Kibaru duman weleweleda yɔrɔ bɛɛ la

¹ Kerecen fɔlɔw ye kibaru duman weleweleda yɔrɔ bɛɛ la. San bisaba, Yesu Krista lakununni kɔfɛ, u tun cɛsirilen don kosɛbɛ waajuli la, fo Masaya cikan ‘tun weleweledala diɲɛ yɔrɔ bɛɛ la, sankolo jukɔrɔ.​—⁠Kol. 1:⁠23.

² Jehowa ka bi baarakɛla timinandiw bɛ ni o kuntilenna kelen fana de ye​​—⁠ ka kibaru duman lase mɔgɔ kelen-kelen bɛɛ ma. Mun bɛ se k’an dɛmɛ k’o kɛ? Mɔgɔ minnu bɛ u ka waati fanba kɛ u ka baarakɛyɔrɔ la, olu hakɛ bɛ ka caya. N’an taara bɔ u ye u ka so, an man teli k’u sɔrɔ yen. Ni u tɛ baarakɛyɔrɔ la, u bɛ dugutaga la, walima sannikɛyɔrɔ la, walima ɲɛnajɛyɔrɔ dɔ la. O mɔgɔw cɛma, i b’a sɔrɔ dɔw ka kan ni Masaya cikan ye. An bɛ se k’o mɔgɔw lasɔrɔ cogo di?​—⁠Mat. 10: ⁠11.

³ Dɔw bɛ ka lasɔrɔ u ka baarakɛyɔrɔ la. Hali dugu misɛnw na, jagokɛyɔrɔw bɛ yen, mɔgɔ caman bɛ u ka tile fanba kɛ yɔrɔ minnu na. Dugubaw kɔnɔ, mɔgɔ minnu bɛ baara kɛ izinibaw, walima sangasobaw la, ani mɔgɔ minnu sigilen bɛ sankanso lakɔlɔsilenbaw kɔnɔ, olu bɛ ka seereya sɔrɔ. U caman tun siɲɛ fɔlɔ don ka seereya sɔrɔ. Dɔgɔkun don labanw na, mɔgɔ minnu lasɔrɔla, k’a sɔrɔ u bɛ ka u lafiya zardɛnw kɔnɔ, walima sɛgɛnlafiyɛnyɔrɔw la, walima u bɛ ka mɔgɔ makɔnɔ mobiliw jɔyɔrɔw la, walima magansɛnw na, olu dɔw bɛ ka sɔn kibaru duman na.

⁴ Weleweledala minnu bɛ ka cɛsiri kɛrɛnkɛrɛnnenw kɛ walisa ka seereya kɛ foroba kɛnɛw la, ani jama bɛ sɔrɔ yɔrɔ minnu na, olu fana hakɛ bɛ ka caya. A daminɛ na, u tun bɛ sigasiga, wa u tun bɛ jɔrɔ bawo u tun delilen bɛ waajuli kɛcogo wɛrɛw de la, i n’a fɔ du-ni-du waajuli. O weleweledalaw bɛ ka mun fɔ sisan o ko la?

⁵ Balimakɛ dɔ min ye foro baarakɛla ŋana ye, o ko: “O ye fanga kura di ne ka cidenyabaara ma!” Balimakɛ dɔ wɛrɛ y’a fɔ ka fara a kan: “A kɛra sababu ye ne sinsinnen ka to n ka waajuli baara la.” Mɔgɔkɔrɔba tutigɛbaga dɔ y’a fɔ, ko: “A ye fanga kura di ne ma hakili ta fan fɛ, farikolo ta fan fɛ, ani alako ta fan fɛ . . . Wa, ne bɛ ka taa ɲɛ hali bi.” Weleweledala dɔ y’a jateminɛ fana ko a bɛ mɔgɔ caman sɔrɔ sisan minnu tun ma deli ka kuma Jehowa Seerew fɛ fɔlɔ. Funankɛninw fana bɛ ka u sen don o nisɔndiya baara la. Funankɛ dɔ ko: “O ka di bawo, i bɛ kuma mɔgɔ caman fɛ.” Dɔ wɛrɛ ko: “Ne ma deli ka sɛbɛn caman di mɔgɔw ma iko sisan.” Nin fɛnw bɛɛ kɛra waajulikɛyɔrɔ la min baarala siɲɛ caman.

⁶ Lakɔlɔsibaga taamakɛlaw bɛ tɔw ɲɛminɛ: Tɔn b’a dɔn ko ‘diɲɛ cogo bɛ ka yɛlɛma.’ O kosɔn, a y’a ɲini lakɔlɔsibaga taamakɛlaw fɛ, u k’u ka foro baara waati bolodacogo yɛlɛma dɔgɔkun o dɔgɔkun, walisa u ka se ka mɔgɔ caman ye ka kibaru duman fɔ u ye. (1 Kɔr. 7:31) San caman kɔnɔ, kafo lakɔlɔsibagaw ye sɔgɔmadaw bila du-ni-du baara kama, ka wuladaw bila segin-ka-bɔnyew, ani Bibulu kalanw kama. Yɔrɔ dɔw la, nafa bɛ o waati bolodacogo la hali bi. Nka, yɔrɔ dɔ wɛrɛw la, baara ɲɛnama tɛ se ka kɛ sɔgɔmada dɔw fɛ, du-ni-du baara la. O yɔrɔw la, lakɔlɔsibaga taamakɛla bɛ se k’a latigɛ ka waajuli kɛ sɔgɔma joona fɛ, butiki-ni-butiki, walima nbɛdaw la. Walima a bɛ se ka weleweledalaw tila kulu fitininw ye, walisa u ka waajuli kɛ baaradaw la minnu bɛ sangasow la, sannikɛyɔrɔw la, mobiliw jɔyɔrɔw la, walima fɛrɛkɛnɛ wɛrɛw la. Ni weleweledalaw bɛ u ka waati kɛ cogo nafama na, u bɛna se ka kuma mɔgɔ caman fɛ.

⁷ Kunnafonisɛbɛnw y’a jira ko o yɛlɛmani diyara kosɛbɛ lakɔlɔsibaga taamakɛlaw ani weleweledalaw ye. Maakɔrɔ kulu caman y’a ɲini kafo lakɔlɔsibaga fɛ, a ka weleweledala damadɔw dege waajuli kɛcogow la minnu nafa ka bon sigida la. A nafa bonyana weleweledalaw ka se ka lakɔlɔsibaga taamakɛla bilasira o waajuli kɛcogow dɔ la kelen na. Kɔfɛ, o weleweledala minnu degera, olu fana sera ka tɔw dege o baaraw la. (2 Tim. 2:⁠2) O kɛra sababu ye kibaru duman ka lase sisan mɔgɔ caman ma.

⁸ A jɛlen don ko an tɛna kafo lakɔlɔsibaga nali kɔnɔ, walisa k’o waajuli kɛcogo dɔw lajɛ. Laala, nafa ɲuman bɛ se ka kɛ nin hakililaw la, i ka waajulikɛyɔrɔ la.

⁹ Nbɛda la waajuli: N’an taara waajulikɛyɔrɔ dɔ la, sɔgɔmada fɛ, ni an ma mɔgɔ si sɔrɔ yen, an b’an yɛrɛw ɲininka tuma caman na, ko: ‘Yan mɔgɔw bɛɛ taara min?’ Mɔgɔ minnu tɛ u ka so, i b’a sɔrɔ u dɔw taara ciw la, walima sanni na. Yali i y’a lajɛ k’o mɔgɔ lasɔrɔ nbɛdaw la waajuli fɛ wa? Ni a kɛra cogo bɛnnen na, o waajuli kɛcogo bɛ se ka wolo ko duman caman na. Sanni an jɔlen ka to yɔrɔ kelen na, ni sɔn-ni-sɔn gafeninw ye an bolo, a ka fisa an ka gɛrɛ mɔgɔw la, ka baro daminɛ u fɛ ni nisɔndiya ye. Wajibi tɛ ka kuma tɛmɛbaga kelen-kelen bɛɛ fɛ. Kuma mɔgɔw fɛ minnu kɔrɔtɔlen tɛ, i n’a fɔ mɔgɔ minnu bɛ yaala-yaala butikiw ni ɲɔgɔn cɛ ka fɛnw filɛ, ani mɔgɔ minnu sigilen bɛ u ka mobili jɔlen kɔnɔ, ani minnu bɛ ka mobiliw makɔnɔ. A daminɛ na, i bɛ se k’o tigi fo ka ɲɛ, k’a lajɛ a bɛna i jaabi cogo min na. Ni a sɔnna ka kuma, e miiri la barokun min bɛ se ka diya a ye, i k’a ɲininka a k’a hakilila fɔ i ye o kan.

¹⁰ Lakɔlɔsibaga taamakɛla dɔ tun ye weleweledala wɔɔrɔ wele u ka fara ale ni a muso kan, walisa ka waajuli kɛ nbɛdaw la. Mun bɔra o la? A ko: “O sɔgɔmada diyara kosɛbɛ! An ma fɔ mɔgɔ si kɔ. An ye sɔn-ni-sɔn gafeninw bisegin, ani sɛbɛndennin caman di mɔgɔw ma. Wa, an ye baro ɲɛnama caman kɛ mɔgɔw fɛ. Weleweledala dɔ la kelen tun siɲɛ fɔlɔ don ka waajuli kɛ nbɛda la. A ko: ‘Ne bɛ tiɲɛ kɔnɔ a san caman filɛ, nka, ne tun m’a dɔn ne bɛ ka fɛn ɲuman min jɛ! Dɔgɔkun bantuma na, jɛkulu ka sɔn-ni-sɔn gafenin tɔw bɛɛ banna.”

¹¹ O kɔfɛ, o lakɔlɔsibaga taamakɛla taara bɔ jɛkulu min ye, a y’a mɛn o yɔrɔ la ko weleweledala caman tun ye waajuli kɛ sɔgɔmada joona fɛ, nbɛda la, nka ko u ma nafa bɛrɛ sɔrɔ o la. Balimamuso dɔ sera ka kuma mɔgɔ fila dɔrɔn fɛ a ka waajuli kɔnɔna bɛɛ la, bawo a ye mɔgɔ minnu kunbɛn, olu bɛɛ tun kɔrɔtɔlen don ka taa u ka baarakɛyɔrɔ la. Lakɔlɔsibaga taamakɛla y’a jira u la, k’u bɛɛ ka segin o nbɛda kelen na, nka tile kɔrɔtalen kɔfɛ. U y’o de kɛ. U tora yen fo midi waati la. Balimamuso min tun sera ka kuma mɔgɔ fila dɔrɔn fɛ sɔgɔma joona fɛ, o sera ka kuma mɔgɔ caman fɛ, a seginnen o yɔrɔ kelen na. A ye sɔn-ni-sɔn gafeninw 31, ani gafeninw 15 di mɔgɔw ma, ka mɔgɔ wulonwula tɔgɔ ni u ka ladɛrɛsi sɔrɔ, ani ka Bibulu kalan fila daminɛ. Mɔgɔ wɛrɛw ye o nafa ɲɔgɔn sɔrɔ u ka kulu la.

¹² Ni i ye mɔgɔ dɔ sɔrɔ min y’a jira ko kibaru duman ka di a ye, i k’a ɲini k’o tigi tɔgɔ, a ka ladɛrɛsi, ni a ka telefɔni nimero sɔrɔ. Sanni i ka sin ka a ɲininka o fɛnw na, i bɛ se k’a fɔ ko: “Baro diyara ne ye kosɛbɛ. An bɛ se ka taa o fɛ waati wɛrɛ la cogo jumɛn na?” Walima ɲininkali kɛ ko: “N bɛ se k’i sɔrɔ i ka so cogo di?” Mɔgɔ minnu lasɔrɔla o cogo la, u caman bɛ sɔn an ka segin ka taa bɔ u ye. Mɔgɔw minnu b’a fɛ ka na an ka lajɛw la, kunnafoniw di u ma. I jan to welesɛbɛn caman ka kɛ i bolo olu kama.

¹³ N’i kumana mɔgɔ dɔ fɛ, kibaru duman ka di min ye, nka a sigilen bɛ jɛkulu wɛrɛ ka waajulikɛyɔrɔ la, i ka kan k’o kunnafoni lase o jɛkulu ma, walisa balima dɔ ka se ka to ka taa bɔ o tigi ye. Yali nbɛda la waajuli ye fɛɛrɛ ɲuman ye walisa kibaru duman ka yiriwa i sigida la wa? N’o don, i ka san 1994 Zuluyekalo An ka Masaya Cidenyabaara (Sɛtanburukalo Kameruni ta) barokun lajɛ, n’o ye ko: “Trouvons des personnes bien disposées en prêchant dans la rue de façon efficace” (An ka mɔgɔ ŋaniya ɲumanw ɲini ka ɲɛ, an kɛtɔ ka waajuli kɛ nbɛdaw la.) O kɔfɛ, i jija ka waajuli kɛ nbɛda la, waati min na i bɛna mɔgɔ caman ye ka kuma u fɛ.

¹⁴ Ka waajuli kɛ mobiliw kɔnɔ: Don dɔ sɔgɔma, tutigɛbaga dɔw y’a latigɛ ka mɔgɔw waaju minnu tun bɛ ka mobiliba makɔnɔ lakɔliba dɔ kɛrɛ fɛ. Baro diyatuma na, mobiliba balila ka na, ka baro jɔ. Nka, tutigɛbagaw ye fɛɛrɛ sɔrɔ o la. U donna mobili kɔnɔ, ka taga a fɛ ka mobili kɔnɔmɔgɔw waaju. Mobili sera a danyɔrɔ la tuma min na, tutigɛbagaw tora a kɔnɔ walisa u ka segin u kɔ. U tagara a fɛ ka waajuli kɛ mobili kɔnɔ tuguni. U kɛlen kɔ ka taa-ni-segin caman kɛ o la, u bɛɛ lajɛlen ye nafa sɔrɔ u ka cɛsiri la. U ye sɔn-ni-sɔn gafeninw 200 di mɔgɔw ma, ka Bibulu kalanw wɔɔrɔ daminɛ. Mobili kɔnɔmɔgɔ dɔw sɔnna k’u ka ladɛrɛsi ni u ka telefɔni nimero di walisa tutigɛbagaw ka se ka taga bɔ u ye u ka so. Dɔgɔkun min dara o kan, tutigɛbagaw seginna mobili jɔyɔrɔ la, ka o ko kelen daminɛ. U ye sɔn-ni-sɔn gafeninw 164 di mɔgɔw ma, ka Bibulu kalan wɛrɛ daminɛ. Mobili jɔyɔrɔ dɔ la, mɔgɔ dɔ donna. Sigiyɔrɔ kelenpe min tun tora, o tun bɛ tutigɛbaga kɛrɛ fɛ. O tigi y’i sigi yen, ka balimakɛ lajɛ, ka yɛlɛmisɛnnin kɛ, k’a fɔ ko: “Ne b’a dɔn ko Tour de Garde dɔ b’i bolo k’a di ne ma.”

¹⁵ Weleweledala caman bɛ seereya nafama kɛ mobiliw kɔnɔ, tɛrɛnw kɔnɔ, walima awiyɔnw kɔnɔ. Ni mɔgɔ dɔ sigilen bɛ i kɛrɛ fɛ, i bɛ se ka baro daminɛ o tigi fɛ cogo di? Weleweledala dɔ min si bɛ san 12 la, a ye baro daminɛ a kɛtɔ ka Réveillez-vous! kalan mobili kɔnɔ. Npogotiginin min tun sigilen bɛ a kɛrɛ fɛ, a tun b’a fɛ o k’a ɲini k’a dɔn ale bɛ ka fɛn min kalan. A kɛra ten. Npogotiginin y’a ɲininka ko a tun bɛ ka mun kalan. Kamalenin y’a jaabi, ko a tun bɛ ka min kalan, o bɛ funankɛninw ka kunko ɲɛnabɔcogo de kan. A y’a fɔ ka fara a kan, ko o barokun ye nafa caman lase ale yɛrɛ ma, k’o tun na se ka npogotiginin fana dɛmɛ. Npogotinin sɔnna sɔn-ni-sɔn gafeninw na ni nisɔndiya ye. Funakɛnin fila wɛrɛw tun bɛ ka u ka kuma lamɛn. Olu fana ye sɔn-ni-sɔn gafeninw ɲini weleweledala fɛ. O waati la, mobili bolibaga y’i jɛgɛn sira fan kelen fɛ, k’u ɲininka walisa k’a dɔn nafa min bɛ o sɛbɛn ninnu na. A ye o dɔn tuma min na, a fana sɔnna sɔn-ni-sɔn gafeninw na. A jɛlen don ko nin kow si tun tɛna se k’a kɛ, ni sɔn-ni-sɔn gafenin caman tun tɛ kamalenin weleweledala bolo, walisa ka se k’u di mɔgɔw bɛɛ ma, minnu tun b’o fɛ.

¹⁶ Ka waajuli kɛ zardɛnw kɔnɔ, ani mobili jɔyɔrɔw la: Ka waajuli kɛ zardɛnw ani mobili jɔyɔrɔw la, o ye fɛɛrɛ ɲuman ye walisa ka mɔgɔw lasɔrɔ. Yali i y’a lajɛ ka waajuli kɛ magansɛnbaw ka mobili jɔyɔrɔw la wa? Ni taara o yɔrɔ la, i ka waati dɔ ta tuma bɛɛ ka a fan bɛɛ filɛ. Mɔgɔ ɲini min kɔrɔtɔlen tɛ, walima min bɛ ka mɔgɔ dɔ makɔnɔ mobili kɔnɔ. I ka baro dabɔ o tigi fɛ ni nisɔndiya ye. Ni baro bɛ ka taa ɲɛ, i k’i jija ka na ni o ye Masaya ko kan. I ka baara kɛ i kelen na, nka o k’a sɔrɔ weleweledala dɔ yɔrɔ man jan i la. I kana bɔrɛ girinman ta i bolo, walima ka fɛn dɔ kɛ min b’a to mɔgɔw bɛ sɔmi i ka baara la. A ka fisa i kana mɛn mobili jɔyɔrɔ kelen na. N’i ye waati kɛ yɔrɔ dɔ la, i ka taa yɔrɔ dɔ wɛrɛ la. Ni mɔgɔ dɔ t’a fɛ ka baro kɛ i fɛ, e ni o tigi ka fara bonya na. I ka taa i ka sira fɛ, ka mɔgɔ wɛrɛ ɲini, i bɛ se ka kuma min fɛ. Balimakɛ dɔ kɛtɔ ka baara kɛ o cogow la, kalo kelen kɔnɔ, a ye sɔn-ni-sɔn gafenin 90 di mɔgɔw ma, mobili jɔyɔrɔw la.

¹⁷Mɔgɔ dɔw bɛ taa zardɛnw na walisa k’u yɛrɛ lafiya. Dɔw bɛ taa yen walisa k’u ɲɛnajɛ, walima ka waati dɔ kɛ ni u denw ye. K’a sɔrɔ i ma u bali u ka kow la, i ka cogo ɲini k’u waaju. Balimakɛ dɔ ye baro daminɛ ni zardɛn kɔlɔsibaga dɔ ye. A y’a ye ko o cɛ tun jɔrɔlen bɛ dɔrɔguko la, ani a denw ka sini ko la. Cɛ ye Bibulu kalan daminɛ. O kalan tun bɛ kɛ tuma bɛɛ, wa zardɛn kɔnɔ.

¹⁸ Ka waajuli kɛ magansɛnbaw la: Mɔgɔ tɛ se ka waajuli kɛ tuma bɛɛ butiki-ni-butiki, bawo dan sigira o baara suguw la, magansɛnba dɔw la. Nka, o n’a ta o ta, weleweledala dɔw ye cogo ɲini walisa ka se ka waajuli kɛ o yɔrɔ suguw la. U bɛ taa u sigi sigilan dɔ kan, walisa mɔgɔ minnu b’u sigi yen k’u sɛgɛn lafiɲɛ, u ka se ka baro daminɛ o mɔgɔw fɛ. Ni mɔgɔ dɔ y’a jira ko a ka di a ye, u bɛ sɛbɛndennin, walima sɔn-ni-sɔn gafenin di o tigi ma sutura la, ka fɛɛrɛw tigɛ walisa ka segin ka na bɔ a ye. Ni u ye waati dɔ kɛ magansɛnba dɔ la, u bɛ taa yɔrɔ wɛrɛ la ka baro daminɛ mɔgɔ wɛrɛ fɛ. A jɛlen don ko tuma min na u bɛ seereya kɛ o kɛcogow fɛ, u b’u yɛrɛ kɔlɔsi walisa mɔgɔw kana u jateminɛ.

¹⁹ N’i ye mɔgɔ dɔ fo, baro daminɛ o tigi fɛ ni nisɔndiya ye. N’i lamɛnbaga sɔnna ka baro kɛ i fɛ, i ka ɲininkali dɔ lawuli, k’i tulomajɔ tuma min na a bɛ ka kuma. I k’a jira k’i bɛ nafa don a ka kuma na. A jira fana ko a bɛ min miiri, o nafa ka bon i bolo. Ni a bɛ se ka kɛ, sɔn a ka kuma ma.

²⁰ Balimamuso dɔ ye baro duman kɛ musokɔrɔba dɔ fɛ, a kɛtɔ k’a fɔ a ye ko fɛnw sɔngɔ gɛlɛyara kosɛbɛ. Muso sɔnna o kuma ma. O nana wolo baro ɲɛnama dɔ la. An balimamuso sera ka musokɔrɔba tɔgɔ, ani a ka ladɛrɛsi sɔrɔ, wa, o dɔgɔkun kelen na, balimamuso seginna ka taa bɔ a ye.

²¹ Ka waajuli kɛ butiki-ni-butiki: Jagokɛyɔrɔw sen bɛ waajulikɛyɔrɔw la minnu bɛ di jɛkulu dɔw ma. Balimakɛ min b’i mago don waajulikɛyɔrɔw la, o bɛ se ka karati kɛrɛnkɛrɛnnenw dilan min bɛ o jagokɛyɔrɔ kuluw jira koɲuman. A ka kan k’a jira cogo jɛlen na fana, k’o yɔrɔw ka kan ka baara a danma. Waajulikɛyɔrɔ dɔw la, jagokɛyɔrɔw bɛ se ka baara tuma min na waajuli bɛ kɛ mɔgɔw ka so. Weleweledala minnu bɛ se kosɛbɛ waajuli la, maakɔrɔw bɛ se k’a ɲini olu fɛ u ka waajuli kɛ jagokɛyɔrɔw la, walisa butiki-ni-butiki waajuli kana kɛ bolokɔfɛko ye.

²² Ni a ɲinina i fɛ ka waajuli kɛ jagokɛyɔrɔw la, k’a sɔrɔ i ma deli k’o kɛ, walisa i ka ‘jagɛlɛya’ sɔrɔ, a cogo ɲuman ye k’a daminɛ ka waajuli kɛ butiki fitinin dɔw la. N’i dara i yɛrɛ la tuma min na, i ka waajuli kɛ butikibaw la. (1 Tes. 2:⁠2) N’i bɛ ka waajuli kɛ butiki-ni-butiki, i k’i labɛn i n’a fɔ n’i bɛ taa lajɛw la Masaya So la. Ni a bɛ se k’a kɛ, i ka don butiki kɔnɔ tuma min na sannikɛla si tɛ ka feerekɛla kɔnɔ. Ɲininkali kɛ n’i bɛ se ka kuma butikitigi, walima kuntigi wɛrɛ fɛ. I ka kɛ mɔgɔ ye min nisɔn ka di, wa i kana mɛn. A kun tɛ i ka yafa ɲini u fɛ. Jagokɛla caman sigilen bɛ n’a ye mɔgɔw ka don u ka butiki kɔnɔ, ka kuma u fɛ.

²³ N’i ye jagokɛla dɔ fo, i bɛ se ka nin fɔ: Jagokɛlaw ka kow ka ca. U sɔrɔ man di u ka so. O de y’a to an nana bɔ i ye i ka jagokɛyɔrɔ la, walisa ka barokun dɔ jira i la min bɛ mɔgɔ bila ka miiri.” O kɔ, kuma fɛn kelen, walima fila kan, min bɛ o sɛbɛn kɔnɔ.

²⁴ Walima i bɛ se ka nin fɔ ni i bɛ kuma butikitigi dɔ fɛ: “Ne y’a kɔlɔsi ko jagokɛlaw b’a fɛ u ka ladɔnniya ka ɲɛ. Nin Tour de Garde (walima Réveillez-vous!) nimero laban bɛ kuma barokun dɔ kan, min bɛ an kelen-kelen bɛɛ kun kan.” A jira mun de don. I bɛna i ka kuma kuncɛ tuma min na, a fɔ ko: “An dalen b’a la ko i bɛna nisɔndiya sɔrɔ a kalanni na.”

²⁵ Ni baarakɛlaw bɛ o yɔrɔ la, wa, n’a bɛnnen don, i bɛ se ka nin fɔ ka fara a kan: “Yali i bɛ sɔn ne ka o kuma kunkurunnin ɲɔgɔn fɔ i ka baarakɛlaw ye wa?” Ni yamaruya dira i ma, i hakili to a la k’i ye layidu ta k’i tɛ mɛn. Baarakɛlaw ka ɲɛmɔgɔ sigilen bɛ n’a ye i k’i ka kuma labato. Ni baarakɛla dɔw y’a daminɛ ka baro kuntaala janya, a ka fisa i ka taa bɔ u ye u ka so .

²⁶ Dugu fitinin dɔ la, weleweledala damadɔw tugura kafo lakɔlɔsibaga kɔ, walisa ka waajuli kɛ butiki-ni-butiki. A daminɛ na, o weleweledala dɔw tun bɛ siran bawo u tun ma deli k’o kɛ. Nka, u ka siran bɔra u la joona, fo u y’a daminɛ ka nisɔndiya sɔrɔ o baara la. Sanni lɛrɛ kelen ka se, u tun ye sɔn-ni-sɔn gafenin 24, ani gafenin 4 di mɔgɔw ma. Balimakɛ dɔ y’a fɔ ko tuma caman na, u tun tɛ se ka kuma mɔgɔ caman fɛ, kalo kelen kɔnɔ, du-ni-du baara la, i n’a fɔ u sera k’o kɛ cogo min na butiki-ni-butiki baara la, nin waati kuntaala surun ɲɔgɔn kɔnɔ.

²⁷ An ka miiri ka fɛɛrɛw sɔrɔ walisa ka waajuli kɛ: Yesu tun ma a ka waajuli dan kɛcogo kelen dɔrɔn ma. A tun bɛ se ka kibaru duman jɛnsɛn tuma o tuma, Yesu y’o kɛ o tumaw na. (Mat. 9:9; Luk. 19:​1-10; Yuh 4:​6-15) Weleweledala dɔw ye fɛɛrɛ minnu sɔrɔ walisa ka waajuli kɛ, olu filɛ.

²⁸ Dɔw y’a kɛ u delinako ye ka bangebagaw waaju tuma min na u b’u denw kɔnɔ lakɔliso donda la. Ikomi bangebaga caman bɛna sanga 20 ɲɔgɔn sanni lakɔli ka jigin, waati bɛ sɔrɔ ka baro daminɛ u fɛ Bibulu barokun dɔ kan, min bɛ dusu don u kɔnɔ.

²⁹ Barokun kɛrɛnkɛrɛnnen dɔw bɛ ɲɛfɔ an ka sɔn-ni-sɔn gafeninw kɔnɔ, minnu ɲɛsinnen bɛ mɔgɔ kɛrɛnkɛrɛnnen dɔw ma. O la sa, tutigɛbaga caman b’u jija ka se k’o mɔgɔw lasɔrɔ. Misali la, an balimamuso dɔ taara bɔ lakɔliso wɔɔrɔ la minnu bɛ a ka jɛkulu waajulikɛyɔrɔ kɔnɔ. A taara ni Desanburukalo tile 22, san 1995 Réveillez-vous! ye a bolo, n’o tun bɛ “l’école en crise” kan (lakɔli gɛlɛyaw). O diyara o mɔgɔw ye kosɛbɛ. A taara bɔ fana “Service d’aide social’’ la, n’o ye baarakɛyɔrɔ ye min bɛ mɔgɔw ni denbayaw dɛmɛ. Sɔn-ni-sɔn gafenin minnu tun bɛ kuma denbaya kan, ani tɔɔrɔw kan, tɔɔrɔ minnu bɛ da denmisɛnninw kan, a ye olu ta a bolo. O mɔgɔw y’a fɔ a ye ko a ka segin ka na ni sɔn-ni-sɔn gafenin nataw ye minnu bɛ kuma o fɛn suguw kan. A taara ni san 1996 Marisikalo tile 8 Réveillez-vous ye baarakɛda la min bɛ mɔgɔw ka baarako ɲɛnabɔ. A y’a fɔ ko a ye nafa sɔrɔ yen “min ɲɔgɔn tɛ.”

³⁰ Kafoba lakɔlɔsibaga y’a fɔ ko ale ni a muso bɛ deli ka senfɛ seereya kɛ, tuma min na u bɛ taa sanni kɛ. U b’o kɛ tuma min na mɔgɔw man ca magansɛn kɔnɔ, ni sannikɛlaw bɛ k’u yaala-yaala dɔɔnin dɔɔnin butiki kɔnɔ. U y’a jira ko u ye baro ɲɛnama caman sɔrɔ o senfɛ.

³¹ Weleweledala caman ye nafa sɔrɔ u kɛtɔ ka waajuli kɛ foroba finikoyɔrɔw la. Tuma min na mɔgɔ si tɛ yen, u tɛ sɛbɛnw bila dɔrɔn k’u kɔdon. U kuntilenna ye ka kibaru duman lase mɔgɔw ma. O kosɔn, u b’u jija ka na waati la, tuma min u bɛ se ka kuma o yɔrɔ mɔgɔw fɛ.

³² Yɔrɔ dɔw la, yamaruya bɛ di weleweledala ɲɛnatɔmɛnen dɔw ma u ka waajuli kɛ awiyɔn jiginyɔrɔw la. Tuma dɔ la, o weleweledalaw bɛ nisɔndiya sɔrɔ ka taamakɛlaw waaju minnu bɛ bɔ diɲɛ fan bɛɛ la, ni u sigilen bɛ yɔrɔw la fana, Jehowa Seerew man ca yɔrɔ minnu na. Ni olu dɔw y’a jira ko kibaru duman ka di u ye, weleweledalaw bɛ sɛbɛndennin, walima sɔn-ni-sɔn gafeninw di u ma.

³³ Jɛkulu waajulikɛyɔrɔ kɔnɔ, sangasoba dɔw kɔlɔsilen bɛ kosɛbɛ. Ni weleweledalaw ma yamaruya sɔrɔ ka don k’o mɔgɔw waaju, u dɔw b’a kɛ u delinako ye ka kuma garidiyɛnw fɛ minnu bɛ baara la o donw na, walima ka kuma o yɔrɔw ɲɛmɔgɔw fɛ. U bɛ o ko kelen de kɛ ni u taara sow la minnu da tɛ dayɛlɛ mɔgɔ wɛrɛw ye. Kafoba lakɔlɔsibaga ni weleweledala damadɔw ye o de kɛ, o yɔrɔ sugu wulonwula la. A yɔrɔ kelen-kelen bɛɛ la, u y’a fɔ o yɔrɔ ɲɛmɔgɔ ye ko ni yamuruya tɛ u bolo ka kuma sokɔnɔmɔgɔw fɛ, u t’a fɛ ɲɛmɔgɔ ka kunnafoni jɛ min bɛ an ka sɛbɛn labanw kɔnɔ. Ɲɛmɔgɔ minnu tun bɛ o yɔrɔ wulonwula la, olu sɔnna sɔn-ni-sɔn gafeninw na. U y’a ɲini weleweledalaw fɛ, u ka na nimero nataw di u ma. Mɔgɔ minnu sigilen bɛ o so sugu kɔnɔ, olu bɛ lasɔrɔ telefɔni de fɛ. Feburuyekalo san 2001 An ka Masaya Cidenyabaara farankan kɔnɔ, i bɛ kunnafoniw sɔrɔ telefɔni seereya kɛcogo kan.

³⁴ I jija ka waajuli kɛ yɔrɔ bɛɛ la: Walisa ka an ka ɲɛnamaya kɛ ka bɛn an ka yɛrɛdi ma, an ka kan k’a dɔn ko Masaya cikan min dira an ma ka weleweleda, k’o ye kɔrɔtɔko ye. O tɛ se ka bila ka sumaya. O la sa, waati min ka fisa an yɛrɛbakun ma, an ka kan ka o bila kɛrɛfɛ, walisa ka mɔgɔw lasɔrɔ waati la min bɛnnen bɛ u ma. O kun ye, ‘cogo bɛɛ la, an ka se ka dɔw kisi.’ Jehowa ka baarakɛla minnu bɛɛ ye u yɛrɛdi a ma, olu bɛ se k’a fɔ iko Pol ko: ‘Ne bɛ fɛn bɛɛ kɛ kibaru duman kosɔn walisa ne ka niyɔrɔ sɔrɔ a la tɔw fɛ.’1 Kɔr. 9:​22, 23.

³⁵ Pol y’a sɛbɛn kɔfɛ ko: ‘Ne bɛ sɔn ka ne yɛrɛ bonya ne ka barikantanyakow la ka tɛmɛ fɛnw bɛɛ kan, walisa Krista ka sebagaya ka to ne kan . . . Ne ye barikanta ye tuma min na, o tuma de la ne barika bɛ bonya.’ (2 Kɔr. 12:​9, 10) Fɔcogo wɛrɛ la, an si tɛ se k’o baara kɛ ni an yɛrɛ fanga ye. An mago b’a la ka Jehowa deli walisa ka a ka hakili senu barikaman sɔrɔ. Ni an bɛ Ala deli walisa ka fanga sɔrɔ, an bɛ se ka da a la ko a bɛna an ka deliliw jaabi. O la sa, kanuya min b’an na ka ɲɛsin mɔgɔw ma, o kanuya bɛna an bila ka fɛɛrɛw ɲini walisa ka kibaru duman fɔ u ye, u bɛ se ka sɔrɔ yɔrɔ o yɔrɔ la. Hakilila minnu bɛ nin farankan kɔnɔ, mun na an tɛna u dɔ la kelen lajɛ an ka waajuli la, dɔgɔkun nata la?

ALA-KA-MARAKO KIBARUYAW

San 2002, Marisikalo kɛra ɲɛtaa ye farafinna kɔrɔn fɛ jamanaw, ani a cɛmancɛ jamanaw fɛ, i n’a fɔ a jiralen bɛ cogo min na.

◼ Benɛn jamana: Nin ye a siɲɛ tan ni seegin ye dɔ bɛ ka fara u ka ɲɛtaa kan. U hakɛ sera weleweledala 6726 ma.

◼ Burukina Faso: U mɔgɔ 177 tun ye tutigɛbaga farankanw ye. Ɲinan Marisikalo tutigɛbaga farankanw hakɛ cayara ka tɛmɛ salon Marisikalo tutigɛbagaw hakɛ kan, siɲɛ fila ni tila. Mɔgɔw minnu nana Yesu ka saya Hakilijigin na, olu hakɛ tun ye 3225 ye. U cayara ni weleweledalaw hakɛ ye, siɲɛ saba.

◼ Kameruni jamana: Nin y’a siɲɛ naani ye, dɔ bɛ ka fara u ka ɲɛtaa kan nin yɔrɔw ko la: Sɛbɛn minnu bɛ jɛnsɛn foro kɔnɔ, sɔn-ni-sɔn gafenin minnu bɛ bila mɔgɔw bolo, segin-ka-bɔnyew ni Bibulu kalan minnu bɛ kɛ. Dɔ bɛ ka fara olu kelen kelen bɛɛ hakɛ kan. Tutigɛbaga farankanw hakɛ yɛlɛla fana. U mɔgɔ kɛmɛ o kɛmɛ la, 260 farala u kan, n’i y’o suma ni salon hakɛ ye, o kalo kelen na.

◼ Gine Ɛkiwatoriyali: U kɛra weleweledala mɔgɔ 779 ye. O kɔrɔ ye ko salon Marisikalo la, weleweledala kɛmɛ o kɛmɛ la, 11 farala u hakɛ kan ɲinan. Bibulu kalan hakɛ kɛra 2428 ye. O ɲɔgɔn tun ma deli ka sɔrɔ. O ye ko Bibulu kalan kɛmɛ o kɛmɛ na, 20 farala salon hakɛ kan. Mɔgɔ minnu nana Yesu ka saya Hakilijigin na, olu tun ye 4114 ye.

◼ Gabɔn: Gafe 2926 dira foro kɔnɔ. O ɲɔgɔn tun ma deli ka kɛ.

◼ Gine Bisawo: Bibulu kalan ye ɲɛtaa sɔrɔ ka se 479 ma.

◼ Mali: Bibulu kalan ye ɲɛtaa kura sɔrɔ ka se 520 ma.

◼ Nizɛri: Sɔn-ni-sɔn gafe dili ye ɲɛtaa kura sɔrɔ foro kɔnɔ. Mɔgɔ 1260 nana Yesu ka saya Hakilijigin na. O ka ca ni salon hakilijigin ta ye. Kɛmɛ o kɛmɛ la, 16 farala u kan.

◼ Senegali: Dɔ farala weleweledalaw hakɛ kan kokura ka se 951 ma. Marisikalo tile 17, Fatiki jɛkulu weleweledala 16 nisɔndiyalenw ye mɔgɔ 132 kunbɛn u ka Masaya So dayɛlɛli ɲɛnajɛ la. Dakar, Pikini ni Gediyawayi jɛkuluw weleweledalaw mɔgɔ 104 nisɔndiyalenw ye mɔgɔ 318 kunbɛn u ka Masaya So dayɛlɛli ɲɛnajɛ la, Awirili kalo tile 21 la.

◼ Togo: Nin ye a siɲɛ fɔlɔ ye weleweledalaw hakɛ tɛmɛna 12000 kan. Weleweledala ye 12249 hakɛ sɔrɔ. O ɲɔgɔn ma deli ka kɛ. O ye ko kɛmɛ o kɛmɛ la, 6 farala u hakɛ kan. Ɲɛtaa kɛra yɔrɔ 11 na. Gafe minnu dira foro kɔnɔ, lɛri minnu kɛra waajuli la, sɔn-ni-sɔn gafenin minnu dira foro kɔnɔ, segin-ka-bɔnyew ani Bibulu kalan minnu kɛra, olu bɛɛ lajɛlen sen bɛ o la. Tutigɛbaga farankanw bɛɛ lajɛlen fana kɛra 3452 ye. Weleweledalaw kɛmɛ o kɛmɛ la, 35 tun ye waati dafalen baara suguya dɔ kɛ Marisikalo la. O nana ni nisɔndiyaba, ani cɛsiriba ye jɛkuluw kɔnɔ. Jɛkulu caman kɔnɔ, weleweledala kɛmɛ o kɛmɛ la, weleweledala 50, walima 50 ni kɔ, tun kɛra tutigɛbaga farankan ye. Marisikalo tile 28 don, an balimaw minnu bɛ Togo jamana la, olu nisɔndiyalen ye mɔgɔ 47545 kunbɛn Yesu ka saya Hakilijigin don na. O mɔgɔw bɛɛ lajɛlen hakɛ tun ka ca ni weleweledalaw hakɛ ye siɲɛ naani ɲɔgɔn.