IRUẸMWI 4

Emwi Nọ Khẹke Ne U Ru U Ke Tie Evbagbẹn Nọhuanrẹn

Matiu 22:41-45

UHUNMWU ẸMWẸ: U ke tie evbagbẹn nọhuanrẹn, u ka rhie ekhọe ọghe emwa ni danmwehọ ruẹ ghee ako ne u khian tie.

Muẹn roro, evbọzẹe ne u khian na tie ako evbagbẹn nọhuanrẹn nii. U ke tie evbagbẹn nọhuanrẹn, rhie ekhọe ọghe emwa ni danmwehọ ruẹ ghee uhunmwu ẹmwẹ ne u hoo ne u rhie ladian, vbe uviẹn ne u khian tie.

U ghi vbe muẹn roro emwi ne ako nii guan kaan. Deghẹ ẹmwẹ ne ọmwa tae ẹre u tiere ladian vbe Baibol, sunu ye ọmwa nọ gele ta ẹmwẹ nii. Erriọ vbe ye, gia miẹn wẹẹ, ọgbenbe ọghe Baibol ne u sunu yi, ẹre ọ gele gbẹn ebe nii.
Ya e Baibol suigiẹ ye ẹmwẹ ne u ta. Deghẹ emwa ni ya Osanobua yi ẹre u gu guan, gi iran rẹn wẹẹ Ẹmwẹ Osanobua ẹre Baibol khin. Vbe odẹ vbenia, te u rhiẹre ma wẹẹ e Baibol ọre ebe nọ ghi sẹ ehia nọ rhie ẹwaẹn ne ọmwa.
Ta ẹmwẹ nọ gha ye emwa gha mwẹ ẹkorhiẹnrhiẹnmwẹ daa evbagbẹn nọhuanrẹn. Fi inọta ọkpa fua, ne u ya e Baibol rhie ewanniẹn yọ. Sunu ye ọlọghọmwa ọkpa ne Baibol gha sẹtin sọfurre yi. Sunu ye ilele ọkpa na khian miẹn vbe ako Evbagbẹn Nọhuanrẹn ne u khian tie.

Muẹn roro emwi ne emwa ni danmwehọ ruẹ ka rẹn vbekpae uhunmwuta ra evbagbẹn nọhuanrẹn ne u khian guan yan. Deghẹ evbagbẹn nọhuarẹn ne emwa wa rẹn ẹsẹsẹmwẹse ẹre u khian tie, u ghi muẹn so vbe odẹ nọ gha ye emwa ni danmwehọ ruẹ, gha roro ẹre wẹẹ iran gha miẹn emwi ọgbọn ruẹ vbọ.