An ka sɛbɛndenninw kɛ ka nɔ ɲumanw bɔ

¹ Kabini Jehowa ka bi jɛkuluba sigi tuma na, a ye baara kɛ ni sɛbɛndenninw ye, ka nafaba bɔ u la. O sɛbɛndenninw bɛ wele angilɛkan na ko tract. An ka Tɔn lakodɔnna sariya sira la ni tɔgɔ yɛrɛyɛrɛ min ye, o ye ko: Watch Tower Bible and Tract Society. O b’a jira ko sɛbɛndenninw walima tracts jɔyɔrɔ ka bon kosɛbɛ kibaru duman jɛnsɛnni na. K’a ta san 1881 ma ka n’a bila san 1918 ma, sɛbɛndennin minnu jɛnsɛnna Jehowa Seerew fɛ, o cayara ni miliyɔn 300 ye. O waati kɔnɔna na, mɔgɔ caman minnu kɛra Krista balimaw ye, ni olu sen bɛ munnen tɔw la, olu ye tiɲɛ dɔn o sɛbɛndennin fɔlɔw de sababu fɛ.

² San 1987 la, sinsin kɛra a kan ko kura ka baara kɛ ni sɛbɛndenninw ye, u kɛtɔ ka sɛbɛndenninw kulɛrilama kura sifa naani bɔ. An bɛ baara kɛ ni o sɛbɛndenninw ye hali bi. San 1992 kafoba ka jamalajɛ la, n’o tun ye ko “Porteurs de lumière” (Yeelen tabagaw) a fɔra o la ko sɛbɛndennin kulɛrilama kura sifa naani wɛrɛw bɛna bɔ. U bɛna kɛ sɛbɛndenninw ye minnu bɛ mɔgɔw bila u k’u hakili jakabɔ. U tɔgɔw filɛ: Le monde actuel survivra t-il ? De l’aide pour les déprimés; Une vie de famille agréable; Qui domine vraiment le monde ? Sɛbɛndennin wɛrɛw farala olu kan. Olu filɛ: Jéhovah : Qui est-il ? Jésus : Qui est-il ? Aimeriez-vous en savoir plus sur la Bible ? Avez-vous un esprit immortel ? Yali i bɛ baara kɛ ni o sɛbɛndenninw bɛɛ ye walisa ka nɔ bɔ ni u ye i ka cidenyabaara la wa?

³ Nɔ ɲuman bɛ bɔ ni sɛbɛndenninw ye, ni an bɛ baara kɛ ni u ye ka ɲɛ. O la sa, fo an ka sɛbɛndennin kelen-kelen bɛɛ kɔnɔko dɔn. Misali la, yali i ye u kelen-kelen bɛɛ kalan k’a ta a daminɛ na fo ka na a bila a laban na walisa fɛn min ɲɛfɔlen bɛ u kelen-kelen bɛɛ kɔnɔ, olu ka to i hakili la wa? Yali i miirila a la walisa k’a dɔn sɛbɛndennin kelen-kelen bɛ se ka diya mɔgɔ sugu minnu ye wa? Ni i bɛ sɛbɛndenninw kelen-kelen bɛɛ kɔnɔko dɔn ka ɲɛ, i ka teli ka u di mɔgɔw ma du ni du baara la ani senfɛ-seereya la, o bɛ se ka kɛ yɔrɔ min na.

⁴ Baara kɛ ni u ye du ni du cidenyabaara la: Kafo lakɔlɔsibaga dɔ ye nin sɛbɛn: “Ne bɛ se ka ne ka baro fanba daminɛ ni sɛbɛndenninw ye.” Yali i delila k’o kɛcogo lajɛ wa? Mun na i tɛna baara kɛ ni sɛbɛndenninw ye walisa ka i ka barow daminɛ? Sɛbɛndenninw sababu la, kuma daminɛcogo caman b’an bolo sisan, an bɛ se ka sugandili kɛ minnu cɛma. Sɛbɛndennin kelen-kelen bɛɛ bɛ cogo di an ma walisa an ka Bibulu kalan daminɛ an ka bɔnyeli fɔlɔ la, walima an ka segin-ka-bɔn-ye la.

⁵ An bɛ se ka baara kɛ ni sɛbɛndenninw ye cogo wɛrɛw la fana. Aw ka baro kɔnɔna na ni mɔgɔ dɔ ye, a ka so dakun na, aw bɛ se ka kunnafoni sɔrɔ ko aw barokɛɲɔgɔn ka mɔgɔ kanulen dɔ banna a ma mɛn, walima ko a somɔgɔ dɔ man kɛnɛ. Mɔgɔ minnu dusukasilenba don, walima minnu bɛ gɛlɛyaw la waati jan kɔnɔ, tuma caman olu dusu bɛ tiɲɛ, hakilitiɲɛbana bɛ u minɛ. An bɛ an ka kanuya jira, an kɛtɔ k’a ɲɛfɔ o tigi ye, dusudon kuma min bɛ sɛbɛndennin kɔnɔ, n’o tɔgɔ ye ko De l’aide pour les déprimés. Dɔ bɛ se k’a fɔ i ye ko a ka furu sara a ma mɛn, walima ko a tɛ baara la tun. O ko sugu bɛ se ka kɛ dusukasiba ye o tigi bolo, ka o kɔmana lase dukɔnɔmɔgɔw bɛɛ ma. Baara kɛ ni nin ɲininkaliw ye minnu bɛ Une vie de famille agréable sɛbɛndennin ɲɛ 2nan na: “Mun na nin kunkoba suguw bɛ denbayaw kan bi? An bɛ se ka hɛrɛ sɔrɔ cogo di an ka denbaya kɔnɔ?” I b’a sɔrɔ nin ɲininkaliw yɛrɛ de ye fɛn fɔlɔ ye minnu bɛ o tigi hakili la. Hali ni o tigi m’a jira o yɔrɔnin bɛɛ la ko o baro ka di a ye, laala a bɛna sɛbɛndennin kalan kɔfɛ​—⁠ Ekl. 11:⁠6.

⁶ Jɛkulu dɔw la, waajulikɛyɔrɔ bɛ baara siɲɛ caman, wa an ka sɛbɛnw bɛ mɔgɔ caman bolo kaban. N’an bɛ baara kɛ ni sɛbɛndenninw ye, o bɛna a to an bɛ sira sɔrɔ ka baro kɛ fɛn dɔ kan min bɛ diya an barokɛɲɔgɔnw ye, k’u bila u ka sɔn ka kuma an fɛ, k’u bila ka miiri jigiya ma, Masaya bɛ min di an ma. Ɲininkali dɔ kɛ min bɛna to u hakili la, aw bɛna baro kɛ min kan kɔfɛ. Aw ka segin-ka-bɔnye kɛ, ka aw mago don u la u ka dɔnniya ɲini senfɛ. Waati senfɛ, aw bɛna se ka kalan daminɛ u kun gafenin walima gafe dɔ kan, min b’u bolo kaban.

⁷ An ka baara kɛ ni sɛbɛndenninw ye senfɛ-seereya la: Ni sɛbɛndenninw bɛ an bolo kɔrɔ (simisi pɔsi kɔnɔ, walima an ka wɛsiti pɔsi kɔnɔ, walima an ka bolola bɔrɛ kɔnɔ, walima an ka waajulikɛbɔrɛ kɔnɔ,) an bɛ yɔrɔ o yɔrɔ la, an na se ka sira sɔrɔ siɲɛ caman k’u di mɔgɔw ma. An ka baara kɛ ni u ye n’an bɛ taa sanni kɛ, n’an bɛ taa taama na, walima ni an bɛ ka baro kɛ ni an somɔgɔw walima ni mɔgɔw ye minnu nana bɔ an ye. Sɛbɛndenninw bɛ an dɛmɛ ka seereya surun kɛ mɔgɔw ye. A kalanni tɛ kɛ baara belebeleba ye mɔgɔ bolo. A kuma tilennen don, wa, a bɛ mɔgɔ gasi sigi. Mɔgɔw sɔn ka di u la ka tɛmɛ gafe walima sɔn-ni-sɔn gafeninw kan, bawo a fɛn kalanta ma ca.

⁸ An bɛ yɔrɔ o yɔrɔ la, an ka kɔlɔsili kɛ walisa ka se ka baara kɛ ni sɛbɛndenninw ye senfɛ-seereya la, lakɔlisow la, walima baarakɛyɔrɔw la, dumunikɛyɔrɔw la, esansi feereyɔrɔw la, ani yɔrɔ wɛrɛw la. An balimamuso dɔ kɛtɔ k’a labɛn ka taa ni a mɔmuso ye dɔgɔtɔrɔ fɛ, a y’a lajɛ ni sɛbɛndennin dɔw tun b’a kun. Dɔgɔtɔrɔso la, a ye baro daminɛ ni muso kɔnɔma dɔ ye. A kɛlen kɔ ka sɛbɛndennin jira muso la, n’o ye Ɲɛnamaya kɛ lafiya la diɲɛ kura kɔnɔ, an balimamuso ye muso ɲininka ko: “Yali i b’a fɛ k’i den lamɔ diɲɛ kɔnɔ min bɛ i n’a fɔ min jiralen bɛ ja kan yan wa?” A sera ka o baro taa ɲɛ a kɛtɔ ka taa bɔ muso ye a ka so. O kɛra sababu ye a ka segin ka taa bɔ muso bara siɲɛ caman, cogo basigilen na.

⁹ Bibulu kalanw bɛ se ka daminɛ ni sɛbɛndenninw ye: Kafo lakɔlɔsibaga dɔ y’a fɔ ko a taalen bɔ jɛkulu dɔ la, o dɔgɔkun kɔnɔna na, o jɛkulu kɔnɔmɔgɔw ye sokɔnɔ Bibulu kalanw 64 daminɛ ni sɛbɛndenninw ye, siɲɛ fɔlɔ min yɛrɛ la u taara bɔ mɔgɔw ye.

¹⁰ Yali i y’a lajɛ ka Bibulu kalan daminɛ siɲɛ fɔlɔ min yɛrɛ la i taara bɔ mɔgɔ dɔ ye wa? Ni i ye baara kɛ ni sɛbɛndennin dɔ ye, i bɛ se k’a jira o tigi la, cogo surun na, kalan bɛ kɛ cogo min na. An balimamuso dɔ ye o de kɛ a kɛtɔ ka baara kɛ ni sɛbɛndennin ye n’o ye ko: Ɲɛnamaya kɛ lafiya la diɲɛ kura kɔnɔ. A kɛtɔ ka ja jira a la, a ye a barokɛɲɔgɔn ɲininka ni ale ɲɛ na an ka dugukolo bɛna kɛ iko o ɲɔgɔn, don dɔ la. A barokɛɲɔgɔn kɛlen kɔ k’a jaabi, an balimamuso y’a ɲini a fɛ, a ka 2 Piɛrɛ 3:13 ni Esayi 65:17 kalan minnu kofɔlen bɛ sɛbɛndennin kɔnɔ. An balimamuso tilara k’a fɔ ko: “Nin layiduw tɛ sugoko ye walima mɔgɔw ka fɛn miirilen dɔ ye, nka o jiralen bɛ ka jɛya Ala ka Kuma kɔnɔ, n’o ye Bibulu ye.” O kɔfɛ, ale ni muso ye ɲɔgɔnye dɔ boloda walisa ka baro taa ɲɛ dɔgɔkun min tun bɛ da o kan. Bɔnyeli nata la, a ye muso ka ɲininkali caman jaabi. A ye gafe dɔ di o muso ma. O ko nana wolo Bibulu kalan dɔ la.

¹¹ Laala i ye mɔgɔ batiselen kura ye, walima i ye weleweledala ye min ma batise fɔlɔ min b’a ɲinina ka dɔ fara a seko kan waajuli kɛcogo la. Ni a bɛ ten a dɔ rɔ i b’a fɛ k’a ɲini weleweledalaw fɛ minnu bɛ se kosɛbɛ cidenyabaara kɛcogo la, olu ka hakililaw di i ma sɛbɛndenninw jiracogo kan walisa i ka se ka baara kɛ ni olu ye i ka jɛkulu waajulikɛyɔrɔ la. An bɛ mɔgɔ caman ka misaliw sɔrɔ Bibulu kɔnɔ, minnu ye dɛmɛ ni dusu sɔrɔ ka bɔ mɔgɔ mɔlenw yɔrɔ, dannaya sira la.​—⁠Kɛw. 18:​24-27; 1 Kɔr. 4:⁠17.

¹² Jɛkulu ka gafe kalan lakɔlɔsibaga bɛ se ka kɛ dɛmɛbaga kɛrɛnkɛrɛnnen ye. A bɛ se ka ko labɛn walisa mɔgɔ wɛrɛw k’i dɛmɛ sɛbɛndenninw jiracogo la, min bɛ nɔ bɔ. Bangebagaw ka baara don k’u denw dɛmɛ u ka se kosɛbɛ waajulibaara kɛcogo la. Denmisɛnnin dɔ min ye Jehowa Seere ye, o degera a bangebagaw fɛ walisa a ka se ka sɛbɛndennin jira, n’o ye ko Ɲɛnamaya kɛ lafiya la diɲɛ kura kɔnɔ. Ka a ni a ba to ɲɔgɔn fɛ dɔ ka Bibulu kalan kɛli la, o denmisɛnnin ye sɛbɛndennin di o tigi furucɛ ma. Cɛ kabakoyara ka a ye ko nin dannako kologɛlɛnw sugu tun bɛ dennin na. Cɛ nisɔndiyara ka sɛbɛndennin bɛɛ kalan. Ni dennin ni a ba tun bɛ segin yen tuma o tuma, dennin tun bɛ Bibulu tɛmɛsira dɔ, walima Bibulu maana dɔ jira cɛ la, a tun bɛ o min labɛn kɛrɛnkɛrɛnnenya la k’o fɔ cɛ ye. Cɛ bɛ sɔn-ni-sɔn gafeninw kalan tuma bɛɛ sisan. A y’a jira fana ko Révélation : dénouement gafe ka di a ye, wa cɛ taara lajɛ dɔw la. Nin kow bɛɛ sera ka kɛ, bawo bangebagaw ye waati ta k’u jɔyɔrɔ fa u kɛtɔ k’u denmuso dege walisa a ka baara ɲuman kɛ ni sɛbɛndenninw ye.

¹³ An ka baara kɛ ni an ka sɛbɛndenninw bɛɛ ye, cogo ɲuman na: Walisa ka baara kɛ ni sɛbɛndennin ye min tɔgɔ ko Le monde actuel survivra-t-il ?, i bɛ se k’i tɔgɔ fɔ i barokɛɲɔgɔn ye, ka baro daminɛ nin cogo la: “E ni ɲɔgɔn tuma. An bɛ kuma mɔgɔw fɛ hadamadenw ka bi ɲɛnamaya kɛcogo kan. E miiri la, yali an ka ɲɛnamaya kɛcogo bɛna ɲɛ ka taga a fɛ wa, walima a bɛna tiɲɛ ka taga a fɛ? [A to a k’i jaabi.] Dɔw b’a miiri ko fɛn min bɛ ka kɛ diɲɛ kɔnɔ bi, o bɛ Bibulu ka kirayakuma de tiimɛli jira, wa, ko diɲɛ laban ka surun. E hakilinata ye mun ye o ko la?” Ni i barokɛɲɔgɔn ye jaabi di ka ban, i ka sɛbɛndennin di a ma. Ɲininkali saba minnu bɛ dakun filanan na, olu jira a la. O kɔfɛ, baro walawalalen bɛ cogo min na sɛbɛndennin kɔnɔ, baara kɛ ni o ye walisa k’a jira a la diɲɛ dɔ banna cogo min na lawale la, ani nin diɲɛ in fana bɛna ban cogo min na. Ni i bɛna wuli ka taa tuma min na, i ni o tigi ka waati dɔ boloda, i bɛ segin ka na waati min na walisa ka baro kɛ dalilu kan minnu bɛ Bibulu kɔnɔ, n’u b’a jira ko diɲɛ laban ka surun.

¹⁴ Tuma caman na, an bɛ se ka Masaya cikan fɔ mɔgɔ wɛrɛw ye waati kunkurunnin dɔrɔn de kɔnɔ, i n’a fɔ baarakɛyɔrɔ la, walima lakɔliso la. Baarakɛyɔrɔ la, baro bɛ se ka na kibaru kura kan ka ɲɛsin gɔfɛrɛnaman ma. I bɛ se k’a fɔ u ye ko kuntigiw ye cɛsiri fɛn o fɛn kɛ, hali ni ŋaniya ɲuman ye, o si ma a bali diɲɛ kɔnɔmɔgɔw ka tɔɔrɔ kɔsɛbɛ tariku kɔnɔna na. O kɔfɛ, dakun laban min bɛ Qui domine vraiment le monde ? sɛbɛndennin ɲɛ 2nan na, kuma o kan. Ɲininkali saba minnu bɛ mɔgɔ bila hakilijakabɔ la, olu kalan. Ni waati tɛ i bolo ka baro kunkurunnin kɛ, i ka sɛbɛndennin di a tigi, walima o tigiw ma. A boloda ka baro kɛ o ɲininkaliw kan waati wɛrɛ la, walima yɔrɔ wɛrɛ la.

¹⁵ I kelen na, walima i ka denbaya kɔnɔ, i ka waati ta k’a lajɛ i bɛ se ka sɛbɛndennin kelen-kelen bɛɛ jira cogo min na. I ka o sɛbɛndenninw jiracogow dege fo i ka se u la. I bɛ se ka baara kɛ ni u ye cogo di kalo sɛbɛn jira tuma na? Yali ɲɔgɔnyew bɛ e ni mɔgɔ dɔw cɛ, ni i bɛ se ka sɛbɛndenninw ta i bolo olu ye wa? Yali mɔgɔ bɛ i bolo dɔgɔkun in na min bɛna nafa sɔrɔ cikan na min bɛ sɛbɛndenninw kɔnɔ wa?

¹⁶ Ka Jehowa kanu kosɛbɛ ani ka hami mɔgɔw ko la, o bɛna an bila ka an seko bɛɛ kɛ walisa ka kibaru duman fɔ mɔgɔw ye. N’an bɛ baara kɛ tuma bɛɛ ni sɛbɛndenninw ye, o bɛna an dɛmɛ k’o kɛ. Denmisɛnnin san wulonwula dɔ tun b’a fɛ ka a sigiɲɔgɔn dɛmɛ a ka diɲɛ kura sɔrɔ. O la sa, a ye sɛbɛndennin kelen di a ma. Bibulu kalan dɔ daminɛna o cogo la. Nin kɛcogo ka nɔgɔn kosɛbɛ dɛ! Yali an bɛ an ka cidenyabaara kɛ o cogo la wa? Ni an ye sɛbɛndennin to mɔgɔ dɔ bolo siɲɛ wɛrɛ, o bɛ se ka kɛ sababu ye an ka Bibulu kalan dɔ daminɛ. Ni an bɛ baara kɛ ni sɛbɛndenninw ye ni hakilitigiya ye walisa ka Masaya kibaru duman fɔ, an bɛ se ka da a la ko an bɛna nɔ ɲuman bɔ o la.