Ma Hia Gha Sẹtin Ru Iyobọ Ne Emwa Na Gu Ruẹ E Baibol Ne Iran Mieke Na Sẹtin Dinmwiamẹ

1-2. De ọmwa nọ gha sẹtin ru iyobọ ne ọmwa na gu ruẹ e Baibol, nọ mieke na sẹtin dinmwiamẹ?

OKHUO ọkpa na tie ẹre Amy nọ rre Fiji khare wẹẹ, “Emwi ne I ghaa ruẹ vbe Baibol na wa mu mwẹ ekhọe, I na wa rẹn wẹẹ, ẹmwata ẹre iran maa mwẹ re. Sokpan I suẹn gha gu etẹn mu obọ nẹ, I ke sẹtin ru afiwerriẹ nọ khẹke vbe arrọọ mwẹ, ẹre I na ghi dinmwiamẹ.” Emwi nọ sunu dae Amy maa ima re wẹẹ: Adeghẹ etẹn ni rre uwu iko na gha ru iyobọ ne ọmwa na gu ruẹ e Baibol, ẹre ọ khian na rherhe gha mwẹ alaghodaro, ọ ghi vbe sẹtin dinmwiamẹ.

² Dọmwadẹ ọghẹe vbe uwu ima gha sẹtin ru iyobọ ne emwa ọgbọn, ne iran do deba ima gha ga e Jehova. (Ẹfis 4:16) Arọndẹ ọkpa na tie ẹre Leilani, nọ rre Vanuatu khare wẹẹ: “A yae kpa itan wẹẹ, orhunmwu ọkpa i biẹ ọmọ. Erriọ iwinna ikporhu iyẹn nọ maan vbe ye; etẹn hia vbe iko gha ku obọ gbe, iran gha sẹtin ru iyobọ ne ọmwa, ya do rẹn odẹ ọghe ẹmwata.” Emwa hia vbe uwu ẹgbẹe, avbe ọse kevbe avbe ọmamwaemwi, ẹre ọ ku obọ kugbe ya koko ọmọ waan. Odẹ ọkpa ne iran ya ru ọna, ọre ne iran na rhie igiọdu ne ọmọ nii, kevbe ne iran na maa re, odẹ nọ khẹke na ya yin. Erriọ vbe ye, ibude, igiọdu kevbe igiemwi esi ọghe etẹn ni rre uwu iko, gha sẹtin ru iyobọ ne ọmwa na maa re Baibol nọ ya gha mwẹ alaghodaro, sẹrriọ wẹẹ, ọ ghi do dinmwiame.—Itan 15:22.

3. Vbe ima miẹn ruẹ vbe ẹmwẹ ne Ana, Dorin, kevbe Leilani tae?

³ Vbọzẹe nọ na khẹke ne ọtẹn gha ghọghọ, vbe etẹn ọvbehe ghaa ru iyobọ ne ọmwa nọ gu ruẹ e Baibol? Ghee emwi ne arọndẹ ne kpataki ọkpa nọ rre Moldova, na tie ẹre Ana khare: “Na do sẹtin ru iyobọ ne ọmwa na gu ruẹ e Baibol ya gha mwẹ alaghodaro, i re iwinna orhunmwu ọkpa.” Ọtẹn nokpia ọkpa na tie ẹre Dorin, nọ re arọndẹ ne kpataki, nọ vbe ga vbe Moldova khare wẹẹ: “Ọ mwẹ ẹmwẹ eso ne imẹ ma te ka zẹdẹ mu roro, ne etẹn ọvbehe gha wa tama ọmwa ne I gu ruẹ e Baibol, ọ ghi wa mu ẹre ekhọe.” E Leilani vbe ta emwi ọvbehe nọ si ẹre nọ na khẹke ne ima gha ghọghọ vbe etẹn ọvbehe ghaa ru iyobọ, ọ wẹẹ: “Ahoẹmwọmwa ne etẹn mwẹ daa ọmwa na gu ruẹ e Baibol, kevbe obọ esi ne iran ya muẹn, sẹtin ya ọmwa nii rẹn wẹẹ, emwa ọghe Jehova ẹre ima gele khin.”—Jọn 13:35.

4. De emwi ne ima khian ziro yan vbe ako iruẹmwi na?

⁴ U sẹtin gha roro ẹre wẹẹ, ‘Vbia khian ya sẹtin ru iyobọ ne ọmwa na gu ruẹ e Baibol, vbe nẹi na imẹ ẹre ọ gu ẹre ruẹ emwi?’ Gia ziro yan emwi ne ima gha sẹtin ru, vbe ọtẹn gha wẹẹ ne ima deba irẹn ya gu ọmwa ruẹ e Baibol, kevbe emwi ne ima gha ru vbe ọmwa nii gha suẹn gha yo iko nẹ. Ma gha vbe guan kaẹn vbene ediọn khian ya ru iyobọ ne emwa na gu ruẹ e Baibol, ne iran mieke na gha mwẹ alaghodaro sẹrriọ wẹẹ, iran ghi do dinmwiamẹ.

U GHA DEBA ỌTẸN YA GU ỌMWA RUẸ EMWI

5. Vbọ khẹke ne u kọ ye orhiọn, vbe ọtẹn gha wẹẹ ne u deba irẹn ya gu ọmwa ruẹ e Baibol?

⁵ Ọtẹn nọ ya e Baibol maa ọmwa emwi, ẹre ọ bi yọ re egbe, nọ ru iyobọ ne ọmwa nọ maa re emwi ya rẹn otọ emwi ne Baibol khare. Ọtẹn gha wẹẹ ne u deba irẹn ya gu ọmwa ruẹ emwi, gha mwẹ ọnrẹn vbe ekhọe wẹẹ, te u khian ru iyobọ ne ọtẹn nii. (Asan 4:9, 10) De vbene u khian ya sẹtin ru iyobọ ne ọtẹn nii hẹ, ne iruẹmwi e Baibol nii mieke na biẹ ọmọ esi?

6. Ọtẹn gha wẹẹ ne u deba irẹn ya gu ọmwa ruẹ emwi, de vbene u khian ya lele adia nọ rre ebe Itan 20:18?

⁶ Mu egbe iruẹmwi nii yotọ. U ghi wẹẹ ne ọtẹn nii tama ruẹ vbekpae ọmwa nọ khian ya gu ruẹ emwi. (Tie Itan 20:18.) U sẹtin nọ rẹn wẹẹ: “De emwi eso ne u rẹnrẹn vbekpa ẹre? De ako ne uwa khian ziro yan? De uhunmwu ẹmwẹ ne u gha hoo ne u rhie ladian vbe ako nii? De emwi eso ne u gha hoo ne I ru, ra ne u gha hoo ne I ta, vbe I gha sẹ evba? Emwi eso rrọọ ne I gha ru, ra ne I gha ta, nọ gha sọnnọ ẹnrẹn ra? De emwi nọ gha ru iyobọ nẹẹn ya gha mwẹ alaghodaro?” Vbene ẹmwata, ẹi re emwi hia ẹre ọtẹn nii khian tama ruẹ vbekpae ọmwa nọ gu ruẹ e Baibol, sokpan emwi nọ rhirhi tama ruẹ vbekpa re, gha ya ruẹ rẹn vbene u khian ya ru iyobọ ne ọmwa nii hẹ. Egbe avbe inọta na ẹre ọtẹn nokhuo ọkpa na tie ẹre Joy, nọ re arọndẹ na gie yo isi, gu emwa ne iran gba yo ikporhu ziro ẹre, a te miẹn wẹẹ, ọ ya gu ọmwa ruẹ e Baibol. Ọ khare wẹẹ: “I gha gu iran ziro vbenian, ọ keghi ru iyobọ ne iran ya rẹn, vbene iran khian ya ru iyobọ ne ọmwa ne I gu ruẹ e Baibol.”

7. Vbọzẹe nọ na khẹke ne u mu egbe yotọ, vbe u gha khian deba ọtẹn ya gu ọmwa ruẹ e Baibol?

⁷ Ọtẹn gha wẹẹ ne u deba irẹn ya gu ọmwa ruẹ emwi, te ọ khẹke ne u mu egbe iruẹmwi nii yotọ. (Ẹzra 7:10) E Dorin na ka guan kaẹn sin khare wẹẹ: “I keghi gbọyẹmwẹ yọ, deghẹ ọmwa ne ima gba winna, na mu egbe iruẹmwi nii yotọ. Ẹghẹ nii, ọ ghi vbe miẹn ẹmwẹ ta, nọ gha ru iyobọ ne ọmwa ne I maa re emwi.” Deba ọni, ọna ghi ya ọmwa na gu ruẹ e Baibol rẹn wẹẹ, uwa eva gele mu egbe iruẹmwi nii yotọ; odẹ vbenian, te uwa rhie igiemwi esi yotọ nẹẹn. Adeghẹ u ma vbe sẹtin mu egbe iruẹmwi nii yotọ ẹsẹsẹmwẹse, hia ne u rhie aro lae, ne u mieke na rẹn avbe olika ẹmwẹ ni rrọọ.

8. Vbọ khẹke ne u ru, ne u mieke na sẹtin na erhunmwu nọ gha mu ọmwa na gu ruẹ e Baibol ekhọe?

⁸ Erhunmwu ne a na, vbe a ghaa gu ọmwa ruẹ e Baibol, wa ru ekpataki. Rhunmwuda ọni, a gha wẹẹ ne u na erhunmwu, ọ khẹke ne u ka mu emwi ne u khian ta roro, ne u mieke na sẹtin na erhunmwu nọ gha mu ekhọe ọghe ọmwa na gu ruẹ e Baibol. (Psm 141:2) Ọ mwẹ okhuo ọkpa na tie ẹre Hanae vbe Japan. Vbe ọtẹn nọ maa ẹre emwi ghi rre do gu ẹre ruẹ emwi, ọ na wẹẹ ne ọtẹn nokhuo nọ lelẹe rre na erhunmwu; Hanae ma mianmian erhunmwu ne ọtẹn nokhuo nii naẹn vbe ẹdẹrriọ. Ọ khare wẹẹ: “Te ọ wa dewuarorua vbe erhunmwu ọghẹe wẹẹ, ọmwa nọ kakabọ sikẹ e Jehova, ẹre ọtẹn nokhuo nii khin. I na vbe gha hoo ne I ya egbe taa ẹre. Ọ ghi vbe so eni mwẹ vbe erhunmwu nii, ọ na wa yẹẹ mwẹ ruan.”

9. Zẹvbe nọ rre ebe Jems 1:19, de vbene u khian ya ru iyobọ ne ọmwa ne uwa gba winna vbe ikporhu, vbe ọ ghaa maa ọmwa emwi?

⁹ Ru iyobọ ne ọmwa ne uwa gba winna vbe ọ ghaa maa ọmwa emwi. Ọtẹn nokhuo ọkpa na tie ẹre Omamuyovbi nọ re arondẹ ne kpataki vbe Nigeria khare wẹẹ: “Ọtẹn nọ sẹtin ru iyobọ ne ọmwa vbe ikporhu, ọre ọtẹn nọ danmwehọ vbe a ghaa gu ọmwa ruẹ emwi. Agharhemiẹn wẹẹ ọ gha guan yọ, ẹi khian ta ẹmwẹ nọ bun gbe, nẹ ghẹ ya ya iruẹmwi nii khian ọghẹe.” Sokpan de vbene u khian ya rẹn ẹghẹ nọ khẹke ne u ya guan, kevbe ẹmwẹ nọ khẹke ne u ta? (Itan 25:11) Gha gbe ehọ kotọ danmwehọ vbe iruẹmwi nii ghaa khian. (Tie Jems 1:19.) Ẹghẹ nii ẹre u khian ya rẹn ẹghẹ nọ khẹke ne u ya guan. Sokpan u ghi gha kọn ẹmwẹ ta. Vbe igiemwi, ghẹ ta ẹmwẹ nọ bun gbe; ọtẹn nọ dia iruẹmwi nii ghaa guan, ghẹ fian ẹmwẹ ye ọre unu, ghẹ vbe mu ẹmwẹ ọvbehe rre. Gi ẹmwẹ ne u khian ta, ra igiemwi ne u khian ru ye kuẹi, ghẹ vbe nọ ọta nọ bun gbe, ne u mieke na sẹtin rhie olika ẹmwẹ nọ rre iruẹmwi nii ladian. Ugbẹnso, u sẹtin gha roro ẹre wẹẹ, u i mobọ mwẹ ẹmwẹ ne u khian ta. Sokpan deghẹ u ma miẹn ẹmwẹ ta, u sẹtin vbe tian ọmwa ne uwa gu ruẹ emwi, u ghi vbe rhie ẹre ma wẹẹ, u hoẹmwẹ ọnrẹn; ena hia gha ru iyobọ nẹẹn ya gha mwẹ alaghodaro.

10. U gha ta emwi eso ne u he miẹn vbe agbọn ma ọmwa na ya e Baibol maa re emwi, vbọ khian ya ru iyobọ nẹẹn hẹ?

¹⁰ Tama rẹn emwi eso ne u he miẹn vbe agbọn. U sẹtin ta vbene u ya miẹn odẹ ẹmwata hẹ, vbene u ya la ọlọghomwa eso gberra, kevbe odẹ eso ne Jehova he ya ru iyobọ nuẹn, deghẹ u ghee ẹre wẹẹ, ọ gha ru iyobọ ne ọmwa na gu ruẹ e Baibol, sokpan u ghi hia ne u fiaẹn kanmwa. (Psm 78:4, 7) A sẹtin miẹn wẹẹ, ẹmwẹ ne u ta nii, ẹre ọ khian wa ru iyobọ nẹẹn. Ọ sẹtin ya amuẹtinyan ọghẹe wegbe sayọ, ọ sẹtin vbe rhie igiọdu nẹẹn ya gha mwẹ alaghodaro, sẹrriọ wẹẹ, ọ ghi do dinmwiamẹ. Ọ sẹtin vbe ru iyobọ nẹẹn ya rẹn vbene ọ khian ya la ọlọghọmwa nọ werriẹ aro daa gberra. (1 Pita 5:9) Arọndẹ ọkpa na tie ẹre Gabriel nọ rre Brazil, gi ima rẹn emwi nọ ru iyobọ nẹẹn, vbe ẹghẹ nọ na gha ruẹ emwi. Ọ khare wẹẹ: “Vbe etẹn eso ghi tama mwẹ emwi ne iran he miẹn vbe agbọn, I na ghi rẹn wẹẹ, e Jehova gele bẹghe emwi ne ima la gberra, deghẹ iran na sẹtin lae gberra, mẹ gha vbe sẹtin.”

ỌMWA NA GU RUẸ E BAIBOL GHA RRIE IKO

11-12. Vbọzẹe nọ na khẹke ne ima ya oyaya gbobọkhian ne ọmwa na gu ruẹ e Baibol, vbe ọ gha rrie iko?

¹¹ Adeghẹ ọmwa na gu ruẹ e Baibol hoo ne ọ sẹtin dinmwiamẹ, te ọ khẹke ne ọ gha yo iko vbe ẹghẹ hia, ọna gha wa ru iyobọ nẹẹn. (Hib 10:24, 25) Ọmwa nọ gu ẹre ruẹ e Baibol, sẹtin wẹẹ nọ gha die iko. Ọ gha rre, ma hia fẹẹrẹ gha sẹtin rhie igiọdu nẹẹn, nọ ye gha rre. Sokpan de odẹ eso ne ima khian ya ru ọna?

¹² Ya oyaya gbe ọbokhian nẹẹn. (Rom 15:7) Adeghẹ ima na ya oyaya gbe ọbokhian nẹẹn, ẹi mwẹ orhiọn rẹn ma sotọ, ọ ghi gha hoo nọ rre vbe ẹdẹ ọvbehe. Ghẹ vbe ru ẹre gberra egbe, ne ekhue ghẹ do gha muẹn. U sẹtin vbe rhie ẹre bu etẹn ọvbehe vbe uwu iko, ne iran tuọ ẹre. Ghẹ gha roro ẹre weẹ, ọtẹn nọ gu ẹre ruẹ emwi ọkpa ẹre ọ khẹke nọ gbaroghe ẹre, rhunmwuda a sẹtin miẹn wẹẹ, ọtẹn nii ma rherhe rre vbe ẹdẹrriọ, ra ọ mwẹ iwinna eso ne ọ ru vbe uwu iko. Gbe ehọ kotọ vbe ọ ghaa gu ruẹ guan, u ghi vbe gi ẹre rẹn wẹẹ, u mwẹ ẹmwẹ ọnrẹn vbe orhiọn. De vbene ena hia khian ya ru iyobọ nẹẹn hẹ? Ọ mwẹ ọtẹn nokpia ọkpa na tie ẹre Dmitrii, nọ dinmwiamẹ vbe ukpo eso nọ gberra, ọguọmwadia iwinna ghi nọ nia. Ọtẹn na ghi guan kaẹn emwi nọ sunu vbe ẹghẹ okaro ne irẹn la Ọgua Arriọba, ọ na kha wẹẹ: “I ghi sẹ Ọgua Arriọba vbe ẹdẹ ọkpa, ekhue ma gu mwẹ la owa, ọtẹn nokpia ọkpa ghi bẹghe mwẹ, ọ na rhie mwẹ la owa. Etẹn nibun na do gha tuọ mwẹ. Emwi nọ sunu na, na wa kpa mwẹ odin. Ẹko rhiẹnrhiẹn mwẹ sẹrriọ wẹẹ, ọ na wa gha khọn mwẹ, ne I gha yo iko vbe ẹdẹgbegbe. I ma he miẹn eke ne emwa na mwẹ egbe ahoẹmwọmwa vbenian ẹdẹ.”

13. De vbene uyinmwẹ ruẹ khian ya ru iyobọ ne ọmwa na ya e Baibol maa re emwi?

¹³ Gha rhie igiemwi esi yotọ. Uyinmwẹ esi ọghuẹ sẹtin ya ọmwa na gu ruẹ e Baibol rẹn wẹẹ, odẹ ẹmwata na khin. (Mat 5:16) E Vitalii nọ re arọndẹ vbe Moldova khare wẹẹ: “Vbe I ghi miẹn vbene etẹn ni rre uwu iko ya ru emwi hẹ kevbe aro ne iran ya ghee emwi, I na wa rẹn wẹẹ, odẹ ọghe ẹmwata na khin.”

14. De vbene igiemwi esi ruẹ khian ya ru iyobọ ne ọmwa ya gha mwẹ alaghodaro?

¹⁴ Ọmwa na gu ruẹ e Baibol ghaa hoo ne ọ sẹtin dinmwiamẹ, te ọ khẹke nọ gha rhie emwi nọ ruẹ ye uyinmwẹ. Sokpan ọna i mobọ khuẹrhẹ. Ọmwa ne u ya e Baibol maa re emwi gha bẹghe vbene Baibol ya ru iyobọ nuẹn hẹ, ọ ghi gha hoo ne ọ ya egbe taa ruẹ. (1 Kọr 11:1) Gia ghee emwi ne Hanae na ka guan kaẹn sin tae, ọ wẹẹ: “Etẹn ni rre iko gele wa rhie emwi ne iran ruẹ ye uyinmwẹ. I na do rẹn vbene a ya rhie igiọdu ne ọmwa, vbene a ya yabọ, kevbe vbene a ya rhie ahoẹmwọmwa ma. Iran i ta emwa ọvbehe ọtakhọ. I na gha hoo ne I gha yevbe iran.”

15. De vbene ebe Itan 27:17 ya ru iyobọ ne ima ya rẹn, evbọzẹe nọ na khẹke na gha si emwa na gu ruẹ e Baibol kẹ egbe, vbe iran gha suẹn gha rrie iko?

¹⁵ Si ẹre kẹ egbe. Ọmwa na gu ruẹ e Baibol gha suẹn gha yo iko nẹ, u ghi si ẹre kẹ egbe. (Fil 2:4) Hia ne u rẹn ọnrẹn sayọ. U gha bẹghe afiwerriẹ eso ne ọ he ru, tian rẹn yọ, u sẹtin nọ rẹn vbene iruẹmwi ọghẹe khian hẹ, u sẹtin vbe nọ rẹn vbekpae ẹgbẹe ọre kevbe iwinna ọghẹe, sokpan u ghi gha begbe, ne u ghẹ ya nọ ọta nọ ma khẹke ne u nọ. U ghaa gu ẹre ziro vbenian, ọ sẹtin ya uwa eva khian ọse. U gha gu ẹre ru ọse, ọna gha ru iyobọ nẹẹn ya gha mwẹ alaghodaro, sẹrriọ wẹẹ, ọ ghi dinmwiamẹ. (Tie Itan 27:17.) Arọndẹ ọghe ẹghẹ hia ẹre Hanae na ka guan kaẹn sin ghi khin. Vbe ọ ghi guan kaẹn ẹghẹ ne ọ na da suẹn gha yo iko, ọ na kha wẹẹ: “I ghi suẹn gha mwẹ ọse nẹ vbe uwu iko, iko na yo vbe ẹghẹ hia na do gha khọn mwẹ, ọ gha khọn rẹn ne egbe wọọ mwẹ, te I ye yo. Ẹghẹ ke ẹghẹ ne I ya gu avbe ọse mwẹ vbe uwu iko mu obọ, ọyẹnmwẹ ọyẹnmwẹ ẹre ọ sẹ mwẹ, ọna ẹre ọ ghi ru iyobọ mẹ ya gban egbe ne avbe ọse ne I ka mwẹ, nẹi ga e Jehova. Rhunmwuda I hoo ne I sikẹ e Jehova kevbe etẹn ni rre uwu iko sayọ, I keghi dinmwiamẹ.”

16. De emwi ọvbehe ne u gha sẹtin ru, ne ọmwa na gu ruẹ e Baibol mieke na ghee egbe ẹre wẹẹ, ọkpa vbe uwu ima ẹre irẹn khin?

¹⁶ Vbene ọmwa na gu ruẹ e Baibol ya mwẹ alaghodaro, u ghi ru iyobọ nẹẹn nọ ya gha ghee egbe ẹre wẹẹ ọkpa vbe uwu ima ẹre irẹn khin. Odẹ ọkpa ne u gha ya ru ọna ọre, ne u tie ẹre gha die owa ruẹ ne uwa gba sọyẹnmwẹ egbe. (Hib 13:2) Ọtẹn nokpia ọkpa na tie ẹre Denis nọ rre Moldova, ghi guan kaẹn ẹghẹ na ya gha gu ẹre ruẹ e Baibol, ọ keghi kha wẹẹ: “Etẹn ni rre uwu iko gha khian sọyẹnmwẹ egbe, iran ghi vbe tie imẹ vbe ọvbokhan mwẹ, ne ima do deba iran. Iran ghi gha tama ima vbene e Jehova he ya ru iyobọ ne iran hẹ. Ọna wa rhie igiọdu ne ima. Ena hia ẹre ọ ghi ru iyobọ ne ima ya ta mu ọlọ yan rẹn wẹẹ, e Jehova ẹre ima khian ga, ọna vbe do ya ima rẹn wẹẹ, agbọn nọ maan khẹ ima vbe odaro.” Ọmwa na ya e Baibol maa re emwi, gha ghi suẹn gha ya iyẹn wewe nẹ, u sẹtin wẹẹ ne uwẹ vbe ọre gba yo ikporhu. Ọtẹn nokpia ọkpa na tie ẹre Diego vbe Brazil khare wẹẹ: “Ẹi re avbiẹ etẹn ẹre ọ wẹẹ ne I lele iran yo ikporhu, ọna keghi kie ẹkpotọ mẹ ne I ya rẹn iran sayọ. I wa ruẹ emwi nibun vbe obọ iran, I na vbe do sikẹ e Jehova vbe Jesu sayọ.”

DE IYOBỌ NE EDIỌN GHA SẸTIN RU?

17. De vbene ediọn khian ya ru iyobọ ne emwa na gu ruẹ e Baibol?

¹⁷ Gha mwẹ ẹghẹ ne emwa na gu ruẹ e Baibol. Ediọn, wa ghaa rhie ẹre ma wẹẹ, uwa hoẹmwẹ iran, ọ gha ru iyobọ ne iran ya gha mwẹ alaghodaro, iran ghi vbe do dinmwiamẹ. Uwa hia ne uwa gha gu iran guan vbene iko te suẹn, ra vbe a gha zobọ nẹ. Adeghẹ u na ye eni iran rre, katekate vbe iran gha khian zẹ ewanniẹn, ọna gha ya iran rẹn wẹẹ, u mwẹ ẹmwẹ iran vbe orhiọn. U sẹtin vbe zẹ ẹghẹ kọ ne u ya gha deba etẹn, vbe iran gha khian ya gu ọmwa ruẹ emwi. Ọna gha wa ru iyobọ ne ọmwa na maa re emwi, vbe odẹ ne u ma te yaro yi. Arọndẹ ọkpa nọ rre Nigeria na tie ẹre Jackie khare wẹẹ: “Emwa ne I gu ruẹ e Baibol gha rẹn wẹẹ, ọkpa vbe ediọn ẹre ọ lele mwẹ do gu ẹre ruẹ emwi, ọ ghi wa kpa iran odin. Ọkpa vbe uwu iran khare wẹẹ: ‘E pastọ mwẹ i sẹtin ru egbe emwi vbenian. Emwa ni fe ọkpa ẹre ọ ya gha tuẹ, ọni ọre deghẹ iran na rhie igho nẹẹn!’ ” Ọmwa nọ ta ẹmwẹ na yo iko nẹ nia.

18. De vbene ediọn khian ya ru iwinna nọ bi ye iran izabọ, zẹvbe nọ rre ebe Iwinna 20:28?

¹⁸ Gha maa etẹn re vbene a ya ya e Baibol maa ọmwa emwi, u vbe gha rhie igiọdu ne iran. Ediọn, iwinna nọ bi ye uwa egbe nọ, ne uwa gha ru iyobọ ne etẹn ni rre iko, ne iran gha guẹ sayọ, vbe odẹ ne iran ya kporhu kevbe odẹ ne iran ya maa emwa emwi. (Tie Iwinna 20:28.) Adeghẹ ekhue ma gi ọmwa ne uwa gba winna, maa ọmwa ne ọ gu ruẹ e Baibol emwi, rhunmwuda u rre evba, u ghi ru iyobọ nẹẹn. E Jackie na ka guan kaẹn ban khare wẹẹ: “Ediọn mobọ nọ ẹmwẹ emwa ne I gu ruẹ e Baibol vbe obọ mwẹ. I gha tama iran isievẹn eso ne I werriẹ aro daa vbe I ghaa gu emwa ruẹ e Baibol, iran ghi vbe rhie ibude eso mẹ.” Ediọn gha sẹtin rhie igiọdu ne etẹn ni ya e Baibol maa emwa emwi, ne egbe ghẹ wọọ iran. (1 Tẹs 5:11) E Jackie ye vbe kha wẹẹ: “Ẹko wa rhiẹnrhiẹn mwẹ, vbe ediọn gha rhie igiọdu mẹ, kevbe iran na vbe tama mwẹ wẹẹ, iran gbọyẹmwẹ ye iwinna ne I ru. Egbe ẹmwẹ vbenian yevbe amẹ nọ furre, ne ọmwa wọn vbe ẹghẹ ne ovẹn ya kakabọ yunmwu. Iran gha tian mwẹ, orhiọn ghi wa la mwẹ iwu, ọna keghi ya mwẹ sọyẹnmwẹ e Baibol na gu ọmwa ruẹ sayọ.”—Itan 25:25.

19. De emwi nọ gha sẹtin ya ima hia gha sọyẹnmwẹ?

¹⁹ Ọ gha khọnrẹn wẹẹ, ima i mwẹ ọmwa ne ima gu ruẹ e Biabol, ma gha ye sẹtin ru iyobọ ne ọmwa ọvbehe, ne ọ gha mwẹ alaghodaro vbe odẹ ọghe orhiọn. Gha mu egbe iruẹmwi yotọ vbe u gha khian deba ọtẹn ya gu ọmwa ruẹ emwi, ne u mieke na vbe miẹn ẹmwẹ ta yọ, sokpan ghẹ ta ẹmwẹ nọ bun gbe. Emwa na gu ruẹ e Baibol gha rrie iko, hia ne u si iran kẹ egbe, u ghi vbe gha rhie igiemwi esi yotọ ne iran. Ediọn ghaa mwẹ ẹghẹ ne emwa na ya e Baibol maa re emwi, ọ gha rhie igiọdu ne iran. Ọ vbe khẹke ne ediọn gha ru iyobọ ne etẹn ni maa iran emwi, ne iran ya guẹ sayọ, vbe odẹ ne iran ya maa emwa emwi, iran ghi vbe gha tian iran. Ọyẹnmwẹ nọ khian gha sẹ ima i gia gie, deghẹ ima na rẹn wẹẹ, ọ mwẹ odẹ eso ne ima vbe ya ru iyobọ ne ọmwa na gu ruẹ e Baibol, ya do khian ọguọmwadia e Jehova!