IRUẸMWI 04

Gha Re Osanobua?

Na Printi Ladian

Ke otọ gha dee, ẹre emwa nagbọn ke ga osa ughughan. Sokpan e Baibol gi ima rẹn wẹẹ, Osa ọkpa rrọọ nọ “hiunsi sẹ osa nikẹre hia.” (2 Krọnikol 2:5, NW) Gha re Osa nii? Vbọ yae hiunsi sẹ osa ọvbehe ne emwa ga? Gbarokotọ vbe iruẹmwi na, ne u mieke na rẹn emwi ne Osa na guan kaẹn na, hoo ne u rẹn vbekpa irẹn.

1. Vbọ re eni Osanobua? Vbọ ya ima rẹn wẹẹ, ọ hoo ne ima rẹn eni ẹnrẹn?

Osanobua ẹre ọ tobọre gie egbe ẹre ma ima vbe Baibol. Ọ khare wẹẹ: “Mẹ ọre Jehova. Ọni ọre eni mwẹ.” (Tie Aizaia 42:5, 8, NW.) Eni Osanobua vbe urhuẹvbo ọghe Hibru ẹre a zedu ẹre khian “e Jehova.” Emwa nibun ni rri egie ebe khare wẹẹ, emwi ne eni na demu ọre “Vbene Irẹn Wẹẹ Ne Emwi Gha Ye, Erriọ Ye.” E Jehova hoo ne ima rẹn eni irẹn. (Ẹksodọs 3:15, NW) Vbọ ya ima kha vberriọ? Rhunmwuda, ọ gberra igba 7,000 ne eni Osanobua ladian vbe Baibol!a Osa ọghe ẹmwata ọkpa ẹre ọ rre “ẹrinmwi kevbe agbọn,” eni ẹnrẹn ọre Jehova.—Diuteronomi 4:39.

2. De emwi ne Baibol tama ima vbekpa e Jehova?

E Baibol gi ima rẹn wẹẹ, vbe uwu osa hia ne emwa nagbọn ga, e Jehova ọkpa ọre Osa ọghe ẹmwata. Emwi wa bun nọ so igiẹ ye ọna. E Jehova ọkpa ọre Osa Ne Udazi; irẹn ọre “Nọ Yo Sẹ, nọ khaevbisẹ yan emwi hia ni rre otagbọn.” (Tie Psalm 83:18, NW.) Irẹn ọre “Oghodua,” nọ rhie ma wẹẹ, ọ mwẹ ẹtin nọ ya ru emwi ke emwi nọ hoo nọ ru. Irẹn “ẹre ọ yi emwi hia” ni rre agbọn kevbe ẹrinmwi. (Arhie Maan 4:8, 11) Ke ẹdẹdẹmwẹdẹ gha dee, ẹre Jehova ke rrọọ; irẹn ọkpa ọre nẹi mwẹ omuhẹn, ẹi khian vbe gha mwẹ ufomwẹ.—Psalm 90:2.

GUALỌ OTỌ RE SAYỌ

Gia ziro yan alughaẹn nọ rre iwaeni ọghe Osanobua kevbe eni ẹnrẹn ne ọmwa ọvbehe i gu ẹre khuẹnniẹn. Ma gha vbe ziro yan odẹ ne Jehova ya gi ima rẹn eni ẹnrẹn, kevbe evbọzẹe nọ na ru vberriọ.

Okpia ọkpa tọn aro mu gha ghee orere iso vbe ẹghẹ asọn. A gbẹn eni e Jehova ye orere iso.

3. Osanobua mwẹ iwaeni nibun, sokpan eni ọkpa ẹre ọ mwẹ

Ne u ya rẹn alughaẹn nọ rre iwaeni ọghe ọmwa kevbe eni ẹnrẹn, kpee VIDIO na, iyeke ọni, uwa ghi ziro yan inọta nọ lelẹe.

E VIDIO: Iwaeni Nibun, Eni Ọkpa (0:41)

De alughaẹn nọ rre iwaeni vbe na ghee “Nọyaẹnmwa” kevbe eni?

E Baibol gi ima rẹn wẹẹ, emwa ga osa kevbe nọyaẹnmwa ughughan. Tie Psalm 136:1-3, iyeke ọni, uwa ghi ziro yan avbe inọta na:

Gha re Osa “nọ kpọlọ sẹ”? Gha re Nọyaẹnmwa “nọ mwẹ ẹtin sẹ”?

4. E Jehova hoo ne u rẹn eni ẹnrẹn, ọ vbe hoo ne u gha loo ẹre

Vbọ ya ima rẹn wẹẹ e Jehova hoo ne ima rẹn eni ẹnrẹn? Kpee VIDIO na, iyeke ọni, uwa ghi ziro yan inọta ni lelẹe.

E VIDIO: Osanobua Mwẹ Eni Ra?—Abọ Ne Kuẹi Vbọ (3:11)

Efoto na mu ladian vbe vidio nọ mwẹ uhunmwuta nọ khare wẹẹ ‘Osanobua Mwẹ Eni Ra?—Abọ Ne Kuẹi Vbọ.’ Okpia ọkpa gha ghee eni Osanobua nọ re Jehova vbe Psalm 83:18, vbe ‘King James Version’ ọghe 1611.

Uwẹ yayi wẹẹ e Jehova hoo ne emwa rẹn eni ẹnrẹn ra? Vbua gu kha vberriọ?

E Jehova hoo ne emwa gha loo eni ẹnrẹn. Tie Rom 10:13, NW, iyeke ọni, uwa ghi ziro yan avbe inọta na:

Vbọ ru ekpataki sẹ hẹ na gha loo eni e Jehova?
Vbọ ye ruẹ hẹ deghẹ ọmwa ma na mianmian eni ruẹ, ọ na vbe gha so eni ruẹ vbe ẹghẹ hia?
Vbe uwẹ a yayi ighẹ ọ ye Jehova hẹ, vbe u ghaa so eni ẹnrẹn?

5. E Jehova hoo ne u gha re ọse irẹn

Okhuo ọkpa na tie ẹre Soten nọ ke Cambodia rre khare wẹẹ, ke ne irẹn ya rẹn eni Osanobua, ọyẹnmwẹ nọ ghi sẹ irẹn i gia gie. Kpee VIDIO na, iyeke ọni, uwa ghi ziro yan inọta nọ lelẹe.

E VIDIO: I Keghi Gualọ Osa Ọghe Ẹmwata Miẹn (8:18)

Efoto: Avbe efoto na mu ladian vbe vidio nọ mwẹ uhunmwuta nọ khare wẹẹ, ‘I Keghi Gualọ Osa Ọghe Ẹmwata Miẹn.’ 1. Soten tota ye ototọ erhan ọkpa vbe uwu ẹgbo, ọ tọn aro mu ghee odukhunmwu, ọ gha na erhunmwu gie Osa ọghe ẹmwata. 2. Herold gha tama e Soten wẹẹ, eni Osanobua ọre Jehova.

Vbọ gha ye Soten hẹ vbe vidio na, vbe a ghi ta eni Osanobua ma rẹn?

U ghaa hoo ne u zẹ ọmwa ọse, emwi ne u khian ka rẹn vbekpa re ọre eni ẹnrẹn. Tie Jems 4:8a, iyeke ọni, uwa ghi ziro yan avbe inọta na:

Zẹvbe nọ rre ako ọghe Baibol na, de emwi ne Jehova hoo ne u ru?
U gha rẹn eni Osanobua, u na vbe gha loo ẹre, vbọ khian ya ru iyobọ nuẹn ya sikẹ ọre sayọ hẹ?

EMWA ESO KEGHI KHA WẸẸ: “Osa ọkpa ẹre ọ rrọọ, ai vbe lele eni na tie ẹre.”

Uwẹ gele yayi wẹẹ, eni Osanobua ọre Jehova ra?
Vbua khian ya sẹtin rhan otọ re ma ọmwa hẹ wẹẹ, Osanobua hoo ne ima gha loo eni ẹnrẹn?

OLIKA ẸMWẸ

E Jehova ọre eni Osa ọghe ẹmwata. Ọ hoo ne ima rẹn eni ẹnrẹn, ọ vbe hoo ne ima gha loo ẹre, ne ima mieke na gha re ọsiọre.

Ogbewerriẹ

Vbọ ya e Jehova lughaẹn ne osa ọvbehe ne emwa ga?
Vbọzẹ nọ na khẹke ne ima gha loo eni Osanobua?
Vbọ ya ruẹ rẹn wẹẹ e Jehova hoo ne u gha re ọsiọre?

Ẹdẹ na ruẹ iruẹmwi na fo:

Emwi Ne U Gha Ru

U ghaa ta ẹmwẹ Osanobua, gha sunu ye eni ẹnrẹn nọ re Jehova.

Emwi Ọvbehe Ne U Gha Ru:

Your other goal

RUẸ SAYỌ

Ghee emwi isẹn nọ sosẹ yọ wẹẹ Osanobua gele rrọọ.

“Osanobua Gele Rrọọ Ra?” (Ọ rre intanẹt)

Ghee evbọzẹe nọ na khẹke ne ima yayi wẹẹ, Osanobua i mwẹ omuhẹn.

“Gha Yi Osanobua?” (The Watchtower, August 1, 2014)

Ghee evbọzẹe nọ na khẹke ne ima gha loo eni Osanobua, agharhemiẹn wẹẹ, a ma wa rẹn vbene a ya gha tie eni nii vbe urhuẹvbo e Hibru nẹdẹ.

“Gha Re Jehova?” (Ọ rre intanẹt)

A lele eni na tie Osanobua ra? Ghee evbọzẹe ne ima gha na sẹtin kha wẹẹ, eni ọkpa ẹre Osanobua mwẹ.

“Inu Eni Osanobua Mwẹ?” (Ọ rre intanẹt)

a U ghaa hoo ne u rẹn sayọ vbekpa emwi ne eni Osanobua demu, kevbe evbọzẹe ne eni nii i na rre Baibol eso na zedu ẹre, ya ghee Appendix A4 vbe New World Translation of the Holy Scriptures.