Ɲininkaliw Jaabi
◼ N’an bɛ taa bɔ mɔgɔw ye tuma o tuma, yali an ka kan k’u hakili jigin k’an bɛ sɔn u ka bolomafara la walasa ka diɲɛ bɛɛ wajuli baara kɔkɔrɔdon wa?
Ayi. Ameriki jamana na, An ka Masaya Cidenyabaara barokun dɔ bɔra san 1990 Zuluyekalo la, n’o tɔgɔ tun ye “Baara kɛ ni sɛbɛnw ye hakilitigiya sira la” (angilɛkan na). A ko: “Ko damadɔw la, a bɛ se ka gɛlɛya k’i da se bolomafaraw ma minnu b’a to an ka baara bɛ se ka kɛ.” A bɛnnen don an ka faamuyali ɲuman sɔrɔ o ko la. An b’a fɛ mɔgɔw k’a faamu ko an bɛ Bibulu kalan baara de la, ko an tɛ jago la. An t’a ɲini ka bolomafaraw dalajɛ.
Siɲɛ fɔlɔ min na an bɛ sɛbɛnw to mɔgɔ bolo min b’a fɛ k’u kalan, a ka ɲi an k’a ɲɛfɔ o tigi ye k’a jɛya k’an ka baara kɔkɔrɔdonnen don ni bolomafaraw ye. An bɛn’an janto o yɔrɔ la n’an b’an hakili to a la k’an tɛ sɛbɛnw to mɔgɔ si bolo fo n’a kɛra mɔgɔ ye min b’a mago don u la, walima n’a nege bɛ min na, k’u kalan.
Mɔgɔ minnu ye mago jira kɛ ka ɲɛsin cikan ma, olu caman b’a bɔ u yɛrɛw la ka bolomafaraw di an ka kɔfɛ segin-ka-bɔnyew la. A bɛ se ka kɛ ko dɔw b’an ɲininka sɛbɛn dɔ sɔngɔ la. Kuma surun na, an bɛ se k’a ɲɛfɔ k’an ka baara tɛ jago baara ye, ka tila k’a jira u la ko mɔgɔ minnu b’a fɛ k’an ka sɛbɛnw kɔnɔkow dɔn, k’an tɛ sɔngɔ fɔ u la. An bɛ se k’u ladɔnniya fana ko mɔgɔ min b’a fɛ ka diɲɛ bɛɛ baara in kɔkɔrɔdon, ko a bɛ se ka bolomafara dɔ di. Waati ni waati, ka kɛɲɛ ni kow ye, n’a y’a sɔrɔ segin-ka-bɔnye dɔ senfɛ mɔgɔ ma bolomafara di, an bɛ se ka hakililajigin kɛ an ka diɲɛ bɛɛ wajuli baara kɔkɔrɔdoncogo la.
Mɔgɔ minnu bɛ mago jira kɛ ka ɲɛsin an ka cikan ma, hali n’an bɛ sɛbɛnw to u bolo k’a sɔrɔ an ma sɔngɔ fɔ u la, o bɛɛ n’a ta, an k’an hakili to a la ko an ka sɛbɛnw dilanni n’u jɛnsɛnni tɛ taa wari kɔ. An dalen b’a la ko Ala ka hakili senu bɛna a ka baarakɛlaw n’an ka wajulikɛyɔrɔ magojirabagaw bila ka bolomafaraw di walasa an ka diɲɛ bɛɛ wajuli baara kɔnɔkow bɛɛ bɛ na ni musaka minnu ye, olu ka se ka kɛ.
◼ Ni dɔ ye bolomafaraba di, yali diyagoya don an ka dɔ fara a ka sɛbɛnw kan wa?
Wajibi t’o ye. An ka faamuyali ɲuman sɔrɔ o ko la. Mɔgɔ bɛ mago min don sɛbɛnw kalanni na, an k’o jateminɛ. Kɔfɛ bɔnyew sen fɛ, an bɛ se ka sɛbɛnw di a ma, a mago bɛ minnu na kɛrɛnkɛrɛnnenya la. N’o tigilamɔgɔ y’a bɔ a yɛrɛ la ka bolomafara wɛrɛ di, an bɛ se ka sɔn o la ni bonya ye. An k’an hakili to a la ko bolomafaraw bɛ an ka diɲɛ bɛɛ wajuli baara kɔnɔkow bɛɛ de kɔkɔrɔdon; Bibulu sɛbɛnw dilanni ni sow jɔli b’o la, ka fara tungafɛcidenw ni tutigɛbaga kɛrɛnkɛrɛnnenw ka baara kan.
◼ Bolomafara buwatiw dabɔra baara kɔkɔrɔdonni kama, baara min ɲɛsinnen bɛ Bibuluw dilanni, u jɛnsɛnni, ni mɔgɔw kalanni ma. O la sa, n’an bɛ sɛbɛnw ta tuma min na, n’an bɛ bolomafara di, ani ni wajuli la fana, mɔgɔw bɛ bolomafaraw di, n’an bɛ tila k’u bila buwatiw kɔnɔ, yali o tɛ bolomafara diko fila ye wa?
Ayi. Bolomafara minnu bɛ bila buwatiw kɔnɔ, buwati minnu dabɔra baara kɔkɔrɔdonni kama, n’o baara ye Bibuluw dilanni, u jɛnsɛnni ani mɔgɔw kalanni ye, olu tɛ di sɛbɛnw dama kama. Weleweledalaw ani mɔgɔ minnu b’u mago don ni kɔnɔnajɛya ye tiɲɛ kuma na, olu bɛ sɛbɛnw sɔrɔ k’a sɔrɔ sɔngɔ ma fɔ u la.
Ni weleweledalaw bɛ wari bila tuma min na buwatiw kɔnɔ, u b’u ta de kɛ walasa Bɛtɛl labɛnnen ka to tuma bɛɛ ani kalan sugu caman ka se ka kɛ, i n’a fɔ tungafɛcidenw ka kalan. O wari bɛ kɛ sababu ye fana walasa ka tungafɛcidenw ni lakɔlɔsibaga taamakɛlaw ka musakaw kɛ. O b’a to fana fɛn nafama wɛrɛw ka kɛ walasa Yesu ye baara min kalifa a ka kalandenw ma, o baara ka se ka kɛ ka dafa. Bibuluw ni sɛbɛn wɛrɛw dilanni ye ko fitinin dɔrɔn de ye musakaw la.
O la sa, ni ŋaniya ɲuman tigiw ye bolomafaraw di an ma wajuli la, an man kan k’a fɔ k’o ye “sɛbɛnw ta” ye. Ɔwɔ, an k’a fɔ u ye ko mɔgɔ minnu b’a fɛ ni kɔnɔnajɛya ye k’an ka sɛbɛnw kalan, k’an bɛ u to u bolo k’a sɔrɔ an ma sɔngɔ fɔ u la. An ka diɲɛ bɛɛ baara bɛ na ni musaka minnu ye, bolomafara bɛɛ bɛ don o dafɛ. Weleweledalaw ka bolomafaraw fana bɛ kɛ o cogo kelen na.