Aro Nọ Khẹke Ne Ima Ya Gha Ghee Eni E Jehova

1-2. Vbe ima ya rẹn hẹ wẹẹ, aro nọ ghaan ẹre Jesu ya gha ghee eni e Jehova?

NỌ NE Jesu eni e Jehova ẹre ọ ghi ru ekpataki sẹ. Vbe uwu emwa hia ni he sinmwi oseghe ne eni Erhae, e Jesu ẹre ọ wa re asanikaro. Zẹvbe ne ima guan kaẹn rẹn vbe ako iruẹmwi nọ lae, te Jesu wa mu egbe nọ ya wu ba ẹmwẹ eni Erhae. (Mak 14:36; Hib 10:​7-9) Ukpo Arriaisẹn Ọkpa Ne Jesu Khian Ya Kha gha ghi fo nẹ, e Jesu mu egbe nọ khian ya werriegbe mu Arriọba nii ne Erhae, rhunmwuda ọ hoo ne agbọn vbe ẹrinmwi gha rhie uyi nọ khẹke ne Jehova. (1 Kọr 15:​26-28) Odẹ ne Jesu ya rhie ẹre ma wẹẹ, aro nọ ghaan ẹre irẹn ya ghee eni Osanobua vbe ya ima rẹn vbene iran eva sikẹ egbe sẹ hẹ. Ọna wa rhie ẹre ma wẹẹ, e Jesu hoẹmwẹ Erhae.

² Eni Erhae ẹre Jesu vbe ya gha die agbọn na. (Jọn 5:43; 12:13) Ọ keghi gi avbe erhuanegbe ẹre rẹn eni Erhae. (Jọn 17:​6, 26) Ọ gi emwa rẹn emwi ne eni e Jehova demu, eni nii ẹre ọ vbe ya gha ru emwi ọyunnuan. (Jọn 10:25) Uhiẹn, e Jesu keghi rinmwian Erhae nọ gha gbaroghe erhuanegbe irẹn “rhunmwuda eni [ẹnrẹn].” (Jọn 17:11) Ugbẹnvbe a miẹn wẹẹ, e Jesu ghaa ya aro nọ ghaan ghee eni Erhae, inu ghi nọ ne emwa ni lele Jesu, ẹ i re te ọ vbe khẹke ne iran rẹn eni nii, ne iran vbe gha loo ẹre?

3. Vbe ima khian zẹ iro yan vbe ako iruẹmwi na?

³ Zẹvbe Ivbi Otu e Kristi ni lele ukpowẹ ọghe Jesu, ma keghi rhie ẹre ma wẹẹ, aro nọ ghaan ẹre ima ya ghee eni Erhae. (1 Pit 2:21) Vbe ako iruẹmwi na, ma gha bẹghe evbọzẹe ne Jehova na kue ne emwa ni “kporhu iyẹn nọ maan ọghe Arriọba” gha ya eni ẹnrẹn wan egbe. (Mat 24:14) Ma gha vbe guan kaẹn aro nọ khẹke ne edọmwadẹ ima ya gha ghee eni e Jehova.

“EMWA NI KHIAN GHA YA ENI ẸNRẸN WAN EGBE”

4. (a) De emwi ne Jesu tama erhuanegbe ẹre vbene ọ te gha rrie ẹrinmwi? (b) De ọta ne ima khian zẹ ewanniẹn yi?

⁴ Vbene Jesu te gha rrie ẹrinmwi, ọ keghi tama erhuanegbe ẹre wẹẹ: “Orhiọn nọhuanrẹn gha ghi tuorre yan uwa nẹ, wa ghi gha mwẹ ẹtin, wa ghi ya sẹ osẹ mẹ vbe Jerusalẹm, vbe otọ e Judia hia, kevbe Sameria, uhiẹn ya sẹ ehe nọ ghi rree sẹ vbe agbọn na.” (Iwinna 1:8) Ọna rhie ma wẹẹ, ẹ i re otọ Izrẹl ọkpa ẹre a khian na kporhu iyẹn nọ maan. Rhunmwuda ọni, ẹkpotọ gha kie ne emwa vbe uhunmwu otagbọn hia ya do gha re erhuanegbe Kristi. (Mat 28:​19, 20) Sokpan, e Jesu khare wẹẹ: “Wa ghi ya sẹ osẹ mẹ.” Te ọ khẹke ne iran na, ni da khian erhuanegbe Jesu rẹn eni e Jehova ra, ra e Jesu ọkpa ẹre iran khian sẹ osẹ na? Emwi nọ rre ebe Iwinna uhunmwu ẹnrẹn 15 rhie ewanniẹn ye ọta na.

5. De vbene avbe ukọ kevbe ediọn ni rre Jerusalẹm ya rhie ẹre ma wẹẹ, te ọ khẹke ne emwa hia rẹn eni e Jehova? (Vbe ya ghee efoto.)

⁵ Vbe ukpo 49 C.E., avbe ukọ kevbe ediọn ni rre Jerusalẹm keghi do iko ne iran mieke na guan kaẹn emwi ne emwa ni ma rhuẹ nẹi re Ivbi e Ju gha ru ne iran mieke na sẹtin gha re Ivbi Otu e Kristi. Iran ghi zẹ iro fo nẹ, e Jems ne irẹn vbe Jesu gba re ivbi iye keghi kha wẹẹ: “[E Pita] wa tae ta isi ẹre, vbene Osanobua ya suẹn gha mwẹ ẹghẹ ne ivbi agbẹnvbo ọvbehe, nọ mieke na zẹ emwa ni khian gha ya eni ẹnrẹn wan egbe vbe uwu ẹbu iran.” De eni ọmwa ne Jems ghaa guan kaẹn? E Jems na ghi sunu ye emwi ne akhasẹ ighẹ Emọs tae, ọ khare wẹẹ: “Ne emwa ni ghi dekẹe mieke na gha ya ekhọe hia gualọ e Jehova, ke iran kevbe emwa ọghe agbẹnvbo hia, ni ghi ya eni mwẹ wan egbe nẹ. Mẹ ne Jehova ẹre ọ tae.” (Iwinna 15:​14-18) Ẹ i re te emwa ni da khian erhuanegbe na khian wa rẹn eni e Jehova kẹkan, te iran khian vbe gha re emwa ‘ni ghi ya eni ẹnrẹn wan egbe.’ Ọna rhie ma wẹẹ, iran ghi gi emwa ọvbehe rẹn eni Osanobua kevbe wẹẹ, eni na ẹre emwa khian vbe rẹn iran ginna.

6-7. (a) Vbọzẹ ne Jesu na gha die agbọn na? (b) De emwi ọvbehe kpataki nọ wa ya Jesu gha die agbọn na?

⁶ Emwi na ya eni Jesu kha ọre “Jehova ọre Ọmiọmwafan,” gele gele, Jesu ẹre Jehova loo ro ya miẹn emwa hia ni mu ẹtin yan irẹn vbe Jesu fan. Te Jesu rrie agbọn na nọ do wu ne emwa nagbọn. (Mat 20:28) Rhunmwuda nọ na ya arrọọ ọghẹe dẹ emwa nagbọn werriegbe, iran gha sẹtin miẹn imiẹnfan, ẹkpotọ ghi vbe kie ne iran ya gha rrọọ vbe etẹbitẹ.​—Jọn 3:16.

⁷ Sokpan, vbọzẹ ne emwa nagbọn na gele gualọ imiẹnfan? Rhunmwuda emwi nọ sunu vbe ogba ọghe Idẹn ẹre nọ. Zẹvbe ne ima tae vbe ako iruẹmwi nọ gberra, evbibiẹ ima nokaro ighẹ Adam vbe Ivi keghi sọtẹ daa e Jehova, rhunmwuda ọni, ẹkpotọ nọ te kie ne iran ya gha rrọọ vbe etẹbitẹ keghi wii iran. (Gẹn 3:​6, 24) Sokpan, vbọ gberra imiẹnfan ọghe emwa nagbọn, ọ mwẹ emwi ọvbehe ne kpataki nọ khẹke na zẹ uze yi. A keghi mu eni e Jehova rhia. (Gẹn 3:​4, 5) Nọnaghiyerriọ, te ọ khẹke na emwa nagbọn rẹn wẹẹ, eni nọhuanrẹn ẹre eni Osanobua khin kevbe wẹẹ, ẹ i ru emwi nọ ma gba. E Jesu ọre ọmwa nọ gele wa rhie ọna ma, rhunmwuda, te odẹ ne Jesu ya yin gele wa ya emwa rẹn aro ọmwa ne Erhae gele khin, erriọ ẹre ọ vbe ya gha họn ẹmwẹ ne Erhae vbe emwi hia.

8. De emwi nọ khẹke ne erhuanegbe Jesu hia rẹn?

⁸ Te ọ khẹke ne emwa hia ni mu ẹtin yan Jesu, Ivbi e Ju kevbe emwa nẹi re Ivbi e Ju rẹn wẹẹ, e Jehova ọre ọmwa nọ miẹn iran fan. (Jọn 17:3) Vbe deba ọni, vbe na ghee Jesu, eni e Jehova ẹre a khian rẹn iran ginna. Te ọ khẹke ne iran vbe rẹn vbene ọ ru ekpataki sẹ hẹ na kpe eni nii huan. Rhunmwuda, ọna rre usun emwi nọ gha tae deghẹ iran gha miẹn fan. (Iwinna 2:​21, 22) Nọnaghiyerriọ, te ọ khẹke ne erhuanegbe Jesu hia gha ruẹ vbekpa e Jehova kevbe Jesu. Ẹ i khabe na na miẹn wẹẹ, vbe ufomwẹ ọghe erhunmwu ne Jesu na vbe ebe Jọn uhunmwu ẹnrẹn 17, ọ na kha wẹẹ: “I gi iran rẹn eni ruẹ nẹ, erriọ ẹre I khian ye gha ru ẹre khian, ne iran mieke na vbe gha mwẹ egbe ahoẹmwọmwa ne u mwẹ mẹ, mẹ vbe iran ghi vbe gha rrọọ vbe akugbe.”​—Jọn 17:26.

“WA ỌRE OSẸ MWẸ”

9. Vbe ima khian ya rhie ẹre ma wẹẹ, aro nọ ghaan ẹre ima ya ghee eni e Jehova?

⁹ Te ọ khẹke ne emwa ni gele ya ekhọe hia lele Kristi, kpe eni e Jehova huan. (Mat 6:​9, 10) Ọ khẹke ne iran vbe gha ghee eni e Jehova zẹvbe eni nọ sẹ eni hia fẹẹrẹ. Uyinmwẹ iran ẹre iran khian ya rhie ọna ma. Sokpan, vbe ima khian ya sẹtin kpe eni e Jehova huan hẹ ra ne ima rhie ẹre ma wẹẹ, ohoghe ẹre Esu tae vbekpa e Jehova?

10. De emwi ne ebe Aizaia uhunmwu ẹnrẹn 42 ya sẹ 44 guan kaẹn? (Aizaia 43:9; 44:​7-9) (Vbe ya ghee efoto.)

¹⁰ Ebe Aizaia uhunmwu ẹnrẹn 42 ya sẹ 44 gi ima rẹn emwi kpataki ne ima gha ru ne ima ya kpe eni e Jehova huan. Ako na ghi guan kaẹn ọmwa nọ khẹke nọ gha khaemwisẹ, ọ na yevbe te a rre ekọtu ne emwa khian na do sẹ osẹ ne osa ọghe iran. E Jehova keghi tama emwa ne iran do sẹ osẹ nọ gha rhie ẹre ma wẹẹ, osa ọghe iran gele rrọọ. Sokpan, a ma miẹn ọmwa rhọkpa nọ sẹtin!​—Tie Aizaia 43:9; 44:​7-9.

11. Zẹvbe nọ rre ebe Aizaia 43:​10-12, de emwi ne Jehova tama emwa rẹn?

¹¹ Tie Aizaia 43:​10-12. E Jehova keghi tama emwa rẹn wẹẹ: “Wa ọre osẹ mwẹ, mẹ ọre Osanobua uwa.” E Jehova na vbe nọ iran wẹẹ: “Osa ọvbehe vbe rrọọ ra? Osa ọvbehe nọ mwẹ ẹtin vbe rrọọ ra?” (Aiz 44:8) Uyi nọkhua wa nọ ne ima ne ẹkpotọ na kie ne ima ya rhie ewanniẹn ye ọta na. Ẹmwẹ ne ima ta kevbe uyinmwẹ ima ẹre ima khian ya rhie ẹre ma wẹẹ, e Jehova ẹre ọ gele re Osa ọghe ẹmwata. Eni ẹnrẹn ẹre ọ sẹ eni hia fẹẹrẹ. Ọ gha khọnrẹn ne Esu gha ya agbọn lọghọ ima, odẹ ne ima ya loo arrọọ ọghe ima keghi rhie ẹre ma deghẹ ima gele hoẹmwẹ e Jehova kevbe deghẹ ima mwẹ ẹkoata daa ẹre. Ọna rhie ma wẹẹ, ẹkpotọ kie ne ima ya kpe eni e Jehova huan.

12. De vbene ẹmwẹ akhasẹ nọ rre ebe Aizaia 40:​3, 5 ya sẹ hẹ?

¹² Te ima ya egbe taa e Jesu vbe ima ghaa sinmwi oseghe ne eni e Jehova ra vbe ima ghaa gi emwa ọvbehe rẹn ẹmwata vbekpa ẹre. Aizaia vbe tae ye otọ wẹẹ, ọmwa gha “gbẹn odẹ ye otọ khẹ e Jehova.” (Aiz 40:3) Vbe ọna ya sẹ hẹ? E Jọn ne Ọ Dinmwi Ọmwa Ye Amẹ keghi gbẹn odẹ khẹ e Jesu nọ ya eni e Jehova gha die agbọn na, eni nii, ẹre ọ vbe ya gha guan. (Mat 3:3; Mak 1:​2-4; Luk 3:​3-6) Aizaia vbe kha wẹẹ: “A gha rhie uyi e Jehova ma.” (Aiz 40:5) De vbene ọna ya sunu hẹ? Vbe Jesu rrie agbọn na, te odẹ nọ ya gha yin wa gele rhie ẹre ma, aro ọmwa ne Jehova khin, sẹrriọ wẹẹ, ọ na yevbe na miẹn wẹẹ, e Jehova tobọre ẹre ọ rrie uhunmwu otagbọn na.​—Jọn 12:45.

13. Vbe ima khian ya ya egbe taa e Jesu hẹ?

¹³ Vbe na ghee Jesu, te ima vbe sẹ osẹ ne Jehova. Ma ya eni e Jehova wan egbe, erriọ ẹre ima vbe ya tama emwa hia ne ima miẹn vbekpa iwinna ọyunnuan ọghẹe. Sokpan, ne ima mieke na sẹtin ru ọnọna, te ọ khẹke ne ima vbe gi emwa rẹn vbekpa emwi hia ne Jesu he ru, nọ mieke na sẹtin kpe eni e Jehova huan. (Iwinna 1:8) Vbọ gha dẹ ọghe emwa ni sẹ osẹ ne Jehova, e Jesu ọre asanikaro, ukpowẹ ọghẹe ẹre ima lele. (Arhie 1:5) Sokpan, de odẹ ọvbehe ne dọmwadẹ ima gha ya sẹtin rhie ẹre ma wẹẹ, ima ya aro nọ ghaan ghee eni e Jehova?

ARO NE IMA YA GHEE ENI E JEHOVA

14. Zẹvbe nọ rre ebe Psalm 105:​3, de aro ne ima ya ghee eni e Jehova?

¹⁴ Te ima ya eni e Jehova hio. (Tie Psalm 105:3.) Ọ wa ya ẹko rhiẹnrhiẹn e Jehova vbe ima ghaa ya eni ẹnrẹn rhuọ. (Jer 9:​23, 24; 1 Kọr 1:31; 2 Kọr 10:17) Evba yae kha vba gha we a “ya e Jehova rhuọ,” ọre ne ima gha hio rhunmwuda ne Jehova na re Osa ọghe ima. Aro nọ ghaan ẹre ima wa ya ghee ẹkpotọ nọ kie ne ima ya tama emwa ọvbehe vbekpa eni nọhuanrẹn ọghe Jehova kevbe ne ima gi iran rẹn wẹẹ, te emwi hia nọ ru wa gba. Ọ ma khẹke ne ekhue gha mu ima ne ima ya tama emwa ne ima gba winna, emwa ne ima gba rre eklasi, emwa ni rre ẹdogbo ọghe ima kevbe emwa ọvbehe wẹẹ, Osẹe Jehova ẹre ima khin! Esu ma hoo ne ima gi emwa ọvbehe rẹn eni e Jehova. (Jer 11:21; Arhie 12:17) Uhiẹn, Esu kevbe avbe akhasẹ ohoghe kue hoo ne emwa wa mianmian eni e Jehova. (Jer 23:​26, 27) Sokpan, rhunmwuda ne ima na ya aro nọ ghaan ghee eni e Jehova, te eni ẹnrẹn ya ima sọyẹnmwẹ “ne ebi ro.”​—Psm 5:11; 89:16.

15. Vba yae kha vba gha we na datie eni e Jehova?

¹⁵ Te ima khian ye gha datie eni e Jehova. (Joẹl 2:32; Rom 10:​13, 14) Na gha datie eni e Jehova gberra na wa rẹn eni nii kẹkan kevbe na vbe gha loo ẹre. Sokpan, emwi na yae kha ọre ne ima do rẹn aro ọmwa ne Jehova khin, ne ima mu ẹtin yan rẹn kevbe ne ima vbe gha mwẹ ilẹkẹtin wẹẹ, ọ gha gbaroghe ima. (Psm 20:7; 99:6; 116:4; 145:18) Ma vbe gi emwa ọvbehe rẹn eni ẹnrẹn kevbe aro ọmwa nọ khin, ma ghi vbe ru iyobọ ne iran ya fi werriẹ, kevbe ne iran sẹtin do gha ru emwi nọ gha ya e Jehova miẹn iran yi.​—Aiz 12:4; Iwinna 2:​21, 38.

16. Vbe ima khian ya rhie ẹre ma wẹẹ, ọmwa ohoghe ẹre Esu khin?

¹⁶ Ma mu egbe ne ima ya rri oya rhunmwuda eni e Jehova. (Jems 5:​10, 11) Ma gha rhikhan mu e Jehova, uhiẹn vbe ima ghaa werriẹ aro daa edanmwẹ te ima rhie ẹre ma wẹẹ, ọmwa ohoghe ẹre Esu khin. Vbe ẹghẹ ọghe Job, Esu keghi ba eguọmwadia e Jehova ifiẹzọ wẹẹ: “Ọmwa gha sẹtin ya emwi hia nọ mwẹ ya dẹ uhunmwu ẹnrẹn ye agbọn.” (Job 2:4) Emwi ne Esu ya ọna kha ọre wẹẹ, emwi ghaa maan ọkpa ẹre emwa khian na sẹtin gha ga e Jehova, sokpan ọlọghọmwa gha rre iran ghi sẹ e Jehova rae. E Job keghi rhikhan mu e Jehova, ọ na rhie ẹre ma wẹẹ, ọmwa ohoghe ẹre Esu khin. Ẹkpotọ wa vbe kie ne ima vbe ẹdẹnẹrẹ ne ima ya rhie ẹre ma wẹẹ, te ima khian rhikhan mu e Jehova, ọ gha khọnrẹn ne Esu si ọlọghọmwa ye ima egbe. Ma gha sẹtin gha mwẹ ilẹkẹtin wẹẹ, e Jehova gha gbogba ga ima rhunmwuda eni ẹnrẹn.​—Jọn 17:11.

17. Zẹvbe nọ rre 1 Pita 2:​12, de odẹ ọvbehe ne ima gha ya sẹtin rhie uyi ne eni e Jehova?

¹⁷ Ma keghi rhie ọghọ ne eni e Jehova. (Itan 30:9; Jer 7:​8-11) Rhunmwuda ne ima na re ọsosẹ ọghe Jehova, ne ima na vbe ya eni ẹnrẹn wan egbe, emwi ne ima ru gha sẹtin rhie urhomwẹ ne eni ẹnrẹn, ọ gha vbe sẹtin sa ọrho yọ. (Tie 1 Pita 2:12.) Nọnaghiyerriọ, ọ khẹke ne ima gha hia vbe odẹ ke odẹ ne ẹmwẹ ne ima ta kevbe emwi ne ima ru gha rhie urhomwẹ gie Jehova. Odẹ vberriọ, te ima rhie uyi ye eni ẹnrẹn agharhemiẹn wẹẹ, emwa ni ma gba ẹre ima khin.

18. De odẹ ọvbehe ne ima ya rhie ẹre ma wẹẹ, aro nọ ghaan ẹre ima ya ghee eni e Jehova? (Vbe ya ghee futnot.)

¹⁸ Eni e Jehova ẹre ọ ru ekpataki sẹ vbe aro ima, ma i lele emwi ne emwa ta lele ima. (Psm 138:2) Vbọzẹ nọ na kakabọ ru ekpataki? Emwa ni lega ima sẹtin gha ya aro dan ghee ima rhunmwuda ne ima na ya aro nọ ghaan ghee eni e Jehova.a Jesu mu egbe nọ ya wu uwu efa zẹvbe izigan, nọ mieke na sẹtin rhie uyi ne eni e Jehova. Jesu “na rhie ekhue hin aro rre,” ọna rhie ma wẹẹ, ọ ma gie aro ne emwa ọvbehe ya gha ghee ẹre gha kpokpo ẹre vbe orhiọn. (Hib 12:​2-4) Nọghayayerriọ, ahoo ọghe Osanobua ẹre ọ rhie aro tua.​—Mat 26:39.

19. De aro ne u ya ghee eni e Jehova, kevbe wẹẹ, vbọzẹ?

¹⁹ Te ima ya eni e Jehova hio, erriọ ẹre ima vbe ghọghọ rhunmwuda na na tie ima Osẹe Jehova. Rhunmwuda ọni, te ima khian ye gha rhie urhomwẹ ne Jehova, ọ gha khọnrẹn ne emwa gha zaan ima. Eni Jehova ẹre ọ ru ekpataki sẹ vbe aro ima, ma i lele emwi ne emwa ta lele ima. Nọnaghiyerriọ, wa gi ima hia vbe odẹ ke odẹ ne ima ye gha rho eni e Jehova, ọ gha khọnrẹn ne Setan gha hia nọ mu idobo ye ima egbe. Ma ghaa ru vberriọ, te ima rhie ẹre ma wẹẹ, eni e Jehova ẹre ima mu ye okaro vbene Jesu vbe ru ẹre.