ˈCɩɛcɩɛ-kïbhëa 5

ˈSaa Lagɔ yɩbhä bhä dʋdʋkpäta a dɔˈwʋ ˈnɩ?

ˈSaa kä bhä ˈnglɩ ˈn Zoova yi bhä dʋdʋkpäta ˈwäla ˈnɩ? (1, 2)

ˈSaa kä bhä ˈnglɩ ˈn dʋdʋkpäta nɩ bhä zɩɛ ˈbhlɩ a -bhlɩɩ glɩnɩ ˈnɩ? (3)

ˈSaa ˈkä bhä ˈnyinylolinʋwa ghlɩ ˈnɩ? (4)

ˈSaa Zezwii ˈkä bhä bhäla guzuwa, -wa yɛɛ ˈku ˈwë -nyɛ gɔgɔwa ˈsɔ ˈwlu nʋ ˈnɩ? (5, 6)

Sɛ a ˈkä bhä ˈzʋ, nzɩ a ˈkä -li a -li ˈla ghlɩmö ˈnɩ? (7)

1. Nɩkpa ˈkä ˈkwädlɩkwädlɩnɩ ˈmäna ˈmö -bhölɩnɩ a za, Zoova ˈwäla dʋdʋkpäta. Nɩkpa wa zlɔnɩɛ ˈmö, ˈmö ɔ yɩbhää nɩɩ, wa nɩ -wʋ ˈmäna ˈmö ˈkwädlɩkwädlɩnɩ mäˈä dʋdʋ ˈwʋ. (Psaume 115:16; Isaïe 45:18) Dʋdʋkpäta ˈnaa ˈkä ˈyli bhɩɛ ˈlɩlɩlɩ, maa a yi ˈkwädlɩkwädlɩnɩ -bhölɩ ˈyize.—Psaume 104:5; Ecclésiaste 1:4.

2. Dʋdʋkpäta a dɛ -bhlʋ, -lɩbhä Lagɔ ˈzʋä ˈbhlɩ a -bhlɩɩ ˈwʋ ˈwëë, ˈn ˈɔ yiɛ bhäla nɩkpɛ -bhɛ. -Lɛ a bhlea ˈla, ˈmö ɔ laa Edɛɛnɩ a lagblɛ. -Lɩbhä ɔ ˈzʋä tɛkänɩkpɛ Adaa -nyɛ ɔɔ nglɔ Ɛɛvö ˈsɔ. Lagɔ ˈyɩbhä la nɩɩ wa nɩ gwälɩ ˈyuë, wa ˈkä mäˈä dʋdʋ ˈwʋ zumanɩ, nzɩ wa ˈkä pɛɛpɛpɛɛpɛ dʋdʋkpäta ˈwuë ˈbhlɩ a -bhlɩɩ ˈwʋ ˈzʋa.—Genèse 1:28; 2:8, 15.

3. -Blipäsɛ Adaa -nyɛ Ɛɛvö ˈsɔ -sɛɛ Lagɔ ˈa gbaa ˈklʋkpamö. Nza Zoova kpëtuë -mä Edɛɛnɩ a lagblɛ ˈmö. Zaa ˈbhlɩ a -bhlɩɩ yɛ a tʋʋ. (Genèse 3:1-6, 23) Maa ˈsaa Zoova yɩbhä a-a ɔ ˈkä dʋdʋkpäta ˈwʋ nʋ, ɔ ˈnɩɛ ˈwʋ dlʋnɩ. Sɛˈɛ ɔ gbä a-a nɩɩ dʋdʋkpäta ˈwuë nɩ ˈzʋ ˈbhlɩ a -bhlɩɩ, -mä nɩkpa ˈwuë ˈkää ˈkwädlɩkwädlɩnɩ -bhölɩnɩ. Sɛ ɔ ˈkä bhä ˈzʋ nzɩ dʋdʋkpäta ˈwuë ˈkä ˈbhlɩ a -bhlɩɩ ˈzʋ ˈnɩ?—Psaume 37:29.

4. ˈNyinylolinʋwa ˈmaa ˈkä ˈyli bhɩɛ ˈwë, ˈn dʋdʋkpäta ˈkää bhäla ˈbhlɩ a -bhlɩɩ zʋ. (Psaume 37:38) Lagɔ ˈa tʋʋ wa laa Amagedɔɔ, ˈmö ɔ ˈkää ˈmö ghlɛnɩ, nzɩ ɔ ˈkä ˈnyinyloli ˈyli bhɩa. Yɩ -kä -sɩbhä ˈplɩ ˈwë, wa yi Sataa -jie ˈmö ˈpä, ɔ yi ˈmö ˈylʋbö a 1.000 -bhlʋ -sɛ. Mɩɩ sɛ zɛmö nɩɩ, ˈnyinylolinʋnyɔ bhlʋ aˈbhë ɔ ˈkää dʋdʋ nyima, ˈnaa ˈkäaˈa -bhölɩɩ ˈlɩlɩlɩ. Lagɔ a -nʋa a ˈyize mʋa ˈkää tʋ ngli ˈwlʋ.—ˈKlʋkälɩwɛlɩɩ 16:14, 16; 20:1-3.

5. -Mi ˈla -kä ˈplɩ ˈwë, ˈn Zezwii Klii ˈkää mäˈä dʋdʋ ˈwʋ ˈkämanɩ -këë ˈylʋbö a 1.000 -bhlʋ ˈkä ˈplɩ. (ˈKlʋkälɩwɛlɩɩ 20:6) Pɛɛpɛpɛɛpɛ ɔ ˈkää -aˈa dlɩ zɛmö -nyɛ -aˈa kpökpa ˈmö ˈsɔ ˈnyinyloli -sɛ. Sɛ Adaa -nyɛ Ɛɛvö ˈsɔ -wʋ a-a ˈwlɩlɩ tɛɛtɛɛdɔˈwʋ ˈn wa yiɛ Lagɔ ˈklʋkpamö -sɛ, -sɩbhä -a ˈkää ˈwlɩlɩ plɛ. Gu lɩbhälɩbhʋ, gɔgʋʋ -nyɛ kwie ˈsɔ ˈnaa ˈkä -bhölɩ. Ɛˈɛ -bhö nyɩasɛ, maa guzuwa yi yɛmanɩ, gɔgɔwa yi ˈsɔ dɩkpö ˈwʋ ˈzʋnɩ.—Job 33:25; Isaïe 33:24; ˈKlʋkälɩwɛlɩɩ 21:3, 4.

6. Zezwii a ˈylʋbö a milɩ -bhlʋ a ˈkämanɔ a ˈtɛnyɩ ˈmö, nɩkpa -wa tɛɛnɩɛ Lagɔ dlɩ, mʋa ˈkää dʋdʋkpäta ˈbhlɩ a -bhlɩɩ ˈwʋ ˈzʋa. (Lwiikö 23:43) -Wa yɛɛ ˈku ˈwë a bäbätɛ yi -glu ˈwlʋ wa ˈkä mäˈä dʋdʋ ˈwʋ -bhölɩnɩ. (Tietiewaa a wɛlɩɩ 24:15) ˈN wa -kä ˈsaa Lagɔ yɩbhä nʋʋ, wa yi ˈkwädlɩ mäˈä dʋdʋ ˈwʋ -bhölɩnɩ ˈyize. Maa, ˈn wa nɩ nʋʋ, ˈyli wa ˈkää bhɩɛ ˈlɩlɩlɩ.—Zaah 5:28, 29; ˈKlʋkälɩwɛlɩɩ 20:11-15.

7. Ɛˈɛ -bhö nyɩasɛ, maa -mii Lagɔ yɩbhää ɔ ˈkä tɛkädɔˈwʋ mäˈä dʋdʋ ˈwʋ nʋʋ, ˈyli yɩ ˈkää ˈwlʋnɩ. A yɩbhä bhä a ˈkä -Li a -lii ˈla ghlɩmö -a? A kä a ˈkɩ ghlɩmö nʋʋ, a nɩ tɛlɩ sɛ a ˈkä Zoova yɩbhlɩnɩ ˈyize, nzɩ a ˈkä ˈsaa ɔ yɩbhää nʋ. Yi ˈkanyɩɛ kwänɩ miɛ nɩɩ, a -nyɛ Zoova ˈa bhlɩnɩwaa ˈsɔ, a nɩ yɩbhänɩ ˈgämö ˈwlu -mä ˈwa Lagɔ ˈa ˈkämanɔɔ a -budu -wʋ -wʋä -mä a yɔwʋ ˈmö.—Isaïe 11:9; Ebleewaa 10:24, 25.

[ˈFoto yɔwʋ ˈa wɛlɩkïbhëa, kpʋ 10]

ˈBhlɩ a -bhlɩɩ yɛ tʋʋ.

[ˈFoto yɔwʋ ˈa wɛlɩkïbhëa, kpʋ 11]

Amagedɔɔ -kä ˈplɩ ˈwëë, dʋdʋkpäta yi bhäla ˈbhlɩ a -bhlɩɩ zʋ.