An bɛ se ka baaraw kɛ minnu ka bon
1 A ka cidenyabaara senfɛ, Yesu tun ye dakabana walew kɛ. A tun ye kabakow kɛ ka mɔgɔ waa yirika ladumuni, ka mɔgɔ caman kɛnɛya, ani ka mɔgɔ damadɔw lakunun ka bɔ saya la. (Mat. 8:1-17; 14:14-21; Yuh. 11:38-44) A ka wale kɛtaw tun ye jamana mumɛ hakili sama. Nka, a ka saya ɲɛ fɛ su laban na, a y’a fɔ a nɔfɛmɔgɔ kantigiw ye ko: “Mɔgɔ min dara ne la, o na ne ka kɛtaw kɛ, ka dɔ kɛ minnu ka bon olu ye.” (Yuh. 14:12) Baara min ka “bon”, an bɛ se k’o kɛ cogo di?
2 An kɛtɔ ka waajuli kɛ danyɔrɔ caman na: Yesu ka baarakɛyɔrɔ tun dannen don Palɛstine ma, k’a sɔrɔ a y’a fɔ a ka kalanden fɔlɔw ye k’u ka seereya kɛ “fo ka taa se dugukolo dan bɛɛ ma,” yɔrɔ min ka jan kosɛbɛ ni Yesu yɛrɛ ka waajuli kɛyɔrɔ ye. (Kɛw. 1:8) A tun ye waajuli baara min dabɔ, sisan o bɛ kɛ diɲɛ bɛɛ la, jamana 232 la. (Mat. 24:14) Danyɔrɔ min kalifara i ka jɛkulu ma, yali i b’i seko kɛ o baara la wa?
3 An kɛtɔ ka se mɔgɔ caman ma: Tuma min na Yesu bɔra dugukolo kan, a ye tun kalanden damadɔw to a kɔ walisa u ka waajuli kɛ ka taa’ fɛ. (Kɛw. 1:15) O bɛɛ n’a ta, u ka timinandiya seereya Pantekɔte don na, san 33nan na kristatile la, o nɔ filɛ nin ye: mɔgɔ minnu sɔnna tiɲɛ la ani ka batise o don na, olu hakɛ yɛlɛnna fo ka se mɔgɔ waa saba ɲɔgɔnna ma. (Kɛw. 2:1-11, 37-41) Minnu ‘labɛnnen don balo banbali kama’, olu dalajɛli bɛ senna an tile la, nin waati min kɔnɔ an ka mɔgɔ batiselenw makɛɲɛ ka ca ni 1000 ye don o don. (Kɛw. 13:48, LK) Yali i b’i seko bɛɛ kɛ walisa ka se dusujɛlen tigiw ma, u sɔrɔ yɔrɔ la ani ka tugu mago jiralen na i se la wa?
4 An kɛtɔ ka mɛn waajuli la: Yesu ka dugukolo kan cidenyabaara danna san saba ni tila ma. Anw na mɔgɔ caman mɛnna waajuli la ka tɛmɛ o kan. Ka ɲɛsin waati ma, an bɛ se ka min kɛ nin baara in na, waleɲumandɔn b’an na ka se ka kalanden kelen-kelen bɛɛ dɛmɛ ka ɲɛnamaya sira minɛ. (Mat. 7:14) Yali caman b’i bolo k’a kɛ kalo o kalo Matigi ka baara la wa?—1 Kɔr. 15:58.
5 Iko Yesu ka kalanden sɛbɛw, an dalen b’a la k’a ka dɛmɛ barika la, an na baara kɛ tun, baara min ka bon.—Mat. 28:19, 20.