À Kè À Ðíí Ɓèɔ̀ Bũ̀in-Xwɛ̃́ìn-Xwɛ̃́ìn Nɔ̀mɔ̀ Dyíin Ɓó À Bìì!

1-2. Ðɛ́ mɔ̀ ɖɛ dyúáɖò ɓɛ́ ɔ kpa ɖɛ ɖé Jɛhova gbo kɛ́, ké ɖɛ́ ɔ mɔ́ ɓɛ́ à ké nyu kɛ́?

KÀ À nyu à mùè-nyɔ̀ùn-dyù ɓè kpɔ̃ɔ kɛɛ jè kpa ɖɛ mìɔ ɖé Jɛhova gbo. Jizɛ cɛ̃ɛ ma kà ɓɛ́ à mɛ ɖɛ̀ɓɛ̀ à mùè ɖò mú kà à ɖɛ̀ɓɛ̀à à mìɔùn múɛ. (Máf. 22:​37-39) Ɔ náa nyu-nyu ɖò mɔ̀ nyɔ ɓè ɓɛ́ à kè wa kè seà jàà-po-ɖɛ̀ dyúáɖòɔ̀ mú peɖeìn nyɛɛ nɔ̀mɔ̀ dyíin dyí-nyu-nyu. À dyiɛ náa nyu ní, nìí, à mu Jɛhova Geɖepɔɔ ɓo-bɛ̃̀ìn síìn, sepoɛɖe ɔ “nyu ké dyóɖóɔ̀ fã̀ìn ɖɛ-gbà-nyu-nyɔ̀ ɓèɔ̀ kè ɖɛín-ɖɛ̀-nyu-nyɔ̀ ɓèɔ̀. Ké ɔ nyí nyɔ ɓè nyu dyí-sɛ́ɖɛ́ìn-ɖɛ̀ kɛ kè nyɔ ɓè nyu ɖɛ se dyí sɛ́ɖɛ́ìn nyɛɛ ní.”—Máf. 5:45.

² Jɛhova ɖɛ̀ɓɛ̀ nyɔùn séín mú dyɛo, kɛɛ ɔ ɖɛ̀ɓɛ̀ nyɔ ɓè ɓɛ́ wa nyu dyí-sɛ́ɖɛ́ìn-ɖɛ̀ kɛɛ mú jɛ́ɛ́. (Jɔ̃́ɔ́ 14:21) Ɔ mɔ́ ɓɛ́ à ké ɔ ɓo-bɛ̃̀ìn sí. Ɔ jèɛɛ, ɔ po à kpéí kà à mɛ “ɖɛɓɛìn ɖɛ̀ɓɛ̀ìn mú hwòɖòɛ̀-ɖé-hwɛ̀-kà,” ké à mɛ “ɖɛɓɛìn ɖɛ̀ɓɛ̀ìn mú kà ɖíí ɓè ɖɛ̀ɓɛ̀ìn kà múɛ.” (1 Píɖɛ̀ 4:8; Wóɖ. 12:10) À dyi nyɔ ɖò mú-ɖɛ̀ɓɛ̀-ɖɛ̀ɓɛ̀ nì kà wɛ jè hwìɖìi poìn ní, ɖɛ ɓɛ́ìn à hwìɖìi dyiɛ kɛɛ mɔ̀ gbo-kpɔ̃ìn-kpɔ̃ìn ɓɛ́ ɔ nì à kè à gbo-xwíníín-nyɔ̀ ɖò ɓɛ́ à ɖɛ̀ɓɛ̀ múɛ pṹa, mɔɔ à kè à ɖɛ̀ɓɛ̀ ɓàto ɖò pṹa kɛ.

3. Ðɛ́ mɛ nì à hwìɖìi ɓá ɖɛ̀ɓɛ̀ìn-ɖɛ̀ɓɛ̀ìn jè dyíɛ́?

³ Kà ɓáá-ɖɛ̀ ɖò mɔ́à gbo-gmɔ̀-gmɔ̀ ɓɛ́ ɔ kéà bã kɛɛ, kàà ɖɛ̀ɓɛ̀ìn-ɖɛ̀ɓɛ̀ìn jè nyu nìɛ̀. Àpɔ́sò Pɔ́ɔ̀ po ma Kɛ́ɖɛ́ì ɖeín-sí-nyɔ̀ ɓè náún, ké ɔ ɖá: “Kà ɓɛ́ ɓè mɔ̀à ɖíí-gàà ɓèɛɛ, ɓè mɛ ɖɛɓɛìn ɖɛ̀ɓɛ̀ìn mú tee.” (Híì. 13:1) Jɛhova mɔ́ ɓɛ́ à ké nyɔ tɔ̀ɔ̀ ɓè mú ɖɛ̀ɓɛ̀ tee. Cɛ̃́ɛ́-ɖɛ̀ nìà kɛ mu xwíníín kɔ̃̀ jè à mɛ xwɛ̃́àìn à mùè ɓiè-nyɔ̀ ɓè bũ̀in mìɔ, kè kà à ɓɛ́ìn náa nyuɛ teeɛɛ jè kɔ̃in zaìn.

XWÍNÍÍN KƆ̃̀ JÈ À MƐ XWƐ̃́ÀÌN À MÙÈ ÐÒ BŨ̀IN MÌƆ KƐ

4. Kà Wɛ́ɖɛ́ 133:1 nyuà cɛ̃ɛ kɛɛ, xwɛ̀ à ɓɛ́ìn zùo-po-hwòɖò ɓéɖéɛ tee ɓó gbo-kpɔ̃ìn-kpɔ̃ìn nìà à hwìɛ̀ kɛɛ jè kɛ́? (Dyé dyi-dyé-ɖɛ̀ɔ̀ ɖekè.)

⁴ Zà Wɛ́ɖɛ́ 133:1 wuɖuún. À wɔ̃́ìn ɖɛ wɛ́ɖɛ́-céè-nyɔ̀ɔ̀ céè ma kɛɛ gbo, kà ɓɛ́ nyɔ ɓè ɖɛ̀ɓɛ̀ Jɛhova múɛɛ ɓàto mú-kpɔ̃-kpɔ̃ mɔ̀ “ɖɛ kpa ɖɛ mìɔ cá” kɛ. Kɛɛ, kà dyúáɖò kà nyɔ ɖò ɓɛ́àìn cu-gɔ̃̀ vɛ̀nɛ̀ ɖò ɓɛ́ ɔ dyéà wé séín nyɛɛ jè feɖe dyi ɓaɖaa kɛɛ, kàà à ɓɛ́ìn gbo-kpɔ̃ìn-kpɔ̃ìn nɔ̀mɔ̀ dyíin nìà à mɔ̀ Kɛ́ɖɛ́ì ɖeín-sí-nyɔ̀ ɓè hwìɛ̀ kɛɛ jè feɖe dyi ɓaɖaa. À dyé à ɖíí ɓèɔ̀ kpɛ́-kpɛ́, ké tiɔ̀ ɖíɛ́ ɓè ní, à dyéìn kpa vò-vò ɖé wíkì dyúáɖò xwíníín. Xwɛ̀ à ɓɛ́ìn zùo-po-hwòɖò ɓéɖéɛ ɓó wa jè teeɛ́? Ðɛ̀ɓɛ̀ìn-ɖɛ̀ɓɛ̀ìn ɓɛ́ à ɓéɖéà ɓó à ɖíí ɓèɔ̀ bììɛɛ mu kɔ̃ kpáùn ɔ jù ké à dyi ti dyí ɖú ɓɛ́ à ké kà wa ɖò-ɖò nyu ɖɛ kpaa ɖé à gbo, kè ɖé dyí-poìn-kpòòɔ̀ múɛɛ jè hwìɖìi poìn ní.

5. Ðɛ́ ɖɛ̀ɓɛ̀ìn-ɖɛ̀ɓɛ̀ìn nìà à hwìɛ̀ kɛɛ ɓɛ́ìn nyɔ tɔ̀ɔ̀ ɓè bũ̀ nyuɛ kɛ́?

⁵ Ðɛ̀ɓɛ̀ìn-ɖɛ̀ɓɛ̀ìn ɓɛ́ à ɓéɖéà à mùè ɖò bììɛɛ fɔ̀nɔ̀ìn nyɔ ɖíɛ́ ɓè ɓɛ́ ɔ mɔ̀ wa ti kĩ́ín ɓɛ́ wa ké à dyí-poìn-poìn ɓèɔ̀ ɖò mú muɛɛ wɔ̃. Ðɛ nìà kɛ ɖòùn ɓɛ́ìn nyuɛ ɓɛ́ wa kéɛ jàà po kà ɓɛ́ wa ɖà jààɔ̀ dyéɛ. Jizɛ cɛ̃ɛ ma, ké ɔ ɖá: “Ɓè dyi mú ɖɛɓɛìn ɖɛ̀ɓɛ̀ìn ní, nìí, nyɔùn séín muɛ dyí dyuòùn kà ɓɛ́ ɓè mɔ̀ ní ɖeín-nà-nyɔ̀ ɓèɛ.” (Jɔ̃́ɔ́ 13:35) Poìn ɖɛ Cáítàɖà dyé ma dyíɛɛ jè hwìɖìi. Ɔ nì ma káɖéjè muɛń, ké ɔ kè Jɛhova Zàse ɓè nì ma Baɓoɔ cɛ̃́iń. Ɔ wɔ̃́ìn ma ɖá-wùɖù ɖò gbo, ɓɛ́ ɔ ké ma kɔ̃̀vɛ̃́sĩ̀ɔ̀ ɖò kɔ̃ mu. Ti ɔ mu ma ɖé ɓó wé kĩ́ín-kĩ́ínɔ̀ ɓaɖaa, ɔ cɛ̃ɛ ma ɔ Baɓo-tɛ̀mɛ̀ìn-nyɔ̀ɔ̀ gbo, ké ɔ ɖá: “Ní wóɖóìn-nyɔ̀ ɓèɔ̀ séè ḿ gbèɖèìn ɖò. Kɛɛ, ɖé ɓèɛ̀ kɔ̃̀vɛ̃́sĩ̀ɔ̀ kɔ̃ɛɛ, nyɔ-kpò kpáɖá-nyɔ sɔ̃́ ɓaɖa-bùè sè sɔ̃́ gbèɖèìn ma ḿ ɓó wé dyúáɖò xwíníín! Jɛhova tɛ̀mɛ̀ìn ma ɔ ɖɛ̀ɓɛ̀ìn-ɖɛ̀ɓɛ̀ìnɔ̀ ḿ dyí dyììn ɖé ɔ zùùn-xwèɖè-dùɔ̀ mú. Ḿ mɔ́ ɓɛ́ ḿ ké xwéɖé-dùà mú nì.” Cáítàɖà gã̀ ma dyúa muɛń dyi tee, ké ɔ kpá ma níɔ ɖé 2024 xwíníín. Ǹdye, ɔ jù ké nyɔ ɖìè ɓè dyi à kũ̀à nɔ̀mɔ̀ dyíin ɓèɔ̀ kè ɖɛ̀ɓɛ̀ìn-ɖɛ̀ɓɛ̀ìn ɓɛ́ à ɓéɖéà à mùè ɖò bììɛɛ dyé ní, ɔ po wa kpéí tee ɓɛ́ wa ké Jɛhova ɓiè.—Máf. 5:16.

6. Xwɛ̀ à ɖíí ɓèɔ̀ bũ̀in-xwɛ̃́ìn-xwɛ̃́ìn ɓɛ́ìn à dyí gmɔ̀ɔ̀ kɛ́?

⁶ À ɖíí ɓèɔ̀ bũ̀in-xwɛ̃́ìn-xwɛ̃́ìn ɓɛ́ìn à dyí gmɔ̀ɔ̀. Pɔ́ɔ̀ cɛ̃ɛ ma ɔ mùè Kɛ́ɖɛ́ì ɖeín-sí-nyɔ̀ ɓè gbo, ké ɔ ɖá: “Ɓè mɛ poìn pòìn kpéí wé séín ɓaɖa . . . ɓɛ́ nàmàùn ní kɔ̃̀ ɖà ɓè cá, ɓɛ́ ɓè ké ɓèɛ̀ hwòɖò-dyùàɔ̀ kùmùìn.” (Híì. 3:13) Ɔ jù ké à hwòɖò dyi ɖé ɖei kpá mìɔ, ké ɔ dyiɛ nyuɛń nì ɓɛ́ à ké hwìè sɛ́ɖɛ́ìn dyíɔ̀ xwíníín sɔ̀ ní, Jɛhova ɓɛ́ìn à mùè jàà-po-nyɔ̀ ɖò ɓɛ́ ɔ mɔ̀ ɖɛ-dyéɖé-gbo-dè-nyɔ̀ kɛɛ hwòɖò-dyùà dyi tìnìɛ̀n, ɓɛ́ ɔ ké à gbo kpá. (Wɛ́ɖɛ́ 73:​2, 17, 23) Gbo-kpá-kpá nì kà wɛ nɔ̀mɔ̀ dyíin ɓó à bìì.

7. Xwɛ̀ ɖɛ̀ɓɛ̀ìn-ɖɛ̀ɓɛ̀ìn kè gbo-kpɔ̃ìn-kpɔ̃ìn nyu gbo muɛ̀n nyɛ́? (Kɔ̀ɖɔ́sĩ̀à 3:​13, 14)

⁷ À nì nyɔ kúɖúú ɓè ɓɛ̀ wa vɔ̃ kóɖó-kóɖó ɓɛ́ wa ké wa mùè ɖò ɖɛ̀ɓɛ̀ìn-ɖɛ̀ɓɛ̀ìn dyí tɛ̀mɛ̀ìn nyɛɛ hwìɛ̀. Ɔ jèɛɛ, à dyé mana ɓáún-ɓáún. (1 Jɔ̃́ɔ́ 4:11) Ɔ hwɔìn-kà, ɖɛ̀ɓɛ̀ìn-ɖɛ̀ɓɛ̀ìn nyuɛ ké à “kuìn kùìn kpeɖe hwòɖò,” ké ɔ nyuɛ ké à kpɔ̃ìn gbo. (Zà Kɔ̀ɖɔ́sĩ̀à 3:​13, 14 wuɖuún; Ìfí. 4:​2-6) Ɔ jèɛɛ, ɖé à dyí-poìn-poìn ɓèɔ̀ múɛɛ, à ɓéɖé gìɖìi ɓɛ́ ɔ se kpoo kà kò ɖò mú nì fɔɔ dà ɓóɖó-kpàà kɔ̃ɛ.

À MƐ DYÉÌN DYÈÌN KPÉÍN

8. Xwɛ̀ Jɛhova nyu à gbo kpáa ɓɛ́ à ké gbo kpɔ̃ìn nyɛ́?

⁸ Gbo-kpɔ̃ìn-kpɔ̃ìn nìà à hwìɛ̀ ɖé ɓóɖó-kpàà dà séín nyɛɛ mɔ̀ dĩ́ín-dĩ̀ìn-ɖɛ̀ ɖò cá. À se mú hwɛ̀ dyɛo, kɛɛ Jɛhova nyuɛ ké ɔ kpá ná. (1 Kɔ̀. 12:25) Baɓoɔ cɛ̃ɛ kà ɓɛ́ ‘Geɖepɔɔ tɛ̀mɛ̀ìn ma à kà ɓɛ́ à ké mú ɖɛɓɛìn ɖɛ̀ɓɛ̀ìn nyɛ.’ (1 Tɛ̀s. 4:9) Ɔ xwíníín mɔ̀ dyììn ɖé Baɓoɔ múɛɛ, Jɛhova cɛ̃ ɖɛ jɛ́ɛ́ à kɔ̃̀ à ké nyu, ɓɛ́ à ké à mùè ɖò bũ̀in xwɛ̃́ìn nyɛɛ à gbo. “Geɖepɔɔ tɛ̀mɛ̀ìn” à ɖɛ ɔ jù ké à dyi ɔ tɛ̀mɛ̀ìn-ɖɛ̀ ɓèɔ̀ múin gmɔìn kóɖó-kóɖó, ké à dyi wa dyi kpɔ̃ ní. (Híì. 4:12; Jĩ́ìn 1:25) Ké ɖɛ nìà wɛ jɛ́ɛ́ ɖé Jɛhova Zàse ɓè vɔ̃ ɓɛ́ wa ké nyu.

9. Ðɛ́ à cɛ̃́ sɔ̀ìn ɖé Wóɖómà 12:​9-13 mú ɓá nyɔ mùè ɖò kpéín dyé jè dyíɛ́?

⁹ Xwɛ̀ Geɖepɔɔ Wuɖuɔ̀ nyu à ɖɛ tɛ̀mɛ̀ìn ɓɛ́ à ké à mùè ɖò bũ̀in xwɛ̃́ìn nyɛ́? Poìn ɖɛ Pɔ́ɔ̀ cɛ̃ ma ɓá ɖɛ nìà kɛ jè dyí ɖé Wóɖómà 12:​9-13 múɛɛ jè hwìɖìi. (Zàà wuɖuún.) Dyéɖé-gbo-dè-ɖɛ̀ jɛ́ɛ́ɔ̀ mɔ̀ wuɖu ɓè mɔ̀à “ɓèɛ̀ dyɔɔ̀ mɛ nyu cá-cá ɓó ɓè mùè ɖò kpéín dyé jè” kɛ. Ðɛ́ mɔ̀ ɔ xwíníín nyɛ́? À mɛ fṹà ɓɛ́ à ké “wìì-hwòɖò-dyùà” ɓéɖé ɓó nyɔ tɔ̀ɔ̀ ɓè bìì dyììn ɖé wa kɔ̃in-zĩ̀ìn-zĩ̀ìn, kè wa jè dyi-kpɔ̃-kpɔ̃ kè wa jĩ́á-jè dyí-nyu-nyu ɔ kè ɖé ɖɛ tɔ̀ɔ̀ ɓè mú. (Ìfí. 4:32) M̀ se kɔ̃̀ m̀ ké fòìn ɓɛ́ nì ɖíí ɖò ké m̀ bũ̀in xwɛ̃́ìn kĩ́ín hwɛ̀. Nì “dyɔɔ̀ mɛ nyu cà-cà” ɓó nì ɖíí ɖò bũ̀in xwɛ̃́ìn jè. Jizɛ cɛ̃ɛ ma wáɖáá, ké ɔ ɖá: “Nyɔ-ɖɛ-nyí-nyí dyà múà, ké ɔ zi ɖɛ-dyé-dyé dyí.”—Àpɔ́. 20:35.

10. Xwɛ̀ à ɓɛ́ìn dúún kuɛ, ɓɛ́ à ‘dyɔɔ̀ ké cà-cà nyu ɓó à mùè ɖò kpéín dyé’ jè kɛ́? (Dyé dyi-dyé-ɖɛ̀ɔ̀ ɖekè.)

¹⁰ Hwìɖìi-nɔ̀mɔ̀-ɖɛ̀ɔ̀ mɔ̀, ti ɓɛ́ Pɔ́ɔ̀ hwɔɔ ma cɛ̃ɛ kà à dyɔɔ̀ mɛ nyu cà-cà ɓó à mùè ɖò kpéín dyé jè nyɛ̀nɛ̀ɛ̀ kɛɛ, ɔ cɛ̃ɛ ma ɖe kà à ní ɖá ɓɛ́ “kpé ké à dyí hwɛ̀” kɛ. Nyɔ ɓɛ́ kpé se dyí hwɛ̀ kɛɛ ku dúún ɓó kũ̀à nyu jè. Wa dyi ɔ kũ̀à ɖò nyí ní, ɔ nyuɛ kóɖó-kóɖó. Nɔ́ɔ́ 3:​27, 28 ɖá: “Nyu nyɔ ɓè ɓɛ́ wa mɔ́ gbo-kpá-kpá kɛɛ nɔ̀mɔ̀ dyíin dyí, ti ɓɛ́ m̀ ɓɛ́ìn kpé ɓɛ́ m̀ kéɛ nyuɛ. Mɔ̀ùn ɖá ɓɛ́ m̀ kéɛ sɔ̃ kɔ̃ nɛ́ìn.” Ɔ jèɛɛ, à dyiɛ dyé kà nyɔ ɖò mɔ́ gbo-kpá-kpá kɛ ní, à nyu ɖɛ séín à ɓɛ́ìn nyuɛ kɛ ɓɛ́ à ké ɔ gbo kpá. À ní zĩ̀ɛ̀n ti gboi; mɔɔ à ní poɛ̀n hwìɖìi kà ɓɛ́ nyɔ kà kò ɖò mu ɖɛɔ̀ jè gbo dyéìn nyɛ.—1 Jɔ̃́ɔ́ 3:​17, 18.

11. Ðɛ́ ɓɛ́ìn à gbo kpáa ɓɛ́ à ké à mùè ɖò bũ̀in xwɛ̃́ìn nyɛ́?

¹¹ Hwìè ɖò kɔ̃̀ mú ɓɛ́ à ɓɛ́ìn nyɔ tɔ̀ɔ̀ ɓè kpéín dyéɛ ɖeɛɛ mɔ̀, ɓɛ́ à ké fṹà ɓó wa kɔ̃in zĩ̀ìn jè ɔ jù ké wa dyi à ɖɛ gbà ɖò bũ̀ nyu ní. Ìfísĩ̀ɔ̀ 4:26 ɖá: “[Dyoɖo] ní ɖá ɓɛ́ ɔ ké ɓè mú dyi gã̀ ɓɛ́ dyóɖó ké zi.” Xwíníínɔ̀ nyɛ́ kɔ̃̀ jèɛ́? Vɔ̀sì 27 cɛ̃ɛ kà ɓɛ́ ɔ náa nyu-nyu muɛ nyuùn ɓɛ́ à ké “Nɔɔ́-nàmàùn pá nyí” kɛ. Jɛhova cɛ̃ɛ à gbo tee ɖé ɔ Wuɖuɔ̀ mú kà ɓɛ́ à mɛ zĩ̀ìn à mùè ɖò kɔ̃in nyɛ. Kɔ̀ɖɔ́sĩ̀à 3:13 cɛ̃ɛ kà ɓɛ́ à mùè ɖòɛ̀ ɖɛ gbà “jè mɛ hwɛ̀ [à] hwìɖìi” gàná cá kɛ. Ðɛ ɓè ɓɛ́ wa ɓɛ́ìn nyuɛ ɓɛ́ à ké nyɔ tɔ̀ɔ̀ ɓè bũ̀in xwɛ̃́ìn nyɛɛ ɖò mɔ̀ wa kɔ̃in-zĩ̀ìn-zĩ̀ìn. À dyiɛ náa nyu ní, ɔ mu à gbo kpáùn ɓɛ́ à ké “gbo-kpɔ̃ìn-kpɔ̃ìn ɓɛ́ zùùɔ̀ nyu ké nyɔ ɓéɖéà kɛɛ . . . dyi kpɔ̃ ɖé gìɖìi ɓɛ́ ɔ kpɔ̃àìn [à] gboɛɛ mú.” (Ìfí. 4:3) Ɔ xwíníín mɔ̀, nyɔ-kɔ̃in-zĩ̀ìn-zĩ̀ìn ɓɛ́ìn nyuɛ ɓɛ́ à ké gbo kpɔ̃ìn, kè ɓɛ́ à ké gìɖìi ɓéɖé.

12. Xwɛ̀ Jɛhova nyu à gbo kpáa ɓɛ́ à ké nyɔ tɔ̀ɔ̀ ɓè kɔ̃in zĩ̀ìn nyɛ́?

¹² Ɔ nì ná dyɛo, kɛɛ ɔ ɓɛ́ìn mú kàmàà ɓɛ́ à ké nyɔ ɓè ɓɛ́ wa po à hwòɖò ɖé ɖeiɛɛ kɔ̃in zĩ̀ìn. Kɛɛ, à ɓɛ́ìn nyuɛ dyììn ɖé Geɖepɔɔ kpé mú. Ti Baɓoɔ ɖàa ma cɛ̃ kà à mɛ “ɓéɖé wìì-hwòɖò-dyùà” ɓó à mùè ɖò bìì, ké à “ní ɖá ɓɛ́ kpé ké [à] dyí hwɛ̀” kɛɛ, Baɓoɔ cɛ̃ɛ ɖe, ké ɔ ɖá: “Ɓè mɛ nyu ɖɛ ɓè hwòɖòɛ̀-ɖé-hwɛ̀-kà.” Nyɔ ɓɛ́ ɔ nyu ɖɛ “hwòɖòɛ̀-ɖé-hwɛ̀-kà” kɛɛ hwòɖò-dyùà nyu cà-cà, sepoɛɖe zùù hwɛ̀in-hwɛ̀inɔ̀ nì ɔ kɔ̃ jè. (Wóɖ. 12:11.) Ɔ jèɛɛ, Geɖepɔɔ zùùɔ̀ ɓɛ́ìn à gbo kpáa, ɓɛ́ à ké wìì-hwòɖò-dyùà ɓéɖé, kè ɓɛ́ à ké à mùè ɖò kɔ̃in zĩ̀ìn ɖé hwòɖò wáɖáá mú. Xwíníínà kɔ̃̀ jè à ɓaà Jɛhova kóɖó-kóɖó ɓɛ́ ɔ kéà à gbo kpá kɛ̀.—Ðúù 11:13.

‘MÚ-GE-GE ÐÒ MƐ ƁƆ́ ÐÉ ƁÈ HWÌƐ̀ NÌƐ̀’

13. Ðɛ́ ɓɛ́ìn mú-ge-ge dyàà ɖé à hwìɛ̀ kɛ́?

¹³ “Nyɔùn séín ɓè” ɓɛ́ wa sɔ̀ìn xwéɖé-dù kò-kò ɓè múɛɛ nì ɖé dyí-poìn-kpòòɔ̀ mú. (1 Tím. 2:​3, 4) Ɔ jù ké à se mú ma ní, à kò jèɔ̀ ɓɛ́ìn nyuɛ ɓɛ́ à ké mú ge ɖé ɖɛ ɓè à gã kɛɛ mú, hwɔìn-kà ɖɔún-po-kà kè bɛ̃̀ìn-kà mɔɔ nyɔ-hwòo-kà mɔɔ péé mɔɔ múà-nyu-kà. (Wóɖ. 14:4; 1 Kɔ̀. 1:10) Sepoɛɖe ‘Geɖepɔɔ tɛ̀mɛ̀ìn à kà à ké mú ɖɛɓɛìn ɖɛ̀ɓɛ̀ìn nyɛ’ jèɛɛ, à ɓéɖé ɓɛ́ à ké mú ma, ɓɛ́ à ní kɔ̃̀ɔ̀ ɖà nyu kà ɖɛ ɓè à gã kɛɛ kpa ɖɛ ké ɔ zi nyɔ tɔ̀ɔ̀ ɓè nììn dyíɛ.—Fèɖ. 2:3.

14. Ðɛ́ à mɛ vɔ̃ ɓɛ́ à ké nyu ti séín nyɛ́, ké xwíníínɔ̀ nyɛ́ kɔ̃̀ jèɛ́?

¹⁴ À ɓɛ́ìn mú-ge-ge ɓɔ́í poɛ ɖeké ɖé dyí-poìn-kpòòɔ̀ mú dyììn ɖé nyɔ tɔ̀ɔ̀ ɓè hwòɖò-dyi-dè-dè kè wa kpéí-po-po mú ti séín. (1 Tɛ̀s. 5:11) Ðé zɔ̃ ɓè zià dyiɛ xwíníín nyɛɛ, nyɔ gbɛ̀ì-gbɛ̀ì ɓè ɓɛ́ wa hwɛ̀ ma kpéí ɖé zùùn mɔɔ wa zà ma wa ɖé dyí-poìn-kpòòɔ̀ múɛɛ ɖà ɖe dyi. À kpɔ̃ wa hwìì ɖé ɖɛ̀ɓɛ̀ìn-ɖɛ̀ɓɛ̀ìn mú! (2 Kɔ̀. 2:8) Poìn ɖíí-màà ɖò ɓɛ́ ɔ hwɛ̀ ma kpéí ɖé zùùn ɓó zɔ̃ ɓaɖa-bùè xwíníín, ké ɔ dyi ma Kĩ́-Dɔ̃̀ Hɔ́ɔ̀ zɔ̃ ɖeɛɛ jè hwìɖìi. Ɔ ɖá, “Wa kpɔ̃ ma ḿ hwìì ɖé múà mú, ké wa tó ma ḿ xwaún dyi.” (Àpɔ́. 3:19) Ðɛ́ kpeɖeín-nɔ̀mɔ̀-nɔ̀mɔ̀ tííwè nìà kɛ nyu ma ɔ bũ̀ kɛ́? Ɔ ɖá, “Ɔ nyuɛ ké ḿ poɛ̀n ma hwìɖìi kà ɓɛ́ Jɛhova sɔ̃̀ɔ̀ nì ma ḿ nàìn ɓɛ́ ḿ ké ma múà ɓéɖé ɖeɛ.” Dyììn ɖé nyɔùn séín kpéí-po-po múɛɛ, Kɛ́ɖɛ́ì ɓɛ́ìn à kũ̀à mú nyùɛ̀n ɓɛ́ à ké “nyɔ ɓè ɓɛ́ [waà] kũ̀àɔ̀ ku wɔ̃, ké [waà] gbɛ̀ɔ̀ ku xwaa” hwòɖò-dyi-dè-dè nyí.—Máf. 11:​28, 29.

15. Ðɛ̀ mɔ̀ hwìè kà kò ɖò kɔ̃̀ mú à ɓɛ́ìn gbo-kpɔ̃ìn-kpɔ̃ìn dyàà kɛ́? (Dyé dyi-dyé-ɖɛ̀ɔ̀ ɖekè.)

¹⁵ Hwìè ɖò kɔ̃̀ mú ɓɛ́ à ɓɛ́ìn gbo-kpɔ̃ìn-kpɔ̃ìn dyàà ɖeɛɛ mɔ̀ dyììn ɖé à wĩín-wùɖù mú. Jóɓò 12:11 ɖá: “Má, ɖùùɔ̀ wɔ̃́ wuɖu ɓè ké ɔ dyuò wa zaìn gboi dyí, kà dyúáɖò kà wɔ̃ɔ̀ dɔ̃̀à ɖɛ wɔ̃, ké ɔ dyuò ɖɛ ɖéèɛ kè ɖɛ se ɖéèɛɛ zaìn gboi dyíɛe?” Kà dyúáɖò kà ɖɛ-pĩ-nyɔ̀ nɔ̀mɔ̀ dyíin ɖò dyià ɖɛ pĩ ní, ɔ dɔ̃̀à wɔ̃ kĩ́ín ɓɛ́ ɔ kéɛ dyé kɛbì ɔ ɖéè ní hwɛ̀ ɔ dyià nyɔ tɔ̀ɔ̀ ɓè nyíɛɛ, kàà ɔ mu dyíin nɔ̀mɔ̀ùn ɓɛ́ à ké ɖɛ ɓè à mu cɛ̃ìn nyɛɛ jè hwìɖìi poìn kĩ́ín hwɛ̀ à ké wa cɛ̃. (Wɛ́ɖɛ́ 141:3) Ðɛ mɛ mɔ̀ à dyí-sɔ́-ɖɛ̀ teeɛɛ mɔ̀ ɓɛ́ à kéɛ jè gbo dyé ɓɛ́ ɖɛ ɓè à muà cɛ̃ìn nyɛɛ ké nyɔ ɓè kpéí po, kè ɓɛ́ ɔ ké wa hwòɖò dyi dè, ɔ kè ɓɛ́ ɔ ké “mana-ɖɛ̀ jù ɖé nyɔ ɓè muà wa wɔ̃́ùn wɛ̃ɛ gbo.”—Ìfí. 4:29.

16. Nyɛ́ jɛ́ɛ́ ɓè ɓɛ́ nyɔ-kpéí-po-wùɖù ɓè kũ̀à mú nyùìn jè mɛ kpɔ̃ hwòɖò kɛ́?

¹⁶ Nyɔ́nɔ́-ɓà ɓè kè wóɖóìn-nyɔ̀ ɓè mɔ̀ nyɔ jɛ́ɛ́ ɓè ɓɛ́ wa kɔ̃̀ wa ké mú ma, ɓɛ́ wa wĩín-wùɖù ɓè ké nyɔ tɔ̀ɔ̀ ɓè kpéí poɛ. (Kɔ̀ɖ. 3:​19, 21; Tátɔ̀ 2:4) Ɛ́ɖɔ̀ ɓè mɔ̀ùn kɔ̃̀ wa ké nyɔ-hwòɖò-dyi-dè-nyɔ̀ ɓè jù kà wa mɔ̀à Jɛhovaa ɓáɖáá ɓèɔ̀ dyí-gmɔ̀-nyɔ̀ ɓèɛ. (Àzé. 32:​1, 2; Gàɖ. 6:1) Nɔ́ɔ́ ɖò nì ɖé Baɓoɔ múɛɛ ɖá: “Wuɖu ɓɛ́ nyɔ ɖò cɛ̃ ké ɔ nì páún wɛ̃ɛ—ɔ zi dyíin nɔ̀mɔ̀ùn mìɔ!”—Nɔ́ɔ́ 15:23.

À ÐƐ̀ƁƐ̀ÌN-ÐƐ̀ƁƐ̀ÌNƆ̀ “MƐ MƆ̀ JÀÀ, KÉ Ɔ MƐ KƆ̃̀ NYUU-ÐƐ̀”

17. Xwɛ̀ à ɓɛ́ìn tɛ̀mɛ̀ìn kà à ɖɛ̀ɓɛ̀ à ɖíí ɓèɔ̀ mú jàà kɛ́?

¹⁷ Àpɔ́sò Jɔ̃́ɔ́ po à kpéí kà à “ɖɛ̀ɓɛ̀ìn-ɖɛ̀ɓɛ̀ìnɔ̀ se ɓéɖé ɓɛ́ ɔ ké wuɖu fóɖóún jù pu. Kɛɛ, ɔ mɛ mɔ̀ jàà, ké ɔ mɛ kɔ̃̀ nyuu-ɖɛ̀” kɛ. (1 Jɔ̃́ɔ́ 3:18) À mɔ́ ɓɛ́ à ké à ɖíí ɓèɔ̀ mú ɖɛ̀ɓɛ̀ sɔ̀ìn ɖé à hwòɖòɔ̀ bũ̀. Xwɛ̀ à ɓɛ́ìn náa nyuɛ kɛ́? Kà à kè à ɖíí ɓèɔ̀ mu da hwèɖèìn nyɛɛ, kàà à mu wa bũ̀in xwɛ̃́ìn mìɔ, ké kàà à mu wa mú ɖɛ̀ɓɛ̀ìn mìɔ. Ɔ jèɛɛ, m̀ mɛ mɔ́ ti dyi, ɓɛ́ m̀ ké nyɔ tɔ̀ɔ̀ ɓè gbo hwèɖè—ɖé dyí-poìn-poìnɔ̀ mú kè ɖé wuɖu-wáɖá-kũ̀àɔ̀ mú. Ðú ti dyí ɓɛ́ m̀ ké nyɔ tɔ̀ɔ̀ ɓè gboi té. À dyiɛ náa nyuín, nìí, à nìɛ̀ tɛ̀mɛ̀ìn kà ‘Geɖepɔɔ tɛ̀mɛ̀ìn ma à kà ɓɛ́ à ké mú ɖɛɓɛìn ɖɛ̀ɓɛ̀ìn nyɛ.’ (1 Tɛ̀s. 4:9) Ké à muɛ dyéìn ɓó à mìɔùn bìì kà “wóɖó-wóɖó ɓè dyi dà dyúáɖò cĩ́ ɖé gbo-kpɔ̃ìn-kpɔ̃ìn mú ní, ɔ mɔ̀ ɖɛ kpa ɖɛ mìɔ cá” kɛ!—Wɛ́ɖɛ́ 133:1.