Baro bɛ daminɛ cogo min na ni sɛbɛndenninw ye

Kabini Zanwuyekalo san 2018, baro kɛcogo misaliw kɛra Krecɛnya ni waajulibaara lajɛ sɛbɛn ɲɛ fɔlɔ kan. Dusu donna an kɔnɔ an ka an sinsin min kan, o ye ka baro kɛ ni mɔgɔw ye, an kana gafew jira u la dɔrɔn. Walasa ka weleweledalaw dɛmɛ u k’u ka waajuli kɛcogo falen falen, baro kɛcogo misali wideyow y’a jira baro bɛ se ka daminɛ cogo min na ni Bibulu dɔrɔn ye. Nka, yala o b’a jira ko an mankan ka baara kɛ ni gafew ye ni an bɛ ka waajuli kɛ du ni du wa? Ayi, o tɛ fewu! Misali la, baara bɛ se ka kɛ ni sɛbɛndenninw ye cogo ɲuman na walasa ka baro daminɛ. An bɛ se ka baara kɛ ni nin kɛcogo naani nata ninnu ye ni an bɛ sɛbɛndenninw fɛn o fɛn jira:

1. Sɛbɛndennin ɲɛ fɔlɔ ɲininkaliw kɛ.

2. Bibulu ka jaabi jira min bɛ tɛmɛsira(w) kɔnɔ sɛbɛndennin ɲɛ filanan san fɛ. Ni waati bɛ yen, sɛbɛndennin kɔnɔfɛn dɔw kalan ani ka baro kɛ olu kan.

3. Sɛbɛndennin di i barokɛɲɔgɔn ma ani ka dusu don a kɔnɔ a ka a kɔnɔfɛn tɔ kalan.

4. Sani i ka taa, ɲininkali min bɛ “I hakili jagabɔ nin kan” duguma, o jira i barokɛɲɔgɔn na ani ka cogoya ɲini walasa ka segin ka na baro kɛ Bibulu ka jaabi kan siɲɛ wɛrɛ.

Ni i seginna ka na, baro kɛ o jaabi kan ani ka ɲininkali wɛrɛ lawuli aw bɛ kuma min kan siɲɛ wɛrɛ. I bɛ se ka ɲininkali dɔ sugandi an ka siti kan walima gafenin kɔnɔ min ko fɔra sɛbɛndennin kɔ kan. Waati bɛnnen na, i ka Kibaru duman min bɔra Ala yɔrɔ gafenin jira walima kalankɛ gafe dɔ wɛrɛ jira ka bɔ Baarakɛminɛnw na, minnu bɛ yɔrɔ koorilen na mɔgɔw kalanni kama.