Lakɔlɔsibagaw bɛ ɲɛmɔgɔya ta—Sɛbɛnnikɛla
1 Fɛn min ye k’i hakililatigɛ ko “fɛn bɛɛ ka kɛ cogo bɛnnen na, a ko ɲɛnabɔlen koɲuman”, jɛkulu ka sɛbɛnnikɛla jɔyɔrɔ ka bon o la. (1 Kɔr. 14:40) Ikomi a ye Jɛkulu ka Baara Kulunin mɔgɔ ye, a b’i jan to jɛkulu ka kunnafonikow la ka fara baarakɛ sɛbɛn nafamaw kan. Hali ni bɛɛ tɛ a ka baara ye iko maakɔrɔ tɔw ta, a ka baara bɛ magoba ɲɛ, wa a ɲumandɔnnen don.
2 Ni sɛbɛn sɔrɔla tuma min na ka bɔ Tɔn yɔrɔ wala fan wɛrɛ fɛ, sɛbɛnnikɛla b’i hakili to a la ani k’a lajɛ k’a jaabira ka bɛn waati ma. A b’i jɛya’ la ko sɛbɛn cilen tɛmɛna maakɔrɔw bɛɛ fɛ, o kɔ a b’a lasagon iko sinsiyɔrɔ waati nata la. A bɛ sɔn-ni-sɔn gafeninw ni gafew kun kan sɛbɛnw sɛgɛsɛgɛ ka tila k’u ci Tɔn ma. Ale de bɛ mɔgɔw lakɔlɔsi, mɔgɔ minnu bɛ jatew ni bakurubasanniw kunna ka fara kafoba ka jamalajɛ koɲɛw bɛɛ kan.
3 Ikomi sɛbɛnnikɛla ka kan ka jɛkulu ka kalo o kalo foro baara dantigɛlisɛbɛn ci Tɔn ma ka bɛn kalo tile wɔɔrɔnan ma, wajibi don an bɛɛ k’an ka foro baara dantigɛlisɛbɛnw di joona kalo sa o kalo sa la. A bɛ tila ka Jɛkulu weleweledalaw ka baara kunnafonisɛbɛnw lafa ni baara dantigɛli jatew ye. Weleweledala kelen-kelen bɛɛ bɛ se k’a ɲini k’a yɛrɛ ka baara kunnafonisɛbɛn lajɛ.
4 Ni weleweledala dɔ nana jɛkulu la wala n’a yɛlɛmana jɛkulu wɛrɛ la, sɛbɛnnikɛla bɛ sɛbɛn ci o jɛkulu maakɔrɔw ma walisa ka kofɔli bataki ni Jɛkulu ka Weleweledala ka Baara Kunnafonisɛbɛn ɲini u fɛ wala k’u ci u ma.—Notre ministère, ɲ. 105.
5 Sɛbɛnnikɛla bɛ tutigɛbagaw ka baara mafilɛ ka maakɔrɔw, kɛrɛnkɛrɛnnenya la baara lakɔlɔsibaga ladɔnniya tutigɛbagaw ka gɛlɛyaw la. A bɛ Jɛkulu ka Gafe Kalan ɲɛminɛbagaw lasɔmi mɔgɔw ko la minnu ye basigibaliw ye foro baara la. Ale ni baara lakɔlɔsibaga fila bɛ ɲɛmɔgɔya ta ka maganw kafo ɲɔgɔn kan ka mago don mɔgɔ walekɛbaliw la.—San 1987 Nowanburukalo ka Le ministère du Royaume, ɲ. 1.
6 Ka sɛbɛnnikɛla ka baaraw koɲumandɔn to an na, an ka kan k’an seko kɛ ka dɛmɛ don a ma walisa ko ɲɛnabɔli ka nɔgɔya a ma.—1 Kɔr. 4:2.