I gɛlɛya k’i balimaw dɔn

¹ Bibulu bɛ kuma teri sɛbɛ ko la iko mɔgɔ min bɛ nɔrɔ i la ka tɛmɛ i balima kan, mɔgɔ min ka kanuya n’a ka kantigiya bɛ to u nɔ na, ani mɔgɔ min b’a tɔɲɔgɔn dɛmɛ degun tuma la. (Nta. 17:17; 18:24) An tɛna dɛsɛ k’o teri suguw sɔrɔ jɛkulu kɔnɔ n’an b’an gɛlɛya ka taa’ fɛ ka tɔw dɔn ani k’u kanu.—Yuh. 13:35.

² An balimaw dɔnni cogo ɲumanw bɛ sɔrɔ sanni lajɛw ka se ani u bannen kɔ. Mun na i tɛ kɔn ka na, ani i se la, ka mɛn ka jɛɲɔgɔnya duman n’a diyanyelaman kɛ n’i batokɛɲɔgɔnw ye? I bɛ se ka baro kɛ ni balima sifa caman minnu ye, maakɔrɔw b’o la, ani mɔgɔ faamuyalenw ni denmisɛnw ni mɔgɔ masumalenw.

³ Baro daminɛ: I kana dan i balimaw foli dama ma. I bɛ se ka baro daminɛ n’u ye i kɛtɔ ka foro cidenyabaara senfɛ ko dɔ tila n’u ye, wala i kɛtɔ k’u ladɔnniya sɔn-ni-sɔn gafenin hakilina nafaman dɔ la, wala i kɛtɔ k’i fɛta fɔ u ye lajɛ bannen ko la. I bɛ se ka fɛn caman dɔn i balimaw fɛ n’i ye lamɛnbaga ɲuman ye ani n’i b’u dusu lamin ka kuma u dɔnkow ko la ani u ka fɛn kalannenw ko la. Dɔ ye Jehowa dɔn cogo min na, ka ɲininkali kɛ o ko dama la, o bɛ se ka fɛn caman bange. Dɔw tɛmɛna ko dɔw fɛ u ka diɲɛnatigɛ kɔnɔ, ko minnu bɛ dannaya kologɛlɛya, dɔ wɛrɛw ye ko gɛlɛn minnu kun fo ka se sisan ma, a bɛ se ka gɛlɛya mɔgɔ ma ka da u la. An b’a faamu ko nin bɛna an dɛmɛ, iko teri sɛbɛw, ka hinɛ ani ka tɔw magow ɲɛ.

⁴ Kɛ mɔgɔ wɛrɛ teri ye: A denmusonin ka saya kɔfɛ, a gɛlɛyara balimamuso dɔ ma ka Masaya dɔnkili da min bɛ kuma lakununni kan. A hakili b’a la ko: “Siɲɛ dɔ la, balimamuso min tun sigilen bɛ ne ɲɛ fɛ sigilanw sira la, o ye n’ kasitɔ ye. O nana k’a bolow meleke ne la, ani ka dɔnkili tɔ da ne nɔfɛ. Ne dusukun fara kanuya la ka ɲɛsin n’ balimakɛw ni n’ balimamusow ma ani n’ nisɔndiyara lajɛw taali ko la, n’ kɛlen k’a faamu ko an bɛ dɛmɛ sɔrɔ yɔrɔ min na, o ye Masaya So de ye.” An na kɛ an balimaw teriw ye an kɛtɔ k’u dusu saalo u mago mana k’o la tuma min na, ani an kɛtɔ k’u dusu lamin tuma bɛɛ.—Heb. 10:24, 25.

⁵ Ikomi nin diɲɛ kɔrɔ in b’a la k’an degun tuma bɛɛ ka taa’ fɛ, an k’a latigɛ k’an balimaw dɔn ka ɲɛ. Kɔnɔnajɛya dusulamin falen-falen na kɛ dubafɛn ye bɛɛ bolo.—Rom. 1:11, 12.