Vbene U Khian Ya Dọlegbe Khian Ọsie Jehova Hẹ

UKPUKPO ẹre a ya tie emwa nibun na kan fua werriegbe. U miẹn ‘oghọghọ nọ khian gha rre ẹrinmwi,’ vbe ẹghẹ ke ẹghẹ ne ọmwa na kan fua ya werriegbe bu e Jehova gha dee! (Luk 15:7 , 10) Adeghẹ ọmwa na te kan fua ẹre u khin, a na ghi tie ruẹ werriegbe, gha mwẹ ọnrẹn vbe ekhọe wẹẹ, e Jesu, avbe odibosa kevbe Jehova, wa ghọghọ wẹẹ, u werriegbe gha die odẹ ọghe ẹmwata. Zẹvbe ne u ya hia ne u werriegbe khian ọse ọghe Jehova, u sẹtin miẹn edogbandogban eso. Ọ ghaa yerriọ, vbọ khian ru iyobọ nuẹn?

EDOGBANDOGBAN ESO NE U GHA SẸTIN WERRIẸ ARO DAA

Etẹn eso rrọọ na tie werriegbe nẹ, sokpan ekhọe iran ye bu abe gbe iran. Erriọ ẹre ọ ghaa ye ne Ọba ighẹ Devid. Uhiẹn vbe Osanobua yabọ ẹre nẹ, ọ na ye gha kha wẹẹ: “Obọ orukhọ mwẹ vba mwe.” (Psm 40:12 ; 65:3) Emwa eso gha werriegbe suẹn gha ga e Jehova, ekhọe iran sẹtin ye gha bu abe gbe iran; ọ sẹtin wa gha yerriọ vbe ọwara ukpo nibun. Ọ mwẹ ọtẹn nokhuo ọkpa na tie ẹre Isabellea na kan fua, ọ gberra ukpo 20 ne ọ ya gha rre uwu agbọn. Ọ khare wẹẹ: “I ma rherhe yayi wẹẹ, e Jehova yabọ mwẹ nẹ.” Iro gha han ruẹ, ọ sẹtin ya ruẹ khian rree ne Jehova. (Itan 24:10) Ghẹ gi egbe emwi vberriọ sunu daa ruẹ.

Emwa eso sẹtin gha si osi wẹẹ, iran i khian sẹtin ru emwi hia nọ khẹke ne iran ru, nọ gha ya iran werriegbe khian ọsie Jehova. Ọ mwẹ ọtẹn nokpia ọkpa na tie ẹre Antoine na te kan fua; a ghi rhie ẹre werriegbe, ọ na wẹẹ: “I keghi mianmian emwi nibun ne I ruẹ re kevbe emwi ne I ka gha ru, vbe ẹghẹ na ma na he kan mwẹ fua.” Rhunmwuda egbe emwi vbenian, emwa eso sẹtin gha si egbe, ne iran ya rhie egbe ye ugamwẹ e Jehova.

Gia kha wẹẹ, okpẹhoho mu owa ọmwa, ọmwa nọ yan owa nii, gha roro ẹghẹ kevbe ẹrhiọn ne ọ gha loo ya werriegbe bọ owa nii, egbe ghi wa wọọ re. Erriọ ẹre ọ vbe ye, adeghẹ u na ru orukhọ nọ wegbe, nọ ghi ya ruẹ khian rree ne Jehova, ọ sẹtin gha lọghọ ruẹ ne u ru emwi nọ khẹke, nọ gha ya uwẹ vbe ọre werriegbe khian ọse. Sokpan ẹi re ẹtin obọ ruẹ ẹre u khian ya sẹtin ru ọna.

E Jehova gie na tie ruẹ ne u do gu irẹn ru adọlọ. (Aiz 1:18) U ru emwi nọ khẹke ne u ru nẹ, ne u mieke na werriegbe khian ọse Jehova. E Jehova wa vbe gbọyẹmwẹ ye emwi hia ne u he ru, erriọ ẹre ọ vbe hoẹmwẹ ruẹ. Rhunmwuda ne u na werriegbe bu e Jehova gha dee, u keghi ya ekhue mu Esu!—Itan 27:11.

Rhunmwuda ne u na werriegbe bu e Jehova rre, irẹn yan rẹn wẹẹ, irẹn gha vbe si ruẹ kẹ egbe. (Jems 4:8) Emwi nọ maan nọ ne etẹn rẹn wẹẹ, a tie ruẹ werriegbe nẹ, sokpan emwi ọvbehe ne kpataki ye rrọọ nọ khẹke ne u ru. Te ọ khẹke ne u gha ru emwi nọ gha ya amuẹtinyan ne u mwẹ daa e Jehova gha wegbe yọ. De vbene u khian ya ru ọna hẹ?

FIAN OKHUO NỌ MA LỌGHỌ GBE NE EGBUẸ

Fian okhuo nọ ma lọghọ gbe ne egbuẹ. Egbọre u ma he mianmian emwi hia ne u he ruẹ vbekpa e Jehova, kevbe emwi hia ne ọ wẹẹ irẹn gha ru vbe odaro. Sokpan ọ khẹke ne u werriegbe suẹn gha rhie egbe ye iwinna ugamwẹ ughughan, vbe na ghee ikporhu kevbe iko na yo, u ghi vbe gha gu etẹn mu obọ vbe ẹghẹ hia. Gia guan kaan emwi eso ne u gha sẹtin ru.

Gha na erhunmwu vbe ẹghẹ hia. E Jehova rẹn wẹẹ, deghẹ ekhọe ruẹ na gha bu abe gbuẹ, ọ sẹtin gha lọghọ ruẹ, ne u na erhunmwu gie ẹre. (Rom 8:26) Ọrheyerriọ, hia ne u gha “na erhunmwu vbe ẹghẹ hia,” u ghi gi ẹre rẹn wẹẹ, u gele hoo ne u werriegbe gha re ọsiọre. (Rom 12:12) Andrej keghi kha wẹẹ: “Te ekhue egbe mwẹ wa gha mu mwẹ, erriọ ẹre ekhọe mwẹ vbe ya gha kpokpo mwẹ. Sokpan ẹghẹ ke ẹghẹ ne I ya na erhunmwu, ẹrhiọn ghi wa la mwẹ iwu, orhiọn mwẹ ghi vbe sẹ otọ.” Adeghẹ u ma rẹn emwi ne u khian tama e Jehova vbe erhunmwu, u sẹtin ya tie erhunmwu ne Devid naẹn, vbe ọ ghi fi werriẹ nẹ, vbe ebe Psalm 51 kevbe 65.

Gha tie Baibol vbe ẹghẹ hia. Ọna gha ya amuẹtinyan kevbe ahoẹmwọmwa ne u mwẹ ne Jehova wegbe sayọ. (Psm 19:7-11) E Felipe khare wẹẹ: “Rhunmwuda ne I ma na gha tie Baibol vbe ẹghẹ hia, ẹre ọ si ẹre ne I na ru emwi nọ sọnnọ e Jehova. I ma hoo ne egbe emwi vbenian werriegbe sunu daa mwẹ, ọni ẹre ọ si ẹre ne I i na ghi ya e Baibol na tie ku.” U gha vbe sẹtin ya egbe taa e Felipe. Adeghẹ u gualọ uhunmwuta eso ne u gha sẹtin tie, u sẹtin nọ iyobọ vbe obọ ọtẹn nọ kakabọ hoẹmwẹ e Jehova.

Gha ru emwi nọ gha ya ruẹ dọlegbe sikẹ etẹn vbe uwu iko. Emwa ni werriegbe bu e Jehova gha dee, sẹtin gha roro ẹre wẹẹ, etẹn i khian gha ya aro nọ maan ghee iran. E Larissa keghi kha wẹẹ: “Te ekhue egbe mwẹ wa gha mu mwẹ. I na gha roro ẹre wẹẹ, te I wa ya ekhue mu etẹn hia ni rre uwu iko. Erriọ ẹre I wa gha roro ẹre vbe ọwara ukpo nibun.” Gha mwẹ ọnrẹn vbe ekhọe wẹẹ, ediọn kevbe etẹn nikẹre, wa mu egbe ne iran ya ru iyobọ nuẹn, ne u ya werriegbe khian ọse Jehova. (Ya ghee ẹkpẹti nọ khare wẹẹ, “Emwi Nọ Khẹke Ne Ediọn Ru.”) Iran wa ghọghọ wẹẹ, u werriegbe bu e Jehova gha dee, iran vbe hoo ne u vbe musọe!—Itan 17:17.

Vbọ khian ya ruẹ sikẹ eten vbe uwu iko? Gha gu etẹn mu obọ vbe ẹghẹ hia, gha yo iko, u ghi vbe gha mwẹ obọ vbe iwinna ikporhu. De vbene ọna khian ya ru iyobọ nuẹn hẹ? E Felix khare wẹẹ: “Te etẹn hia wa gha kpẹho khẹ ẹghẹ na khian ya tie mwẹ werriegbe. Te iran wa rhie ẹre ma wẹẹ, iran hoẹmwẹ mwẹ. Iran keghi ya ekhọe hia gbe ọbokhian mẹ, iran na vbe ru iyobọ mẹ, ne I ghẹ gha ghee egbe mwẹ orhunmwuyẹn; iran na vbe rhie igiọdu mẹ, ne I gha mwẹ alaghodaro vbe ugamwẹ e Jehova.”—Ya ghee ẹkpẹti nọ khare wẹẹ “Emwi Nọ Khẹke Ne U Ru.”

GHẸ GI ẸTIN FO RUẸ!

Te Esu khian ye gha hia ne ọ gbe amuẹtinyan ruẹ mu otọ, zẹvbe ne u ya hia ne u werriegbe khian ọse Jehova. (Luk 4:13) Nọnaghiyerriọ, khẹ ye egbe, u ghi vbe gha ru emwi nọ gha ya ruẹ sikẹ e Jehova sayọ.

E Jehova ghi guan kaan avbe ohuan ọghẹe, ọ na wẹẹ: “I gha gualọ ni wiri vbọ, I ghi viọ iran ni bibi odẹ vbọ werriegbẹ rre, I gha gbalọ ẹwẹn iran ni kuan egbe vbọ, I gha vbe sinmwi iran ni khuọnmwi.” (Ẹzik 34:16) Ẹi re avbiẹ emwa e Jehova he ru iyobọ na, ya werriegbe khian ọsiọre. Gha mwẹ ọnrẹn vbe ekhọe wẹẹ, ọ gha vbe ru iyobọ nuẹn, ne u ya gha re ọsiọre ne kankankan.

Emwi Nọ Khẹke Ne Ediọn Ru

Ediọn mwẹ iyobọ nọkhua ne iran gha sẹtin ru ne emwa na rhie werriegbe, ne iran mieke na werriegbe khian ọsie Jehova. Gia ghee emwi eso ne ediọn gha sẹtin ru.

Gha rhie igiọdu ne iran. Ukọ e Pọl rẹnrẹn wẹẹ, emwa eso na kan fua, gha werriegbe bu e Jehova gha dee, ekhọe iran sẹtin ye gha fi iran uwẹnrhiẹn, sẹrriọ wẹẹ iro ghi wa han iran. (2 Kọr 2:7) Ekhue egbe iran sẹtin gha mu iran rhunmwuda emwi ne iran ru, ọna sẹtin ya orhiọn gbe ye iran iwu. Ọni ẹre ọ si ẹre ne Pọl na kha wẹẹ: “Wa yabọ ẹre, wa ghi vbe gha bu ẹre ude.” Ọ khẹke ne ediọn gi emwa na rẹn wẹẹ, e Jehova kevbe etẹn ne iran gba ga kakabọ hoẹmwẹ iran. Ediọn ghaa tian iran ye alaghodaro ne iran mwẹ, iran na vbe gha ru iyobọ ne etẹn na, orhiọn i khian gbe ye iran iwu.

Gha gu iran na erhunmwu. Ebe Nọhuanrẹn gi ima rẹn wẹẹ: “Erhunmwu ọmwa ẹmwata wa mwẹ ẹtin ne a ya winna iwinna ẹtin ẹsẹse.” (Jems 5:16) E Larissa na ka guan kaan sin khare wẹẹ: “I keghi gi ediọn rẹn emwi eso nọ ya mwẹ si osi. Iran na ghi gu mwẹ na erhunmwu. Ẹre I na ghi la evba rẹn wẹẹ, ediọn i mu ohu mwẹ. Iran keghi hoo ne iran ru iyobọ mẹ, ne I mieke na werriegbe khian ọsie Jehova.” E Theo khare wẹẹ: “Erhunmwu ne ediọn gu mwẹ na, ya mwẹ rẹn wẹẹ, e Jehova gele hoẹmwẹ mwẹ, ọ bẹghe vbene I hia hẹ, ne I gha ru emwi esi, ẹi re abakuru mwẹ, ẹre ọ ghee.”

Si iran kẹ egbe. Etẹn na kan fua, ni ghi werriegbe bu e Jehova gha dee hoo ne iran gha mwẹ ọse vbe uwu iko. Ọdiọn ọkpa na tie ẹre Justin khare wẹẹ: “Gha loo ẹkpotọ nọ rhirhi kie nuẹn ya deba iran winna vbe ikporhu, u ghi vbe gha mu otuẹ gie iran vbe owa. Ma gha si iran kẹ egbe, ọ gha wa ru iyobọ ne iran.” Ọdiọn ọvbehe na tie ẹre Henry khare wẹẹ, “Etẹn gha bẹghe ẹre wẹẹ, ediọn si etẹn vbenian kẹ egbe, iran ghi vbe gha hoo ne iran ru vberriọ.”

Rhie igiọdu ne iran, ne iran gha tie Baibol. Ọtẹn ne ọ fuẹro, gha sẹtin ru iyobọ ne ọmwa na rhie werriegbe, ne ọ ya gha tie Baibol vbe ẹghẹ hia. Ọdiọn ọkpa na tie ẹre Darko khare wẹẹ: “Ẹghẹ ke ẹghẹ ne I ya tie Baibol, I ghi gi etẹn na rẹn emwi ne I ruẹ re vbọ, I ghi vbe gi iran rẹn vbene Baibol na tie gbe mwẹ otiti hẹ. I gha vbe miẹn uhunmwuta eso vbe ebe ọghe ima, nọ gha rhie igiọdu ne iran, I ghi vbe ru emwamwa ne ima ya tie ẹre kugbe.” Ọdiọn ọvbehe na tie ẹre Clayton khare wẹẹ: “I keghi rhie igiọdu ne iran, ne iran gha tie okha eso ni rre Baibol, ọghe emwa ni vbe werriẹ aro daa egbe emwi ne iran la gberra.”

Gha gbaroghe iran. Emwa na te kan fua na ghi rhie werriegbe, rẹnrẹn wẹẹ, ediọn ẹre ọ bu ohiẹn etẹn ni ru orukhọ. Nia, ọ vbe khẹke ne iran rẹn wẹẹ, ọsuohuan ne ọ gbaroghe iran, ẹre ediọn khin. (Jer 23:4) Gha rhie ehọ ne iran ta yi, u ghi vbe gha tian iran. Gha gu iran guan vbe ẹghẹ hia. Gia ghee emwi ne ọdiọn ọkpa na tie ẹre Marcus ru, vbe ẹghẹ ke ẹghẹ ne iran ya mu otuẹ gie etẹn vbenian. Ọ khare wẹẹ: “Ma gha sẹ owa iran, ma ghi ya e Baibol rhie igiọdu ne iran, ma ghi vbe tian iran ye ẹrhiọn ne iran loo ro, ne iran ya werriegbe khian ọsie Jehova. Ma ghi vbe gi iran rẹn wẹẹ, emwi ne iran ru, wa ya ẹko rhiẹnrhiẹn e Jehova. Vbene ima te kpa, ma ghi gi iran rẹn ẹdẹ ne ima ghi dọlegbe dee.”

a A fi eni emwa eso werriẹ.