CƐ̃́Ɛ́-ÐƐ̀ 15
WƐ́ÐƐ́ 30 Ḿ Ɓà, Ní Geɖepɔɔ Kè Ní Ɓàto
‘Ɔ Nɔ̀mɔ̀ Dyíin Ɓɛ́ À Ké Geɖepɔɔ Bũ̀in Xwɛ̃́ìn!’
“Ɓá mɔ́ún jè dyíɛɛ, ɔ nɔ̀mɔ̀ dyíin ɓɛ́ ḿ ké m̀ bũ̀in xwɛ̃́ìn.”—WƐ́ÐƐ́ 73:28.
DYÉÐÉ-GBO-DÈ-ÐƐ̀
Kà à ɓɛ́ìn Jɛhova bũ̀in xwɛ̃́ìn kè kpáná ɓè sɔ̀ìn ɖé ɔ náa nyu-nyu múɛ.
1-2. (a) Dúún-ku-kuɔ̀ nyɛ́ ɔ ɖú dyí ɓɛ́ à ké nyɔ ɖò ɓàto mú kpɔ̃ kɛ́? (b) Ðɛ́ à mu jè cɛ̃ìn ɖé cɛ̃́ɛ́-ɖɛ̀ nìà kɛ múɛ́?
M̀ ƁÉÐÉ ɓàto xwɛ̃́ìn bũ̀in ɖòò? Xwɛ̀ m̀ nyu ma ɔ ɓàto mú kpɔ̃ɔ kɛ́? M̀ hwèɖè ma ɔ gbo dyɛ̀, ké m̀ cɛ̃́ ma ɔ fũ̀à-fṹá-ɖɛ̀ ɓèɔ̀ jè, ké m̀ dyuò ma ɖɛ ɓè ɔ ɖɛ̀ɓɛ̀ múɛ kè ɖɛ ɓè ɔ se mú ɖɛ̀ɓɛ̀ kɛɛ dyí. M̀ dèɛ̀ ma dyéɖé gbo kà ɔ ɓéɖé kpeɖe nɔ̀mɔ̀ dyíin ɓè ɓɛ́ nì mu kíɖíí síɛ mɔ́ùn wɛ̃. Ké m̀ ɖɛ̀ɓɛ̀ nì ɓàtoɔ̀ mú.
2 Nyɔ ɖò ɓàto mú-kpɔ̃-kpɔ̃ ɖú ti kè dúún-ku-ku dyí. Ðɛ dyúáɖòɔ̀ ɓá Jɛhova Geɖepɔɔ ɓàto mú kpɔ̃ jè dyí. Cɛ̃́ɛ́-ɖɛ̀ nìà kɛ mu kà à ɓɛ́ìn Geɖepɔɔ bũ̀in xwɛ̃́ìn kè kpáná ɓè sɔ̀ìn ɖé ɔ náa nyu-nyu múɛɛ jè cɛ̃ìn. Kĩ́ín nyɛɛ, poìn xwíníín kɔ̃̀ jè ɔ nɔ̀mɔ̀à dyíin ɓɛ́ à kéà à ɖɛ̀ɓɛ̀ Ɓàto mɔ̀à Jɛhova kɛɛ bũ̀in xwɛ̃́ìn nyɛɛ jè hwìɖìi.
3. Xwíníínɔ̀ nyɛ́ kɔ̃̀ jè à mɛ nàìn kpáná ɓè sɔ̀àìn ɖé Jɛhova bũ̀in-xwɛ̃́ìn-xwɛ̃́ìn múɛɛ jè hwìɖìiɛ́? Poɛ̀n ɖɛí.
3 Ɔ nì wáɖáá kà m̀ wɔ̃́ìn gbo kà ɓɛ́ Jɛhova bũ̀in-xwɛ̃́ìn-xwɛ̃́ìn mɔ̀ ɖɛ nɔ̀mɔ̀ dyíin nyɛ. À dyi kà ɔ bũ̀in-xwɛ̃́ìn-xwɛ̃́ìn nɔ̀mɔ̀ dyíin nyɛɛ jè hwìɖìi nàìn jɛ́ɛ́ ní, ɔ mu à kpéí poùn ɓɛ́ à ké ɔ bũ̀in xwɛ̃́ìn mìɔ. (Wɛ́ɖɛ́ 63:6-8) Ɔ hwɔìn-kà, à dyuòɛ̀ dyí kà ɓɛ́ ɖɛín-ɖɛ̀ ɖi-ɖi kè kpóɖó-dyùàɔ̀ dyi-nyu-nyu kè fɔ̀-fɔ̀ ɔ kè ní pàɖà ná-ná nɔ̀mɔ̀ dyíin ɓó à bììɛ. Kɛɛ, nyɔ pàɖà ní poìn ɖɛ ɓè nìà kɛ jè hwìɖìi, ké wa wã̀ìn wa dyɔɔ̀ mú wóɖó jè dyéɖé kɔ̃in. Kɛɛ, kà à mu ɖɛ ɓè ɓá à dyɔɔ̀ mú wóɖó jè dyíɛ jè hwìɖìi poìn mìɔ kɛɛ, kàà à mu ɖɛ ɓèà nyuɛ mɔ́ùn tee. Kà dyúáɖòɔ̀ kàà, à dyuòɛ̀ dyí kà ɓɛ́ Jɛhova bũ̀in-xwɛ̃́ìn-xwɛ̃́ìn nɔ̀mɔ̀ dyíin ɓó à bììɛ, kɛɛ kpáná ɓè sɔ̀ìn ɔ náa nyu-nyu múɛɛ jè hwìɖìi-nàìn-nàìn ɓɛ́ìn à kpéí poɛ ɓɛ́ à ké à Ɓàtoɔ̀ bũ̀in xwɛ̃́ìn tee.—Wɛ́ɖɛ́ 119:27-30.
4. Kà wa nyuà tɛ̀mɛ̀ìn ɖé Wɛ́ɖɛ́ 73:28 múɛɛ, ɖɛ́ wɛ́ɖɛ́-céè-nyɔ̀ɔ̀ cɛ̃ ma kɛ́?
4 Zà Wɛ́ɖɛ́ 73:28 wuɖuún. Wɛ́ɖɛ́ 73 céè-nyɔ̀ɔ̀ mɔ̀ ma Ðíìváà-nyɔ̀ ɓèɔ̀ ɖò ɓɛ́ wa gã ma ɓɛ́ ɔ ké ma ɓeɖe-nyɔ̀ jù ɖé Jɛhovaa gbòɔ̀ múɛ. Ɔ ɖà ma Jɛhova ɓiè jàà-kà ɓó zɔ̃ pàɖà xwíníín dyɛ̀. Kɛɛ, ɔ poɛ̀n ma hwìɖìi kà ɔ kɔ̃̀ ɔ kéɛ ma ɔ mìɔùn kè nyɔ tɔ̀ɔ̀ ɓè hwìɖìi dyà kà ɓɛ́ “ɔ nɔ̀mɔ̀ dyíin” ɓɛ́ ɔ kè wa kè ké ma Geɖepɔɔ “bũ̀ìn xwɛ̃́ìn” nyɛ. Ðɛ́ mɔ̀ kpáná ɖíɛ́ ɓè ɓɛ́ wa sɔ̀ìn ɖé ɔ náa nyu-nyu múɛ́?
‘GEÐEPƆƆ BŨ̀IN-XWƐ̃́ÌN-XWƐ̃́ÌN’ DYÀ MÚÀ
5. (a) Xwíníínɔ̀ nyɛ́ kɔ̃̀ jè Jɛhova bũ̀in-xwɛ̃́ìn-xwɛ̃́ìn nyíà à múà kɛ́? (b) Sɔ̀ìn ɖé Nɔ́ɔ́ 2:6-16 múɛɛ, cɛ̃ kà Jɛhovaa fɔ̀nɔ̀-hwòɖòɔ̀ ɓɛ́ìn m̀ kpáná dyí nyuɛ, kè m̀ dyí gmɔ̀ɔ̀ ɖé hwìè jɛ́ɛ́ ɓè múɛɛ jè.
5 Kà à mu Jɛhova bũ̀in xwɛ̃́ìn mìɔ kɛɛ, kàà à mu múà ɓéɖéìn mìɔ. (Wɛ́ɖɛ́ 65:4) Ðɛ nìà kɛ mɔ̀ jàà ɓó xwíníín pàɖà ɓè jè. Kĩ́ín nyɛɛ, à dyé kpáná dyììn ɖé fɔ̀nɔ̀-hwòɖò ɓè nìà ɖé ɔ Wuɖu mɔ̀à Baɓoɔ kɛ múɛɛ kũ̀à-gbo-po-po mú. Fɔ̀nɔ̀-hwòɖò nì náa gmɔ̀ à dyí ɖé ɖɛ gbà ɓè kè ɖɛ-xwa-bĩ-bĩ vɛ̀nɛ̀ ɓè xwaún. (Zà Nɔ́ɔ́ 2:6-16 wuɖuún.) Ɓó xwíníínà jèɛɛ, Baɓoɔ ɖá: “Mana nì nyɔ ɓɛ́ ɔ dyé fɔ̀nɔ̀-hwòɖò da ɔ kè ɓɛ́ ɔ wɔ̃́ ɖɛ múin nyɛɛ kɔ̃.”—Nɔ́ɔ́ 3:13.
6. Xwíníínɔ̀ nyɛ́ kɔ̃̀ jè wɛ́ɖɛ́-céè-nyɔ̀ɔ̀ se ma múàùn kpá kɛ́?
6 Ɔ mɔ̀ jàà kà ɓɛ́ Jɛhovaa ɓàto ɓè dyé wìì-ɖɛ̀ ɓè dyí tiɔ̀ ɖíɛ́ ɓè ɓaɖa kɛ. Wɛ́ɖɛ́ 73 céè-nyɔ̀ hwòɖò kpá ma ɖé ɖei ti ɔ poìn ma ɖɛ gbà ɓè nì ma kpáuń wɛ̃ɛ jè hwìɖìiɛ. Dyoɖo kè hwɛ̀nɛ̀ dyá ma ɔ, sepoɛɖe ɔ poɛ̀n ma hwìɖìi kà ɓɛ́ hwòɖò-kɔ̃in-nyìnììn-nyɔ̀ ɓè ɓɛ́ wa se ma Geɖepɔɔ jè gbo kɔ̃̀ɛɛ nyuu-ɖɛ̀ nì ma mú wóɖóɛń nyɛ. Ɔ poɛ̀n ma hwìɖìi se-dyí-sɛ́ɖɛ́ìn-kà kà ɓɛ́ ɖɛ gbà-nyu-nyɔ̀ ɓè ɓéɖé ma kɔ́mɔ́-ɖɛ̀ pàɖà tee, ké wa dyɔɔ̀ wóɖó ma mú tee, ké wa ní dyé ma ɖɛ ɖòɛ̀ gà fɔɔ kɛ. (Wɛ́ɖɛ́ 73:3-7, 12) Fũ̀à-fṹá dè ma wɛ́ɖɛ́-céè-nyɔ̀ɔ̀ dyí mìɔ, ké ɔ poɛ̀n ma hwìɖìi ti ɖò ɓaɖa kɛbì ɔ Jɛhova ɓiè-ɓièɔ̀ mɔ̀ ma ɖɛ fóɖóún ní. Ðé ɔ hwòɖò-ɖé-ɖei-kpá-kpáɔ̀ múɛɛ, ɔ cɛ̃ɛ ma, ké ɔ ɖá: “Ḿ ɖà ní hwòɖò-dyùàɔ̀ mú hwɔ pídyiì? Ḿ ɖà nàmàùn séín xwai dèɖè pídyiì?”—Wɛ́ɖɛ́ 73:13.
7. Xwɛ̀ à ɓɛ́ìn hwòɖò-ɖé-ɖei-kpá-kpá ɓè ɓɛ́ wa ɓɛ́ìn à múà xwa zàà kɛɛ xwaún póɛ kɛ́? (Dyé nìà kpàɔ̀ kɔ̃ún wɛ̃ ɖekè.)
7 Wɛ́ɖɛ́-céè-nyɔ̀ɔ̀ se ma wɔ̃́ ɓɛ́ hwòɖò-ɖé-ɖei-kpá-kpá ké ma ɔ wɔ̃ zi. Ɔ nyùìn ma ɓó ɖɛ ɖò. Ɔ “mu ma ɖé [Geɖepɔɔ] gbò-hwɛ̀in-hwɛ̀inɔ̀ mú.” Ðéɛ̀ Jɛhova sɛ́ɖɛ́ìn ma ɔ hwìɖìi-poìn-poìn-kàɔ̀ dyí. (Wɛ́ɖɛ́ 73:17-19) À hwòɖò dyi ɖé kpá ní, Jɛhova mɔ̀à à ɖɛ̀ɓɛ̀ Ɓàto kɛɛ dyuòɛ̀ jè dyí. Ɔ jù ké à dyi ɔ ɓaà ɓó à hwìè da zàìn jè, ké à dyi gbo-kpá-kpá ɓɛ́ ɔ tòà dyììn ɖé ɔ Wuɖuɔ̀ kè dyí-poìn-kpòòɔ̀ múɛɛ dyi kpɔ̃ ní, à mu kpéí kpáùn, ɓɛ́ à ké hwòɖò-ɖé-ɖei-kpá-kpá hwòɖò kùìn. Ké à dyi hwòɖò dyií gbàìn mìɔ ní, Jɛhova mu à hwòɖò dyi dèìn.—Wɛ́ɖɛ́ 94:19.a
Ðíìváà-nyɔ̀ ɓɛ́ ɔ céèà Wɛ́ɖɛ́ 73 kɛɛ, nyànà ɖé “Geɖepɔɔ gbò hwɛ̀in-hwɛ̀inɔ̀” mú dyi (Dyé zaìn-kɔ̃in 7)
‘GEÐEPƆƆ BŨ̀IN-XWƐ̃́ÌN-XWƐ̃́ÌN’ NYÍ À CĨ́-CĨ́ NƆ̀MƆ̀ DYÍIN KÈ HWÒÐÒ-KƆ̃-DÈ-ÐƐ̀
8. Ðɛ́ mɔ̀ hwìè kpa ɖɛ tɔ̀ɔ̀ ɓè kɔ̃̀ mú ɓɛ́ Geɖepɔɔ bũ̀in-xwɛ̃́ìn-xɛ̃́ìn nɔ̀mɔ̀ dyíin ɓó à bììɛ́?
8 Geɖepɔɔ bũ̀in-xwɛ̃́ìn-xwɛ̃́ìn nɔ̀mɔ̀ dyíin ɓó à bìì ɖé hwìè kpa ɖɛ sɔ̃́ ɓè mú ɖe. Kĩ́ín nyɛɛ, ɔ nyí à cĩ́-cĩ́ nɔ̀mɔ̀ dyíin kàùn. Ké sɔ̃́ ɖeɛɛ, ɔ nyí à jàà hwòɖò-kɔ̃-dè-ɖɛ̀ ɓó ɖé dyúa bìì. (Jɛ̀ɖ. 29:11) Ɓèà gmɔìn kpáná ɓè nìà kɛ múin kóɖó-kóɖó.
9. Xwɛ̀ Jɛhova bũ̀in-xwɛ̃́ìn-xwɛ̃́ìn nyu à cĩ́-cĩ́ nɔ̀mɔ̀ dyíin nyíɛ kɛ́?
9 Geɖepɔɔ bũ̀in-xwɛ̃́ìn-xwɛ̃́ìn nyí à cĩ́-cĩ́ nɔ̀mɔ̀ dyíin. Nyɔ pàɖà ɓè ɓɛ́ wa doàìn Geɖepɔɔ nì jè mú zɛ̃̀ɛ̀ kɛɛ poɛ̀n hwìɖìi kà ɓɛ́ cĩ́-cĩ́ se xwíníín ɖò ɓéɖé, kè kà nyɔùn-dyù jè mu dyi ziìn fɔɔ cá ɖé dyúa kɛ. Kɛɛ, dyììn ɖé Geɖepɔɔ Wuɖuɔ̀ cɛ̃́-cɛ̃́ múɛɛ, à ɖàa dyí dyuò wáɖáá kà ɓɛ́ Geɖepɔɔ “nì kɛ, ɔ kè kà ɓɛ́ ɔ nyí nyɔ ɓè ɓɛ́ wa mɔ́ ɔ dyiɛɛ pɛ́ɛ̀-ɖɛ̀ kɛ.” (Híì. 11:6) Ké zɛ̃̀ɛ̀ kɛɛ, à cĩ́ ɖé múà mú, sepoɛɖe à nì ɖɛ kɔ̃̀ jè Geɖepɔɔ mɛà à kɛɛ nyuɛń—à ɓiè à dyɔún-Ɓà Jɛhova.—Dìtɔ̀. 10:12, 13.
10. Ðɛ́ Wɛ́ɖɛ́ 37:29 tɛ̀mɛ̀ìn ɓá nyɔ ɓè ɓɛ́ wa dèà Jɛhova hwòɖò kɔ̃ɛɛ hwòɖò-po-naín jè dyíɛ́?
10 Ðɛ ɖòùn nyɔ pàɖà ɓè mɔ̀ùn dè hwòɖò kɔ̃ɛɛ mɔ̀ ɓɛ́ wa ké kũ̀à nyu, kè ɓɛ́ wa ké dyú ɓè wóɖóìn, ɔ kè ɓɛ́ wa ké wíɖí dyi dè ɓó ti wa mu súá kpáùn wɛ̃ɛ jè. Geɖepɔɔ se ɖé kpá. Kɛɛ, Jɛhova ɓiè-nyɔ̀ ɓè dè ɔ hwòɖò kɔ̃. (Wɛ́ɖɛ́ 25:3-5; 1 Tím. 6:17) À dè Geɖepɔɔ ɓɛ́ à xwɛ̃́àìn bũ̀in nyɛɛ hwòɖò kɔ̃, ké à dè ɖɛ ɓè ɔ ɖáìn à nyɛ́nɛ́ín nyɛɛ hwòɖò kɔ̃. Ðɛ ɓè à dèà hwòɖò kɔ̃ɛɛ ɖò mɔ̀ ɔ ɓiè-ɓiè ɓó sè-ná-sèɛ̀ tiín ɖé Páɖédà mú.—Zà Wɛ́ɖɛ́ 37:29 wuɖuún.
11. Ðɛ́ Geɖepɔɔ bũ̀in-xwɛ̃́ìn-xwɛ̃́ìn nyu à bììɛ́, ké ɖɛ ɔ nyu Geɖepɔɔ bììɛ́?
11 Geɖepɔɔ bũ̀in-xwɛ̃́ìn-xwɛ̃́ìn nɔ̀mɔ̀ dyíin ɓó à bìì ɖé hwìè pàɖà tɔ̀ɔ̀ ɓè mú. Ɔ hwɔìn-kà, Jɛhova cɛ̃ɛ kà ɓɛ́ ɔ mu nyɔ ɓè ɓɛ́ wa xwɛ̃́ìn ɔ bũ̀in, ké wa táà waà nàmàùn ɓèɔ̀ dyiɛɛ kɔ̃in zĩ̀ìn nyɛ. (Àzé. 1:18) Ɔ jèɛɛ, à se kɔ̃̀ à ké à mìɔùn zaa kpɔ̃̀ìn ɓó nàmàùn ɓè ɓɛ́ à ɖà ma nyuɛɛ jè. (Wɛ́ɖɛ́ 32:1-5) Ké Jɛhova hwòɖò-dyi-dè-dè po à múàùn. (Nɔ́ɔ́ 23:15) Jɛ́ɛ́ kɛɛ, m̀ ɓɛ́ìn mana tɔ̀ɔ̀ ɓè ɓɛ́ wa sɔ̀ìn ɖé Geɖepɔɔ bũ̀in-xwɛ̃́ìn-xwɛ̃́ìn múɛɛ jè hwìɖìi poɛ̀n. Kɛɛ, xwɛ̀ m̀ ɓɛ́ìn Geɖepɔɔ bũ̀in xwɛ̃́ìn kánáá pu kɛ́?
KÀ NYƆ KÉ GEÐEPƆƆ BŨ̀IN XWƐ̃́ÌN NYU KÁNÁÁ PUƐ
12. Ðɛ́ m̀ ɖà nyu ɓɛ́ m̀ ké Geɖepɔɔ bũ̀in xwɛ̃́ìn nyɛ́?
12 Ɔ jù ké m̀ ɖà níɔ kpá ní, nìí, ɔ xwíníín mɔ̀, m̀ ɖà Jɛhova bũ̀in xwɛ̃́ìn nɔ̀ɔ̀. M̀ ɖà ɖɛ pàɖà cɛ̃́ ɓá Jɛhova kè Kɛ́ɖɛ́ì Jizɛ jè dyí, ké m̀ ɖà nàmàùn ɓè m̀ nyu ma kɛɛ dyi táà, ké m̀ ɖà Geɖepɔɔ hwìɖìi taɓa kóɖó-kóɖó, ké m̀ ɖà vɔ̃ ɓɛ́ nì nyuu-ɖɛ̀ kè Geɖepɔɔ mɔ́ɔ́-ɖɛ̀ ké gbo muìn. Kɛɛ, ɓɛ́ à ké Geɖepɔɔ bũ̀in xwɛ̃́ìn mìɔ ní, à ɓéɖé ɓɛ́ à ké ɖɛ ɓè nìà kɛɛ nyu tee.—Kɔ̀ɖ. 2:6.
13. Ðɛ́ mɔ̀ ɖɛ tã ɓè ɓɛ́ wa ɓɛ́ìn à gbo kpáa ɓɛ́ à ké Jɛhova bũ̀in xwɛ̃́ìn kánáá pu kɛ́?
13 Ðɛ́ ɓè mu à gbo kpáùn ɓɛ́ à ké Jɛhova bũ̀in xwɛ̃́ìn kánáá pu kɛ́? (1) À ɓéɖé ɓɛ́ à ké Baɓoɔ wuɖuún zà, kè ɓɛ́ à kéɛ cɛ̃́ tee. À dyiɛ náa nyu ní, à mɛ ɓɔ́ ɖɛ mɛ́nɛ́ɛ́-mɛ́nɛ́ɛ́ ɓè ɓá Geɖepɔɔ jè dyíɛɛ ɖòùn cɛ̃́ɛ pu. Kɛɛ, à mɛ vɔ̃ ɓɛ́ à ké ɖɛ mɔ̀ Geɖepɔɔ mɔ́ɔ́-ɖɛ̀ ɓó à bììɛɛ múin wɔ̃́, kè ɓɛ́ à ké wɔ̃́ ɓɛ́ hwìè-da-zàìn-wùɖù ɓè nìà ɖé ɔ Wuɖuɔ̀ múɛɛ ké à nàìn. (Ìfí. 5:15-17) (2) À ɓéɖé ɓɛ́ à ké à hwìɖìi-taɓa-taɓaɔ̀ dyi kùìn dyììn ɖé ɖɛ pàɖà ɓè ɓɛ́ wa tɛ̀mɛ̀ìn kà ɔ ɖɛ̀ɓɛ̀ à múɛɛ jè hwìɖìi-nàìn-nàìn mú. (3) À ɓéɖé ɓɛ́ à ké ɖɛ ɓè ɓɛ́ Jɛhova nyɛ́ múɛɛ mú nyɛ́ tee, kè ɓɛ́ à ké nyɔ ɓè ɓɛ́ wa nyu ɖɛ ɓèà xwaiɛɛ dyí ɓàɖàìn.—Wɛ́ɖɛ́ 1:1; 101:3.
14. Dyììn ɖé ɖɛ 1 Kɔ̀ɖéíntĩ̀ɔ̀ 10:31 cɛ̃à kɛ múɛɛ, ɖɛ́ mɔ̀ ɖɛ ɖíɛ́ ɓè ɓɛ́ à ɓɛ́ìn nyuɛ ɖé à cĩ́-cĩ́ɔ̀ mú wé séín ɓɛ́ à ké Jɛhova hwòɖò dyi dè kɛ́? (Dyé dyi-dyé-ɖɛ̀ ɓèɔ̀ ɖekè.)
14 Zà 1 Kɔ̀ɖéíntĩ̀ɔ̀ 10:31 wuɖuún. Ɔ kpa ɖɛ ɓɛ́ à ké ɖɛ ɓè ɓɛ́ wa dè Jɛhova hwìɖìiɛɛ nyu tee. Ðɛ nìà kɛ zi ɖɛ ɓè à nyu ɖé wuɖu-wáɖá-kũ̀àɔ̀ múɛ kè ɖé dyí-poìn-poìn ɓèɔ̀ múɛɛ kɔ̃. Nyuu-ɖɛ̀ nɔ̀mɔ̀ dyíin ɓè ɓɛ́ wa dè Jɛhova hwìɖìiɛɛ ɓá ɖɛ ɓè à nyu ɖé à cĩ́-cĩ́ɔ̀ mú wé séín nyɛɛ dyí ɖekè. Ɔ hwɔìn-kà, à dyi jàà nyu ɖé ɖɛ séín mú, ké à dyi nyɔ tɔ̀ɔ̀ ɓè ɖɛ nyí ní, à nyuɛ ké Jɛhova kpá múàùn. (2 Kɔ̀. 8:21; 9:7) Ɔ mɔ́ ɓɛ́ à kéɛ tɛ̀mɛ̀ìn kà à dyé nyíí-ɖɛ̀ mɔ̀à fɛ̀ɛ̀ kɛɛ kpéín mìɔ kɛ. À xwɛ̃́ìn nyɔ nyíà à fɛ̀ɛ̀ kɛɛ bũ̀in dyììn ɖé kà à nyu ɖɛ ɖiɛ kè kà à nyu náa kɛɛ mú-màìn-màìn mú, ɔ kè dyììn ɖé à dyɔɔ̀ mú wóɖó jè gbo-kɔ̃̀-kɔ̃̀ ɖé hwìè tɔ̀ɔ̀ ɓè ɓɛ́ wa sɛ́ɖɛ́ìn dyíɛɛ mú. Ðɛ séín ɖò ɓɛ́ à nyu ɓɛ́ à ké Jɛhova hwòɖò dyi dè, kɛbì ɔ mɛ mɔ̀ ɖɛ tííwè ɓèɛɛ, ɔ nyuɛ ké Jɛhova hwòɖò dèìn à múin.—Ðúù 16:10.
Hwòtimo nàìn-nàìn dyí-sɛ́ɖɛ́ìn-kà kè à mìɔùn gbo-gmɔ̀-gmɔ̀ dyììn ɖé kpóɖó-dyùàɔ̀ dyi-nyu-nyu kè ɖɛín-ɖɛ̀ ɖi-ɖi ɔ kè jĩ́á-jè nyu-nyu múɛɛ mɔ̀ hwìè ɖíɛ́ ɓè kɔ̃̀ mú à ɓɛ́ìn Jɛhova hwòɖò dyi dèɛ̀ kɛ (Dyé zaìn-kɔ̃in 14)
15. Xwɛ̀ Jɛhova mɔ́ ɓɛ́ à ké nyɔ tɔ̀ɔ̀ ɓè kpɔ̃ kɛ́?
15 Jɛhova nɔ̀mɔ̀ kpeɖeín ɖé dyí-sɛ́ɖɛ́ìn-nyɔ̀ ɓè kè nyɔ se dyí sɛ́ɖɛ́ìn ɓè gbo. (Máf. 5:45) Ɔ mɔ́ ɓɛ́ à ké nyɔ tɔ̀ɔ̀ ɓè ɖɛín-ɖɛ̀ dyí nyu ɖekè. Ɔ hwɔìn-kà, ɔ mɔ́ ɓɛ́ à “ní kɔ̃̀ ɖà nyɔ ɖò ɖɛ gbà kɔ̃ún cɛ̃, ɓɛ́ [à] ké se jɛ, kɛɛ . . . [à] mɛ ɓéɖé kpeɖe nɔ̀mɔ̀ dyíin ɓó nyɔùn séín gbo.” (Tátɔ̀ 3:2) Ɔ jèɛɛ, à ní zàìn nyɔ tɔ̀ɔ̀ ɓè dyéɖé zùùn, sepoɛɖe à kè wa kè se jàà-po-ɖɛ̀ dyúáɖò ɓèɔ̀ mú peɖeìn jè. (2 Tím. 2:23-25) À xwɛ̃́ìn Jɛhova bũ̀in dyììn ɖé nyɔ séín ɓè jè-gbo-kɔ̃̀-kɔ̃̀ mú.
À ƁƐ́ÌN GEÐEPƆƆ “BŨ̀IN XWƐ̃́ÌN” KƐBÌ À MƐ BĨ ÐƐ XWA KƐ
16. Xwɛ̀ Wɛ́ɖɛ́ 73 céè-nyɔ̀ hwòɖò nyu ma nìɛ̀ ɓó ti ɖò ɓaɖa kɛ́?
16 Kɛɛ, ɔ jù ké m̀ dyiɛ hwìɖìi poìn tiɔ̀ ɖíɛ́ ɓè ɓaɖa kà ɓɛ́ m̀ se ɖɛ kpa ɓó Jɛhovaa ɖɛ̀ɓɛ̀ìn-ɖɛ̀ɓɛ̀ìnɔ̀ jè ní ɖé? Kà à nyuɔ́ kà cɛ̃ɛ kɛɛ, ɖɛ dyúáɖòɔ̀ kpá ma nyɔ céè ma kà Wɛ́ɖɛ́ 73 kɛɛ gbo. Ɔ cɛ̃ɛ ma wìì-kà, ké ɔ ɖá: “Ɔ sè ɖɛ tííwè ɓɛ́ ḿ kéɔ́ má ní hwìèɔ̀ dyí sɔ̀ìn. Ɔ sè ɖɛ tííwè ɓɛ́ ḿ kéɔ́ má ɓuɖu.” (Wɛ́ɖɛ́ 73:2) Ɔ mìɔùn wɔ̃́ìn ma mú kà ɓɛ́ ɔ “hwòɖò-dyùàɔ̀ nɛɛ̀” ma, ké ɔ nì ma “kà zuɖuu-nìmìì ɖò nìà kɛ” ɓó Jɛhova dyúa. (Wɛ́ɖɛ́ 73:21, 22) Ɔ poɛ̀n ma hwìɖìi kà sepoɛɖe ɔ bĩ ma ɖɛ xwa jèɛɛ, ɔ nyuu-ɖɛ̀ se ma mú wóɖóɛ ɓɛ́ìn ɖeè, ké ɔ se ma ɖɛ kpa ɖé Jɛhova gboò?
17. (a) Ðɛ́ wɛ́ɖɛ́-céè-nyɔ̀ɔ̀ ɓɛ́ìn ma nyuɛ ti ɔ hwòɖò kpá ma ɖé ɖei mìɔ kɛ́? (b) Ðɛ́ mɔ̀ cɛ̃́ɛ́-ɖɛ̀ ɖò ɓɛ́ à ɓɛ́ìn ɔ xwaún cɛ̃́ɛ kɛ́? (Dyé dyi-dyé-ɖɛ̀ ɓèɔ̀ ɖekè.)
17 Ɔ jù ké wɛ́ɖɛ́-céè-nyɔ̀ɔ̀ dyiɛ ma hwìɖìi poìn kà Jɛhova ɖà ma ɔ kɔ̃ín pòìn nyɛ ní, nìí, hwìɖìi-poìn-poìn nìà wɛɛ mɔ̀ ma ɓó ti wè bìì pu. Ɔ nì pu kà ti ɔ hwòɖò kpá ma ɖé ɖeiɛɛ, ɔ wɔ̃́ɔ ma múin kà ɔ kɔ̃̀ ɔ ké ma Geɖepɔɔ bũ̀in xwɛ̃́ìn mìɔ kɛ. Ɔ cɛ̃ɛ ma, ké ɔ ɖá: “Kɛɛ wɛ̃́ɛ́ kɛɛ, [Jɛhova,] m̀ nì ɓó ḿ gbo ke kánáá pu. M̀ kpɔ̃ ní ɖiaùn-sɔ̃̀ɔ̀ dyi. M̀ gã̀ ḿ nàìn dyi tee dyììn ɖé nì nyɔ-náún-po-poɔ̀ mú, ké sɔ̀ìn ɓóɛ gboɛɛ, nì mu ḿ jè dyi kpɔ̃ùn ɖé dya-dè-dè mú.” (Wɛ́ɖɛ́ 73:23, 24) À mɔ̀ùn mɛ gmɔ̀ìn ɖé Jɛhova gbo ɖekè, ɓɛ́ ɔ ké à dyi kùìn ɔ jù ké à dyi kpéí hwɛ̀, mɔɔ à hwòɖò dyi ɖé ɖei kpá ní. (Wɛ́ɖɛ́ 73:26; 94:18) Kɛbì à mɛ sɔ̀ìn hwìì ɓó ti wè bììɛɛ, à ɓɛ́ìn Jɛhova gbo ɖe kɔ́ìn, ɓɛ́ à kéɛ hwòɖò kɔ̃ dè kà ɔ “zĩ̀ìn nyɔ kɔ̃in” nyɛ. (Wɛ́ɖɛ́ 86:5) Jɛ́ɛ́ kɛɛ, ɔ jù ké à hwòɖò dyi ɖé ɖei kpá ní, à mɛ xwɛ̃́ìn Geɖepɔɔ bũ̀in mìɔ.—Wɛ́ɖɛ́ 103:13, 14.
À dyi kpéí hwɛ̀ ɖé zùùn ní, à mɛ xwɛ̃́ìn Jɛhova bũ̀in dyììn ɖé ɔ ɓiè-ɓièɔ̀ gbo-vòìn-vòìn mú (Dyé zaìn-kɔ̃in 17)
‘XWƐ̃́ÌN GEÐPƆƆ BŨ̀IN’ KÁNÁÁ PU
18. Xwíníínɔ̀ nyɛ́ kɔ̃̀ jè Jɛhova bũ̀in-xwɛ̃́ìn-xwɛ̃́ìn seà sèìn-naín ɖò kɔ̃̀ kɛ́?
18 Jɛhova bũ̀in-xwɛ̃́ìn-xwɛ̃́ìn kè ɔ dyí-dyuò-dyuò se sè-naín ɖò kɔ̃̀ fɔɔ. Baɓoɔ cɛ̃ɛ kà ɓɛ́ Jɛhovaa nyuu-ɖɛ̀ ɓèɔ̀ kè ɔ hwòɖò-fɔ̀nɔ̀-fɔ̀nɔ̀ɔ̀ ɔ kè ɔ ɖɛ-dyí-dyuò-dyuòɔ̀ “zi kpéín ɓúáuń mìɔ” kɛ.—Wóɖ. 11:33.
19. Ðɛ́ mɔ̀ hwòɖò-kɔ̃-dè-ɖɛ̀ ɓɛ́ Wɛ́ɖɛ́ 73 nyí à kɛ́?
19 Wɛ́ɖɛ́ 79:13 ɖá: “À mɔ̀à nì nyɔ ɓè, ɓɛ́ à mɔ̀à nì ɓáɖáá ɓè nìà ɖé nì nyúà-ɖɛ̀ dyi-ɖi-naínɔ̀ kɛɛ mu m̀ zùo poùn kánáá pu. Ké à mu nì ɓàìn-bɔ̃̀ dyi poùn ɖé xwéɖé-dù deìn dúún ɓèɔ̀ hwìɛ̀.” Mɔ̀ùn ɓɛ́ìn hwòɖò kɔ̃ dèɛ̀ ɖekè kà m̀ ɓɛ́ìn sè-ná-sèɛ̀ mana ɓè dyéɛ ɔ jù ké m̀ dyi Geɖepɔɔ bũ̀in xwɛ̃́ìn kánáá pu níɛ, ké m̀ ɓɛ́ìn cɛ̃ɛ, ɓɛ́ m̀ ké níìn: “Geɖepɔɔ mɔ̀ ḿ kpé-nyí-nyɔ̀. Ɔ ɖòùn mɔ̀ ɖɛ séín ní mɔ́ɛ, ké kàà ɔ mu nììn kánáá pu.”—Wɛ́ɖɛ́ 73:26.
WƐ́ÐƐ́ 32 Gã Jɛhova!
a Nyɔ ɓè ɓɛ́ fũ̀à-fṹá dè dyí, ké wa gbàìn hwòɖò dyií, ké wa hwòɖò kpá ɖé ɖei teeɛɛ mu dyɛ̀ hwòo-nyɔ̀ mɔ́ùn. Ɓɛ́ m̀ ké ɖɛ pàɖà cɛ̃́ ní, dyé Dyí-Gmɔ̀ìn-Gbò-Cèè-Ðɛ̀ɔ̀, Nɔ̀. 1 2023.