Kà M̀ Ɓɛ́ìn Gèɖèpɔ́ɔ̀ Jè Cɛ̃́ɛ Kɛ

M̀ ɓɛ́ìn Jɛ̀hóvà jè cɛ̃́ɛ dyììn ɖé Báɓòɔ̀ wuɖuún-zà-zà mú. Gèɖèpɔ́ɔ̀ gã zɔ̃̌ɔ̀ gàa ɓě ɖò ɓɛ́ wa ké ma ɔ hwìɖǐi-poìn-ɖɛ̀ ɓě ɓíɖíi céè. Ðɛ ɓě ɓɛ́ wa céè ma kà ɓíɖíiɛɛ ɖé wa ɖáìn Báɓòɔ̀ kɛ̀. Zɛ̃̌ɛ̀ kɛɛ, à cɛ̃́ Gèɖèpɔ́ɔ̀ jè dyììn ɖé Báɓòɔ̀ wuɖuún-zà-zà mú. Sepóɛɖé Gèɖèpɔ́ɔ̀ mɔ̀ nyɔ kɔ̃̀ wuɖu nìà ɖé Báɓòɔ̀ mú jèɛɛ, wa ɖáìn Báɓòɔ̀ Gèɖèpɔ́ɔ̀ Wuɖu ɖekè. À ɓɛ́ìn ɖɛ Báɓòɔ̀ cɛ̃ kɛɛ jǎà poɛ, sepóɛɖé Jɛ̀hóvà ní tɔ́mɔ́ se fɔɔ. “Gèɖèpɔ́ɔ̀ se . . . se tɔ́mɔ́ɔ ɓɛ́ìn.” (Híìbúɖúù 6:18) Gèɖèpɔ́ɔ̀ Wuɖuɔ̀ mɔ̀ jǎà.—Jɔ̃́ɔ́ 17:17.

Báɓòɔ̀ mɔ̀ nyíí-ɖɛ̀ kpa ɖɛ mìɔ ɓɛ́ ɔ sɔ̀ìn ɖé Gèɖèpɔ́ɔ̀ gboɛ. Ɔ nì kà céè-ɖɛ̀ ɓɛ́ ɖɛ̀ɓɛ̀ǐn-ɖɛ̀ɓɛ̀ǐn ɓǎ ɖò ɖoɓo ɔ dyú ɓě gboɛɛ nìà kɛ. Ɔ cɛ̃ɛ à nììn gbo kà ɓɛ́ Gèɖèpɔ́ɔ̀ mu ɓóɖó-kpàà gbo zĩàìn ɓɛ́ ɔ ké cĩ́-naín nɔ̀mɔ̀ dyíin mɔ̀à páɖédǎ kɛɛ jǔ kɛ. Báɓòɔ̀ cɛ̃ ɖɛ ɓě ɓɛ́ Gèɖèpɔ́ɔ̀ nyuó zɔ̃̌ɔ̀ kè ɖɛ ɓě ɔ nì nyuɛń kàǔn ɔ kè ɖɛ ɓě ɓɛ́ ɔ mu nyuùn ɖé dyúa ɓó ɔ dyú ɓě ɓɛ́ ɔ ɓɛ́ìn hwòɖǒ kɔ̃ dèɛ̀ kɛ bììɛɛ à gbo. Ké ɖeɛɛ, ɔ tɛ̀mɛ̀ìn à nììn kà à ké fũ̀à-fṹá-ɖɛ̀ ɓě dyi zĩ̀ìn nyɛ ɔ kè kà à ké múàǔn nìɛ̀.—2 Tímétè 3:16, 17.

Jɛ̀hóvà Zàse Ɓěɔ̀ mɔ̀ Gèɖèpɔ́ɔ̀ ɓǎto ɓě, ké wa mu m̀ gbo kpáùn ɓɛ́ m̀ ké ɖɛ Báɓòɔ̀ tɛ̀mɛ̀ìn nyɛɛ múin wɔ̃́. Cɛ̃ɛ wa gbo pū kà ɓɛ́ m̀ mɔ́ ɓɛ́ m̀ ké Báɓòɔ̀ cɛ̃́ kɛ. Wa ní kpɔ̃ wíɖí ɓó Báɓòɔ̀ tɛ̀mɛ̀ìn jè. (Máfíò 10:8) Ɓó kɔ̃in ɖeɛɛ, m̀ ɓɛ́ìn Kɛ́ɖɛ́ì ɖeín-sí-nyɔ̀ ɓěɛ̀ dyí-poìn-poìn ɓěɔ̀ mú muɛ. Wa ɓéɖé dyí-poìn-poìn ɓě nìà kɛ ɖé ɓièìn-naín ɓě wa ɖáìn Kĩ́dɔ̃̀ Hɔ́ɔ̀ kɛɛ mú. M̀ dyi Kɛ́ɖɛ́ì ɖeín-sí-nyɔ̀ ɓěɛ̀ dyí-poìn-poìn ɓěɔ̀ mú mu ní, nìí, nì ɖɛ-dyuò-dyuò ɓá Gèɖèpɔ́ɔ̀ jè dyíɛɛ mu kɔ̃ kpáùn wàɖà.

M̀ ɓɛ́ìn Gèɖèpɔ́ɔ̀ jè cɛ̃́ɛ dyììn ɖé ɖɛ ɓě ɔ ɖǎà mɛɛ mú. Báɓòɔ̀ ɖá, “Gèɖèpɔ́ɔ̀ mɛ zɔ̃̌ɔ̀ dyɔɔ̀ kè ɓóɖó-kpàɔ̀.” (Jɛ́nɛ́sì 1:1) Ti ɓɛ́ Gèɖèpɔ́ɔ̀ mɛ ma “dyɔɔ̀” kɛɛ, ɔ mɛ ma dyóɖóɔ̀ ɖekè. Ðɛ́ ɖɛ nìà kɛ cɛ̃ à gbo ɓá Gèɖèpɔ́ɔ̀ jè dyíɛ́? Ɔ cɛ̃ɛ à gbo kà ɓɛ́ Jɛ̀hóvà ɓéɖé kpé mìɔ kɛ. Ɔ ɖòùn mɔ̀ nyɔ ɓɛ́ìn ma ɖɛ ɓɛ́ ɔ ku wɔ̃ kà dyóɖóɔ̀ nìà kɛɛ mɛɛ. Ðɛ ɔ cɛ̃ à gbo ɖeɛɛ mɔ̀, Jɛ̀hóvà ɓéɖé fɔ̀nɔ̀-hwòɖǒ mìɔ, sepóɛɖé ɔ kɔ̃̀ ɓɛ́ ɔ ké ma fɔ̀nɔ̀-hwòɖǒ ɓéɖé ɓɛ́ ɔ ké ma dyóɖó ɓɛ́ ɔ nyíà à zùzù kè ce kánáá pū, ké ɔ ní mɔ́ìn nyɛɛ mɛ.

Jɛ̀hóvàà mɛɛ-ɖɛ̀ ɓě tɛ̀mɛ̀ìn kà ɓɛ́ ɔ ɖɛ̀ɓɛ̀ à múɛ. Poìn ɓáá-ɖɛ̀-ɓò kò-kò séín ɓě nìà ɓóɖó-kpàà kɔ̃ɛɛ jè hwìɖǐi. Jɛ̀hóvà ɓɛ́ìnɔ̌ má à tòɖòò-cù dyúáɖò kpeé-kpeé nyíɛ mɔɔ ɔ ké seɔ̌ má à ɖò nyí fɔɔ. Kɛɛ ɔ nyí à ɓáá-ɖɛ̀-ɓò ɓě ɓɛ́ m̀ dyi wɔ̃ dɔ̃̌ ní, wa kò ké wa ɓéɖé dyéɖé kè ɓɛ́-kà kò-kò ɓěɛ. Ðɛ ɓěa tɛ̀mɛ̀ìn kà ɓɛ́ Gèɖèpɔ́ɔ̀ ɖɛ̀ɓɛ̀ à mú, ké ɔ ɓéɖé jĩ́á-jè kè hwìɖǐi-poìn-hwòɖǒ-dyùà, ké ɔ nɔ̀mɔ̀ kpeɖeín nyɛ.—Wɛ́ɖɛ́ 104:24.