ˈCɩɛcɩɛ-kïbhëa 6

ˈSaa -lɛ bhä Lagɔ ˈa ˈkämanɔɔ ˈnɩ?

Dɛɛ Lagɔ ˈa ˈkämanɔɔ glɩ bhä ˈnɩ? (1)

-Mɔ -lɛ bhä wʋ kämanɩnyɔ ˈnɩ? (2)

Nɩkpa -mumuë nyɔɔ ˈsɔ yi bhä ˈgämö ˈkämanɩ -a? ˈN nɩ -kä mii, -zɩmö wa -bhli bhä ˈnɩ? (3)

-Lii -mii tulanɩ bhä ˈylimö nɩɩ, ˈpɩwʋ a ˈyli bhɩɛ tɛnyɩ yɛ ghlɛ ˈnɩ? (4)

ˈSaa Lagɔ ˈa ˈkämanɔɔ ˈkä bhä bhäla nɩkpa ˈwlu nʋ ˈnɩ? (5-7)

1. Zezwii -wʋ a-a mäˈä dʋdʋ ˈwʋ la, ˈɔ ˈwʋ-bhlinɩwaa ˈmö ɔ ˈcɩa nɩɩ, wa nɩ bhibhe Lagɔ ˈa ˈKämanɔɔ a za. Wa -kä ˈkämanɔ nʋʋ, ˈbhlɩ a mɛ ˈkifii ˈkämanɩɛ -gömö ˈmö wa gaaa. Zaa, Lagɔ ˈa ˈKämanɔɔ, ˈwʋ dɛ wʋ -wʋä. -Mä zlɩ ˈmö -mä wʋ -wʋä, ˈn ˈwʋ ˈkää dʋdʋ ˈwuë -gömö ˈkämanɩ. Lagɔ ˈa nglɩɩ ˈmö wʋ ˈkää ˈghlimanɩ, nzɩ yɩ ˈkä ˈwlɩlɩ plɛ. ˈKämanɔɔ ˈla mu ˈkää ˈnglɩ -kä, ˈn Lagɔ ˈkää sɛ ɔ zʋä -mä ghäyɩ ˈwʋ, ɔ ˈkä -sɩbhä mäˈä dʋdʋ ˈwʋ ˈzʋmö.—Matie 6:9, 10.

2. Zezwii ˈmö Lagɔ nʋä ɔ ˈkä ˈɔ ˈKämanɔɔ a ˈkifii ˈwʋ ˈzʋa. (Lwiikö 1:30-33) Dɛ Zezwii -wʋ a-a mäˈä dʋdʋ ˈwʋ la, -mä ˈɔ -bhɛbhɛlii ˈmö, -mä ɔ tulanɩɛ ˈylimö nɩɩ, ˈkämanɩnyɔ a mɔ ɔ nɛnɩɛ, ɔ zlɔnɩɛ ˈmö, ˈmö ɔ kää glɩnɩ. Zezwii sɩbhä -mä zlɩ ˈmö ˈwlu, ɔˈɔɔ ˈKämanɔɔ ˈwʋ libhï cuu. (Ebleewaa 10:12, 13) Maa ˈkämanɔ Zoova nʋä ɔ ˈkä Zezwii yowʋ ˈnyɛ, ˈylʋba wa laa 1914 ˈmö ɔ nyɔnɔnyɩɛ yowʋ. Tɛɛnɩa -lɛ, Zezwii yiɛ -mä zlɩ ˈmö, ˈɔ ˈKämanɔɔ Zoova nyɔ yowʋ tɛɛ.—Daniel 7:13, 14.

3. Mäˈä dʋdʋ ˈwʋ a nɩkpa glaˈmö, -mä Zoova gbäzɩɛ nyɩbhɛlɩɩ -nyɛ ˈngwlɩɩ ˈsɔ -wa ˈtɛɛnɔɔ dlɩ, nzɩ wa ˈkä -mä zlɩ ˈmö mö. Ɛˈɛ -bhö nyɩasɛ, maa -zijlituwaa -nyɛ bʋbɔbʋbɔwa ˈsɔ wa ˈkää ˈzʋ, nzɩ wa -nyɛ Zezwii ˈsɔ wa ˈkä mäˈä dʋdʋ ˈwʋ a nɩkpaa ˈwuë -gömö ˈkämanɩ. (Lwiikö 22:28-30; ˈKlʋkälɩwɛlɩɩ 5:9, 10) Nɩkpa ˈla -wa -nyɛ Zezwii ˈsɔ ˈkää ˈgämö ˈkämanɩ, ˈmö ɔ laa “waˈaa -zu,” 144.000 wa -bhliɛ.—Lwiikö 12:32; ˈKlʋkälɩwɛlɩɩ 14:1-3.

4. Zezwii libhïä ˈɔ ˈkämanɔɔ ˈwʋ cuu, Sataa -nyɛ ˈɔ zuzukuzokuu ˈsɔ ˈmö ɔ kpëtiɛ -mä zlɩ ˈmö, ˈn ɔ yuë mäˈä dʋdʋ ˈwʋ sɛ bhlɩ. Tɛɛnɩa ˈylʋba wa laa 1914 ˈmö, mäˈä dʋdʋ ˈwʋ a -lii ˈwuë, ˈmö yɩ ˈtɛmanɩa. (ˈKlʋkälɩwɛlɩɩ 12:9, 12) -A ˈzʋ -mä tʋ -gwɩ gwɩɛ, ngɔmʋ, gwi ˈkädɩ, ˈnyinylolii yɩ ˈmänanɩ nɩkpa ˈwlu. -Lii ˈla ˈwuë mii “tulanɩɛ ˈyli ˈmö” nɩɩ, Zezwii yɛ ɔ ˈkämanɔ tɛɛ, ˈn ˈpɩwʋ a ˈyli bhɩɛ tɛnyɩ yɛ ghlɛ.—Matie 24:3, 7, 8, 12; Lwiikö 21:10, 11; 2 Timotee 3:1-5.

5. Sɛɛ wïlagänɩnyɔ dlinɩˈɛ ɔ wïla ˈylimöö, ˈn ɔ zʋˈɛ bhabhïlaa yɩ dɛ, ˈn ɔ zʋˈɛ wïla a -wïlaa ˈyɩ dɛɛ, -sɩbhä Zezwii ˈkää bhäla nɩkpaa ˈwuë -zijli tunɩ. Nɩkpaa -wa -nyɛ “bhabhïlaa” ˈwlʋnɩɛ, mʋa kää Zezwii a gbʋ dlɩ ˈwʋ. Mʋa lɛ kää ˈkwädlɩkwädlɩnɩ mäˈä dʋdʋ ˈwʋ -bhölɩnɩ. Maa nɩkpaa -wa -nyɛ “wïla a -wïlaa” ˈwlʋnɩɛ, mʋa panɩɛ Lagɔ ˈa ˈKämanɔɔ -gömö. (Matie 25:31-34, 46) -Lɛ ˈnaa ˈkää ˈmö gwälɛˈn zezwii ˈkää nɩkpaa -wa -nyɛ wïla a -wïlaa ˈwlʋnɩɛ, ˈyli bhɩa. (2 Tesaloniikö 1:6-9) A kä a ˈkä Zezwii a -nʋa -wa -nyɛ “bhabhïlaa” ˈsɔ ˈwlʋnɩɛ glɩnɩ nʋʋ, a nɩ -pʋnɩ Lagɔ ˈa ˈKämanɔɔ ˈa wɛlɩɩ ˈyukwli, nzɩ a ˈkɩɩ ˈmö nɛmönɩ.—Matie 24:14.

6. Dʋdʋkpäta ˈbhlɩɩ a -bɛ a -dlinɩɛ zɩɛ ˈylimö. ˈBhlɩɩ ˈla ˈwuë bhʋlʋbhlʋ yi kää yɩnyɩɩ a ˈkämanɩwa. ˈN yɩ kwäkwänɩɛ tʋ. Maa Lagɔ ˈa ˈkämanɔɔ muu kää mäˈä dʋdʋ ˈwʋ ˈa ˈkämanɔɔ a kii ˈwuë ˈyli ˈbhɩa, nzɩ wʋ ˈkä dʋdʋ ˈwuë -gömö ˈkämanɩ. (Daniel 2:44) Zaa ˈku lɩbhälɩbhʋ, tʋ -gwɩ gwɩɛ -nyɛ -glakäkʋ ˈsɔ ˈnaa ˈkäaˈa -bhölɩ. -Lɛ a ˈtɛnyɩ ˈla ˈmö, nɩkpaa ˈwuë dlɩ -bhlʋ wa yiɛ kä, wa kää -wanɩ ˈn wa kää ˈtɩɩ glɩ.—Mika 4:3, 4.

7. Zezwii a ˈylʋbö a milɩ -bhlʋ a ˈKämanɔ a ˈtɛnyɩ ˈmö, nɩkpa ˈwuë -wa ˈtɛɛnɩɛ Lagɔ dlɩ, yi ˈwlɩlɩ plɛ, ˈn dʋdʋkpäta ˈwuë ˈkää ˈbhlɩ a -bhlɩɩ zʋ. Zezwii kä ˈsaa Lagɔ yɩbhänɔ ˈylʋbö a milɩ -bhlʋ ˈmö zɛmö bhɩɛnɩ ˈwëë, ˈkämanɔɔ ɔ dɩba Lagɔ ˈnyɔ a-a, ˈmö ɔ ˈkɔ yowʋ ˈnyɛ. (1 Kɔlɛɛtɩ a -nʋa 15:24) -Lii -mii Lagɔ ˈa ˈKämanɔɔ ˈkää -bhɛ, -n bhɛnɩ -n kɩ -na -lowluwaa -nyɛ -na tuawa ˈsɔ ˈnyɛ.

[ˈFoto yɔwʋ ˈa wɛlɩkïbhëa, kpʋ 13]

Zezwii ˈa ˈkämanɔɔ a ˈtɛnyɩ ˈmö, -gblɩ ˈgblɛ -nyɛ nɩkpa a ˈmö -dlinɩ dlinɛ ˈsɔ ˈnaa ˈkä -bhölɩ.