CƐ̃́Ɛ́-ÐƐ̀ 38
Ɓéɖé Zùo-Po-Hwòɖò Ɓó Nyíí-Ðɛ̀ Mɔ̀à Fɛ̀ɛ̀ Kɛɛ Jè
À ɓɛ́ìn ɖɛ pàɖà nyuɛ, mɔɔ à ɓɛ́ìn ɖɛ pàɖà múàùn dyi kpáìn, sepoɛɖe à ɓéɖé fɛ̀ɛ̀ jè. Kɛbì à mɛ dyé fũ̀à-fṹá dyíɛɛ, à kpáìn ɖɛ ɖíɛ́ ɓè múàùn dyi ɖé à fɛ̀ɛ̀ɔ̀ mú tee. Xwɛ̀ à ɓɛ́ìn tɛ̀mɛ̀ìn kà à ɓéɖé zùo-po-hwòɖò ɓó nyíí-ɖɛ̀ mɔ̀à fɛ̀ɛ̀ kɛɛ jè kɛ́? Ké ɖɛ́ mɔ̀ xwíníín kpa ɖɛ ɖò ɓɛ́ à ɓéɖé ɓó ɔ náá nyu jè kɛ́?
1. Xwíníínɔ̀ nyɛ́ kɔ̃̀ jè à mɛ ɓéɖéà zùo-po-hwòɖò ɓó fɛ̀ɛ̀ jè kɛ́?
À mɛ ɓéɖé zùo-po-hwòɖò ɓó fɛ̀ɛ̀ jè, sepoɛɖe ɔ mɔ̀ nyíí-ɖɛ̀ sɔ̀ìn ɖé à ɖɛ̀ɓɛ̀ìn-ɖɛ̀ɓɛ̀ìn Ɓà Jɛhova gboɛ. Ðé ɔ gbo “ɖéɛ̀ fɛ̀ɛ̀ . . . nì”—ɔ mɛ ma fɔ̀ɔ̀-ɖɛ̀ séín. (Wɛ́ɖɛ́ 36:9) “Ɔ mìɔùn nyuɛ ké nyɔ séín ɓéɖé fɛ̀ɛ̀, ké wa cĩ́, ké ɔ nyí wa ɖɛ séín.” (Àpɔ́sò 17:25, 28) Jɛhova nyí à ɖɛ à kɔ̃̀ à ké ɓéɖé ɓɛ́ à ké cĩ́ɛ. Kɛɛ, ɓó ɔ kɔ̃in nyɛɛ, ɔ nyuɛ ɓɛ́ à ké fɛ̀ɛ̀ múàùn dyi kpáìn.—Zà Àpɔ́sò 14:17 wuɖuún.
2. Xwɛ̀ à ɓɛ́ìn Jɛhova dyí tɛ̀mɛ̀ìn kà à po ɔ zùo ɓó nyíí-ɖɛ̀ mɔ̀à fɛ̀ɛ̀ kɛɛ jè kɛ́?
Sɔ̀ìn ti kɔ̃̀ ɓaɖa m̀ ɖe ɖú ma nì xwíɖí dyí nyɛ̀nɛ̀ɛ̀ kɛ gboɛɛ, Jɛhova kɔ̃̀ ma nì jè gbo. Dyììn ɖé zùù hwɛìn-hwɛìnɔ̀ kpé múɛɛ, Dèɓé mɔ̀ ma kà Geɖepɔɔ ɓiè-nyɔ̀ ɓèɔ̀ ɖò kɛɛ cɛ̃ɛ ma ɔ gbo, ké ɔ ɖá: “M̀ dyé ma ḿ ti ɓɛ́ ḿ séè ma wóɖóɛ.” (Wɛ́ɖɛ́ 139:16) Nì fɛ̀ɛ̀ɔ̀ jè kpa ɖɛ mìɔ cá ɖé Jɛhova gbo. (Zà Máfíò 10:29-31 wuɖuún.) Ɔ mu ɔ puàùn mìɔ ɔ jù ké nyɔ séín ɖò dyi nyɔ ɖò fɛ̀ɛ̀ kpó cɛ̃ hwòɖò-gbo-wɔ̃́ìn-kà ní, kɛbì ɔ mɛ mɔ̀ ɔ mìɔùn nììn fɛ̀ɛ̀ kɛ.a (Ɛ́séɖɔ̀ 20:13) Ké ɖeɛɛ, ɔ mu Jɛhova puàùn ɔ jù ké à dyi à fɛ̀ɛ̀ɔ̀ nàdì xwaún dyi po mɔɔ à dyi kɛ́ɛ́-ɖɛ̀ nyu ɓá nyɔ tɔ̀ɔ̀ ɓè nììn fɛ̀ɛ̀ɔ̀ jè dyí ní. Ɔ jù ké à dyi à fɛ̀ɛ̀ɔ̀ gbo gmɔ̀, ké à dyi nyɔ tɔ̀ɔ̀ ɓè nììn fɛ̀ɛ̀ kpéín dyé ní, nìí, à muɛ tɛ̀mɛ̀ìn kà à ɓéɖé zùo-po-hwòɖò ɓó nyíí-ɖɛ̀ zi ɖɛ kpáuń mìɔ mɔ̀à fɛ̀ɛ̀ kɛɛ jèɛ.
ÐE ÐƐ MÚIN CÁ
Cɛ̃́ hwìè ɖíɛ́ ɓè kɔ̃̀ mú m̀ ɓɛ́ìn tɛ̀mɛ̀ìn kà m̀ ɓéɖé zùo-po-hwòɖò ɓó nyíí-ɖɛ̀ mɔ̀à fɛ̀ɛ̀ kɛɛ jèɛ.
3. Gmɔ̀ nì dyɔɔ̀ mú wóɖó jè gbo
Kɛ́ɖɛ́ì ɖeín-sí-nyɔ̀ ɓè ɓɛ́ wa zà wa mìɔùn xwáɖáún wɛ̃ɛ nyùìn wa fɛ̀ɛ̀ gànáà kũ̀à mú, ɓɛ́ wa ké Jɛhova ɓiè. Ɔ hwɔìn kà wa kéɔ́ wa kpóɖó-dyùà gànáà tò ɓɛ́ ɔ ké sáa-zàìn-ɖɛ̀ jù ɖé Geɖepɔɔ gboɛ. Zà Wóɖómà 12:1, 2 wuɖuún, ɓɛ́ ɓè ké dyi-diè-ɖɛ̀ ɓè nìà kɛ dɔ́ɔ́ kɔ̃in dèìn:
Ðɛ́ mɛ po m̀ kpéí ɓɛ́ m̀ ké nì dyɔɔ̀ mú wóɖó jè gbo gmɔ̀ kɛ́?
Ðɛ́ mɔ̀ hwìè ɖíɛ́ ɓè kɔ̃̀ mú m̀ ɓɛ́ìn náá nyuɛ kɛ́?
4. Gmɔ̀ m̀ mìɔùn dyí, ɓɛ́ m̀ ké puà-puà kè gĩɔ dyí ɓàɖàìn
Baɓoɔ po à kpéí, ɓɛ́ à ké xwai-nyu-ɖɛ̀ ɓè ɓɛ́ wa nyìnììn dyíin nyɛɛ dyí ɓàɖàìn. Po VÍÐÒƆ̀ kũ̀à gbo, ɓɛ́ m̀ ké ɖɛ ɖíɛ́ ɓè m̀ ɓɛ́ìn nyuɛ ɓɛ́ m̀ ké m̀ mìɔùn dyí gmɔ̀ kɛɛ jè cɛ̃́.
Zà Nɔ́ɔ́ 22:3 wuɖuún, ɓɛ́ ɓè ké kà m̀ ké m̀ mìɔùn kè nyɔ tɔ̀ɔ̀ ɓè dyí gmɔ̀ ɖé dà ɓè nìà kɛɛ jè dɔ́ɔ́ kɔ̃in dèìn. Wa mɔ̀ . . .
ɖé m̀ ɓíɖí taún.
ɖé nì kũ̀à-nyùìn-naín.
m̀ dyi péé nyuɛń nììn.
m̀ dyi hwòtimo nàìn nì mɔɔ m̀ dyi ɖò mú kpáín.
5. Dyé dyú nì ɔ ɖe xwíníín keɛɛ fɛ̀ɛ̀ kpéín
Dèɓé zaìn ma kɔ̃in kà ɓɛ́ ɖɛ séín ɓá dyú ɓɛ́ ɔ nì ɔ ɖe xwíníín keɛ jè dyíɛɛ jè kpɔ̃ Jɛhova hwòɖò kɛ. Zà Wɛ́ɖɛ́ 139:13-17 wuɖuún, ɓɛ́ ɓè ké dyi-diè-ɖɛ̀ nìà kɛ dɔ́ɔ́ kɔ̃in dèìn:
Ðé Jɛhova dyéɖéín nyɛɛ, dɛ̀ nyɔ ɖòɛ̀ fɛ̀ɛ̀ dèìn gbɔ kɛ́, ɖé ɔ ɖe xwíníínǹ mɔɔ ti ɔ wóɖóɛɛ̀?
Gma ɓè ɓɛ́ Jɛhova dè ma ɓó Éézùɖùɛ̀-nyɔ̀ ɓèɔ̀ bììɛɛ gmɔ̀ ma xwíɖí-nì-màà ɓè dyí. Zà Ɛ́séɖɔ̀ 21:22, 23 wuɖuún, ɓɛ́ ɓè ké dyi-diè-ɖɛ̀ ɓè nìà kɛ dɔ́ɔ́ kɔ̃in dèìn:
Xwɛ̀ Jɛhova nyu nyɔ ɓɛ́ ɔ se ɓó ɖei dyé ké ɔ ɖáɓá dyú ɓɛ́ ɔ nì ɔ ɖe xwíníín keɛɛ dya gmɔ̀ɔ̀ kɛ́?
Xwɛ̀ ɔ hwòɖò nyu nìɛ̀ ɔ jù ké nyɔ ɖò dyi ɖɛ nì náa nyu hwòɖò-gbo-wɔ̃́ìn-kà níɛ́?b
Xwɛ̀ nì hwòɖò nyu nìɛ̀ ɓá kà Jɛhova nyuà ɖɛ nìà kɛ dya gmɔ̀ɔ̀ kɛɛ jè dyíɛ́?
Màa ɓɛ́ ɔ dyuòɛ̀ dyí kà ɓɛ́ fɛ̀ɛ̀ kpa ɖɛ kɛɛ ɓɛ́ìn hwìɖìi poɛ̀n dyɛ̀ mɔ̀ùn kà ɓɛ́ xwíɖí-wɔ̃-zà-zà mɔ̀ ɖɛ ɖòùn ɔ ɓɛ́ìn nyuɛ kɛ. Zà Àzédyà 41:10 wuɖuún, ɓɛ́ ɓè ké dyi-diè-ɖɛ̀ ɓè nìà kɛ dɔ́ɔ́ kɔ̃in dèìn:
Ɔ jù ké wa dyi màa ɖò kíɖíí nɛ́ɛ nì ɓɛ́ ɔ ké xwíɖí wɔ̃ zà ní, nyɛ́ ɔ mɛ gmɔ̀ìn gbo kɛ́? Xwíníínɔ̀ nyɛ́ kɔ̃̀ jèɛ́?
NYƆ ÐÍƐ́ ƁÈ ÐÁ: “Màa ɖò ɓéɖé kpé ɓɛ́ ɔ kéɛ gã kɛbì ɔ mɔ́ xwíɖí wɔ̃ zàà dyi ní—ɔ mɔ̀ nyɔ kɔ̃̀ ɔ kpóɖó-dyùàɔ̀.”
Ðɛ́ nyu ké m̀ poɛ jàà kà ɓɛ́ xwíɖí-nì-màà ɖòɛ̀ fɛ̀ɛ̀ kè dyú nìà ɔ xwíníín keɛɛ fɛ̀ɛ̀ jè kpa ɖɛ ɖé Jɛhova gbo kɛ́?
SṸÌN-XWÍNÍÍN
Baɓoɔ tɛ̀mɛ̀ìn à, ɓɛ́ à ké Jɛhovaa nyíí-ɖɛ̀ mɔ̀à fɛ̀ɛ̀ kɛɛ mú ɖɛ̀ɓɛ̀, kè ɓɛ́ à kéɛ kpéín dyé, ɔ kè ɓɛ́ à kéɛ dyí gmɔ̀. Ðɛ nìà kɛ ɓá à fɛ̀ɛ̀ kè nyɔ tɔ̀ɔ̀ ɓè nììn fɛ̀ɛ̀ jè dyí.
Ðɛ-kɔ̃in-kpa-kpa
Xwíníínɔ̀ nyɛ́ kɔ̃̀ jè nyɔùn-dyùɛ̀ fɛ̀ɛ̀ jè kpaà ɖɛ mìɔ ɖé Jɛhova gbo kɛ́?
Xwɛ̀ Jɛhova hwòɖò nyu nìɛ̀ ɔ jù ké nyɔ ɖò dyi ɔ mùè ɖòɛ̀ fɛ̀ɛ̀ɔ̀ ɔ mú zà hwòɖò-gbo-wɔ̃́ìn-kà níɛ́?
Ðɛ́ po m̀ múàùn ɓá nyíí-ɖɛ̀ mɔ̀à fɛ̀ɛ̀ kɛɛ jè dyíɛ́?
CƐ̃́ ÐƐ PÀÐÀ
Xwɛ̀ à ɓɛ́ìn Jɛhova zùo poɛ ɓó nyíí-ɖɛ̀ mɔ̀à fɛ̀ɛ̀ kɛɛ jè kɛ́?
Mɔ́ dyi-diè-ɖɛ̀ nìà kɛ gɔ̃̀-jù-wùɖù dyi. Geɖepɔɔ mu màa ɓɛ́ ɔ ɖà xwíɖí wɔ̃ zà kɛɛ kɔ̃in zĩ̀ìnǹ?
Cɛ̃́ kà Geɖepɔɔ fɛ̀ɛ̀-dya-gmɔ̀-kà mɛ nyu à gbo kpáa, ɓɛ́ à ké se péé ɓè ɓɛ́ wa mu à fɛ̀ɛ̀ɔ̀ nàdì xwaún dyi poùn wɛ̃ gã kɛɛ jè.
“‘Nàdì-Pèè Ɓè’—M̀ Mɛ Dɔ̃̀ Wa Múù?” (Wóɖó Nyíɔún!, Kpadyua 8, 2000)
Ɔ jù ké nyɔ ɖò dyi ɔ mìɔùn beè jè hwìɖìi poìn ní ɖé? Cɛ̃́ kà Baɓoɔ ɓɛ́ìn nyɔ gbo kpáa kɛɛ jè.
a Jɛhova kɔ̃̀ nyɔ ɓè kɔ̃̀ hwòɖò kpá ɖé ɖeiɛɛ jè gbo mìɔ cá. (Wɛ́ɖɛ́ 34:18) Ɔ wɔ̃́ nyɔ-ɖɛ-puà-puà ɓɛ́ ɔ ɓɛ́ìn nyuɛ ɓɛ́ nyɔ ké nyɔ mìɔùn beè jè hwìɖìi poìn nyɛɛ jè múin, ké ɔ mɔ́ ɔ ké gbo-kpá-sɔ̃̀ tò. Ɓɛ́ m̀ ké kà ɔ gbo-kpá-sɔ̃̀ ɓɛ́ìn ɖɛ ɖò gbo zĩàìn nyɛ dyé ní, zà cɛ̃́ɛ́-ɖɛ̀ mɔ̀à “Ḿ Mɔ́ Mɛ́ɛ Dyi—Baɓoɔ Ɓɛ́ìn Ḿ Gbo Kpáà Ɔ Jù Ké Ḿ Dyi Ḿ Mìɔùn Ðáɓá Jè Hwìɖìi Poìn Níì?” ɓɛ́ ɔ nìà Cɛ̃́ Ðɛ Pàɖà wákáɔ̀ xwíɖíi nɔ cɛ̃́ɛ́-ɖɛ̀ nìà kɛ múɛɛ wuɖuún.
b Nyɔ ɓè ɓɛ́ wa ɖà xwíɖí wɔ̃ zà kɛɛ se kɔ̃̀ ɓɛ́ wa hwòɖò ké ɖé ɖei kpá, sepoɛɖe Jɛhova ɓɛ́ìn wa kɔ̃in zĩ̀ɛ̀n. Ɓɛ́ m̀ ké ɖɛ pàɖà cɛ̃́ ní, dyé cɛ̃́ɛ́-ɖɛ̀ mɔ̀à “Ðɛ́ Baɓoɔ Cɛ̃ Ɓá Xwíɖí Wɔ̃ Zà Jè Dyíɛ́?” ɓɛ́ ɔ nìà Cɛ̃́ Ðɛ Pàɖà xwíɖíi nɔ cɛ̃́ɛ́-ɖɛ̀ nìà kɛ múɛ.