Emwi Ọyẹnmwẹ Nibun Ne I ma Ya Aro Yi Kevbe Emwi Ne I Ruẹ Re Vbe Ugamwẹ E Jehova

Evbibiẹ mwẹ keghi si kpa vbe Estonia vbe ẹghẹ na na gha khọn Okuo Ọgbagbọn II, iran na gha rrie Germany, evba ẹre a ghi na biẹ mwẹ. Vba ghi biẹ mwẹ nẹ, iran na gha mu egbe ne iran khian ya si gha rrie Canada. Owa nokaro ne ima ghaa ye vbe ọkpẹn Ottawa, vbe Canada, kegha re owa nekherhe na na koko ọkhọkhọ. Ivbiogue sẹlẹkẹ ẹre ima wa gha khin, sokpan ima ye gha miẹn ekẹn ọkhọkhọ re vbe owiẹ owiẹ.

Ọ ghi rre ẹdẹ ọkpa, Avbe Osẹe Jehova keghi tie ebe Arhie Maan 21:3, 4 ma iye mwẹ. Ako na mu ẹre ekhọe sẹrriọ wẹẹ, ameve na rhọọ kua vbe aro ẹre. Erha mwẹ vbe iye mwẹ na ye gha ruẹ e Baibol, vbene ima te rẹn, erha mwẹ vbe iye mwẹ na dinmwiamẹ.

Evbibiẹ mwẹ ma gua gha zẹ Ebo ẹse, sokpan iran ma zẹdẹ gha ya ẹmwata na rhẹghẹrẹ. Iyobọ ẹdẹ Satọde hia, ẹre erha mwẹ ya rhie imẹ vbe ọtẹn mwẹ nokhuo na tie ẹre Sylvia yo ikporhu, iyeke vbe ọ gha ya asọn ohoho winna wiẹn egbe rua nẹ, vbe kọmpini na na ranran ematọn (nickel) vbe Sudbury, Ontario. Vbe deba ọni, uzọla uzọla ẹre ima ya koko gha ruẹ ebe Owa Ọkhẹ kugbe zẹvbe ẹgbẹe. Erha mwẹ vbe iye mwẹ wa ru iyobọ mẹ ya do hoẹmwẹ e Jehova. Ọna ẹre ọ ghi ru iyobọ mẹ ya do ya egbe mwẹ fiohan ne Jehova vbe ukpo 1956, ukpo igbe ẹre I ghaa ye vbe ẹghẹ nii. Ahoẹmwọmwa nọ wegbe ne iran mwẹ ne Jehova, wa ru iyobọ mẹ ya gha ga e Jehova vbe ẹdagbọn mwẹ.

Vbe I ghi ladian vbe owebe ne ukpogieva, I ma ghi mu ugamwẹ e Jehova karo. I na gha roro ẹre wẹẹ, I gha suẹn iwinna arọndẹ, I i khian sẹtin miẹn igho nọ gha sẹ mwẹ ya mu okhian yo ehe ughughan vbe uhunmwu otagbọn na. I keghi miẹn iwinna ọkpa vbe ughae radio, mẹ ẹre ọ ghaa kpee ihuan vbe evba, te iwinna na wa gha yẹẹ mwẹ. Sokpan I ghaa winna vbe ẹghẹ ota, rhunmwuda ọni, I wa gha gbe ẹdẹ iko re, emwa ni ma hoẹmwẹ Osanobua ẹre I vbe gu gha mu obọ. Vbene ẹghẹ ya khian, I na fi werriẹ, rhunmwuda emwi ne I ka ruẹ vbe Baibol.

I na ghi si kpa gha rrie Oshawa, vbe Ontario. Evba nii ẹre I na miẹn ọtẹn nokpia ọkpa na tie ẹre Ray Norman, ọtiẹn ọnrẹn nokhuo Lesli, kevbe avbe arọndẹ ọvbehe. Te iran hia wa hoẹmwẹ mwẹ. Vbe I ghi bẹghe vbene ọyẹnmwẹ sẹ iran hẹ, I na gha muẹn roro, emwi ne I khian ya ẹdagbọn mwẹ ru. Iran keghi rhie igiọdu mẹ ne I rhie obọ ye iwinna arọndẹ, I na gele ru vberriọ vbe ukpo 1966. Te ọyẹnmwẹ wa gha sẹ mwẹ. Sokpan, I ma rẹn wẹẹ, emwi eso ne I ma ya aro yi, nọ khian fi ẹdagbọn mwẹ werriẹ gha sunu.

E JEHOVA GHA WẸẸ NE U RU EMWI, HIA NE U RU ẸRE

Vbe I ye rre owebe ne ukpogieva, I keghi rhie obọ ye ebe wẹẹ, I hoo ne I ya ga vbe Bẹtẹl nọ rre Toronto, vbe Canada. Vbe I ghi ga zẹvbe arọndẹ, a na gie na tie mwẹ ne I do ga vbe Bẹtẹl vbe ọwara ukpo enẹ. Sokpan, ẹmwẹ e Lesli gele wa gha yẹẹ mwẹ, rhunmwuda ọni, I na gha mu ohan wẹẹ I gha kpa gha rrie Bẹtẹl, I i khian ghi dọlegbe miẹn ọnrẹn. I keghi mu ẹmwẹ na ye erhunmwu, I na gele rhiegba ye erhunmwu na na, vbe okiekie I na do zẹ ọre vbe iro wẹẹ, I gha yo e Bẹtẹl. Ẹre I na gbe ọ khian ẹdẹ hia ne Lesli, ọ wa da mwẹ ẹi re nekherhe.

I winna vbe eke na na họ ukpọn vbe Bẹtẹl, vbene ẹghẹ ya khian I na do gha ru iwinna akọwe. Vbe ẹghẹ na kha na, arọndẹ ne kpataki ẹre Lesli ghaa khin vbe Gatineau, vbe Quebec. Ẹghẹ hia ẹre I ya gha muẹn roro emwi ne Lesli ghi vbe ru vbe eke nọ ye vbe odọ, I na vbe gha nọ egbe mwẹ deghẹ azẹ nọ khẹke ẹre I ru. Erriọ ọkpa vbe usun emwi ne I ma te ya aro yi ya sunu vbe ẹdagbọn mwẹ. I ma sẹtin ghọghọ. A keghi tie Ray, ne ọtiẹn Lesli nokpia gha die Bẹtẹl. Ughugha ọkpa ẹre ima eva vbe gha ye! Erriọ imẹ vbe Lesli ghi ya werriegbe suẹn gha gu egbe guan. Ẹdẹ nọ gba vbe ukpo enẹ ne iran rhie mẹ vbe Bẹtẹl, ẹre ima ru orọnmwẹ, ọni ọre vbe February 27, 1971.

Abotu keghi wẹẹ ne imẹ vbe Lesli ya ga vbe iko na na zẹ urhuẹvbo e French vbe Quebec. Ukpo eso ghi gberra nẹ, otu na wẹẹ ne I suẹn gha ga zẹvbe ọgbaroghe ọghe otako, ukpo 28 ẹre I ghaa ye vbe ẹghẹ na kha na. I kegha roro ẹre wẹẹ I kherhe gbe kevbe wẹẹ, I ma gbegba nọ gha sẹtin ru iwinna na, sokpan ẹmwẹ nọ rre ebe Jerimaia 1:7, 8 keghi rhie igiọdu mẹ. Vbọrhirhighayehẹ, ọ gberra uhukpa ne Lesli miẹn odekun ọghe imọto, rhunmwuda ọni, ọ ma ghi sẹtin gha vbiẹ ẹse. Nọnaghiyerriọ, vbe ima khian ya sẹtin miẹn uhunmwu hẹ vbe iwinna ọgbaroghe ọghe otako? Ọrheyerriọ, e Lesli keghi kha wẹẹ, “Adeghẹ e Jehova tie ima ne ima do ru emwi, ẹi re te ọ khẹke ne ima hia ne ima ru ẹre?” Erriọ ima ghi ya suẹn iwinna na, ukpo 17 ẹre ima wa ya sọyẹnmwẹ iwinna ọghe ọgbaroghe ọghe otako.

Vbe I ru iwinna ọgbaroghe ọghe otako, I wa gha ru iwinna nibun, rhunmwuda ọni I ma mobọ gha mwẹ ẹghẹ ne ọvbokhan mwẹ vberriọ. Ọ mwẹ emwi kpataki ne I wa ruẹ vbe asẹ na. Vbe owiẹwiẹ ọkpa vbe ẹdẹ e Mọnde, ọmwa keghi sobọ vbe ẹkhu. I ghi ladian, I ma bẹghe ọmwa rhọkpa, vbọ gberra okhuae ọkpa nọ ghaa rre onurho vba, ukpọn na waa ye etebul, ọmerhan, cheese, ebrẹd, ayọn, ekalaka kevbe ovbi ebe na gbẹnnẹ emwi yi, ẹre ọ ghaa rre uwu ẹre, emwi na gbẹn ye ebe nii ọre, “Rhie ọvbokhan ruẹ ladian ne uwa ya rri emwi.” Ovẹn wa yunmwu vbe ẹdẹrriọ, ehe hia na ye sẹnrẹn. Sokpan, I na tama e Lesli wẹẹ, I i sẹtin yo rhunmwuda, ọ mwẹ ọta eso ne I mu egbe ẹre. Ọ ma gui o, sokpan ẹko ma rhiẹnrhiẹn ọnrẹn. Vbe I khian ghi suẹn gha mu egbe ọta na, ekhọe mwẹ na gha gu mwẹ gui. Ẹre ẹmwẹ nọ rre ebe Ẹfisọs 5:25 kevbe 28 na wa la mwẹ ekhọe. Ọ na yevbe na miẹn wẹẹ, te Jehova ya ẹmwẹ nọ rre ako nii tama mwẹ wẹẹ, ne I mu ọghe ọvbokhan mwẹ karo? I ghi na erhunmwu nẹ, I na tama e Lesli wẹẹ, “Gi ima gha khian,” ọ na wa gha ghọghọ. Ma na gha rrie ihe ọkpa nọ ye mose mose vbe ọkpẹn ẹzẹ, ma na waa ukpọn na waa ye etebul yotọ, ẹdẹrriọ ọre ọkpa vbe usun ẹdẹ nọ ghi gbe ima otiti sẹ vbe ẹdagbọn ima. I na ye sẹtin mu egbe ọta mwẹ.

Ma wa gha sọyẹnmwẹ iwinna ọgbaroghe ọghe otako, ehe ne ima wa gha mu okhian yo wa gha kpọlọ, ke British Columbia ya sẹ Newfoundland. I na do sẹtin gha mu okhian ye ehe nibun, ọni ọre emwi nọ wa gha rrọọ mwẹ ekhọe vbe I rre ọvbokhan. I te gha hoo ne I yo Owebe Gilead, sokpan I ma hoo ne I yo ẹvbo ọvbehe ya ga. Te ọ yevbe na miẹn wẹẹ, emwa ni kakabọ hin usi ẹre avbe arọndẹ na gie yo isi khin, rhunmwuda ọni, I na gha roro ẹre wẹẹ, I ma gbegba. Yevbesọni, ohan na gha mu mwẹ wẹẹ, a sẹtin gie ima gha rrie ẹvbo ne okpe emianmwẹ ye kevbe na na khọn okuo vbe otọ Africa. Eke ne I wa gha ye wa fu mwẹ egbe.

A NA WẸẸ NE IMA GHA DIE ESTONIA KEVBE THE BALTICS, MA MA TE ZẸDẸ YA ARO YE ỌNA

Vbe ukpo 1992, vbe iwinna Arriọba ghi suẹn gha mwẹ alaghodaro vbe ẹvbo eso ni ka gha rre ototọ Soviet Union, a na nọ ima deghẹ ima gha hoo ne ima ya ga zẹvbe arọndẹ na gie yo isi vbe Estonia. Ọna wa kpa ima odin, sokpan ma na muẹn ye erhunmwu. Ẹre ima na werriegbe nọ egbe ima wẹẹ, ‘Adeghẹ e Jehova tie ima ne ima do ru emwi, ẹi re te ọ khẹke ne ima hia ne ima ru ẹre?’ Ma na wẹẹ ima gha yo, I na tama egbe mwẹ wẹẹ, ‘Ẹi re otọ Africa ma rrie amaiwẹ.’

Ẹre ima na ghi wa suẹn gha ruẹ urhuẹvbo Estonia. Ma ghi gbe uki eso nẹ vbe ẹvbo na, a na wẹẹ ne ima suẹn iwinna ọgbaroghe ọghe otako. Iko 46 kevbe avbe ẹbu na ma he kpasẹ yi nọ gha re iko, ẹre ima ghaa ga vbe ẹvbo eha na tie ẹre The Baltics, kẹ kevbe Kaliningrad, vbe Russia. Ọna rhie ma wẹẹ, te ima gha ruẹ urhuẹvbo e Latvia, e Lithuania, kevbe Russia. Ọna ma zẹdẹ gha khuẹrhẹ. Ọrheyerriọ, te etẹn ni rre evba wa gha ghọghọ wẹẹ, ima hia ne ima ruẹ urhuẹvbo iran, iran na vbe gha ru iyobọ nọ khẹke ne ima. Vbe ukpo 1999, abotu ọkpa na do gha rre Estonia, ẹre a na ghi wẹẹ ne I ya ga zẹvbe ọkpa vbe Agbaziro Ọghe Abotu vbe evba nii. Imẹ, Toomas Edur, Lembit Reile, kevbe Tommi Kauko ẹre ọ ghaa re Agbaziro Ọghe Abotu vbe evba.

Ma keghi do rẹn Osẹe Jehova nibun na ka viọ gha rrie Siberia. Agharhemiẹn wẹẹ, a ya obọ nọ tọn gha mu iran vbe eghan kevbe wẹẹ iran kpa sẹ ẹgbẹe ọghe iran rae, iran ma gi ohu mu iran. Te iran wa ye gha ya ọyẹnmwẹ kevbe izọghae kporhu iyẹn nọ maan. Ọna keghi ya ima rẹn wẹẹ, ma gha sẹtin zin egbe ọlọghọmwa nọ rhirhi gha khin, ma ghi vbe gha sọyẹnmwẹ agharhemiẹn wẹẹ ẹi khuẹrhẹ.

Ọwara ukpo nibun ẹre ima wa ya gha winna, ma ma mobọ gha hẹwẹ vberriọ, rhunmwuda ọni, egbe na wa do wọọ ọvbokhan mwẹ ighẹ Lesli ẹsẹsẹmwẹse. Ma ma rherhe rẹn wẹẹ emianmwẹ ọkpa na tie ẹre fibromyalgia, nọ si egbewọmwẹ ẹre ọ khuọnmwi. Ma na ghi gha muẹn roro deghẹ ima gha wa werriegbe gha rrie Canada. Vbe abotu ghi tama ima ne ima gha die owebe ọkpa vbe Patterson, New York, U.S.A., I na gha roro ẹre wẹẹ, ma i khian sẹtin yo. Sokpan, vbe ima ghi mu ẹmwẹ na ye erhunmwu nẹ inugba nọ khin, ma na wẹẹ ima gha yo. E Jehova wa fiangbe emwi ne ima ru na. Ẹghẹ ne ima ya gha rre owebe na, ẹre a ghi ya gele do gbaroghe Lesli ẹse. Rhunmwuda ọni, ma na ghi sẹtin dọlegbe suẹn gha ru avbe emwi ne ima te ka ru.

EMWI ỌVBEHE NE IMA MA TE YA ARO YI —OTỌ ẸVBO ỌVBEHE

Ọ mwẹ akota ọkpa ne otu ke igiogbẹ tie mwẹ, vbe ukpo 2008, vbe ẹghẹ ne ima na gha rre Estonia, iran na wẹẹ, deghẹ ima gha hoo ne ima ya ga vbe Congo. Ọna keghi wa kpa mwẹ odin, katekate ne iran na tama mwẹ wẹẹ, ne I gi iran rẹn vbene I kha hẹ vbe ẹdẹ nọ lelẹe. Vbe okaro, I ma ka tama e Lesli, rhunmwuda I rẹnrẹn wẹẹ, ẹi khian miẹn ovbe vbe asọn nii deghẹ I na tama rẹn. Nọghayayerriọ, mẹ ẹre ọ ma ghi miẹn ovbe vbe asọn nii, rhunmwuda ne I na gha na erhunmwu vbekpa emwi nọ ya osi si mwẹ, vbe I gha họn ẹmwẹ Africa.

Vbọ ghi rre ẹdẹ nọ lelẹe vbe I ghi tama e Lesli nẹ, ma na ghi tama egbe ima wẹẹ, “E Jehova ẹre ọ wẹẹ ne ima gha rrie otọ Africa. Vbe ima ghi ya rẹn wẹẹ, ẹi khian fu ima egbe kevbe wẹẹ, ma i khian sọyẹnmwẹ ọnrẹn deghẹ ima ma yo hiehie?” Ukpo 16 ẹre ima gbe vbe Estonia, ma ke kpa gha rrie Kinshasa, vbe Congo. Te abotu nọ rre evba wa ye mose mose, avbe obobo ne mose mose wa gha rre ehe hia, erriọ ehe hia wa vbe ya furre. Ọkpa vbe usun emwi ne Lesli ka wa mu ye ughugha vbe evba, ọre ekadi ọkpa nọ ghaa gu ẹre ke obọ ne ima ya kpa hin e Canada rre. Emwi na gbẹn ye ekadi nii ọre, “Gha waan vbe eke na rhirhi kọ ruẹ yi.” Ma na do rẹn etẹn nibun vbe evba, ma gu emwa nibun ruẹ e Baibol, ma vbe miẹn ọyẹnmwẹ nọ sẹ ọmwa, vbe ọmwa gha rhie egbe ye iwinna arọndẹ na gie yo isi, ọyẹnmwẹ nọ ghi gha sẹ ima vbe ugamwẹ e Jehova rhunmwuda ena hia i gia gie. Vbene ẹghẹ ya khian, ẹkpotọ keghi kie ne ima ya mu otuẹ gha rrie otọ ẹvbo 13 ọvbehe vbe otọ Africa, abotu ẹre ọ gie ima gha khian. Ọna ẹre ọ ghi ru iyobọ ne ima ya gele do rẹn emwa ni rre otọ Africa kevbe odẹ ughughan ne iran ya ru emwi. Ohan ma ghi gha mu mwẹ, ma kpọnmwẹ e Jehova wẹẹ ọ gie ima gha rrie otọ Africa.

Vbe ima ghi rre Congo, iran keghi mu evbare ughughan ne ima, vbe na ghee avbe aranmwẹ ne giẹrẹ, ni yevbe na ghee asẹlẹ (insects), ma te gha roro ẹre wẹẹ, ma i khian sẹtin rri avbe evbare na. Sokpan vbe ima ghi bẹghe ẹre wẹẹ, etẹn ni rre evba wa rri orhiẹnrhiẹn ọnrẹn, ẹre ima na vbe re vbọ, ọ na wa vbe rhiẹnrhiẹn ima.

Ma na mu okhian gha rrie odẹ ekẹn ọghe ẹvbo nii, ya rhie igiọdu ne etẹn ni rre evba, ma na vbe kpemehe emwi ne iran gualọ ne iran, vbe ehe na kha na, otu eso kegha khọn, iran na gha rhie ikuanegbe ne ikhuo kevbe ibiẹka. Etẹn ni bun sẹ vbe evba i mwẹ igho. Ọrheyerriọ, iran keghi ya ekhọe hia yayi wẹẹ, arhiọkpaegbe rrọọ, erriọ iran vbe ya hoẹmwẹ e Jehova, iran ma gi emwi rhọkpa si iran hin otu e Jehova rre, ena hia keghi wa rhie igiọdu ne ima. Ọ ya ima gha muẹn roro evbọzẹe ne ima na ga e Jehova, ọ na vbe ya ima mu ẹtin yan e Jehova sayọ. Etẹn eso ni rre evba khian nẹi ghi mwẹ owa mwẹ odẹ, emwi okọ hia ne iran vbe kọ ye ugbo na vbe wii iran. Ọna keghi ya mwẹ rẹn wẹẹ, ai mu ẹtin yan emwi ewe, banban ehia ghi wa ru gbee. Ọ vbe ya mwẹ rẹn wẹẹ emwi nọ ru ekpataki sẹ ọre ne ima gha re ọsie Jehova. Agharhemiẹn wẹẹ, iran miẹn ukpokpo nọ wegbe, etẹn na ma zẹdẹ gha vian. Vbene avbe etẹn na ya gha ru emwi wa rhie igiọdu ne ima, ọ keghi ru iyobọ ne ima ya ya udinmwẹ werriẹ aro daa ọlọghọmwa ughughan, ya sẹ egbe ọlọghọmwa ọghe emianmwẹ.

A KEGHI GIE IMA GHA RRIE ASIA

Emwi ọvbehe ne ima ma te ya aro yi keghi sunu. A na wẹẹ ne ima gha rrie abotu nọ rre Hong Kong. Ma ma te zẹdẹ ya aro yọ wẹẹ, ma gha dia otọ Asia ya! Ma ghi yerre vbene Jehova ya ru iyobọ ne ima vbe avbe otọ ẹvbo ọvbehe ne ima na ka ya ga, ma na ghi wẹẹ, ima gha yo. Ọ ghi rre ukpo 2013, ma keghi kpa sẹ avbe ọse ne ima hoẹmwẹ ọnrẹn rae kevbe otọ Africa ne mose mose, agharhemiẹn wẹẹ ima ma rẹn vbene eke ne ima ghi rrie na khian gha ye hẹ. Na kha na, te ameve wa gha rhọọ kua vbe aro ima.

Ẹvbo ne emwa na wa bun kevbe ne emwa ni ke ẹvbo ughughan rre ye, ẹre Hong Kong khin. Rhunmwuda ọni, afiwerriẹ ne gẹdẹgbẹ ẹre ọna wa gha khin ne ima. Ọ ma zẹdẹ gha khuẹrhẹ ne ima do ruẹ urhuẹvbo e Cantonese. Sokpan te etẹn wa ya ekhọe hia gbọbokhian ne ima, ma wa vbe rri orhiẹnrhiẹn evbare ne iran re vba. Iwinna Arriọba wa gha mwẹ alaghodaro vbe ẹvbo na, sokpan otọ kevbe owa keghi khian aghanghan. Rhunmwuda ọni, Ẹbu Nọ Su keghi zẹ ọre vbe iro wẹẹ, iran gha khiẹnnẹ owa ugamwẹ kevbe otọ nibun. Vbọ ma he kpẹẹ vba, vbe ukpo 2015, a na wẹẹ ne ima gha rrie South Korea, evba ẹre ima na ghi gha ga. Urhuẹvbo na vbe zẹ mwa i vbe khuẹrhẹ ne ima. Agharhemiẹn wẹẹ, ma i wa gua zẹ urhuẹvbo na ẹse, etẹn keghi rhie igiọdu ne ima, iran keghi tama ima wẹẹ, ma wa mwẹ alaghodaro vbe odẹ ne ima ya zẹ urhuẹvbo e Korea.

EMWI NE IMA RUẸ RE

Na do sẹtin zẹ ọse ọgbọn i re emwi nọ khuẹrhẹ, sokpan ma keghi do bẹghe ẹre wẹẹ, ma ghaa zẹ owẹ nokaro ne ima ya mu ọghọ ye emwa egbe, ọ ghi khuẹrhẹ ne ima ya gu iran ru ọse. Ma keghi do bẹghe ẹre wẹẹ, iyobọ ekhọe ọkpa ẹre etẹn hia mwẹ kevbe wẹẹ, te Jehova yi ima ne ima sẹtin ya ekhọe hia hoẹmwẹ emwa ughughan, ma ghi vbe gu iran ru ọse.—2 Kọr 6:11.

Ma keghi do bẹghe ẹre wẹẹ, te ọ khẹke ne ima gha ya aro ne Jehova ya ghee emwa ghee emwa kevbe wẹẹ, ne ima gha gualọ vbene Jehova ya rhie ẹre ma wẹẹ irẹn hoẹmwẹ ima, kevbe emwi ne Jehova hoo ne ima ru vbe ẹdagbọn ima. Ẹghẹ ke ẹghẹ ne iro ya han ima, ra ne ima ya roro ẹre deghẹ etẹn gele hoẹmwẹ ima, ma ghi ya tie avbe ekadi ra elẹta ne etẹn gbẹnnẹ gie ima. Aro ima wa vbe dae, vbene Jehova he ya họn erhunmwu ima, ọ gi ima rẹn wẹẹ irẹn hoẹmwẹ ima, ọ na vbe rhie ẹtin ne ima ya sẹtin gha ru iwinna ugamwẹ ọghe ima.

Ke ukpo nibun gha dee nian, mẹ vbe Lesli do bẹghe ẹre vbe nọ ru ekpataki sẹ ne ima gha mwẹ ẹghẹ ne egbe, ọ gha khọnrẹn ne ima gha mwẹ iwinna nibun ne ima ru vbe obọ. Ma vbe do bẹghe ẹre wẹẹ, ọ ma de emwi nọ rhiae ne ima vbe giẹ egbe ima, deghẹ ima na ru abaruku eso vbe ima ghaa ruẹ urhuẹvbo ọgbọn. Asọn asọn, ma keghi muẹn roro emwi ne ima sọyẹnmwẹ ọnrẹn, ne ima gha sẹtin kpọnmwẹ e Jehova yi.

Ọghe ne ẹmwata, I te wa gha roro ẹre wẹẹ, I i khian sẹtin ru iwinna arọndẹ na gie yo isi kevbe wẹẹ, I i khian sẹtin dia ẹvbo ọvbehe ya. Ọrheyerriọ, I keghi do bẹghe ẹre wẹẹ emwi ọkpa i rrọọ ne ima i sẹtin ru adeghẹ e Jehova na gha rre ima iyeke. Ẹmwẹ ne akhasẹ ighẹ e Jerimaia ta keghi la mwẹ ekhọe, ọ khare wẹẹ: “Eo Jehova, U mu mwẹ rẹrẹ nẹ.” (Jer 20:7) Gele gele, e Jehova wa ru emwi eso ne ima ma te ya aro yi, ọ wa fiangbe ima ẹi re ne kherhe, ọ na kue ru emwi nọ da mwẹ vbe orhiọn mẹ, I na ye sẹtin ya okọ ẹhoho mu okhian yo ihe ughughan. Ẹi re avbiẹ ẹvbo ẹre ima he ya okọ ẹhoho mu okhian yo, vbe I ye kherhe, I ma te roro ẹre wẹẹ I gha sẹtin yo avbe ẹvbo na, otu wa gie ima yo ihe ughughan vbe uhunmwu otagbọn na. Vbe iwinna ugamwẹ ughughan ne ima he ru, I wa ya ekhọe hia kpọnmwẹ e Lesli ye odẹ nọ ya ya ekhọe hia mudia yọ mwẹ iyeke.

Ẹghẹ hia ma ya ye egbe ima ẹre rre ọmwa ne ima ru emwi na hia na, kevbe evbọzẹe ne ima na ru ẹre. Avbe emwi hia ne ima sọyẹnmwẹ ọnrẹn vbe ẹdẹnẹrẹ, ya ima rẹn wẹẹ, e Jehova gha ru emwi nọ sẹ ọni, vbe ẹghẹ ne ima khian ya gha rrọọ vbe etẹbitẹ kevbe ẹghẹ ne Jehova khian ya “gi ẹko vuọn emwi hia” nọ yi.—Psm 145:16.