An ka ɲɔgɔn sabati an kɛtɔ ka kuma lajɛw la
1 Heburuw 10:24 b’an waaju ka ‘ɲɔgɔn jija [su, NW] kanuya ni kɛwale ɲumanw na.’ Ka ɲɔgɔn sabati n’an ka kumaw ye jɛkulu lajɛw la, ani k’o kɛ ka ɲɛ, o sen b’o la. Mun na an ka kan ka kuma? An bɛ se k’o kɛ cogo jumɛn na? Jɔni b’a nafa sɔrɔ?
2 Aw ka miiri siɲɛ hakɛ minnu na aw ye nafa sɔrɔ aw kɛtɔ ka tɔw lamɛn ka kuma cogo nɔgɔn na ani ka kuma jɛlenw fɔ minnu ye dɔ fara aw ka faamuli ani aw kan, hakili ta fan fɛ. Bonya b’aw bolo k’o ɲɔgɔn kɛ tɔw fana ye. N’aw bɛ kuma tuma min na, aw b’aw ŋaniya de jira ka “hakili nilifɛn dɔ lase” walisa mɔgɔ minnu bɛɛ bɛ lajɛ la, olu ka sinsi.—Rom. 1:11, 12, NW.
3 Kumaw bɛ ɲɛ cogo min na: An kana an ka kuma kun janya an kɛtɔ ka dakun miiriya kelen-kelen bɛɛ fɔ. Tuma caman na, n’an ka kuma fɔtaw cayara, jaabi jɔnjɔn tɛ dɔn tun, wa o bɛ se ka tɔw dusu faga ka kuma. Dakun jaabi fɔlɔ kun ka kan ka surunya, ka sin ka ɲininkali sɛbɛnnen jaabi di. O kɔfɛ, mɔgɔ minnu bɛ kuma ta walisa ka dɔ fara o jaabi kan, u bɛ se k’a ɲɛfɔ o kuma bɛ sirataama cogo nafama min na, walima k’a jira sɛbɛnniw bɛ sirataama cogo min na. Manuel pour l’École gafe lajɛ, a ɲɛ 90-2 na.
4 N’a y’a sɔrɔ ka kuma, o miiriya b’aw jɔrɔ, aw ka kɔn ka kuma kun surun dɔ labɛn. O kɔ, aw k’a ɲini baro ɲɛminɛbaga fɛ, a ka kuma di aw ma o dakun na. N’aw y’o kɛ lajɛ damadɔw la, kuma bɛna nɔgɔya aw ma kosɛbɛ. Aw k’aw hakili to a la, k’u seko ta fan fɛ jamalakuma ko la, Musa ni Jeremi tun y’a jira k’u tun dalen tɛ u yɛrɛw la (Ekis. 4:10; Jer. 1:6) Nka, Jehowa y’u dɛmɛ ka se ka kuma a tɔgɔ la. A bɛna aw fana dɛmɛ.
5 Jɔni bɛna nafa sɔrɔ aw ka kumaw la? Aw yɛrɛw bɛ nafa sɔrɔ o la, bawo aw ka kumaw bɛ tiɲɛ sinsi kosɛbɛ aw hakili n’aw dusukun na, ka nɔgɔya aw bolo kosɛbɛ aw hakili ka jigi o la kɔfɛ. Dɔw fana bɛ nafa sɔrɔ k’aw ka kumaw lamɛn, kuma minnu bɛ mɔgɔ sabati. An kɛra Mɔgɔw ye minnu ka dɔnniya man bon kosɛbɛ, walima denmisɛnw, walima minnu bɛ maloya, walima minnu ye kuraw ye, n’an bɛɛ b’an cɛsiri k’an ka limaniya jira jɛkulu ka lajɛw la, o bɛ dusu don an kɔnɔ.
6 Lajɛw la, n’an bɛ kuma tuma min na walisa ka ɲɔgɔn sabati, an dalen b’a la ka ‘kumaw sɔrɔ minnu bɛ bɛn u waati ma, n’u ka di’!—Nta. 15:23.