ ọkpa i sẹtin gha rrọọ vbe ẹi re te Osanobua ye obọ yọ, avbe emwa ni rre asẹ hia, Osanobua ẹre ọ viọ iran ye evba.
w08 6/15 31 okhuẹn 4
Avbe Olika Ẹmwẹ Ni Rre Ebe Ne Pọl Gbẹn Gie Emwa E Rom
13:1—Vbe a yae kha, ne a na wẹẹ “avbe emwa ni rre asẹ hia, Osanobua ẹre ọ viọ iran ye evba”? Ne ako na, na wẹẹ “avbe emwa ni rre asẹ hia, Osanobua ẹre ọ viọ iran ye evba” rhiema wẹẹ, Osanobua ẹre ọ kue ne iran gha khaevbisẹ, kevbe wẹẹ, vbene eso vbuwe iran ke la ukpo, Osanobua rẹn nẹ wẹẹ iran gha khaevbisẹ. Ẹmwẹ ne Baibol tae yotọ vbekpae emwa eso ni khaevbisẹ keghi sosẹ ye ọna.
E Baibol Na Tie
(Rom 13:1-14) Ọ kere ne emwa hia gha họn ẹmwẹ ne avbe ukọ ẹvbo, rhunmwuda asẹ ọkpa i sẹtin gha rrọọ vbe ẹi re te Osanobua ye obọ yọ, avbe emwa ni rre asẹ hia, Osanobua ẹre ọ viọ iran ye evba. 2 Ọmwakọmwa nọ gu asẹ ne ọ rrọọ gha suan, iyi ne Osanobua yi ẹre ọ gbe odan yi, ọmwakọmwa ne ọ ru vberriọ, oya ẹre ọ ya obọ si rrie egbe. 3 Rhunmwuda iran ni rre asẹ i re ne afianma rẹn fian ọmwa ne ọ ru emwi ẹse, sokpan iran ni ru emwi dan, deghẹ uwẹ i hoo ne afianma iran ni rre asẹ gha fian an, gha ru emwi esi, ọ gha tian ruẹn. 4 Rhunmwuda ọguọmwadia Osanobua ne ọ winna ye umamwẹ ruẹn ẹre nọ. Sokpan, u gha ru emwi dan, gie afianma rẹn gha fian an, rhunmwuda, ẹtin ne ọ mwẹ ne ọ ya rri ọmwa oya, ẹi re ọghe abawẹ, ọguọmwadia Osanobua nọ, oya ẹre ọ rri iran ni ru emwi dan re ne Osanobua. 5 Rhunmwuda ọna ẹre a na miẹn wẹẹ iwinna uwa nọ ne uwa gha họn ẹmwẹ ne iran ni rre asẹ, ẹi re rhunmwuda afianma izohu Osanobua ọkpa, sokpan zẹ vbe ne ekhọe ọmwa i na gu ọmwa gui. 6 Otọ emwi nọ ye uwa zẹ igho uhunmwu ẹre ọna khin, rhunmwuda Osanobua ẹre iran ni rre asẹ winna na, deghẹ iran winna iwinna ne ọ kan iran. 7 Rhunmwuda ọnii wa ha osa kevbe igho ne a fian ye emwi ne uwa mwẹ ne iran, wa ghi vbe gha ye ọghọ vbe ute da ne iran. 8 Ghẹ rri ọmwa rhọkpa osa, osa ọkpa ne u gha re ọrọre ne uwa gha hoẹmwẹ egbe, ọmwakọmwa ne ọ mwẹ ahoẹmwọmwa ghe ihua ẹre, mu nene uhi sẹ nẹ. 9 Avbe uhi na, “Ghẹ ghẹ, ghẹ do izigha, ghẹ rha, ghẹ ye aro ye emwi ẹrrẹe,” ena hia kevbe ọvbehe ne ọ rhirhi gha khin, uhi ọkpa ẹre a ya fian ehia ifi wẹẹ, “Hoẹmwẹ ogieva ruẹ zẹ vbene u hoẹmwẹ egbe ruẹ.” 10 Ọmwakọmwa ne ọ hoẹmwẹ ogieva ẹre, ẹi ru ẹre emwi khọọ. Deghẹ a ghi mwẹ ahoẹmwọmwa nẹ khekherriọ, ọni ọre wẹẹ a mu nene Uhi hia sẹ nẹ. 11 Ọ kere ne uwa gha ru vbenian, rhunmwuda, wa rẹn vbene ẹghẹ kha hẹ na, ẹghẹ sẹ ne uwa gha ya rhiọrre vbe ovbe. Rhunmwuda, ẹghẹ ne a gha ya miẹn ima fan, ẹghẹ na ẹre ọ na sikẹ otọ sẹ vbene ọ ye ẹghẹ ne ima na da yayi. 12 Asọn ye egbe khian buan nẹ, te ẹdẹ ghi ra gbe. Wa gie ima viọ emwi igbinna ne a ya gbinna vbe uwu uwanmwẹ mwẹ obọ. 13 Wa gie ima gha ru emwi ọmwa ne ọ rẹn enegbe, zẹvbe ivbi uwanmwẹ ẹdẹ, ẹi re vbe uwu oyanghan, ra ayọn ne a da gbe egbe, ẹi re uwu alama oghẹ ra usankanmwẹ, ẹi re vbe uwu igbinna ra oya ọmwa da ọmwa. 14 Sokpan wa viọ emwi igbinna ọghe Nọyaẹnmwa Jesu Kristi mwẹ obọ, wa ghẹ gie ẹmwẹ egbe orukhọ uwa mu uwa, vbekpa ne uwa na rhie emwi ne ọ hoo nẹẹn ne ẹko vọẹn.
MARCH 11-17
EMWI EWE NI RRE UWU ẸMWẸ ỌGHE OSANOBUA | ROM 15-16
“Hẹnhẹn Egbe Yan E Jehova Nọ Ru Iyobọ Nuẹ Ya Gha Mwẹ Izinegbe Kevbe Ifuẹko”
(Rom 15:4) Rhunmwuda, emwi hia ne a gbẹn ye nene Ebe, te a gbẹn ọnrẹn ne a ya maa ima emwi, ne ima sẹtin lekpa izinegbe kevbe ẹtin ne Ebe rhie ye ọmwa iwu, gha mwẹ idaehọ.
“Gu Enọ Viẹ Gha Viẹ”
11 Odẹ ne Jesu ya khiẹ vbe Lazarọs wu keghi re ọkpa vbe usun okha nibun ni rre Baibol ni rhie ifuẹko ne ọmwa. Ọna ẹre ọ gele si ẹre ne Baibol na kha wẹẹ “emwi hia ne a gbẹn ye nene Ebe, te a gbẹn ọnrẹn ne a ya maa ima emwi, ne ima sẹtin lekpae izinegbe kevbe ẹtin ne Ebe rhie ye ọmwa iwu, gha mwẹ idaehọ.” (Rom 15:4) U ghaa khiẹ, u gha sẹtin miẹn ifuẹko vbe ako ọghe evbagbẹn nọhuanrẹn ni rre ototọ mwa:
▪ “E Nọyaẹnmwa sikẹ iran ne agbọn zẹ ọre ẹtin. Ọ vbe miẹn iran hia ne iro haan rẹn fan.”—Psm 34:18, 19.
▪ “Ẹghẹikẹghẹ ne udu mwẹ ya mu waa, l na vbe gha hawa, u ghi fu mwẹ ẹko rre, u ghi ya mwẹ sẹ ọyẹnmwẹ.”—Psm 94:19.
▪ “Te Nọyaẹnmwa Jesu Kristi tobọ ẹre, kevbe Osanobua ne Erha mwa ne ọ hoẹmwẹ ima kevbe nọ ke uwu ẹse ọhẹ ọghẹe rhie igiọdu etẹbitẹ ne ima, deba idaehọ nọ maan, gha ye ẹtin ne ọ la ọmwa iwu vuọn ekhọe uwa.”—2 Tẹs 2:16, 17.
(Rom 15:5) Ne Osanobua, obọ ọmwa ne izinegbe kevbe a rhie ẹtin ye ọmwa iwu ke rre, gie uwa sẹtin gha ziro kugbe, vbe emwi ne uwa ru, vbekpa ne uwa gha na gha lele igiemwi Jesu.
w16.04 14 okhuẹn 5
“Wa Ghi Gie A Miẹn Wẹẹ, Te Uwa Wa Mwẹ Izinegbe Nii Sẹ Ota”
5 Rinmwian e Jehova ne ọ rhie ẹtin nuẹ. Obọ e Jehova ẹre “izinegbe kevbe a rhie ẹtin ye ọmwa iwu ke rre.” (Rom 15:5) Irẹn ọkpa ẹre ọ gele rẹn otọ ọlọghọmwa ne ima la gberra; ye vbe sẹ ọni, irẹn ọkpa ẹre ọ gele rẹn vbene ọ ye ima hẹ vbe egbe ighẹ emwi nọ sunu vbe ẹdogbo ne ima ye, emwi ne ima mu roro, uhiẹn ya sẹ egbe emwi eso na biẹ ima biẹ. Rhunmwuda ọni, irẹn ọkpa ẹre ọ khian gele sẹtin ru iyobọ ne ima ya zin egbe. E Baibol khare wẹẹ, “Ọ viọ emwi ne iran i mwẹ ne iran ni ya ọghọ nẹẹn. Ọ họn utumwẹ iran, ọ keghi miẹn iran fan.” (Psm 145:19) De vbene Osanobua khian ya họn erhunmwu ọghe ima hẹ, deghẹ ima na rinmwiaẹn nọ rhie ẹrhiọn ne ima ya zin egbe?
(Rom 15:13) Te Osanobua, obọ ọmwa ne idaehọ hia ke rre gha ya oghọghọ kevbe ọfumwegbe vuọn uwa, vbekpa iyayi ne uwa mwẹ vbe uwu irẹn, ne idaehọ uwa miẹn ehe na gha muan yọ vbekpa ẹtin orhiọn nọhuanrẹn.
w14 6/15 14 okhuẹn 11
“Hoẹmwẹ Nọyaẹnmwa Osanobua Ruẹ”
11 ‘Ayayẹro ne Jehova rhie ne ima keghi ya ima mwẹ oghọghọ kevbe ọfunmwegbe.’ (Rom 15:13) Ayayẹro ne Osanobua rhie ne ima keghi ru iyobọ ne ima ya sẹtin zin egbe edanmwẹ ọghe amuẹtinyan. Osanobua gha ‘mu ẹrhu ẹde ọghe arrọọ vbe ẹrinmwi’ ne emwa ne a hannọ zẹ ni ‘da imudiase ọghe iran yi ya sẹ ẹdẹ uwu.’ (Arhie 2:10) Emwa ni mwẹ ayayẹro ọghe arrọọ ọghe etẹbitẹ vbe uhunmwu otagbọn na, ni da imudiase ọghe iran yi gha sọyẹnmwẹ afiangbe ọghe etẹbitẹ vbe Paradais vbe uhunmwu otagbọn na. (Luk 23:43) De vbene ayayẹro na ya ima hẹ vbe ekhọe? Vbe ne ai na gbawawẹ, ọ keghi ya ima mwẹ ọyẹnmwẹ kevbe ọfunmwegbe, ọ vbe ya ima hoẹmwẹ Osanobua ne ‘emwi nọ gbae kevbe nọ maan hia ke obọ re rre.’—Jems 1:17.
Gualọ Emwi Ewe Ọghe Orhiọn
(Rom 15:27) Iran ẹre ọ tobọ iran kha ighẹ iran ra ru ẹre, sokpan ne a ta ẹmwata, te ọ bi ye iran egbe ne iran ye avbe ivbiogue nii obọ. Rhunmwuda avbe Ju ghae afiangbe ọghe orhiọn iran sẹ iran ne ẹi re Ju obọ. Rhunmwuda ọni, te ọ vbe kei ne iran ne ẹi re Ju vbe ya emwi afiangbe nọ re ọghe egbe ne iran mwẹ, ga avbe Ju.
w89 12/1 24 okhuẹn 3
‘Vbene A Khian Ya Rẹn Deghẹ Ahoẹmwọmwa Ne Uwa Mwẹ Gele Sẹ Otọ Ẹko’
Te ọ te khẹke ne iran nẹi re Ivbi e Ju ru iyobọ ne etẹn iran ni re Ivbi e Ju ni ghaa rre Jerusalẹm. A gha wẹẹ na ghee ẹre, te ọ wa bi ye iran egbe ne iran ru vberriọ. Te ọ yevbe na miẹn wẹẹ etẹn nẹi re Ivbi e Ju ghaa mwẹ etẹn ni rre Jerusalẹm ‘osa,’ rhunmwuda e Jerusalẹm ẹre iyẹn nọ maan ke vẹwae la agbẹnvbo ọvbehe. E Pọl keghi tama iran wẹẹ: “Ugbẹnvbe avbe Ju ghae emwi ewe ọghe orhiọn ọghe iran sẹ iran ne ẹi re Ju obọ, ọ keghi bi ye iran ne ẹi re Ju egbe ne iran ya emwi ikpakpa ne iran mwẹ ru iyobọ ne avbe Ju.”—Rom 15:27, The New English Bible.
(Rom 16:25) Gie ima rhie uyi ne Osanobua! Irẹn gha sẹtin ya uwa mudia gbain vbe iyayi uwa, zẹvbe iyẹn nọ maan ne I kporhu ẹre ighẹ ẹmwẹ Jesu Kristi, kevbe zẹvbe ẹmwata ne a rhie lẹre ne ẹkpo i mwẹ arria gha dee, ne a miẹn nian wẹẹ ọ vẹe ne a rẹn
it-1 858 okhuẹn 5
Irẹnmwi Ọghe Emwi Nọ Khian Sunu Vbe Odaro
E Mẹzaia na vbe rẹn ye Kristi, ọre Ọmọ na wẹẹ a khian la obọ re fiangbe emwa esi hia ni ke uniẹn emwa nagbọn rre. (Gal 3:8, 14) Ẹghẹ okaro ne a ya guan kaan ‘ọmọ’ na, ọre vbe iyeke Adam vbe Ivi ghi sọtẹ daa Osanobua vbe ogba ọghe Idẹni; ẹghẹ na kha na, a ma he biẹ Ebẹl. (Gẹn 3:15) Ukpo 4,000 gberra nẹ, a ke do rẹn “ẹmwata ne a rhie lẹre” vbe nọ dekaan ọmwa ne ‘ọmọ’ na ru eyan rẹn nii gele khin. Te a gele wa rhie ẹmwata na lẹre, ke “ne ẹkpo i mwẹ arria gha dee.”—Rom 16:25-27; Ẹfis 1:8-10; 3:4-11.
E Baibol Na Tie
(Rom 15:1-16) Ọ kere ne ima ne iyayi ẹre wegbe gha kpa iran ni ma wegbe ihẹ. Ọ ma kei ne ima gha ru ne ọ yẹẹ egbe mwa. 2 Sokpan ọ kere ne dọmwade ọghẹe vbe uwu ima gha ru ne ọ yẹẹ ọtiọnrẹn, ne umamwẹ ọnrẹn, ne a miẹn ehe na gbe ẹre igiẹ vbe uwu iyayi. 3 Rhunmwuda ẹi re ọghe enegbe Kristi ẹre ọ ghaa ru. Sokpan zẹ vbene ebe khare, “Ẹbọ ne iran ni tie ihẹn nuẹn tie nuẹn do sẹ ima egbe.” 4 Rhunmwuda, emwi hia ne a gbẹn ye nene Ebe, te a gbẹn ọnrẹn ne a ya maa ima emwi, ne ima sẹtin lekpa izinegbe kevbe ẹtin ne Ebe rhie ye ọmwa iwu, gha mwẹ idaehọ. 5 Ne Osanobua, obọ ọmwa ne izinegbe kevbe a rhie ẹtin ye ọmwa iwu ke rre, gie uwa sẹtin gha ziro kugbe, vbe emwi ne uwa ru, vbekpae ne uwa gha na gha lele igiemwi Jesu. 6 Ne uwa hia miẹn ehe na sẹtin gha ye urhu ọkpa rho e Nọyaẹnmwa, ne uwa gha rho Osanobua kevbe Erha e Nọyaẹnmwa Jesu Kristi. 7 Wa gha rhan obọ miẹn egbe, ne uyi Osanobua. Zẹ vbene Kristi rhan obọ miẹn uwa. 8 Ne I tama uwa wẹẹ e Kristi khian ọguọmwadia iran ne Ju ne ọ miẹn ehe na rhie ma wẹẹ Osanobua i hiẹ ọmwa, ne ẹmwẹ ne ọ tama avbe erha mwa odede miẹn ehe na sẹ. 9 Ke ne iran ne ẹi re Ju miẹn ehe na gha rho Osanobua rhunmwuda itohan rẹn. Zẹ vbene ebe khare: “Rhunmwuda ọni, mẹ gha kpọnmwọ vbe uwu ẹbu avbe iran ne ẹi re Ju, I gha so ihuan urhomwẹ ghee eni ruẹn.” 10 Ọ kevbe dọlegbe tae wẹẹ, “Wa ne ẹi re Ju, wa deba emwa ne Osanobua hannọ zẹ gha ghọghọ!” 11 Ọ yevbe tae ba ẹre wẹẹ, “Wa rho e Nọyaẹnmwa, wa ne ẹi re Ju hia. Wa kakabo rho ẹre, wa ne emwa hia.” 12 Deba ẹre Aizaia vbe tae wẹẹ, “Ọmọ ọkpa gha la uniẹn Jese rre. A gha tọn rẹn mu ne ọ gha khaevbisẹ ya iran ne ẹi re Ju.” 13 Te Osanobua, obọ ọmwa ne idaehọ hia ke rre gha ya oghọghọ kevbe ọfumwegbe vuọn uwa, vbekpa iyayi ne uwa mwẹ vbe uwu irẹn, ne idaehọ uwa miẹn ehe na gha muan yọ vbekpa ẹtin orhiọn nọhuanrẹn. 14 Ẹtẹn mwẹ, mẹ rẹnrẹn wẹẹ te emwi ni maan hia wa gba uwa obọ, kevbe wẹẹ wa rẹn emwi ẹsẹse, ighẹ wa gha sẹtin gha maa egbe uwa emwi. 15 Sokpan vbe ebe ne I gbẹn gie uwa, emwi ne I tae vbọ, I ma vbe zẹdẹ rhie aranmwẹ kọ ẹho guan. Emwi ne ọ ya mwẹ si agbada vbe unu guan ọrọre rhunmwuda ukpo ne Osanobua mu mwẹ yi. 16 Ọni nọ wẹẹ, ne I gha re ọguọmwadia Jesu Kristi ne ọ gha winna ne iran ne ẹi re Ju. Mẹ ghi gha kporhu iyẹn nọ maan Osanobua zẹvbe ohẹn, ne iran ne ẹi re Ju sẹtin do gha re emwi izọese ne ọ gie Osanobua rhan obọ miẹn, kevbe ne orhiọn nọhuanrẹn ya fiohan nẹẹn.
MARCH 18-24
EMWI EWE NI RRE UWU ẸMWẸ ỌGHE OSANOBUA | 1 KỌRINTI 1-3
“Ọmwa Nọ Rhie Aro Tua Emwi Ikpakpa Ẹre Uwẹ Khin Ra, Ra Ọmwa Nọ Rhie Aro Tua Emwi Orhiọn?”
(1 Kọrinti 2:14) Sokpan ọmwa ne ẹi mwẹ nene orhiọn nọhuanrẹn, ẹi sẹtin rhan obọ miẹn ọhẹ ne ọ ke obọ Osanobua rre. Ẹmwata, ẹi rẹn emwi ne a yae kha, ẹmwẹ oya ehia khin vbe ehọ ẹre rhunmwuda orhiọn nọhuanrẹn ẹre a ya sẹtin rẹn vbene uyi ẹre sẹ hẹ.
Vbe A Yae Kha Na Gha Re Ọmwa Nọ Rhie Aro Tua Emwi Orhiọn?
4 De ama ne a ya rẹn ọmwa nọ rhie aro tua emwi ikpakpa? Emwi ikpakpa ẹre emwa nagbọn khu khian. Ọna ọre iwinna nọ mu emwa nagbọn vbe uhunmwu otagbọn hia. Ukọ e Pọl keghi gie ẹre zẹvbe “orhiọn ne ọ sua iran nian ighẹ iran ne ẹi họn ẹmwẹ ne Osanobua.” (Ẹfis 2:2) Orhiọn dan na, ẹre ọ ya emwa yin uyinmwẹ dan ọghe emwa ni lẹga iran. Emwa vbenian i zẹdẹ lele ilele ọghe Osanobua, emwi nọ khọn iran ẹre iran ru. Iwinna nọ mu emwa ni rhie aro tua emwi ikpakpa ọre emwi ewe ne a khu khian, ukpo ne a na zẹ kevbe oseghe ne a sinmwi ne egbe ọmwa.
5 De ama ọvbehe ne a ya rẹn ọmwa nọ rhie aro tua emwi ikpakpa? Ọmwa nọ rhie aro tua emwi ikpakpa keghi yin uyinmwẹ ne Baibol gbodan yi. (Gal 5:19-21) Vbe ebe nokaro ne Pọl gbẹn gie Ivbiotu e Kristi vbe Kọrinti, ọ keghi ya unu kaẹn uyinmwẹ eso ne a ya rẹn emwa ni rhie aro tua emwi ikpakpa. Eso vbọ keghi re: iwannegbe, ẹmwẹ ẹrhẹe ne a mu yan uhunmwu, ẹzọ, ne a na tie egbe ẹzọ vbe owa ẹzọ, ne a na gbodan ye emwamwa ọghe ọdakha kevbe ne emwa na mu ẹmwẹ evba gha re kevbe evba gha da ye okaro vbe arrọọ ọghe iran. Emwa vbenian i sẹtin mudia gbain vbe iran gha werriẹ aro daa edanmwẹ. (Itan 7:21, 22) E Jud guan kaẹn emwa eso ni gha khian rree ne Osanobua, sẹrriọ wẹẹ, iran ghi gha yin vbe na ghee aranmwẹ oha.—Jud 18, 19.
(1 Kọrinti 2:15, 16) Ọmwa ne ọ mwẹ orhiọn nọhuanrẹn, ẹre ọ sẹtin rẹn uyi ne ọ rre emwi hia egbe, sokpan ọmwa ne ọ sẹtin bu ohiẹn irẹn, ẹi rrọọ. 16 Zẹ vbene ebe khare: “De ọmwa ne ọ rẹn emwi ne ọ rre Nọyaẹnmwa ekhọe? Gha ọ gha sẹtin bu ẹre ude?” Vbene ọ rhirhi gha ye hẹ, ekhọe Kristi ọre ima mwẹ.
Vbe A Yae Kha Na Gha Re Ọmwa Nọ Rhie Aro Tua Emwi Orhiọn?
6 De ama ne a ghi ya rẹn emwa ni rhie aro tua emwi orhiọn? Emwa ni deziẹn vbe odẹ ọghe orhiọn keghi hoo ne iran ya ẹko rhiẹnrhiẹn Osanobua. Iran keghi hia vbe odẹ ke odẹ ne iran “ye vbe” Osanobua. (Ẹfis 5:1) Ọna rhiema wẹẹ, te iran gbaro kotọ ẹsẹse ne iran mieke na rẹn aro ne Jehova ya ghee emwi. Iran i ya ilele kevbe adia ọghe Osanobua rhẹghẹrẹ. Iran keghi hia ne iran lele adia ọghe Osanobua vbe arrọọ ọghe iran. Te iran wa lughaẹn ne emwa ni rhie aro tua emwi ikpakpa. (Psm 119:33; 143:10) Emwa ni deziẹn vbe odẹ ọghe orhiọn keghi rhie akpa ọghe ọmọ okọ ọghe “orhiọn nọhuanrẹn” ma, vbene iran na bi egbe ne ahoo ọghe ikpakpa. (Gal 5:22, 23) Igiemwi na gha ru iyobọ ne ima ya rẹn ọnrẹn sayọ evba ya re kha ne a gha re ọmwa nọ deziẹn vbe odẹ ọghe orhiọn: Ọmwa gha fuẹro ẹki ne a do, a ghi wẹẹ ọmwa nọ gua do ẹki nọ, sokpan ọmwa nọ ya ekhọe hia gbọyẹmwẹ ye emwi orhiọn keghi re ọmwa nọ deziẹn vbe odẹ ọghe orhiọn.
Vbe A Yae Kha Na Gha Re Ọmwa Nọ Rhie Aro Tua Emwi Orhiọn?
15 De vbene ima tobọ ima gha ya sẹtin ya egbe tae Kristi hẹ? Ebe 1 Kọrinti 2:16 khare wẹẹ, te ọ khẹke ne ima gha mwẹ “ekhọe Kristi.” Ebe Rom 15:5 na vbe kha wẹẹ ne ima “gha lele igiemwi Jesu.” Nọnaghiyerriọ, ne ima do sẹtin gha yevbe Kristi, te ọ khẹke ne ima gele rẹn vbene Jesu ru emwi hẹ kevbe avbe akpa nọ mwẹ ne ima mieke na sẹtin gha lele ukpowẹ ọre. Emwi ne Jesu wa rhie aro tua ọre asikẹgbe ne irẹn gu e Jehova mwẹ. Ma gha ya egbe ta e Jesu, ma ghi do khian Ọsie Jehova. Ọna ẹre ọ si ẹre ne ọ na khẹke ne ima gha mwẹ ekhọe ọghe Kristi.
Gualọ Emwi Ewe Ọghe Orhiọn
(1 Kọrinti 1:20) De ehe ne avbe umẹwaẹn ghi ye vbọ khekherriọ ra iran ni rẹn emwi? Ra iran ni gua ra muan ẹmwẹ vbe agbọn na. Osanobua rhiema nẹ ighẹ ẹwaẹn agbọn na, ukọnmwẹ nọ.
it-2 1193 okhuẹn 1
Ẹwaẹn
Avbe umẹwaẹn ọghe agbọn na keghi hẹe ighẹ emwi ne Osanobua la obọ e Kristi kpemehe ẹre, iran keghi kae ba emwi ukọnmwẹ; emwa ni khaevbisẹ keghi bu ohiẹn gbe Jesu, iran na kue ‘kan rẹn mu erhan.’ (1 Kọr 1:18; 2:7, 8) Sokpan vbe ẹghẹ na nia, Osanobua keghi rhiẹre ma wẹẹ, ukọnmwẹ ẹre ẹwaẹn ọghe emwa nagbọn khin, ọ na zẹ efa ye avbe umẹwaẹn ọghe agbọn na egbe. Ọ keghi loo emwi ne iran ghee zẹvbe emwi “ukọnmwẹ ọghe Osanobua,” kevbe emwa ne iran ghee zẹvbe ‘emwa ni kọẹn, akpa kevbe na ma ka yọ,’ ya mu emwamwa ọghẹe sẹ. (1 Kọr 1:19-28) E Pọl keghi tama Ivbiotu e Kristi ni rre Kọrinti ne iran ghẹ mianmian wẹẹ, “ẹwaẹn ẹmwẹ agbọn na, [kevbe] ọghe avbe ẹtin ni rre ọdakha vbe agbọn na,” gha khian nọ fafaa; rhunmwuda ọni, ukọ e Pọl ma ya egbe ẹwaẹn vbenia maa emwa emwi. (1 Kọr 2:6, 13) Ọ keghi ya obọ sekhae ne Ivbiotu e Kristi ni rre Kọlose wẹẹ, ne iran gha begbe vbe egbe “ẹwaẹn akuọkan [emwi ne ẹmwẹ Grik na, nọ re phi·lo·so·phiʹas rhiema ọre, na hoẹmwẹ ẹwaẹn] ne agbọn ya rẹrẹ ọmwa” kevbe “iruẹmwi la obọ dinna obọ ọghe emwa.”—Kọl 2:8; yae taa uviẹn 20-23.
(1 Kọrinti 2:3-5) Ẹre a na miẹn wẹẹ ẹghẹ ne I na bu uwa rre, egbe ke wọọ mwẹ. 4 Ikporhu mwẹ kevbe ẹmwẹ ne I tae, I ma ya ẹmwẹ umẹwaẹn ne ọ guẹ ẹmwẹ tae, vbe ẹi re ẹmwẹ ne ọ mu ọmwa ekhọe ọghe ẹtin orhiọn Osanobua. 5 Rhunmwuda ọni, ẹi re ẹwaẹn ọmwa ne agbọn ẹre iyayi uwa rhunmwuda ẹre mudia, vbe ẹi re ẹtin ọghe Osanobua.
w08 7/15 27 okhuẹn 6
Avbe Olika Ẹmwẹ Ni Rre Ebe Ne Pọl Gbẹn Gie Emwa Kọrinti
2:3-5. Vbe ẹghẹ ne Pọl na gha kporhu vbe Kọrinti, nọ wa re ẹvbo ne Ivbi e Grik na ruẹ emwi, ọ sẹtin gha roro ẹre deghẹ emwi ne irẹn maa emwa re gha mu iran ekhọe. Vbọrhirhighayehẹ, deghẹ ọ ghaa mwẹ egbe iziro vberriọ, ọ ma gi ẹre mu idobo ye iwinna ne Osanobua waa re. Erriọ vbe ye, ọ ma vbe khẹke ne ima gi isievẹn nọ rhirhi gha khin ne ima werriẹ aro daa mu idobo ye ima egbe, ne ima ghẹ ghi kporhu iyẹn nọ maan ọghe Arriọba Osanobua. Ma gha sẹtin hẹnhẹn egbe yan e Jehova vbene Pọl ru ẹre.
E Baibol Na Tie
(1 Kọrinti 1:1-17) E Pọl ne a lekpa iho Osanobua tie ne ọ do gha re ukọ ọghe Jesu Kristi, kevbe Sọstenes, ọtẹn mwẹ ne okpia, ẹre ọ gbẹn ebe na, 2 gie esọsi Osanobua nọ rre Kọrinti, gie emwa ne a tie re ne iran do gha re emwa ni huanrẹn Osanobua, emwa ni khian ọghẹe rhunmwuda ighẹ iran ya egbe ba e Kristi Jesu, deba emwa hia ni ghi na erhunmwu ghe Nọyaẹnmwa Jesu Kristi nẹ, zẹvbe Nọyan iran kevbe ima. 3 Te Osanobua ne Erha mwa, kevbe Nọyaẹnmwa Jesu Kristi gha rhie ẹsọhẹ kevbe ọfumwegbe ne uwa. 4 Ẹghẹ hia ẹre I ya kpọnmwẹ Osanobua mwẹ ne uwa, rhunmwuda ẹsọhẹ ne ọ la obọ Jesu Kristi rhie ne uwa. 5 Rhunmwuda te uwa ghi ya emwi hia fe nian, kevbe ẹmwẹ ne a guan kevbe irẹnmwi, rhunmwuda ighẹ wa rhie egbe ba e Kristi. 6 Ikporhu ẹmwẹ Kristi wa gbinna nẹ vbe uwu uwa sẹrriọ 7 wẹẹ wa ma he vbabọ emwi afiangbe ọkpa ẹdẹ, vbe uwu ẹghẹ ne uwa ya diakhẹ Nọyaẹnmwa Jesu Kristi ne ọ rhie egbe ma. 8 Irẹn gha ya uwa mudia gbain ya sẹ ufomwẹ, ne a miẹn ehe na miẹn wẹẹ, ọ gha sẹ ẹdẹ Jesu Kristi Nọyaẹnmwa, wa ghi gha re emwa ne a miẹn wẹẹ ẹi mwẹ abe. 9 Osanobua ne ọ tie uwa ne uwa do gha gu Jesu Kristi ne Ovbi ẹre mu obọ, ọmwa ne ọ kere ne a mu ẹtin yan nọ. 10 I ya ẹtin e Nọyaẹnmwa Jesu Kristi rinmwian uwa etẹn, ne uwa gie ẹmwẹ uwa hia gha gu egbe ro vbe ẹmwẹ ne uwa ta, ne iwannegbe ghẹ gha rre ẹkpo uwa, wa gha re ọkpa vbe iro ne uwa zẹ, kevbe emwi ne uwa hoo ne uwa ru. 11 Rhunmwuda, emwa eso ni ke owa e Klọe rre, wa tama mwẹ etẹn mwẹ ighẹ wa muan egbe ẹmwẹ. 12 Gu mwẹ wa tae vbenian wẹẹ ẹmwẹ ughughan wa hia ta. Orhiọnkpa ghi wẹẹ, “Otu e Pọl mẹ ye,” ọmwa ọvbehe ghi vbe wẹẹ, “Otu Apọlọs mẹ ye.” Eso ghi vbe wẹẹ, “Otu e Pita mẹ ye,” eso ghi vbe wẹẹ, “Otu e Kristi mẹ ye.” 13 Te a ghi ghae Kristi ye otu ra? E Pọl ẹre ọ wu ne uwa vbe uhunmwu ugbugbe ra? Te a sa amẹ ne uwa ne uwa gha re erhuanegbe Pọl ra? 14 I kpọnmwẹ Osanobua ighẹ I ma sa amẹ ne ọmwa rhọkpa gberra e Krispọs kevbe Gaiọs. 15 Ọmwa ne ọ gha sẹtin kha ighẹ te a sa amẹ ne irẹn ne ọ gha re ọrhuanegbe mwẹ ẹi rrọọ. 16 (Ẹn hẹn, I gele vbe sa amẹ ne Stefanas kevbe emwa owa ẹre. I ma ghi yerre adeghẹ I ye vbe sa amẹ ne emwa ọvbehe gberra enii.) 17 Kristi ma gie mwẹ ne I do gha sa amẹ ne emwa. Iyẹn nọ maan ẹre ọ wẹẹ ne I do kporhu ẹre, vbe ne ai na vbe ya aguẹmwẹ ẹwaẹn emwa ne agbọn tae, rhunmwuda emwi vberriọ gha ya uwu ne Kristi wu vbe uhunmwu ugbugbe khian nẹi ghi mwẹ ẹtin hiehiere.
MARCH 25-31
EMWI EWE NI RRE UWU ẸMWẸ ỌGHE OSANOBUA | 1 KỌRINTI 4-6
“Eyist Kherhe Ẹre Ọ Ya Ebrẹd Hia Hue”
(1 Kọrinti 5:1, 2) I họn ẹmwẹ uyinmwẹ alama oghẹ vbe obọ uwa, egbe ne ohan i gie avbe enigẹbọ danmwẹ ghe, rhunmwuda, a tama mwẹ wẹẹ arhin ọkpa rhie amwẹ erhae rọnmwẹ. 2 De ne uwa ghi tọn egbe mu ba nian? Vbe ẹmwata, te ọ kere ne uwa gha khiẹ, ọmwa ne ọ ru emwi na, ne uwa si ẹre ladian hin uwu ẹbu uwa rre.
(1 Kọrinti 5:5-8) Wa rhie ọmwa na ne Setan ne a gbe ikinnegbe ẹre uan, ne a miẹn ehe na miẹn orhiọn rẹn fan vbe ẹdẹ Nọyaẹnmwa. 6 Ọ ma kei ne uwa na tọn egbe mu! Wa ma họn vbe a yae kpa itan wẹẹ, “Eyist kherhe ẹre ọ ya ebrẹd hia hue.” 7 Wa rhie eyist ọwiẹyi orukhọ na hin ehe ne uwa ye rre, ne uwa miẹn ehe na huan fo. Ẹghẹ nii, wa ghi do yevbe ẹlubọ ne a ma he rhie eyist yi, I rẹnrẹn ighẹ egbe emwi vberriọ ẹre uwa khin. Rhunmwuda a le evbare Alagberra mwa nẹ nian, ugbẹnvbe a miẹn wẹẹ, a ya e Kristi ne ọre Oteghe Ohuan Alagberra mwa, zọ ese nẹ. 8 Wa gie ima do ugie emwi ukpo mwa, sokpan ẹi re ne a ya ebrẹd ne eyist nẹdẹ nii ye do, eyist orukhọ kevbe alama, sokpan ọghe ebrẹd ne ẹi mwẹ eyist, ebrẹd uhuanmwẹ kevbe uhunmwu ẹmwẹ.
(1 Kọrinti 5:13) Osanobua ẹre ọ ra bu ohiẹn iran sokpan, uwẹ ma rẹn ighẹ ọ kere ne uwa gha bu ohiẹn emwa ne uwa gba rre otu? Zẹ vbene ebe khare, “Wa yuo ọmwa dan nii hin uwu ẹbu uwa rre.”
it-2 230
Eyist
Ẹmwẹ nọ mu ukhọmwẹ emwi na ẹre ukọ e Pọl vbe loo vbe ẹghẹ ne ọ na tama etẹn ni rre Kọrinti ne iran kan okpia ọkpa nọ ghaa mwẹ obọ vbe uyinmwẹ alama oghẹ fua vbuwe iko; e Pọl keghi tama iran wẹẹ: “Wa ma họn vbe a yae kpa itan wẹẹ, ‘Eyist kherhe ẹre ọ ya ebrẹd hia hue.’ Wa rhie eyist ọwiẹyi orukhọ na hin ehe ne uwa ye rre, ne uwa miẹn ehe na huan fo. Ẹghẹ nii, wa ghi do ye vbe ẹlubọ ne a ma he rhie eyist yi, I rẹnrẹn ighẹ egbe emwi vberriọ ẹre uwa khin. Rhunmwuda a le evbare Alagberra mwa nẹ nian, ugbẹnvbe a miẹn wẹẹ, a ya e Kristi ne ọre Oteghe Ohuan Alagberra mwa, zọ ese nẹ.” Vbe iyeke ọni, e Pọl na vbe rhan otọ emwi ne ọ ya “eyist” kha. Ọ na wẹẹ, “Wa gie ima do ugie emwi ukpo mwa, sokpan ẹi re ne a ya ebrẹd ne eyist nẹdẹ ni ye do, eyist orukhọ kevbe alama, sokpan ọghe ebrẹd ne ẹi mwẹ eyist, ebrẹd uhuanmwẹ kevbe uhunmwu ẹmwẹ.” (1 Kọr 5:6-8) Te Pọl ghaa hoo nọ loo Ugie Ebrẹd Nọ Ma Hue ne Ivbi e Ju ghaa do vbe iran gha wa da do Ugie Alagberra fo, ya ru igiemwi. Zẹvbe ne eyist kherhe gha ya sẹtin ya ebrẹd hue, erriọ iko nọ rre Kọrinti nii khian vbe ya khian nọ ma huan, deghẹ iran ma rhie okpia nii nọ ghaa yin uyinmwẹ alama oghẹ hin uwu iko rre. Te iran gha rhie “eyist” hin uwu ẹbu iran rre, zẹvbe ne Ivbi Izrẹl ya gha rhie eyist hin owa rre, vbe ẹghẹ ke ẹghẹ ne iran ya do Ugie Ebrẹd Nọ Ma Hue.
it-2 869-870
E Setan
De emwi ne Baibol yae kha, ne ọ na wẹẹ ‘na rhie ọmwa ne Setan ne ọ gbe ikinnegbe ẹre rua’?
Ọ ghaa mwẹ ọtẹn nokpia ọkpa vbe Kọrinti nọ ghaa lovbiẹ ke ọvbokhan erhae; vbe Pọl ghi tama etẹn ni rre Kọrinti oya nọ khẹke ne iran rri okpia nii re, ọ na wẹẹ: “Wa rhie ọmwa na ne Setan ne a gbe ikinnegbe ẹre rua.” (1 Kọr 5:5) Emwi ne Pọl ya ọna kha ọre ne iran kan okpia nii fua vbuwe iko, ne iran ghẹ vbe gu ẹre gha muobọ. (1 Kọr 5:13) Na rhie ọmwa na ne Setan rhiema wẹẹ, ẹi khian ghi gha rre uwu iko, sokpan uwu agbọn ne Setan na khaevbisẹ ẹre ọ khian ghi gha ye. Vbe na ghee “eyist kherhe” nọ rre uwu “ebrẹd hia,” erriọ okpia nii nọ mwẹ obọ vbe uyinmwẹ alama oghẹ ye vbuwe iko; etẹn ni rre uwu iko gha rhie okpia na nọ ya “ikinnegbe” ọghẹe ru orukhọ, hin uwu ẹbu iran rre, ọ ghi yevbe na miẹn wẹẹ, te iran gbe “ikinnegbe ẹre” rua nẹ ghẹ mieke na gha rre uwu ẹbu iran. (1 Kọr 5:6, 7) Erriọ e Pọl vbe ya rhie Haimẹniọs kevbe Alẹkzanda ne Setan, rhunmwuda ne iran na mu amuẹtinyan ọghe iran fua, kevbe ne iran ma na ghi lele emwi ne ekhọe ọguọmwaziro ọghe iran tama iran.—1 Tim 1:20.
(1 Kọrinti 5:9-11) Vbe ebe ne I ka gbẹn gie uwa, I tama uwa ne uwa ghẹ gha gu iran ni gbe alama mu obọ. 10 Ẹi re iran ni ma yayi, ni gbe alama, ra ni zuan ra ni gbe olighi, ra ni ga ẹbọ, ọre I kha. Wa gha wẹẹ ne uwa gha lẹẹ ne iran, ọni rhiema ighẹ te uwa ghi ra kpa hin agbọn na rre fẹẹrẹ. 11 Emwi ne I kha ọrọre wẹẹ, wa gha miẹn ọmwa ne ọ tie egbe ẹre ọtẹn, ne ọ yayi, ọ na gha gbe alama, ọ zuan, ọ ga ẹbọ, ọ ta ọtakhọ, ọ da ayọn gbe egbe, ra ọ gbe olighi, wa ghẹ gu ẹre mu obọ, wa ghẹ kue gu ọmwa vberriọ rri evbare.
lvs 241, ifiẹmwẹ ni rre ufomwẹ ebe
Emwamwa Ọghe Na Kan Ọmwa Fua Vbuwe Iko
Ọmwa gha ru orukhọ nọ wegbe vbene ọ ma na fiwerriẹ, ọ ma na vbe muegbe nọ ya lele ilele ọghe Jehova, ẹi khian ghi sẹtin gha re ọkpa vbe iko ọghe Ivbiotu e Kristi. Te ọ khẹke na kaẹn fua. A gha kan ọmwa fua vbuwe iko, ai ghi gu ẹre muobọ, ai ghi vbe gu ẹre guan. (1 Kọrinti 5:11; 2 Jọn 9-11) Emwamwa ọghe na kan ọmwa orukhọ fua vbuwe iko keghi kpe eni e Jehova huan, erriọ vbe ya gbogba ga iko. (1 Kọrinti 5:6) Ọ keghi vbe re odẹ na ya gbe ọmwa orukhọ hin ọkhọ rre, na mieke na ru iyobọ nẹẹn ya dọlegbe bu e Jehova gha dee.—Luk 15:17.
▸ Uhunmwu ebe 3, okhuẹn 19
Gualọ Emwi Ewe Ọghe Orhiọn
(1 Kọrinti 4:9) Rhunmwuda, ọ ye mwẹ vbene a miẹn wẹẹ, ma ne ukọ ẹre Osanobua hẹ ke odieke zẹvbe emwa ne a wẹẹ ne a ya gbele ua ye ada, ne agbọn vbe ẹrinmwi miẹn gha ghee.
w09 5/15 24 okhuẹn 16
Avbe Odibosa—‘Emọ Orhiọn Ni Winna Ne Osanobua’
16 Ivbiotu e Kristi ni werriẹ aro daa ukpokpo keghi re ‘ughe ne avbe odibosa.’ (1 Kọr 4:9) Avbe odibosa gha bẹghe vbene ima da imudiase ọghe ima yi hẹ, ẹko ghi gha sẹ iran ọyẹnmwẹ, erriọ iran vbe ya ghọghọ vbe ọmwa orukhọ gha roro iro fi uyinmwẹ werriẹ. (Luk 15:10) Avbe odibosa vbe bẹghe uyinmwẹ esi ọghe avbe etẹn ima nikhuo. E Baibol khare wẹẹ, “rhunmwuda iran ne avbe odibosa khekherriọ, ọ kere ne okhuo gha gue uhunmwu ẹnrẹn, ne ọ miẹn ehe na rhiema wẹẹ ototọ asẹ ọdọ ọre, ẹre irẹn ye.” (1 Kọr 11:3, 10) Vbene ẹmwata, avbe odibosa keghi sọyẹnmwẹ vbe iran gha bẹghe ẹre wẹẹ, etẹn nikhuo kevbe eguọmwadia Osanobua ọvbehe ni rre uhunmwu otagbọn, ku obọ gbe ba emwamwa ọghe otu e Jehova, kevbe wẹẹ, iran họn ẹmwẹ ne emwa ne Jehova zẹ ni gha re uhunmwuta. Avbe odibosa gha bẹghe vbene eguọmwadia e Jehova họn ẹmwẹ hẹ, ọ ghi vbe yee iran rre wẹẹ, ọ khẹke ne iran tobọ iran ye gha họn ẹmwẹ ne Jehova.
(1 Kọrinti 6:3) Wa ma rẹn ighẹ ma ẹre ọ khian bu ohiẹn avbe odibosa ra? Inu inu ghi nọ ne emwi agbọn na?
it-2 211
Uhi
Uhi Ne Osanobua Gbe Ne Avbe Odibosa. Agharhemiẹn wẹẹ avbe odibosa sẹ emwa nagbọn, te Osanobua ye gbe uhi ne iran. (Hib 1:7, 14; Psm 104:4) Uhiẹn, e Jehova vbe gbe uhi ne Setan ne ọkaẹrhia, ọ na kue vbe viẹn uwu nẹẹn. (Job 1:12; 2:6) E Maikẹl ne ọkaolotu avbe odibosa rẹnrẹn wẹẹ, e Jehova ọre Ọbuohiẹn Nọ Sẹre, ọni ẹre ọ si ẹre wẹẹ, vbe ẹghẹ ne irẹn vbe Esu ya gha mwẹ imuaemwẹ, ọ na tama Esu wẹẹ: “Nọyaẹnmwa ọre ikọ ruẹ.” (Jud 9; yae taa Zẹk 3:2.) Osanobua ne Jehova keghi viọ avbe odibosa ye ototọ Jesu Kristi. (Hib 1:6; 1 Pit 3:22; Mat 13:41; 25:31; Fil 2:9-11) Ọna ẹre ọ si ẹre ne Jesu na sẹtin gie odibosa ọkpa bu e Jọn. (Arhie 1:1) Sokpan, vbe ebe 1 Kọrinti 6:3, ukọ e Pọl keghi kha wẹẹ, etiẹn e Kristi ọghe orhiọn gha bu ohiẹn avbe odibo, rhunmwuda te iran khian deba e Kristi guọghọ avbe emọ orhiọn ni sọtẹ dae Jehova.
E Baibol Na Tie
(1 Kọrinti 6:1-14) Adeghẹ ọkpa vbe uwu uwa gu ọtẹn ọvbehe muan ẹmwẹ, vbe ekhue ra gi ẹre mu ẹzọ bu avbe enibuohiẹn ni ma yayi hẹ yi? Ẹi re emwa Osanobua ẹre ọ kere ne ọ bu ẹre? 2 Wa ma rẹn ighẹ emwa Osanobua ẹre ọ ra bu ohiẹn, agbọn na? Ẹn hẹn, a deghẹ wa ẹre ọ ra bu ohiẹn agbọn na, wa i sẹtin bu ena ighẹ iku ẹmwẹ ra? 3 Wa ma rẹn ighẹ ma ẹre ọ khian bu ohiẹn avbe odibosa ra? Inu inu ghi nọ ne emwi agbọn na? 4 Adeghẹ ẹmwẹ vberriọ sunu, te uwa ghi ra muẹn tu iran ne ẹi mwẹ ukpo ne ọ ye vbe esọsi ra ne iran bu ẹre ne uwa? 5 Wa gie ekhue gha mu uwa! Ẹi mwe a ma miẹn ọmwa ọkpa ne ọ waan vbe uwu uwa, ne ọ gha sẹtin bu ohiẹn etẹn eva ni muan ẹmwẹ? 6 Ne uwa gha na te ru vberriọ, ọtẹn ọkpa ghi mu ọtẹn ọvbehe ye iko, ne iran ni ma yayi gha bu ohiẹn nii. 7 Ne a na miẹn wẹẹ wa zẹdẹ mu egbe ye iko hiehie rhiema ighẹ te emwi hia wa kulo gbe uwa. Wa ma rẹn ighẹ a yagha uwa ẹre ọ maan sẹ? Wa ma rẹn ighẹ a gbe uwa mien uwa emwi ẹre ọ maan sẹ? 8 Ẹn o, wa tobọ uwa gha yagha egbe, wa tobọ uwa gha gbe egbe miẹn egbe emwi, uhin ya sẹ egbe etẹn uwa ne arẹnegbe. 9 Sokpan, wa rẹnrẹn ighẹ Arriọba Osanobua i ra sẹ emwa dan obọ. Wa ghẹ rẹrẹ egbe uwa: Avbe ni gbe alama, iran ni ga ẹbọ, iran ni ghẹẹ, ikpia ni tie ikpia ne ihua iran ovbe. 10 Iran ni rhaa, iran ni zuan, iran ni da ayọn gbe egbe, iran ni ta ẹrrẹe ọtakhọ, ra iran ni gbe olighi, ne Arriọba Osanobua gha sẹ ọre obọ, ẹi rrọọ. 11 Erriọ eso vbe uwu uwa te ye, sokpan, a khuẹ uwa hin orukhọ rre nẹ, a ya uwa fi ohan ne Osanobua nẹ, a dọlọ uwa kugbe ba Osanobua vbe ekpa eni Jesu Kristi Nọyaẹnmwa kevbe vbekpae orhiọn Osanobua mwa. 12 Orhiọnkpa sẹtin kha wẹẹ, “I sẹtin ru emwi ne ọ rhirhi khọn mwẹ.” Ẹmwata nọ sokpan ẹi re emwi hia ẹre ọ khẹ kuẹ. Ma sẹtin kha wẹẹ, “I sẹtin ru emwi ne ọ rhirhi khọn mwẹ.” Sokpan mẹ i ra gie ifi emwi rhọkpa mu mwẹ. 13 Ọmwa ọvbehe sẹtin kha wẹẹ, “Ẹko ẹre ọ yan evbare, evbare ẹre ọ yan ẹko.” Ẹmwata nọ, sokpan Osanobua gha rhie ufomwẹ ye eveva. A ma rhie egbe ne ọmwa ne ọ ya gha gbe alama oghẹ, sokpan ne ọ gha ga Nọyaẹnmwa. Nọyaẹnmwa vbe kpehe ne egbe. 14 Osanobua ne ọ huẹn Nọyaẹnmwa kpa vbe orinmwi, ọ gha vbe ya ẹtin ẹnrẹn huẹn ima kpaegbe.