Po Jɛhovaa Nyɔ-Kɔ̃in-Zĩ̀ìn-Zĩ̀ìnɔ̀ Jè Jàà

1-2. Ðɛ́ mɔ̀ hwòɖò-dyi-dè-dè ɓɛ́ nyɔ ɓè ɓɛ́ wa táà waà nàmàùn ɓèɔ̀ dyiɛɛ ɓɛ́ìn ɓéɖéɛ kɛ́? (Dyé dyi-dyé-ɖɛ̀ɔ̀ ɖekè.)

KÃ́Á Dèɓé dyuò ma kà nyɔ ɖòɛ̀ hwòɖò-ɖé-ɖei-kpá-kpá ɓó nàmàùn ɓè ɓɛ́ ɔ ɖà ma nyuɛ jè nyu nìɛ̀ kɛɛ dyí. (Wɛ́ɖɛ́ 40:12; 51:3; zà-wuɖu-da) Ɔ nyu ma ɖɛ-xwa-bĩ-bĩ vɛ̀nɛ̀ ɓè ɖé ɔ cĩ́-cĩ́ɔ̀ mú. Kɛɛ, ɔ táà ma ɔ nàmàùn ɓèɔ̀ dyi, ké Jɛhova zĩ̀ìn ma ɔ kɔ̃in. (2 Sám. 12:13) Ɔ nì ma ná jèɛɛ, Dèɓé wɔ̃́ ma hwòɖò-dyi-dè-dè ɓɛ́ ɔ sɔ̀ìn ɖé Jɛhovaa nyɔ-kɔ̃in-zĩ̀ìn-zĩ̀ìnɔ̀ múɛɛ jè múin ɖekè.—Wɛ́ɖɛ́ 32:1.

² À ɓɛ́ìn hwòɖò-dyi-dè-dè ɓɛ́ ɔ sɔ̀ìn ɖé Jɛhovaa nyɔ-kɔ̃in-zĩ̀ìn-zĩ̀ìnɔ̀ múɛɛ ɓéɖéɛ kà Dèɓé nì ma kà kɛ. Ɔ dè à hwòɖò dyi cá ɓɛ́ à kéɛ dyí dyuò kà ɓɛ́ Jɛhova mɔ́ ɓɛ́ ɔ ké à nàmàùn séín ɓèɔ̀ kɔ̃in zĩ̀ìn ɔ jù ké à dyi wa dyi táà, ké à dyi wa mú wɔ̃́ìn, ké à dyi vɔ̃ ɓɛ́ à ké se wa nyu ɖe fɔɔ níɛ! (Nɔ́ɔ́ 28:13; Àpɔ́. 26:20; 1 Jɔ̃́ɔ́ 1:9) Ké ɔ dè à hwòɖò dyi ɖekè ɓɛ́ à kéɛ dyí dyuò kà ɔ dyi à kɔ̃in zĩ̀ìn ní, ɔ nyuɛ gàná cá, ké ɔ hwɔìn kà à seɔ́ má nàmàùn ɖò nyu fɔɔ kɛ!—Ìzí. 33:16.

3-4. Xwɛ̀ ɖíí-màà ɖò hwòɖò nyu ma nìɛ̀ ti ɔ ɖà ma níɔ kpá kɛ́, ké ɖɛ́ à mu dɔ́ɔ́ kɔ̃in dèìn ɖé cɛ̃́ɛ́-ɖɛ̀ nìà kɛ múɛ́?

³ Ɔ ɓɛ́ìn mú kàmàà ɓó nyɔ ɖíɛ́ bìì tiɔ̀ ɖíɛ́ ɓè ɓaɖa ɓɛ́ wa ké Jɛhovaa nyɔ-kɔ̃in-zĩ̀ìn-zĩ̀ìnɔ̀ jè jàà po. Poìn ɖɛ Jɛ̀nífɔ̀ ɓɛ́ ɔ ɓúáìn ma jààɔ̀ múɛ mùìn ma múɛɛ jè hwìɖìi. Ti ɔ mɔ̀ ma nyɔ gmɔ̀ kɛɛ, ɔ ɖú ma kpeɖe gbà ɓè nyu kpàì, ké ɔ vièɛ̀ ma ɔ wóɖóìn-nyɔ̀ ɓèɔ̀ dyí. Ti zɔ̃ pàɖà ɖà ma ziɛɛ, ɔ kɔ́ìn ma Jɛhova gbo ɖe, ké ti wè ɖà ma ziɛɛ, ɔ kpá ma níɔ. Ɔ ɖá: “Ðɛ ɓè ɓɛ́ ní cĩ́-cĩ́ɔ̀ ɓá ma dyí kĩ́ín nyɛɛ mɔ̀ ma kɔ̃̀ɔ̀-ɖɛ̀ pàɖà mɔ́-mɔ́ kè gbàɖàùn-po-po kè nɔmɔɔ pàɖà ná-ná ɔ kè dyoɖo se dyí-kpɔ̃-kà nìɛɛ mú-kpá-kpá. Ðé ní hwòɖòɔ̀ xwíníín nyɛɛ, ḿ dyuòɛ̀ ma dyí kà ti ḿ ɖà ma kɔ̃in-zĩ̀ìn-zĩ̀ìn zɔ̀ ké ḿ ɖà ma ní nàmàùn ɓèɔ̀ dyi táà kɛɛ, Jizɛɛ sáa-zà-zàɔ̀ hwɔ ma ḿ múɛ. Kɛɛ, ḿ seɛ ma jàà po cá kà ɓɛ́ Jɛhova ɖà ma ḿ kɔ̃in zĩ̀ìn nyɛ.”

⁴ Ɔ kàmà mú ɓɛ́ m̀ kéɛ jàà po tiɔ̀ ɖíɛ́ ɓè ɓaɖa kà Jɛhova ɖà m̀ kɔ̃in zĩ̀ìn ɓó ɖɛ-xwa-bĩ-bĩ ɓè ɓɛ́ m̀ ɖà ma nyuɛ jèɛɛ̀? Jɛhova mɔ́ ɓɛ́ à ké ɔ wììɔ̀ jè jàà po kà Dèɓé nyuɛ ma kà kɛ. Ðé cɛ̃́ɛ́-ɖɛ̀ nìà kɛ múɛɛ, à mu xwíníín kɔ̃̀ jè à kɔ̃̀ à kéà Jɛhovaa nyɔ-kɔ̃in-zĩ̀ìn-zĩ̀ìnɔ̀ jè jàà po kè ɖɛ ɓɛ́ìn à gbo kpáa ɓɛ́ à kéɛ náa nyuɛɛ jè dɔ́ɔ́ kɔ̃in dèìn.

XWÍNÍÍNƆ̀ NYƐ́ KƆ̃̀ JÈ À KƆ̃̀ À KÉÀ JƐHOVAA NYƆ-KƆ̃IN-ZĨ̀ÌN-ZĨ̀ÌNƆ̀ JÈ JÀÀ PO KƐ́?

5. Ðɛ́ Sétɔ̃̀ mɔ́ ɓɛ́ à ké jàà po kɛ́? Cɛ̃ ɔ hwɔìn-ɖɛ̀ ɖò jè.

⁵ À dyi Jɛhovaa nyɔ-kɔ̃in-zĩ̀ìn-zĩ̀ìnɔ̀ jè jàà po ní, à ɓɛ́ìn xwáɖá ɖò ɓɛ́ Sétɔ̃̀ gbà kɛɛ dyí ɓàɖàìn. Ɔ mɛ nì m̀ hwìɖìi kà Sétɔ̃̀ mu vɔ̃ùn ɖé hwìè séín mú ɓɛ́ ɔ kéɛ nyu ɓɛ́ à ké Jɛhova ɓièɛ̀ ɓɔ́ kɛ. Tiɔ̀ ɖíɛ́ ɓè ɓaɖaín, Sétɔ̃̀ ɓɛ́ìn nyuɛ ɓɛ́ à kéɛ jàà po kà à nàmàùn ɓèɔ̀ se kɔ̃in zĩ̀ɛ̀n ɓɛ́ìn nyɛ. Poìn ɖɛ gàa ɖò dyé ma dyí ɖé Kɔ́ɖéìn-hwɔ̀ɖɔ̀ɔ̀ mú ti wa zà ma ɔ ɖé dyí-poìn-kpòòɔ̀ mú ɓó gbàɖàùn po jèɛɛ jè hwìɖìi. (1 Kɔ̀. 5:​1, 5, 13) Ti ɔ ɖà ma ɔ nàmàùn-kpèɖèɔ̀ dyi táà kɛɛ, Sétɔ̃̀ mɔ́ ɓɛ́ nyɔ ɓè nì ma ɖé dyí-poìn-kpòòɔ̀ múɛɛ ké se ma ɔ kɔ̃in zĩ̀ìn—mɔɔ ɓɛ́ wa ké se ma ɔ jè dyi kpɔ̃ ɖe. Ké ɓó kɔ̃in ɖeɛɛ, Sétɔ̃̀ mɔ́ ɓɛ́ gàa ɓɛ́ ɔ ɖà ma ɔ nàmàùn-kpèɖèɔ̀ dyi táà kɛɛ kéɛ ma hwìɖìi poìn kà Jɛhova se ma ɔ kɔ̃in zĩ̀ɛ̀n ɓɛ́ìn nyɛ—mɔɔ “ɓɛ́ wìì [ké ma] ɔ nyuɛń zi mìɔ,” ɓɛ́ ɔ ké ma Jɛhova ɓièɛ̀ ɓɔ́. Sétɔ̃̀ séè ɔ dyí-sɔ́-ɖɛ̀ɔ̀, mɔɔ ɔ sɛ́ɖɛ́-ɖɛ̀ ɓèɔ̀ gbo zĩàìn ke. Kɛɛ, “à dyuò ɖɛ Sétɔ̃̀ mɔ́ ɓɛ́ ɔ ké nyuɛɛ dyí.”—2 Kɔ̀. 2:​5-11.

6. Ðɛ́ à ɓɛ́ìn nyuɛ ɓɛ́ à hwòɖò ké se ɖé ɖei kpá ɓó nàmàùn ɓè à ɖà ma nyuɛɛ jè kɛ́?

⁶ À dyi Jɛhovaa nyɔ-kɔ̃in-zĩ̀ìn-zĩ̀ìnɔ̀ jè jàà po ní, à hwòɖò se ɖé ɖei kpáa mu ɓó nàmàùn ɓè à ɖà ma nyuɛɛ jè. À dyi nàmàùn nyuín, à hwòɖò kpá ɖé ɖei tee. (Wɛ́ɖɛ́ 51:17) Ɔ ná nì-nì nɔ̀mɔ̀ dyíin. À hwòɖò-xwíníín-hwòɖò-dyùàɔ̀ ɓɛ́ìn à kpéí poɛ ɓɛ́ à ké ɖɛín-ɖɛ̀ nyu, ɓɛ́ à ké à nàmàùn-kpèɖèɔ̀ dyi táà. (2 Kɔ̀. 7:​10, 11) Kɛɛ, ɔ jù ké à hwòɖò dyi ɖé ɖei kpá ke kánáá pu ɓó nàmàùn ɖò ɓɛ́ à ɖà ma dyi táà seeɛ jè ní, ɔ ɓɛ́ìn nyuɛ ɓɛ́ à ké Jɛhova ɓièɛ̀ ɓɔ́. À dyi Jɛhovaa nyɔ-kɔ̃in-zĩ̀ìn-zĩ̀ìnɔ̀ jè jàà po ní, à ɓɛ́ìn à hwòɖò-ɖé-ɖei-kpá-kpáɔ̀ ɖé à ɖeín poɛ. Nìí, à ɓɛ́ìn Jɛhova ɓièɛ̀ kà ɔ mɔ́ ɓɛ́ à ké ɔ ɓièɛ—dyììn ɖé hwòɖò wáɖáá kè múà mú. (Kɔ̀ɖ. 1:​10, 11; 2 Tí 1:3) Nìí, xwɛ̀ à ɓɛ́ìn Geɖepɔɔ nyɔ-kɔ̃in-zĩ̀ìn-zĩ̀ìnɔ̀ jè jàà poɛ kɛ́?

ÐƐ́ ƁƐ́ÌN À GBO KPÁA ƁƐ́ À KÉ JƐHOVAA NYƆ-KƆ̃IN-ZĨ̀ÌN-ZĨ̀ÌNƆ̀ JÈ JÀÀ PO KƐ́?

7-8. Xwɛ̀ Jɛhova nyu ma ɔ mìɔùn mɛ dèɛ̀ ɖé Mózè gbo kɛ́, ké ɖɛ́ mɔ̀ hwòɖò-kɔ̃-dè-ɖɛ̀ ɓɛ́ mɛ-dè-dè nìà wɛ nyí à kɛ́? (Ɛ́séɖɔ̀ 34:​6, 7)

⁷ Poìn kà Jɛhova nyu ɔ mìɔùn mɛ dèɛ̀ kɛɛ jè hwìɖìi. Dè ɖɛ Jɛhova cɛ̃ ma Mózè gbo ɖé Sányà-Tòɖòɔ̀ dya kɛɛ jè hwìɖìi.a (Zà Ɛ́séɖɔ̀ 34:​6, 7 wuɖuún.) Jɛhova ɓɛ́ìn ma kpeɖe tɔ̀ɔ̀ ɓè ɓɛ́ ɔ ɓéɖéɛ jè cɛ̃ɛ dyɛo, kɛɛ ɔ gãa ma ɓɛ́ ɔ kéɛ ma Mózè gbo cɛ̃ kà ɔ mɔ̀ “jĩ́á-jè kè wìì Geɖepɔɔ” kɛ. Nì hwòɖò ɖá Geɖepɔɔ nì náa mu dyi wáɖáùn, ɓɛ́ ɔ ké se ɔ ɓiè-nyɔ̀ ɖò ɓɛ́ ɔ ɖà ɔ nàmàùn-kpèɖèɔ̀ dyi táà jàà kɛɛ kɔ̃in zĩ̀ìnǹ? Ɔ seɛ náa nyuɛ ɓɛ́ìn! Ɔ náa nyu-nyu mu hwòɖò-kɔ̃in-nyìnììn-nyìnììn jùùn—ké ɔ mɔ̀ kpeɖe ɓɛ́ Jɛhova se tɛ̀mɛ̀ìn ɓɛ́ìn nyɛ.

⁸ À ɓɛ́ìn hwòɖò kɔ̃ dèɛ̀ kà ɓɛ́ Jɛhova se se tɔ́mɔ́ɔ́ mu ɓá ɔ mìɔùn jè dyíɛ, sepoɛɖe ɔ mɔ̀ jàà Geɖepɔɔ. (Wɛ́ɖɛ́ 31:5) Ɔ jèɛɛ, à ɓɛ́ìn ɔ wuɖuɔ̀ jàà poɛ. Ɔ jù ké ɔ dyi mú kàmà ɓɛ́ m̀ ké nàmàùn ɓè m̀ ɖà ma nyuɛ jè hwìɖìi poɛ̀n ɓɔ́ ní, m̀ mɛ diè m̀ mìɔùn dyi, ɓɛ́ m̀ ké níiń: ‘Ḿ poɛ jàà kà ɓɛ́ Jɛhova mɔ̀ jĩ́á-jè kè wìì Geɖepɔɔ, ké ɔ mu nyɔ séín ɖò ɓɛ́ ɔ táà ɔ nàmàùn-kpèɖèɔ̀ dyiɛɛ kɔ̃in zĩ̀ìn nyɛɛ̀? Nìí, ḿ seɛ jàà poɛ ɓɛ́ìn kà ɔ ɖà ḿ kɔ̃in zĩ̀ìn nyɛɛ̀?’

9. Ðɛ́ mɔ̀ à nàmàùn ɓèɔ̀ kɔ̃in-zĩ̀ìn-zĩ̀ìn xwíníín nyɛ́? (Wɛ́ɖɛ́ 32:5)

⁹ Nàìn ɖɛ ɓè ɓɛ́ Jɛhova po ma Baɓo céè-nyɔ̀ ɓè hwòɖò xwíníín ɓɛ́ wa ké ma céè ɓá ɔ nyɔ-kɔ̃in-zĩ̀ìn-zĩ̀ìnɔ̀ jè dyíɛɛ jè hwìɖìi. Poìn kà Dèɓé nyu ma Jɛhovaa nyɔ-kɔ̃in-zĩ̀ìn-zĩ̀ìnɔ̀ mɛ dèɛ̀ kɛɛ jè hwìɖìi. (Zà Wɛ́ɖɛ́ 32:5 wuɖuún.) Dèɓé cɛ̃ɛ ma, ké ɔ ɖá, “M̀ zĩ̀ìn ma ḿ kɔ̃in.” Híìbúɖúù-wùɖù kɔ̃̀ xwíníín-mú-zà-zà mɔ̀à “zĩ̀ìn kɔ̃in” nyɛɛ xwíníín mɔ̀, “ɓɛ́ m̀ ké ɖɛ ɖò dyií ɖú,” mɔɔ “ɓɛ́ m̀ ké ɖɛ ɖò ɓó zà,” mɔɔ “ɓɛ́ m̀ ké ɖɛ ɖò kpa” kɛ. Ti Jɛhova zĩ̀ìn ma Dèɓé kɔ̃in nyɛɛ, ɔ ɖú ma ɔ nàmàùn ɓèɔ̀ dyií, ké ɔ kpa ma wa dyììn ɖé hwìè ɖò mú. Gbɛ̀ ku xwa mɔ̀à hwòɖòɛ̀-ɖé-ɖei-kpá-kpá ɓó nàmàùn ɖò nyu jèɛɛ sɔ̀ ma Dèɓé dúún, ké ɔ hwòɖò dè ma dyi. (Wɛ́ɖɛ́ 32:​2-4) À ɓɛ́ìn hwòɖò-dyi-dè-dè dyúáɖòɔ̀ ɓéɖéɛ ɖekè. À dyi à nàmàùn ɓèɔ̀ dyi táà jàà ní, à se ɓéɖé ɓɛ́ à ké gbɛ̀ ku xwa mɔ̀à hwòɖòɛ̀-ɖé-ɖei-kpá-kpá ɓó nàmàùn ɖò nyu jè ɓɛ́ Jɛhova ɖàà à dú zà ké ɔ ɖàà kpa kɛɛ dú dè ɖe fɔɔ.

10-11. Ðɛ́ wuɖu mɔ̀à “zĩ̀ìn nyɔ kɔ̃in” nyɛɛ tɛ̀mɛ̀ìn à ɓá Jɛhova jè dyíɛ́? (Wɛ́ɖɛ́ 86:5)

¹⁰ Zà Wɛ́ɖɛ́ 86:5 wuɖuún. Dèɓé cɛ̃ɛ ɖé vɔ̀sì nìà kɛ mú kà ɓɛ́ Jɛhova “zĩ̀ìn nyɔ kɔ̃in” nyɛ. Dyììn ɖé wuɖu nìà wɛ jè cɛ̃-cɛ̃ múɛɛ, Baɓo ɖɛ-múin-ɖe-cèè-ɖɛ̀ ɖò cɛ̃ɛ ɓá Jɛhova jè dyí, ké ɔ ɖá: “[Ɔ] mɔ̀ ‘nyɔ-kɔ̃in-zĩ̀ìn-nyɔ̀’—ɔ mɔ̀ ɔ ‘kpeɖe.’” Xwíníínɔ̀ nyɛ́ kɔ̃̀ jè Jɛhova nìà ná kɛ́? Vɔ̀sìɔ̀ wáká tɔ̀ɔ̀ zaìn kɔ̃in, ké ɔ ɖá: “Nì ɖɛ̀ɓɛ̀ìn-ɖɛ̀ɓɛ̀ìn se-sèìn-naín-kɔ̃̀ɔ̀ nì ɓó nyɔ séín ɓè ɓɛ́ wa pòìn m̀ kpéiɛɛ bìì.” Ðé cɛ̃́ɛ́-ɖɛ̀ nyɔ zià kɛ múɛɛ, à cɛ̃́ɛ ma kà ɓɛ́ Jɛhovaa ɖɛ̀ɓɛ̀ìn-ɖɛ̀ɓɛ̀ìn se-sèìn-naín-kɔ̃̀ɔ̀ mɔ̀ nyɔ nyuɛ ké ɔ kpɔ̃ ɓó ɔ jàà-ɓiè-nyɔ̀ ɓèɔ̀ gboi kánáá puɛ. Ɔ ɖɛ̀ɓɛ̀ìn-ɖɛ̀ɓɛ̀ìn se-sèìn-naín-kɔ̃̀ɔ̀ muɛ nyuùn ɓɛ́ ɔ ké nyɔ ɓè ɓɛ́ wa táà waà nàmàùn ɓèɔ̀ dyiɛɛ “kɔ̃in zĩ̀ìn.” (Àzé. 55:7) Ɔ jù ké ɔ dyi mú kàmà ɓó m̀ bìì, ɓɛ́ m̀ ké Geɖepɔɔ nyɔ-kɔ̃in-zĩ̀ìn-zĩ̀ìnɔ̀ jè jàà po ní, m̀ ɓɛ́ìn m̀ mìɔùn dyi dièɛ̀, ɓɛ́ m̀ ké níiń: ‘Ḿ poɛ jàà kà Jɛhova mɔ̀ nyɔ-kɔ̃in-zĩ̀ìn-nyɔ̀, ké ɔ zĩ̀ìn nyɔ séín ɓè ɓɛ́ wa táà waà nàmàùn ɓèɔ̀ dyi, ké wa pòìn ɔ kpéiɛ kɔ̃in nyɛɛ̀? Nìí, ḿ se ɓéɖé ɓɛ́ ḿ kéɛ jàà poò kà ɔ mu ḿ kɔ̃in zĩ̀ìn ɔ jù ké ḿ dyi ɔ kpéi pòìn níɛɛ̀?’

¹¹ Ɔ dè à hwòɖò dyi ɓɛ́ à kéɛ dyí dyuò kà ɓɛ́ Jɛhova wɔ̃́ à jè múin gàná cá kɛ. (Wɛ́ɖɛ́ 139:​1, 2) Ðɛ nìà kɛ nì wáɖáá ɖé Dèɓéɛ̀ wɛ́ɖɛ́ ɓèɔ̀ ɖò mú ɖe, ké wa ɓɛ́ìn à gbo kpáa ɖekè ɓɛ́ à ké Jɛhovaa nyɔ-kɔ̃in-zĩ́ìn-zĩ́ìnɔ̀ jè jàà po.

ÐƐ NÌ JƐHOVA HWÌÐÌI ƁÁ À JÈ DYÍƐƐ JÈ MƐ ƁƆ́ M̀ HWÌÐÌI SƆ̀Ɔ̀

12-13. Kà Wɛ́ɖɛ́ 103:14 nyuà cɛ̃ɛ kɛɛ, ɖɛ́ nì Jɛhova hwìɖìi ɓá à jè dyíɛ́, ké xwɛ̀ ɔ nyu à kpɔ̃ɔ kɛ́?

¹² Zà Wɛ́ɖɛ́ 103:14 wuɖuún. Dèɓé cɛ̃ɛ ma ɓá Jɛhova jè dyí, ké ɔ ɖá: “Ɔ nì ɔ hwìɖìi kà à mɔ̀ púu-púu kɛ.” Dyììn ɖé wuɖu ɓèa múɛɛ, Dèɓé zaìn xwíníín ɖò kɔ̃̀ jè Jɛhova zĩ̀àìn ɔ ɓiè-nyɔ̀ ɓè ɓɛ́ wa táà waà nàmàùn ɓèɔ̀ dyiɛ kɔ̃in nyɛɛ jè kɔ̃in: Ɔ nì ɔ hwìɖìi kà à se mú hwɛ̀ kɛ. Ɓɛ́ à ké ɖɛ nìà kɛ múin wɔ̃́ nɔ̀mɔ̀ dyíin ní, ɓèà poìn wuɖu ɓè ɓɛ́ Dèɓé cɛ̃à kɛɛ jè hwìɖìi kóɖó-kóɖó.

¹³ Dèɓé ɖá Jɛhova “dyuò ɖɛ ɔ ɖú ma dyí ɓɛ́ ɔ dyi ma à mɛ kɛɛ dyí.” Ɔ mɛ ma Áɖɔ̀ùn “sɔ̀ìn ɖé ɓóɖóɔ̀ púu-púuɔ̀ mú,” ké ɔ dyuòɛ̀ kà nyɔùn-dyù se kɛɛ ɖò ɓéɖéɛɛ ɓéɖé sèìn-naín ɓèɛ—ɔ hwɔìn-kà, wa kɔ̃̀ wa ké ɖɛ ɖi, kè ɓɛ́ wa ké mɔ́, ɔ kè ɓɛ́ wa ké fɔ̀ kɛ. (Jɛ́n. 2:7) Kɛɛ, ti Áɖɔ̀ùn kè Íì nyu ma nàmàùn wɛ̃ɛ, nyɔùn-dyù púu-púu jù-jùɔ̀ ɓéɖéá ma xwíníín kà kò ɖò. Sepoɛɖe à mɔ̀ wa dyú ɓè jèɛɛ, à sè ma nàmàùn dúí, ké ɔ nyuɛ ké à mɔ́ ɖɛ gba ɓè nyuɛ dyi. Jɛhova se à se-mú-hwɛ̀-hwɛ̀ɔ̀ jè dyuò ɖòùn pu; kɛɛ Dèɓé cɛ̃ɛ kà ɓɛ́ “ɔ nì ɔ hwìɖìi” kɛ. Híìbúɖúù-wùɖù wa nyùàìn kũ̀à múɛɛ xwíníín ɖò mɔ̀ ɓɛ́ m̀ ké ɓó ɖɛín-ɖɛ̀ ɖò nyùìn. À ɓɛ́ìn ɖɛ mɔ̀ Dèɓéɛ̀ wuɖu ɓèɔ̀ xwíníín nyɛɛ xwíníín sṹɛ̀n, ɓɛ́ à ké níiń: Jɛhova dyuòɛ̀ dyí kà à mu ɖɛ xwa bĩìn tiɔ̀ ɖíɛ́ ɓè ɓaɖa kɛ; ké ɔ dyi ná kpá ní, ɔ dyé ti ɓɛ́ ɔ ké à wììn dyé kè ɓɛ́ ɔ ké à kɔ̃in zĩ̀ìn ɔ jù ké à dyi à nàmàùn ɓèɔ̀ dyi táà jàà ní.—Wɛ́ɖɛ́ 78:​38, 39.

14. (a) Xwɛ̀ Dèɓé nyu Jɛhovaa nyɔ-kɔ̃in-zĩ̀ìn-zĩ̀ìnɔ̀ jè cɛ̃ɛ kɛ́? (Wɛ́ɖɛ́ 103:12) (b) Ðɛ́ à ɓɛ́ìn cɛ̃́ɛ dyììn ɖé kà Jɛhova nyu ma Dèɓé kɔ̃in zĩ̀ɛ̀n nyɛɛ múɛ́? (Dyé gbɔ̀ɖɔ̀ɔ̀ nìà kɛ, “Jɛhova Zĩ̀ìn Nyɔ Kɔ̃in Gàná Cá.”)

¹⁴ Xwɛ̀ Jɛhovaa nyɔ-kɔ̃in-zĩ̀ìn-zĩ̀ìnɔ̀ nyu nìɛ̀ kɛ́? (Zà Wɛ́ɖɛ́ 103:12 wuɖuún.) Dèɓé cɛ̃ɛ kà ɓɛ́ Jɛhova dyi nyɔ kɔ̃in zĩ̀ìn ní, nìí, Ɔ po nyɔ nàmàùn ɓèɔ̀ dà vɛ̃in, ké ɔ nì “kà dyóɖó-xwáɖáún-wóɖóìn-naínɔ̀ kèɛ̀ dyi-kpáìn-naín nyuà gboi tɔmɔìn nyɛɛ” nìà kɛ. Ɔ xwíníín mɔ̀, dyóɖó-xwáɖáún-wóɖóìn-naínɔ̀ kè dyóɖó-dyi-kpáìn-naínɔ̀ zi gboi tɔmɔìn mìɔ; ké wa se dyí ɓɛ̀ɖɛ̀ìn ɓɛ́ìn fɔɔ cá. Ðɛ́ ɖɛ nìà kɛ tɛ̀mɛ̀ìn à ɓá nàmàùn ɓè ɓɛ́ Jɛhova zĩ̀ìn kɔ̃in nyɛɛ jè dyíɛ́? Céè-ɖɛ̀ ɖò zaìn ɖɛ nìà wɛ jè kɔ̃in, ké ɔ ɖá: “Ɔ jù ké Jɛhova dyi à nàmàùn ɓèɔ̀ dà vɛ̃in po ní, nìí, à ɓɛ́ìn jàà poɛ kà ɓɛ́ ɔ nyɔ́ mɔɔ ɔ bɛ̃̀ mɔɔ ɔ jè se ɔ hwìɖìi nìɛ̀ mu ɖé fɔɔ kɛ.” Ɔ mɛ nì m̀ hwìɖìi kà ɓɛ́ ɖɛ ɖòɛ̀ nyɔ́ ɓɛ́ìn ɖɛɔ̀ jè m̀ hwìɖìi dyàà kɛ. Kɛɛ, ɔ jù ké Jɛhova dyi à kɔ̃in zĩ̀ìn ní, ɖɛ ɖò seɛ nyuɛ ɓɛ́ìn ɓɛ́ ɔ jè ké ɔ hwìɖìi dyi ɖe, ɓɛ́ ɔ kéɛ nyu ɓɛ́ ɔ ké à gà kɔ̃ tò.—Ìzí. 18:​21, 22; Àpɔ́. 3:19.

15. Ðɛ́ à ɓɛ́ìn nyuɛ ɔ jù ké à hwòɖò dyi ɖé ɖei kpá tee ɓó ɖɛ-xwa-bĩ-bĩ ɓè à ɖà ma nyuɛɛ jè níɛ́?

¹⁵ Xwɛ̀ Dèɓéɛ̀ wuɖu ɓè nìà ɖé Wɛ́ɖɛ́ 103 múɛɛ ɓɛ́ìn à gbo kpáa, ɓɛ́ à ké Jɛhovaa nyɔ-kɔ̃in-zĩ̀ìn-zĩ̀ìnɔ̀ jè jàà po kɛ́? Ɔ jù ké à hwòɖò dyi ɖé ɖei kpá tee ɓó nàmàùn ɓè à ɖà ma nyuɛ jè ní, à ɓɛ́ìn à mìɔùn dyi-diè-ɖɛ̀ ɓè nìà kɛ dyi dièɛ̀: ‘Ðɛ nì Jɛhova hwìɖìiɛ jè nì ḿ hwìɖìi sɔ̀ùnǹ—ɔ xwíníín mɔ̀, ɔ nì ḿ hwìɖìi sɔ̀ùn kà ɔ dyuòɛ̀ dyí kà ḿ se mú hwɛ̀, ké ɔ mu ní nàmàùn ɓè ɓɛ́ ḿ ɖàà dyi táà kɛ kɔ̃in zĩ̀ìn nyɛɛ̀? Ðɛ ɓè ɓɛ́ Jɛhova gã ɓɛ́ wa jè ké ɔ hwìɖìi sɔ̀ kɛ jè nì ḿ hwìɖìi ɖekèè? Ɔ xwíníín mɔ̀, ḿ nì nàmàùn ɓè ɓɛ́ Jɛhova ɖà kɔ̃in zĩ̀ìn, ké ɔ se ḿ gà kɔ̃ tòɛ̀ mu ɓó wa jè kɛ jè hwìɖìi poɛ̀n keè?’ Jɛhova ní pɛ̃́ìn nàmàùn ɓè à ɖà ma nyuɛ hwìɖìi kánáá pu. Ké kàà à mɛ nyuɛ ɖekè. (Wɛ́ɖɛ́ 130:3) À dyi Jɛhovaa nyɔ-kɔ̃in-zĩ̀ìn-zĩ̀ìnɔ̀ jè jàà po ní, à mu à mìɔùn kɔ̃in zĩ̀ɛ̀n ɓɛ́ìn ɓó ɖɛ-xwa-bĩ-bĩ ɓè à ɖà ma nyuɛɛ jè, ɓɛ́ à ké dyúa mu.

16. Zaìn xwíníín kɔ̃̀ jè ɔ seà dyíin nɔ̀mɔ̀ ɓɛ́ à hwòɖò kéà ɖé ɖei kpá kánáá pu ɓó nàmàùn ɓè à ɖà ma nyuɛ jèɛɛ jè kɔ̃in. (Dyé dyi-dyé-ɖɛ̀ɔ̀ ɖekè.)

¹⁶ Poìn ɖɛ nìà kɛ jè hwìɖìi. Hwòɖòɛ̀-ɖé-ɖei-kpá-kpá kánáá pu ɓó nàmàùn ɓè à ɖà ma nyuɛ jèɛɛ, hwɔìn ɓɛ́ m̀ ké hwòtimo ɖò nàìn nì, ɓɛ́ m̀ ké hwòtimoɔ̀ sɛ́ɓɛ́ɛ̀ gmɔ̀àìn ɖé ɖeɛɛ mú gmɔìn nì kánáá puɛ. Ɔ nɔ̀mɔ̀ dyíin ɓɛ́ m̀ ké sɛ́ɓɛ́ɛ̀ɔ̀ dyéɖé dyai ɓaɖa ɖoo-ɖò ɓaɖa, ɓɛ́ m̀ ké nàdì-ɖɛ̀ ɓè nì m̀ ɖeín nyɛɛ dyéɖé gbo dèɛ̀ ɓɛ́ìn. Kɛɛ, ɓɛ́ m̀ ké hwòtimoɔ̀ nàìn nɔ̀mɔ̀ dyíin ní, m̀ kɔ̃̀ m̀ ké ɖé hwìèɔ̀ dyúa gmɔ̀ kánáá pu. Kà dyúáɖòɔ̀ kàà ɔ mu dyíin nɔ̀mɔ̀ùn ɓɛ́ à ké ɖɛ-xwa-bĩ-bĩ ɓè ɓɛ́ à ɖà ma nyuɛɛ jè hwìɖìi poìn tiɔ̀ ɖíɛ́ ɓè ɓaɖa, sepoɛɖe ɔ náa nyu-nyu ɓɛ́ìn à gbo kpáa, ɓɛ́ à ké se ɖɛ dyúáɖòɔ̀ nyu ɖe. Kɛɛ, ɔ jù ké à hwòɖò dyi ɖé ɖei kpá tee ɓó ɖɛ-xwa-bĩ-bĩ ɓè à ɖà ma nyuɛ jè ní, ɔ ɓɛ́ìn nyuɛ ɓɛ́ à ké ɓo dɔ̀ ɖé Jɛhova ɓiè-ɓiè mú. Kɛɛ, ɓèà mɛ gmɔ̀ ɖé hwìèɔ̀ dyúa kánáá pu. À nì hwìè mùàìn dè ɓɛ́ nyɔùn ɓéɖéà fɛ̀ɛ̀ ɖé Geɖepɔɔ ɓóɖó ɖìèɔ̀ múɛɛ kɔ̃, ɔ mɔ̀ dɛ̀ ɓɛ́ ɓɛ́ ɖɛ gba ɓè jè seà “nyɔ ɖò hwìɖìi dyiɛ́ mu ɖe fɔɔ” kɛ.—Àzé. 65:17; Nɔ́ɔ́ 4:25.

PO JƐHOVAA NYƆ-KƆ̃IN-ZĨ̀ÌN-ZĨ̀ÌNƆ̀ JÈ JÀÀ TEE

17. Xwíníínɔ̀ nyɛ́ kɔ̃̀ jè à kɔ̃̀ à kéà Jɛhovaa ɖɛ̀ɓɛ̀ìn-ɖɛ̀ɓɛ̀ìnɔ̀ kè ɔ nyɔ-kɔ̃in-zĩ̀ìn-zĩ̀ìnɔ̀ jè jàà po teeɛ́?

¹⁷ À kɔ̃̀ à ké Jɛhovaa ɖɛ̀ɓɛ̀ìn-ɖɛ̀ɓɛ̀ìnɔ̀ kè ɔ nyɔ-kɔ̃in-zĩ̀ìn-zĩ̀ìnɔ̀ jè jàà po tee. (1 Jɔ̃́ɔ́ 3:19) Xwíníínɔ̀ nyɛ́ kɔ̃̀ jèɛ́? Sepoɛɖe Sétɔ̃̀ mu vɔ̃ùn tee ɓɛ́ ɔ kéɛ nyu ɓɛ́ à kéɛ jàà po kà ɓɛ́ Jɛhova se à mú ɖɛ̀ɓɛ̀, mɔɔ ɔ ní zĩ̀ìn à kɔ̃in nyɛ. Ðɛ dyúáɖò ɖé Sétɔ̃̀ mɔ́ kɛbì ɔ séín ɖò mɛ kpá kɛ. Ɔ mɔ̀, ɓɛ́ à ké Jɛhova ɓièɛ̀ ɓɔ́. À ɓɛ́ìn hwìɖìi dèɛ̀ kà ɓɛ́ Sétɔ̃̀ mu gana vɔ̃̀ìn nyɛ, sepoɛɖe ɔ dyuòɛ̀ dyí kà ɓɛ́ ɔ tiɔ̀ ɖà ɓoún xwã́ kɛ. (Wɛ̀ɖ. 12:12) À mɛ ɓɔ́ wɔ̃́ɔ ɓɛ́ ɔ ké à toún ɖu!

18. Ðɛ́ m̀ ɓɛ́ìn nyuɛ ɓɛ́ m̀ ké Jɛhovaa ɖɛ̀ɓɛ̀ìn-ɖɛ̀ɓɛ̀ìnɔ̀ kè ɔ nyɔ-kɔ̃in-zĩ̀ìn-zĩ̀ìnɔ̀ jè jàà po kɛ́?

¹⁸ Ɓɛ́ m̀ ké Jɛhovaa ɖɛ̀ɓɛ̀ìn-ɖɛ̀ɓɛ̀ìnɔ̀ jè jàà po cá ní, sí náún-po-wùɖù ɓè ɓɛ́ wa dèàìn dɔ́ɔ́ kɔ̃in ɖé cɛ̃́ɛ́-ɖɛ̀ɔ̀ nyɔ zià kɛ múɛɛ kíɖíí. Ɓɛ́ m̀ ké Jɛhovaa nyɔ-kɔ̃in-zĩ̀ìn-zĩ̀ìnɔ̀ jè jàà po ní, poìn kà Jɛhova nyu ɔ mìɔùn mɛ dèɛ̀ kɛɛ jè hwìɖìi. Nàìn ɖɛ ɓè ɔ po ma Baɓo céè-nyɔ̀ ɓè hwòɖò xwíníín ɓɛ́ wa ké ma cɛ̃ ɓá ɔ nyɔ-kɔ̃in-zĩ̀ìn-zĩ̀ìnɔ̀ jè dyíɛɛ jè hwìɖìi. Ɔ mɛ ɓɔ́ m̀ hwìɖìi sɔ̀ɔ̀ kà Jɛhova dyuò kà m̀ nyu nìɛ̀ kɛɛ dyí, ké ɔ mu m̀ wìì kɔ̃ ɓéɖéìn nyɛ. Ké ɔ mɛ nì m̀ hwìɖìi kà ɔ dyi nyɔ ɖò kɔ̃in zĩ̀ìn ní, ɔ nyuɛ náa gàná cá kɛ. Nìí, nì mu jàà-po-po dyúáɖò ɓɛ́ Dèɓé ɓéɖé ma ɓá Jɛhovaa wììɔ̀ jè dyíɛɛ ɓéɖéìn ɖekè, ɓɛ́ m̀ kéɛ cɛ̃ɛ ɓɛ́ìn, ɓɛ́ m̀ ké níiń, “Nì zùo, Jɛhova ɓó ní nàmàùn séín ɓèɔ̀ kɔ̃in zĩ̀ìn jè!”—Wɛ́ɖɛ́ 32:5.