Níɔ-Kpá-Kpá Mɔ̀ Dyí-Sɔ́-Ðɛ̀ Kpa Ðɛ Ðò Cá!

Jízɛ̀ tɛ̀mɛ̀ìn ma kà ɓɛ́ Kɛ́ɖɛ́ì ɖeín-sí-nyɔ̀ ɓè ɓéɖé ɓɛ́ wa ké níɔ kpá kɛ. (Zà Máfíò 28:19, 20 wuɖuún.) Kɛɛ, ɖɛ́ mɔ̀à níɔ-kpá-kpá kɛ́? Ké ɖɛ́ nyɔ ɖò kɔ̃̀ ɔ ké nyu ɓɛ́ ɔ ké ɖɛ nìà wɛ nyuɛ ɓɛ́ìn nyɛ́?

1. Ðɛ́ mɔ̀à níɔ-kpá-kpá kɛ́?

Wuɖu mɔ̀à “níɔ-kpá-kpá” kɛɛ sɔ̀ìn Gíɖíì wùɖù kɔ̃̀ xwíníín mɔ̀, “ní hwuɖu-pàìn-pàìn” nyɛ. Ti wa po ma Jízɛ̀ níɔ kɛɛ, wa poɛ ma ɖé Jɔ́nì-nìɔ̀ hwuɖu, púɛɛ ‘ɔ sɔ̀ ma ɖé níɔ gbo.’ (Máà 1:9, 10) Kà dyúáɖòɔ̀ kàà wa po jàà Kɛ́ɖɛ́ì ɖeín-sí-nyɔ̀ ɓè níɔ dyììn ɖé wa ní-hwuɖu-pàìn-pàìn mɔɔ ní-hwuɖu-po-po mú.

2. Ðɛ́ níɔ-kpá-kpá tɛ̀mɛ̀ìn nyɛ́?

Nyɔ ɖò dyi níɔ kpáín, ɔ tɛ̀mɛ̀ìn kà ɓɛ́ ɔ ɖà ɔ mìɔùn Jɛhova Geɖepɔɔ xwáɖáún zàìn nyɛ. Xwɛ̀ nyɔ ɖò nyu ɔ mìɔùn xwáɖáún zàà kɛ́? Hwɛ̀ nyɔɔ̀ ké níɔ kpá ní, ɔ ɖòùn ɓaà ké ɔ cɛ̃ɛ Jɛhova gbo kà ɔ mɔ́ ɓɛ́ ɔ ké Ɔ bìì kũ̀à nyu kánáá puɛ. Ɔ ɖi wuɖu kà ɔ mu Jɛhova ɖòùn ɓièìn, ké Geɖepɔɔ mɔ́ɔ́-ɖɛ̀ nyu-nyu mu ɖɛ kpa ɖɛ jùùn ɖé ɔ fɛ̀ɛ̀-wè séín múɛ. Ɔ gãa ɓɛ́ ɔ ké ɔ “hwòɖòɛ̀-mɔ́ɔ́-ɖɛ̀ dyi táà,” ɓɛ́ ɔ ké Jízɛ̀ɛ̀ tɛ̀mɛ̀ìn-ɖɛ̀ ɓè kè ɔ nyuu-ɖɛ̀ ɓè “kíɖíí sí.” (Máfíò 16:24) Ɔ mìɔùn xwáɖáún-zà-zà kè níɔ-kpá-kpá nyuɛ ké ɔ xwɛ̃́ìn Jɛhova kè ɔ ɖíí jàà-po-nyɔ̀ ɓè bũ̀in.

3. Ðɛ́ nyɔ ɖò ɓéɖé ɔ ké nyu hwɛ̀ ɔ ké níɔ kpá kɛ́?

M̀ ɓɛ́ìn níɔ kpá jè ti dyéɛ dyììn ɖé Jɛhova jè cɛ̃́-cɛ̃́ kè ɔ hwìɖìì-taɓa-taɓa mú. (Zà Híìbúɖúù 11:6 wuɖuún.) Kà nì ɖɛ-dyuò-dyuòɔ̀ kè hwìɖìì-taɓa-taɓaɔ̀ muà kɔ̃ kpáa níìn nyɛɛ, kàà nì ɖɛ̀ɓɛ̀ìn-ɖɛ̀ɓɛ̀ìn ɓó Jɛhova bììɛɛ mu kɔ̃̀ kpáùn. Nìí, nì muɛ mɔ́ùn ɓɛ́ m̀ kéɛ jè cɛ̃ kè ɓɛ́ m̀ ké ɔ gma ɓèɔ̀ dyi kpɔ̃. (2 Tímétè 4:2; 1 Jɔ̃́ɔ́ 5:3) Ɔ jù ké nyɔ ɖò dyi cĩ́ɛ ní ‘kà Jɛhova mɔ́ɔ kɛ, ɓɛ́ . . . ɔ ké ɖɛ dè ɔ hwòɖò dyiɛɛ nyu ti séín’ ní, ɔ ɓɛ́ìn gãa ɓɛ́ ɔ ké ɔ fɛ̀ɛ̀ɔ̀ Geɖepɔɔ xwáɖáún zàìn ɓɛ́ ɔ ké níɔ kpá.—Kɔ̀ɖɔ́sĩ̀à 1:9, 10.a

ÐE ÐƐ MÚIN CÁ

4. À ɓɛ́ìn ɖɛ cɛ̃́ɛ sɔ̀ìn Jízɛ̀ɛ̀ níɔ-kpá-kpáɔ̀ mú

Zà Máfíò 3:13-17 wuɖuún, ɓɛ́ m̀ ké ɖɛ pàɖà ɓá Jízɛ̀ɛ̀ níɔ kpá jè dyíɛɛ cɛ̃́. Nìí, ɓè dèìn dyi-diè-ɖɛ̀ ɓè nìà kɛ dɔ́ɔ́ kɔ̃in:

• Jízɛ̀ mɔ̀ ma dyú pɛ́ɖɛ̀ ti ɔ kpá ma níɔ kɛɛ̀?

• Xwɛ̀ ɔ nyu ma níɔ kpáa kɛ́? Wa mɛ́nɛ́ìn ma ɔ ní dúi puù?

Jízɛ̀ dè ma kũ̀à jɛ́ɛ́ ɓɛ́ Geɖepɔɔ nyíɛ ma ɓóɖó-kpàà kɔ̃ɛɛ nyu-nyu gbɔ ti ɔ ɖà ma níɔ kpá kɛ. Zà Ðúù 3:21-23 kè Jɔ̃́ɔ́ 6:38 wuɖuún, ɓɛ́ ɓè ké dyi-diè-ɖɛ̀ nìà kɛ dɔ̀ɔ̀ kɔ̃in dèìn:

• Ti Jízɛ̀ kpá ma níɔ kɛɛ, kũ̀àɔ̀ nyɛ́ kɔ̃̀ nyu jè ɔ po ma kĩ́ín ɖé ɔ cĩ́-cĩ́ɔ̀ múɛ́?

5. Níɔ-kpá-kpá mɔ̀ dyí-sɔ́-ɖɛ̀ m̀ ɓɛ́ìn nyuɛ kɛ

Kĩ́ín nyɛɛ, nyɔ mìɔùn xwáɖáún-zà-zà kè níɔ-kpá-kpá ɓɛ́ìn nyɔ hwòɖò dyí gbààìn. Kɛɛ, m̀ ɓɛ́ìn dyúa muɛ, ɓɛ́ nì hwòɖò ké m̀ mìɔùn múin dèìn ɓó dyí-sɔ́-ɖɛ̀ kpa ɖɛ nìà kɛ nyu jè. Ɓɛ́ m̀ ké nyɔ ɓè nyu ma ɖɛ nìà wɛ ɖíɛ́ ɓè dyé ní, po VÍÐÒƆ̀ kũ̀à gbo.

VÍÐÒ: Kà À Ké Jɛhova Ɓàto Jù Kɛ (1:11)

Zà Jɔ̃́ɔ́ 17:3 kè Jĩ́ìn 1:5 wuɖuún, ɓɛ́ ɓè ké dyi-diè-ɖɛ̀ nìà kɛ dɔ́ɔ́ kɔ̃in dèìn:

• Ðɛ́ ɓɛ́ìn nyɔ ɖò gbo kpáa, ɓɛ́ ɔ ké ti dyé ɓó níɔ kpá jè kɛ́?

1. À zà à mìɔùn xwáɖáún ɖé Jɛhova gbo, dyììn ɖé ɔ gbo-cɛ̃-cɛ̃ mú kà à mɔ́ à ké ɔ bìì kũ̀à nyu kánáá puɛ

2. À níɔ-kpá-tììn nyɛɛ, à tɛ̀mɛ̀ìn kà à ɖà à mìɔùn Geɖepɔɔ xwáɖáún zàìn nyɛ

6. Níɔ-kpá-kpá mɔ̀ Jɛhovaa xwéɖé-dùɔ̀ nyɔ ɖò jù-jù

À dyi níɔ kpáín, à jù Jɛhova xwéɖé-dù kpɔ̃ìn gbo ɖé ɓóɖó-kpàà dà séín nyɛɛ nyɔ ɖò. À sɔ̀ ɓóɖó-dù kà kò ɖò kɔ̃ ké à ɓéɖé cĩ́-kà kà kò ɖò dyɛo, kɛɛ à po ɖɛ dyúáɖòɔ̀ jàà ké à kpɔ̃ gma dyúáɖòɔ̀ dyi. Zà Wɛ́ɖɛ́ 25:14 kè 1 Píɖɛ̀ 2:17 wuɖuún, ɓɛ́ ɓè ké dyi-diè-ɖɛ̀ nìà kɛ dɔ́ɔ́ kɔ̃in dèìn:

• Xwɛ̀ níɔ-kpá-kpá nyu gbo-kpɔ̃ìn-kpɔ̃ìn nìà nyɔ ɖò kè Jehova pṹa kɛ ɔ kè nyɔ tɔ̀ɔ̀ ɓè nìà Ɔ ɓièɛ̀n nyɛ pṹa kɛɛ nyuɛ kɛ́?

SṸÌN-XWÍNÍÍN

Jízɛ̀ tɛ̀mɛ̀ìn ma kà Kɛ́ɖɛ́ì ɖeín-sí-nyɔ̀ ɓè ɓéɖé wa ké níɔ kpá kɛ. Ɓɛ́ nyɔ ɖò kéɛ náa nyuín, ɔ ɓéɖé ɓɛ́ ɔ ké ɔ hwìɖìì-taɓa-taɓa ɖé Jɛhova múɛɛ dyi kùìn kè ɓɛ́ ɔ ké Ɔ gma ɓèɔ̀ dyi kpɔ̃ ɔ kè ɓɛ́ ɔ ké ɔ mìɔùn Jɛhova xwáɖáún zàìn.

Ðɛ-kɔ̃in-kpa-kpa

• Ðɛ́ mɔ̀à níɔ-kpá-kpá kɛ́, ké xwíníínɔ̀ nyɛ́ kɔ̃̀ jè ɔ kpaà ɖɛ kɛ́?

• Xwɛ̀ nyɔ mìɔùn xwáɖáún-zà-zà kè níɔ-kpá-kpá nyu gbo muɛ̀n nyɛ́?

• Ðɛ́ nyɔ ɖò nyu hwɛ̀ ɔ ké ɔ mìɔùn xwáɖáún zà kè ɓɛ́ ɔ ké níɔ kpá kɛ́?

CƐ̃́ ÐƐ PÀÐÀ

Cɛ̃́ ɖɛ mɔ̀ níɔ-kpá-kpá xwíníín nyɛ kè ɖɛ se níɔ-kpá-kpá kɛɛ jè.

“Ðɛ́ Mɔ̀ Níɔ-Kpá-Kpá Kɛ́?” (Ðúú-kɔ̃-cèè-ɖɛ̀)

Gmɔìn hwìè ɓè kɔ̃̀ mú ɓɛ́ nyɔ ɖò ɓɛ́ìn dyúa múɛ, ɓó níɔ kpá jè kɛɛ kɔ̃in.

“Jɛhova Mú Ðɛ̀ɓɛ̀-Ðɛ̀ɓɛ̀ Kè Zùo-Po-Hwòɖò Ɓéɖé-Ɓéɖé Nyuɛ Ké Nyɔ Kpá Níɔ” (Dyí-Gmɔ̀ìn-Gbò-Cèè-Ðɛ̀ɔ̀, Dunu-Tòɖò 2020)

Zà kà gàa ɖò ɖɛ-dyí-sɔ́-sɔ́ ɓó níɔ kpá jèɛɛ se ma kà ɔ hwòɖò nyu ma nìɛ̀ kɛ dyí ɓá puɛɛ jè wuɖuún.

“Wa Mɔ́ Ɓɛ́ Ḿ Ké Ma Jààɔ̀ Dyuò Wáɖáá Ɓó Ḿ Mìɔùn Bìì” (Dyí-Gmɔ̀ìn-Gbò-Cèè-Ðɛ̀ɔ̀, Fóɖó-Vĩ̀ 1, 2013)

Cɛ̃́ kà níɔ-kpá-kpá mɔ̀ dyí-sɔ́-ɖɛ̀ kpa ɖɛ ɖòɛ kè kà m̀ ɓɛ́ìn ti dyéɛ ɓó ɔ jè kɛ.

“Ḿ Mɛ Kpá Níɔɔ̀?” (Dyi-Diè-Ðɛ̀ Ɓè Nyɔ Gmɔ̀ Ɓè Diè Dyiɛ—Gɔ̃̀-Jù-Wùɖù Ɓè Ɓɛ́ Wa Tò Gbo-Kpá-Kpá Kɛ, Kpo 2, wuɖu-kpà 37)