Qu’enseigne la Bible ? gafe jiracogow

Gafe min tɔgɔ ye ko Qu’enseigne la Bible ?, hakilila suguya caman dilen bɛ o jiracogo kan nin cɛmancɛ sɛbɛn kɔnɔ. Nka, walisa aw ka se ka baara kɛ ni o hakililaw ye cogo la min bɛ nɔ bɔ, fo aw ka o hakililaw fɔ aw ka fɔcogo la, ani ka olu fɔ ka kɛnyɛ ni aw ka waajulikɛyɔrɔ mɔgɔw mago ye. Yɔrɔ kɛrɛnkɛrɛnnen minnu bɛ se ka ta gafe kɔnɔ walisa ka aw ka Bibulu kan barow sinsin olu kan, aw ka kan ka olu fana sɛbɛkɔrɔ dɔn. Ni jiracogo wɛrɛw bɛ yen minnu ka ɲi, aw bɛ se ka baara kɛ ni o jiracogow fana ye.—San 2005 Zanwuyekalo An ka Masaya Cidenyabaara ɲɛ 8nan lajɛ.

Bibulu

◼ “Mɔgɔ caman bɛ Bibulu jate Ala ka Kuma ye. Nka, yala i delila k’i yɛrɛ ɲininka nin na wa: gafe min sɛbɛnna mɔgɔw fɛ, tiɲɛ na, a bɛ se ka fɔ o ma cogo di ko Ala ka Kuma? [Jaabi makɔnɔ. O kɔfɛ, 2 Piɛrɛ 1:21 kalan ani dakun 5nan fana ɲɛw 19-20nan na.] Bibulu bɛ jaabi minnu di o ɲininkali suguw la, nin sɛbɛn bɛ olu fɔ an ye.” Ɲininkali minnu bɛ ɲɛ 6nan na, olu jira a la.

◼ “Mɔgɔ bɛ se ka kunnafoni minnu sɔrɔ bi, olu ka ca ni waati tɛmɛnenw ta ye. Nka, e fɛ, an bɛ se ka laadilikan ɲuman sɔrɔ min, n’o bɛ se k’an dɛmɛ ka hɛrɛ ani ɲɛtaa sɔrɔ an ka diɲɛnatigɛ kɔnɔ? [Jaabi makɔnɔ. O kɔfɛ 2 Timote 3:16, 17 kalan ani dakun 12nan fana, ɲɛ 22-23nan.] An bɛ se ka an ka ɲɛnamaya kɛ cogo min na walisa ka an kodiya Ala ye ani ka nafa sɔrɔ o la, nin gafe b’o fɔ an ye.” Sɛbɛnniw ni ja minnu bɛ yɔrɔ finman kɔnɔ ɲɛ 122-3nan, olu jira i barokɛɲɔgɔn na.

Saya/Lakunnuni

◼ “Mɔgɔ caman b’u yɛrɛ ɲininka mun bɛ saya kɔ fɛ. Yala e fɛ an bɛ se k’o dɔn wa? [Jaabi makɔnɔ. O kɔfɛ, Eklesiaste 9:5 kalan ani dakunw 5-6nan fana ɲɛw 58-59nan.] Layidu min bɛ Bibulu kɔnɔ lakunnuni ko la, o kɔrɔ bɛna kɛ min ye mɔgɔw salenw bolo, nin gafe bɛ o fana ɲɛfɔ.” Ja min bɛ ɲɛ 75nan na, o jira i barokɛɲɔgɔn na.

◼ “Ni an diyanyɛmɔgɔ dɔ sara an b’a fɛ k’o tigi ye kokura. E ma sɔn o ma wa? [Jaabi makɔnɔ.] Mɔgɔ caman ye dususaalo sɔrɔ layidu la min bɛ Bibulu kɔnɔ, ko suw bɛna kunun. [Yuhana 5:28, 29 kalan ani dakunw 16-17nan fana ɲɛw 71-2nan.] Nin kalansen bɛ nin ɲininkaliw fana jaabi.” Ɲininkali minnu bɛ ɲɛ 66nan na, olu jira i barokɛɲɔgɔn na.

Ɲɛnamaya banbali

◼ “Mɔgɔ caman bɛ kɛnɛya ni sijan fɛ. Nka, ni o tun bɛ se k’a kɛ, yala i b’a fɛ ka balo kudayi wa? [Jaabi makɔnɔ. O kɔfɛ Jirali 21:3, 4 kalan ani dakun 17nan fana, ɲɛ 54nan na.] Nin gafe b’a fɔ an ye, an bɛ se ka ɲɛnamaya banbali sɔrɔ cogo min na. Ni nin layidu in timɛna tuma min na, ɲɛnamaya bɛna kɛ min ye, a bɛ o fana fɔ an ye.”

Denbaya

◼ “A ka di an bɛɛ ye an ka denbaya ka hɛrɛ sɔrɔ. E ma sɔn o ma wa? [Jaabi makɔnɔ.] Bibulu bɛ kuma fɛn dɔ kan, denbaya kɔnɔmɔgɔ kelen-kelen bɛɛ bɛ se ka min kɛ walisa hɛrɛ ka na denbaya kɔnɔ: o ye ka Ala ladege, k’i ka kanuya jira.” Efesekaw 5:1, 2 kalan ani dakun 4nan fana ɲɛ 135nan na.

So sɔrɔ ko

◼ “Yɔrɔ caman na, a bɛ ka gɛlɛya ka t’a fɛ ka se ka so ɲuman sɔrɔ da nɔgɔn na. E fɛ, yala mɔgɔ kelen-kelen bɛɛ bɛna so ɲuman sɔrɔ don dɔ wa? [Jaabi makɔnɔ. O kɔfɛ Esayi 65:21, 22 kalan ani dakun 20nan fana, ɲɛ 34nan na.] Nin gafe b’a jira ko Ala ye o layidu min ta, o bɛna timɛ.”

Jehowa Ala

◼ “Mɔgɔ caman minnu dalen bɛ Ala la, olu b’a fɛ ka gɛrɛ Ala la kosɛbɛ. Yala i b’a dɔn ko Bibulu b’a ɲini an fɛ an ka gɛrɛ Ala la wa? [Jaabi makɔnɔ. O kɔfɛ Yakuba 4:8a kalan ani dakun 20nan fana, ɲɛ 16nan na.] Nin sɛbɛn dilanna walisa ka mɔgɔw dɛmɛ u ka dɔ fara u ka dɔnniya kan Ala ko la, ni u yɛrɛ ka Bibulu ye.” Ɲininkali minnu bɛ ɲɛ 8nan daminɛ na, olu jira i barokɛɲɔgɔn na.

◼ “Mɔgɔ caman bɛ Ala deli walisa a tɔgɔ ka saniya, walima senuya. Yala i delila k’i yɛrɛ ɲininka o tɔgɔ ye min ye wa? [Jaabi makɔnɔ. O kɔfɛ Zaburu 83:19 kalan ani dakunw 2-3nan fana ɲɛ 195nan na.] Nin gafe b’a jira an na Bibulu bɛ min fɔ tigitigi Jehowa Ala ko la ani a sagonata kan ka ɲɛsin hadamadenw ma.”

Yesu Krista

◼ “Mɔgɔw ye Yesu komɛn dugukolo yɔrɔ bɛɛ la. Dɔw ko Yesu tun ye mɔgɔba dɔrɔn de ye. Nka dɔ wɛrɛw b’a bato iko Se-bɛɛ-tigi Ala. An dalen bɛ min na Yesu ko la, yala nafa bɛ o la wa?” Jaabi makɔnɔ. O kɔfɛ, Yuhana 17:3 kalan ani dakun 3nan fana ɲɛ 37-8nan. Ɲininkali minnu bɛ kalansen daminɛ na, olu jira i barokɛɲɔgɔn na.

Delili

◼ “Ala b’an ka deliliw jaabi cogo min na, yala i delila k’i yɛrɛ ɲininka o la wa? [Jaabi makɔnɔ. O kɔfɛ 1  Yuhana 5:14, 15 kalan ani dakunw 16-18nan fana ɲɛ 170-2nan.] Nin kalansen b’a ɲɛfɔ fana mun na an ka kan ka Ala deli, ani an ka kan ka mun kɛ walisa a k’an lamɛn.”

Diinɛ

◼ “Mɔgɔ caman bɛ ka a ye sisan ko diinɛ minnu bɛ diɲɛ kɔnɔ, sanni olu ka hadamadenw dɛmɛ k’u ka gɛlɛyaw ɲɛnabɔ, olu de bɛ ka kɛ u ka gɛlɛyaw sababu ye. E fɛ, yala diinɛw bɛ ka mɔgɔw bila sira ɲuman kan wa? [Jaabi makɔnɔ. O kɔfɛ Matiyu 7:13, 14 kalan ani dakun 5nan fana, ɲɛw 146nan na.] Nin kalansen bɛ kuma fɛn wɔɔrɔ kan minnu b’an dɛmɛ k’a dɔn Ala bɛ sɔn diinɛ min na.” O fɛn wɔɔrɔ minnu bɛ gafe ɲɛ 147nan na, olu jira i barokɛɲɔgɔn na.

Kasaara/tɔɔrɔ

◼ “Ni mɔgɔ dɔw bɛ ka tɔɔrɔ, u caman bɛ miiri k’o ye Ala sago ye. Ni Ala b’an kanu yala a bɛ se ka kɛ hadamadenw ka tɔɔrɔ sababu ye wa? [Jaabi makɔnɔ. O kɔfɛ Yakuba 1:13 kalan.] E ka nin misali lajɛ min b’an dɛmɛ k’a faamu mun na Ala b’a to tɔɔrɔ ka kɛ, hali ni ale tɛ o sababu ye.” Dakunw 8-9 kalan ɲɛw 10-11nan.

◼ “Ni kasaara dɔ kɛra, mɔgɔ caman b’u yɛrɛ nininka ni Ala b’a janto mɔgɔw la tiɲɛ na, ani ni tiɲɛ na, a ɲɛ bɛ u ka tɔɔrɔ la. Yala i delila k’i yɛrɛ ɲininka o la wa? [Jaabi makɔnɔ. O kɔfɛ 1 Piɛrɛ 5:7 kalan ani dakun 11nan fana ɲɛ 11nan na.] Ala bɛna hadamadenw ka tɔɔrɔ ban pewu cogo min na, nin sɛbɛn bɛ o ɲɛfɔ.” Ɲininkali minnu bɛ ɲɛ 106nan na, olu jira i barokɛɲɔgɔn na.

Kɛlɛ/Bɛn

◼ “Mɔgɔ bɛ bɛn fɛ yɔrɔ bɛɛ la. Bɛn ka sigi dugukolo kan, yala o ye ko ye min tɛna kɛ abada wa? [Jaabi makɔnɔ. O kɔfɛ Zaburu 46:8, 9 kalan.] Ala bɛna a sagonata tiimɛ cogo min na, ka na ni bɛn ye dugukolo yɔrɔ bɛɛ la, nin gafe b’o ɲɛfɔ.” Ja min bɛ ɲɛ 35nan na, o jira a la, ani dakunw 17-21 kalan ɲɛw 33-4nan.

[Box on page 5]

An bɛ se k’a ɲɛfɔ cogo min na mɔgɔw ye k’u bɛ se ka bolomafara di walisa k’an dɛmɛ an ka baara la

“N’i b’a fɛ ka bolomafara di bi an ka baara kama min bɛ ka kɛ diɲɛ yɔrɔ bɛɛ la, ne bɛ sɔn o la ni nisɔndiya ye.”

“Hali ni an tɛ wari ɲini mɔgɔw fɛ an ka sɛbɛnw ko la, o n’a ta o ta, an bɛ sɔn bolomafara la, hali ni a ka dɔgɔ an ka baara kama min bɛ ka kɛ diɲɛ yɔrɔ bɛɛ la.”

“Laala i bɛ i yɛrɛ ɲininka an bɛ wari sɔrɔ min k’an ka baara kɛ. Bolomafaraw de sababu fɛ, minnu bɛ kɛ ni a ma kɛ diyagoya ye. N’i fana b’a fɛ ka bolomafara dɔ di bi , ne bɛ sɔn o la ni nisɔndiya ye.”