M̀ Ɓéɖé Ɓɛ́ M̀ Ké Gèɖèpɔ́ɔ̀ Jè Cɛ̃́

Ɓɛ́ m̀ ké Gèɖèpɔ́ɔ̀ ɓǎto jǔ ní, m̀ ɓéɖé ɓɛ́ m̀ ké ɔ jè cɛ̃́. Nì ɓǎto ɓě dyuò nì nyɛ́nɛ́ ké wa ɖáà? Ǹdye, wa nyuɛ náa ní. Gèɖèpɔ́ɔ̀ mɔ́ ɓɛ́ m̀ ké ɔ nyɛ́nɛ́ dyuò, ɔ kè ɓɛ́ m̀ kéɛ ɖá ɖekè. Gèɖèpɔ́ɔ̀ nyɛ́nɛ́ mɔ̀ Jɛ̀hóvà. (Wɛ́ɖɛ́ 83:18, New World Translatıon [NW]; Máfíò 6:9) Ké ɖeɛɛ, m̀ ɓéɖé ɓɛ́ m̀ ké ɖɛ ɓě Gèɖèpɔ́ɔ̀ ɖɛ̀ɓɛ̀ mú ɔ kè ɖɛ ɓě ɔ se mú ɖɛ̀ɓɛ̀ kɛɛ dyí dyuò. M̀ ɓéɖé ɓɛ́ m̀ ké ɔ ɓǎto ɓě kè ɔ mú-nyɛ́-nyɔ̀ ɓě dyí dyuò. Ɔ ɖú ti dyí ɓɛ́ à ké nyɔ ɖò dyí dyuò. Báɓòɔ̀ ɖá ɔ mɔ̀ fɔ̀nɔ̀-hwòɖǒ ɓɛ́ à ké ti wáká po ɓɛ́ à ké Jɛ̀hóvà jè cɛ̃́.—Ìfísĩ̀ɔ̀ 5:15, 16.

Gèɖèpɔ́ɔ̀ ɓǎto ɓě nyu ɖɛ dè ɔ hwìɖǐiɛ. Poìn nì ɓǎto ɓěɔ̀ jè hwìɖǐi. Ɔ jǔ ké m̀ dyi wa kpɔ̃ gbàà-kà, ké m̀ dyi ɖɛ ɓě wa se mú ɖɛ̀ɓɛ̀ kɛɛ nyu ní, nìí, wa mu nì ɓǎto ɓě jǔùn kánáá pūù? Hée, ɔ se ná nì! Kà dyúáɖòɔ̀ kǎà m̀ dyi mɔ́ ɓɛ́ m̀ ké Gèɖèpɔ́ɔ̀ ɓǎto jǔ ní, nìí, m̀ ɓéɖé ɓɛ́ m̀ ké ɖɛ dè ɔ hwìɖǐiɛɛ nyu.—Jɔ̃́ɔ́ 4:24.

Ɓiè-kpò séín ní nyuɛ ɓɛ́ nyɔ ké Gèɖèpɔ́ɔ̀ ɓǎto jǔ. Jízɛ̀ ɓɛ́ ɔ mɔ̀à Gèɖèpɔ́ɔ̀ ɓǎto xwɛ̃́ìn bũ̌in mìɔ kɛɛ cɛ̃ ma hwìè sɔ̃́ ɓě jè. Hwìè ɓěɔ̀ dyúáɖò ɓúá gboi, ké nyɔ pàɖǎ nìɛ̀ kpauń. Hwìè nìà wɛ mu ɖé mú-gbɔɔ̀-naín. Hwìè tɔ̀ɔ̀ ɓíè gboi, ké nyɔ xwéɖé wè nìɛ̀ kpauń. Hwìè nìà wɛ mu ɖé dɛ̀ ɓɛ́ sè-ná-sèɛ̀ fɛ̀ɛ̀ nìà kɛ. Ɔ xwíníín mɔ̀, m̀ dyi mɔ́ ɓɛ́ m̀ ké Gèɖèpɔ́ɔ̀ ɓǎto jǔ ní, nìí, m̀ ɓéɖé ɓɛ́ m̀ ké kà ɔ mɔ́ ɓɛ́ nyɔǔn ké ɔ ɓiè jɛ́ɛ́ kɛɛ cɛ̃́.—Máfíò 7:13, 14.