An ka Jehowa ka bato kɛyɔrɔ bonya
1 N’an welela dɔ bara tuma min na, an b’a jira k’an b’a bolofɛnw bonya n’an tɛ fɛn kɛ min b’u tiɲɛ, ani n’an tɛ yɛlɛma don du ka laada ɲumanw na. Yali o man kan ka kɛ tiɲɛ ye fo ka tɛmɛ o kan, n’an bɛ Jehowa ka so kɔnɔ tuma min na wa? An ka kan k’an taama cogo dɔn a ka so kɔnɔ (Zab. 15:1; 1 Tim. 3:15). An ka Krecɛn lajɛw mana kɛ Masaya So kɔnɔ wo, wala du dɔ kɔnɔ wo, wala foroba so dɔ kɔnɔ wo, anw na mɔgɔ fanba bɛ bonya jira tuma bɛɛ, bonya min bɛnnen don Jehowa ka so ma, ale min “nɔɔrɔ bɛ dugukolo ni sankolo san fɛ”.—Zab. 148:13.
2 Lajɛw kɛ tuma la, balima dɔw tɛ bonyaba jira; u bɛ mankan ci, ani u b’a kɛ i n’a fɔ nafa tɛ kalan ɲɛfɔtɔ la. Baliku dɔw b’u ta baro ɲɛkontan fɛ donda la, wala bulon kɔnɔ, wala ɲɛgɛn da la, wala Masaya So kɔfɛ k’a sɔrɔ lajɛ daminɛna kaban. Denmisɛn dɔ mana bila k’a hakili to a dɔgɔnin na, tuma dɔw la u b’a kɛ tulon kɛ ye, wa u tɛ nafa bɛrɛ sɔrɔ kalan na. Denmisɛn dɔw yera tulon kɛ la Masaya So kɔkanna na, lajɛ bannen kɔfɛ, ka mankanba ci, ani ka karate ladege yɛrɛ kɛ u ni ɲɔgɔn cɛ. Tuma dɔw la, u ye sigiɲɔgɔnw tɔɔrɔ, ani ka bolifɛnw degun u jɔyɔrɔ la walima siraba kan.
3 An kana kɛ bonyabaliw ye tun: N’an b’an ka bato ka nɔɔrɔ n’a ka senuya faamu, an tɛ sɔn cogo si la ka mɔgɔw hakili ɲagami ni dogodogoninkuma ye, wala ni dumuni ye, wala ni singɔmu ɲimi ye, wala ni sɛbɛn fura mɔrɔmɔrɔli ye, wala ni taa ka segin ɲɛkontanw ye ɲɛgɛn da la, wala n’an ka nabaliya ye ka bɛn waati ma lajɛw la, tuma bɛɛ. Bangebaga minnu bɛ bonya jira ani waleɲumandɔn bɛ minnu na, olu b’u denw bali ka tapi ni so masiri finiw nɔgɔ. Masaya So wala gafe kalan bɛ kɛ du min kɔnɔ, u b’u bali fana k’o kogow nɔgɔ. Fan wɛrɛ fɛ, an bɛɛ sɔnnen b’a ma ko kunmasuli jogo ni hakilintanya kumaw ni malobaliya tulon kumaw, u mana kɛ fɛn o fɛn ye, olu bɛnnen tɛ an ka lajɛw la cogo si la.—Ef. 5:4.
4 N’an ka Krecɛn lajɛw kuntilenna tora an hakili la tuma bɛɛ, an denw n’an yɛrɛw na bonya jira, bonya min ka kan ni Jehowa ka bato ye, an y’a sugandi ‘ka jɔ’ yɔrɔ min na.—Zab. 84:11.