IRUẸMWI 6

Rhan Otọ Emwi Ne Evbagbẹn Nọhuanrẹn Nu Tiere Demu

Jọn 10:33-36

UHUNMWU ẸMWẸ: U gha tie ako evbagbẹn nọhuanrẹn ọkpa, u ghi rhan otọre u ke suẹn gha ta ẹmwẹ ọvbehe. Ọ khẹke ne emwa ni danmwehọ ruẹ rẹn vbene evbagbẹn nọhuanrẹn ne u tiere ya dekaan uhunmwu ẹmwẹ ne u hoo ne u rhie ladian.

VBENE A YA RU ẸRE HẸ:

Niania ẹmwẹ ne kpataki ni rrọọ. U gha tie evbagbẹn nọhuanrẹn nẹ, niania avbe ẹmwẹ ni wa mọbọ dekaan uhunmwu ẹmwẹ ne u hoo ne u rhie ladian. U ghaa hoo ne u ru ọna, u sẹtin tie avbe ẹmwẹ nii yan egbe yan egbe, ra u ghi nọ ọta nọ gha ru iyobọ ne emwa ni danmwehọ ruẹ ya rẹn avbe ẹmwẹ ne kpataki ne u hoo ne u rhie ladian.

Adeghẹ u loo ẹmwẹ ọvbehe ya niania emwi ne u hoo ne u rhie ladian vbe evbagbẹn nọhuanrẹn ne u tiere, te ọ khẹke ne emwa ni danmwehọ ruẹ ye bẹghe ẹre ẹsẹsẹmwẹse vbene avbe ẹmwẹ ni rre uwu e Baibol ya ginna uhunmwu ẹmwẹ ne u hoo ne u rhie ladian.
Niania uhunmwu ẹmwẹ nọ rrọọ. Adeghẹ u na kha wẹẹ ọ mwẹ emwi ne u hoo ne u rhie ladian vbe evbagbẹn nọhuanrẹn ne u khian tie, rhan otọre vbene avbe ẹmwẹ ne kpataki ni rre evbagbẹn nọhuanrẹn ne u tiere ya dekaan emwi ne u hoo ne u rhie ladian.

Zẹvbe ne u ya ziro yan evbagbẹn nọhuanrẹn ne u tiere, u ghi ye wee Baibol ruẹ yotọ. Ọna gha ru iyobọ ne emwa ni danmwehọ ruẹ ya rẹn vbene ẹmwẹ ne u ta, ya ginna uviẹn ọghe evbagbẹn nọhuanrẹn ne u da wa tie.
Rhan otọre vbe odẹ ne khuẹrhẹ. Esa i rrọọ ne u ya gha guan kaan avbe ẹmwẹ ne ẹi mwẹ vbene ọ ya dekaan uhunmwu ẹmwẹ ne u hoo ne u rhie ladian. Muẹn roro emwi ne emwa ni danmwehọ ruẹ ka rẹn vbekpae uhunmwuta ne u guan yan, kevbe vbene ọ hiunsi sẹ hẹ ighẹ uhunmwu ẹmwẹ ne u hoo ne u rhie ladian. Ọna gha ru iyobọ nuẹ ya ru atamuolọyan vbe nọ dekaan olika ẹmwẹ ne u gha rhie ladian, nọ gha ya emwa ni danmwehọ ruẹ rẹn otọ ẹmwẹ ne u guan yan.