Ahoẹmwọmwa Ru Iyobọ Ne Ima Ya Zin Egbe Vbe Emwa Ghaa Khẹko Ima

1. Zẹvbe nọ rre ebe Matiu 24:9, vbọzẹe nọ ma na khẹke nọ kpa ima odin vbe emwa ghaa khẹko ima?

AI MIẸN ọmwa nẹi sẹtin hoẹmwẹ ọmwa kevbe nẹi hoo ne ọmwa hoẹmwẹ irẹn; rhunmwuda erriọ e Jehova ya yi ima. Ọni ẹre ọ si ẹre nọ na da ima sẹ ugboloko, vbe ọmwa ghaa khẹko ima, ugbẹnso ọ ghi kue gha ya ohan mu ima. Vbe igiemwi, ọtẹn nokhuo ọkpa na tie ẹre Georgina nọ rre Europe khare wẹẹ: “Vbe I rre ukpo 14, iye mwẹ keghi suẹn gha khẹko mwẹ rhunmwuda ne I na ga e Jehova. Ẹko mwẹ na wa vuọn ne orriara, I na vbe gha roro ẹre wẹẹ, egbọre ọmwa dan ẹre I khin.”b Ọtẹn nokpia na tie ẹre Danylo khare wẹẹ: “Ọ ghaa mwẹ asẹ ọkpa ne avbe soldier ya gbe mwẹ, iran na gha rhovbiẹ mwẹ, iran na wẹẹ obọ gha vba mwẹ, rhunmwuda ne I na Osẹe Jehova. Emwi ne iran ru na keghi si ohan yọ mwẹ egbe, ekhue egbe mwẹ na vbe gha mu mwẹ.” Emwa gha khẹko ima vbenian, ọ keghi da ima sẹ ugboloko. Sokpan ọ ma kpa ima odin, rhunmwuda Jesu tae yotọ wẹẹ, te emwa khian gha khẹko ima.—Tie Matiu 24:9.

2-3. Vbọsiẹ ne agbọn na khẹko erhuanegbe Jesu?

² Te agbọn na wa khẹko erhuanegbe Jesu. Vbọzẹe? Rhunmwuda ma i re ‘ọghe agbọn na,’ vbene Jesu vbe gha ye. (Jọn 15:17-19) Ẹmwata nọ wẹẹ, ma rhie ọghọ ne avbe arriọba, sokpan rhunmwuda ne ima i na re ọghe agbọn na, ma i mwẹ obọ vbe emwamwa otu azẹ, ma i tuẹ afiala, ma i vbe so ihuan na ya rhie uyi gie avbe arriọba. E Jehova ọkpa ẹre ima rhie ugamwẹ na. Ma rẹnrẹn wẹẹ, e Jehova ọkpa ẹre ọ mwẹ asẹ na ya kha yan emwa nagbọn, rhunmwuda ọni, ma keghi ye ẹre ike. Sokpan Esu vbe ikpaye ọre keghi gbodan ghee asẹ na. (Gẹn 3:1-5, 15) Ma keghi yae wewe wẹẹ, Arriọba Osanobua ọkpa ẹre ọ khian sẹtin sọfurre ye ọlọghọmwa ọghe emwa nagbọn kevbe wẹẹ, Arriọba nii gha fuẹn iran rua, emwa hia ni gbodan daa ẹre. (Dan 2:44; Arhie 19:19-21) Iyẹn nọ maan ẹre ọna khin ne emwa esi, sokpan nọ ne emwa dan, te ọ ya ẹko rriara iran.—Psm 37:10, 11.

³ Emwi ọvbehe nọ ya agbọn na khẹko ima ọre wẹẹ, ilele ọghe Osanobua ẹre ima ya ru emwi. Ma i mwẹ obọ vbe uyinmwẹ dan ne emwa nagbọn na mwẹ obọ. Vbe igiemwi, uyinmwẹ nọ kẹkẹ ne Ivbi e Sodọm kevbe Gomorra ghaa yin nọ ya e Jehova fuẹn iran rua, ẹre emwa nagbọn ghi na fuẹn! (Jud 7) Te iran ghi kue ghee ẹre zẹvbe emwi nọ ma de emwi nọ rhiae. Rhunmwuda ne ima na ya ilele ni rre Baibol ru emwi, emwa nibun keghi ya ima gbogiẹ, iran keghi kha wẹẹ, ọghe ima tua gbe!—1 Pit 4:3, 4.

4. De avbe akpa nọ gha ru iyobọ ne ima ya zin egbe, vbe emwa ghaa khẹko ima?

⁴ Vbọ khian ru iyobọ ne ima ya sẹtin zin egbe, vbe emwa ghaa khẹko ima kevbe iran ghaa ya unu kpamisikan ku ima? Ọ khẹke ne ima gha mwẹ amuẹtinyan nọ wegbe wẹẹ, e Jehova gha ru iyobọ ne ima. Te amuẹtinyan ọghe ima yevbe asa nọ gbogba ga ima, ne “avbe ifẹnmwẹ erhẹn ne ọka ẹrhia nii filo” ghẹ mieke na kuan ima. (Ẹfis 6:16) Sokpan ẹi re amuẹtinyan ọkpa ẹre ọ khian ru iyobọ ne ima, ọ vbe khẹke ne ima gha mwẹ ahoẹmwọmwa. Vbọzẹe? Rhunmwuda “egbe i kaẹn” ọmwa nọ mwẹ ahoẹmwọmwa, ọ vbe zin egbe oya. (1 Kọr 13:4-7, 13) Nia, gia ziro yan vbene ahoẹmwọmwa ne ima mwẹ ne Jehova, etẹn ne ima gba ga, kevbe eghian ima, khian ya ru iyobọ ne ima ya sẹtin zin egbe, vbe emwa ghaa khẹko ima.

AHOẸMWỌMWA NE IMA MWẸ NE JEHOVA RU IYOBỌ NE IMA YA ZIN EGBE VBE EMWA GHAA KHẸKO IMA

5. De vbene ahoẹmwọmwa ne Jesu mwẹ ne Erhae ya ru iyobọ nẹẹn hẹ?

⁵ Vbe asọn nokiekie ne Jesu gbe vbe agbọn, a te miẹn wẹẹ eghian rẹn gbe ẹre rua, Jesu tama erhuanegbe ẹre ni mwẹ ẹkoata wẹẹ: “I hoẹmwẹ Evbavba, ọni ẹre ọ si ẹre ne I na vbe ru emwi ne ọ rhirhi khama mwẹ ne I ru.” (Jọn 14:31) Ahoẹmwọmwa ne Jesu mwẹ ne Jehova, ẹre ọ ru iyobọ nẹẹn ya sẹtin zin egbe edanmwẹ nọ werriẹ aro daa. Ahoẹmwọmwa ne ima mwẹ ne Jehova, gha vbe sẹtin ru iyobọ ne ima vbe odẹ vberriọ.

6. Zẹvbe nọ rre ebe Rom 5:3-5, vbọ ye eguọmwadia e Jehova hẹ vbe ekhọe, vbe agbọn ghaa khẹko iran?

⁶ Ke ẹghẹ gha dee, ahoẹmwọmwa ne eguọmwadia e Jehova mwẹ nẹẹn, keghi ru iyobọ ne iran ya sẹtin zin egbe ukpokpo. Vbe igiemwi, vbe ẹghẹ ne ekọtu ọghe Ivbi e Ju ya tama avbe ukọ ne iran dobọ iwinna ikporhu yi, ahoẹmwọmwa ne iran mwẹ ne Osanobua keghi ya iran kha wẹẹ, “ne Osa khare ọre ima ra ya ru emwi, ighẹ ẹi re ne emwa ne agbọn khare.” (Iwinna 5:29; 1 Jọn 5:3) Ahoẹmwọmwa nọ wegbe vberriọ, ẹre ọ vbe ru iyobọ ne etẹn ima vbe ẹdẹnẹrẹ, ni rre ẹvbo ne avbe arriọba ni zẹ ẹtin na werriẹ aro nọ khọọ daa iran. Agbọn ghaa khẹko ima, orhiọn i gbe ye ima iwu, nọghayayerriọ ma keghi sọyẹnmwẹ.—Iwinna 5:41; Tie Rom 5:3-5.

7. Vbọ khẹke ne ima ru, vbe ẹgbẹe ọghe ima ghaa zẹ ima kpokpo?

⁷ Ẹi zẹdẹ re emwi nọ khuẹrhẹ, deghẹ ukpokpo na gha ke obọ ẹgbẹe ọghe ima rre. Ma gha suẹn gha ruẹ e Baibol, emwa eso vbe ẹgbẹe ọghe ima sẹtin gha roro ẹre wẹẹ, te a mu ima rẹrẹ. Eso ghi kue gha roro ẹre wẹẹ, ima ma rẹn emwi ne ima ru. (Yae taa Mak 3:21.) Eso sẹtin vbe gha werriẹ aro nọ khọọ daa ima. Egbe emwi vbenian gha sunu, ọ ma khẹke nọ kpa ima odin. Jesu khare wẹẹ: “Ẹgbẹe ọmwa, ẹre ọ gha re oghian nọ khọ ẹko ọmwa sẹ.” (Mat 10:36) Sokpan, ọ gha khọnrẹn ne ẹgbẹe ima gha zẹ ima kpokpo, ma i khian gha ghee iran zẹvbe eghian ima. Nọghayayerriọ, ahoẹmwọmwa ne ima mwẹ ne Jehova ghaa wegbe sayọ, ahoẹmwọmwa ne ima mwẹ ne emwa ọvbehe, ghi vbe gha wegbe yọ. (Mat 22:37-39) Sokpan ẹi khian gha mwẹ ẹghẹ ọkpa, ne ima gha ya rhie owẹ gberra uhi kevbe ilele ọghe Jehova, ne ima mieke na ya ẹko rhiẹnrhiẹn ọmwa ọvbehe.

8-9. Vbọ ru iyobọ ne ọtẹn nokhuo ọkpa ya mudia gbain, vbe ọ werriẹ aro daa ukpokpo nọ wegbe?

⁸ E Georgina na ka yunu kaẹn sin, wa gha hia nọ mudia ẹse, agharhemiẹn wẹẹ iyẹe ghaa zẹ ọre kpokpo. E Georgina khare wẹẹ: “Ẹghẹ ọkpa ẹre Avbe Osẹe Jehova ya suẹn gha gu imẹ vbe iye mwẹ ruẹ e Baibol. Sokpan vbọ ghi rre uki ehan vba, vbe I khian ghi suẹn gha yo iko, iye mwẹ na wa fi werriẹ. I na do bẹghe ẹre wẹẹ, emwa okeke ẹre ọ ghaa ruẹn ẹmwẹ ye ọre ẹko, ọ na do gha ya ẹmwẹ ohoghe nii gu mwẹ muan ẹmwẹ. Ọ ghi gha rhovbiẹ mwẹ, ọ ghi gha si mwẹ eto, ọ ghi vbe gha piẹn mwẹ ẹho. Ọ gha wa miẹn ebe Ọghomwa rhọkpa, ọ ghi filo ẹre kua. I ghi rre ukpo 15, I na ghi dinmwiamẹ. Rhunmwuda iye mwẹ hoo ne I dobọ ugamwẹ e Jehova yi, ọ na ya mu mwẹ fi owa ne a na gbaroghe ibiẹka ni loo ikpẹ ukhunmwu ni wegbe, kevbe ni mwẹ obọ vbe uyinmwẹ dan. Ẹi re emwi nọ khuẹrhẹ na do sẹtin zin egbe, vbe ọmwa nọ khẹke nọ hoẹmwẹ ruẹ ghaa zẹ ruẹ kpokpo.”

⁹ Vbọ ru iyobọ ne Georgina? Ọ khare wẹẹ: “Ẹdẹ ne iye mwẹ suẹn gha zẹ mwẹ kpokpo, ẹre I tie Baibol fo. Ọna keghi ya mwẹ gha mwẹ ilẹkẹtin wẹẹ, odẹ ẹmwata ẹre I ye, ọ na vbe ya mwẹ sikẹ e Jehova sayọ. Ẹghẹ hia, ẹre I ya gha na erhunmwu gie Jehova, ọ na vbe gha họn erhunmwu mwẹ. Vbe I ye rre owa nii, ne iye mwẹ mu mwẹ yi, ọtẹn nokhuo ọkpa na wẹẹ ne I gha die owa ẹre, ma ghi tie Baibol kugbe, ma na vbe ziro yan rẹn. Vbe uwu ẹghẹ nii hia, te etẹn wa gha rhie igiọdu mẹ, iran na rhie mwẹ vbe na miẹn wẹẹ, erha ọkpa vbe iye ọkpa ẹre ọ biẹ ima. Ọna na do ya mwẹ rẹn wẹẹ, ẹi mwẹ vbene eghian ima khian wegbe sẹ hẹ, e Jehova sẹ iran.”

10. De ilẹkẹtin ne ima mwẹ?

¹⁰ Ukọ e Pọl khare wẹẹ, “emwi ọkpa i rrọọ . . . ne ọ gha sẹtin wannọ ima hin ahoẹmwọmwa Osanobua ne ọre ọghe ima rre vbekpa Kristi Jesu Nọyaẹnmwa.” (Rom 8:38, 39) Ọ gha khọnrẹn ne ima gha rri oya, ẹi mwẹ ẹghẹ ọkpa ne Jehova khian ya sẹ ima rae, ọ gha rhie ifuẹko ne ima, ọ ghi vbe rhie ẹtin ne ima. Zẹvbe ne ima miẹn ọnrẹn vbe okha ọghe Georgina, e Jehova keghi loo etẹn ne ima gba ga, ya ru iyobọ ne ima.

AHOẸMWỌMWA NA MWẸ NE ETẸN RU IYOBỌ NE IMA YA ZIN EGBE VBE EMWA GHAA KHẸKO IMA

11. De vbene ahoẹmwọmwa ne Jesu guan kaẹn vbe ebe Jọn 15:12, 13 khian ya ru iyobọ ne erhuanegbe ẹre hẹ? Ru igiemwi yọ.

¹¹ Vbe asọn nọ gbe fi ẹdẹ ne Jesu wu, ọ keghi ye erhuangbe ẹre rre wẹẹ, ne iran gha hoẹmwẹ egbe. (Tie Jọn 15:12, 13.) Ọ rẹnrẹn wẹẹ, deghẹ iran na ya ekhọe hia hoẹmwẹ egbe, ọ gha ya iran gha mwẹ akugbe, iran ghi vbe sẹtin zin egbe vbe emwa ghaa zẹ iran kpokpo. Gia ziro yan igiemwi ọghe iko nọ ghaa rre Tẹsalonaika. Ke ẹghẹ na wa ya mu iko nii gbọọ, ẹre avbe eghian kegha zẹ iran kpokpo. Ọrheyerriọ, etẹn ni rre iko nii keghi mudia gbain, iran na ye gha hoẹmwẹ egbe. Igiemwi esi ẹre ọna khin ne ima. (1 Tẹs 1:3, 6, 7) E Pọl na ye rhie igiọdu ne iran wẹẹ, ne iran ye gha rhie ahoẹmwọmwa “nọ sẹ ọni” ma. (1 Tẹs 4:9, 10) E Pọl vbe gi iran rẹn wẹẹ, ahoẹmwọmwa na ẹre ọ khian gu iran kpa ya rhie ifuẹko ne emwa ne iro han rẹn, iran ghi vbe gha ru iyobọ ne emwa ni vburriẹ. (1 Tẹs 5:14) Te iran wa gele lele adia ne Pọl rhie ne iran. Vbe ima ya rẹn hẹ? Vbe elẹta nogieva ne Pọl gbẹn gie iran vbe ukpo ọkpa ghi gberra nẹ, ọ na khama iran wẹẹ: “Ahoẹmwọmwa ne uwa mwẹ ghee egbe, wa vbe mu otọ yọ.” (2 Tẹs 1:3-5) Ahoẹmwọmwa ne iran ghaa mwẹ ne egbe, ẹre ọ ru iyobọ ne iran ya zin egbe ọlọghọmwa kevbe ukpokpo ne iran ghaa werriẹ aro daa.

12. Vbe ẹghẹ ne okuo ya mu sa vbe ẹvbo ọkpa, de vbene etẹn ya rhie ahoẹmwọmwa ma egbe?

¹² Gia ziro yan emwi nọ sunu daa Danylo na ka yunu kaẹn sin kevbe ọvbokhan rẹn. Vbe ẹghẹ ne okuo ya mu sa vbe ẹvbo iran, iran ma rhunmwuda ọni dobọ iko yi, iran na ye rhiegbe ye iwinna ikporhu, iran na vbe gha ghae evbare ne iran mwẹ ne etẹn. Ọ ghi rre ẹdẹ ọkpa, avbe soldier na mu osisi bu e Danylo gha die owa. E Danylo khare wẹẹ: “Iran na wẹẹ ne I siẹn ugamwẹ ne I ye. Ugbẹnvbe a miẹn wẹẹ I ma kue ye iran re, iran na ya ugbemwẹ yan mwẹ, iran na ba gha ru vbe na miẹn wẹẹ, iran khian ya osisi fi mwẹ uhunmwu, sokpan iran na ghi fi ẹre ye ẹhoho. Iran ke kpa, iran na yan wẹẹ, iran gha dọlegbe rre, iran gha mu ọvbokhan mwẹ yagha. Ẹre etẹn na wẹẹ ne ima zẹgiẹ kpa hin ẹvbo nii rre, iran na ghi su ima gha rrie eke ne a na lae train. I i khian sẹtin mianmian ahoẹmwọmwa ne etẹn mwẹ daa mwẹ. Ma ghi sẹ ẹvbo nii, etẹn ni rre evba keghi rri evbare ne ima, iran na gu mwẹ gualọ iwinna, kevbe owa ne ima khian dia! Rhunmwuda ọni, ma na vbe sẹtin ru iyobọ ne etẹn ọvbehe ne okuo khulo hin owa rre.” Egbe okha vbenian, keghi ya ima rẹn wẹẹ, ahoẹmwọmwa ne ima mwẹ ne egbe, ru iyobọ ne ima ya zin egbe vbe emwa ghaa khẹko ima.

AHOẸMWỌMWA NE IMA MWẸ NE EGHIAN IMA RU IYOBỌ NE IMA YA ZIN EGBE VBE IRAN GHAA KHẸKO IMA

13. De vbene orhiọn nọhuanrẹn khian ya ru iyobọ ne ima ya zin egbe vbe emwa ghaa khẹko ima?

¹³ Jesu tama erhuanegbe ẹre wẹẹ, ne iran gha hoẹmwẹ eghian iran. (Mat 5:44, 45) Egbe emwi vbenian khuẹrhẹ na ru ra? Hiehie! Orhiọn nọhuanrẹn ọghe Osanobua gha sẹtin ru iyobọ ne ima ya gha mwẹ ahoẹmwọmwa, izinegbe, itohan, ekhọe ọmẹhẹ, kevbe a dia egbe ọmwa. (Gal 5:22, 23) Ma ghaa mwẹ avbe akpa na, ọ gha ru iyobọ ne ima ya zin egbe vbe emwa ghaa kpokpo ima. Emwa nibun rrọọ ni te gbodan ghee ima, ni ghi do fi ekhọe werriẹ, rhunmwuda uyinmwẹ esi ọghe ọdafẹn iran ra ọvbokhan iran, ovbi iran ra ọmwa ne iran gba rre ẹdogbo ọkpa, nọ re Osẹe Jehova. Nibun vbe iran na, ni te gbodan ghee ima, khian Osẹe Jehova nẹ. Nọnaghiyerriọ, deghẹ ọ na gha lọghọ ruẹ ne u hoẹmwẹ emwa ni khẹko ruẹ, rhunmwuda ne u na ga e Jehova, rinmwian e Jehova nọ rhie orhiọn nọhuanrẹn ọghẹe nuẹn. (Luk 11:13) U ghi vbe gha mwẹ ilẹkẹtin wẹẹ, ere rrọọ deghẹ ima na gha lele ibude ne Osanobua rhirhi rhie ne ima.—Itan 3:5-7.

14-15. De vbene adia nọ rre ebe Rom 12:17-21 ya ru iyobọ ne Yasmeen, ne ọ gha ya obọ esi mu ọdafẹn ọnrẹn agharhemiẹn wẹẹ ọ ghaa zẹ ọre kpokpo?

¹⁴ Gia ziro yan igiemwi ọghe ọtẹn nokhuo ọkpa na tie ẹre Yasmeen, nọ rre Middle East. Ọdafẹn ọnrẹn na gha roro ẹre wẹẹ, te Avbe Osẹe Jehova muẹn rẹrẹ, rhunmwuda ọni, ọ na gha hia ne ọ mu idobo yọ re egbe, nẹ ghẹ ga e Jehova. Ọdafẹn ọnrẹn na suẹn gha rhovbiẹ ọre, ọ na vbe tama emwa eso vbe uwu ẹgbẹe, ọkaolutu ugamwẹ ọkpa kevbe okpia ọkpa nọ zẹ ọbo, ne iran kpe ohan yọ re egbe kevbe ne iran kha wẹẹ, te ọ khian ya obọ re zagha ẹgbẹe ọre. Ọ na kue gha die Ọgua Arriọba do gha vannọ mu etẹn, ọ na gha rhovbiẹ iran! Ẹghẹ hia ẹre Yasmeen ya gha viẹ egbe ẹre rua, rhunmwuda obọ atosi ne ọdafẹn ọnrẹn ya gha muẹn.

¹⁵ E Yasmeen gha rrie iko, etẹn ghi gha fu ẹre ẹko rre. Ediọn ni rre iko ọghẹe keghi rhie igiọdu nẹẹn, nọ lele adia nọ rre ebe Rom 12:17-21. (Tie ẹre.) E Yasmeen khare wẹẹ: “Ọ ma gha khuẹrhẹ hiehie, sokpan I keghi rinmwian e Jehova ne ọ ru iyobọ mẹ, I na vbe gha hia, ne I gha ya emwi ne Baibol khare ru emwi. Ẹghẹ ke ẹghẹ ne ọdafẹn mwẹ ya ya ohu gbe iku ye ukoni, I ghi vbe fẹko rhọọ ẹre. Ọ ghaa rhovbiẹ mwẹ, I fẹko ya urhu ne khuẹrhẹ zẹ ẹmwẹ wanniẹn ọnrẹn. Vbe ẹghẹ ne ọ na vbe gha khuọnmwi, mẹ ẹre ọ vbe gbaroghe ẹre.”

16-17. Vbua miẹn ruẹ vbe emwi nọ sunu dae Yasmeen?

¹⁶ E Jehova keghi fiangbe Yasmeen ye obọ esi nọ ya gha mu ọdafẹn ọnrẹn. Ọ khare wẹẹ: “Vbene ẹghẹ ya khian, ọdafẹn mwẹ na do gba ẹko mwẹ, rhunmwuda ọ rẹnrẹn wẹẹ, I i khian mu iyeke ẹmwẹ ma rẹn. Ma ghaa guan kaẹn emwi nọ dekaẹn e Baibol, te ọ ghi vbe danmwehọ, ọ na vbe khama mwẹ wẹẹ, ne ọfunmwegbe gha rre owa ẹre irẹn gualọ. I gha khian kpa gha rrie iko, te ọ ghi vbe tama mwẹ wẹẹ, “U ghi rherhe rre oo.” Te imẹ vbe ọdafẹn mwẹ ghi wa sikẹ egbe sayọ, erriọ ọfunmwegbe ghi vbe ya rre owa ima. Erhunmwu ne I na ọre ne Jehova ya obọ kaan rẹn ekhọe, nọ do deba mwẹ gha gae.”

¹⁷ Igiemwi ọghe Yasmeen ya ima rẹn wẹẹ, “ẹtin i fo ahoẹmwọmwa, . . . Idaehọ kevbe izinegbe ẹre i fi raa.” (1 Kọr 13:4, 7) Ẹmwata nọ wẹẹ, ikhẹko sẹtin si obalọ ye ọmwa egbe, sokpan ahoẹmwọmwa gha sẹtin khọn miotọ yan ikhẹko. Ahoẹmwọmwa sẹtin fi ekhọe nọ wegbe werriẹ. Ma ghaa rhie ahoẹmwọmwa ma, ọ keghi ya e Jehova sọyẹnmwẹ. Ọ gha khọnrẹn wẹẹ, emwa ni kpokpo ima ye khẹko ima, ma gha ye sẹtin gha ghọghọ. Vbe ima gu kha vberriọ?

GHA GHỌGHỌ VBE EMWA GHAA KHẸKO RUẸ

18. Vbọzẹe nọ na khẹke ne ima gha ghọghọ vbe emwa ghaa kpokpo ima?

¹⁸ Jesu khare wẹẹ: “Ọ maan ne uwa [ra “oghọghọ nọ ne uwa,” NW] vbe emwa ghaa khuiwu uwa.” (Luk 6:22) Ugbẹnvbe a miẹn wẹẹ, ẹi sẹ ima ọyẹnmwẹ vbe emwa ghaa khẹko ima, vbọ khian ghi ya ima gha ghọghọ? Gia ziro yan emwi eha. Okaro, ma gha sẹtin zin egbe vbe emwa ghaa khẹko ima, ma ghi gha mwẹ ilekẹtin wẹẹ, emwi ne ima ru ya ẹko rhiẹnrhiẹn Osanobua. (1 Pit 4:13, 14) Nogieva, amuẹtinyan ọghomwa ghi do wegbe sayọ. (1 Pit 1:7) Nọ ghi wa sẹ ehia, e Jehova gha ya arrọọ ọghe etẹbitẹ san ima ẹse.—Rom 2:6, 7.

19. Vbọzẹe ne avbe ukọ na gha ghọghọ, vbe a ghi gbe iran asan nẹ?

¹⁹ Vbe Jesu da rhiọ kpaegbe gha rrie ẹrinmwi, avbe ukọ ọghẹe kegha sọyẹnmwẹ zẹvbe ne Jesu tae yotọ. Vbe a ghi gbe iran asan nẹ, a na tama iran ne iran ghẹ ghi kporhu, sokpan iran na ye gha ghọghọ. Vbọzẹe? Rhunmwuda, “Osanobua vbe ka iran ye emwa ni sẹe ni gha rri oya efaa ba ẹmwẹ eni Jesu.” (Iwinna 5:40-42) Iran ma gha mu ohan emwi ne eghian iran gha ru iran re, rhunmwuda ahoẹmwọmwa ne iran mwẹ ne Jesu. Odẹ ne iran ya rhie ahoẹmwọmwa na ma, ọre ne iran na gha kporhu vbene egbe ma na wọọ iran. Erriọ etẹn ima nibun vbe ye vbe ẹdẹnẹrẹ. Te iran wa ye mudia ẹse, agharhemiẹn wẹẹ iran werriẹ aro daa edanmwẹ. Iran rẹnrẹn wẹẹ, e Jehova i khian mianmian iwinna esi ọghe iran, kevbe ahoẹmwọmwa ne iran mwẹ nẹẹn.—Hib 6:10.

20. De emwi ne ima khian ziro yan vbe ako iruẹmwi nọ ghi lele ọna?

²⁰ Ugbẹnvbe a miẹn wẹẹ, ma ye rre agbọn Esu na, te agbọn khian ye gha khẹko ima. (Jọn 15:19) Sokpan ọ ma khẹke ne ohan gha mu ima. Vbe ako iruẹmwi nọ ghi lele ọna, ma gha bẹghe vbene Jehova khian ya ya ima khian nọ “wo vbe egbe” kevbe vbene ọ khian ya “miẹn [ima] fan.” (2 Tẹs 3:3) Nọnaghiyerriọ, uwa gi ima ye gha hoẹmwẹ e Jehova, etẹn ne ima gba ga kevbe eghian ima. Ma gha lele adia na, ma ghi gha mwẹ akugbe, amuẹtinyan ọghe ima ghi vbe wegbe sayọ. Ẹghẹ nii, ma ghi sẹtin rhie uyi gie Jehova, ma ghi vbe rhie ẹre ma wẹẹ, ahoẹmwọmwa gha sẹtin khọn miotọ yan ikhẹko.