Vbọ Re Arriọba Osanobua?
Ewanniẹn ne Baibol rhie ye inọta na
Arriọba nọ gele rrọọ ẹre Arriọba Osanobua khin, e Jehova tobọre ẹre ọ mu ẹre gbọọ. Na na miẹn wẹẹ, ẹrinmwi ẹre “Arriọba Osanobua” khain ke gha kha rre, e Baibol vbe tie ẹre “Arriọba ẹrinmwi.” (Mak 1:14, 15; Matiu 4:17, King James Version) Vbene a mwamwa arriọba emwa nagbọn, erriọ ẹre Osanobua wa vbe ya mwamwa ọghẹe, sokpan ne Arriọba Osanobua ya maan sẹ ọghe emwa nagbọn i re avbiẹ.
Emwa Ni Khain Gha Khaevbisẹ. Osanobua zẹ Jesu nọ gha re Ọba ọghe Arriọba ọghẹe, ọba ọvbehe i rrọọ nọ mwẹ egbe ẹtin ne Jehova rhie ne Jesu. (Matiu 28:18) Jesu i loo ẹtin rẹn ghee ihan, emwi nọ he ru ya ima rẹn wẹẹ, ọmwa nọ mwẹ enina kevbe nọ gia mu ẹtin yan ẹre nọ. (Matiu 4:23; Mak 1:40, 41; 6:31-34; Luk 7:11-17) Osanọbua vbe loo e Jesu ya zẹ emwa eso ni khian ya deba ẹre vbe ẹrinmwi, “te iran khian gha khaevbisẹ yan uhunmwu otagbọn zẹvbe ọba.”—Arhie Maan 5:9, 10.
Inu ukpo ne arriọba na khian ya kha. Ẹghẹ hia ẹre arriọba emwa nagbọn ya fi werriẹ, sokpan Arriọba Osanobua i “khian fo vbe otọ” ẹdẹ.—Daniẹl 2:44.
Emwa ne Arriọba na kha yan. Ẹ i re ẹgbẹe ne ọmwa ke rre, ra ehe na na biẹ ọmwa ẹre ọ khian ya ọmwa la Arriọba Osanobua, sokpan ọmwa nọ họn ẹmwẹ ne Osanobua, ẹre ọ khian laọ.—Iwinna 10:34, 35.
Uhi. Uhi ọghe Arriọba Osanobua ru iyobọ ne emwa ya lẹẹ ne emwi dan, sokpan ẹ i re ọni ọkpa, ọ vbe ru iyobọ ne iran ya gha mwẹ uyinmwẹ esi. Vbe igiemwi, e Baibol khare wẹẹ: “‘Te u gha ya otọ ẹko ruẹ hia, arrọọ ruẹ hia kevbe ekhọe ruẹ hia hoẹmwẹ e Jehova ne Osanobua ruẹ.’ Ọna ọre uhi nokaro, nọ ghi hin usi sẹ. Nogieva nọ vbe yevbe ọna ọre: ‘Te u gha hoẹmwẹ ogieva ruẹ zẹvbe ne u hoẹmwẹ egbuẹ.’” (Matiu 22:37-39) Ne emwa ne Arriọba Osanobua kha yan na hoẹmwẹ Jehova kevbe emwa ọvbehe, iran keghi hia ne iran gha ya obọ esi mu emwa hia.
Imamwaemwi. Arriọba Osanobua mwẹ uhi nọ khẹke ne emwa hia ni rre ototọ re gha lele, Osanobua vbe tama iran emwi ne iran gha ru, ne iran mieke na sẹtin gha lele uhi na.—Aizaia 48:17, 18.
Emwi Ne Arriọba Osanobua Khian ru. Emwa ni khian gha kha vbe Arriọba Osanobua i khian fẹ, ne emwa ni rre ototọ iran gha sẹ usẹ. Nọghayayerriọ, arriọba na gha mu eyan ọghe Osanobua sẹ, emwa hia ni họn ẹmwẹ ne Osanobua ghi gha rre agbọn na vbe etẹbitẹ.—Aizaia 35:1, 5, 6; Matiu 6:10; Arhie Maan 21:1-4.