CƐ̃́Ɛ́-ÐƐ̀ 02
Baɓoɔ Nyí Nyɔ Hwòɖò-Kɔ̃-Dè-Ðɛ̀
Nyɔ ɓè nì ɓóɖó-kpàà dà séín nyɛɛ zĩ̀ìn fũ̀à-fṹá-ɖɛ̀ ɓè ɓɛ́ ɔ nyu ké wa kpá wììn, mɔɔ wa gbàìn hwòɖò dyií mɔɔ ɔ puà wa kɛɛ mú. M̀ ɖà ɖɛ ɖò ɓɛ́ ɔ nyu ké ɖɛ ɓè nìà kɛ kpá m̀ gboɛɛ mú zĩ̀ìn ɖòò? M̀ ɓɛ́ìn dyɛ̀ gà dyéɛń nìɛ̀, sepoɛɖe m̀ nì wɛ́ɛń mɔɔ nì ɖɛ̀ɓɛ̀-nyɔ̀ ɖò ɖà mɛ́ jè. M̀ ɓɛ́ìn m̀ mìɔùn dyi diè, ‘cĩ́-cĩ́ mu náa dyíin nɔ̀mɔ̀ùnǹ?’ Baɓoɔ tò gɔ̃̀-jù-wùɖù ɓɛ́ ɔ ɓɛ́ìn nyɔ hwòɖò dyi dèɛ̀ kɛ ɓó dyi-diè-ɖɛ̀à jè.
1. Xwɛ̀ Baɓoɔ nyu nyɔ hwòɖò-kɔ̃-dè-ɖɛ̀ nyíɛ kɛ́?
Baɓoɔ se xwíníín kɔ̃̀ jè fũ̀à-fṹá-ɖɛ̀ ɓè dyíàìn ɓóɖó-kpàà kɔ̃in nyɛɛ kɔ̃in zaìn pu, kɛɛ ɔ cɛ̃ bɔ̃̀ nɔ̀mɔ̀ dyíin kà ɓɛ́ fũ̀à-fṹà-ɖɛ̀ ɓè nìà kɛ nì ɓó ti wè xwíníín, ké wa mu dyi zĩ̀ìn kàùn wɛ̃. Ðɛ ɓè ɓɛ́ Baɓoɔ ɖáìn nyɔ nyɛ́nɛ́ín nyɛɛ ɓɛ́ìn nyuɛ ɓɛ́ à “ké hwòɖò-po-naín kè hwòɖò-kɔ̃-dè-ɖɛ̀ ɓéɖé.” (Zà Jɛ̀ɖèmádyà 29:11, 12 wuɖuún.) Ðɛ ɓèa kpá à gbo, ɓɛ́ à ké fũ̀à-fṹá-ɖɛ̀ ɓè hwòɖò kùìn kàùn kè ɓɛ́ à ké kpeɖe nɔ̀mɔ̀ dyíin ɓéɖé ɔ kè ɓɛ́ à ké múà ɓéɖé kánáá pu.
2. Hwòɖò-po-naínɔ̀ nyɛ́ Baɓoɔ dèà mɛ kɛ́?
Baɓoɔ dè hwòɖò-po-naín ɖò mɛ, ɔ ɖá: “Mɛ́-mɛ́ ɖò se nìɛ̀ mu ɖe. Kpé-po-po ɖò se nìɛ̀ mu ɖe. Vĩ̀-vĩ̀ ɖò se nìɛ̀ mu ɖe. Nyɔ-ɖɛ-puà-puà ɖò se nìɛ̀ mu ɖe.” (Zà Wɛ̀ɖɛ̀ɓèɖésĩ̀ɔ̀ 21:4 wuɖuún.) Fũ̀à-fṹá-ɖɛ̀ ɓè ɓɛ́ wa ɓɛ́ìn nyuɛ ɓɛ́ cĩ́-cĩ́ ké mú kàmà zɛ̃̀ɛ̀—ɔ hwɔìn kà, gà-dyé-dyé kè se-dyí-sɛ́ɖɛ́ìn-ɖɛ̀ kè wɛ́ ɔ kè gĩɔ kɛɛ—se nìɛ̀ mu ɖe fɔɔ. Baɓoɔ cɛ̃ɛ kà ɓɛ́ nyɔùn-dyù mu fɛ̀ɛ̀ múàùn dyi kpáìn kánáá pu ɖé páɖédà mú nɔ ɓóɖó-kpàà kɔ̃ɛ.
3. Xwɛ̀ m̀ ɓɛ́ìn hwòɖò-kɔ̃-dè-ɖɛ̀ ɓɛ́ Baɓoɔ nyíà nyɔ kɛɛ jè jàà poɛ cá kɛ́?
Nyɔ pàɖà dè ɖɛ nɔ̀mɔ̀ dyíin ɓè kpá jè hwòɖò kɔ̃, kɛɛ wa seɛ dyí dyuò jɛ́ɛ́ kɛbì wa hwòɖò-kɔ̃-dè-ɖɛ̀ɔ̀ mu náá jàà kpáùn ní. Ðɛ Baɓoɔ cɛ̃ kɛɛ kò ní. Ɓɛ́ à ké ɖɛ Baɓoɔ cɛ̃ kɛɛ jè jàà po cá ní, à mɛ “gmɔìn Geɖepɔɔ-cèè-ɖɛ̀ ɓèɔ̀ múin ɓó wé séín ɓaɖa.” (Àpɔ́sò 17:11) Kà nì muà Baɓoɔ cɛ̃́ìn nyɛɛ, m̀ mìɔùn muɛ gbɔ poɛ ɓɛ́ìn kɛbì nì mu ɖɛ ɓè Baɓoɔ cɛ̃ ɓá ɖé dyúa jè dyíɛɛ jàà poùn ní.
ÐE ÐƐ MÚIN CÁ
Gmɔìn ɖɛ ɖíɛ́ ɓè ɓɛ́ Baɓoɔ cɛ̃ ɓá ɖé dyúa jè dyíɛɛ múin. Dyé kà hwòɖò-kɔ̃-dè-ɖɛ̀ ɓɛ́ Baɓoɔ nyí nyɔ kɛɛ nì nyɔ ɓè gbo kpáuń zɛ̃̀ɛ̀ kɛ.
4. Baɓoɔ nyí nyɔ hwòɖò-kɔ̃-dè-ɖɛ̀ mɔ̀à sè-ná-sèɛ̀ fɛ̀ɛ̀ se kɛɛ ɖò ɓéɖéɛ
Dyé nyɛ́nɛ́ín-ɖáìn-ɖɛ̀ gbɛ̀ì-gbɛ̀ì ɓè ɓɛ́ Baɓoɔ cɛ̃ jèɛ. Wa nyɛ́ nɔ̀mɔ̀ m̀ hwìɖìi jɛ́ɛ́ cá kɛ́? Xwíníínɔ̀ nyɛ́ kɔ̃̀ jèɛ́?
Zà vɔ̀sì ɓè céèà ɓó nyɛ́nɛ́ín-ɖáìn-ɖɛ̀ ɓèa wáún wɛ̃ɛ wuɖuún, ɓɛ́ ɓè ké dyi-diè-ɖɛ̀ ɓè nìà kɛ dɔ́ɔ́ kɔ̃in dèìn:
Nì hwòɖò ɖá vɔ̀sì ɓè nìà kɛ nyí nyɔ hwòɖò-kɔ̃-dè-ɖɛ̀ɛ̀? Wa ɓɛ́ìn nì xwéɖé-dùɔ̀ kè nì ɓàto ɓè hwòɖò-kɔ̃-dè-ɖɛ̀ nyíɛɛ̀?
Nàìn ɓóɖó-kpà ɓɛ́ ɖɛ ɓè nìà kɛ nì kɔ̃ɛɛ kɔ̃ cĩ́ jè hwìɖìi
NYƆ ÐÒ SE . . . |
NYƆ SÉÍN MU . . . |
|---|---|
|
|
|
|
|
|
|
|
|
|
5. Hwòɖò-kɔ̃-dè-ɖɛ̀ nìà ɖé Baɓoɔ múɛɛ ɓɛ́ìn ɖɛ gbo zĩàìn
Nyɔ pàɖà hwòɖò kpá ɖé ɖei mɔɔ wa kpá dyoɖoún dyɛ̀ mɔ̀ùn ɓó fũ̀à-fṹá-ɖɛ̀ ɓè wa dyéà wa ɖeiɛɛ jè. Nyɔ ɖíɛ́ ɓè vɔ̃ ɓɛ́ wa ké ɖɛ gbo zĩàìn, ɓɛ́ ɔ ké dyíin nɔ̀mɔ̀. Dyé kà ɖɛ Baɓoɔ cɛ̃à kà ɓɛ́ ɖɛ ɓè mu dyíin nɔ̀mɔ̀ùn wɛ̃ɛ nyu nyɔ ɓè gbo kpáa kàùn wɛ̃. Po VÍÐÒƆ̀ kũ̀à gbo, ɓɛ́ ɓè ké dyi-diè-ɖɛ̀ ɓè kɔà ɓó dyíɛɛ dɔ́ɔ́ kɔ̃in dèìn.
Ðé víɖòɔ̀ múɛɛ, se-dyí-sɛ́ɖɛ́ìn-ɖɛ̀ɔ̀ nyɛ́ nyùìn ma Wàɖàfíkà fũ̀à-fṹá kɛ́?
Se-dyí-sɛ́ɖɛ́ìn-ɖɛ̀ ɓɛ́ ɔ dyé ma kɛɛ se ma dyi zi dyɛo, kɛɛ xwɛ̀ Baɓoɔ nyu ma ɔ gbo kpáa kɛ́?
Hwòɖò-kɔ̃-dè-ɖɛ̀ ɓɛ́ Baɓoɔ nyí nyɔùn ɓó ɖé dyúa bììɛɛ ɓɛ́ìn à gbo kpáa, ɓɛ́ à ké hwòɖò-ɖé-ɖei-po-ɖɛ̀ ɓè wɔ̃ zi kè ɓɛ́ à ké à fũ̀à-fṹá-ɖɛ̀ ɓèɔ̀ hwòɖò kùìn. Zà Nɔ́ɔ́ 17:22 kè Wóɖómà 12:12 wuɖuún, ɓɛ́ ɓè ké dyi-diè-ɖɛ̀ ɓèɛ̀ dɔ́ɔ́ kɔ̃in dèìn:
Nì hwòɖò ɖá bɔ̃̀ ɓáà hwòɖò-kɔ̃-dè-ɖɛ̀ nìà ɖé Baɓoɔ múɛ jè dyíɛɛ ɓɛ́ìn ɖɛ ɖò gbo zĩàìn ɖé nì cĩ́-cĩ́ɔ̀ mú kàùnǹ? Xwíníínɔ̀ nyɛ́ kɔ̃̀ jèɛ́?
NYƆ ÐÍƐ́ ƁÈ ÐÁ: “Ðɛ ɓè ɓɛ́ Baɓoɔ ɖáìn nyɔ nyɛ́nɛ́ín ɓó ɖé dyúa bììɛɛ, se jàà cá.”
Nì hwòɖò ɖá, xwíníínɔ̀ nyɛ́ kɔ̃̀ jè ɔ kpaà ɖɛ ɓɛ́ m̀ kéà múin gmɔìn nyɛ́?
SṸÌN-XWÍNÍÍN
Baɓoɔ nyí à hwòɖò-kɔ̃-dè-ɖɛ̀, ké ɔ kpá à gbo, ɓɛ́ à ké fũ̀à-fṹá-ɖɛ̀ ɓè hwòɖò kùìn dyììn ɖé hwòɖò-po-naín ɓɛ́ ɔ ɓéɖé múà kɛɛ jè cɛ̃-cɛ̃ mú.
Ðɛ-kɔ̃in-kpa-kpa
Xwíníínɔ̀ nyɛ́ kɔ̃̀ jè nyɔ ɓè mɔ́à hwòɖò-kɔ̃-dè-ɖɛ̀ kɛ́?
Ðɛ́ Baɓoɔ cɛ̃ ɓá ɖé dyúa jè dyíɛ́?
Xwɛ̀ hwòɖò-kɔ̃-dè-ɖɛ̀ ɓéɖé-ɓéɖé ɓó ɖé dyúa bììɛɛ, ɓɛ́ìn m̀ gbo kpáa kàùn wɛ̃́?
CƐ̃́ ÐƐ PÀÐÀ
Cɛ̃́ kpé ɓɛ́ hwòɖò-kɔ̃-dè-ɖɛ̀ ɓéɖéɛɛ jè.
“Hwòɖò-Kɔ̃-Dè-Ðɛ̀—Dɛ̀ M̀ Ɓɛ́ìn Dyéɛ Kɛ́?” (Wóɖó Nyíɔún!, Zágìɖìɔ̀ 22, 2004)
Dyé kà hwòɖò-kɔ̃-dè-ɖɛ̀ ɓó ɖé dyúa bììɛɛ ɓɛ́ìn nyɔ ɓè nì wɛ́ɛń mìɔ kɛɛ gbo kpáa kɛ.
“Gà-Dyé-Dyé Ðé Wɛ́ Ku Wɔ̃ Dò Xwaún—Baɓoɔ Ɓɛ́ìn M̀ Gbo Kpáà?” (Ðúú-kɔ̃-cèè-ɖɛ̀)
M̀ dyi víɖò-wɛ̀ɖɛ̀ nìà kɛ dyi dyé ní, nàìn hwìɖìi kà m̀ kè nì xwéɖé-dùɔ̀ nì fɛ̀ɛ̀ múàùn dyi kpáìn ɖé páɖédà ɓɛ́ Baɓoɔ ɖáìn nyɔ nyɛ́nɛ́ín nyɛɛ múɛ.
Zà kà se-dyí-sɛ́ɖɛ́ìn-ɖɛ̀ gbo-vɔ̃-nyɔ̀ ɖò fɛ̀ɛ̀ nyu ma gbo zĩàìn ti ɔ cɛ̃́ ma hwòɖò-kɔ̃-dè-ɖɛ̀ ɓɛ́ Baɓoɔ ɓéɖé ɓó ɖé dyúa bììɛɛ jè wuɖuún wɛ̃.