Mẹ Ne Ekhue Te Ka Wa Mu Na Ghi Do Khian Arọndẹ Na Gie Yo Isi

Ukpo 1951 ẹre a biẹ mwẹ vbe Vienna, vbe Austria, ẹgbẹe nọ rhiegba ye ugamwẹ e Catholic ẹre i ke rre. Ọmwa ne ekhue wa gha mu ẹre I ghaa khin, sokpan, te I wa ya Osanobua yi, erriọ ẹre I vbe ya gha na erhunmwu gie ẹre vbe ẹghẹ hia. Vbe I rre ukpo ihinrin, Avbe Osẹe Jehova na suẹn gha gu erha mwẹ ruẹ e Baibol; vbọ ma he kpẹẹ vba iye mwẹ na vbe deba ẹre.

Iko ne ima ghaa yo vbe ẹghẹ nii ọre Döbling Congregation vbe Vienna. Emwi wa bun ne ima ghaa ru kugbe zẹvbe ẹgbẹe. Ma ghaa tie Baibol kugbe, ma ghaa koko yo iko, ma na vbe koko gha rhiegbe ladian vbe iwinna na ru vbe asikoko. Vbe I ye kherhe, erha mwẹ keghi ru iyobọ mẹ ya hoẹmwẹ e Jehova ẹsẹse. Uhiẹn, emwi ne erha mwẹ wa gha gualọ ọre ne imẹ vbe ọtẹn mwẹ nokhuo gha re arọndẹ ọghe ẹghẹ hia. Sokpan, ọni ma zẹdẹ gha rrọọ mwẹ ekhọe vbe ẹghẹ nii.

VBE I SUẸN IWINNA UGAMWẸ ẸGHẸ HIA

Ukpo 1965 ẹre I dinmwiamẹ, vbe I rre ukpo 14. Vbọrhirhighayehẹ, te ọ wa gha lọghọ mwẹ ne I sẹtin gu emwa guan vbe ikporhu. I wa vbe gha roro ẹre wẹẹ, emwa ọvbehe maan sẹ mwẹ, I na wa gha hoo ne avbe ihua mwẹ gha ya aro nọ maan ghee mwẹ. Rhunmwuda ọni, vbọ ma he kpẹẹ vbe I dinmwiamẹ, I na suẹn gha gu emwa nẹi ga e Jehova mu obọ. Agharhemiẹn wẹẹ, ẹmwẹ iran ghaa yẹẹ mwẹ, ekhọe mwẹ na gha bu abe gbe mwẹ, rhunmwuda I rẹnrẹn wẹẹ, emwa nẹi ga e Jehova ẹre iran khin. Sokpan, I na ye gha gu iran mu obọ. Vbọ ghi ru iyobọ mẹ?

Vbe asẹ nii, ọmọ okhuo ọkpa nọ rre ukpo 16 na tie ẹre, Dorothée keghi do deba iko ọghe ima. Vbene ọ ya gha ya oyaya kporhu ke owa ya sẹ owa na wa gha yẹẹ mwẹ. I ya ekherhe diẹn ọnrẹn, sokpan, I ma gha yo ikporhu vbe ẹghẹ hia. Ẹre I na ghi tama egbe mwẹ wẹẹ: ‘Osẹe Jehova ẹre evbibiẹ mwẹ khin, sokpan e Dorothée ọkpa ọre Osẹe Jehova vbe ẹgbẹe ọre. Iyẹe ne egbe ma rran ẹre ọ gu dia, ọrheyerriọ, ẹghẹ hia ẹre ọ ya yo ikporhu!’ Igiemwi esi ọghẹe keghi ru iyobọ mẹ ya rhiegbe ye ugamwẹ e Jehova sayọ. Vbọ ma he kpẹẹ vba, mẹ vbe Dorothée ẹre ọ ghi gba gha ru iwinna arọndẹ ọghe ẹghẹ hia. Arọndẹ ọghe ọyọmwabọ ẹre ima ka ya suẹn, vacation pioneers ẹre a ghaa tie ẹre vbe ẹghẹ nii, iyeke ọni, ma na ghi suẹn iwinna arọndẹ ọghe ẹghẹ hia. Odẹ ne Dorothée ya rhiegba ye ugamwẹ e Jehova wa gele ru iyobọ mẹ. Irẹn ẹre ọ ru iyobọ mẹ ya suẹn gha gu ọmwa ruẹ e Baibol vbe ẹghẹ okaro. Vbene ẹghẹ ya khian, ọ na ghi do gha khuẹrhẹ mẹ ne I sẹtin gu emwa guan vbe ikporhu ọghe ke owa ya sẹ owa, vbe abọ idunmwu kevbe vbe ihe ọvbehe.

Vbe ukpo ne I suẹn iwinna arọndẹ ọghe ẹghẹ hia, otu keghi gie Ọtẹn Nokpia Heinz nọ ke Austria rre gha die iko ọghe ima. Vbe ọ ya tuẹ ọtiọnrẹn nọ re Osẹe Jehova nọ rre Canada ẹre ọ na miẹn odẹ ẹmwata na. Te otu gie Heinz gha die iko ọghe ima vbe Vienna zẹvbe arọndẹ nekpataki. Ke ẹghẹ nọ wa ya rre, ẹre ẹmwẹ ọnrẹn wa ya suẹn gha yẹẹ mwẹ. Ọ ghaa hoo nọ ru iwinna arọndẹ na gie yo isi, sokpan, ẹ i re ọni mẹ ghaa hoo ne I ya ẹdagbọn mwẹ ru. Rhunmwuda ọni, I ma gi ẹre rẹn wẹẹ, ẹmwẹ ọnrẹn yẹẹ mwẹ. Sokpan, ọ ghi sẹ ẹghẹ, mẹ vbe Heinz na suẹn gha si egbe obọ, ma na vbe ru orọnmwẹ, iyeke ọni, ma na ghi suẹn gha ru iwinna arọndẹ vbe Austria.

I NA GHI DO GHA HOO NE I RU IWINNA ARỌNDẸ NA GIE YO ISI

Ẹghẹ hia ẹre Heinz ya gha kha wẹẹ, iwinna arọndẹ na gie yo isi te wa yẹẹ irẹn. Agharhemiẹn wẹẹ, ọ ma kpikpi mwẹ, ọ ghi ya ẹwaẹn nọ mwẹ ọta eso nọ gha ya mwẹ gha mu iwinna arọndẹ na gie yo isi roro, usun ọta nọ nọ mwẹ re ọre wẹẹ, “Ugbẹnvbe a miẹn wẹẹ, ma i mwẹ emọ, ma gha sẹtin ru sayọ vbe ugamwẹ e Jehova ra?” Rhunmwuda ne I na gha re ọmwa ne ekhue mu, ohan na gha mu mwẹ wẹẹ, I i khian sẹtin ru iwinna arọndẹ na gie yo isi. Ẹmwata nọ wẹẹ, I ghaa ru iwinna arọndẹ ọghe ẹghẹ hia, sokpan, I vbe gha roro ẹre wẹẹ, iwinna arọndẹ na gie yo isi gha lọghọ gbe. Ọrheyerriọ, Heinz ma gi egbe wọọ re, te ọ ye gha guan kaẹn iwinna arọndẹ na gie yo isi. Ọ na vbe rhie igiọdu mẹ ne I gha muẹn roro vbene I khian ya ru iyobọ ne emwa ọvbehe hẹ, ne I gha te ya gha rhie aro tua ohan nọ mu mwẹ. Ibude nọ rhie mẹ wa gele ru iyobọ mẹ.

Kherhe kherhe iwinna arọndẹ na gie yo isi na do gha yẹẹ mwẹ, ẹre ima na ghi fill e fọm ọghe Owebe Giliẹd. Vbọrhirhighayehẹ, ọtẹn nọ siẹnro abotu vbe ẹghẹ nii na tama mwẹ wẹẹ, ne I hia ne I ruẹ vbe na ya zẹ Ebo ẹse. Vbọ ghi rre ukpo eha ne I ya gha ruẹ vbe na ya zẹ Ebo ẹse, otu keghi we ne ima ya ga vbe iko na na zẹ Yugoslavian nọ rre Salzburg vbe Austria. Ukpo ihinrọn ẹre ima gbe vba, ma na ya ukpo ọkpa ru iwinna ọgbaroghe ọghe otako. Urhuẹvbo Serbo-Croatian wa gha lọghọ na ruẹ, sokpan, ma wa gha mwẹ emwa ni bun ne ima gu gha ruẹ e Baibol.

Vbọ ghi rre ukpo 1979, otu na we ne ima ya die Bulgaria ya vbe ovbi ẹghẹ kherhe, rhunmwuda a mu awua ye iwinna ima vbe evba. Iran na we ne ima ba ru vbe na miẹn wẹẹ, te ima khian ya “rọkhọ erhuan” vbe ẹvbo nii. Iran na we ne ima ghẹ kporhu, sokpan ne ima ya ẹwaẹn viọ avbe ebe ima eso ni ma kpọlọ gbe la ẹvbo nii, vbene emwa i khian na rẹn vbekpa ẹre. Etẹn nikhuo isẹn ni rre Sofia, nọ re isiẹvbo ọghe Bulgaria ẹre ima khian viọ avbe ebe na gie. Te ohan wa gha mu mwẹ, sokpan e Jehova wa ru iyobọ mẹ ya sẹtin ru iwinna na. Vbe I bẹghe udinmwẹ kevbe ọyẹnmwẹ nọ ghaa sẹ etẹn nikhuo na, agharhemiẹn wẹẹ, arriọba sẹtin mu iran ye eghan, ọ keghi wa rhie igiọdu mẹ ne I ru vbene ẹtin mwẹ sẹ vbe iwinna ke iwinna ne otu e Jehova wa mwẹ re.

Vbe ẹghẹ eso ghi gberra nẹ, ma na dọlegbe fill e fọm ọghe Giliẹd, otu na ghi tie ima gha die owebe na. Ma ghaa roro ẹre wẹẹ, ọghe Ebo ẹre ima khian yo vbe United States. Sokpan, vbọ ghi rre November 1981, a na suẹn gha ru Owebe Giliẹd vbe abotu nọ rre Wiesbaden vbe Germany. Rhunmwuda ọni, urhuẹvbo e German ẹre a ghi ya ma ima emwi vbe owebe na, urhuẹvbo na ẹre I rẹn otọ ọre sẹ. De eke na khian ghi gie ima gha rrie nian?

VBE IMA RU IWINNA ARỌNDẸ NA GIE YO ISI VBE ẸVBO NA NA GHA KHỌN OKUO

E Kenya ẹre otu gie ima gha rrie! Sokpan, abotu nọ rre Kenya na nọ ima deghẹ ima gha sẹtin ya ga vbe ẹvbo nọ ma rree gbe vbe evba, na tie ẹre Uganda. Vbe ukpo igbe nọ gberra vbene ọ te sẹ ẹghẹ na, okaokuo ọkpa na tie ẹre General Idi Amin keghi ya ẹtin vbe iwegbe miẹn arriọba ukpo vbe Uganda. Vbe ẹghẹ nọ ya gha rre ukpo arriọba, ẹ i re avbiẹ emwa ẹre ọ gbelua, ẹbo emwa ni bun ẹre ọ vbe gha rri oya. Vbọ ghi rre ukpo 1979, emwa ọvbehe na vbe ya ẹtin vbe iwegbe miẹn irẹn ukpo arriọba. Ọni ẹre ọ si ẹre ne I ma na gha hoo ne I gha rrie eke na na khọn okuo. Sokpan, Owebe Giliẹd ma ima re wẹẹ, te ọ khẹke ne ima gha mu ẹtin yan e Jehova. Rhunmwuda ọni, ma na we ima gha yo.

Te emwi wa wegbe vbe Uganda. Ọdafọn mwẹ ighẹ Heinz ghi gie vbene Uganda ghaa ye hẹ vbe 2010 Yearbook, ọ na kha wẹẹ: “Emwi ni bun, . . . vbe na ghee, eke na na sa amẹ kevbe na na miẹn efoni na ya kọl emwa, ma ghi gha winna. . . . Te emwa wa gha filo osisi, erriọ ẹre emwa vbe ya gha rra, katekate vbe asọn. . . . Emwa hia ghi wa tota ye owa, iran ghi gha na erhunmwu ne emwa dan ghẹ sẹ eke ne iran ye.” Vbe uwu ena hia, te etẹn ni rre ẹvbo na, wa ye gha ya oghọghọ ga e Jehova!

Vbe ukpo 1982, mẹ vbe Heinz na gha rrie Kampala, nọ re isiẹvbo ọghe Uganda. Uki isẹn nokaro ne ima gbe vbe evba nii, owa ọtẹn nokpia Sam Waiswa kevbe ọvbokhan rẹn ighẹ Christina ẹre ima ghaa ye. Ma hia ni ghaa rre owa nii ọre, ọdọ vbe amwẹ na, emọ isẹn ne iran mwẹ kevbe etẹn iran enẹ vbe uwu ẹgbẹe. Uhukpa vbe ẹdẹ ẹre Ọtẹn Nokpia kevbe Ọtẹn Nokhuo Waiswa kevbe ẹgbẹe ọghe iran mobọ gha rri evbare, rhunmwuda vbene obọ iran sẹ, ọrheyerriọ emwi ma gha da iran. Vbe uwu ẹghẹ ne ima ya gha rre owa iran, ma wa miẹn emwi ni bun ruẹ nọ ghi ru iyobọ ne ima vbe iwinna arọndẹ na gie yo isi. Vbe igiemwi, ma keghi ruẹ vbe na ya ya ẹwaẹn loo amẹ hẹ, ma gha ghi ya amẹ kherhe khuẹ, ma ghi loo amẹ nii ya flọsh e tọilẹt. Vbọ ghi rre ukpo 1983, mẹ vbe ọdafọn mwẹ na ghi miẹn owa vbe ihe ọvbehe ne okuo ma wa sẹ vberriọ vbe Kampala.

Te ima wa gele gha sọyẹnmwẹ iwinna ikporhu iyẹn nọ maan. I yerre wẹẹ, ọ mwẹ uki ọkpa ne ima ya rhie ebe iyẹn ọghe ima nọ gberra 4,000 ne emwa! Sokpan, ẹmwẹ emwa ni rre ẹdogbo nii ẹre ọ ghi wa yẹẹ ima sẹ. Iran wa hoẹmwẹ Osanobua, erriọ ẹre iran vbe ya gha gbọyẹmwẹ ye ẹmwẹ nọ rre uwu e Baibol. Emwa ni rrie odẹ 10 ya sẹ 15 ẹre I ghaa gu ruẹ e Baibol, erriọ ẹre ọdafọn mwẹ vbe gha ye. Ma wa miẹn emwi ni bun ruẹ vbe obọ emwa ne ima gu ruẹ e Baibol. Vbe igiemwi, owẹ ẹre iran ya gha yo iko, ẹre iran vbe ya gha yo owa vba gha zobọ nẹ, iran i vian, sokpan, iran ghi wa gha ghọghọ, ọna wa gha yẹẹ ima.

Vbe ukpo 1985 kevbe 1986, okuo eva na dọlegbe mu sa vbe Uganda. Ẹghẹ ni bun, ma wa gha bẹghe ibiẹka, ni da osisi nọkhua yi, iran ghi mudia ye eke ne avbe ivbiyokuo mudia yi, avbe ivbiyokuo ẹre ọ ghaa loo iran. Vbe uwu ẹghẹ nii, ma keghi na erhunmwu ne Jehova rhie ẹwaẹn ne ima, nọ vbe ru iyobọ ne ima ya lẹẹ ne ẹbe zẹvbe ne ima ya gha gualọ emwa ni hoo ne iran ruẹ e Baibol. E Jehova wa gele họn erhunmwu ima. Ma gha wa miẹn ọmwa nọ wa hoo nọ ruẹ vbekpa e Jehova, orhiọn ima ghi wa sẹ otọ.

Ma wa vbe gha kporhu ma avbe erhunmwuyẹn, ọna wa vbe gha yẹẹ ima. Vbe igiemwi, ma kporhu ma ọdọ vbe amwẹ ọkpa na tie ẹre Murat kevbe Dilbar Ibatullin, ni ke Tatarstan rre (Central Russia), ma na vbe suẹn gha gu iran ruẹ e Baibol. Ọbo ebo ẹre Murat ghaa khin. Ọdọ vbe amwẹ na keghi do khian Osẹe Jehova, iran wa vbe rhiegba ye ugamwẹ e Jehova ke ẹghẹ nii gha dee. Vbọ ma he kpẹẹ vba, I na vbe miẹn okhuo ọkpa nọ ke Ukraine rre, na tie ẹre Tatjana Vileyska, te iro wa han okhuo na vbe ẹghẹ nii sẹrriọ wẹẹ, ọ na gha hoo nọ gbe egbe ẹre rua. Vbe Tatjana ghi dinmwiamẹ nẹ, ọ na dọlegbe gha rrie Ukraine, ọ na vbe deba etẹn ni zedu ebe ọghe ima gha winna vbe ẹvbo nii.a

MA NA GHA RRIE ẸVBO ỌVBEHE

Vbe ukpo 1991, vbe ima ya gbe ẹghẹ eso vbe Austria, abotu nọ rre ẹvbo na keghi tama ima wẹẹ, e Bulgaria ẹre ima khian na ghi ya ga zẹvbe arọndẹ na gie yo isi. Ukpo ni bun ẹre a ya mu awua ye iwinna Avbe Osẹe Jehova vbe ẹvbo eso vbe Europe, ya sẹ egbe Bulgaria. Sokpan vbe ẹghẹ na kha na, a fan obọ re ne Avbe Osẹe Jehova nẹ ne iran gha ru iwinna iran vbe Bulgaria. Zẹvbe ne I ka tae sin, ẹvbo na ẹre ima ka ya ẹwaẹn viọ avbe ebe ọghe ima eso gha rrie, ne emwa ghẹ mieke na rẹn. Sokpan nian, te a gie ima gha rrie evba ne ima ya kporhu.

A keghi tama ima ne ima ghẹ dọlegbe gha rrie Uganda. Rhunmwuda ọni, ma ma ghi ya viọ ihẹ ima, amaiwẹ te ima khian gbe okhian ẹdẹ hia ne avbe ọse ima. Ma keghi ke evba kpa gha rrie Bẹtẹl nọ rre Germany, ma ghi sẹ evba, ma na mu imọto ọkpa, ma na yae gha rrie Bulgaria. A keghi we ne ima ya ga vbe ẹbu na ma he kpasẹ yi nọ gha re iko vbe Sofia, etẹn ni rrie odẹ 20 ẹre ọ ya iyẹn wewe vba.

Ma werriẹ aro daa ọlọghọmwa ni bun ọvbehe vbe Bulgaria. Vbe okaro, ma i gua zẹ urhuẹvbo iran. Vbe deba ọni, ebe na tie ẹre The Truth That Leads to Eternal Life kevbe My Book of Bible Stories ọkpa ẹre a he gbẹn vbe urhuẹvbo e Bulgarian. Ọ ma vbe gha khuẹrhẹ ne ima ya sẹtin do suẹn gha gu emwa ruẹ e Baibol. Ọrheyerriọ, ẹbu nekherhe na, na ye gha mwẹ alaghodaro vbe ugamwẹ e Jehova. Orthodox Church ghi do rẹn vbekpa iwinna ikporhu ọghe ima vbe ẹvbo nii, iran na suẹn gha zẹ ima kpokpo.

Vbe ukpo 1994, a keghi mu awua ye iwinna Avbe Osẹe Jehova vbe ẹvbo nii, emwa na ghi do gha ya aro dan ghee iran. A mu etẹn eso ye eghan. Ugha iyẹn na gha ta ohoghe vbekpa ima, iran na we Avbe Osẹe Jehova gbele ibiẹka rua, erriọ ẹre iran vbe ya tama Avbe Osẹe Jehova ne ihua iran, ne iran gbe egbe iran rua, lekpa ne iran i na mu esagiẹn ye egbe. Ọna keghi yae gha lọghọ ne imẹ vbe ọdafọn mwẹ sẹtin gha kporhu. Vbe ẹghẹ ni bun ma wa gha miẹn avbe emwa ni vannọ mu ima, eso ghi tie avbe olakpa, vbene eso na gha filo emwi gbe ima. Ma ma sẹtin gha viọ ebe ima la ẹvbo nii, vbe deba ọni, a ke sẹtin gualọ eke na khian na do iko, ọ ghi ba kua. Uhiẹn avbe olakpa, na do gbe olighi vbe asikoko nọkhua ọkpa ne ima do. Mẹ vbe ọdafọn mwẹ ma he ka miẹn egbe emwi vbenian ẹdẹ. Te ẹvbo na wa lughaẹn ne Uganda, te emwa ni rre odọ wa mu egbe ne iran ya ruẹ e Baibol! Vbọ ghi ru iyobọ ne ima?

Ne ima na gha gu etẹn ni rre ẹvbo nii mu obọ wa gha ya ima sọyẹnmwẹ. Te iran wa gha ghọghọ ye odẹ ẹmwata ne iran miẹn, erriọ ẹre iran vbe ya gha kpọnmwẹ ima ye iyobọ ne ima ye ne iran. Ma hia na wa rhikhan mu egbe, ma na gha ru iyobọ ne egbe. Ena hia keghi ma ima re wẹẹ, ma gha sẹtin gha sọyẹnmwẹ iwinna ke iwinna ne ima ru vbe ugamwẹ e Jehova adeghẹ ima na mu ọghe emwa ọvbehe karo.

Vbene ẹghẹ ya khian, emwi na vbe do gha zẹye. Vbe ukpo 1998, a keghi yae wewe wẹẹ, a ma ghi mu awua ye iwinna Avbe Osẹe Jehova vbe Bulgaria, vbọ ma he vbe kpẹẹ vba, ma keghi do gha mwẹ ebe ni bun vbe urhuẹvbo e Bulgarian. Vbe ukpo 2004, a keghi ya abotu ọgbọn na bọ fiohan gie Jehova. Vbe ẹdẹnẹrẹ, iko 57 ẹre ọ rre Bulgaria, etẹn ni re 2,953 ẹre ọ ya iyẹn wewe vba. Vbe ukpo ugamwẹ nọ lae na, orhunmwu 6,475 ẹre ọ rrie Ugie Ayere. Vbe asẹ ọkpa etẹn nikhuo isẹn kẹkan ẹre ọ ghaa rre Sofia, sokpan, nian, iko ihinrin ẹre ọ ghi rre evba! Aro ima gele dae wẹẹ, “ẹgbẹe nọ kanmwa sẹ . . . [khian nọ ghi] kpọlọ.”​—Aiz 60:22.

ỌLỌGHỌMWA ỌVBEHE NE IMA WERRIẸ ARO DAA

Ke ukpo ni bun gha dee nian, te I wa gha wa owa emianmwẹ. Vbe ukpo eso nọ gberra, emwi eso keghi zọ ladian vbe egbe mwẹ (tumor), uhiẹn ọkpa na kue zọ ladian vbe uhunmwu mwẹ. Iran keghi loo radio therapy ya gbaroghe mwẹ, I na vbe gha rrie India, ọbo ebo ọkpa keghi mwa mwẹ egbe vbe ughaẹdẹ 12, ne iran mieke na sẹtin rhie avbe tumor nii hin mwẹ egbe rre. Egbe ghi rran mwẹ nẹ vbe abotu nọ rre India, ma na ghi dọlegbe gha rrie Bulgaria.

Na kha na, arowa mwẹ na do gha khuọnmwi emianmwẹ nọ wegbe na tie ẹre Huntington, emianmwẹ na kegha rre uniẹn ọghe iran. Ọ ma sẹtin gha khian ẹse, ọ ma sẹtin gha guan ẹse, inian eso ni rre egbe ẹre ma ghi vbe gha winna ẹse. Zẹvbe ne emianmwẹ nii ya gha tua yọ, mẹ ẹre ọ ghi do gha re obọ ọre vbe owẹ ọre. Ugbẹnso, egbe ghi wa wọọ mwẹ, I ghi gha roro ẹre deghẹ I gha sẹtin wa gha gbaroghe ẹre khian vberriọ. Sokpan, ọtẹn nokpia ọkpa na tie ẹre Bobi kegha rhie ọdafọn mwẹ lele egbe yo ikporhu vbe ẹghẹ hia. Ekhue emianmwẹ ne ọdafọn mwẹ khuọnmwi ma zẹdẹ gha mu e Bobi hiehie. Te Bobi wa gha ru iyobọ mẹ; ọ ghaa gbaroghe ọdafọn mwẹ ugbẹnso. Agharhemiẹn wẹẹ, mẹ vbe ọdafọn mwẹ we ima i khian biẹ vbe agbọn Esu na, ọmọ ne Jehova ya ru ima ẹse ẹre Bobi ghaa khin!​—Mak 10:​29, 30.

Ọdafọn mwẹ vbe gha khuọnmwi emianmwẹ kansa. Sokpan, vbe ukpo 2015 ọdafọn mwẹ ne uwa keghi viọ obọ nọ fu yan egbe. Vbe ọdafọn mwẹ wu, te I wa gha rre uwu ohioro; ọ na yevbe na miẹn wẹẹ, te I rre imina, Sokpan, te I wa ye mu ẹmwẹ ọnrẹn roro, te ọ yevbe na miẹn wẹẹ, ọ ye rre agbọn! (Luk 20:38) Ẹdẹgbegbe ẹre I ya ye ẹre rre avbe ẹmwẹ igiọdu kevbe ibude esiesi nọ rhie mẹ. I wa kpọnmwẹ e Jehova we imẹ vbe ọdafọn mwẹ gbe ukpo ni bun vbe ugamwẹ e Jehova.

I KPỌNMWẸ E JEHOVA YE IYOBỌ NỌ RU MẸ

E Jehova gele wa ru iyobọ mẹ ya sẹtin zin egbe ọlọghọmwa hia ne I werriẹ aro daa. Ọ vbe ru iyobọ mẹ ne ekhue ghẹ ghi gha mu mwẹ kevbe ne I sẹtin gha mu ọghe emwa ọvbehe karo vbe ima ru iwinna arọndẹ na gie yo isi. (2 Tim 1:7) I kpọnmwẹ e Jehova wẹẹ, mẹ vbe ọtẹn mwẹ nokhuo nekherhe ẹre ọ ghi gba rre iwinna ugamwẹ ẹghẹ hia. Vbe na guan na, otako ọghe Serbian vbe Europe ẹre irẹn vbe ọdafọn ọnrẹn na ga. E Jehova gele wa họn erhunmwu ne erha mwẹ na vbe ukpo ni bun nọ gberra!

E Baibol ne I tie ne egbe mwẹ wa mu mwẹ orhiọn sẹ otọ. I ghaa rre uwu ọlọghọmwa I ghi “kakabọ gha na erhunmwu,” vbene Jesu ru ẹre. (Luk 22:44) Odẹ ọkpa ne Jehova ya họn erhunmwu mwẹ ọre nọ na loo etẹn ni rre iko nọ rre Nadezhda, vbe Sofia ya rhie ẹre ma wẹẹ, iran hoẹmwẹ mwẹ, iran keghi wa vbe ya obọ esi mu mwẹ. Iran tie mwẹ ba egbe ẹghẹ ke ẹghẹ ne iran khian ya sọyẹnmwẹ egbe, iran ghi wa vbe gu mwẹ rẹn wẹẹ, iran gbọyẹmwẹ ye iwinna ne I ru, ọna keghi wa ya mwẹ ghọghọ.

Ẹghẹ hia ẹre I ya mu ẹmwẹ arhiọkpaegbe roro. I ghi wa gha ya ekhọe zomwa rẹn wẹẹ, I bẹghe evbibiẹ mwẹ vbe odaro owa ima vbe Paradais, iran ghi wa ye mose mose vbene iran ka gha ye vbe iran da ru orọnmwẹ. Ọtẹn mwẹ nokhuo ghi gha le evbare. I ghi vbe bẹghe ọdafọn mwẹ vbe ọ mudia ke ẹsin ọghẹe. Avbe emwi vbenian ne I mu roro keghi rhie iziro dan nọ te rrọọ mwẹ ekhọe hin mwẹ ekhọe rre, ọ ghi vbe ya mwẹ gha gbọyẹmwẹ ye ẹse hia ne Jehova he ru mẹ.

I gha mu emwi hia nọ he sunu vbe ẹdagbọn mwẹ roro, I ghi wa ya ekhọe hia kue ye emwi ne Devid tae nọ rre ebe Psalm 27:​13, 14, ọ khare wẹẹ: “De vbene I gha te khian ẹmwẹ agbọn mwẹ hẹ, akpawẹ I i mwẹ amuẹtinyan wẹẹ, I gha miẹn umamwẹ ọghe Jehova vbe otọ emwa ni ye rre agbọn. Mu ẹtin yan e Jehova, gha mwẹ udinmwẹ, ghẹ gi ẹtin fuẹ. Mu ẹtin yan e Jehova.”