Jɛhovaa Nyɛ́nɛ́ɔ̀—Kà Ɔ Jè Nyu Ðɛ Kpaa Ðé Jizɛ Gboɛ

1-2. (a) Ɓó máaún-kà hwɛ̀ ɓɛ́ Jizɛ ké ma mɛ́ɛ, ɖɛ́ ɔ nyu ma kɛ́? (b) Ðɛ́ mɔ̀ dyi-diè-ɖɛ̀ ɓè ɓɛ́ à mu dɔ́ɔ́ kɔ̃in dèìn ɖé cɛ̃́ɛ́-ɖɛ̀ nìà kɛ múɛ́?

Ɔ MƆ̀ ma Tɔ́ɔ́dè ɓàɖà hwìo, Nísàùn-dɛ̀nɛ̀ɔ̀ wé 14 kɔ̃, ɓó 33 C.E., ké ɔ mɔ̀à ma ti ɓɛ́ wa ké ma Jizɛ peɖe, kè ɓɛ́ wa ké ma ɔ zaa wɔ̃ po, kè ɓɛ́ wa ké ma ɔ zaa dúún wáɖá, kè ɓɛ́ wa ké ma ɔ gà dyéìn ɔ kè ɓɛ́ wa ké ma ɔ ɖáɓá. Ɔ kè ɔ jàà àpɔ́sò ɓèɔ̀ ɖà ma Bounɓoɔ̀ ɖii-ɖɛ̀ɔ̀ ɖiɛ hwɔ ɖé dyií-gbò ɖòɛ̀ ɓí-dyù ɖò mú. Ti wa ɖà ma ɖɛ ɖiɛ hwɔɛɛ, Jizɛ sè ma ɔ àpósɔ̀ ɓèɔ̀ kpéí-po-wùɖù ɓè dyi. Ké hwɛ̀ ɓɛ́ wa séín ké ma ɖé gbòɔ̀ mú sɔ̀ nyɛ̀nɛ̀ɛ̀ kɛɛ, Jizɛ nyu ma ɓaà-wùɖù kpa ɖɛ ɖò. Àpɔ́sò Jɔ̃́ɔ́ céè ma ɓaà-wùɖù nìà wɛ ɓíɖíi; ké ɔ nì ɖé Jɔ̃́ɔ́ wuɖu-kpà 17 mú.

² Ðɛ́ Jizɛɛ ɓaà-wùɖùɔ̀ tɛ̀mɛ̀ìn à dyí ɓá ɖɛ kpɔ̃ ma ɔ hwòɖò ɓó tia ɓaɖaa jè dyíɛ́? Xwɛ̀ ɓaà-wùɖù nìà wɛ nyu ɖɛ kpa ma ɖɛ ɖé ɔ gbo ti ɔ nì ma wuɖu-wáɖá-kũ̀àɔ̀ nyuɛń dà ɓóɖó-kpàà kɔ̃ɛɛ tɛ̀mɛ̀ìn nyɛ́? Ɓèà dèìn dyi-diè-ɖɛ̀ ɓè nìà kɛ gɔ̃̀-jù-wùɖù ɓèɔ̀ dɔ́ɔ́ kɔ̃in.

“Ḿ NYUƐ KÉ WA ÐÀ [NÌ NYƐ́NƐ́Ɔ̀] DYÍ DYUÒ”

3. Ðɛ́ Jizɛ cɛ̃ ma ɓá Jɛhovaa nyɛ́nɛ́ɔ̀ jè dyíɛ́, ké ɖɛ ɔ kpàìn ma hwòɖò kɛ́? (Jɔ̃́ɔ́ 17:​6, 26)

³ Jizɛ cɛ̃ɛ ma ɖé ɔ ɓaà-wùɖùɔ̀ mú, ké ɔ ɖá: “Ḿ nyuɛ ké wa ɖà [nì nyɛ́nɛ́ɔ̀] dyí dyuò.” Jɛ́ɛ́ kɛɛ, ɔ cɛ̃̀ìn ma kpa sɔ̃́ kà ɔ ɖàa ma nyu, ké ɔ ɖeín-nà-nyɔ̀ ɓèɔ̀ ɖà ma Jɛhovaa nyɛ́nɛ́ɔ̀ dyí dyuòɛ. (Zà Jɔ̃́ɔ́ 17:​6, 26 wuɖuún.) Ðɛ́ Jizɛ kpàìn ma hwòɖò kɛ́? Ɔ tɛ̀mɛ̀ìn ma wa nyɛ́nɛ́ ɖò ɓɛ́ wa se ma dyí dyuòɛɛ̀? Jizɛɛ ɖeín-nà-nyɔ̀ ɓèɔ̀ mɔ̀ ma Júù-nyɔ̀ ɓè jèɛɛ, wa dyuòɛ̀ ma dyí kà Geɖepɔɔ nyɛ́nɛ́ mɔ̀ ma Jɛhova kɛ. Nyɛ́nɛ́ nìà wɛ nì ɖé Dèè-Wùɖù Sùàɔ̀ mú kpa táázĩ̀ìn vò-vò. Ɔ jèɛɛ, Jizɛ se ma Geɖepɔɔ nyɛ́nɛ́ɔ̀ dyí dyuò jè cɛ̃iń nì; kɛɛ, ɔ nì ma ɖɛ mɔ̀ nyɛ́nɛ́ɔ̀ xwíníín nyɛɛ jè cɛ̃iń. Jizɛ ɖàa ma nyu ɓɛ́ nyɔ ɓè ké ma Nyɔ ɓéɖéà Jɛhova-nyɛ̀nɛ̀ɔ̀ kɛɛ dyí dyuò, kè ɓɛ́ wa ké ma nyɔɔ̀ hwòɖòɛ̀-gbɔ-po-ɖɛ ɓè kè ɔ nyuu-ɖɛ̀ ɓè ɔ kè ɔ kpeɖe ɓè dyí dyuò ɖekè ɖé hwìè kɔ̃̀ mú ɓɛ́ nyɔ ɖò se ma nyuɛ ɓɛ́ìn nyɛ.

4-5. (a) Xwɛ̀ à ɓɛ́ìn ɖɛ mɔ̀ nyɔ ɖòɛ̀ nyɛ́nɛ́ dyuò-dyuò xwíníín nyɛɛ jè kɔ̃in zaìn nyɛ́? (b) Hwìèɔ̀ nyɛ́ kɔ̃̀ mú Jizɛɛ ɖeín-nà-nyɔ̀ ɓèɔ̀ dyuò ma Jɛhovaa nyɛ́nɛ́ɔ̀ dyíɛ́?

⁴ Poɛ̀n hwìɖìi kà ɛ́ɖɔ̀ ɖò nì ɖé nì dyí-poìn-kpòòɔ̀ múɛɛ nyɛ́nɛ́ mɔ̀ Dèɓé, ké ɔ mɔ̀ nyɔ-hwòo-nyɔ̀ ɓɛ́ ɔ nyu nyɔ ɓè kũ̀à gboɛ. M̀ ɖà ɖíí-gàà nìà kɛ dyí dyuòɛ̀n hwèɖèìn. Kɛɛ púɛɛ wé ɖòɛ̀ ɓaɖaa, cɛ-cɛ-wɛ̀ ɖò kpɔ̃ m̀. Wa kpàìn m̀ pɛɖɛ ɖé píɖɛín-gbò kɔ̃̀ mú ɓɛ́ ɖíí-gààɔ̀ nyuà kũ̀à kɛɛ zɔ̃̀, ké ɔ nyùìn ɔ nyɔ-hwòo-sɛ̀ɖɛ̀ɔ̀ kũ̀à mú ɓɛ́ ɔ ké m̀ póìn. Nì hwòɖò ɖá ɖíí-gààɔ̀ nyɛ́nɛ́ɔ̀ mu ɖɛ kpaùn mìɔ ɖé m̀ gboò? Jɛ́ɛ́ cá pu! Dèɓé se ɛ́ɖɔ̀ ɖòùn pu ɖé m̀ gbo ɖe; ɔ mɔ̀ nyɔ-kũ̀à-gbo-nyu-nyɔ̀ ɓɛ́ ɔ póìn nì fɛ̀ɛ̀ɔ̀ ɖekèɛ.

⁵ Kà dyúáɖòɔ̀ kàà Jizɛɛ ɖeín-nà-nyɔ̀ ɓèɔ̀ dyuò ma Jɛhovaa nyɛ́nɛ́ɔ̀ dyí. Kɛɛ, nyɛ́nɛ́ nìà wɛ kpa ma ɖɛ mìɔ ɖé wa gbo dyììn ɖé Jizɛɛ wuɖu-wáɖá-kũ̀àɔ̀ mú. Xwíníínɔ̀ nyɛ́ kɔ̃̀ jè à ɖáà ná kɛ́? Ɔ mɔ̀ sepoɛɖe Jizɛ tɛ̀mɛ̀ìn ma ɔ Ɓàà kpeɖeɔ̀ ɖé ɖɛ séín ɓè ɔ cɛ̃ ma kè ɖɛ séín ɓè ɔ nyu ma kɛɛ mú. Ɔ jèɛɛ, ɔ àpɔ́sò ɓèɔ̀ “dyuò” ma Jɛhova dyí nɔ̀mɔ̀ dyíin dyììn ɖé ɔ tɛ̀mɛ̀ìn-ɖɛ̀ ɓèɔ̀ ɖùù gbo tò-tò kè kà ɔ nyu ma nyɔ ɓè kpɔ̃ɔ kɛɛ dyéɖé-gbo-dè-dè mú.—Jɔ̃́ɔ́ 14:9; 17:3.

“NÌ NYƐ́NƐ́ ƁƐ́ M̀ NYÍ MA Ḿ [WƐ̃]”

6. Hwìèɔ̀ nyɛ́ kɔ̃̀ mú Jɛhova nyí ma Ɔ nyɛ́nɛ́ɔ̀ Jizɛ kɛ́? (Jɔ̃́ɔ́ 17:​11, 12)

⁶ Ðé ɓaà-wùɖù ɓɛ́ Jizɛ nyu ma ɓó ɔ ɖeín-nà-nyɔ̀ ɓèɔ̀ bììɛ múɛɛ, ɔ cɛ̃ɛ ma, ké ɔ ɖá: “Gmɔ̀ wa dyí dyììn ɖé nì nyɛ́nɛ́ ɓɛ́ m̀ nyí ma ḿ wɛ̃ɛ mú.” (Zà Jɔ̃́ɔ́ 17:​11, 12 wuɖuún.) Ɔ xwíníín mɔ̀ wa muá Jizɛ Jɛhova ɖáìnǹ? Gbào. Dèɛ̀ dyéɖé gbo kà ti ɓɛ́ Jizɛ cɛ̃ ma Jɛhova-nyɛ̀nɛ̀ɔ̀ jèɛɛ ɔ ɖá, “nì nyɛ́nɛ́.” Ɔ jèɛɛ, Jizɛ se ma Jɛhovaa nyɛ́nyɛ́ɔ̀ dyí ɖú. Nìí, ɖɛ́ Jizɛ kpàìn ma hwòɖò ɓɛ́ ɔ dyiɛ ma cɛ̃ kà Geɖepɔɔ ɖà ma Ɔ nyɛ́nɛ́ɔ̀ ɔ nyí kɛ́? Kĩ́ín nyɛɛ, Jizɛ mɔ̀ ma Jɛhova kɛ́-ɓaɖa-nyɔ̀ kè ɔ bìì wùɖù-nyɔ̀. Ɔ dyi ma ɖé ɔ Ɓàà nyɛ́nɛ́ɔ̀ mú, ké ɔ nyu ma dĩ́ín-dĩ̀ìn-ɖɛ̀ ɓè ɖé nyɛ́nɛ́ nìà wɛ mú. (Jɔ̃́ɔ́ 5:43; 10:25) Ɓó kɔ̃in ɖeɛɛ, Jizɛ-nyɛ̀nɛ̀ɔ̀ xwíníín mɔ̀, “Jɛhova Mɔ̀ Nyɔ-Póìn-Nyɔ̀.” Jɛ́ɛ́ kɛɛ, Geɖepɔɔ nyɛ́nɛ́ɔ̀ ɓá Jizɛɛ nyɛ́nɛ́ɔ̀ dyí.

7. Xwɛ̀ Jizɛ ɓɛ́ìn ma Jɛhova bìì wùɖùɛ̀ kɛ́? Zaìn kɔ̃in.

⁷ Ɔ jù ké ɓóɖó ɖòɛ̀ kɛ́-ɓaɖa-nyɔ̀ ɖò dyi ɓóɖó-nàìn-nyɔ̀ ɖò kɛ́ ɓaɖa ní, ɔ ɓɛ́ìn ɓóɖó-nàìn-nyɔ̀ɔ̀ bìì wùɖùɛ̀. Ɔ jèɛɛ, kɛ́-ɓaɖa-nyɔ̀ɔ̀ wuɖuɔ̀ ɓéɖé kpé dyúáɖò ɓɛ́ ɓóɖó-nàìn-nyɔ̀ɔ̀ wuɖuɔ̀ ɓéɖéà kɛ. Kà dyúáɖòɔ̀ kàà, Jizɛ ɓaɖa ma Jɛhova kɛ́, ké ɔ wùɖù ma ɔ bìì ɖé nyɔ ɓèɔ̀ gbo.—Máf. 21:9; Ðúù 13:35.

8. Xwɛ̀ Jizɛ nyu ma Jɛhova kɛ́ ɓaɖaa hwɛ̀ ɔ ké ma ɓóɖó-kpàà kɔ̃ dyi kɛ́? (Ɛ́séɖɔ̀ 23:​20, 21)

⁸ Sepoɛɖe Jizɛ mɔ̀ Wuɖuɔ̀ jèɛɛ, ɔ wùɖù ma Jɛhova bìì. Ɔ nyuɛ ma náa dyììn ɖé Jɛhovaa wuɖuɔ̀ ínjà tɔ̀ɔ̀ ɓè kè nyɔùn-dyù ɓè gbo-cɛ̃-cɛ̃ mú. (Jɔ̃́ɔ́ 1:​1-3) Jizɛ ɓɛ́ìn ma ínjà ɓɛ́ Jɛhova ɖoɓo ma ɓɛ́ ɔ ké ma Éézùɖùɛ̀-nyɔ̀ ɓèɔ̀ dyí gmɔ̀ ti wa nì ma Íjè-ɓòɖòɔ̀ kɔ̃ sɔ̀ùn wɛ̃ɛ jùɛ. Ti Jɛhova nìɛ̀ ma Éézùɖùɛ̀-nyɔ̀ ɓèɔ̀ gbo cɛ̃iń ɓɛ́ wa ké ma ínjà nìà wɛ wuɖu nyuɛɛ, Ɔ cɛ̃ɛ ma, ké ɔ ɖá: “Sepoɛɖe ɔ ɓaɖa ní kɛ́.”a (Zà Ɛ́séɖɔ̀ 23:​20, 21 wuɖuún.) Jizɛ ɓaɖa ma Jɛhova kɛ́, sepoɛɖe ɔ mɔ̀ nyɔ jɛ́ɛ́ ɓɛ́ ɔ vɔ̃ ma ɔ Ɓàà nyɛ́nɛ́ɔ̀ jè ké ɔ hwɔɔ ma múɛ.

“Ḿ ƁÀ, M̀ MƐ NYUƐ ƁƐ́ NÌ NYƐ́NƐ́Ɔ̀ KÉ ƁÀÌN-ƁÀÌN ƁÉÐÉ”

9. Xwɛ̀ Jɛhovaa nyɛ́nɛ́ɔ̀ jè nyu ma ɖɛ kpaa mìɔ ɖé Jizɛ gbo kɛ́? Zaìn kɔ̃in.

⁹ À ɖàa máa dɔ́ɔ́ kɔ̃in dèìn kà hwɛ̀ ɓɛ́ Jizɛ ké ma ɓóɖó-kpàà kɔ̃ dyiɛɛ, Jɛhovaa nyɛ́nɛ́ɔ̀ jè kpa ma ɖɛ mìɔ ɖé ɔ gboɛ. Xwíníínà kɔ̃̀ jè Jɛhovaa nyɛ́nɛ́ɔ̀ ɓá ma kà ɖɛ séín ɓɛ́ Jizɛ nyu ma dà ɓóɖó-kpàà kɔ̃ɛɛ dyí jɛ́ɛ́ kɛ̀! Ðé Jizɛɛ wuɖu-wáɖá-kũ̀àɔ̀ mánáín nyɛɛ, ɔ cɛ̃ɛ ma Jɛhova gbo, ké ɔ ɖá: “Ḿ Ɓà, nyuɛ ɓɛ́ nì nyɛ́nɛ́ɔ̀ ké ɓàìn-ɓàìn ɓéɖé.” Wàɖà cá kɛɛ, ɔ Ɓà jù ma ɔ gɔ̃̀ sɔ̀ìn ɖé dyɔún ɖé wuɖu zoo mú, ké ɔ ɖá: “Ḿ ɖàa nyu ɓɛ́ ɔ ké ɓàìn-ɓàìn ɓéɖé, ké ní muɛ náa nyuùn ɖe.”—Jɔ̃́ɔ́ 12:28.

10-11. (a) Ðɛ́ Jizɛ nyu ma ɓɛ́ Jɛhovaa nyɛ́nɛ́ɔ̀ ké ma ɓàìn-ɓàìn ɓéɖéɛ́? (Dyé dyi-dyé-ɖɛ̀ɔ̀ ɖekè.) (b) Xwíníínɔ̀ nyɛ́ kɔ̃̀ jè Jɛhovaa nyɛ́nɛ́ɔ̀ kɔ̃̀ ɔ kéà mú hwɛ̀, kè ɓɛ́ ɔ kéà dya-dè-dè ɓéɖé kɛ́?

¹⁰ Jizɛ mɔ̀ùn nyuɛ ma ɖekè ɓɛ́ ɔ Ɓà nyɛ́nɛ́ɔ̀ ké ma ɓàìn-ɓàìn ɓéɖé. Xwɛ̀ kɛ́? Hwìè ɖò kɔ̃̀ mú ɓɛ́ ɔ nyuɛ ma náa kɛɛ mɔ̀ dyììn ɖé ɔ Ɓàà kpeɖe nɔ̀mɔ̀ dyíin ɓèɔ̀ kè Ɔ nyuu-ɖɛ̀ ɓèɔ̀ jè nyɔ tɔ̀ɔ̀ ɓè gbo-cɛ̃-cɛ̃ mú. Kɛɛ, ɔ kɔ̃̀ ɔ ké ma ɖɛ ɖò nyu ɖe ɓɛ́ nyɛ́nɛ́ nìà wɛ ké ma ɓàìn-ɓàìn ɓéɖé. Jɛhovaa nyɛ́nɛ́ɔ̀ kɔ̃̀ ɔ ké ma mú hwɛ̀ kè ɓɛ́ ɔ ké ma dya-dè-dè ɓéɖé.b Ti Jizɛ tɛ̀mɛ̀ìn ma ɔ ɖeín-sí-nyɔ̀ ɓèɔ̀ kà wa ké ma ɓaà nyuɛɛ, ɔ tɛ̀mɛ̀ìn ma kà ɓɛ́ nyɛ́nɛ́ nìà wɛ jè kpa ma ɖɛ mìɔ kɛ. Ɔ cɛ̃ɛ ma, ké ɔ ɖá: “À Ɓà, mɔ̀ nìà ɖé dyɔún wɛ̃ɛ, nì nyɛ́nɛ́ɔ̀ [mɛ] hwɛ̀ mú.”—Máf. 6:9.

¹¹ Xwíníínɔ̀ nyɛ́ kɔ̃̀ jè Jɛhovaa nyɛ́nɛ́ɔ̀ kɔ̃̀ ɔ kéà mú hwɛ̀, kè ɓɛ́ ɔ kéà dya-dè-dè ɓéɖéɛ́? Ɔ mɔ̀ sepoɛɖe ɖé Ídɛ̃̀ìn-ɓàà-ɖɛ̀-gbàɔ̀ múɛɛ, Sétɔ̃̀ mɔ̀à Nɔ́ɔ́-nàmàùn wɛ̃ɛ tɔ́mɔ́ìn ma Jɛhova Geɖepɔɔ se wĩin. Sétɔ̃̀ cɛ̃ɛ ma kà ɓɛ́ Jɛhova mɔ̀ se-tɔ́mɔ́-nyɔ̀, kè kà ɓɛ́ Ɔ nì ma Áɖɔ̀ùn kè Íì ɖɛín-ɖɛ̀ ɖò dyí vìeɛ̀n nyɛ. (Jɛ́n. 3:​1-5) Ké ɖeɛɛ, Sétɔ̃̀ nìɛ̀ ma cɛ̃iń ɖé hwìè ɖò mú kà ɓɛ́ Jɛhova ɖɛ-nyu-kà se ma dyí sɛ́ɖɛ́ìn nyɛ. Se-tɔ́mɔ́-tɔ́mɔ́ ɓɛ́ Sétɔ̃̀ nyu ma kà kɛɛ gbɔɔ̀ ma Jɛhovaa nyɛ́nɛ́ɔ̀ mú. Ké ɖé Jóɓò nììn tiín nyɛɛ, Sétɔ̃̀ cɛ̃ɛ ma kà ɓɛ́ nyɔ ɓè ɓɛ́ wa ɓiè Jɛhova kɛɛ nyuɛ náa ɓó ɖɛ wa ɓɛ́ìn Ɔ xwaún dyéɛ kɛɛ jèɛ. Se-tɔ́mɔ́-nyɔ̀ nìà wɛ cɛ̃ɛ ma ɖekè kà ɓɛ́ nyɔ ɖò se Jɛhova mú ɖɛ̀ɓɛ̀ ɓɛ́ìn jàà cá, ɓɛ́ ɔ ké Ɔ ɓiè kánáá pu ɖé mú-dɔ̃̀-dɔ̃̀ xwaún wɛ̃. (Jóɓò 1:​9-11; 2:4) Ti kɔ̃̀ ɔ ké ma zi ɓɛ́ nyɔ mɔ̀ ma se-tɔ́mɔ́-nyɔ̀ɔ̀ kɛɛ jè ké ma wáɖáá nì, kɛbì ɔ mɔ̀ ma Jɛhova mɔɔ Sétɔ̃̀ ní.

“Ḿ WƆ̃́ ƁƐ́ Ḿ KÉ NÍ FƐ̀Ɛ̀Ɔ̀ DYI PƐ̃́ÌN”

12. Sepoɛɖe Jizɛ ɖɛ̀ɓɛ̀ ma Jɛhovaa nyɛ́nɛ́ɔ̀ mú jèɛɛ, ɔ hwòɖò wɔ̃́ ɓɛ́ ɔ ké ma ɖɛ́ nyu kɛ́?

¹² Sepoɛɖe Jizɛ ɖɛ̀ɓɛ̀ ma Jɛhova mú jèɛɛ, ɔ mɔ́ ɓɛ́ ɔ ké ma ɖɛ séín ɔ ɓɛ́ìn ma nyuɛ kɛɛ nyu, ɓɛ́ ɔ ké ma Jɛhova nyɛ́nɛ́ɔ̀ mú hwɔ, kè ɓɛ́ ɔ kéɛ ma dya dè. Jizɛ cɛ̃ɛ ma, ké ɔ ɖá, “Ḿ wɔ̃́ ɓɛ́ ḿ ké ní fɛ̀ɛ̀ɔ̀ dyi pɛ̃́ìn.” (Jɔ̃́ɔ́ 10:​17, 18) Jɛ́ɛ́ kɛɛ, ɔ hwòɖò wɔ̃́ ma ɓɛ́ ɔ ké ma mɛ́ ɓó Jɛhovaa nyɛ́nɛ́ɔ̀ jè.c Áɖɔ̀ùn kè Íì ɓɛ́ wa mɔ̀ ma nyɔùn-dyù kĩ́ín-kĩ́ín se kɛɛ ɖò ɓéɖéɛɛ pòìn ma Jɛhova kɔ̃ín, ké wa zi ma Sétɔ̃̀ gbo. Kɛɛ, ɓá Jizɛ mɔ̀ùn jè dyíɛɛ, ɔ hwòɖò wɔ̃́ ma ɓɛ́ ɔ ké ma ɓóɖó-kpàà kɔ̃ dyi, ɓɛ́ ɔ kéɛ ma tɛ̀mɛ̀ìn kà ɔ ɖɛ̀ɓɛ̀ Jɛhova múɛ. Jizɛ nyuɛ ma náa dyììn ɖé Jɛhova wuɖu nyu-nyu mú ɖé ɔ cĩ́-cĩ́ gànáa mú. (Híì. 4:15; 5:​7-10) Ɔ nyu ma Jɛhova wuɖu tee ké ɔ dyɛ̀ìn ma ɔ gĩɔ ɖé gà-dyé-cùɔ̀ dya. (Híì. 12:2) Dyììn ɖé hwìè nìà kɛ múɛɛ, ɔ tɛ̀mɛ̀ìn ma kà ɔ ɖɛ̀ɓɛ̀ Jɛhova kè Ɔ nyɛ́nɛ́ɔ̀ múɛ.

13. Xwíníínɔ̀ nyɛ́ kɔ̃̀ jè Jizɛ mɔ̀ ma kà nyɔ jɛ́ɛ́ ɓɛ́ ɔ kéɛ ma tɛ̀mɛ̀ìn kà Sétɔ̃̀ mɔ̀ ma se-tɔ́mɔ́-nyɔ̀ɔ̀ kɛ́? (Dyé dyi-dyé-ɖɛ̀ɔ̀ ɖekè.)

¹³ Dyììn ɖé Jizɛɛ cĩ́-kàɔ̀ múɛɛ, ɔ tɛ̀mɛ̀ìn ma kà ɓɛ́ Sétɔ̃̀ mɔ̀ ma se-tɔ́mɔ́-nyɔ̀ɔ̀, ké ɔ se ma Jɛhova kɛ̀! (Jɔ̃́ɔ́ 8:44) Jizɛ dyuò ma Jɛhova dyí mìɔ, ké ɔ zi ma nyɔ séín ɖò dyí. Ké ɔ jù ké ɖɛ séín ɓè ɓɛ́ Sétɔ̃̀ cɛ̃ ma kà Jɛhova kɔ̃ùn wɛ̃ɛ ɖò dyi ma jàà jù ní, nìí, Jizɛ muɛ ma jè dyí dyuòùn. Kɛɛ, Jizɛ jìnìɛ̀n ma kɔ̃ kóɖó-kóɖó ɓɛ́ ɔ ké ma Jɛhova nyɛ́nɛ́ɔ̀ jè kùì kpɔ̃ tee. Ké ti ɓɛ́ ɔ hwɔìn ma, kà Jɛhova ɖà ma Jizɛ dyí táà kɛɛ, Jizɛ hwòɖò wɔ̃́ ma ɓɛ́ ɔ ké ma mɛ́, ké ɔ se ma ɔ ɖɛ̀ɓɛ̀ìn-ɖɛ̀ɓɛ̀ìn Ɓàɔ̀ kɔ̃ín pòìn.—Máf. 27:46.d

“Ḿ ÐÀ KŨ̀À ƁƐ́ M̀ NYÍ MA Ḿ, ƁƐ́ Ḿ KÉ MA NYUƐƐ NYUƐ HWƆ”

14. Xwɛ̀ Jɛhova nyu ma Jizɛ mana kɔ̃ poɛ ɓó ɔ wuɖu nyu jè teeɛ́?

¹⁴ Ðé ɓaà-wùɖù ɓɛ́ Jizɛ nyu ma ɓó máaún-kà hwɛ̀ ɔ ké ma mɛ́ɛ múɛɛ, ɔ cɛ̃ɛ ma, ké ɔ ɖá: “Ḿ ɖà kũ̀à ɓɛ́ m̀ nyí ma ḿ, ɓɛ́ ḿ ké ma nyuɛɛ nyuɛ hwɔ.” Jizɛ dèɛ̀ ma hwòɖò kɔ̃ kà ɓɛ́ Jɛhova mu ma ɔ mana kɔ̃ poùn ɓó ɔ wuɖu nyu jè teeɛ. (Jɔ̃́ɔ́ 17:​4, 5) Ké ɔ sɛ́ɖɛ́ìn ma dyí ɓɛ́ Jizɛ ké ma ɔ Ɓà hwòɖò kɔ̃ dè. Jɛhova seɛ ma gbo wɔ̃́ìn ɓɛ́ Jizɛ ké ma ɖé xwɛ́-gmààɔ̀ mú sè. (Àpɔ́. 2:​23, 24) Jɛhova zà ma Jizɛ gĩɔ, ké ɔ nyí ma ɔ kpé vɛ̀nɛ̀ ɖò ɖé dyɔún. (Fèɖ. 2:​8, 9) Ké ti ɖà ma ziɛɛ, Jizɛ jù ma Kã́á ɓó Geɖepɔɔ kã́á-ɓòɖòɔ̀ bìì. Ðɛ́ Kã́á-ɓòɖòɔ̀ mu nyuùn wɛ̃́? Ðé ɓaà-wùɖù ɓɛ́ Jizɛ tɛ̀mɛ̀ìn ma kà ɔ ɖeín-nà-nyɔ̀ ɓèɔ̀ kɛ wáká sɔ̃́ nììnɔ̀ múɛɛ, ɔ cɛ̃ɛ ma, ké ɔ ɖá: “Nì kã́á-ɓòɖòɔ̀ mɛ dyi. Wa mɛ nyu nì [Jɛhovaa] mɔ́ɔ́-ɖɛ̀ nɔ ɓóɖó-kpàà kɔ̃, kà ɔ nyuà nìɛ̀ ɖé dyɔún wɛ̃.”—Máf. 6:10.

15. Ðɛ́ kà kò ɖò ɓɛ́ Jizɛ mu nyuùn wɛ̃́?

¹⁵ Ti wè ɖà ziín, Jizɛ mu Geɖepɔɔ mú-nyɛ́-nyɔ̀ ɓèɔ̀ gbo vɔ̃ùn, ɓɛ́ ɔ ké hwòɖò-kɔ̃in-nyìnììn-nyɔ̀ ɓèɔ̀ mú gbɔɔ̀ ɓó Àmàgɛ́ɖɔ̀ùn-tòɔ̀ tiín. (Wɛ̀ɖ. 16:​14, 16; 19:​11-16) Sɔ̀ìn ɓóɛ gbo nyɛ̀nɛ̀ɛ̀ ní, ɔ mu Sétɔ̃̀ ɖé ‘ɓí vɛ̀nɛ̀ tɔ̀mɔ̀ùn-tɔ̀mɔ̀ùn’ ɓɛ́ ɔ mɔ̀à ɔ kpé xwa-zà-zà kɛɛ mú poùn. (Wɛ̀ɖ. 20:​1-3) Jizɛ mu gìɖìi dyàùn ké ɔ muɛ nyuùn ɓɛ́ nyɔùn-dyù mú hwɛ̀ ɖe ɓó ɔ Zɔ̃ Táázĩ̀ìnɔ̀ tiín. Ɔ mu nyɔ ɓè ɖàa mɛ́ɛ gĩɔ zàùn. Ɔ mu ɓóɖó-kpà gànáɔ̀ páɖédà mú nyuùn. Jɛhovaa hwòɖòɛ̀-gbɔ-po-ɖɛ̀ mu jàà kpáùn!—Wɛ̀ɖ. 21:​1-4.

16. Ðɛ́ mu jàà kpáùn ɖé Zɔ̃ Táázĩ̀ìnɔ̀ mánáín nyɛ́?

¹⁶ Ðɛ́ mu jàà kpáùn ɖé Zɔ̃ Táázĩ̀ìnɔ̀ mánáín nyɛ́? Nyɔùn-dyù se nàmàùn kè kɛɛ ɖò ɓéɖéɛ mu ɖe. Nyɔùn-dyù se waà nàmàùn ɓèɔ̀ kɔ̃in zĩ̀ìn jè ɓaà mu ɖe dyììn ɖé mú-gbààìn-ɖɛ̀ɔ̀ mú; ké wa se mú-zĩìn-nyɔ̀ mɔɔ sáa-zà-nyɔ̀ ɖò mɔ́ɔ mu ɖe. Ké “mú-nyɛ́-nyɔ̀ hwɛ̀ìn-gbɔ” mɔ̀à “gĩɔ [ɓɛ́ Áɖɔ̀ùn dyàà kɛɛ]” se nìɛ̀ mu ɖe fɔɔ. Xwɛ́-gmà ɓèɔ̀ mu fóɖóún kpáùn. Ɔ xwíníín mɔ̀, nyɔ ɓè ɖà ma mɛ́ɛ mu gĩɔ wóɖóùn. Nyɔ séín mu ɓóɖó-kpàà kɔ̃ nììn ɓó tia ɓaɖaa se kɛɛ ɖò ɓéɖéɛ mu.—1 Kɔ̀. 15:​25, 26.

17-18. (a) Ðɛ́ kà kò ɖò mu kpáùn ɖé Zɔ̃ Táázĩ̀ìnɔ̀ mánáín nyɛ́? (b) Ðɛ́ Jizɛ mu nyuùn ɔ jù ké ɔ nàìn-kpèɔ̀ ɖà mánáín hwɛ̀ níɛ́? (1 Kɔ̀ɖéíntĩ̀ɔ̀ 15:​24, 28) (Dyé dyi-dyé-ɖɛ̀ɔ̀ ɖekè.)

¹⁷ Ðɛ́ kà kò ɖò mu kpáùn ɖe ɖé Zɔ̃ Táázĩ̀ìnɔ̀ mánáín nyɛ́? Ɓó tia ɓaɖaa, ɖɛ kpa ɖɛ jɛ́ɛ́ ɖò mu kpáùn. Dɔ́ɔ́ ɓáà Jɛhovaa nyɛ́nɛ́ɔ̀ mú hwɛ̀ jè dyíɛɛ mu dyi ziìn. Xwɛ̀ kɛ́? Ðé Ídɛ̃̀ìn-ɓàà-ɖɛ̀-gbàɔ̀ múɛɛ, Sétɔ̃̀ cɛ̃ɛ ma kà ɓɛ́ Jɛhova mɔ̀ se-tɔ́mɔ́-nyɔ̀, ké Ɔ ní nàìn nyɔùn-dyù ɖé ɖɛ̀ɓɛ̀ìn-ɖɛ̀ɓɛ̀ìn múɛ. Sɔ̀ìn ɓó tia gboɛɛ, nyɔ ɓè ɓɛ́ wa dè Jɛhova dya, ké wa dyé ɔ kpéín nyɛɛ ɖà ɔ nyɛ́nɛ́ɔ̀ mú hwɔ kpa vò-vò. Ɔ jèɛɛ, ɖé Zɔ̃ Táázĩ̀ìnɔ̀ mánáín ní, Jɛhovaa nyɛ́nɛ́ɔ̀ mu dya-dè-dè ɓéɖéìn. Tia kéá ɓó nyini ní, nìí, Jɛhova ɖàa tɛ̀mɛ̀ìn wáɖáá kà ɔ mɔ̀ à dyɔún-Ɓà, ké ɔ ɖɛ̀ɓɛ̀ à múɛ.

¹⁸ Sétɔ̃̀ɛ̀ wuɖuɔ̀ muá se kpáùn fɔɔ cá ɓó sè-ná-sèɛ̀ tiín. Ðɛ́ Jizɛ mu nyuùn ɔ jù ké ɔ nàìn-kpèɔ̀ ɖà mánáín hwɛ̀ níɛ́? Ɔ mu Sétɔ̃̀ɛ̀ ɓo-bɛ̃̀ìn síìn ɓɛ́ ɔ ké Jɛhova gbo vɔ̃ɔ̀? Gbào! (Zà 1 Kɔ̀ɖéíntĩ̀ɔ̀ 15:​24, 28 wuɖuún.) Jizɛ mu Kã́á-ɓòɖòɔ̀ ɔ Ɓà xwáɖáún zàìn. Ɔ mu Jɛhovaa nàìn-kpèɔ̀ xwíɖíi nììn. Ǹdye, Jizɛ se nì kà Sétɔ̃̀ nìà kɛ, kɛɛ ɔ hwòɖò mu wɔ̃́ùn ɓɛ́ ɔ ké ɖɛ séín ɖe tò, sepoɛɖe ɔ ɖɛ̀ɓɛ̀ Jɛhova mú jè. Ké ti wa mu Sétɔ̃̀ mú gbɔɔ̀ùn gàná cá kɛɛ, Jɛhovaa nyɛ́nɛ́ɔ̀ mu mú hwɛ̀ìn fɔɔ cá, ké ɔ mu dya-dè-dè ɓéɖéìn.

19. Xwɛ̀ Jɛhovaa nyɛ́nɛ́ɔ̀ jè nyu ma ɖɛ kpaa ɖé Jizɛ gbo kɛ́?

¹⁹ Jɛhova hwòɖò wɔ̃́ ma ɓɛ́ ɔ ké ma ɔ nyɛ́nɛ́ɔ̀ Jizɛ nyí ɓó xwíníín nɔ̀mɔ̀ dyíin ɓè jè! Jizɛ ɓaɖa ma ɔ Ɓà kɛ́ dyí-sɛ́ɖɛ́ìn-kà. Nìí, xwɛ̀ Jɛhovaa nyɛ́nɛ́ɔ̀ jè nyu ma ɖɛ kpaa ɖé Jizɛ gbo kɛ́? Ɔ jè kpa ma ɖɛ ɖé ɔ gbo ké ɔ zi ma ɖɛ séín ɖò dyí. Ɔ hwòɖò wɔ̃́ ma ɓɛ́ ɔ ké ma mɛ́ ɓó nyɛ́nɛ́à jè, ké ɔ hwòɖò mu wɔ̃́ùn ɓɛ́ ɔ ké Jɛhova ɖɛ séín xwáɖáún zàìn ɖé Zɔ̃ Táázĩ̀ìnɔ̀ mánáín. Xwɛ̀ à ɓɛ́ìn Jizɛ ɓo-bɛ̃̀ìn síɛ kɛ́? À mu dyi-diè-ɖɛ̀ nìà wɛ gɔ̃̀-jù-wùɖù dɔ́ɔ́ kɔ̃in dèìn ɖé cɛ̃́ɛ́-ɖɛ̀ɔ̀ nyɔ kɔà ɓó dyíɛɛ mú.