IRUẸMWI 47
Uwẹ Mu Egbe Ne U Gha Ya Dinmwiamẹ Ra?
Emwi wa bun ne u he ruẹ vbekpa e Jehova, ke ne u ya suẹn gha ruẹ e Baibol. Ọ gha kẹ, u ru afiwerriẹ eso nẹ, rhunmwuda emwi ne u he ruẹ. A sẹtin ye miẹn wẹẹ, ọ mwẹ emwi nọ da ruẹ obọ yi, ne u ma na he ye ya egbe fiohan ne Jehova kevbe ne u dinmwiamẹ. Vbe iruẹmwi na, ma gha guan kaẹn emwi eso ni gha sẹtin mu idobo yọ, ne ọmwa ghẹ dinmwiamẹ, kevbe emwi ne u gha ru, ne u sẹtin dinmwiamẹ.
1. De vbene ọ khẹke ne u mwẹ irẹnmwi sẹ hẹ u ke dinmwiamẹ?
U ke dinmwiamẹ, ọ khẹke ne u gha mwẹ irẹnmwi nọ gbae ọghe “ẹmwata” nọ rre Baibol. (1 Timoti 2:4) Ọna ma rhie ma wẹẹ, te u khian ka wa rẹn emwi hia ni rre Baibol, u ke sẹtin dinmwiamẹ. Uhiẹn, te Ivbiotu e Kristi ni dinmwiamẹ vbe ẹghẹ nọ kpẹẹ re, ye ruẹ emwi. (Kọlose 1:9, 10) Sokpan ọ khẹke ne u gha mwẹ irẹnmwi nọ sẹ omwa ọghe imamwaemwi ni rre Baibol. Ediọn vbe iko gha ru iyobọ nuẹn ya rẹn deghẹ u mwẹ irẹnmwi nọ sẹ omwa.
2. De emwi eso nọ khẹke ne u ru, u ke dinmwiamẹ?
U ke dinmwiamẹ, te ọ khẹke ne u “roro iro fi uyinmwẹ werriẹ, . . . [u ghi vbe] kie werriegbe.” (Tie Iwinna 3:19, NW.) Ọna rhie ma wẹẹ, u ghi gbe I ma rẹn ye emwi dan ne u ka gha ru, u ghi vbe rinmwian e Jehova nọ yabọ ruẹ. Ọ vbe khẹke ne u he uyinmwẹ dan yotọ, ne u suẹn gha ru emwi ni yẹẹ Osanobua. Deba ọni, u ghi suẹn gha mwẹ obọ vbe emwamwa ọghe iko, vbe na ghee iko na yo, u ghi vbe suẹn gha deba etẹn ni rre iko yo ikporhu.
3. Vbọzẹ nọ ma na khẹke ne u gi ohan si ruẹ ghee iyeke?
Emwa eso keghi mu ohan wẹẹ, iran i khian sẹtin mu eyan ne iran yan ma e Jehova sẹ. Ẹmwata nọ wẹẹ u gha zẹdia ru abakuru, zẹvbe nọ vbe gha ye ne eguọmwadia Osanobua nẹdẹ ne Baibol guan kaẹn. Sokpan e Jehova ma ya aro yọ wẹẹ, te ọ khẹke ne eguọmwadia re gha re emwa ni gbae. (Tie Psalm 103:13, 14.) Ọ keghi sẹ ọre ọyẹnmwẹ vbe u ghaa hia vbene ẹtin ruẹ sẹ! Ọ gha ru iyobọ nuẹn. Vbene ẹmwata, e Jehova rhie ilẹkẹtin ne ima wẹẹ, “emwi ọkpa i rrọọ nọ gha sẹtin wannọ ima hin ahoẹmwọmwa rẹn rre.”—Tie Rom 8:38, 39.
GUALỌ OTỌ RE SAYỌ
Gia ziro yan vbene irẹnmwi nọ sẹ omwa ọghe Jehova kevbe iyobọ nọ ke obọ re rre, gha ya sẹtin ru iyobọ nuẹn ya khọnmiotọ yan emwi ke emwi nọ gha sẹtin mu idobo yọ, ne u ghẹ dinmwiamẹ.
4. Gha mwẹ irẹnmwi nọ sẹ omwa ọghe Jehova
Vbọ khẹke ne u rẹn e Jehova sẹ hẹ, u ke dinmwiamẹ? Ọ khẹke ne u rẹn ọnrẹn sẹrriọ wẹẹ, u ghi do hoẹmwẹ ọnrẹn, u ghi vbe gha hoo ne u gha ru emwi ni yẹẹ ọre. Kpee VIDIO na, ne u ya rẹn vbene emwa ni ruẹ e Baibol vbe ehe ughughan vbe otagbọn na, he ya ru vberriọ hẹ. Iyeke ọni, uwa ghi ziro yan inọta nọ lelẹe.
Vbe vidio na, vbọ ru iyobọ ne emwa eso ya sẹtin mu egbe khẹ idinmwiamẹ?
Tie Rom 12:2, iyeke ọni, uwa ghi ziro yan avbe inọta na:
U zẹdia gbe awawẹ deghẹ imamwaemwi ẹmwata ẹre ọ gele rre Baibol ra, ra deghẹ ẹmwata ẹre Avbe Osẹe Jehova maa emwa re ra?
Deghẹ u gbe awawẹ, vbọ khẹke ne u ru?
5. Khọnmiotọ yan emwi ke emwi nọ gha sẹtin mu idobo yọ ne u ghẹ dinmwiamẹ
Ma gha ghi ta mu olọ yan rẹn nẹ wẹẹ, ima gha ya egbe fiohan ne Jehova kevbe wẹẹ, ima gha dinmwiamẹ, ẹi mwẹ ima ma werriẹ aro daa isievẹn. Ne u ya miẹn igiemwi ọghe ọmwa nọ werriẹ aro daa isievẹn vbenian, kpee VIDIO na, iyeke ọni, uwa ghi ziro yan inọta ni lelẹe.
Vbe vidio na, de isievẹn ne Narangerel la gberra nọ mieke na sẹtin ga e Jehova?
De vbene ahoẹmwọmwa nọ mwẹ ne Jehova ya ru iyobọ nẹẹn hẹ, ya la avbe isievẹn nii gberra?
Tie Itan 29:25, NW kevbe 2 Timoti 1:7, iyeke ọni, uwa ghi ziro yan inọta na:
De emwi nọ ya ima mwẹ udinmwẹ, nọ zẹe ighẹ ima sẹtin la isievẹn ughughan gberra?
6. Mu ẹtin yan e Jehova
E Jehova gha ru iyobọ nuẹn ya gha ru emwi ni yẹẹ ọre. Kpee VIDIO na, iyeke ọni, uwa ghi ziro yan inọta ni lelẹe.
Vbe vidio na, vbọzẹ ne ọmwa na gu ruẹ e Baibol, na gha si egbe ghee iyeke nẹ ghẹ dinmwiamẹ?
De emwi nọ ruẹ re, nọ ghi ya amuẹtinyan nọ mwẹ daa e Jehova wegbe sayọ?
Tie Aizaia 41:10, 13, iyeke ọni, uwa ghi ziro yan inọta na:
Vbọzẹ ne u gha na sẹtin gha mwẹ ilẹkẹtin wẹẹ, u gha sẹtin muẹn sẹ ighẹ eyan ne u yan rẹn vbe u gha ya egbe fiohan ne Osanobua?
7. Hia ne u gele gha gbọyẹmwẹ ye ahoẹmwọmwa ne Jehova mwẹ nuẹn
U ghaa ye ẹre rre vbe ẹghẹ hia wẹẹ, e Jehova hoẹmwẹ ruẹ, ekhọe ruẹ ghi vuọn ne ekpọnmwẹ, u ghi vbe gha hoo ne u gae vbe etẹbitẹ. Tie Psalm 40:5, iyeke ọni, uwa ghi ziro yan inọta na:
De nọ yẹẹ ruẹ sẹ vbe uwu avbe afiangbe ne u he miẹn vbe obọ e Jehova?
Te akhasẹ e Jerimaia wa hoẹmwẹ e Jehova, erriọ ẹre ọ vbe ya gha ya aro nọ ghaan ghee ẹmwẹ ọnrẹn, ọ na vbe gha gbọyẹmwẹ ye uyi ne Jehova mu ye ọre egbe, ne ẹkpotọ na kie nẹẹn ya gha ya eni e Jehova wan egbe. Ọ khare wẹẹ: “Ẹmwẹ ruẹ keghi do ya oghọghọ kevbe ọyẹnmwẹ vuọn ekhọe mwẹ, eni ruẹ ẹre I ya wan egbe, eo, Jehova!” (Jerimaia 15:16, NW) Rhie ewanniẹn ye avbe inọta na:
Vbọzẹ nọ na re uyi nọkhua, ne ọmwa gha re Osẹe Jehova?
Uwẹ hoo ne uwẹ dinmwiamẹ zẹvbe Osẹe Jehova ra?
Ọ mwẹ emwi rhọkpa nọ si ruẹ ghee iyeke ra?
Vbua yayi wẹẹ ọ khẹke ne u ru, ne u mieke na sẹtin dinmwiamẹ?
EMWA ESO KEGHI KHA WẸẸ: “I ma yayi wẹẹ I gha sẹtin musọe vbe I gha dinmwiamẹ nẹ.”
Erriọ vbe ye vbe ekhọe uwẹ ra?
OLIKA ẸMWẸ
Vbe ẹtin e Jehova, u gha sẹtin khọnmiotọ yan emwi ke emwi nọ gha mu idobo yọ, ne u ghẹ dinmwiamẹ.
Ogbewerriẹ
De vbene ọ khẹke ne u rẹn e Baibol sẹ hẹ, u ke dinmwiamẹ?
De afiwerriẹ eso nọ khẹke ne u ru, u ke dinmwiamẹ?
Vbọzẹ nọ ma na khẹke ne u gi ohan si ruẹ ghee iyeke?
RUẸ SAYỌ
Ghee emwi nọ khẹke nọ gua ruẹ kpa ya dinmwiamẹ.
“Uwẹ Muegbe Ne U Khian Ya Dinmwiamẹ Ra?” (Owa Ọkhẹ, March 2020)
Ghee vbene u gha ya sẹtin lae gberra hẹ, isievẹn eso ni gha sẹtin mu idobo yọ, ne u ghẹ dinmwiamẹ.
“Vbọ Si Mwẹ Ghee Iyeke Ne I Ma Na He Ye Dinmwiamẹ?” (Owa Ọkhẹ, March 2019)
Ghee vbene okpia ọkpa ya sẹtin lae gberra hẹ, emwi eso ni gha te mu idobo yọ, nẹ ghẹ dinmwiamẹ.
‘Vbọzẹ Ne U Na Si Obọ Ẹgogo Ghee Iyeke, Ne U Ma Na He Ye Dinmwiamẹ?’ (1:10)
Okpia ọkpa na tie ẹre Ataa, ka gha si egbe nẹ ghẹ dinmwiamẹ. Ghee emwi nọ ghi ru iyobọ nẹẹn ya dinmwiamẹ.