An ka kɛ karamɔgɔw ye, an tɛ weleweledalaw dama ye
1 Kɔlɔsili kɛra a kan ko “Jehowa Seerew ye dugukolo mumɛ bɛɛ fa n’u ka waajuli ye, a kɔrɔjɛ la”. U sera k’o kɛ cogo di? O ma kɛ ni hadamaden barika walima n’a ka setigiya ye, nka o kɛra ni Ala ka hakili senu walekɛbaatɔ ye a ka magankɛlaw la, u kɛtɔ ka fɛɛrɛw sugu caman tigɛ ka baara kɛ n’u ye walisa k’u ka ci dafa, waajuli ani mɔgɔw kalanni na.—Zak. 4:6; Kɛwalew 1:8.
2 Sɛbɛnw ye fɛɛrɛ nafaman ye walisa k’an ka waajuli baara kɛ. San caman kɔnɔ, kitabuw, kitabuninw, gafeninw, sɔn-ni-sɔn gafeninw, ani sɛbɛndenninw miliyari caman de bɔra ani ka jɛnsɛn Jehowa Seerew fɛ walisa ka dɛmɛ don, Masaya kibaru duman ka dɔn. Jate minnu bɛ 1997 Annuaire kɔnɔ, u b’a jira ko sɛbɛn minnu bɔra u ye hakɛ sɔrɔ minnu tun ma deli ka sɔrɔ. An bɛ don min na bi, Traduction du monde nouveau sɛbɛn minnu bɔra, u ka ca ni miliyɔn 91 ye. San kelen kɔnɔ, La Tour de Garde ni Réveillez-vous! sɛbɛn minnu bɔra Ameriki jamana la, kɛmɛ o kɛmɛ la, 7,1 farala o hakɛ kan. Aliman jamana na, sɔn-ni-sɔn gafenin kɛmɛ o kɛmɛ, 35 farala o bɔli hakɛ kan. Gafenin minnu bɔra o yɔrɔ la, o tilayɔrɔ sabanan tun ye Irisikan mɔgɔw ta ye.
3 Munna nafa bɛ nin sɛbɛnw camanba sugu la? Dugukolo fan bɛɛ la, dusulaminba tun dira an bɛɛ ma, ka seereya kɛ mɔgɔw ye, u bɛ sɔrɔ yɔrɔ o yɔrɔ la. An camanba bɛ dɔ fara an ka seereya baarakɛyɔrɔw kan—jama yɔrɔw la, siraw kan, ani jagokɛyɔrɔw la—sɛbɛn hakɛba de tɔra mɔgɔw bolo minnu bɛ mago dɔ jira. O mɔgɔ ninnu caman ma deli ka Masaya cikan mɛn. Walisa k’o mago wasa, jɛkuluw bɛ sɛbɛnw sugu caman bila u kɔrɔ walisa ka baara kɛ n’u ye cidenyabaara kɔnɔfɛnw bɛɛ la.
4 An kuntilenna ye mun ye Sɛbɛnw jɛnsɛnni na? An kuntilenna tɛ ka sɛbɛnw bila mɔgɔw bolo dɔrɔn. Ci min ye ka kalandenw kɛ, o kɔnɔfɛn ye fila ye—ka weleweledali kɛ ani ka mɔgɔw kalan. A fɔlɔ ye ko bonya b’an bolo ka Masaya kibaru duman waajuli kɛ, ka mɔgɔ bila u k’a dɔn k’o kelenpe de ye hadamadenw jigiya ye. (Mat. 10:7; 24:14) An ka sɛbɛn minnu sinsinen bɛ Bibulu kan, u jirala kaban ka kɛ fɛɛrɛ ɲɛkoma ye walisa ka mɔgɔ mago ɲaga ani ka Masaya dɔnniya di u ma.
5 A filanan ye ko n’an bɛna kalandenw kɛ, an ka kan k’u kalan Yesu ka ci fɔlenw bɛɛ la. (Mat. 11:1; 28:19, 20) O yɔrɔ la fana, sɛbɛnw bɛ ni ɲɛciba de ye walisa ka tiɲɛ don kalandenw dusukunw na, k’u dɛmɛ ka kɛ Yesu ka kalandenw ye.
6 Minnu bɛ sɔn sɛbɛnw na, u bɛ se ka kɛ ‘kuma lamɛnbagaw’ ye, nka u tɛna kɛ kɛbagaw ye ni mɔgɔ si tɛ u dɛmɛ. (Yak. 1:22-25) Caman tɛna kɛ abada kalandenw ye fo ni mɔgɔ dɔ y’u dɛmɛ. (Kɛw. 8:30, 31) U mago bɛ karamɔgɔ dɔ la min b’u dɛmɛ ka Sɛbɛnniw ka tiɲɛ darula jira u la. (Kɛw. 17:2, 3) An kuntilenna ye k’u dɛmɛ ka taa ɲɛ fo u ka se k’u yɛrɛlatɛmɛ, ka batise ani k’u dege ka kɛ karamɔgɔ dafalenw ye minnu bɛna mɔgɔ wɛrɛw kalan.—2 Tim. 2:2.
7 Magoba jɔra karamɔgɔ caman na: N’an bɛ waajuli kɛ, an bɛ kibaru duman fɔ kɛnɛ na. Nka, mɔgɔ kalan kɔrɔ ye ka sennawale kalan kɛ a kun. K’a sɔrɔ waajuli b’a to tɔw bɛ bɔ Masaya cikan kala ma, kalanni bɛ mɔgɔw dɛmɛ ka sɔn kibaru duman ma ani k’a waleya. (Luka 8:15) Karamɔgɔ tɛ dan ka weleweledali kɛ; a bɛ ɲɛfɔli kɛ, ka hakilijakabɔ kɛ ni dalilu ɲumanw ye, ka seereyaw di ani ka mɔgɔ bila ka da a la.
8 N’a bɛ se ka kɛ, an camanba ka kan ka kɛ karamɔgɔw ye, an kana dan ka kɛ weleweledalaw ye. (Heb. 5:12a) Ka sɛbɛnw jɛnsɛn o y’an ka baara yɔrɔ koloman dɔ ye, nka k’an ka cidenyabaara kuntilenna filanan sɔrɔ, an bɛ min kɛ an ka karamɔgɔya la, a bɛ bɔ o de kɔnɔ. An bɛ se k’an nisɔndiya n’an sera ka sɛbɛnw bila, nka walisa k’an ka cidenyabaara kɛ k’a dafa, an man kan ka sɛbɛnw bilali mafilɛ iko an kuntilenna laban. (2 Tim. 4:5) Sɛbɛnw bilali ye an ka baara yɔrɔ nafaman dɔ ye min bɛ sira dayɛlɛ ka tiɲɛ kalan kɛ tɔw kun.
9 Aw ka segin-ka-bɔnye kɛ walisa ka Bibulu kalanw daminɛ: An bɛɛ delila ka gafew, gafeninw, ani sɔn-ni-sɔn gafeninw bila ani ka segin-ka-bɔnyew tɔgɔta sɛbɛn dɔ dilan. An ka kan ka waati basigilen dɔ boloda walisa ka segin ka na mago ɲaga kɛ. Tuma min na an bɛ segin ka na u fɛ, an kuntilennaba tɛ ka dɔ fara u ka sɛbɛnw kan, nka k’u dusulamin walisa fɛn min b’u bolo ka ban, u k’o kalan ani ka nafa sɔrɔ o la. Yali an yɛrɛw tun na se ka ɲɛtaa sɔrɔ alako ta fan fɛ, ni mɔgɔ dɔ tun ma segin ka na siɲɛ caman walisa k’an dɛmɛ ka dɔnniya jɔnjɔn sɔrɔ wa?—Yuhana 17:3.
10 An ka mago bɛɛ nɔbɔ k’an hakili to a la ka Bibulu kalan daminɛ ni Ala bɛ mun wajibiya an ma? gafenin ye, wala ni La Connaissance qui mène à la vie éternelle gafe ye. O sɛbɛnw fila ninnu bɛ Masaya cikan jira cogo la, min faamuya ka nɔgɔn. Bibulu kalansira kolomanw kalan dafalen bɛ Wajibiya gafenin kɔnɔ. La Connaissance gafe b’a to an ka se ka tiɲɛ kalan kɛ tɔw kun cogo pereperelatigɛlen na, ani ni nɔgɔya ani jɛya ye, ani k’a surunya.
11 Iko a ɲɛfɔra cogo min na san 1996 Zuwɛnkalo Ministère du Royaume farankan kɔnɔ, kalan bolodali nɔgɔn bɛ nɔgɔya don karamɔgɔ ka mɔgɔ kalan la ani kalanden ka degeli la. Aw k’o farankan in sɛbɛn mara aw bolo kɔrɔ walisa ka kalan kɛcogow an’a fɛɛrɛw lajɛ, o minnu nɔ ɲumanw yera. A bɛ hakilila minnu dɔw di, u filɛ: an bɛ se k’an mago don cogo kɛrɛnkɛrɛnnen na kalanden na cogo min; kalan hakɛ min ka kan ka kɛ siɲɛ kelen kɔnɔ; ɲininkali minnu ni barokun tɛ ɲɔgɔn ɲɛ sira la, olu ko bɛ minɛ cogo min na; karamɔgɔ ni kalanden fila bɛɛ bɛ se k’u labɛn cogo min sanni kalan ka kɛ; ani kalanden bɛ ɲɛsin Jehowa ka jamakulu ma cogo min. N’an tugura o hakililaw la, an caman, kuraw sen b’o la, bɛna se ka sennawale kalanw ɲɛminɛ.
12 Dantigɛlisɛbɛn ɲumanw ka bɔ foro kɔnɔ: Wajibiya gafenin ani Connaissance gafe jirala ka kɛ dɛmɛ nafamaw ye kalan na ka ɲɛsin kalandenw kɛli cogo teliman ma. Bolivi jamana na, an balimakɛ dɔ kɛlen kɔ ka Wajibiya gafenin sɔrɔ dɔrɔn, a y’a ta ka kalan daminɛ ni cɛ dɔ ye. Kalo naani o kɔfɛ, kafo kulu lajɛba la, o kalanden tun bɛ batɛmu ɲinibaga hɛrɛlenw cɛma.
13 Caman dusukun y’u bila k’u yɛrɛlatɛmɛ u kɛlen kɔ k’u ka Connaissance gafe kalan ban. Angola jɛkulu dɔ kɔnɔ, Bibulu kalan minnu ɲɛminɛna weleweledalaw fɛ, o hakɛ bonyara, ka bɔ mɔgɔ 190 la ka na mɔgɔ 260 la, ani lajɛ matarafali mɔgɔw hakɛ mafila la, ka bɔ mɔgɔ 180 na ka na mɔgɔ 360 la, kalo naani dɔrɔn Connaissance gafe bɔli kɔfɛ o jamana in na. Dɔɔnin dɔrɔn o kɔfɛ, mago jɔra jɛkulu kura sigili la.
14 A kɛlen kɔfɛ k’a ka kalan kun fɔlɔ daminɛ Connaissance gafe kan, balimakɛ dɔ ko, ka kalan ɲɛminɛ o kan, o ka “nɔgɔn ni kalan ɲɛminɛbaga bɛ ɲininkaliw dɔrɔn kɛ, ka sɛbɛnniw waleyata dɔw kalan, ani k’a kɔlɔsi ni kalanden y’a faamu.” A tun y’a miiri tuma bɛɛ ko weleweledala senkoyalen dɔw dama de tun bɛ se ka sennawale Bibulu kalan ɲɛminɛ, ani ko ale tun tɛna se abada k’o kɛ. Nka a nana a faamu k’a tun na se, a kɛtɔ ka fɔ: “Ni ne bɛ se, bɛɛ bɛ se”.
15 N’an bɛ Bibulu kalanw ɲɛminɛ i n’a fɔ an ka cidenyabaara kɔnɔfɛn dɔ, an na kalandenw kɛli kuntilenna sɔrɔ. Mɔgɔ minnu y’u seko bonya nin cidenyabaara ɲɛ in na, tiɲɛ na, u bɛ wasa ni barajiba diya bɔ. A ka se ka fɔ an ko la, k’an fana bɛ “Ala ka masaya ko waajuli kɛ ka mɔgɔw kalan Matigi Yesu Krista ko la ni ja gɛlɛya ye.”—Kɛw. 28:31.