Jɛhovaa Nyɔ-Kɔ̃in-Zĩ̀ìn-Zĩ̀ìnɔ̀—Ðɛ Mɔ̀ Ɔ Xwíníín Ɓó M̀ Bììɛ

1. Xwíníínɔ̀ nyɛ́ kɔ̃̀ jè kɔ̃in-zĩ̀ìn-zĩ̀ìn ɓɛ́ nyɔùn-dyù nyuɛɛ jè kàmàà múin wɔ̃́uń wɛ̃́?

“Ḿ ÐÀ M̀ KƆ̃IN ZĨ̀ÌN.” Wuɖu ɓèà dè nyɔ hwòɖò dyi cá! Ɔ ɓɛ́ìn ná nìɛ̀ jɛ́ɛ́ ɔ jù ké m̀ dyiɛ dyí dyuò kà m̀ cɛ̃ ma ɖɛ ɖò, mɔɔ m̀ nyu ma ɖɛ ɖò ɓɛ́ ɔ po nyɔ ɖò hwòɖò ɖé ɖeiɛ. Kɛɛ, ɖɛ́ mɔ̀ wuɖu ɓè mɔ̀à, “Ḿ ɖà m̀ kɔ̃in zĩ̀ìn” kɛɛ xwíníín jɛ́ɛ́ cá kɛ́? Ɔ xwíníín mɔ̀ nyɔɔ̀ nìɛ̀ m̀ gbo cɛ̃ɛń kà m̀ kè ɔ kè mɔ̀ ɓàto ɖeɛɛ̀? Mɔɔ ɔ nìɛ̀ cɛ̃ɛń kà ɔ se ɖɛ kpáà kɛɛ jè cɛ̃́ɛ mɔ́ ɖe fɔɔ kɛɛ̀? Kɔ̃in-zĩ̀ìn-zĩ̀ìn ɓɛ́ nyɔùn-dyù nyuɛɛ jè kàmà múin wɔ̃́uń mìɔ.

2. Xwɛ̀ wa nyu Jɛhovaa nyɔ-kɔ̃in-zĩ̀ìn-zĩ̀ìnɔ̀ mɛ dèɛ̀ ɖé Baɓoɔ múɛ́? (Dyé gmɔ̀-ɓíɖíi-bɛ̃̀ɔ̀ ɖekè.)

² Kà Jɛhova nyu à mɔ̀ nyɔùn-dyù ɓèɛɛ kɔ̃in zĩ̀ɛ̀n nyɛɛ kò ɓó kà à nyu à mùe ɖò kɔ̃in zĩ̀ɛ̀n nyɛɛ gbo gàná cá. Kɔ̃in-zĩ̀ìn-zĩ̀ìn ɓɛ́ Jɛhova nyuɛɛ se hwɔìn-ɖɛ̀ ɖò ɓéɖé fɔɔ. Wɛ́ɖɛ́-céè-nyɔ̀ɔ̀ cɛ̃ɛ ma Jɛhova gbo, ké ɔ ɖá: “Jàà kɔ̃in-zĩ̀ìn-zĩ̀ìn sɔ̀ìn ɖé m̀ gbo. Ɔ nì ná ɓɛ́ nyɔ ɓè ké m̀ kpéín dyéɛ ɓɛ́ìn.”a (Wɛ́ɖɛ́ 130:​4, NWT) Ǹdye, Jɛhovaa nyɔ-kɔ̃in-zĩ̀ìn-zĩ̀ìnɔ̀ mɔ̀ “jàà kɔ̃in-zĩ̀ìn-zĩ̀ìn.” Ɔ mɔ̀ nyɔ tɛ̀mɛ̀ìn ɖɛ mɔ̀ kɔ̃in-zĩ̀ìn-zĩ̀ìn xwíníín jɛ́ɛ́ kɛɛ à dyí. Tiɔ̀ ɖíɛ́ ɓè ɓaɖaín, nyɔ ɓè céèà Baɓoɔ kɛɛ nyùìn Híìɓúɖúù-wùɖù ɖò kũ̀à mú, ɓɛ́ wa ké kɔ̃in-zĩ̀ìn-zĩ̀ìn ɓɛ́ Jɛhova nyuɛɛ jè cɛ̃. Kɛɛ, wa ní nyùìn wuɖua kũ̀à mú ɔ jù ké wa dyi kɔ̃in-zĩ̀ìn-zĩ̀ìn ɓɛ́ nyɔùn-dyù nyuɛɛ jè cɛ̃ɛń nììn.

3. Xwɛ̀ kɔ̃in-zĩ̀ìn-zĩ̀ìn ɓɛ́ Jɛhova nyuɛɛ nyu kòɛ̀ ɓó à nììnɔ̀ gbo kɛ́? (Àzédyà 55:​6, 7)

³ Jɛhova dyi nyɔ ɖò kɔ̃in zĩ̀ìn ní, ɔ sámá nyɔɔ̀ nàmàùn ɓèɔ̀ ɓó dyi. Ké ɔ kè nyɔɔ̀ ɓɛ́ìn gbo-kpɔ̃ìn-kpɔ̃ìn nɔ̀mɔ̀ dyíin ɓéɖéɛ ɖe. Jɛhovaa nyɔ-kɔ̃in-zĩ̀ìn-zĩ̀ìnɔ̀ hwɛ̀ gbɔ gáná cá, ké ɔ zĩ̀ìn nyɔ kɔ̃in tee.—Zà Àzédyà 55:​6, 7 wuɖuún.

4. Xwɛ̀ Jɛhova nyu à gbo kpáa ɓɛ́ à ké ɖɛ mɔ̀ kɔ̃in-zĩ̀ìn-zĩ̀ìn xwíníín jɛ́ɛ́ kɛɛ múin wɔ̃́ kɛ́?

⁴ Ɔ jù ké Jɛhovaa nyɔ-kɔ̃in-zĩ̀ìn-zĩ̀ìnɔ̀ dyi kò ɓó à nììnɔ̀ gbo nì, nìí, xwɛ̀ à mɔ̀ nyɔùn-dyù se mú hwɛ̀ ɓèɛɛ ɓɛ́ìn ɖɛ mɔ̀ ɔ nyɔ-kɔ̃in-zĩ̀ìn-zĩ̀ìn xwíníín jɛ́ɛ́ kɛɛ múin wɔ̃́ɔ kɛ́? Jɛhova kpá à gbo ɓɛ́ à kéɛ múin wɔ̃́ dyììn ɖé mɛ-dèìn-wùɖù ɓè kũ̀à-mu-nyùìn-nyùìn mú ɓɛ́ ɔ ké ɔ nyɔ-kɔ̃in-zĩ̀ìn-zĩ̀ìnɔ̀ jè kɔ̃in zaìn. Ðé cɛ̃́ɛ́-ɖɛ̀ nìà kɛ múɛɛ, à mú wuɖu ɓèa ɖíɛ́ ɓè jè cɛ̃́ìn. Wuɖu ɓèa mu kà Jɛhova nyu à nàmàùn bũ̀ zàà, kè kà ɔ nyu gbo-kpɔ̃ìn-kpɔ̃ìn à kè ɔ kè pṹa dyàà ɖeɛɛ à dyí tɛ̀mɛ̀ìn. Kà à muà ɖɛ-dyí-poìn-poìn ɓèa jè cɛ̃́ìn nyɛɛ, à mu à ɖɛ̀ɓɛ̀ìn-ɖɛ̀ɓɛ̀ìn Ɓà ɓɛ́ ɔ tɛ̀mɛ̀àìn ɔ nyɔ-kɔ̃in-zĩ̀ìn-zĩ̀ìnɔ̀ ɖé hwìè kò-kò ɓé múɛɛ zùo poùn mìɔ cá.

JƐHOVA ZÀ NYƆ NÀMÀÙN BŨ̀IN

5. Ðɛ́ mu kpáùn ɔ jù ké Jɛhova dyi à nàmàùn ɓèɔ̀ kɔ̃in zĩ̀ìn níɛ́?

⁵ Ðé Baɓoɔ múɛɛ, wa poìn nàmàùn kè gbɛ̀ ku xwa ɖò dyí. Kã́á Dèɓé dè ma ɔ nàmàùn ɓèɔ̀ mɛ, ké ɔ ɖá: “Ní nàmàùn ɓèɔ̀ nì kà ní-nɔ̀ɔ̀ nìà kɛ, ké ɔ nìa ḿ manauń. Wa ku xwa kà gbɛ̀ nìà kɛ, ké ḿ seɛ xwa ɓɛ́ìn ɖe.” (Wɛ́ɖɛ́ 38:4) Kɛɛ, Jɛhova zĩ̀ìn nyɔ ɓè ɓɛ́ wa táà wa nàmàùn ɓèɔ̀ dyíɛɛ kɔ̃in. (Wɛ́ɖɛ́ 25:18; 32:5) Híìbúɖúù-wùɖù kɔ̃̀ xwíníín-mú-zà-zà mɔ̀à “zĩ̀ìn kɔ̃in” kɛɛ xwíníín mɔ̀, ɓɛ́ m̀ ké ɖɛ ɖò “dyií ɖú” mɔɔ m̀ kéɛ “kpa.” À ɓɛ́ìn hwìɖìi poɛ̀n kà Jɛhova mɔ̀ gàa kui-kui ɖò ɓɛ́ ɔ ɖú à gbɛ̀ ku xwa ɓè mɔ̀à nàmàùn wɛ̃ɛ dyí, ké ɔ kpa wa kɛ.

6. Xwɛ̀ dɛ̀ Jɛhova po à nàmàùn ɓèɔ̀ kɛɛ nyu ɓoún cɛ̃̀ɛ̀ kɛ́?

⁶ Mɛ-dèìn-wùɖù ɖò nì ɓó ɖe ɓɛ́ ɔ tɛ̀mɛ̀ìn kà Jɛhova po à nàmàùn ɓèɔ̀ ɖé dà vɛ̃in nyɛ. Wɛ́ɖɛ́ 103:12 cɛ̃ɛ, ké ɔ ɖá: “Kà dyóɖó-xwáɖáún-wóɖóìn-naínɔ̀ kèɛ̀ dyi-kpáìn-naín nyuà gboi tɔmɔìn nyɛɛ, kàà à kè à nàmàùn ɓè ɓɛ́ ɔ zàà à bũ̀in ké ɔ kpaà ɖé dà vɛ̃in nyɛɛ ɖà gboi tɔmɔìn nyu.” Dyóɖó xwáɖáún-wóɖóìn-naínɔ̀ kè ɔ dyi-kpáìn-naínɔ̀ mɔ̀ dà tɔmɔìn gboi ɓè cá. Wa sɔ̃́ɔ̀ séè gmɔìn ɖò. Ɔ xwíníín mɔ̀, Jɛhova zà à nàmàùn ɓèɔ̀ à bũ̀in, ké ɔ poɛ dà vɛ̃in-vɛ̃in cá. Ɔ mɔ̀ Jɛhovaa nyɔ-kɔ̃in-zĩ̀ìn-zĩ̀ìnɔ̀ mɛ-dè-kà nɔ̀mɔ̀ dyíin ɖò cá!

7. Xwɛ̀ Baɓoɔ nyu ɖɛ Jɛhova nyùìn à nàmàùn ɓèɔ̀ múɛɛ mɛ dèɛ̀ kɛ́? (Mákà 7:​18, 19)

⁷ Jɛhova zà à nàmàùn ɓèɔ̀ à bũ̀in, ké ɔ po wa dà vɛ̃in dyɛo, kɛɛ ɔ dèìn wa hwòɖò xwíníín dyi kánáá puù? Ɔ se ná nì fɔɔ. Kã́á Hɛ́sèkádyà céè ma ɓá Jɛhova jè dyí, ké ɔ ɖá: “M̀ ɖà ní nàmàùn séín ɓèɔ̀ ɖé m̀ ɖeín zĩ̀ìn.” (Àzé. 38:​9, 17) Mɛ-dèìn-wùɖù nìà kɛ tɛ̀mɛ̀ìn kà ɓɛ́ Jɛhova zà nyɔ ɓè ɓɛ́ wa táà waà nàmàùn ɓèɔ̀ dyiɛɛ wa bũ̀in, ké ɔ poɛ xwáɖáún wɛ̃. Ðɛ ɓɛ́ìn wuɖu ɓè nìà wɛ xwíníín-mú-zà-zà jùɛ ɖeɛɛ kɛà kɛ̀: “M̀ ɖàa nyu ké ní [nàmàùn ɓèɔ̀] hwɔìn kà wa seɔ́ má kpá kɛ.” Baɓoɔ nɛ́ìn fɔ̀nɔ̀-hwòɖò nìà kɛ jìì kɔ̃ ɖé mɛ-dèìn-wùɖù kà kò ɖò mú ɖe. Ɔ céè ɖé Mákà 7:​18, 19 mú. (Zàà wuɖuún.) Ðéɛ̀ wa cɛ̃ɛ kà ɓɛ́ Jɛhova po à nàmàùn ɓèɔ̀ ɖéé ɖé dyóóɔ̀ hwuɖuɛ. Ðé ti sùà múɛɛ, ɔ se ma xwa fɛ̃́ìn ɓɛ́ nyɔ ɖò ké ma ɖɛ ɓè kpá ɖé dyóóɔ̀ hwuɖu dyi vɛ̃in nyɛɛ ɖe zà.

8. Ðɛ́ ɓè à ɖà cɛ̃́ kàùn wɛ̃́?

⁸ Dyììn ɖé mɛ-dèìn-wùɖù ɓè nìà kɛ múɛɛ, à ɖàa cɛ̃́ kà ɓɛ́ Jɛhova dyi à kɔ̃in zĩ̀ìn ní, ɔ zà gbɛ̀ ku xwa ɓɛ́ nàmàùn dè nyɔ dúɛɛ à dúɛ. Ðɛa kɔ̃̀ jè Dèɓé cɛ̃ɛ ma, ké ɔ ɖá, “Nyɔ ɓè ɓɛ́ mana nì kɔ̃ɛɛ mɔ̀ nyɔ ɓè kɔ̃̀ nàmàùn ɓè ɓɛ́ Geɖepɔɔ ɖà kɔ̃in zĩ̀ìn, ké Geɖepɔɔ ɖà waà ɖɛ gbà ɓèɔ̀ bũ̀in wɔɔ̀ kɛ. Nyɔ ɓè ɓɛ́ mana nì kɔ̃ɛɛ mɔ̀ nyɔ [Jɛhova] se zaa kpɔ̃̀ìn ɓó ɖɛ gbà ɖò nyu jèɛ.” (Wóɖ. 4:​7, 8) Ɔ mɔ̀ jàà kɔ̃in-zĩ̀ìn-zĩ̀ìn!

JƐHOVA SÁMÁ ƁÓ NÀMÀÙN DYI

9. Mɛ-dèìn-wùɖùɔ̀ nyɛ́ Jɛhova nyùìn kũ̀à mú ɓɛ́ ɔ kéɛ kɔ̃in zaìn kà ɔ zĩ̀ìn nyɔ kɔ̃in gàná cá kɛ́?

⁹ Jɛhova nyùìn mɛ-dèìn-wùɖù tɔ̀ɔ̀ ɓè kũ̀à mú, ɓɛ́ ɔ ké à gbo kpá ɓɛ́ à kéɛ múin wɔ̃́, kà ɓɛ́ dyììn ɖé mú-gbààìn-ɖɛ̀ɔ̀ múɛɛ, ɔ sámá ɓó nyɔ ɓè nàmàùn ɓè dyi ɔ jù ké wa dyi wa nàmàùn ɓèɔ̀ dyi táà níɛ. Baɓoɔ cɛ̃ɛ kà ɓɛ́ Jɛhova wɔɔ̀ mɔɔ dèɖè nyɔ nàmàùn bũ̀in, ké ɔ hwɔ nyɔ múɛ. Ðɛ nìà kɛ nyuɛ ké nàmàùn-nyɔ̀ɔ̀ nì séɖéé tá-tá. (Wɛ́ɖɛ́ 51:7; Àzé. 4:4; Jɛ̀ɖ. 33:8) Jɛhova mìɔùn dè ɖɛ sɔ̀ìn ɖé ɖɛ nìà kɛ múɛɛ mɛ, ké ɔ ɖá: “Kɛbì ɓèɛ̀ nàmàùn ɓèɔ̀ mɛ bo mìɔ kà táɓòtíì nìà kɛɛ, ní mu wa nyuùn ɓɛ́ wa ké séɖéé tá-tá nì. Kɛbì wa mɛ bo kà nyɔmɔɔ nìà kɛɛ, nì mu wa nyuùn ɓɛ́ wa ké nì kà ɓáɖáá-fíɖí nìà kɛ.” (Àzé. 1:18) Ɔ kàmà mú cá ɓɛ́ nyɔ ké bɛ̃̀ zĩ-zã ɖò ɖɔ ɖò bũ̀ zà. Kɛɛ, dyììn ɖé ɖɛ-dyí-poìn-poìn nìà kɛ múɛɛ, Jɛhova cɛ̃ɛ à gbo wáɖáá kà ɓɛ́ à nàmàùn ɓèɔ̀ ɓɛ́ìn à bũ̀in dèɖèɛ̀ cá, ɓɛ́ nyɔ ɖò ké se wa dyéɛ ɓɛ́ìn ɖeɛ.

10. Ðɛ́ mɔ̀ mɛ-dèìn-wùɖù kà kò ɖò ɓɛ́ Jɛhova nyùìn kũ̀à mú ɓɛ́ ɔ kéɛ tɛ̀mɛ̀ìn kà ɔ zĩ̀ìn nyɔ kɔ̃in gàná cá kɛ́?

¹⁰ Ðé cɛ̃́ɛ́-ɖɛ̀ nyɔ zià kɛ múɛɛ, wa poìn nàmàùn kè “kpa” dyí. (Máf. 18:​32-35) Ɔ jèɛɛ, ti séín ɓɛ́ à nyu Jɛhova nàmàùn bũ̀ɛɛ, ɔ nì pu kà à kpaɔ̀ nì kɔ̃ kpáuń kánáá pu kɛ. À ɓéɖé kpa vɛ̀nɛ̀ ɖò ɓó Jɛhova bìì! Kɛɛ, ɔ dyi à kɔ̃in zĩ̀ìn ní, ɔ nì pu kà ɔ táà kpa ɓɛ́ à kɔ̃̀ à kéɔ́ má pɛ́ɛ̀ kɛɛ dyiɛ. Ɔ ní kpɔ̃ nyɔ dyi ɓó nàmàùn ɓɛ́ ɔ ɖà kɔ̃in zĩ̀ìn nyɛɛ jè. Ɔ mɔ̀ ɖɛ-dyí-poìn-poìn nɔ̀mɔ̀ dyíin ɖò cá ɓɛ́ ɔ tɛ̀mɛ̀ìn kà à hwòɖò nyu nìɛ̀ ɔ jù ké Jɛhova dyi à kɔ̃in zĩ̀ìn níɛ!

11. Ðɛ́ mɔ̀ à nàmàùn ɓèɔ̀ “ké dyi gbaà” kɛɛ xwíníín nyɛ́? (Àpɔ́sò 3:19)

¹¹ Jɛhova ní táà à kpa ɓèɔ̀ mɔɔ à nàmàùn ɓèɔ̀ dyi pu, kɛɛ ɔ gbaà wa dyi. (Zà Àpɔ́sò 3:19 wuɖuún.) Ɔ hwɔìn wa kéɔ́ kpa m̀ ɓéɖéɛɛ céè-ɖɛ̀ ɖò kɔ̃ céè ɓɛ́ wa kéɛ bɛ̃̀ kɔ̃in cɛ̃ìn nyɛ. Kɛɛ, nɔ̀ɓà ɓèɔ̀ nì bɛ̃̀ ɓèɔ̀ xwíɖíi, ké nyɔ ɖò ɓɛ́ìn wa dyéɛ ke. Kɛɛ, ɓɛ́ m̀ ké ɖɛ ɖò dyi gbaà kɛɛ kò ní. Ɓɛ́ à ké mɛ-dèìn-wùɖù nìà kɛ múin wɔ̃́ ní, ɔ mɛ nì à hwìɖìi kà céèìn-nì ɓɛ́ wa nyùìn ma kũ̀à mú ɖé ti sùà múɛɛ ɓɛ́ìn ma dyi gbaà wàɖà-wàɖà kɛ. Nyɔ ɖò ɓɛ́ìn ɖɔ-wɔ̃̀ te-te ɖò dyí ɖúɛ ké ɔ sámá ɓó céè-dyèɖè ɖò dyi. Ɔ jèɛɛ, ɔ jù ké wa dyi ma kpa ɖò céè-ɖɛ̀ ɖò kɔ̃ “dyi gbaà” ní, ɔ pa ma dyi gàná cá. Nyɔ ɖò se ma ɖɛ céè ma ɓóɛɛ dyéɛ ɓɛ́ìn ɖe fɔɔ. Ɔ nì ma pu kà kpa ɖò se ma céè-ɖɛ̀ɔ̀ kɔ̃ céèɛ. Ɔ po à múàùn mìɔ ɓɛ́ à kéɛ dyí dyuò kà ɓɛ́ Jɛhova ní táà à nàmàùn ɓèɔ̀ dyi ɖòùn puɛ, kɛɛ ɔ gbaà wa dyi gàná cá kɛ!—Wɛ́ɖɛ́ 51:9.

12. Ðɛ́ à cɛ̃́ dyììn ɖé mɛ-dèìn-wùɖù ɓáà ní-kpò ɖò jè dyíɛɛ mú kɛ́?

¹² Jɛhova nyùìn mɛ-dèìn-wùɖù nìà wɛ hwɔìn-ɖɛ̀ ɖò kũ̀à mú ɓɛ́ ɔ ké kà ɔ nyu nàmàùn dyi gbaà kɛɛ mɛ dè. Ɔ ɖá: “Ḿ ɖà ɓèɛ̀ gma-ɖuà-ɖuà ɓèɔ̀ ɓó ḿ dyúa dyi sámá kà ní-kpò cɛ̃̀à ɖé dyií dyiɛ. Ḿ ɖà ɓèɛ̀ nàmàùn ɓèɔ̀ ɓó dyi zà kà dunu cɛ̃̀à ɖé dyií dyiɛ.” (Àzé. 44:22) Jɛhova dyi à kɔ̃in zĩ̀ìn ní, ɔ nì pu kà ɔ kéɔ́ má ní-kpò ɖò kũ̀à mú nyùìn ɓɛ́ ɔ kéɛ à nàmàùn ɓèɔ̀ kɔ̃in ɓáìn ɓɛ́ wa ké dyi pa gàná cá kɛ.

13. Jɛhova dyi à kɔ̃in zĩ̀ìn ní, xwɛ̀ à hwòɖò nyu nìɛ̀ kɛ́?

¹³ Ðɛ́ ɖɛ nìà kɛ tɛ̀mɛ̀ìn à kɛ́? Jɛhova dyi à kɔ̃in zĩ̀ìn ní, à mɛ ɓɔ́ à mìɔùn zaa kpɔ̃ìn ɓó à nàmàùn ɓèɔ̀ jè ɖé à fɛ̀ɛ̀-wè séín mú. Dyììn ɖé Jizɛ Kɛ́ɖɛ́ìɛ̀ sáa-zà-zàɔ̀ múɛɛ, Jɛhova ɖà à kpa ɓèɔ̀ dyi táà gàná cá, ké kpa ɓèa jè se nì ɖe fɔɔ. Ðɛ ɓɛ́ jàà kɔ̃in-zĩ̀ìn-zĩ̀ìn sɔ̀àìn ɖé Jɛhova gboɛ mu à bìì nyuùn ɔ jù ké à dyi à nàmàùn ɓèɔ̀ dyi táà níɛɛ nìàò wɛ̀.

JƐHOVA KPƆ̃ À JÈ DYI ÐE

14. Xwíníínɔ̀ nyɛ́ kɔ̃̀ jè à ɓɛ́àìn Jɛhovaa nyɔ-kɔ̃in-zĩ̀ìn-zĩ̀ìnɔ̀ hwòɖò kɔ̃ dèɛ̀ kɛ́? (Dyé dyi-dyé-ɖɛ̀ ɓèɔ̀ ɖekè.)

¹⁴ Jàà kɔ̃in-zĩ̀ìn-zĩ̀ìn ɓɛ́ ɔ sɔ̀àìn ɖé Jɛhova gboɛɛ nyuɛ ké à kè ɔ kè ɓéɖé gbo-kpɔ̃ìn-kpɔ̃ìn nɔ̀mɔ̀ dyíin. Ɔ kpá à gbo ɓɛ́ à ké à mìɔùn zaa-kpɔ̃̀ìn-kpɔ̃̀ìn dyí ɓàɖàìn. À se kɔ̃̀ à ké fã̀à peɖe kà ɓɛ́ Jɛhova mu à xwíníín dyi dèìn, ké ɔ mu hwìè dyi mɔ́uń nì, ɓɛ́ ɔ ké à gà dyéìn nyɛ. Ðɛ nì náa se kpáa mu sɔ̀ùn-sɔ̀ùn. Jɛhova dyi níín ɔ zĩ̀ìn à kɔ̃ino ní, xwíníínɔ̀ nyɛ́ kɔ̃̀ jè à ɓɛ́àìn ɔ wuɖuɔ̀ hwòɖò kɔ̃ dèɛ̀ kɛ́? Jɛhova cɛ̃ɛ ma kpáá-ɖɛ̀-cɛ̃-nyɔ̀ Jɛ̀ɖèmádyà gbo, ké ɔ ɖá: “Ní mu waà ɖɛ gbà ɓèɔ̀ kɔ̃in zĩ̀ìn. Waà nàmàùn ɓèɔ̀ jè mu ḿ hwìɖìi hwɛ̀ìn.” (Jɛ̀ɖ. 31:34) Àpɔ́sò Pɔ́ɔ̀ cɛ̃ ma ɖɛ dyúáɖòɔ̀, ké ɔ ɖá: “Waà nàmàùn ɓèɔ̀ jè mu ḿ hwìɖìi hwɛ̀ìn.” (Híì. 8:12) Kɛɛ, ɖɛ́ mɔ̀ wuɖu ɓèa xwíníín jɛ́ɛ́ cá kɛ́?

15. Jɛhova dyi níín à nàmàùn ɓèɔ̀ jè mu ɔ hwìɖìi hwɛ̀ìn ní, ɖɛ́ mɔ̀ ɔ xwíníín nyɛ́?

¹⁵ Baɓoɔ dyi ɖɛ ɖò ké nyɔ “hwìɖìi nì” kɛɛ jè cɛ̃ ní, ɔ xwíníín se ɓɛ́ nyɔ ké ɖɛ ɖò jè hwìɖìi pɛ̃́ìn, mɔɔ nyɔ kéɛ jè hwìɖìi poìn ɖòùn puɛ. Kɛɛ, ɔ xwíníín ɖò mɔ̀ ɓɛ́ nyɔ ké ɓó ɖɛ ɖò nyùìn. Ðɛ-gbà-nyu-nyɔ̀ ɓè ɓɛ́ wa ɓá ma kà dyií ɓó Jizɛ wáùn wɛ̃ɛ ɖò cɛ̃ɛ ma Jizɛ gbo, ké ɔ ɖá: “Ní jè mɛ nì m̀ hwìɖìi, ti nì mu nì kã́á-ɓòɖòɔ̀ kɔ̃ muùn wɛ̃.” (Ðúù 23:​42, 43) Ɔ seɛ ma Jizɛ gbo cɛ̃ɛń nì, ɓɛ́ Jizɛ kè ma ɔ jè hwìɖìi poìn pu ɓó tia ɓaɖa. Ké ɖɛ Jizɛ cɛ̃ ma kɛɛ tɛ̀mɛ̀ìn kà ɓɛ́ ɔ mu ma ɖɛ ɖò nyuùn, ɓɛ́ ɔ ké ɖɛ-gbà-nyu-nyɔ̀ɔ̀ gĩɔ zà kɛ. Ɔ jèɛɛ, Jɛhova dyi níín à nàmàùn ɓèɔ̀ jè mu ɔ hwìɖìi hwɛ̀ìn ní, nìí, ɔ nìɛ̀ cɛ̃ɛń kà ɔ se à ɖɛ ɖò bũ̀ nyuɛ́ mu ɓá à nàmàùn ɓèɔ̀ jè dyíɛ. Ɔ se à gà dyéɛ̀n mu ɖé dyúa ɓó nàmàùn ɓè ɔ ɖà kɔ̃in zĩ̀ìn nyɛɛ jè.

16. Xwɛ̀ Baɓoɔ nyu buɛ̀-buɛ̀ ɓɛ́ ɔ sɔ̀àìn ɖé jàà kɔ̃in-zĩ̀ìn-zĩ̀ìn múɛɛ mɛ dèɛɛ kɛ́?

¹⁶ Baɓoɔ nyùìn mɛ-dèìn-wùɖù kà kò ɖò kũ̀à mú ɖe, ɓɛ́ ɔ ké à gbo kpá ɓɛ́ à ké buɛ̀-buɛ̀ ɓɛ́ ɔ sɔ̀ìn ɖé jàà kɔ̃in-zĩ̀ìn-zĩ̀ìn múɛɛ múin wɔ̃́. Sepoɛɖe à se mu hwɛ̀ jèɛɛ, Baɓoɔ ɖá à mɔ̀ “nàmàùn gìì.” Kɛɛ à po Jɛhova zùo ɓó à kɔ̃in zĩ̀ìn jè, sepoɛɖe à hwɔ̀ìn gìì ɓè ɓɛ́ wa “ɖà nàmàùn xwaún pó” kɛ. (Wóɖ. 6:​17, 18; Wɛ̀ɖ. 1:5) Ǹdye, Jɛhovaa kɔ̃in-zĩ̀ìn-zĩ̀ìnɔ̀ zi nyɔ múàùn poɛ̀n mìɔ, sepoɛɖe à se nàmàùn gìì ɖe.

17. Xwɛ̀ nyɔ-kɔ̃in-zĩ̀ìn-zĩ̀ìn nyu dyi-káná-káná dyàà kɛ́? (Àzédyà 53:5)

¹⁷ Zà Àzédyà 53:5 wuɖuún. Mɛ-dèìn-wùɖù hwɛ̀ìn-gbɔ ɓɛ́ à muà jè cɛ̃ìn nyɛɛ poìn à kè nyɔ ɓè ɓɛ́ wa ɓéɖé wɛ́ gbà ɖòɛɛ dyí. Kɛɛ, sepoɛɖe Jɛhova tò ma mú-gbààìn-ɖɛ̀ɔ̀ dyììn ɖé ɔ dyú-gààɔ̀ mú jèɛɛ, ɔ nyuɛ ké à káná dyi ɖé zùùn. (1 Píɖɛ̀ 2:24) Mú-gbààìn-ɖɛ̀ɔ̀ nyuɛ ké à kè Jɛhova ɓéɖé gbo-kpɔ̃ìn-kpɔ̃ìn ɓɛ́ nàmàùn mɔ̀à zùùn-wɛ̀ kɛ gbɔɔ̀ mà kà múɛɛ ɖe. Kà dyúáɖò kà nyɔ ɓɛ́ ɔ ɓéɖé wɛ́ gbà ɖòɛ dyià dyi káná ní ɔ kpáà múàùn wɛ̃ɛ, kàà à mɔ̀ùn kpá múàùn ɖekè ɔ jù ké à dyi dyi káná ɖé zùùn, ké Jɛhova dyi à jè dyi kpɔ̃ ɖe dyììn ɖé ɔ nyɔ-kɔ̃in-zĩ̀ìn-zĩ̀ìnɔ̀ mú ní.

ÐƐ MƆ̀ JƐHOVAA NYƆ-KƆ̃IN-ZĨ̀ÌN-ZĨ̀ÌNƆ̀ XWÍNÍÍN ƁÓ À BÌÌƐ

18. Ðɛ́ à ɖà cɛ̃́ dyììn ɖé mɛ-dèìn-wùɖù kò-kò ɓè nìà ɖé Baɓoɔ múɛɛ mú ɓá Jɛhovaa nyɔ-kɔ̃in-zĩ̀ìn-zĩ̀ìnɔ̀ jè dyíɛ́? (Dyé gbɔ̀ɖɔ̀ɔ̀ nìà kɛ ɖekè, “Kà Jɛhova Nyu À Kɔ̃in Zĩ̀ɛ̀n Nyɛ.”)

¹⁸ Ðɛ́ à ɖà cɛ̃́ dyììn ɖé mɛ-dèìn-wùɖù ɓè nìà ɖé Baɓoɔ múɛɛ mú ɓá Jɛhovaa nyɔ-kɔ̃in-zĩ̀ìn-zĩ̀ìnɔ̀ jè dyíɛ́? Jɛhova dyi à kɔ̃in zĩ̀ìn ní, ɔ nyuɛ náa gàná cá, ké ɔ jè hwɛ̀ ɔ hwìɖìi fɔɔ. Ðɛ nìà kɛ nyuɛ ké à kè à dyɔún Ɓàɔ̀ ɓɛ́ìn gbo-kpɔ̃ìn-kpɔ̃ìn nɔ̀mɔ̀ dyíin ɓéɖéɛ. Kɛɛ, ɔ mɛ nì à hwìɖìi kà jàà kɔ̃in-zĩ̀ìn-zĩ̀ìn mɔ̀ nyíì-ɖɛ̀ kɛ. Ɔ sɔ̀ìn ɖé Jɛhovaa ɖɛ̀ɓɛ̀ìn-ɖɛ̀ɓɛ̀ìn kè ɔ kpeɖeɛ̀-dyíin-nɔ̀mɔ̀-nɔ̀mɔ̀ ɓɛ́ ɔ tɛ̀mɛ̀ìn à mɔ̀ nàmàùn-nyɔ̀ ɓèɛ dyíɛɛ mú. Ɔ se ɖɛ ɓɛ́ nyɔùn-dyù ɓéɖé kpé ɓó ɔ dyé jèɛ.—Wóɖ. 3:24.

19. (a) Ðɛ́ kɔ̃̀ jè à mɛ ɓéɖéà zùo-po-hwòɖò kɛ́? (Wóɖómà 4:8) (b) Ðɛ́ à mu jè cɛ̃ìn ɖé cɛ̃́ɛ́-ɖɛ̀ nyɔ kɔà ɓó dyíɛɛ mú kɛ́?

¹⁹ Zà Wóɖómà 4:8 wuɖuún. À ɖò-ɖò séín mɛ ɓéɖé zùo-po-hwòɖò kà ɓɛ́ Jɛhova mɔ̀ “jàà kɔ̃in-zĩ̀ìn-nyɔ̀” kɛ! (Wɛ́ɖɛ́ 130:4 nwt) Kɛɛ, à kɔ̃in-zĩ̀ìn-zĩ̀ìnɔ̀ ɓá ɖɛ kpa ɖɛ ɖò dyí. Jizɛ cɛ̃ɛ ma jè, ké ɔ ɖá: “Ɔ jù ké ɖɛ gbà ɓè ɓɛ́ nyɔùn ɓè nyu ɓè bũ̀ɛɛ jè se ɓè hwìɖìi hwɛ̀ ní, nìí, ɓè nììn ɖɛ gbà ɓèɔ̀ jè se ɓè Ɓàɔ̀ hwìɖìi hwɛ̀ɛ̀ mu ɖekè.” (Máf. 6:​14, 15) Ɔ jèɛɛ, ɔ kpa ɖɛ ɓɛ́ à ké Jɛhovaa nyɔ-kɔ̃in-zĩ̀ìn-zĩ̀ìnɔ̀ dyéìn. Kɛɛ, xwɛ̀ à ɓɛ́ìn náa nyuɛ kɛ́? Cɛ̃́ɛ́-ɖɛ̀ɔ̀ nyɔ kɔà ɓó dyíɛɛ mu ɖɛ ɓè ɔ ɓá dyíɛɛ à dyí tɛ̀mɛ̀ìn.